Contra'l zarru d'Albo en Candás

El centru de Candás vivió ayeri al mediu día una manifestación de los y les trabayadores de la fábrica d'Albo, a la que se xunieron unos 300 vecinos y vecines en solidaridá según recueye asturiasverde.com.

La empresa de conserves ye la última que queda en Candás, llocalidá que na primer mitá del sieglu XX foi la capital de la industria conservera d' Asturies. Los y les trabayadores anunciaron que van lluchar pa que nun se pieslle una industria que nun sólo xenera un bon númeru de puestos de trabayu sino que tamién ye parte de la hestoria y la esencia de Candás.

José Luis Rendueles gana’l XII Concursu de Cuentos pola Oficialidá del Asturianu

Pablo Rodríguez y Xosé Lluis Campal, segundu y tercer premiu

José Luis Rendueles Antón foi'l ganador del Concursu de Cuentos pola Oficialidá del Asturianu, que convoca’l Conceyu Bimenes y qu’esti añu llegó a la so duodécima edición. El primer premiu, dotáu con 800 euros, foi pa la so obra “Atadures”. L’autor yá ganare esti mesmu concursu nel añu 1999.

El segundu premiu, dotáu con 500 euros, foi pal cuentu “La viesca de la nieve gris”, de Pablo Rodríguez Alonso, y Xosé Lluís Campal Fernández algamó’l tercer premiu, al que se-y apurren 350 euros, con “La pantasma’l pasáu”.

La entrega de premios va tener llugar na Casa la Cultura de Santuyano, de magar les 19’45 hores, el prósimu vienres, día 3. L’actu, nel que se fadrá llectura pública del cuentu ganador y que cuntará cola presencia de José Emilio González Aller, Alcalde de Bimenes, finará cola actuación del monologuista Carlos Alba, que representará la so obra “La matazuga”.

Güelpe d'Estáu n'Hondures

Secuestru del presidente d'Hondures y los embaxadores de Venezuela, Cuba y Nicaragua.

El presidente d'Hondures, Manuel Zelaya, alcuéntrase en Costa Rica, como ratificó per teléfonu a teleSUR. "La Fuerza Armada traicionóme" denunció. Según el so propiu testimoñu pela mañana d'esti domingu homes armaos entraron en so casa y col usu de la fuercia sacáronlu del país. "Toi en San José de Costa Rica, fui víctima d'un secuestru de dalgún grupu de militares hondureños. Nun creo que l'Exércitu te sofitando esta aición", dijo n'esclusiva a teleSUR.

Zelaya cree que esto "foi un complot d'una élite mui voraz, una élite que lo único que ta deseando ye caltener al país aislláu y con un extrem de probreza". El presidente secuestráu esti domingu dixo que "la cúpula de les FF.AA. triciónome, ultraxáronme, invadieron mio casa ésta mañana. Amenazaron con disparame, ye un secuestru brutal contra la mio persona, ensin nenguna xustificación".

Sobre'l so secuestru dixo "Xubiérome a un vehículu, lleváronme a la base aérea, xubiéronme a un avión". Zelaya eclarió que nun pdió nengún asilu en Costa Rica, "ye un secuestru" sentenció. Pesie al güelpe d'Estáu perpetráu contra elli Zelaya afirmó a a teleSUR que a dir "a Managua como presidente d'Hondures, el mio periodu fina en 2010" y mientres sigue siendo'l "presidente electu dende cualaquier llugar del mundu".

Tamién foi secuestrada la canciller d'Hondures, Patricia Rodas, nesta acción tamién foron capturados los embaxadores de Cuba, Venezuela y Nicaragua quienes tras ser golpiaos foron dexaos en llibertá. Pela so parte Rodas foi llevada a la base aérea de Tegucigalpa. L'embaxador de Venezuela n'Hondures Armando Laguna confirmó er teléfonu a teleSUR que foron secuestraos y golpiaos por integrantes de les Fuerces Armaes encapuchaos y armaos.

Rempuesta Popular

Frente a la casa presidencial entamaron a concentrase xente pa reclamar la presencia del Presidente de la República Manuel Zelaya. Según el director de l'Axencia Bolivariana (ABN), Freddy Fernández, quien s'alcuentra n'Hondures con motivu de la consulta democrática que s'efectuaría esti domingu.

“La organización popular ta concetrándose frente a la Casa Presidencial. Na ciudá vense columnes de fumo en dalgunos puntos, lo que demuestra la protesta de la xente por esta aición. Hai helicóteros sobrevolando la ciudá y fuerte presencia de militares con arma de guerra na casa presidencial”, detalló Fernández.

Fernández informó tamién que pel momentu tolos canales privaos de televisión y les emisores de radio, quitando los que tan col güelpe d'Estáu “sacáronlos del aire” y que nun hai nenún mediu qu'informando sobre lo que pasa na república centroamericana.

Trevín: “España nun s’entendería ensin Cuadonga”

El Delegáu del Gobiernu español n’Asturies, Antonio Trevín, asoleyó otra vuelta el so cuadonguismu ranciu mentantes la presentación d’un sellu de Correos conmemorativu del centenariu del Gran Hotel Pelayo. El que fora Presidente del "Principado" y alcalde de Llanes presentó'l sellu xunta l'abad de Cuadonga, Juan José Tuñón.

Va tiempu que yá nun sorprenden les manifestaciones que dende estremaes posiciones del nacionalismu español vienen alimentando la lleenda de Cuadonga como “cuna d’España” o, como diz Trevín, “esplica d’onde venimos y por qué somos asina”.

Si va tiempu que nun sorprende, si ye cierto que cada vuelta caltener esti discursu cuadonguista ye más difícil cola hestoría na man y el rídiculu del que caltién en plenu sieglu XXI que Cuadonga esplica España o que ye la so cuna ye evidente.

Los tiempos del cuadonguismu paez que nun finaron, paez que ye necesario afitar la españolidá d’Asturies al traviés de Cuandonga de xemes en cuando y lo que ye pior proyectar esa españolidá en base a lleedes históriques de la formación d'España y la distorsión de la historia d’Asturies. Nos tiempos nos que yá nin siquiera se fala del aniciu d’España cuando los denomaos reis católicos, cola xuntanza dinastica de los reinos de Castilella y Aragón, y cuando más bien pa falar d’España como tal hai que dir al s.XIX, el delegáu del Gobiernu español n’Asturies, mayestru y del PSOE, atrévese a caltener Cuadonga como mitu del españolismu y el cuadonguismu como arma.

Verdá, optimismu y paciencia.

Artículu de Mariu Arbesú.

Yera’l añu 98 cuando entame a arrimame a Andecha Astur. Fícelo porque nun me presta que naide nun decida por mi o trate de guiar el mio destín, ficelo porque quería ser llibre y porque pienso que ye posible una Asturies llibre, con una sociedá más activa, una sociedá con más capacidá de resistencia, una sociedá más decidida, menos conservadora, más valiente, una sociedá qu’aspire a poder escoyer en cada momentu democráticamente lo que más-y convien, una sociedá que defienda los sos intereses, que nun se dexe gobernar, que tenga voluntá propia, que defienda la so llingua, la so identidá cultural, que defienda’l so paisaxe, la so tierra, a la so mocedá, a los sos vieyos y vieyes, a los sos homes y muyeres. A la fín, una nación que defenda los sos intereses comunes.

Esa Asturies ye posible. Yá daquella percibí un ambiente de llucha nesi sen que de xuru consiguió animame y defechu na praútica ficeme militante nacionalista d’izquierda. Nos medios y na cai veiase qu’había conflictu y qu’había llucha: la resistencia los trabayadores de Duro Felguera enzarraos na catedral d’Uviéu, la fuelgona minera de xineru, la fola de declaraciones d’oficialidá n’algunos conceyos asturianos o’l recopilatoriu “L’Asturianu Muevese” son dalgunos exemplos del ambiente de actividá y resistencia que se vivia n’Asturies del añu 98.

De cara a entamar n’Asturies un movimientu organizáu dende una posición nacional, democrática y d’izquierdes les condiciones oxetives del añu 1998 a esta parte malpenes nun camudaron y por embargu ente dalgunes persones cunde’l pesimismu. Oxetivamente siguen esistiendo y dominando los mesmos grupos de poder económicos y políticos, los medios de comunicación son igual d’hostiles a cualaquier alternativa de cambéu y el marcu xurídicu-políticu sigue siendo’l mesmu. Ye dicir, oxetivamente nun tenemos porque pensar qu’otros tiempos fueron meyores o que yera más facil tresformar la sociedá d’aquella que agora mesmo, por embargu, posiblemente, lo que sí camudaron foron algunes condiciones suxetives: asina cada vegada siéntese a más xente ñegar les posibilidaes de cambéu alimentando mitos nel sen de que los asturianos “nun somos capaces”, “somos imposibles”, “nun somos a ponemos d’alcuerdu” ya eses coses.

¿Alguien imaxina a un oftalmólogu diciendo-y a un paciente que perdió parte de la visión tres un accidente que con esa incapacidá nun tien denguna posibilidá de salir alantre y que quedó plenamente inacapacitáu pa facer vida normal? Evidentemente non. Nel campu la melicina dizse que la persona nun ta enferma sinon que perdió salú. De lo que se trata ye de destacar qu’igual que naide nun tien plena salú tampoco nadie nun ta dafechamente enfermu. Destacar los aspeutos saludables de les persones y potenciar lo sano ye lo que promueve angüañu la melicina.

Poro, si continuamos col casu del paciente y el mélicu, tenemos un fechu oxetivu que ye, por exemplu, la perda del 30% de la visión d’un rapaz tres un accidente pero tenemos tamién otros fechos suxetivos que serán los que faigan a esa persona parase, reflexonar, reconocer la so nueva situación y ponese a lluchar por seguir medrando como persona o pol contrariu fundise nuna depresión ensin salida. Toos y toes coincidiremos ensin ser espertos na tema que la posible recuperación y la meyora na calidá de vida d’esi paciente va a resultar más fácil si conseguimos xenerar nélli esa actitú positiva ente esa nueva rialidá.

Poro, n’Asturies ye urxente entamar a potenciar lo sano de la nuesa sociedá. Na llinia de lo que tamos falando sería inutil nun reconocer qu’un problema de calter suxetivu que carez Asturies ye la perda del ego, la baxa autoestima, el complexu d’inferioridá.

Pienso que ye responsabilidá nuestra lluchar escontra esi pesimismu pa da-y la vuelta y convertilu n’optimismu. El pesimismu llevanos a la depresión, a la pasividá mentantu l’optimismu a la acción, a la actividá. Poro, tenemos de volcanos en xenerar y contaxar esi optimismu y activar la sociedá pero non sólo no teunolóxico o no productivo sinon no humano, no creativo, no ideolóxico y no político, pues una sociedá activa, ideoloxizada, creativa nun se dexa engañar y tien voluntá por sigo mesma.

Pues bien, si decimos que ta nes nueses manes xenerar eses condiciones suxetives al nuesu favor ye urxente que cada asturianu o asturiana que sienta la necesidá d’avanzar na reconstruición nacional d’Asturies entame a movese darréu pero teniendo en cuenta siempres les sos sensibilidaes, gustos y capacidades individuales. Caún tien d’atopar el so puestu en coherencia col so disfrute y talentu personal asina espoxigará la so autoestima personal y al tiempu la de toos y toes xuntes.

Los que yá somos nacionalistes d’izquierdes y militamos dende un grupu de música, un portal contrainformativu, un coleutivu escontra la represión, un sindicatu, un movimientu social o una organización política tenemos de tener nidio’l nuesu rol de dinamizadores, atopando y activando nuevos nacionalistes d’izquierdes qu’entamen a trabayar nel movimientu. Asina, faciendo 4000 kilometros cada añu buscando nes aules de secundaria, na universidá, nos nuesos barrios, pueblos y conceyos diremos creando la rede necesaria, la bas social de la que tanto falamos y na que nun habrá llugar pal pesimista, pal vagu o pol que tenga prises. Hai qu’armase de verdá, optimismu y paciencia. Yá lo dixo’l Subcomandante Marcos: la paciencia ye una virtú necesaria nos lluchadores.

Xueves a les 20 hores Concentración pa desixir l’esclarecimientu de la muerte del xoven David Blanco na comisaría de Policía de Xixón

El xueves a les 20 hores na plaza de la Ciudá de L’Habana, nel barriu xixonés de Moreda, los familiares y amigos de David Blanco, el xoven muertu na comisaría de la Policía Nacional de Natahoyo, convoquen una concentración pa dexisir l’esclarecimientu de les causes de la so muerte.

Los fechos vienen del día 26 d’avientu de 2008 cuando’l xoven David Blanco ye deteníu y lleváu al calabozu de la comisaría de Natahoyo, d’onde sal ensin vida.

Familiares, la compañera y vecinos de David convoquen pa mañana xueves esta concentración pa desixir una investigación independiente y rigurosa que conlleve la depuración de les responsabilidaes de la so muerte. Los familiares denuncien na mesma convocatoria que dende les autoridaes se quier pasar páxina al considerar la razón de la so muerte como causes naturales, mientres a la par los sos oxetos personales desaparecieron o miembros de la policía secreta prohibíen la entrada al tanatoriu a amigos y conocidos. Ellos dexen bien nidiu que «nun se creen eso de les causes naturales».

Estrayíu d'Aruelu.

¿Fraude electoral? comunicáu grupu d'apoyu a iniciativa internacionalista n'Asturies.

Énte la impugnación del escrutiniu del 7 xunu asina como de les elecciones mesmes, fecha por Iniciativa Internacionalista a nivel estatal, nós, el grupu d’apoyu a Iniciativa n’Asturies queremos dar a conocer públicamente les dificultaes que tuvimos n’Asturies antes, demientres y dempués de les elecciones al Parlamentu Européu.
Les primeres torgues produxieronse na Xunta Electoral de Zona n’Uviéu, onde’l tratu de la Secretaria foi enforma discriminatoriu, dexándonos “pal final” a la de xestionar cualesquier trámite, y sin entrar nes formes lo más destacáu foi la pérdida de fueyes d’apoderaos, lo que fixo retrasar toos estos trámites hasta’l sábadu día 6, esto ye, el día antes de les elecciones. En resultes de too esto el grupu d’apoyu contó con una menor rede d’apoderaos, faciendo asina más difícil el control nes distintes meses electorales.
Cola Xunta Electoral Provincial les torgues nun fueron menores, yá qu’una vez pasaes les elecciones y dientro los plazos que la llegalidá española otorga pa contrastar los escrutinios de les actes de les meses colos resultaos oficiales del ministeriu d’interior, al grupu d’apoyu nun se-y dexó ver eses actes, como tampoco se-y permitió l’accesu a los votos nulos, llegando a prohibir la entrada na sala en que se taba faciendo’l recuentu de les actes al representante d’Iniciativa Internacionalista, mientres nel interior de la mesma si taben los representantes del PSOE y del PP. P’acabar el secretariu de la Xunta Electoral Provincial ñegóse a roblar la quexa que presentamos énte toes estes irregularidaes.
Toes estes estorbises y l’oscurantismu col que se fixo’l recuentu de actes y comprobación de votos nulos dannos a entender que dalgo queríen ocultar. Nós lo que creyemos ye qu’un euroescañu d’esta candidatura sedría realmente dañino pa los intereses y la imaxen del Estáu Español n’Europa, yá que sedría un altavoz onde dar a conocer lo antidemocrático del Estáu Español, amás si l’Estáu considera una futura illegalización d’Iniciativa, ésta sedrá más cenciella ensin representación n’Europa.
Intentáronlo cola Llei de Partíos, colo que consiguieron retrasar y camudar la nuesa campaña, anque finalmente nun se llegó aplicar por tar el Tribunal d’Estrasburgo detrás y lo que ficieron foi distorsionar los resultaos del día 7. Fechu que pudo comprobase naquelles zones del Estáu que contaben con una bona rede d’interventores y apoderaos, na CAV (Comunidá Autónoma Vasca) el tresvase de votos llegó al esperpentu en llugares como Milagro (Araba) onde’l tradicional votu abertzale convirtiese en votos pal MSR, partíu d’ideoloxiía neonazi. Destacaos fueron tamién los tresvases de votos arriendes del código de partíu onde II-SP apaecía unes vegaes col númberu 29, otres col 30 y otres col 31, colo que nunca nun vamos saber hasta onde llegó’l baile de votos ente II-SP, UNA y DN que teníen los códigos de partíos penriba y perbaxo de II-SP.
Enxamás vamos saberlo pola falta d’información, desinformación na que collaboren los medios al serviciu del Estáu Español y el so capital, lo que llama ye qu’en llugares tan alloñaos como Irán nun haya duldes de pucherazu (no que cinca a los medios), naide lo discute, ehí sí hai información, dientro del caos qu’estos medios afalen cola repetición d’imáxenes sanguines o grandes semeyes en portada, hai información de primera. Nós, dende equí , nun sabemos si n’Irán hebo fraude, nun sabemos si los más de 11 millones de votos de diferencia ente Ahmadineyad y Musaví son resultáu del pucherazu, lo que nós dende equí sabemos ye que equí sí hubo fraude electoral y húbolo porque ta confirmao, demostrao y en parte correxío nel recuentu d’actes, ocurrió na CAV, cientos de votos volvieron a Iniciativa. Nel restu l’Estáu la falta d’interventores y apoderaos impide tener control de les actes colo que ye imposible saber hasta ónde llegó’l fraude electoral.
Esti fraude electoral ye’l que callen los mesmos medios que falen d’Irán, nun quieren informar de lo que ta pasando, nun quieren informar de la non coincidencia ente actes y resultaos oficiales, nun quieren informar del aumentu del 40% votos nulos, nin quieren informar de que se duplicaron los votos en blanco, estos últimos imposibles de comprobar. Y toa esta desinformación contrasta coles ganes d’informase que los distintos cuerpos policiales tuvieron demientres la campaña electoral alrodiu d’esta candidatura, con siguimientos en simples pegaes de propaganda electoral. Toos estos contrastes son los claroscuros de la “democracia” a la española.
¡¡PUXA ASTURIES LLIBRE!!
¡¡PUXA LA LLUCHA!!

Ñaz l`Asamblea contra`l TAV n`Asturies

Un grupín de persones que tamos a la contra del Tren d`Alta Velocidá y del modelu económicu capitalista vamos xuntamos el miércoles a les nueve nel local L'Arcu la Viella (Uviéu) col enfotu de crear una Asamblea Contra`l TAV n'Asturies.

Hai delles coses interesantes que falar y aiciones que mos prestaría entamar col vuestru sofitu.

Esta vegada queremos adelantamos al trazáu del tren d´alta velocidá de la Costa, y non quexamos depués.

Animamosvos a que-vos paséis perellí a discutilo.

Sobren les razones...Tovía tamos a tiempu.

Valoración Elleiciones Euopées 2009 d'Andecha Astur

MALOS RESULTAOS ELLEUTORALES

Cuantitativamente falando Andecha Astur obtuvo unos malos resultaos elleutorales y estos habrá qu’analizalos fondamente, selemente y criticamente pero teniendo en cuenta que yeren mui previsibles y qu’en gran parte son espresión o consecuencia de la situación de bloquéu na que s’afaya Andecha Astur dende l’añu 2006 cuando un grupu d’escindidos decidió dir haza otru proyeutu intentando illexítimamente la lliquidación d’Andecha Astur y xudicializando dempués la vida del nacionalismu asturianu d’izquierda.

Persabíemos qu’acudíemos a estes elleiciones nel pior escenariu posible, y cualisquier valoración tien que faese de magar esta rialidá.

BON TONU DE LA ORGANIZACIÓN.

Nel tarrén práuticu, pa lo que sí valieron estes elleiciones foi pa comprobar el bon tonu d’Andecha pesia les innegables carencies, contrastando los pocos recursos de los que disponemos cola capacidá rial de la muerganización y resaltando especialmente la capacidá de reaición y rempuesta frente a los pilancos que se mos punxeron; nun tiempu recor y nuna situación bien abegosa, siendo quien a algamar los avales precisos pa iguar la nuesa presentación a les elleiciones, y metanes de la campaña elleutoral respondiendo a trafullos xudiciales y desesperaos intentos d’evitar la nuesa presencia nesta convocatoria elleutoral. Too ello mentes se llevaba alantre una campaña na cai que mos fexo tar presentes socialmente superando l’avezada marxinalización que carecemos por parte de los medios de comunicación.

Nesi sen, estes elleiciones suponen l’entamu d’una nuea dinámica d’actuación, una vuelta queda perafitada la capacidá política y muerganizativa d’Andecha Astur y, lo más importante, la voluntá de los sos militantes de continuar defendiendo’l proyeutu que representa.

PERDA DE CREDIBILIIDÁ DE LA IZQUIERDA NACIONALISTA

Per otru llau la perda de credibilidá de la izquierda nacionalista n’Asturies nos caberos años polos motivos enantes siñalaos relativos a la táutica d’acosu llegal al que miembros de la UNA vienen sometiendo a Andecha Astur ye otru aspeutu que mos afeutó mui negativamente pero del que remanez un aspeutu mui positivu y ye que demostróse que nadie nun pue medrar a costafecha d’intentar lliquidar a Andecha Astur. Esa táutica nun algama bonos resultaos y los sos responsables tienen qu’abando­nala darréu porque queda nidio que xenera un perxuiciu mutuu que, de nun ser eso lo que persigue, namás ye desplicable pola torpeza de los sos autores.

Asina rescampla la incapacidá d’Unidá / UNA pa costituyise como referente ellectoral viable y «pragmáticu» qu’hexemonizara’l campu «asturianista» talo y comu vendió’l so proyeutu dende un principiu, y la costatación de que yá nestos intres nun tienen posibilidaes de ser namás qu’unes sigles más nel dispersu tarrén políticu elleutoral asturianu, ta prevocando nesta formación una descomanada agresividá escontra Andecha Astur, a quien de dalgún mou pretenden culpar del so fracasu, incapaces d’asumir qu’el so proyeutu, si ye que lu tienen, nun son quien a tresmitilu a la sociedá. Esta frustración, ye entá mayor nel seutor escindíu d’Andecha Astur que quinxo facer valir, dientru d’esi proyeutu ellectoralista, la so falsa condición de representantes d’Andecha Astur, a la qu’illexíti­ma­mente pretendieron esaniciar.

ANDECHA ASTUR EN SOLITARIO Y COMPITIENDO CON OTRES CANDIDATURES D’IZQUIERDA NACIONALISTA CON POSIBLIDAES REALES

Andecha Astur acudió en solitario a estes elleiciones por condicionantes esternos, non por voluntá propia. Por esti motivu valoróse in estremis presentamos en solitario tomando una decisión politíca perdifícil y valiente que mos permitió siguir esistiendo nel mapa politicu estatal y asturianu como un proyeutu más y, sobre tou, que mos permitió evaluar y comparar la nuesa situación particular respeuto al restu de formaciones.

Toviemos que competir con dos coaliciones estatales d’ámbitu independentista d’izquierda qu’’amás cuntaben con posibilidaes d’algamar representación: Iniciativa Internacionalista y Europa de los Pueblos, coalición esta cabera cola qu’Andecha Astur llevaba trabayando estos cincu años, y pa la que tenía ganao una credibilidá social que precisamente esperábase rentabilizar nestes elleiciones, pero que les circustancies fixeren que contabilizaren a la escontra de nós mesmos. En cuantes a Iniciativa Internacionalista hai que conseñar que munchos militantes y simpatizantes de la izquierda independentista asturiana magar que se presentaba Andecha Astur consideraron más rentable apoyar esta opción como una oportunidá única y aprovechable pa facer un votu de refuga a la llei de partios.

Con too y con esto, por si fuera poco otres dos candidatures más d’izquierda estatal PCPE y Izquierda Anticapitalista ficieron campaña n’Asturies suponiendo un ellementu más na dispersión del votu d’izquierda.

UN ANALÍS MAS XENERAL

A naide nun-y escapa qu’otra de les concluxones obligaes d’estes elleiciones ye’l progresible avance del españolismu y de la drecha (PP, PSOE) y de la ultrraderecha (UPD, DN. FRENTE NACIONAL), asina comu la falta de motivación d’una parte importante de la sociedá asturiana esencialmente d’izquierda y críticos col sistema qu’o bien nun participa elleutoralmente, vota en blanco o vota a opciones tipu PACMA.

D’otramiente rescampla tamién la inesistencia n’Asturies d’un espaciu elleutoral nacionalista o asturianista qu’enfrente o asuma una taútica esclusivamente nacional (PAS y URAS nin siquier se presentaron a les elleiciones) por embargu sí se reflexa la esistencia d’activos nacionalistes d’izquierda (AA, UNA, II, EpD).

Los resultaos nun son bonos pa denguna de les formaciones o coaliciones que se mueven elleutoralmente nel ámbitu de la izquierda nacionalista y de la izquierda alternativa n’Asturies asina vemos que los resultaos d’Andecha Astur, PCPE, Iniciativa Internacionalista, UNA, Europa de los Pueblos ya Izquierda Anticapitalista son en tolos casos perbaxos y mui asemeyaos en porcentaxe. Denguna d’estes formaciones nun destaca perenriba les demás y eso sitúamos “nun empate a ceros” o “empate ténicu” que mos invita a facer una reflexón en cuantes que faese evidente la necesidá d’avanzar políticamente haza táutiques de llucha basaes nun entamu de xunidá d’aición.

XUNIDÁ D’AICÍÓN COMO APUESTE TAÚTICU

Andecha Astur apuesta ensin condicionamientos previos por xenerar esos espacios xunitarios d’alderique y trabayu con una dinámica propia, ensin tar marcaos por criterios elleutoralistes y nesi sen trabayaremos y contautaremos con toes aquelles organizaciones y colleutivos que seyan receptivos a esta táutica.

Entendiendo por Xunidá d’Aición el trabayu apautáu que resulte de la puesta a comuña de puntos de coincidencia mínimos que compartamos les organizaciones, persones y coleutivos que voluntariamente decidamos involucramos nesta nuea tauticá xunitaria, respetando siempres les identidaes y peculiaridaes propies de les formaciones sociales o polítiques que quieran compartir esi espaciu común.

Andecha Astur atalanta qu´agora mesmo nun ye rialista plantegase coaliciones o xuntances elleutorales y lo que se propón ye entamar dende la base conociéndomos, escuchándomos y afitando rellaciones de respetu que propicien el trabayu conxuntu ente los axentes más activos de la sociedá asturiana que-y dea puxu a l’activación de nueos axentes sociales y políticos.

Andecha Astur considera que de magar esa Xunidá d´Aición pue xenerase la necesaria reactivación de la sociedá asturiana na defensa de los sos llexítimos drechos ya intereses, afitando´l necesariu procesu de recostruición nacional y social d´Asturies.

Andecha Astur colos trabayadores de Vesuvius

Militantes d'Andecha Astur de dellos conceyos participaron na movilización qu'aconceyó a cientos de persones pol futuru de la fábrica de Vesuvius.

Miembros de los Conceyos d'Andecha Astur de Llangréu, Sieru, Noreña y Uviéu sofitaron güei la marcha que los trabayadores de Vesuvius ficieron dende Riañu (Llangréu) a Uviéu y la concetración que caltuvieron delantre la Xunta Xeneral.

La marcha salió de Llangréu a les 8:30 hores y llegó pasaes les 13:00 hores a la Xunta Xeneral.

La multinacional pretende zarrar les sos instalaciones n'Asturies pese a ser rentable dafechu cola disculpa de la cris.

Andecha Astur yá s'aconceyare colos trabayadores na fábrica al entamu'l conflictu ufiertándo-yos tola ayuda posible y tresmitiéndo-yos tola nuesa solidaridá y sofitu énte tán dura situación.

Andecha Astur va siguir solidarizándose y sofitando no que pueda tanto a los trabayadores de Vesuvius, como a los demás trabayadores en llucha na Cuenca del Nalon y n'Asturies.

Facemos nuesu'l glayíu de los trabayadores de Vesuvius "RESISTIR YE VENCER".

"Imposible" normalizar les rellaciones Cuba-EEUU si nun se llibera a "Los Cinco"

El presidente de l'Asamblea Nacional del Poder Popular de Cuba, Ricardo Alarcón, alvirtió de que va ser "imposible" normalizar les rellaciones con EE.UU hasta que nun llibere a los cinco axentes cubanos presos dende hai más d'una década.

Alarcón fexo etes declaraciones a la cadena estaounidense CNN n'Español, dempués de que'l Tribunal Supremu d'EE.UU refugare'l llunes atender una apellación presentada polos conocíos como 'los cinco' pa que'l so xuiciu se repitiere fuera de Miami, dao qu'aleguen falta d'oxetividá del xuráu nesta ciudá.

"Yo pienso que ye inconcebible, imposible, imaxinar una rellación normal ente EE.UU y Cuba mientres los nuesos cinco compañeros permanezan en prisión", señaló Alarcón, retruicando a Barack Obama, que faló de "rellanzar" les rellaciones ente Washington y L'Habana

"Teníen qu’escorrer a gorrazos a los sindicatos minoritarios" Antonio Pino (CCOO)

REACCIONES TRES LA SENTENCIA CONTRA LA CARRERA PROFESIONAL

La sentencia qu’anula la "carrera profesional" de los funcionarios del Principáu nun va ser recurrida pol Gobiernu asturianu. Pa los sindicatos CCOO y UXT la decisión tomada pol TSXA nun ye del so gustu y retruquen a los sindicatos denunciantes que-yos tenien que "correr a gorrazos" los funcionarios públicos. USO tamién se desmarca del llau d’UXT y CCOO.

L’alcuerdu algamáu ente’l Gobiernu d’Areces y los sindicatos CCOO y UXT n’avientu del 2006, foi aprobaú en mayu del 2007, dies enantes de les eleiciones nacionales nes que Vicente Álvarez Areces foi relexíu. Esi alcuerdu remuneraba a gran parte de los 14.000 funcionarios con ente 1.800€ y más de 6.000€ pa toos aquellos que roblaran un alcuerdu qu’entá nun tenía base xuridica.

Asumiendo la falta de base xurídica, Migoya sorrayó que "por eso establecimos el pagu a cuenta y por eso enxamás lo nomamos carrera, nomándolo desarrollu profesional". Migoya intentó salir del pasu en tomar la decisión d’adelantar el pagu de la carrera profesional ensin base dala llegal "basándonos na voluntá del Gobiernu (PSOE) de sacar alantre la petición de los trabayadores y na bona fe de les partes".

Migoya, aseguró a los funcionarios que nun tendrán que reembolsar el dineru cobráu hasta agora, que va de más de 6.000 euros a 1.680 euros, nun intentu de desviar l’atención sobre l’asuntu, siendo esta la so irresponsabilidá na xestión del procesu xunto al conseyeru d’economía, Jaime Rabanal, como sorrayen dende’l COFPA.

Demientres los secretarios xenerales de los sindicatos firmantes d’una carrera profesional ensin base xuridica, CCOO y UXT espetaron a les organizaciones demandantes (seis sindicatos (CSI, FSP-UGT, FETE-UGT, CCOO, ANPE y USIPA) y Unidá Nacionalista Asturiana) d’"irresponsables" e "impresentables" y de perseguir "únicamente" dir contra l’Executivu del Principáu, d’UXT y de CC OO. Antonio Pino, secretaríu xeneral de CCOO solliñó"ensin camentar qu’en realidá perxudiquen a 14.000 trabayadores que los teníen qu’escorrer a gorrazos a toos". Nel sindicatu CCOO, la so estaya d’educación ta posicionada nidiamente a la contra de la "carrera profesional" siendo ún de los demandantes de la citada carrera.

Estrayíu d'Aruelu.

La versión beta del traductor automáticu pal 2010

La Universidá d'Uviéu y l'Academia de la Llingua, col sofitu de la Conseyería de Cultura del Principáu, tan desendolcando un programa informáticu de traducción automática del asturianu al castellán, que podría tener lista una versión beta pa 2010.

Asina lo fizo saber la Conseyera de Cultura na rueda prensa porsterior a la robla del alcuerdu cola Universidá d'Uviéu pa la traducción per parte de la polémica Unidá de traducción de los tetosque se presenten en Llingua Asturiana na institución académica.

Vesuvius en llucha

Los trabayadores de Vesuvius intensifiquen les movilizaciones en defensa de la continuidá de la fábrica en Riañu y fain frente a un casu claru de desllocalización que trai 100 emplegos directos ya otros munchos indirectos na Cuanca del Nalón. Si esti martes cortaron toles salides d’Asturies per carretera güei pela mañana marcharon dende Riañu a Uviéu xunta dellos cientos de persones.

Cientos de persones sofitaron a la plantiya de Vesuvius nuna marcha vindicativa dende la fábrica de la multinacional en Llangréu fasta les puertes de la Xunta Xeneral. La marcha salió de Riañu pasaes les 8:30 hores y finó pasaes les 13:00 hores delantre la Xunta Xeneral. Ellí un bon garrapiellu xente recibió a los trabajadores y los solidarios y solidaries.

Pel camín, munches foron les persones que dieron puxu y salidarizáronse al pasu de los manifestantes dende los sos vehiculos o dende les sos cases. L'españíu de petardos intensificóse a la enmtrada d'Uviéu pela Tenderina y tamién foron más los que dende les sos cases animaben dende les cases. La marcha taba convocada pol comité d’empresa (CCOO mayoritariamente y UGT) y sofitáronla vecinos de Llangréu, trabayadores de Diasa, xente de CSI, Andecha Astur o PCPE ente otros.

La concentración delantre de la Xunta Xeneral caltúvose demientres una hora, lo que duró un conceyu que dellos voceros de los trabajadores caltuvieron nel interior, y a ella sumáronse abondos uvieinos y uvieines que querían solidarizase colos trabajadores en llucha. L’árbitru internacional llangreanu Manuel Mejuto González tampoco nun perdió la ocasión de solidarizáse colos sos vecinos y tuvo presente na concentración.

Les movilizaciones van siguir mentanto nun se garantice la continuidá d'una fábrica que rentable y el cientu de puestos de trabayu que tán en xuegu.

Cada vuelta son más les movilizaciones obreres n'Asturies énte la fola de despidos, regulaciones d'emplegu o cierre d'empreses. Na cuyuntura socio-económica d'anguañu too indica que tamos énte un momentu de repunte de la conflictividá social.

www.infoasturies.net

CSI ta presenta en La Coruña güei escontra l'acosu llaboral de Banesto.

Güei 17 xunu hebo una concentración frente la sede de Banesto en La Coruña na que participó el sindicatu asturian de clas Corriente Sindical d'izquierda. Los trabayadores y sindicalistes protestaron poles amenaces, presiones y despidos que tan sofriendo dientru la empresa.

Federación nazional-Socialista Asturiana

Artículu de Xune Elipe.

La pérdiga d’argumentos de los detractores de la normalización y oficialidá de la llingua asturiana ye más qu’evidente nestos últimos años. Escomenzaron colo de que nun esistía mesmamente un idioma propiu d’esta tierra, depués pasaron a lo de los milenta bables, más tarde sacaron aquello de que yera articifial, llueu abellugáronse tres la falacia de que nun había demanda, col tiempu inventaron lo de que diba ser carísimo, y d’ehí llegaron a lo de la imposición. Últimamente tán los mandamases de la FSA toos esprecetaos por facer llegar a la ciudadanía’l mensaxe de que detrás de “lo del bable” hai otros intereses ocultos, unos fines realmente macabros y espantibles que perxudicaríen la convivencia pacífica ente asturianos. Por eso s’oponen tan xabazmente a la oficialidá, por cuidanos a toos d’esi monstruu que quedaría llibre si llegare a promulgase tala reconocencia. Namás dende la falta d’argumentos intelixentes y lóxicos pue entendese esta posición, nun-yos queda más que’l recursu al mieu.

Esti emplegu del mieu irracional como elementu del xuegu políticu ye’l mesmu (con toles distancies que se quieran) qu’utilizaron los nazis colos xudíos na Alemaña de los años cuarenta; el presentar a un grupu determináu como un peligru llatente pal restu de la sociedá ye la mesma filosofía que tán esponiendo anguaño los responsables políticos d’Asturies. Palabres como les de Javier Fernández o Fernando Lastra asina lo afita: dicir que la oficialidá llevaría l’ascensu del “nacionalismu escluyente” (como si’l d’ellos nun lo fuere), o que supondría la obligatoriedá (cásique a sangre y fueu) del asturianu, respuende al mesmu pensamientu intransixente y represor d’aquellos que quixeron ser los amos del mundu. Nun reconocer un derechu a una mayoría o minoría de ciudadanos cola sida de qu’eso diría en detrimentu de la llibertá de los otros ciudadanos, ensin prueba nenguna y col únicu argumentu del “porque yo lo digo”, tien un nome: autoritarismu. La utilización del mieu ye l’últimu recursu de les dictadures; ye la fase que tamos viviendo anguaño n’Asturies (“cuidáu con estos del bable que detrás d’ellos hai unes fuercies malignes que son les que realmente mueven los filos…”).

La so “solución final” a esti problema (pa ellos únicamente) de la llingua asturiana yá taba pensada y pactada: nun yera otra qu’aquello del “patrimoniu llingüísticu” de la reforma del Estatutu fallada. Convertir esta llingua nesa patraña llegal supondría cenciellamente firmar la so partida de defunción. Habrá daquién que piense qu’esta comparanza ye escesiva y hasta una barbaridá, pero non menos que les fataes y babayaes que tenemos qu’aguantar los defensores del nuestru idioma, como aquella de que “detrás del bable vienen les metralletes” que dalgún d’estos bienpensantes soltó ensin ponese coloráu hai un tiempu. Pa esti añu, en Halloween, voi amazcarame de bable… ¡uuuuiiiii, qué mieu! Mentanto, pasa a la resistencia.

SOFITU énte l'agresión policial a un independentista

El Muerganu Antirrepresivu Popular Sofitu quier denunciar publicamente l'agresión sofrida por un militante independentista el pasau xueves n'Uviéu.
A la salida de la so casa foi aparau por un miembru de la policia expañola al gritu de "terrorista" "Dejuana" y "esto es ejpaña" pol fechu de llevar una camiseta que pon "Euskal Herria" ya introducíu nel coche onde, nun-y veia naide, el nazi-onal dedicose a pega-y tortazos.
Ye la tercera vegada qu'esti personaxe apara y amenaza a esti mozu independentista y a la vista de que nun llogra el so oxetivu d'amedrenta-y ya pasó a l'agresión fisica.
Dase'l casu, unu mas, qu'esti miembru de les fuercies d'ocupación expañoles tién un pasau vinculau a movimientos neo-nazis ya que militó nes "Brigadas Azules" , aficionaos neo-nazis del Uviéu, y onde yera conocíu pola so afición a degollar gatos.
Recordamos que la ideoloxía independentista nun ye illegal, neto que la solidaridá internacionalista pa con Euskal Herria, pola contra, si que ye delitu l'agresión, les amenaces, l'abusu d'autoridá y la ñegación del holocausto.
Saludamos el valor del compañeru a denunciar esta agresión anque ponemos en dulda l'actuación d'ún xulgau escontra les sos propies fuercies policiales (ya vemos el casu de los Mossos) ya que n'estos xulgaos impera un coorporativismu xabaz nel que nun se pón n'entredichu l'estau de "drechu" condergando a policies.
La solución ye cenciella: ¡fuera les fuercies d'ocupación!

PUXA ASTURIES LLIBRE Y ANTIFACISTA
¡QUE COLÉN!

Basta de despidos. Queremos Trabayu

Esti próximu sábadu ta convocáu un manifestamientu n'Avilés escontra la crisis.

Trabayadores de la empresa KONECTA, trabayadores de TSK, de Mecafran, de Aleastur, de la hostelería d’Avilés, monitores de les piscines d’Avilés, despedíos de Daorje... convoquen xunta sindicatos como CSI y CGT, organizaciones polítiques como Andecha Astur, PCPE, UNA o PCA y dellos coleutivos .

Si el sábadu pasáu trabayadores d'empreses en conflictu na Cuenca del Caudal entamabe una manifestamientu, eti sábadu son los d'empreses de la Comarca d'Avilés los que van salir a la cai xunta organizaciones abondo pa vindicar trabayu y protestar pola escaladade despidos.

La salida ye de la Plaza'l Vaticnu (La Sindical) n'Aviles a les 12:30 hores. La convocatoria conxunta faise baxo'l manifiestu que reproducimos darréu:

Les coses van permal. Na comarca d’Avilés tenemos 15.000 persones en paru, n’Asturies vamos camín de les 100.000 y nel Estáu español pasamos de los 4 millones.

Los despidos cuéntense per millares, los Espedientes de Regulación d’Emplegu (ERE) por docenes y el 35% de los paraos y paraes yá nun cobren un res.

Va unos meses, el Conseyeru de Trabayu, Graciano Torre, llamaba “salvajes” a los trabayadores d’Asturmasa porque la fuelga que teníen prevista podía provocar la parada d’un fornu altu de Veriña. Agora, Arcelor nun sólo nun paró esi mesmu fornu, sinon que tamién paró la mitá de les bateríes de cock, forzó un ERE a la totalidá de la plantiya, conxeló los sueldos y ta entamando un procesu pa prescindir de toles empreses auxiliares. ¿Quién ye agora’l xabaz?. Facer una fuelga pa defender el puestu de trabayu nun ye denguna xabazada, la verdadera xabazada ye ser Conseyeru de Trabayu y dar la espalda a miles de trabayadores que s’enfrenten al paru y la probeza.

Pero nun ye sólo Arcelor, Cristalería intenta implantar el so tercer ERE y zarrar el Llaboratoriu, Alcoa va conxelar los sueldos dellos años y ampliar la xornada llaboral, DuPont va menguar la so plantiya, na Asturiana de Zinc la defensa d’un conveniu xustu conlleva xuicios y represión pa los trabajadores, Aleastur acaba de presentar un ERE que s’amesta a muchos otros comu’l de Daorje, n’empreses como Mecafran, con carga de trabayu asegurada pa dellos años, tan echando hores estres ensin control, nel Ayuntamientu d’Avilés el conflictu ente los y les monitores de les piscines y el Gobiernu municipal sigue abiertu, el sector de la pesca funde pocu a pocu, los comercios cierren ún tres otru, la construcción yá perdió miles d’emplegos y na hostelería les condiciones llaborales son cada vuelta más precaries.

Sin embargu, la cris nun tien les mesmas consecuencies pa tol mundu igual. El paru medra descontroladamente, los salarios nun lleguen a fin de mes, munchos/es trabayadores acaben la prestación por desemplegu, pierden les sos viviendes y yá entama a faltar la comida en munches cases. Pero, mentanto, los bancos publiquen beneficios multimillonarios y siguen recibiendo miles de millones d’euros del dineru públicu.

Y, aprovechando la situación, la gran patronal y los sos gobiernos intentan llevar alantre una reforma llaboral p’algamar el despidu de baldre, la conxelación de sueldos, el aumentu de la xornada llaboral, el retrasu de la edá de xubilación y la reforma del sistema de pensiones.

Pero el problema de fondu ye, ensin dulda, el modelu de produición capitalista, basáu esclusivamente nel crecimientu económicu a toa costa, pal beneficiu d’unos pocos. Ye necesario cambiar esti sistema de produición por otru distintu, cuyo fin seya repartir la riqueza y satisfacer les necesidaes humanes.

Nun podemos dexar que les coses sigan pel camín que van. Ye necesario que nos movilicemos, que salgamos a la cai y avancemos haza una fuelga xeneral, como ferramienta pa garantizar:

- Trabayu dignu pa toes y toos.
- Si nun hai trabayu, prestación por desemplegu indefinío.
- Renta básica indefinío.
- Salarios y pensiones mínimes de 1.000 euros.
- Derechos básicos pa toles ciudadanes/os, garantizaos pol Estáu (alimentos, salú, vivienda y educación).
-Nacionalización de la banca.

CONVOQUEN: trabayadores de la empresa KONECTA, trabayadores de TSK, de Mecafran, de Aleastur, de la hostelería d’Avilés, monitores de les piscines d’Avilés, despedíos de Daorje, Confederación General del Trabajo (CGT), CSI-Arcelor, Corriente Sindical d’Izquierda (CSI), PCA n’Avilés, PCA en Corvera, Andecha Astur, PCPE, CJC-CMC, UNA, Unión Proletaria, El Militante, Sindicato de estudiantes, UJCE.

XIII Fiesta de la Oficialidá de la Llingua Asturiana

EL Conceyu Bimenes entama del 26 de xunu al sábadu 4 de xunetu de 2009 la Fiesta de la Oficialidá de la Llingua Asturiana qu'esti añu llega a la so decimotercer edición con un programa petáu d'actos y actividaes. El Pregón esti añu ye de Roberto González-Quevedo González, escritor, filósofu, antropólogu y Secretariu de l’Academia de la Llingua Asturiana.

La fiesta zarrala'l sábadu 4 un conciertu de Los Gatos del Fornu, Los Ciquitrinos y DJ15. El programa d'actos de la XIII Fiesta de la Oficialidá de Bimenes ye'l que vien darréu:

• Vienres 26 xunu na Casa la Cultura a les 20’00 hores.

Presentación del programa d’actos de la XIII Edición de la Fiesta de la Oficialidá de la Llingua Asturiana.

• Miércoles 24 xunu – miércoles 8 xunetu na Casa la Cultura 16’00 - 20’00 hores.

Esposición de les obres presentaes al “VI Concursu de Cómic n’Asturianu de la Comarca de la Sidra”.

• Xueves 2 xunetu na Casa la Cultura a les 20’30 hores.

Teatru. Representación de la obra “Ello yera una vez…”, a cargu del Grupu de Teatru Carbayín.

• Vienres 3 xunetu na Casa la Cultura

19’45 hores. Entrega de premios del “XII Concursu de Cuentos pola Oficialidá del Asturianu”.

20’30 hores. Monologuismu. Representación de la obra “La matazuga”, a cargu del monologuista Carlos Alba.

• Sábadu 4 xunetu

nel prau de la fiesta

11’00 hores. Apertura de la VII Feria d’Artesanía y Mercáu de Productos Agroalimentarios.

12’00 hores. Pasacais de los grupos folklóricos Los Yerbatos (Bimenes), Oter de Fumos (Valladolid) y Os Pauliteiros (Miranda del Douro) hasta la Casona de los Careaga.

na Casona de los Careaga

12’30 hores. Pregón, a cargu de Roberto González-Quevedo González, escritor, filósofu, antropólogu y Secretariu de l’Academia de la Llingua Asturiana.

13’00 hores. Misa n’asturianu, oficiada por José Manuel García de Jesús y cantada por El Corriellu la Pandorga.

nel prau de la fiesta

13’30 hores. Puya’l ramu. Collabora: Sociedá de Feries y Fiestes “Nuestra Señora del Rosario” de Santuyano.

13’45 hores. Actuación de los grupos folklóricos Los Yerbatos (Bimenes), Oter de Fumos (Valladolid) y Os Pauliteiros (Miranda del Douro).

14’45 hores. Xinta popular: Bollu preñáu, empanada, casadiella y arroz con lleche. Venta anticipada de vales na Casa Conceyu (Martimporra)

16’00 - 18’00 hores. Taller de manualidaes pa neños, a cargu de l’Asociación Sociocultural Afayaivos.18’30 hores. X Concursu de Gaiteros y Gaiteres Mozos.

23’00 hores. Conciertu. Actuación de:

Los Gatos del Fornu

Los Ciquitrinos

DJ – J15

Asturies ruempe les machorre na llucha pol "Año Preto"

La Selección Asturiana de Liriu, formada por Pravia, Toño, Urbano, Luis, Carlos y Xuacu, ta acabante de llegar de Celeiro de Mariñaos, onde compitieron nel IV Tornéu Parroquial "Año Preto". El Combináu Nacional, que na llucha pol triunfu terminó rompiendo les machorres, quedó nun meritoriu cuartu puestu tan solo vencida pol gran equipu de Vilamar, ganador del tornéu.

Asturies acompañada pol orbayu gallegu entamó la so competición nuna primer partida escontra'l gran equipu de Vilamar que dominó dende la primer carrera. Na metada l'alcuentru l'esfuerzu fechu polos nuesos xugadores ganando delles carreres nun foi suficiente pa baltiar la diferencia algamada por Vilamar, que muncho más concentraos superaron al conxuntu asturianu, algamando la segunda victoria pa Vilamar, que yá ganara a Xove primero, dexando a Vilamar clasificáu pa la final.



Depues del descansu y les felicitaciones a los clasificaos, yera la hora del encuentru ente Xove y Asturies, nel que se definiríen les places de la cuarta a la duodécima. Dende les primeres carreres entamó a calecese l'ambiente calteniéndose cásique de contino un empate ente los dos equipos. A falta de 5 carreres Asturies ganaba por 3 al equipu de Xove. Nesti momentu los nuesos dalgo nerviosos fallaron nes tiraes finales, pero dexó d'orbayar na pista central de Celeiro y apareció'l seleccionador nacional, Pravia que con dellos machorrazos maestros dió un emburrión al equipu consiguiendo la victoria y la cuarta plaza na clasificación final, faciendo asina rescamplar el potencial de la nuesa selección, asitiándose como firme candidata a la Copa Cantabrico de Liriu.

Darréu del espectaculu esportivu yera la hora de la sesión vermú onde se presentaría el poemariu "Orbayu d'alfileres" de Carlos Suari y el tema Circu de Zimmer103, inspiráu nel poema de mesmo títulu. Y depués d'esti momentu artísticu-reivindicativu, llegó la "Guagua (Tropical) da LNB" que nos llevaría a Reinante pa la esperada xinta de xermandía con productos del país vecín y la "Callada coma resposta.....".

Na tarde de Celeiro apaeció'l sol faciendo que secara la pista pa qu'entamara la final a 3 d'esti IV Tornéu Parroquial "Año Preto". Asina emprincipió l'esperáu momentu, nel que los equipos de Furabolos, Vilamar y Billardeiros Musicais, compitieron pol "Año Preto", que depues de munches carreres nes que l'empate foi la tónica xeneral, el nuevu conxuntu de Vilamar algamo la victoria faciendose asina col codiciáu reciellu, esti añu blancu.

Pero esti tornéu nun termina equí, como ye tradición nes selmanes vinientes tendra de xugase'l tercer tiempu, folixa-xinta pa degustar el "Año Preto", nel chigre de Lola de Remourelle.

Amás l'espor tradicional va tener continuidá nel nuesu país esta mesma selmana. El domingu 21 de xunu en Piarnu (Castrillón) va xugase el I Tornéu "Pitu de Caleya", entamáu pol CNL (Campionatu Nacional de Liriu), que sirvirá de sofitu pa echar a andar l'ansiáu Campionatu del que vais tar informaos equí mesmo.

http://espordasturies.blogspot.com/

http://liriu.blogspot.com/

Los muertos n'accidentes llaborales aumentaron n'Asturies un 13% nel 2008, según la Fiscalía.

UVIÉU, 15 de Xunu (EUROPA PRESS)

El Principáu rexistró 20.253 accidentes con baxa en xornada de trabayu, de los que 20.069 nun tuvieron gravedá, y 158 fueron graves y 26 mortales, nel pasáu añu 2008, según el resume estadísticu del Institutu Asturianu de Prevención de Riesgos Llaborales recoyíu na Memoria añal de la Fiscalía de Siniestralidá Llaboral.

De los 26 muertos, once pertenecíen al sector servicios y otros diez al sector de la construcción, y cinco al sector industrial y asemeyaos.

La evolución porcentual sobre'l 2007 supón una baxada nel total de siniestros d'un 4,4 por cientu. Los accidentes baxaron nun 4,3 por cientu y los graves nun 16 por cientu. Sin embargu, los mortales subieron nun 13 por cientu, pasando de 23 a 26.

La fiscal especial en Siniestralidá Llaboral, Esperanza González, destacó na Memoria que ye preocupante l'aumentu "significativu" nel númberu d'accidente mortales sobre l'añu anterior, "lo que ha llevar a la reflexón sobre la eficacia de les midíes adoptaes en materia de prevención, como cauce fundamental pa evitar la siniestralidá llaboral", señaló.

Pel contrario, según la fiscal, les lesiones, tanto sin como con gravedá, baxaron. De los 158 accidentes graves, 63 tuvieron llugar nel sector servicios y otros 42 na construcción, mientres 53 fueron na industria y sectores asemeyaos.

Pela so parte, de les causes en trámite del añu 2008 correspondientes a homicidiu por accidente llaboral, va formulase acusación n'ocho, y de los delitos de lesiones n'accidente llaboral, va formulase acusación en 12.

Como datu positivu, la fiscal valoró la rapidez na actuación que supunxo un avance importantísimu pa la conocencia exacta de los fechos per parte del Xulgáu Instructor y Fiscal n'orde a l'averiguación de los posibles delitos.

Sin embargu, apuntó'l ministeriu públicu, sigue pendiente la efeutividá del sistema informáticu, puesto que, como yá se facía constar na Memoria del añu 2007, los datos estadísticos espeyaos na presente Memoria se correspuenden colos procedimientos que realmente despachó la Fiscal Delegada y que se conseñaron según la so propia estadística.

Federación nazional-Socialista Asturiana

La pérdiga d’argumentos de los detractores de la normalización y oficialidá de la llingua asturiana ye más qu’evidente nestos últimos años.

Escomenzaron colo de que nun esistía mesmamente un idioma propiu d’esta tierra, depués pasaron a lo de los milenta bables, más tarde sacaron aquello de que yera articifial, llueu abellugáronse tres la falacia de que nun había demanda, col tiempu inventaron lo de que diba ser carísimo, y d’ehí llegaron a lo de la imposición. Últimamente tán los mandamases de la FSA toos esprecetaos por facer llegar a la ciudadanía’l mensaxe de que detrás de “lo del bable” hai otros intereses ocultos, unos fines realmente macabros y espantibles que perxudicaríen la convivencia pacífica ente asturianos. Por eso s’oponen tan xabazmente a la oficialidá, por cuidanos a toos d’esi monstruu que quedaría llibre si llegare a promulgase tala reconocencia. Namás dende la falta d’argumentos intelixentes y lóxicos pue entendese esta posición, nun-yos queda más que’l recursu al mieu. Esti emplegu del mieu irracional como elementu del xuegu políticu ye’l mesmu (con toles distancies que se quieran) qu’utilizaron los nazis colos xudíos na Alemaña de los años cuarenta; el presentar a un grupu determináu como un peligru llatente pal restu de la sociedá ye la mesma filosofía que tán esponiendo anguaño los responsables políticos d’Asturies. Palabres como les de Javier Fernández o Fernando Lastra asina lo afita: dicir que la oficialidá llevaría l’ascensu del “nacionalismu escluyente” (como si’l d’ellos nun lo fuere), o que supondría la obligatoriedá (cásique a sangre y fueu) del asturianu, respuende al mesmu pensamientu intransixente y represor d’aquellos que quixeron ser los amos del mundu. Nun reconocer un derechu a una mayoría o minoría de ciudadanos cola sida de qu’eso diría en detrimentu de la llibertá de los otros ciudadanos, ensin prueba nenguna y col únicu argumentu del “porque yo lo digo”, tien un nome: autoritarismu. La utilización del mieu ye l’últimu recursu de les dictadures; ye la fase que tamos viviendo anguaño n’Asturies (“cuidáu con estos del bable que detrás d’ellos hai unes fuercies malignes que son les que realmente mueven los filos…”).

La so “solución final” a esti problema (pa ellos únicamente) de la llingua asturiana yá taba pensada y pactada: nun yera otra qu’aquello del “patrimoniu llingüísticu” de la reforma del Estatutu fallada. Convertir esta llingua nesa patraña llegal supondría cenciellamente firmar la so partida de defunción. Habrá daquién que piense qu’esta comparanza ye escesiva y hasta una barbaridá, pero non menos que les fataes y babayaes que tenemos qu’aguantar los defensores del nuestru idioma, como aquella de que “detrás del bable vienen les metralletes” que dalgún d’estos bienpensantes soltó ensin ponese coloráu hai un tiempu. Pa esti añu, en Halloween, voi amazcarame de bable… ¡uuuuiiiii, qué mieu! Mentanto, pasa a la resistencia.

Marcha de los trabayadores de Vesuvius

El proximu xueves 18 de Xunu, los trabayaores de Vesuvius iniciarán una marcha dende Riañu hasta Uviéu.
Saldrán a les 08,30 hores dende la fabrica.

Sofitalos y xúnite a ellos!

Entrevista a Patrick Zimmerman

Xunu 12, 2009 por Pablo R. Alonso


Patrick Zimmerman (California, 1981) llegó a Asturies curiosamente’l pasáu 8 de setiembre cola intención de recoyer información pa la so tesis doctoral, que trata sobre’l nacionalismu asturianu dende la transición ("Domesticated Nationalism: Asturian Regionalism and Cultural Politics since the Spanish Transition, 1974-2008."). Hai unes selmanes esti doctorandu de la Universidá Carnegie Mellon de Pittsburgh abandonó'l nuesu país de vuelta pa los Estaos Uníos depués d’un trabayu de campu que lu llevó a entrevistase con bona parte de los protagonistes del asturianismu de los últimos trenta años. Unos meses nos que, por cierto, l’investigador norteamericanu tamién tuvo tiempu pa deprender el nuesu idioma.

Asturies.com quixo falar con Patrick Zimmerman enantes del so regresu pa que tresmitiera a los nuesos llectores la so visión del pasáu, presente y futuru del asturianismu.


La primer pregunta ye obvia ¿Qué lleva a un californianu a interesare por Asturies y el nacionalismu asturianu?

Hai tiempu que m’interesaben los nacionalismos n’España, los problemes no que cinca al Estáu de les autonomíes y la Transición. A partir d’ehí necesitaba garrar un exemplu de nacionalismu pa la mio tesis. En principiu pensé en Galicia o n’Asturies porque había menos coses escrites sobre dambos y nun soi tan presuntuosu como pa creer que podía aportar dalgo importante sobre los dos nacionalismos más estudiaos, el catalán y el vascu. Entós siguiendo los conseyos del mio director de tesis decidí enfocar el mio estudiu namás nún. Intereséme por Asturies por razones epistemolóxiques y tamién personales. Siempre quixera conocer los paisaxes y la gastronomía d’equí. Y nel planu epistemolóxicu interesábame saber lo que pasó y enforma lo que nun pasó: Por qué n’Asturies nun asocedió lo que n’otres partes.

Como diz l’asturianismu políticu nun ta prácticamente estudiáu, quiciás los trabayos más relevantes nesta estaya sean los de Pablo San Martín

Sí, Pablo San Martín ye l’investigador principal. Tamién hai un estudiu inéditu de Tino Brugos, del cuál editó un capítulu nel so llibru ”Conceyu Bable: venti años”, pero’l restu del so trabayu nun lo llei, y la verdá ye que prestaría abondo lleelu.

¿Con qué tesis partía sobre l’asturianismu? ¿Qué esperaba alcontrar?

Bueno, ya sabía qu’había una identidá destacada, una llingua propia, un movimientu obreru contestatariu y pensaba que diba topar más vinculación ente esi movimientu obreru y l’asturianismu. Había dalgún nexu, sobre too ente Andecha Astur y la Corriente Sindical d’Izquierda, más no personal que no organizativu, pero en CC.OO y UGT tan muncho menos interesaos nel asturianismu y eso sorprendióme.

Falando de desconexones, n’alguna entrevista anterior falaba usté de la desconexón qu’hai ente la masa de falantes de la llingua del país y l’asturianismu

Yo creo qu’a lo llargo de los trenta años hai pocos exemplos de xente que voten en razón de la llingua. N’algunos casos puede vese l’asturianu hasta como una prioridá pero non absoluta, y entós cuando la xente “pro-asturianista” vota failo por intereses más cercanos, como los venceyaos a la economía, o por razones ecolóxiques o temes sociales. Entós creo qu’eso esplica un poco les razones pa que’l nacionalismu tenga poco éxitu políticu mientres que tien bastantes éxitos nel ámbitu cultural, como ye que s’implantase na sociedá la percepción de que l’asturianu ye una llingua, ente otres coses polo ye, o la lliteratura que tien bastante éxitu.

¿Hai desconexón tamién ente si movimientu cultural que tien ciertu puxu y el feble movimientu políticu?

Na rellación ente dambos movimientos non, porque munches persones participen de dambos. Lo que faltó ye tomar ventaya de la popularidá de coses como la música asturiana en clave política, por exemplu. Ye obvio que Nuberu, Carlos Rubiera, Dixebra o Llan de Cubel son músicos y grupos abiertamente nacionalistes y la xente que compra los sos discos ye consciente d’ello. Lo que faltó nes formaciones polítiques nacionalistes ye’l saber como tomar ventaya d’ello. Hai más xente que compra esos discos que los que voten nacionalista.

Nel alderique sobre’l nacionalismu asturianu organizáu pola Tertulia Cultural “Pachín de Melás” y nel qu’usté participó xunto a Ignaciu Llope y José Luís Carmona, comentóse qu’hubo dos momentos claves na historia del asturianismu políticu. Ún foi na época de la Transición, especialmente nel añu 77 cola primera convocatoria democrática, y lo que pudo ser y nun foi con aquella Unidá Rexonalista, que podría haber algamao un escañu nel Parlamentu español si llega a realizase la proyectada xuntanza col Partido Socialista Popular y qu’a la fin nun se consiguió, quedando Unidá Rexonalista con 11.000 votos. ¿Esta foi la primer gran frustración del asturianismu?

Fue un momentu que causó bastante decepción y lo mas importante ye que causó tamién que muncha xente marchare pa casa, pa otros partíos más minoritarios o pa sectores más radicales. Nesti casu, con Unidá Rexonalista mostróse cuál yera’l númberu real d’asturianistes en términos de votos. Muncha xente comentó, y yo toi d’alcuerdu, que l’asturianismu políticu tenía más fuerza cuando naide sabía exactamente que fuerza electoral podía tener. Depués de los 11.000 famosos votos del añu 77 yá se supo. Y fueron pocos. Home, si hubiesen sumao los 42.000 del PSP nun yeren pocos. Pero naquellos años hai otru momentu clave: l’atracu al Banco Herrero. Foi un momentu que dio una publicidá increíblemente mala y que marcó, enforma nos primeros años de los 80 y que puede que siga marcando, la visión esterna que se tien del nacionalismu asturianu porque hai xente qu’iguala nacionalismu con ETA. Y el Banco Herrero dio un argumentu a esi pensamientu. Naquel socesu intervinieron xente rellacionada colos poli-milis (ETA p-m) qu’entraron nel Conceyu Nacionalista Astur al traviés del CAR (Comites d’Acción Revolucionaria) tres una votación interna nel CNA, a pesar que la mayoría del vieyu CNA, la so cúpula na que taben xente como Carmona o Dubardu Puente marcharen depués d’esa votación, les sigles del CNA quedaron venceyaes al socesu y eso influyó na percepción de la xente.

¿Durante estos trenta años l’asturianismu podría dicise que “pagó los platos rotos” de nacionalistes catalanes y vascos?

Había ciertu mimetismu, más de lo vasco que de lo catalán. Claramente l’asturianismu na percepción de la mayoría de los ciudadanos vincúlenlo a los demás nacionalismos del Estáu español. Sicasí l’asturianismu nun ta tanto “pagando los platos rotos” de vascos o catalanes, ye que ye un movimientu muncho más mozu que los otros o mesmamente que’l gallegu, nel sentíu de nacionalismu modernu. Si había una corriente rexonalista nos años 20 y 30 pero hai una ruptura absoluta ente esa corriente y lo que ñaz con Conceyu Bable en 1974. Ye más una cuestión de tiempu que de los “vecinos”.

L’otru momentu clave, más recién y quizás más traumáticu foi’l de Coalición Asturiana nel añu 1991. El nacionalismu entra finalmente nes instituciones por mor del pactu ente PAS y UNA, algamando Xuan Xosé Sánchez Vicente un escañu na Xunta Xeneral. Un acontecimientu que pudo significar l’espoxigue definitivu del asturianismu políticu pero que visto casi venti años depués paez que quedó en nada ¿Cómo valora esi momentu?

Como la cume d’un procesu desarrolláu a lo llargo de finales de los 80. Hai que dicir que na historia del asturianismu dende los 80 nunca hubo un solu partíu nacionalista. Nin siquiera nel 91 porque nesi momentu yá esistía Andecha. Sicasí, la xuntura d’Unidá Nacionalista Asturiana col Partíu Asturianista foi probablemente’l momentu de más unidá nel mundu nacionalista: había xente desde de centru-derecha hasta d’izquierdes. D’esa xuntura quedó fuera un sector más radical que formaría Andecha Astur y que quedó fuera por dos razones, nun fiase de Xuan Xosé Sánchez Vicente y por nun aliase con “burgueses”; había razones ideolóxiques y personales. Esos fueros los famosos 9 espulsaos, o que marcharon, de la UNA y que formaron Andecha Astur, por eso nunca hubo una unidá completa. Pero la gran masa de la xente nacionalista d’aquel momentu si formaron parte de Coalición Asturiana. Foi una oportunidá claramente perdida de consolidar un movimientu nacionalista. Depués nel 1995 el PAS en solitariu repitió l’escañu pero hai que conseñar que foi nel peor momentu electoral del PSOE, cuando’l Partido Popular ganó les elecciones autonómiques, la única vez que nun les ganara’l PSOE y eso influyó en que Xuan Xosé conservare l’escañu. Toi convencíu de que si PAS-UNA hubieren siguío en coalición la presencia del nacionalismu asturianu sería más visible y con resultaos electorales meyores que los del añu 1999, anque hai que dicir que nesi añu tampoco hubo una baxada grande de votos del PAS, llueu si la hubo, pero nesi añu perdióse l’escañu y perdióse la visibilidá.

¿Y como ve anguaño’l panorama del movimientu nacionalista asturianu?

Ta nel momentu más baxu. Nel planu cultural bastante activu. Agora tamos viviendo un momentu nel que los primeros escolinos que tuvieren asturianu yá son adultos, tan n’época universitaria o del primer empléu y hai que ver como van funcionar estes nueves xeneraciones. Tamién veo una xeneración asturianista “de la vieya guardia” un poco pesimista, non toos, pero que sienten más esi fracasu. Persones como Xuan Xosé Sánchez Vicente, Ignaciu Llope o Carmona tan bastante pesimistes, como pudimos ver nes intervenciones d’estos dos últimos na tertulia que mencionamos enantes.

Curiosamente hai un furacu demográficu que mencioné yá na tertulia porque hai pocos trentañeros asturianistes (anque realmente hai pocos trentañeros en xeneral n’Asturies) nun sé si porque marcharen hai años desilusionaos del asturianismu o simplemente ye que nun había.

A too ello hai qu’amestar que la idea d’unidá, d’unión, d’axuntar xente del asturianismu garróla en parte Izquierda Unida yá dende la década pasada con postures a favor de la oficialidá o la declaración de cooficialidá en conceyos gobernaos por ellos como Llangréu. Un averamientu al asturianismu que continua anguaño na figura de Valledor.

Un datu llamativu ye qu’ inicialmente titulaba la so tesis “El nacionalismu domesticáu” ¿Por qué esi términu?

Bueno, lo de domesticáu foi una hipótesis inicial según la cuál el PSOE consiguió domesticar un peligru inicial, un peligru pa ellos, la posibilidá d’otru País Vascu: hubo un momentu nos años 70 onde había la posibilidá de crear, bueno quizás otru País Vascu non, pero si otra Galicia. Sicasí, cuando llegué a Asturies ensiguida descarte esi títulu porque decatéme que la causa de la falta d’espoxigue del asturianismu tenia menos que ver con acciones d’arriba, del poder pa colos d’abaxo, que colos propios asturianistes. Nun quiero dicir tampoco que la situación del nacionalismu sía responsabilidá solo de los asturianistes. Dambos tienen responsabilidá.

Y agora’l títulu cambió a “nacionalismu frustráu” ¿Por qué?

Porque veolo nes cares de la xente: frustración, qu’amas foi una palabra que mencionaron polo menos ente un terciu y la metá de les persones qu’entrevisté pa la tesis ensin nenguna incitación o provocación pa dicila: salió espontáneamente. D’ehí’l cambéu.

¿Y cuál ye’l futuru del asturianismu?

Nun sé. Puede que dependa de la demografía. Cuando llegue otra xeneración habrá que ver si mantién la dinámica d’enfrentamientu ente los asturianistes. El futuru veolu positivu, pero a llargu plazu históricu. Dependerá tamién de factores como la normalización llingüística: yá hai un estándar, hai asturianu nes escueles, hai más de 20000 escolinos esti añu recibiendo clases d’asturianu y esto ye un éxitu claru. La normalización social ye lo más difícil. Sicasí, anguaño ye polémico dicir que l’asturianu nun ye una llingua, que ye un dialectu del castellán. Va 35 años dicilo yera normal. Fui mui sorprendente cuando Conceyu Bable dixo qu’equí había una llingua. Esta popularidá que tien la cultura propia, les señes d’identidá, indíquenme qu’entá queden votantes potenciales, pero hai que saber como atraelos.

Una última cuestión en rellación a lo qu’acaba de dicir ¿Falten líderes o referentes nel asturianismu?

Evidentemente los líderes tienen un rol nesti tipu d’histories pero yo creo que si’l movimientu asturianista s’estendiere na masa social surdiríen. Agora mesmo hai munchos líderes nos partíos que nun quieren ser políticos a xornada completa. Ellos creen muncho nel proyectu pero non pa ser, por exemplu, presidentes d’Asturies. Xuan Xosé Sánchez Vicente ye una escepción. Por exemplu na UNA, si preguntes a Llope si él quier ser diputáu probablemente diríate que non, porque él tien la so carrera profesional. Hai munchos más militantes que persones que quieran liderar esa masa militante. Lo mesmo pasa colos líderes d’Andecha Astur.



Estrayíu d'Asturies.com

Entamar l’alderique, construir alternatives

Yá pasó’l 7 de xunu y la resaca eleutoral vien mui dura pa toos aquellos que vivimos, pensamos y actuamos naguando por unes polítiques alternatives a les que’l circu mediáticu y la clase política mos quieren vender día sí y día tamién.

La finada campaña eleutoral bien pudo ser n’Asturies el guión d’una traxicomedia onde nun faltó de ná y sobraron demasiaes coses. Quiciabes nesti país préstanos abondo “La vida de Bryan” con eso del Frente Popular de Judea y el Frente Judaíco Popular, pero les comedies meyor dexales nel cine porque mos vienen enriba los thrillers psicolóxicos.

Los resultaos eleutorales fueron l’ensayu xeneral de lo que va llegar: mayor avance de les polítiques conservadores y neolliberales, retrocesu de los drechos de los trabayaores, más homexeneidá nel discursu dominante, desencantu social xeneral pa cola política, negación de les señes d’indentidá de los pueblos…. Toos somos conscientes d’ello; ye hora de dexar de caleyar a cuatro pates pa entamar a dar pasos eficaces que planteen una rempuesta madura al diluviu que mos vien enriba.

Munchos fueron los ciberalderiques plantegaos a lo llargu d’esta campaña sobre una obsesiva xuntanza. Munches les actuaciones qu’echaben per tierra eses reflexones. Pero al marxen del pasáu y mirado al futuru ye necesariu qu’esta resaca eleutoral mos lleve por nuevos caminos estratéxicos y d’actuación.

Partamos de los fechos y de la realidá. El pueblu y la izquierda asturiana nun ye mayoritariamente nacionalista. Poco sumaríen dos sigles si nun esiste una conciencia nacional ente la izquierda y la población. Pero más se podría facer si, adaptándonos a la realidá sociopolítica d’Asturies, sumárase la fuercia d’esi movimientu obreru asturianu combativu y los sos ámbitos d’aición; una izquierda crítica desencantada condenada tamién al “guetu” si nun toma otros caminos estratéxicos.

Siendo reales hai qu’añadir tamién qu’una completa unidá de les diferentes organizaciones que formen la denominada izquierda alternativa asturiana baxo una única sigla ye daqué que nun lo van compartir mayoritariamente nin organizaciones, nin militantes, nin votantes. En mayor o menor medida se tien un apreciu a unes sigles que representen una estratexa y un discursu políticu trabayáu durante años.

Entós, ¿Qué plantegar?

Si bien ye ciertu qu’esisten diferentes proyeutos políticos, tamién ye verdá qu’una serie de persones y sigles vienen compartiendo dende años atrás abondos espacios n’estremaes actividaes polítiques y sociales. Nestes movilizaciones nun solo coinciden organizaciones polítiques, sinon que converxen tamién movimientos sociales de toa triba: sindical, de mocedá, antirrepresivu, vecinal, antirracista, de reivindicación llingüística….

Milenta personalidaes y coleutivos vienen compartiendo espacios que reivindiquen unos mínimos asumidos pola mayor parte de la izquierda alternativa asturiana: denuncia del desmantelamientu y la emigración asturiana, construcción d’una sociedá más xusta e igualitaria col protagonismu de los trabayaores, defensa de la llingua e identidá asturiana, la democracia participativa, la soberanía de los pueblos, la igualdá ente sexos….

Los citaos son dalgunos exemplos d’una llarga llista de causes qu’axunten. Causes reivindicaes con mayor o menor protagonismu y con unes u otres estratexes, pero a la fin toos ellos puntos ideolóxicos compartidos polos diferentes ámbitos y que xeneren puntos d’alcuentru na so defensa.

Y digo yo… si más o menos podemos tar xuntos nuna manifestación, si tamos fartucos de que mos mexen dende enrriba, si creemos firmemente nunos ideales xustos pero que por falta de coordinación y errores estratéxicos nun lleguen a calar socialmente a niveles más amplios nin algamen representación institucional… ¿Por qué nun converxer toos nunes candidatures eleutorales en base a unos mínimos comunes?

Unes candidatures que garanticen la independencia e identidá propia de los proyeutos particulares de cada una de les sigles que la formen; qu’axunten a partíos políticos, movimientos sociales y xente a nivel individual en base a unos principios asumibles por toos y que nun causen exclusión ente les diferentes sensibilidaes de la izquierda.

En definitiva: unes candidatures d’unidá popular con una estratexa práutica y eficaz que despierte la ilusión y la confianza ente toles persones con ciertes aspiraciones sociales y polítiques en común, que nun signifiquen la desaparición de les ya existentes y estremaes sigles y coles que facer un trabayu responsable y diariu saliendo del “guetu”.

Propuestes constructives

La propuesta ta nel aire; la estratexa de creación y actuación a desendolcar. Ente les organizaciones relaciones de igual a igual, respetu y entendimiento mutuu pol bien común. De cara a la población asturiana conectar con ella a bas d’un trabayu constante y diariu de base: dende’l barriu, dende la cai, dende los conceyos.

Crear conciencia, sumar fuercies y xenerar confianza e ilusión na población. Tomar contautu cola xente con propuestes reales en base a los principios ideolóxicos comunes y llegar a unes instituciones que pueden non ser el fin p’algamar les nueses aspiraciones, pero sí un importante mediu por conquistar pa poder trabayar y construir alternatives.

Queden dos años de trabayu pa materializar esta propuesta. De la voluntá de les persones que formen les colectividaes y d’una actuación responsable en comuña depende demostrar que los enfrentamientos ente compañeros tan bien pal patiu del colexu, pero qu’asina políticamente el camín ye más duru, esclusivu y frustrante.

Sumar más que restar, construir más que destruir, espertar unes conciencies mui adormilaes, xenerar ilusión y trabayu más que frustración y desidia.

Entamemos un periodu de reflexón y alderique, planteguemos alternatives, construyámosles y trabayemos pa qu’un día se faigan realidá.

--------------------------------------------------------

* Xicu Ariza Fernández (Xixón, 1989)Criáu nel barriu d’El Natahoyo anguañu ta emigráu a Leioa (Bizkaia) onde fae estudios de Periodismu na UPV-EHU.Militante de diferentes organizaciones y movimientos sociales dende temprana mocedá ye tamién coordinador del mediu de comunicación musical FNAST.NET y músicu del grupu Falanoncaduca.

Mani obrera en Mieres, VIENRES 12 A LES 19:00

MANIFESTACIÓN DIA 12 DE JUNIO , A LAS 19:00 EN MIERES, CON SALIDA DESDE LA PLAZA DE LA PASERA (IGLESIA S. JUAN)

¡VAN TIRANOS ASTURIES ABAJO!

COLECTIVO DE TRABAJADORES DE LA CUENCA DEL CAUDAL

Los colectivos de trabajadores de la cuenca del Caudal convocamos una manifestación para protestar contra el cierre de empresas en las cuencas y en Asturias entera, contra la crisis y la precariedad.

Denunciamos el fracaso de la REINDUSTRIALIZACIÓN, que conlleva hundir aun más nuestra economía y AUMENTA EL PARO ESCANDALOSAMENTE.

¡¡EXIGIMOS A UNA SOLUCIÓN A LAS ADMINISTRACIONES, COMO RESPONSABLES DIRECTOS DE LA SITUACIÓN EN LA QUE NOS ENCONTRAMOS LOS TRABAJADORES Y EL RESTO DE CIUDADANOS DE ASTURIAS!!!

MANIFESTACIÓN DIA 12 DE JUNIO , A LAS 19:00 EN MIERES, CON SALIDA DESDE LA PLAZA DE LA PASERA (IGLESIA S. JUAN)

¡¡ACUDE POR TU FUTURO Y EL DE TUS HIJOS!!

Los ERE multiplíquense per 4 y los trabayadores afectaos per 9

N'Asturies rexistráronse 216 Espedientes de Regulación d'Emplegu (ERE) ente los meses de xineru y abril, qu'afectaron a un total de 3.393 trabayadores. De xineru a mayu de 2008 los ERE foron 4 veces menos y los trabayadores a los que-yos afectó 9 veces menos.

Nel mesmu periodu de 2008, rexistráronse 50 ERE y el númberu de trabayadores afectaos y afectaes foi de 370. Estes cifres suponen, según datos recoyíos pol ministeriu español de trabayu, que nesti 2009 multiplicáronse por 4 el númberu d'espedientes de regulación d'emplegu n'Asturiaes y por 9 el númberu de trabayadores afectaos por ellos.

Primeres impresiones del candidatu d'Andecha Astur Mariu Arbesú.

El candidatu d’Andecha Astur Mariu Arbesú valorando los resultaos elleutorales afirmó “qu’Asturies pierde porque ganen los de siempres, el PP y el PSOE, los mesmos que la tan fundiendo”.

Arbesú tuvo unes pallabres d’agradecimientu pa los militantes "pol enorme esfuerzu que ficieron los sos militantes y simpatizantes nesta campaña cuando yá llevamos 3 años siguios de elleiciones, y además nun momentu dificil pal nacionalismu d’izquierda."

El candidatu nacionaliegu considera que “nun son bonos resultaos los d’Andecha Astur en particular y nin, en xeneral, los del nacionalismu asturianu y los del conxuntu de fuerzes que se mueven elleutoralmente nel ámbetu de la izquierda n’Asturies, asina diose “un empate a cero” que nun beneficia a nadie y que mos invita a facer una reflexón en cuantes que faese evidente la necesidá d’avanzar políticamente haza taútiques de llucha basaes nun entamu de xunidá d’aición”

Finalmente Mario Arbesú recordó “qu’Andecha Astur apuesta por xenerar esos espacios xunitarios d’alderique y trabayu y nesi sen trabayaremos y contautaremos con toes aquelles organizaciones y coleutivos que seyan receptivos a esta táutica entamando por plantegar una gran campaña de denuncia de la situación de carencies democrátiques y de crisis permanente na que vive Asturies”

“Tinitón” inauguró’l muselón y el nuevu Hospital Universitariu Central.

Esta fin de selmana’l Tinitón Areces tuvo delles inauguraciones perimportantes dientro la campaña ellectoral: el superpuertu d’El Musel en Xixón el sábadu y el nuevu Hospital central n’Uviéu’l domingu. El presidentón tamién tuvo saldando a ciudadanos y ciudanes nel paséu de San Llorienzu esti sábadu.

Col maletín de los fondos europeos en mano presentóse Tinitón Areces nel actu d’inauguración d’El Muselón el sábado pela mañana. Ellí cellebróse un emotivu actu nel que nun faltó la tortiella y el vinu español. Tres cortar la cinta y degustar los productos, como manden los cánones, el presidentón paseó pel paséu de la playa del Arbeyal fotografiándose con grandes y pequeños y saludando a los presentes nun día tán soleyeru.

Siguiendo en campaña, Tinitón averóse tamién pel paséu de la playa de San Llorienzu pa saludar a los y les xixoneses y amuelar la so cercanía a la población. Pel centricu paséu Tinitón dióse autenticu bañu de multitudes.

Yá’l domingu, Tinitón madrugó pa participar n’otru perimportante actu ya inauguró’l carísimu nuevu Hospital Central Universitariu d’Asturies (HUCA). Tinitón xintó lo mesmo que’l día anterior (tortiella y vinu español) quedando bien fartucu. El gran detalle del presidentón foi’l devolve-yos el céntimu sanitariu a los vecinos y vecines que s’averaron a saludalu.

Andecha Astur entamó estos actos de denuncia y parodia dientro de la so campaña ellectoral.

Andecha Astur, Darréu y PCPE-Asturies denucien persecución política en Llangréu.

Esta mañana Andecha Astur, Darréu y PCPE-Asturies dieron una rueda prensa conxunta pa denunciar la persecución política corquestada que carecemos estes organizaciones nel Conceyu de Llangréu, gobernáu pol PSOE, dende va años y que se fai más dura entovía en campaña ellectoral.
Voceros de les organizaciones denunciaron les multes y sanciones que venimos suriendo, los correos amenazantes, l'acosu personal y amenaces a domiciliu a militantes, ensin escaecer la impunidá ya hipocresía de PSOE pa coles sos propies normes de "Llimpieza" .

Na rueda prensa que se desendolcó na Casa la Cultura de Sama desarroláronse estos conteníos nun comunicáu conxuntu que reproducimos darréu:

Les organizaciones polítiques Andecha Astur, Darréu y PCPE-Asturies, queremos manifestar públicamente lo que vien darréu:

1- Que dende fai varios años dambes organizaciones venimos sufriendo una orquestada persecución política por parte del Ayuntamientu de Llangréu, dirixíu por Esther Díaz y el PSOE.

2- Que dambes organizaciones fuimos inxustificadamente multaes pol Ayuntamientu de Llangréu en numberoses ocasiones. Tal inxusticia queda manifiesta nel fechu de que toles sanciones suprimiéronse nos tribunales de xusticia, teniendo’l Ayuntamientu que correr colos gastos xudiciales.

3- Que’l fechu de que’l PSOE utilice’l control del Ayuntamientu pa perseguir a les nueses organizaciones supón un enorme coste económicu pa les arques municipales, costes que dempués paguen coles perres de tolos ciudadanos.

4- Que la conceyalía de llimpieza, amparándose nes normatives pa Llangréu, pretende sancionar con fuertes multes a les nueses organizaciones por pegar cartelos y pegadielles nos mesmos llugares onde’l PSOE pega la so propaganda elleutoral, tal y comu amuesen una gran cantidá de semeyes realizaes en dellos llugares del conceyu.

5- Qu'en dengún momentu’l PSOE recibió denguna sanción económica por parte del Ayuntamientu, esistiendo un doble raseru a la hora d’interpretar les ordenances municipales.

6- Que, xusto enantes de les presentes elleiciones, l’ Ayuntamientu de Llangréu mos unvió un corréu amenazando con sanciones nel casu de poner la nuesa propaganda elleutoral fuera de los paneles destinaos a esi fin.

7- Que, curiosamente, dende que s’istaló fai varios años esta ordenanza sólo se-y concede espaciu nos paneles elleutorales y les faroles al PSOE, PP e IU, dexándonos a les demás muerganizaciones ensin denguna capacidá pa danos a conocer a los/es llangreanos/es.

8- Que, nes dos caberes elleiciones celebrades nel nuesu conceyu, diéronse impugnaciones en varies meses elleutorales al nun esistir les nueses papeletes nelles, torgando la posibilidá de que la xente pueda votanos. Estes impugnaciones enxamás tuvieron rempuesta.

9- Que dalgunos de los nuesos militantes sofrieron un acosu personal pol Ayuntamientu llangreanu recibiendo amenaces nos sos domicilios particulares sobro estos asuntos.

Por too ello, condenamos estes persecuciones antidemocrátiques y represores por parte del Ayuntamientu de Llangréu y del PSOE, xeres de les que se desprende una nidia intención por parte del gobiernu del conceyu d’aniquilar a toes aquelles muerganzaciones polítique que-yos resulten molestes emplegando pa ello'l control del aparatu municipal.

Llangréu, a 1 de xunu de 2009

Andecha Astur, Darréu, PCPE-Asturies

Dempués de la rueda prensa miembros d'Andecha Astur y del PCPE-Asturies entamaron a pegar nos paneles ellectorales carelos de denuncia de l'ausencia d'espaciu que carecemos nos pocos y pequeños paneles oficiales pa facer campaña nos que se pue lleer ¿onde pegamos nós? ¿onde tal nuesu espaciu? y que roblen dambes orgnizaciones.