martes, 29 de junio de 2010

Probitú democrática ya internacionalización del conflictu


Afayámonos nuna situación de país bien murnia. Los drechos nacionales y sociales d’esti pueblu milenariu son nulos y nun tan garantizaos en denguna fueya impresa. Lo único impreso garantiza precisamente la falta de drechos que l’Estáu Español nos da. Ufiértanos una llista amplia de pilancos llegales a la hora de desendolcanos con un mínimu non yá de soberanía, sinon d’autonomía. Les lletres, como digo, namás garanticen la falta de democracia n’Asturies, yá seyan impreses na Constitución Española o nel Estatutu d’Autonomía pal “Principado” d’Asturies. Les lletres dan frases, y estes mesmes frases asoleyen drechos democráticos, pero, evidentemente, ayenos a les necesidaes de los asturianos y asturianes. Ayenos y separtaos dafechu d’esos intereses del nuesu pueblu. Unes lleis y garantíes plantegaes únicamente dende’l centralismu españolista y que nunca sintieron les vindicaciones populares del país asturianu. Esta llei impuesta nin respeta a Asturies como nación, nin nos normaliza , nin nos respeta como asturfalantes, ente otres coses. Esta llei ampara a la maquinaria represiva p’actuar como-y pete.

Esos testos que tenemos, repito, namás afiten el sometimientu d’un pueblu a los intereses del réxime del Reinu d’España, testos redactaos col espíritu del tardo-franquismu más ranciu. Namás afiten represión y la ñegativa del Estáu a que les asturianes y asturianos seyan quien a algamar dalgo de puxu y tener drechu a decidir por sí mesmxs. Esti drechu a opinar y tomar partida ñeguenlu nel país títeres y poltroneros asitiaos col interés de la oligarquía imperante a cumplir la función yá programada. Hailos de tolos collores y de toles tribes, pero toxs salvaguarden l’espíritu del “ too queda atáu y bien atáu” de Franco y escúdense nunes cartes de drechos totalmente deficitaries de cara a la participación de la ciudadanía na vida política diaria.

Per otru llau tenemos númberos. Númberos que falen de cuasi 100.000 paraxs, ERE’s y múltiples cierres d’empreses, munches estandartes de la supuesta reactivación llaboral n’Asturies dempués de la reconversión. Cifres que falen d’emigración forciada, sobremanera ente la mocedá y tantos por cientu falando d’una altísima tasa de probitú nesti supuestu primer mundu. Y nun ye solo eso, los númberos dan pa más. Dan pa ver como eses y esos caciques de poltrona persiguen con multes millonaries a les organizaciones y ciudadanxs que quieren otra cosa. Multes a esos y eses que denuncien la situación que carez el país, escudándose nuevamente na so llei, qu’a la fin nun val pa más que perpetuar l’orde vixente , enxamás p’avanzar nes necesidaes qu’a los pueblos correspuenden.

Asina, merez la pena cavilar sobre’l tema y ser conscientes de lo pocu qu’insistimos a la hora d’enfrentanos énte la constitucionalidá del Estáu y l’Estatutu vergoñosu y antipopular que tenemos, totalmente alloñau de les demandes de los y les asturianes. Munches vegaes enfotámonos n’aldericar sobre qué facer nel campu xuegu. Dexamos tiempu en como combinar a lxs xugadores pa xugar el partíu de la democracia española y la constitución monárquica. Y pue tar bien, pero a lo meyor hai qu’entamar por camudar la competición, por camudar les regles del xuegu más al nuesu favor, yá que denguna garantizanos nin tan siquier finar los partíos.

En resumen, que nun danse condiciones democrátiques nesti país pa entamar a facer frenti col mesmu métodu al poder. Quiciabes tenemos que tornar al entamu. Quiciabes deberiemos facer qu’esos drechos que se supón que garanticenmos un mínimu de llibertá seyan más alcordies a los pruyimientos y les vindicaciones qu’el Pueblu Asturianu reclama. En poques pallabres, igual ye hora de reclamar una democratización de la sociedá asturiano. Igual ye hora d’axuntar voluntades ente tol movimiento de reconstrucción nacional y social cola fin d’algamar un discursu únicu, ensín atayos, y ensín dexar de llau nunca les necesidaes primaries de la xente, pero cola fin d’algamar un marcu políticu dignu. Un marcu políticu onde toxs podamos participar n’igualdá de condiciones y oportunidaes.

Pa enfrentamos a esta xera tenemos que visibilizar la problemática y el conflictu qu’hai nesta nación. Tenemos que visibilizalu dientru d’Asturies, amosando les carencies evidentes que sofrimos día a día. Falando cola sociedá cara a cara, falando colxs nuesxs allegaxs. Nun avergoñanos de lo que somos y de lo que tratamos d’espeyar. Esto paez perfácil y cenciello pero toos y toes deberíemos danos cuenta de qu’estes conversaciones dexámoles pal nuesu círculu ideolóxicu y pocu más. Hai que finar con esto y guetar la nuesa normalización propia si queremos algamar dalgunes condiciones cíviques y democrátiques.

Pero, si vamos a dómines inda más escures de la nuesa hestoria podemos ver qu’esta visibilización del conflictu nun tien porque zarrase a les nueses llendes. Y refiérome a dómines más escures pa señalar el contestu hestóricu de los años 60 y entamos de los 70. Daquella, yera una rialidá qu’en tolos pueblos d’Europa y n’otros continentes clamábase pola fin de la Dictadura Franquista y la democratización del Estáu. El papel que tuvieron los movimientos populares fuera del tarrén estatal contra’l franquismu foi clave p’algamar migayines d’aire frescu y “bondaes” del réximen.

Agora, solo hai que treslladase al momento actual y visibilizar fuera’l país que n’Asturies hai un movimientu políticu esistente que tamién quier ser tratáu col respetu y les mesmes oportunidaes qu’una democracia normalizada ufiertaría. Tenemos qu’intentar cuntar col mundiu nesta dura xera que tenemos delantre, y eso solo pue aportar recibiendo la solidaridá d’otros espacios políticos foriatos. Internacionalizando la situación pre-democrática qu’arrecostina Asturies dende fai décades. Ye’l momentu de da-y puxu a les relaciones internacionales y medrar nestes. Ye’l momentu que nun teamos solos na difícil tarea de normalización demócratica porque globalizando’l nuesu conflicto y recibiendo fuercies d’otros compañeros y compañeres en llucha sedremos más fuertes y tendremos abondo llográu. Ye’l momento d’axuntar fuercies dientru d’Asturies pa enfotase en pedir rescate a nivel internacional.

*Xosé A. González. Estudiante y militante de Darréu – Mocedá Independentista Revolucionario.

sábado, 26 de junio de 2010

Tres denuncies por tortures y maltratu policial en 2009 n'Asturies.


Asturies rexistró en 2009 trés denuncies por tortures y maltratu policial, trés denuncies de trés persones, una a la Guardia Civil y dos a policíes llocales. Nesi añu, nel Estáu español cuntabilizáronse 624 persones que denunciaron tortures y maltratu en situaciones de privación de llibertá o detenciones por parte de les 'Fuercies de Seguridá del Estáu', funcionarios de prisiones o otros encargaos de custodia. Los datos tan recoyíos nel informe sobre "La Tortura nel Estáu español" del añu pasáu de la Coordinadora pa la Prevención y Denuncia de la Tortura.

El 'Cuerpo Nacional de Policía' acumula 197 denuncies, los Mossos catalanes, 190; les policíes llocales, 64; los 'funcionarios de prisiones', 65; la Ertzaintza vasca, 46, y la Guardia Civil, 43. Cerca de la mitá de les denuncies (48,3%) foron presentaes por persones que participaron en movilizaciones sociales, les interpuestes por persones inmigrantes supusieron el 16,5%; les interpuestes por persones preses, el 11,1, y por deteníos en réxime d'incomunicación, el 7,2 %. Los centros de menores acumularon 12 denuncies, el 1,9%. L'informe tamién recueye les muertes de persones cuando s'alcontraben baxo custodia. En 2009 fueron 41 persones, la mayoría de las cuales -el 68%- nes cárceles.

Dende la Coordinadora señálase qu'anque los casos contrastaos se caltienen añalmente alredor de los 600-700 casos nel Estáu español hai una tendencia de aumentu de la "violencia institucional" que nun se ve espeyada nes estadístiques pol miéu a denunciar. Tamién amuesa la so oposición a que les funciones del 'Mecanismo Nacional de Prevención de la Tortura' seyan encomendaes al 'Defensor del Pueblo' y reitera la petición de s'ellimine la detención incomunicada y el réxime d'aisllamientu penitenciariu.La Coordinadora para la Prevención y Denuncia de la Tortura formenla alrededor de mediu centenar d'organizaciones d'estremaos paises y territorios del Estáu ente les que nun hai denguna asturiana.

Confómenla: Acció dels Cristians per l'Abolició de la Tortura (ACAT), Alerta Solidària, Asociación APOYO, Asociación EXIL, Associació Catalana per la Defensa del Drets Humans, Associaçaõ Contra a Exclusão pelo Desenvolvimento, Asociación Contra la Tortura, Asociación para la Defensa de los Derechos de la Infancia, Asociación Libre de Abogados, Associació Memòria Contra la Tortura, Asociación Pro Derechos Humanos de Andalucía, Asociación de Solidaridad y Apoyo a los Presos de Aragón (ASAPA), Behatokia (Observatorio Vasco de Derechos Humanos - Euskal Herriko Giza Eskubideen), Centro de Asesoría y Estudios Sociales (CAES), Centro de Documentación Contra la Tortura, Comissió de Defensa de Drets Humans del Col.legi d'Advocats Barcelona, Comisión de Derechos Humanos del Colegio de Abogados de Baleares, Comité Anti-Sida de Lugo, Concepción Arenal, Coordinadora Antirrepressiva de Gràcia, Coordinadora Contra la Marginación de Cornellá, Coordinadora de Barrios de Madrid, Coordinadora Estatal de Solidaridad con las Personas Presas, Esculca (Observatório para a defensa dos direitos e liberdades), Eskubideak (Euskal Abokatuen Elkartea), Etxerat (Euskal Errepresaliatu Politikoen Elkartea), Federacion de Asociacions de Loita contra a Droga, Federación Enlace, Fundación Érguete, Grupo 17 de Marzo, Sociedad Andaluza de Juristas para la defensa de los DDHH individuales y Colectivos, Gurasoak, Institut Drets Humans de Catalunya, Justicia i Pau, Movemento polos Dereitos Civis, Observatori del Sistema Penal i els Drets Humans de la UB, PreSOS Extremadura, PreSOS Galiza, Rescat, SalHaketa (Bizkaia), SalHaketa (Araba), Santurtziko Torturaren Kontrako Taldea, Sos Racisme Catalunya, Subcomisión Penitenciaria del CGAE yTorturaren Aurkako Taldea

jueves, 24 de junio de 2010

Mundial y Propaganda


Estes selmanes ta cellebrándose en Sudáfrica’l mundial de fútbol, un eventu mediáticu ya importante –sobre too pa la FIFA, que va ganar miles de millones-, y con elli llega’l mesmu cantar qu’invádenos cada dos años: ”la roja” entra n’escena algamando’l monopoliu informativu en radios, televisiones, periódicos, internet y na publicidá.

Esto ye asina dende siempres, anque dende la so cacarexada victoria na cabera eurocopa esi fenómenu amplificose, potenciando asina varies víes pa los que quieren aprovechar el tirón: d’un lláu,les empreses busquen beneficios al traviés del forofismu y d’ufiertes varies si la seleición española algama tal cosa, y d’otru lláu los medios de comunicación bombárdiennos díi y nueche col mesmu tema a sabiendes de que vende.

Ehí entama aquello de la pescadilla que se muerde la cola, ye dicir, los medios falen de la seleición española porque’l tema tien bona rempuesta ente la xente,y la xente respuende porque nun-yos queda otra depués de que-yos tuvieren metiendo la seleición polos güeyos y los oyíos de contino.

Aparte d’estes dos víes p’aprofitar económicamente l’asuntu esiste una “tercera vía”, más silenciosa y tresmitía más indireutamente, pero que ye la más potente ya interesante pa los gobernantes y les élites interesaes nel caltenimientu del modelu d’estáu xunitariu culturalmente,tresmitiendo valores y sentimientu d’españolía, d’arguyu “nacional”, y faciendo escaecer la realidá d’un estáu nel que conviven delles naciones tapecíes baxo la hexemonía de lo español, afitao nesti casu col sofitu mayoritariu de les empreses y los medios de comunicación oficiales.

Asina ye en tol estáu, pero si queremos centranos nel casu asturianu veses perfácil con un exemplu: la seición de deportes nos informativos de la TPA ye práuticamente un monográficu dedicáu a la seleición española. ¿Por qué nun pasa lo mesmo cuando un equipu o un deportista asturianu algama un trunfu importante o participa nuna competición internacional? -descontando fútbol y fórmula 1 pol fechu de que la TPA tien los drechos d’esos deportes, polo qu’interesa’l so espardimientu por custiones d’audiencia- La rempuesta ye la mesma d’enantes: esaltación, promoción y normalización de vezos y actitudes españolistes, qu’en munchos casos yá nun s’emplegaben dende’l franquismu (¿Quién diba dicinos que diba recuperase’l normal emplegu del perconocíu “arriba españa”?).

Otru aspeutu d’esti procesu de promoción y puxu de lo español ye l’atropu de la mocedá, pincipalmente de los guah.es, qu’ente l’atractivu que supón la imaxe de la seleición y los pás qu’afiten los comportamientos enantes citaos son un oxetivu fácil de llevar al so tarrén.

Pero cabe entrugase si detrás del supuestu sofitu mayoritariu de los asturianos y asturianes pa cola seleición española ye dalgo más qu’un patrón de comportamientu, un efeutu de lo que mos dicen que tenemos que facer.Na mio opinión n’Asturies la influencia qu’exercen los medios de comunicación ye un factor decisivu,ente otres coses porque diverses encuestes realizaes amosen que los asturianos somos los menos identificaos con españa per detrás d’Euskadi y Catalunya, seya por una ideoloxía de calter nacionalista, por descontentu coles polítiques del estáu pa con Asturies o por otros motivos.

¿Camudaría esi sofitu a la seleición española ensin campaña propagandística dende tolos frentes? Toi seguru de que sí.

De toles maneres esto ye lo que mos trae y traerá la seleición española demientres dure’l filón, y en nós ta nun sigui-yos el xuegu y facer ver la realidá d’un aparatu propagandísticu escondíu baxo’l disfraz del deporte.

Artículu d'Adrian Calvillo.

lunes, 21 de junio de 2010

La muerte del "asturianismu" y los finxos móviles

Va unos años, abluquemos porque delles persones, acreditaes con títulos de filoloxía, aneciaben públicamente con que n´Asturies esistía una llingua que correspondía al tueru galaicu-portugués y dicíen "fálase portugués" n´Asturies. L´eonaviegu pasó a denomase “gallego-asturiano”, y yá pudieron arreblagar dellos pa poder quitar inda lo d´”asturiano”. Pues bien, resulta que nun ye abondo. Resulta qu´agora tamién se fala´l “castellanu-montañés”. Dixéralo un informe detrás del que paez ser hai manes del BNG, non digo na ellaboración (al autor-y supongo independencia y honestidá intelectual ensembre) sinón por cuenta los auspicios y encontos qu´alcontró.

Bien, yá la tenemos lliada nesta RFA, república filolóxica asturiana. Falamos asturianu, castellán, gallegu-asturianu (ergo, portugués), castellanu montañés, y quésiyo cuánto más. Tamién hai enguedeyu, porque l´asturianu debía nomase, según dellos, astur-lleonés, y eso, barrunto yo, podía obligar a un cambiu denominativu a l´ALLA. El casu ye tar en constante revisión, inestabilidá, anormalidá. El casu ye mover les isogloses, y facer como esi humorista manchegu- Pablo Mota- que quería conquistar Portugal pa España “a pocos”, moviendo los finxos de la frontera pali que pali, ensin que los del país vecín se decataren, “al merme, al merme” como dicía´l célebre cómicu. Equí lo mesmo, movemos un poco´l finxu, como siempre piensa l´aldeanu desconfiáu, y al cabu d´unos años queda´l campesín ensin prau.

El casu ye desacreditar a l´ALLA, ¡pa dalgo institucionalizao que tenemos a nivel nacional! Mañana otru día inventarán nueves llingües, nueves ortografíes, nuevos inventos.

Xuan Bello, en Les Noticies, dexó escrito qu´almiraba a Areces. Sí, ye d´almirar que l´autoritarismu qu´esti periodista y escritor critica a los que nun ven eso de “les múltiples llingües”, sía tamién cosa d´almirar nos gobiernos del PSOE-IU-BNG que tantu remanen l´asturianismu y lu echen a perder. P´autoritarismu y falta de realidá, la de Tini Areces, al que tantu almira l´escritor de Paniceiros.

Hai que dexase d´”asturianismos”. O somos nacionalistes asturianos o non.

Porque´l términu “asturianismu” ta echáu a perder. Si sigue en boca d´IU y sos nuevos inventos, ye puxarra. Si sigue en manes del Sánchez-Vicente y sos flirteos col españolismu más intransixente, ye cagalera en campu rasu. Si sigue en manes de Xuan Bello y sos “almiratibles” Tini Areces, feseanos y disgregacionistes, entós ye como volver a los tiempos de “los amigos de los bables”, en plural, ye tirar la patria pel ventán. Ye dicir, ye facer casu a una camaretá de persones qu´ensin derechu dalu quieren disgregar el dominiu llingüísticu asturianu, étnicamente venceyáu a la Nación Asturiana y territorialmente venceyáu, al empar, al País Astur.

Mira tu per ónde nun quiero criticar por criticar, namás que destructivamente. Quiero proponer idees positives tamién.

Ta, d´una banda, l´estremu de “reconquistar” l´Asturies de Santiyana pal País Astur, o inda llegar hasta les Encartaciones (onde descubrí palabres asturianes qu´usaba entá mio güela villaviciosina; vide los llibros de Txomin Etxebarría), y otres reivindicaciones territoriales que tan de moda tán na columna de llibre espublización de Glayíu.

D´otra banda tán los disgregacionistes, esos qu´inventen una llingua nueva n´Asturies cada selmana.

Yo propongo, mui herderianamente, venceyar llingua y nación y dexase de tontaes. Herder nun foi´l reaccionariu que nos quieren vender. Foi´l profeta de los nuevos tiempos, l´antítesis perfecha del xacobinismu y del nominalismu llingüísticu que quieren espardir les Academies Paraleles de la LLingua.

Y en cuenta d´anexonar Lleón, Asturies de Santiyana o los conceyos lucenses, propongo una ALLIANZA DEL NOROESTE. ¿Váis faceme casu? De mano sé que non. Pero toos somos pueblos hermanos, falando llingües hermanes y con un ethnos asemeyáu. Y a toos esti Reinu d´España ta dándonos como al gurrión. Debemos trabayar xuntos asturianos con gallegos, lleoneses, cántabros, y reivindicar lo nuestro nesti Reinu oficialmente mediterrániu que nos escaez y nos marxina. ¿Nun tien más xacíu esto, qu´andar corriendo finxos ya isogloses?.

*Carlos X. Blanco ye Doctor en Filosofía y Llicenciáu en Sicoloxía

Sofitu denuncia nuevos casos de represión


Acabantes de finar la selmana na qu’un nuevu militante independentista foi xulgáu, y con seguridá condergáu a pagar unos cuantos díes de multa por ser acosáu, amenazáu y golpeáu pola policía española, Sofitu quier asoleyar los nuevos casos de represión que tamos acabantes de carecer.

El primeru d’ellos ye la multa de 90€ que la policía española impuso-y a una moza independentista pol pergrave fechu de cantar el famosu estribillu "muncha policía, poca diversión" mentantu los axentes del cuerpu represivu identificaben a un mozu nuna plaza de Cimavilla en Xixón.

El segundu ye un fechu que se vién repitiendo delles vegaes nos años caberos, y ye qu’otru mozu independentista foi multáu pola guardia civil española n’autopista "Y" namás que por ser asturianu y amosalo llevando les iniciales "AS" na matrícula del so coche en cuenta de la impuesta "E" española. L’importe de la multa ye de 100€, anque con un descuentu del 50% si se fai pagu rápidu.

Per otru lláu dende Sofitu quier informase tamién que vienen de pagase 1.410€ poles multes alministratives que la delegación del gobiernu español n’Asturies metió a los y les solidaries que nes pasaes navidaes averáronse a Villabona a pidir l’Amnistía pa los prisioneros políticos. Perres que se sumen a los 195€ yá pagaos por multes de tráficu que tamién impusieron los guardies civiles de turnu, y qu’entá se pué sumar a los 630€ de multes que tan a l’aspera del recursu.

viernes, 18 de junio de 2010

La Cope rectifica una nota criminalizadora contra Fer.


La cadena ultraconservadora COPE vien de rectificar una noticia asoleyada'l pasáu 2 de marzu na que acusaba al independentista asturianu Fernando G.R. de "terrorista" y de la "colocación de 19 bombes". Les acusaciones apaecieron nuna noticia criminalizadora d'una charra d'Aición Antifacista na Facultá de Xeografía y Hestoria de la Universidá de Salamanca y na que diba participar esti ciudadanu asturianu que tuvo 102 díes presu baxo la llei antiterrorista y que depués nun foi condergáu por dengún delitu de terrorismu.

Na so rectificación la cadena episcopal reconoz que "Fer" enxamás foi acusáu de colocar 19 bombes, yá que pesie a ser imputáu por estos fechos, nin foi acusáu nin condergáu por delitu de terrorismu dalgún.

Otros munchos medios de comunicación españoles, amás de la organización ultraderechista AVT, asoleyaron tamién nel so día esta mesma noticia coles mesmes acusaciones escontra'l independentista asturianu, siendo la cadena COPE la única que fasta agora rectificó estos fechos.

jueves, 17 de junio de 2010

Conceyu Abiertu del Ensame República Asturiana





L'Ensama Republica Asturiana convoca un conceyu abiertu pal proximu dia 26 de xunu a les 11:00 hores en L'Arcu la Vieya (Uviéu). Esti ye'l comunicau:

L'Ensame Republica Asturiana nació hai casi dos años col enfotu de dar una rempuesta a la presencia borbonica nes tierres asturianes nos mui “cacarexaos” Premios Principiegos. Daquella un garrapiellu de persones entendieron la importancia de tomar esti día como referente del movimientu republicanu astur, qu'hasta entós, nun yera quién a salir a la cai a amosar la nuesa refuga haza la presencia humildante de los reis y principes españoles y, amás, col axetivu de republicanu, terminu mui remanáu y que n'Asturies taba perdiendo'l so significáu de naguar por una Asturies llibre.

A ello sumaronse SOFITU, FAI!, ANDECHA ASTUR, DARRÉU, UNA-MOCEDÁ y mas tarde sumariase la CSI, inclusive nel so día GOMERU, grupu musical, convidó a acudir a los actos entamaos pol ERA. Un par de manifestaciones, una xuntanza escontra la constitución, una folixa y un conciertu son el nuesu bagaxe nestos dos años de viaxe, quiciás non mui abultáu pero importante ya que yera la primer esperiencia coleutiva del movimientu a la que tamién se sumaron persones a titulu individual.

Agora, mirando p'atras, vemos la necesidá d'afitar la esperiencia del ERA na rede del movimientu organizativu astur: meyorar la coordinación ente coleutivos y persones a titulu individual, marcar un calendariu conxuntu, llograr una mayor visualización del conxuntu... y tolo necesariu pal medrar del movimientu. Por ello convidamos a tolos interesaos a acudir a un conceyu abiertu'l prosimu Sábadu 26 de xunu a les 11:00 en L'Arcu La Vieya d'Uviéu a los coleutivos y persones que ya participen nel ERA asina como a otros coleutivos que se quieran sumar o individualidaes que vean nel ERA un importante pegollu sobre'l qu'afitar el movimientu republicanu d'Asturies.

Afalamos a los coleutivos y persones qu'acudan a que lo faigan con propuestes concretes, a poder ser en papel y con delles copies pal so estudiu.

Puxa Asturies Llibre!! Puxa Asturies Republicana!!

miércoles, 16 de junio de 2010

Cellebráu'l xuiciu contra'l policia denunciáu por acosu a un militante de Darréu.


La Fiscalía pide l'absolución amparandose na so credibilidá como "funcionarios".

Cellebróse güei pela mañana n'Uviéu el xuiciu escontra un policia español, venceyáu a movimientos fúboleros y neonazis, qu'agredió y amenazó a un mozu independentista militante de Darréu. Unes 30 persones solidaries aconceyaronse pela mañana énte los xulgaos, convocaos pola organiación antirrepresiva Sofitu y la organización xuvenil Darréu na que milita'l xoven, p'amosar la so refuga a estos actos. Pasaes les 12 la mañana, con mas de media hora de retrasu, entamó'l xuiciu.

El policia en cuestión, conocíu como "Richi", mui conocíu dende hai años pola so agresividá cuando diba antroxáu de bonehead cola so peña "Brigadas Azules", ñegó la mayor, diciendo que foi'l rapaz en que los amenazó y se ñegó a identificase. Dase'l casu que'l rapaz ye estudiante de derechu y sabe perfechamente que nun pué negase pues podria ser deteníu. Tamién ñegó conocer al rapaz, pese a los sos alcuentros nos ambientes fuboleros, y reconoció nun saber que significa "¿fue usted procesado alguna vez por cargo similares?" a lo que respondió "No sé que significa ser procesado" lo que llevantó sorises na sala. Esti policía yá tuvo un xuiciu por una agresión y amenaces a otru mozu, nun va muncho.

El compañeru de "Richi" fizo un exemplu de coorporativismu cargando él cola actuación policial. Lluéu'l mozu, desplicó la so versión, como lu siguieron más de 300 metros al so llau dende un coche patrulla, como xubieron a l'acera énte l'asombru de la xente que pasiaba pela cai Uría, como se ñegaron a da-y los sos datos y como foi golpeáu na mano cuando anotaba la matricula del coche patrulla.

La defensa/acusación del rapaz, yera un xuiciu doble ya que los policies denunciáronlu cuando él interpunxo la so denuncia, desixó al tribunal que reclame a la oficina bancaria de Caxastur y a l'Ayuntamientu d'Uviéu les grabaciones d'aquel día, dalgo que yá pidieren esnin atopar rempuesta. La fiscalía del estáu pidió l'absolución pa los policies amparandose na so credibilidá como "funcionarios". "Al final la sensación de que la xusticia española tién bién montada la so rede de coorporativismu y que naide pué tocar a un agresor si lleva placa", según esplica Sofitu.

Al salir del xuiciu los 10 antidisturbios qu'acompañaron al policía nel xuiciu punxieron la nota mas cañí al salie xiblando l'himnu español y el "Cara al sol", himnu falanxista.

sábado, 12 de junio de 2010

Andecha Astur llamenta la reconstrucción del toru d’Osborne n’Ambás (Carreño)


Andecha Astur lamenta la decisión tomada por parte del Grupo Osborne d’iguar el toru d’Ambás, nel conceyu de Carreño, que resultó destruyíu’l pasáu mes de febreru a causa de les fuertes raches de vientu. Atalantamos como daqué intolerable que demientres el padremuñu asturianu sigue ignoráu y esfarrapándose por falta de presupuestu, sigan gastándose perres en recostruyir estos símbolos del españolismu.

P’Andecha Astur ye inalmisible que s’utilice comu reclamu publicitariu y de propaganda la silueta d’un animal que representa’l maltratu y l’agresión animal pagaos y sovencionaos por parte del Estáu Español. Amás hai qu’amestar la refuga social que xeneren n’Asturies estes valles, una amuesa d’ello son les constantes agresiones que sufren (ésta en concreto taba enllena pintaes).

Andecha Astur quier denunciar qu’estos toros son otra manera más de fomentar ya imponer la cultura españoliega y les sos tradiciones. Enxamás s’integrarán nel nuesu paisax porque enxamás formaron nin formarán parte d’él. Andecha Astur yá se manifestara nel so momentu escontra la sentencia del Tribunal Supremu del 30 d’avientu de 1977 que-y apurría valir cultural a esti antiguu reclamu publicitariu, espresión del tardofranquismu y de la falta de gustu.Poro, Andecha Astur quier reiterar nuevamente la so petición de retirada de les 5 valles publicitaries (Ambás, Grau, Santa María de Piedramuelle, El Berrón y Llanes) que’l Grupo Osborne mantién anguaño nel nuesu país pol so calter antiasturiano, por sofitar postures d’imposición cultural españoliega y por sofitar el maltratu animal. Lamentablemente Asturies ye’l territoriu non andaluz con más valles d’esti tipu. Y tamién asinamesmo, pide-y a les autoridaes que sigan los exemplos de dalgunos conceyos asturianos y declaren Asturies como un país antitaurín.

Asoleyáu na páxina d'Andecha Astur.

viernes, 11 de junio de 2010

Darréu llama a participar na concentración de Sofitu del prósimu miércoles n’Uviéu

La convocatoria coincide col xuiciu a la policía española por acosu a un militante independentista, nesti casu miembru de Darréu.

La organización de Mocedá Independentista Revolucionario, Darréu, anima a la mocedá en xeneral, y n’especial a los sos simpatizantes a acudir a la la xuntanza antifacista que’l Muerganismu Antirrepresivu Popular "Sofitu" entama esti prósimu miércoles 16 de xunu.

Sofitu denunció los fechos yá que’l mozu foi acosáu, rexistráu, identificáu y finalmente agredíu polos policies. Tanto Sofitu como Darréu denuncien la falsedá de l'acusación de desobediencia denunciada polos dos polícies.

"Una vegada más salta a les clares el carauter d’esta policía nacional que tenemos n’Asturies, que cumple’l so deber d’afitar l’españolismu y l’orde estableciu, anque tea que recurrir a la violencia gratuito y la persecución".

La organización de mocedá independentista, "énte esta situación d’enfrentamientu nos xulgaos ente les fuercies facistes d’ocupación y l’independentismu asturianu" fai un llamamientu "a tola mocedá asturiano" a dir a sofitar al militante de Darréu a la concentración entamada por Sofitu a les 10:45 hores delantre’l xulgaos d’Uviéu, en Llamaquique, el miércoles 16.

jueves, 10 de junio de 2010

Chupa Chups afita que la so decisión de marchar d'Asturies ye "irreversible"


Depués d'aconceyar col comité d'empresa güei, Chupa Chups aseguró que la decisión de dexar de producir na factoría asturiana ye "irreversible" y que ye una midida "meditada y estudiada enforma". La firma va centralizar tola producción de porres nel so centru de Sant Esteve Sesrovires (Barcelona), cola fin, según ellos, de garantizar la competitividá de la compañía y "poder caltener la produición" de Chupa Chups nel estáu español". La empresa diz tener "voluntá decidida" d'atopar soluciones pa los 121 trabaydores afectaes, ente les midíes contémplase'l treslláu a Catalunya d'una parte de la plantiya.

La empresa argumenta pa zarrar la fábrica en Piloña que l'adopción d'esta decisión respuende a la necesidá d'adautar la capacidá productiva a la demanda del mercáu global, "lo qu'obligó a la compañía a racionalizar la so estructura industrial n'España".

Noticia d'Infoasturies.

martes, 8 de junio de 2010

Campaña d'e-mails escontra la bandera española na bandera de la Federación Asturiana de deportes d'iviernu.


Fai unos díes el blogue Fueya en Blanco asoleyó una noticia na que pidía a los internautes qu'amosaren el so refugu a la bandera d'España nel llogotipu de la Federación de Deportes d'Iviernu del Principáu d'Asturies. Dende equí queremos da-y puxu a la iniciativa d'emails y animamos a tolos llectores a que dende'l so correu personal o d'organización faigan lo mesmu y unvien un corréu a la Federación. Remenbramos que xunto cola madrilana, l'asturiana ye la única federación del Estáu qu'incluye na so imaxen la bandera del Reinu d'España. Tamién dicir qu'esta ye la única federación deportiva asturiana que tien la bandera roxigualda nel so escudu.

El corréu pa unviar la so quexa ye'l que vien darréu:correo@fdipa.com

Animate tú tamién a amosar el to refugu a la bandera española.

¡ VALIÓ DE SIMBOLOXÍA ESPAÑOLISTA !

Sofitu convoca dos actos, ún pal miercoles 16 n'Uviéu y otru'l 19 en Xixón.


Dende SOFITU convoquen pal miércoles 16 próximu, a les 10:45, nos xulgaos de Llamaquique d’Uviéu una xuntanza antifascista pol xuiciu a un militante independentista por un presuntu delitu de faltes por desobediencia. Nel mesmu, dos policíes españoles y un militante independentista sentaránse nel banquiellu como denunciantes y denunciaos.Los fechos asocedieron a entamos d’esti añu cuando una patrulla de uniformaos españoles acosó, rexistró, identificó, y tamién menació y golpió a un mozu dixebriegu, militante de Darréu, na cai Uría d’Uviéu, namái que pola so conocida militancia política.

Énte estos fechos l’organismu popular antirrepresivu Sofitu presentó una denuncia nos xulgaos, anque tamién los dos policíes denunciaren al mozu por una supuesta desobediencia, "mintiendo dafechu na so declaración" según afirmen dende Sofitu.

L’organismu asoleya qu’unu de los policíes españoles, ye un conocíu fascista d’Uviéu, con delles semeyes en redes sociales d’internet onde queda clara la so ideoloxía, militante de dellos grupos nazis del mundu del fútbol, que yá fuera xulgáu malpenes va unos meses por unos fechos idénticos d’acosu a otru militante independentista, y qu’a finales de los 90, fuera condergáu por matar dellos gatos d’otra militante nacionalista.

Dende Sofitu afiten, que tanto l’exercitu español, como "los cuerpos represivos españoles, son un ñeru onde s’afayen bona parte de los fascistes d’Asturies. Tres la proteición que-yos da una placa y una pistola, actúen con impunidá escontra tolo que suene a independentismu asturianu".

Énte estos fechos, Sofitu convoca l’aconceyamientu sopelexáu pal miércoles 16 de xunu, a les 10:45 hores delantre los xulgaos d’Uviéu pa denunciar la impunidá de los cuerpos represivos españoles y amosar solidaridá pa col militante. Tamién el sábadu 19 a les 14:00 h entamarán una xinta antirrepresiva nel CSA Sestaferia de Xixón, al envís de recaldar perres pa les continues multes que representa’l ser militante activu n’Asturies.

La CSI participa na fuelga pero nun va firmar al día siguiente nenguna reforma llaboral


Los sindicatos UXT y CC OO tienen convocada una xornada de fuelga en protesta polos recortes económicos alcordaos pol gobiernu a les emplegaes y emplegaos públicos. Énte ello, la Corriente Sindical d’Izquierda realiza’l posicionamientu públicu siguiente: per una parte llama a participar na fuelga porque, al marxe de quién la convoque, les midíes del gobiernu suponen una agresión intolerable que nun tien que quedar ensin respuesta; per otru llau, les nueses sigles nun van apaecer nos carteles anunciadores de la mesma, porque consideramos qu’UXT–CCOO son collaboradores necesarios nesta situación por munchos motivos.

¿Por qué participar na fuelga?


Porque, al marxe de quién la convoque, les midíes del gobiernu suponen una agresión intolerable pa les persones emplegaes públiques y esta agresión nun tien que quedar ensin respuesta; d’ehí’l nuesu llamamientu a la participación nesta y en cualquier otra movilización que se convoque, como elementu de protesta y d’oposición a eses midíes.

Amás, sabemos que na alministración del Principáu tán preparándose otres midíes que se van aplicar de manera inminente: basándose nuna supuesta redistribución d’efeutivos que se ta planificando pa poder contribuyir al aforru adicional de 150 o 200 millones d’euros na alministración autonómica, va producise la imposición de reducciones de plantía que van venir daes pola amortización de places y el cese d’interinos, asina como pola movilidá forzosa de personal fixo a otros departamentos.
Pero’l que más de 6 millones de pensionistes vayan ver conxelaos los ingresos y la reforma llaboral inminente convierte’l problema en xeneral, non solo de los emplegaos públicos. Y ehí ye onde tien que se dirixir la respuesta a estes agresiones, na convocatoria d’una fuelga xeneral, porque’l conflictu yá ye con tola sociedá.

¿Por qué nun convocamos esta fuelga xunto con UXT y CC OO?


Sicasí, les nueses sigles nun van apaecer nos carteles anunciadores de la mesma, porque consideramos qu’UXT – CC OO son collaboradores necesarios nesta situación por munchos motivos:

Por tener permitío a l’alministración facese tan fuerte nestos años que decide midíes de manera unillateral cada vez más davezu ensin que se-y ponga reparu dalu.
Por tener firmao un estatutu básicu del emplegáu públicu (xunto con CSIF), que sepultó dafechu la poca capacidá negociadora que teníemos nes alministraciones públiques empara de favores como miles de lliberaos sindicales, subvenciones millonaries…
Por permanecer pasivos delantre el deterioru brutal del mercáu llaboral (firmando reformes llaborales anteriores, pautando EREs, tolerando la mayor tasa d’emplegu temporal y precariu d’Europa, horarios con xornaes aparrantes y sueldos míseres, despidu de quien esixe los drechos mínimos…).
Por permitir que les coses llegaren a esti estremu nesti Estáu nel qu’hai yá 5 millones de paraos –el 20 % de la mano d’obra activo– ensin faer más nada que ruedes de prensa nes que, con cara de circunstancies, los dirixentes amuésense esmolecíos pola situación económica, desmovilizando a la clas obrera.
¿D’aú vien esta situación?

El gobiernu del PSOE, presionáu polos poderes económicos y los grupos financieros internacionales, aprobó unes midíes económiques que pretenden reducir el gastu públicu y saniar l’estáu de cuentes del Estáu. Dempués vendrá’l despidu semigratuitu, la reforma de la Seguridá Social, y mayor precariedá na contratación llaboral.

La crisis actual provocada polos emporios financieros y los especuladores tamién mos toca a nós, pese a que nestos últimos años el gobiernu atesteronaba en dicir qu’equí nun pasaba nada y que too diba perbién. Ello ye que se marafundió’l dineru público con midíes populistes y nada progresistes (cheques naciellu, ordenadores pa toos, 400 euros de reducción xeneralizada nel IRPF, ayudes pa mercar coches…); nun daba más que se precisare o non, o los ingresos de los beneficiarios... Por nun se poner a falar de les privatizaciones encubiertes a traviés de la esternalización de los servicios públicos per aciu d’empreses-chiringuitos que taragañen cientos de millones d’euros pa sustituyir el trabayu de los emplegaos públicos por trabayadores con condiciones llaborables míseres pa ellos y privilexaes pa los directivos.

¿Qué fai’l gobiernu?

Les midíes impuestes pol PSOE van escontra los de siempre: les y los trabayadores. Ponse nel disparaderu a los emplegaos públicos, culpándomos por tener (dellos) un trabayu estable, escaeciendo a los miles de temporales qu’agora pretenden poner na cai. Rebaxen los salarios una media del 5 % esti añu, pese a que práuticamente yá teníemos conxelaes les nueses retribuciones (por mor d’un alcuerdu con UXT, CC OO y CSIF, qu’agora incumplen); conxelen les retribuciones yá devaluaes pal añu que vien. Conxelen la mayoría de les pensiones pese al Pautu de Toledo, paralicen gran parte de les inversiones públiques, reducen l’aportación a la cooperación al desarrollu, pretenden entamar el copagu de los gastos sanitarios... Nun se diz un vierbu de cuála va ser l’aportación de los que más tienen, nun se diz un vierbu de les grandes bolses de fraude fiscal, nun se diz un vierbu de pidir responsabilidaes a los causantes de la crisis. Equí paguen los de siempre: les y los trabayadores.

¿Cómo respuenden los sindicatos mayoritarios?

Énte estes midíes, los “sindicatos mayoritarios” llancen en solitario una convocatoria de fuelga en tol sector públicu pal 8 de xunu qu’entra, y dempués llamen a los demás a sumamos a la mesma, mientres siguen sentaos col gobiernu y patronal negociando otra reforma llaboral, que nun pue consistir más que nuna vuelta de tuerca más a la xente trabayador. Énte esta agresión continuada na CSI entendemos que nun hai res que negociar y que nun cabe más que la FUELGA XENERAL y la confrontación xeneral énte un gobiernu y una Xunión Europea que nun son quien a atacar a los responsables verdaderos de la crisis. Tarrecemos qu’esti tipu de convocatories sectoriales sían la sida pa nun llanzar una respuesta contundente, qu’esta convocatoria sirva de sida y que suponga una apa pa pautar, dividir y desmovilizar en nome de la “responsabilidá”.

¿Qué fai la Corriente?

Paralelamente, n’Asturies, dende la Corriente Sindical d’Izquierda entamemos movilizaciones de manera unitaria con toles centrales sindicales con representación na alministración –sacante UXT y CC OO, que dende l’empiezu foron por llibre–, que remató nes manifestaciones del 19 de mayu y del 2 de xunu n’Uviéu, nes que participaron miles de persones emplegaes públiques. Y comprometémosmos a siguir nel mesmu camín de resistencia y llucha.

Sobren los motivos

Insistimos: esti ye un problema global qu’afeuta a la sociedá en conxuntu; sobren los motivos pa movilizase y nun quedar callaos. Pero ye que, puestos a recortar ¿por qué nun recorten –o suprimen, según el casu– los sueldos vitalicios de los políticos, los gastos militares, les subvenciones y los lliberaos institucionales de sindicatos, partíos políticos y organizaciones empresariales, los beneficios de la banca, les subvenciones a la Ilesia católica, los conciertos con colexos privaos, el presupuestu de la Casa Real, los chiringuitos innumerables, etc., etc., etc.?

*Estaya de l'Alministración Autonómica de la CSI

lunes, 7 de junio de 2010

Fai! tuvo na concentración escontra la incineradora de residuos en Xixón


La organización d'esquierda soberanista acudió a la convocatoria de la Plataforma de Ganaderos y Afectaos escontra la Incineradora y del Consorciu Cívicu pa refugar la instalación d'un fornu de residuos na enésima midida contra'l patrimoniu ambiental y la salú de los y les asturianos/es. Na pancarta de Fai! podía lleese "La puxarra ta pa reciclar, non pa gobernar". Analís de Fai!:

PSOE-PP-IX,
la basoria qu'afuega en Caliao,
que quema en Serín,
y que mos tira de la llingua...

Les bilurdies del Gobiernu y la prensa asturianos.

1. La capacidá del vertidoriu de Coxersa escosará nel 2015.
Falso. Lo que ta escosando ye'l frenti de vertíos d'anguaño. Y hai qu'adicar que nel mesmu vertidoriu hai delles plantes de tratamientu de desechos. De los aprox 3.000.000 tonelaes añales de residuos industriales cuasi toos poseyen vertidorios controlaos y específicos non xestionaos por Coxersa, y el restu (un 14% del total) son urbanos. Sicasí Coxersa namás recicla'l 10% (52.286 de 526.000 tonelaes) de los residuos urbanos, ún de los porcentaxes más baxos del Estáu Español. El problema ye la incompetencia (convenida) na xestión de residuos nestos caberos años per parte de la direición de Coxersa (Santiago Fernández) y de la conseyería de mediu ambiente presidida por Belén López. Amás la planta sedría incompatible col reciclaxe, dao qu'obligaría a quemar el 85% de los redisuos domésticos.

2. La incineradora acabaría col problema de los vertidorios.
Falso. Principalmente porque precisaría d'otros dos más onde almacenar les povises y la escoria xenerao altamente contaminante.

3. La so instalación crearía munchos puestos de trabayu.
Falso. El reciclaxe y la recoyida selectiva xeneraríen 10 veces más puestos de trabayu amás de que los ayuntamientos recibiríen más beneficios al xestionar estos recursos.

4. La incineradora nun ye contaminante nin perxudicial pa la salú.
Falso. Aumentaría la emisión de CO2 en 600.000 tonelaes al añu. Otros gases qu'emitiría como dioxines, furanos y metales pesaos son altamente canceríxenos, bioacumulables y alteradores hormonales y del ADN. Arriendes d'ello, la so cercanía a importantes noyos urbanos, rurales y semirurales (habiendo nesi radiu de 10km una población de 600.000 habitantes) contaminaría estes zones perxudicando a ganaderos y agricultores y introduciéndose na cadena alimentaria.

5. Nun hai otra solución.
Falso. De les 526.000 tonelaes añales de basoria 226.000 son desechu orgánicu domésticu y 100.000 tonelaes correspuenden a la basa de depuradores. Combinando l'almacenamientu en vertidoriu, el reciclaxe y la biometanización nuna planta capaz de tratar alrodiu 300.000 tonelaes, cuya construcción precisa la metá qu'el d'una incineradora y el so mantenimientu hasta 6 vegaes menos, nun habría falta de quemar residuu dalu.

6. Entós ¿Por qué quieren construyir una incineradora?
Por cada tonelada incinerada l'alministración ha pagar 60€ a la empresa xestionadora de la planta incineradora. Los contratos con estes empreses suelen ser d'ente 25 y 30 años, polo que ye un negociu mui rentable pa éstes y por consiguiente pa los políticos y amigos propietarios d'élles. Los que nun vamos salir tan beneficiaos vamos ser los asturianos, pos amás d'incrementase la tasa de basoria 5 veces, vamos financiar col nuesu dineru una instalación tóxica que va menguar la nuesa salú, conxelar les futures polítiques de reciclaxe y financiar a una empresa privada dende les arques públiques.

domingo, 6 de junio de 2010

UN AÑU D’USU Y DISFRUTE


Fai un añu un xulgáu de Xixón dictaba sentencia sobre’l desaloxu de la nave que tiempu atrás albergó les instalaciones de la fábrica FLEX nel barriu de La Calzada, y que’l 11 de Xunetu de 2008, tres 10 años d’abandonu, suciedá y goteres, un piñu de mozos y moces decidieron recuperar pal usu comunitariu y social de la xente. En dicha sentencia, la xueza encargada del casu ordenaba a los y les activistes contra la especulación que desaloxaran l’edificiu y que-y lu reintegrarán al su “lexítimu” dueñu, Construcciones Llorente SL, pa qu’ésti pudiere llevar a cabu “l’usu y disfrute” de les sus instalaciones. Amás, por mor d’unes identificaciones arbitraries de la policía díes antes del desaloxu, delles persones fueron acusaes d’un delitu de “usurpación” y tán agora mesmo a la espera de xuiciu.

Pasó tou un añu enteru dende aquel desaloxu, dende aquel 5 de Xunu de 2009, y les instalaciones de la FLEX, que durante 11 meses abellugaron al Centru Social Okupáu y Autoxestionáu La ReFLEXón, vuelven a ser un sumideru de suciedá y abandonu, un edificiu gris, apagáu y ensin vida. Les charres, los talleres, los conciertos, les proyecciones cinematográfiques, les xintes populares, el mercáu de gratuidá, los recitales de poesía, l’autoxestión, la solidaridá y el trabayu en comuña dieron pasu de nueu al abandonu y la especulación, gracies al interés, o desinterés, según se mire, de Construcciones Llorente y de la mal llamada Xusticia.

Pero’l CSOA La ReFLEXón nun morrió aquel 5 de Xunu. El CSOA La ReFLEXón siguió y sigue vivu. Porque la especulación nun acabó aquel día, y porque la decisión de llevar a cau un movimientu horizontal, asambleariu y anticapitalista nes instalaciones de l’antigua fábrica de FLEX nun fue’l caprichu d’una xente. Aquella xente siguió buscando sitios afayaízos pa denunciar la especulación inmobiliaria y llevar alantre el su proyectu anticapitalista, ocupó simbólicamente un edificiu na Cai Los Moros pa festexar l’aniversariu del proyectu y desechó unos cuantos más por tar en condiciones ruinoses. Pero la búsqueda continúa, porque son innumerables los edificios qu’hai en Xixón abandonaos a la espera de tiempos meyores pa los intereses especulativos, y más que va haber de siguir estos tiempos de recortes sociales, desempléu y precariedá. El tiempu danos y siguirá dándonos la razón, y nós siguiremos denunciando la especulación inmobiliaria y lo inxusto d’esti sistema capitalista.

En Xixón, a 5 de Xunu de 2010. L’asamblea nel exiliu del CSOA La ReFLEXón.

sábado, 5 de junio de 2010

Inspección nun dexa poner clase d'asturianu n'Infantil


Xulio Llaneza, mayestru del Colexu Públicu Elena Sánchez Tamargo de La Pola Llaviana denunció públicamente que la Inspección Educativa nun permite al centru implantar l'asignatura de Llingua Asturiana n'Educación Infantil, basándose en que nun ta nel Currículu pa esti nivel educativu. El docente recordó que'l propiu Tribunal Superior de Xusticia d'Asturies refugó un recurso del sindicatu Suatea contra esti currículu por esti vacíu, señalando la resolución que la Llingua si taba incluyida dientru del conceutu cultura asturiana.

Xulio Llaneza Fernández aprofitó la so intervención nel actu d'entrega de los premios de l'Academia de la Llingua -foi ganador del premiu de recoyida oral de Léxicu- pa denunciar la situación. "Un día llegó la direutora esplicando que la inspectora dixo-y que nun se pue dar asturianu n'Infantil porque nun está nel currículu", declaro más tarde a l'axencia Europa Press.

"Tamos dando asturianu con una bona aceptación en primaria, con alredor de 70% de alumnos que lo escueyen. Pensamos la posibilidá d'empicipiar n'infantil, porque tenemos profesores titulaos, con una interina a tiempu completu, y unos cuantos más fixos que tenemos la capacitación y el equipu directivu yera favorable a ello, y sabemos qu'hai otros sitios n'Asturies onde lo dan" esplicó.

Fonte: Infoasturies.

L’Imperiu y la Mentira


Nun me quedó otra alternativa qu’escribir dos cavilgues sobre Irán y Corea, qu’espliquen el peligru inminente de guerra col emplegu de l’arma nuclear. De la mesma, espresé yá la opinión de qu’unu d’ellos podía iguase si China decidía vetar el resolvimientu qu’Estaos Xuníos promueve nel Conseyu de Seguridá de Naciones Xuníes. L’otru depende de fautores qu’escapen a toa posibilidá de control, por cuenta de la conducta fanática del Estáu d’Israel, convertíu por Estaos Xuníos a la so actual condición de fuerte potencia nuclear, que nun acepta control nengún de la superpotencia.

Cuando se produz la primer intervención d’Estaos Xuníos pa entartallar la Revolución Islámica en xunu de 1953, en defensa de los sos intereses y los del so estrechu aliáu’l Reinu Xuníu, que llevó al poder a Mohammad Reza Pahlevi, Israel yera un pequeñu Estáu que nun s’apoderó tovía de cuasi tol territoriu palestín, parte de Siria y non poco de la vecina Xordania, defendida hasta entós pola Lexón Árabe, de la que nun quedó nin la solombra.

Güei los cientos de cohetes con oxives nucleares, sofitaos polos aviones más modernos que-y suministra Estaos Xuníos, amenacien la seguridá de tolos Estaos de la rexón, árabes y non árabes, musulmanes y non musulmanes, que tán al algame del ampliu radiu d’aición de los sos proyeutiles, que pueden cayer a pocos metros de los sos oxetivos.

El domingu 30 de mayu pasáu, cuando escribí la reflexón L’imperiu y la droga, nun asocediera tovía’l brutal ataque contra la flotilla que tresportaba cebera, melecines y artículos pal millón y mediu de palestinos sitiaos nun pequeñu fragmentu de lo que fuera la so propia Patria mientres miles d’años.

La inmensa mayoría de les persones inverten el so tiempu y lluchen pa enfrentar les necesidaes que-yos impon la vida —ente elles l’alimentu, el derechu a la recreación y al estudiu, y otros problemes vitales de los familiares más allegaos—; nun pueden detenese na busca d’información sobre lo que ta asocediendo nel planeta. Unu velos en cualesquier parte con espresiones de nobleza y col enfotu de qu’otros s’encargarán de buscar soluciones a los problemes que los aforfuguen. Son capaces d’allegrase y sonrir. Allegren d’esta forma a los que tenemos el privilexu de reparar con ecuanimidá les realidaes que nos amenacien a toos.

L’inventu perestrañu de que Corea del Norte fundiera la corbeta sudcoreana Cheonan —diseñada con teunoloxía punta, dotada con un ampliu sistema de sonar y sensores acústicos somarinos—, n’agües asitiaes frente a les sos costes, culpábala del bederre fechu que costó la vida de 40 marinos surcoreanos y decenes de mancaos.

Nun yera fácil pa mi desentrañar el problema. Nun tenía, per un sitiu, la forma d’esplicame que fuera posible pa gobiernu dalgunu, por muncha autoridá qu’esfrutara, utilizar los mecanismos del mandu pa dar la orde de torpediar una nave insinia. Per otru llau, nun creyí per un segundu la versión de que Kim Jong Il diera esa orde.

Escarecía d’elementos de xuiciu pa llegar a una conclusión, pero tenía la seguridá de que China vetaría un proyeutu de resolvimientu del Conseyu de Seguridá que sancionara a Corea del Norte. Per otru llau nun tenía dulda dalguna de qu’Estaos Xuníos nun puede evitar l’emplegu de l’arma nuclear por parte del gobiernu incontrolable d’Israel.

N’hores avanzaes del día 1u de xunu empezó a descorrese’l velu de lo que realmente asocedió.

Escuché a les 10 y 30 p.m. el conteníu d’un analís agudu del periodista Walter Martínez, qu’ellabora Dossier, programa estelar de la televisión venezolana. Él llegó a la conclusión de qu’Estaos Xuníos fixo creer a una y otra parte de Corea lo que caúna d’elles afirmaba de la otra, coles mires de resolver el problema de la devolución del territoriu ocupáu pola base d’Okinawa que’l nuevu líder de Xapón, faciéndose ecu de les enganíes del país, demandaba. El so partíu llogró un enorme respaldu nes eleiciones por cuenta d’esa promesa de so pa llograr el retiru de la base militar ellí instalada, que ye un puñal claváu dende va más de 65 años nel corazón de Xapón, güei desarrolláu y ricu.

Al traviés de Global Research conócense los detalles verdaderamente estelantes de lo qu’asocedió, gracies al artículu de Wayne Madsen, periodista investigador que trabaya en Washington, que sopelexó información de fontes d’intelixencia nel sitiu web Wayne Madsen Report.

Diches fontes —afirmó— "...abarrunten que l’ataque contra la corbeta de guerra antisomarina de l’Armada surcoreana Cheonan foi un ataque de bandera falsa fechu por que paeciera provenir de Corea del Norte."

"Unu de los propósitos principales pal aumentu de les tensiones na península coreana yera aplicar presión sobre’l primer ministru xaponés Yukio Hatoyama pa que camudare de política sobre’l retiru d’Okinawa de la base del Cuerpu de Marinos d’EE.XX Hatoyama almitió que les tensiones pol fundimientu del Cheonan tuvieron una importante influencia na so decisión de dexar que los marinos de EE.XX permanecieren n’Okinawa. La decisión d’Hatoyama llevó a una división nel gobiernu de la coalición de centroizquierda, un fechu saludáu en Washington, pola amenaza del líder del Partíu Socialdemócrata, Mizuho Fukushima, d’abandonar la coalición pol cambéu d’actitú sobre Okinawa.

"El Cheonan foi fundíu cerca de la islla Baengnyeong, un llugar del estremu occidental alloñáu de la mariña surcoreana, pero frente a la mariña norcoreana. La islla ta altamente militarizada y dientro del algame de fueu d’artillería de les defenses costeres norcoreanes, que ta al otru llau d’una estrecha canal.

"El Cheonan, una corbeta de guerra antisomarina, tenía sonar de teunoloxía punta, y amás operaba n’agües con amplios sistemes de sonar hidrófonu y de sensores acústicos somarinos. Nun esiste evidencia suecoreana de sonar o d’audiu d’un torpedu, somarín o mini-somarín nel área. Una y bones nun hai casi navegación na canal, la mar taba silenciosa nel momentu del fundimientu.

"Sicasí, la islla Baengnyeong alluga una base d’intelixencia militar estaunidense-surcoreana y SEALS [fuerces especiales] de l’Armada d’EE.XX operen dende la base. Amás, había cuatro barcos de l’Armada d’EE.XX nel seutor, parte del Exerciciu Foal Eagle EE.XX-Corea del Sur, mientres el fundimientu del Cheonan. Una investigación de les buelgues metáliques y químiques del torpedu sospechosu amuesa que ye de producción alemana.

"Esisten barruntos de que los SEALS de l’Armada d’EE.XX caltienen una amuesa de torpedos europeos con fines de denegabilidá plausible p’ataques de bandera falsa. Amás, Berlín nun viende torpedos a Corea del Norte, sicasí, Alemaña caltien un programa d’estrecha cooperación de desenvolvimientu conxuntu de somarinos y armes somarines con Israel.

"La presencia del USNS Salvor, unu de los participantes en Foal Eagle, tan cerca de la islla Baengnyeong mientres el fundimientu de la corbeta surcoreana, tamién amena entrugues.

"El Salvor, un barcu civil de salvamentu de l’Armada, que participó n’actividaes d’allugamientu de mines polos marines tailandeses nel Golfu de Tailandia en 2006, tuvo presente cerca del momentu de la esplosión, con un complementu de 12 buzos d’agües fondes.

"Beixín, satisfecha cola afirmación d’inocencia de Kim Jong Il de Corea del Norte dempués d’un viaxe urxente en tren de Pyong Yang a Beixín, barruntu del papel de l’Armada de EE.XX nel fundimientu del Cheonan, asociáu a barruntos particulares respeutu al papel xugáu pol Salvor. Los barruntos son los siguientes:

"1. El Salvor participaba nuna operación d’instalación de mines nel llechu marín; n’otres pallabres, asitiaba mines antisomarinas disparaes horizontalmente no fondero de la mar.

"2. El Salvor taba realizando inspeición rutinaria y caltenimientu de mines nel llechu marín, y asitiándoles nuna manera eleutrónica activu —disparu por gatíu sensible— como parte del programa d’inspeición.

"3. Un buzu de los SEALS asitió una mina magnética nel Cheonan, como parte d’un programa clandestín col enfotu d’influyir la opinión pública en Corea del Sur, Xapón y China.

"Les tensiones na península coreana clisaron convenientemente tolos demás puntos de l’axenda nes visites de la secretaria d’Estáu Hillary Clinton a Beixín y Seúl."

Asina, de forma ablucantemente fácil, Estaos Xuníos llogró resolver un importante problema: liquidar el gobiernu d’Unidá Nacional del Partíu Demócrata de Yukio Hatoyama, pero a un peraltu costu:

1- Ofendió fondamente a los sos aliaos de Corea del Sur.

2- Destacó l’habilidá y rapidez con qu’actuó’l so alversariu Kim Jong Il.

3- Resaltó’l prestíu de la potencia china, que’l so Presidente con plena autoridá moral movióse personalmente y unvió a los principales líderes de China a falar col Emperador Akihito, el Primer Ministru y otres personalidaes eminentes de Xapón.

Los líderes políticos y la opinión mundial tienen una prueba del cinismu y la falta total d’escrúpulos que carautericen la política imperial d’Estaos Xuníos.

Fidel Castro Ruz

viernes, 4 de junio de 2010

Cuasi mediu millar de persones manifestáronse en Xixón contra l'ataque israelí a la 'Flota de la Llibertá'


Al traviés d'una convocatoria rápida y en poques hores por parte del Comité de Solidaridá cola Causa Árabe d'Asturies (CSCA), cuasique mediu millar de persones manifestáronse na tarde del llunes en Xixón en solidariedá con Palestina y en protesta pol ataque del exercitu d'Israel a la flota de la Llibertá, compuesta por seyes embarcaciones con 10 tonelaes d'ayuda humanitaria y unes 750 persones col resultáu de 10 muertos.

Pesie a lo apresurao de la convocatoria por mor del terscursu de los acontecimientos, cerca de quinientes persones concentráronse nel Paséu Begoña a les 20:00 hores. Tres la llectura del comunicáu refugando y condergando l'aición asesina y dexar clara la composición de la Flota de la Llibertá, el CSCA, tomaron la decisión de marchar hasta la Plaza del Ayuntamientu.

Nel percorríu peles cais de Xixón glayaronse consignes como: “¡Boicot a Israel!”, “¡Llibre, llibre, Palestina llibre!”, “¡Toos somos palestinos!” o “¡Vosotros sionistes, sois los terroristes!”

Fonte: INFOASTURIES.

Areces nauguró una fábrica de tortilles


Ye bien conocida l'afición del presidente del "Principado", Vicente Álvarez Areces, a les tortilles. Pues bien, esti llunes, foi unu de los más felices ya importante dende que llegare a la presidencia.

Ensin dubia, foi la nauguración suañada dempués de cientos d'elles (dalgunes ensin los naguaos pinchinos de tortilla) en tantos años de dura dedicación a la política. En Mieres entamaba a furrular una fábrica de la portuguesa Ovofoods que tien de productu estrella la tortilla y que ye la punta de llanza del plan reindustrializador del gobiernín.

Naz nel polígonu de baiña con unes ayudes de más de cinco millones d'euros por ser un proyectu xenerador d'emplegu nes cuenques mineres, la planta va porcesar namás y namenos que trés millones de güevos diarios y tropecientes tortielles. Ensin dubia, cola instalación inaugurada por Areces, Asturies conviertese nun país productor de tortilla

Fai! cellebró la II Folixa " Asturies enxamás vencida".


"Xixón cellebró la II Folixa Asturies Enxamás Vencida

Como taba previsto, la organización d'esquierda soberanista Fai! llevó alantre la II Folixa Asturies Enxamás Vencida el pasáu sábadu 22 de mayu na Casa Sindical de Xixón conmemorando d'esti xeitu'l 202 aniversariu de los acontecimientos del 25 mayu de 1808 n'Asturies.

Esta xornada entamó a les 20:00h nel salón d'actos de la Casa Sindical cola actuación de Da Robotz, con un recintu engalanáu con una bandera nacional de decenes de metros cuadraos que taba escoltada poles enseñes d'otres naciones ensin estáu européees (Euskal Herria, los Paisos Catalanes, Llión, Andalucía, Escocia, Irlanda...) ensin escaecer les de Palestina y el Sáhara. Al tiempu, una referencia a la llucha popular del pueblu de Grecia, con un gran panel nel que se lleía "Pueblos d'Europa irguíivos" n'inglés (Peoples of Europe...¡rise up!) que finaba con un "Asturies írguite".


Mentanto los asistentes diben entrando y disfrutando de la música lletrónico medraba'l baturiciu alrodiu los puestos de material de les organizaciones y espacios convidaes (les organizaciones polítiques UNA, Darréu, CMC, Coordinadora Antifacista d'Asturies, RASH-Asturies y el llocal Cambalache) y de la barra onde se podía consumir bébora y xinta con precios populares.

Soles 23:00 vieno la breda de Galán, raperu natural de Tresona (Corvera), que caleció l'ambiente'l salón coles sos rimes combatives ya iróniques, dándo-y pasu a les afilaes lletres d'Arma X gociando dambos de la devoción del públicu, que pudo esfrutar coles collaboraciones de Delfo (La Tarrancha) nún tema.

Escontra les 2:00 am aportó l'actuación de "La Tarrancha" que col so soníu informal y mestizu preparó'l tarrén pa los aragoneses Mallacán. La mecigaya d'estilos, la so música fiero y identitario foi bien acoyío poles y polos asturianos que s'averaren a la Casa Sindical como bien demostró la grande cantidá de discos vendíos nel puestu instaláu nel conciertu. A mou de dispidida final Xune, cantante del autóctonu más que reconocíu grupu Dixebra, acompangó a esti grupu nel cantar Gora Herria, versión del míticu grupu Negu Gorriak, cosa que foi bien agradecida polos y poles presentes nuna collaboración inédita y que dexó entregaos a los y les presentes.

Dende Fai! queremos agradecer fonderamente a tolos grupos, organizaciones y xente individual poles cellebrar xuntos esta II Folixa Nacional (y toles facilidaes y collaboraciones que y animavos a participar l'añu que vien.

¡PUXA'L 25 DE MAYU!

¡PUXA ASTURIES LLIBRE!

Toles semeyes en: http://www.flickr.com/photos/fai-asturies/ en formatu copyleft, non deriváu comercial."


Estrayiu de la páxina web de Fai!.

miércoles, 2 de junio de 2010

L’Imperiu y la Guerra


Va dos díes, en curties pallabres, señalé que l’imperialismu nun podía resolver el pergrave problema del consumu d’estupefacientes qu’azota a la población del mundu. Güei deseo encetar otru tema al mio xuiciu de gran trescendencia.

L’actual peligru de que Corea del Norte seya atacada por Estaos Xuníos, a partir del recién incidente que tuvo llugar nes agües d’esi país, seique pueda evitase si’l Presidente de la República Popular China decide utilizar el derechu de vetu, prerrogativa que nun-y gusta n’absolutu a esi país exercer nos alcuerdos que s’alderiquen nel Conseyu de Seguridá de Naciones Xuníes.

Esiste un segundu y más grave problema pal qu’Estaos Xuníos nun tien respuesta posible: el conflictu creáu tocante a Irán. Ye daqué que se vía venir claramente desque’l Presidente Barack Obama pronunció’l so discursu’l 4 de xunu de 2009 na Universidá Islámica d’A el-Azhar, en El Cairu.

Nuna reflexón qu’escribí entós, cuatro díes más llueu, cuando dispunxi d’una copia oficial del discursu, utilicé numberoses cites p’analizar la importancia del mesmu.

Voi Señalar un númberu d’elles.

"Rexuntamos nun momentu de tensión ente Estaos Xuníos y musulmanes alredor del mundu…"

"…el colonialismu negó-yos derechos y oportunidaes a munchos musulmanes,…la Guerra Fría de cutiu utilizaba a los países de mayoría musulmana como axentes, ensin tener en cuenta les sos aspiraciones propies."

Impresionaben realmente esi y otros razonamientos en boca d’un Presidente afroamericanu, que paecíen verdaes evidentes como les conteníes na Declaración de Filadefia’l 4 de xunetu de 1776.

"Vini equí a buscar un nuevu empiezu pa Estaos Xuníos y musulmanes alredor del mundu, que se base n’intereses mutuos y el respetu mutuu…"

"Como nos diz el Sagráu Corán, ’tengan conciencia de Dios y digan siempres la verdá’."

"…ye parte de la mio responsabilidá como Presidente d’Estaos Xuníos lluchar contra los estereotipos negativos del Islam uquier que surdan."

Siguió asina esbillando temes escabrosos del universu de contradicciones insolubles qu’envolubren la política d’Estaos Xuníos. "Metanes la Guerra Fría, Estaos Xuníos desempeñó un papel nel derrocamientu d’un gobiernu iranín escoyíu democráticamente."

"Dende la Revolución Islámica, Irán desempeñó un papel en secuestros y actos de violencia contra militares y civiles estaunidenses."

"Los estrechos venceyos d’Estaos Xuníos con Israel son bien conocíos. Esti venceyu ye infrayable."

"Munchos esperen, en campamentos pa refuxáu na Ribera Occidental, Gaza y tierres de la redolada, una vida de paz y seguridá que nunca tuvieron."

Güei sabemos que sobre la población de Gaza cai con frecuencia un agua de fósforu vivu y otros componentes inhumanos y crueles, llanzaos sobre la Franxa, con roxura verdaderamente nazi fascista. Sicasí, les afirmaciones d’Obama paecíen vibrantes y n’ocasiones sinceres, en tanto diba repitiéndoles una y otra vegada, metanes febril cuerre cuerre pel mundu, uquier qu’a la so hora programada llegaba l’avión númberu ún de la Fuercia Aéreo d’Estaos Xuníos.

Ayeri 31 de mayu, la comunidá internacional foi conmocionada col asaltu, n’agües internacionales a decenes de milles de la mariña de Gaza, de cásique un cientu de soldaos de les fuercies especiales d’Israel, que baxaron dende helicópteros n’hores de la madrugada, disparando frenéticamente contra centenares de pacífiques persones de diverses nacionalidaes, causándo-yos —según informaciones de prensa— non menos de 20 muertos y decenes de mancaos. Ente les persones atacaes, que tresportaben mercancíes pa los palestinos sitiaos na so propia Patria, había ciudadanos norteamericanos.

Cuando Obama faló na Universidá Islámica d’A el-Azhar del derrocamientu d’un gobiernu iranín escoyíu democráticamente" y darréu añedió que "Dende la Revolución Islámica, Irán desempeñó un papel en secuestros y actos de violencia contra militares y civiles…", referíase al movimientu revolucionariu promovíu pol Ayatollah Ruhollah Jomeini, que dende París, ensin una sola arma, entartalló a les Fuercies Armaes del más poderosu xendarme con qu’Estaos Xuníos cuntaba nel Sur d’Asia. Yera bien difícil que la más poderosa potencia del mundu aguantara la tentación d’instalar ellí una de les sos bases militares, al Sur de la URSS.

Fai yá más de cinco décades, Estaos Xuníos entartallara otra Revolución absolutamente democrática, cuando derrocó’l gobiernu iranín de Mohammad Mossadegh. Esti foi elixíu Primer Ministru d’Irán el 24 d’abril de 1951. El senáu aprobó la nacionalización del petróleu, que fuera la so bandera de llucha, el 1 de mayu d’esi mesmu añu. "Los nuesos llargos años de negociaciones con países estranxeros ―declaró― nun dieron resultancia hasta equí."

Ye obviu que se taba refiriendo a les grandes potencies capitalistes, que controlen la economía mundial. Irán tomó posesión de les instalaciones énte la intransixencia de la British Petroleum, qu’entós llamábase Anglu-Iranian Oil Company.

El país nun tenía posibilidaes de formar téunicos. Gran Bretaña retirara’l so personal calificáu, y respondió con bloqueos de pieces y mercaos. Unvió la so flota de guerra en zafarranchu de combate al país. Como resultáu, la producción petrolera d’Irán menguó de 241,4 millones de barriles en 1952, a 10,6 en 1953. Neses favorables condiciones la CIA entamó’l golpe d’Estáu que derrocó a Mossadegh, hasta la so muerte que tuvo llugar trés años dempués. La monarquía foi reestablecida y un poderosu aliáu d’Estaos Xuníos xubió al poder n’Irán.

Estaos Xuníos nun fixo otra cosa colos demás países que nun seya eso; desque se creó esa nación nos suelos más ricos del planeta, nun respetó nunca los derechos de los pobladores indíxenes qu’ellí vivieron mientres milenios o fueron importaos como esclavos polos colonizadores ingleses.

Toi seguru, sicasí, de que millones de norteamericanos intelixentes y honestos entienden estes verdaes.

El Presidente Obama puede pronunciar cientos de discursos, tratando de conciliar contradicciones que son inconciliables en desterciu de la verdá, suañar cola maxa de les sos frases bien articulaes, mientres fai concesiones a personalidaes y grupos carentes dafechu d’ética, y dibuxar mundos de fantasíes que namái caben na so cabeza y qu’asesores ensin escrúpulos, conociendo los enclinos suyos, semen na so mente.

Dos entrugues obligaes: ¿va poder Obama esfrutar les emociones d’una segunda eleición presidencial ensin que’l Pentágonu o l’Estáu d’Israel, que nel so comportamientu nun acata en nada les decisiones d’Estaos Xuníos, utilicen les sos armes nucleares n’Irán? ¿Cómo va ser la vida nel nuesu planeta dempués d’eso?


FIdel Castro Ruz

martes, 1 de junio de 2010

Ñaz un nuevu partíu asturianista en Corvera


Esti xueves 3 de xunu preséntase MAS Corvera, una nueva agrupación que quier representar a tol asturianismu del conceyu "siendo una alternativa a los partíos tradicionales".

MAS Corvera defínese como unpartiu políticu de calter local inspiráu nos principios de la democracia social, los derechos humanos y de los pueblos, el desendolcu caltenible y la defensa del mediu ambiente, la xusticia, la paz y la solidaridá internacional.

L’agrupación diz asumir como propia la hestoria y aportación del socialismu democráticu, na defensa de los drechos de los más desfavorecíos y na llucha pola construcción d'una sociedá más xusta y igualitaria, “apostando nidiamente por mecanismos de participación ciudadana, como lo ye la democracia participativa.

La presentación oficial d’esta nueva candidatura asturianista ye’l próximu xueves 3 de xunu a les 16.30 nel Centru Sociocultural de Los Campos en Corvera, na mesma intervendrá’l secretariu xeneral de la formación, Xicu Mata

Fonte: Asturies.com

Vidiu del pasucais del XIII Día d'Andecha en Villaviciosa