Naz el Centru Social La Semiente en L'Entregu

Esti vienres di 29 d’abril va presentase un nuevu proyectu social en L’Entregu, el Centru Social La Seminete, una iniciativa que surde ente "la desidia, la desmovilización, l’apatía, la falta de perspectives y la monotonía" asina un grupu de xente variao, dende estudiantes a paraos, trabayadores en precario, xubilaos/es decidieron xuntase "pa facer coses pola zona na que viven". Asina como xurde l’Asociación Cultural la Semiente, que pon en marcha un centru social autoxestionáu dende’l que coordinar toes eses acividaes.

El centru ñaz cola idea de tar abiertu a toles persones que quieran participar, ansí como tamién a qu’otros colesctivos o asociaciones puedan usar esi espaciu tanto pa reunise como pa realizar acividaes. Dende el Centru Social La Semiente quieren faese actividaes culturales y sociales qu’abarquen tanto cuestiones locales a otres d’indole global e internacional, como puen ser los conflictos en distintes partes del mundu.

La primer actividá "L’Entregu ayer y güei” va tener llugar esi vienres día 29, na que se va faer una proyección audiovisual con imáxenes antigües y nueves de L’Entregu. L’actu va tener llugar nel andén de lo que yera l’antigua estación de RENFE. Con esta actividá arranca La Semeinte que tien previsto ya pal mes de mayu un ciclo de cine-forum entitulau “Cine y música” que sedrá públicu y gratuitu, y tendra cita tolos miércoles del mes a les 20.00 nel centru Social La Semiente.

Pal dia 6 de mayo, ta programada tamién una Timba PoétiKa, onde se va mezclar la música la poesia y les mas modernes técniques audiovisuales con D.J. ANTISTAILO acompañando la axitación poética de Pablo X. Suárez, Miguel Allende, Sergio S. Taboada y Suarón, aparte de delles colaboraciones de poétes locales. Esti mesmu mes y coincidiendo col aniversariu del Mayo del 68, va faese tamien una charra/alderique sobre Mayo del 68 y los movimientos estudiantiles.

Concidiendo col 1 de Mayu, La xSmiente va tar colaborando xunto col FUSOA, na celebración dela IX FOLIXA DEL 1 DE MAYU, qu’esti añu dexa la so ubicación natural en Xixón pa faese en Ciañu-Llangreu. El Cine Ideal de Ciañu reunirá sol escenariu a la banda interactiva catalana Insershow y a los asturianos Skama la Rede, La Tarrancha y Arma X. El conciertu sedrá a les 20.00 hores del Domingo 1 de mayu y tien un preciu de 5 euros anticipada y 7 en taquilla.

¡PUXA!

Proclamaes les candidatures n’asturianu de Conceyu Abiertu por Llangréu y Conceyu Abiertu por Samartín del Rei Aurelio

Finalmente, la Xunta eleutoral de Llaviana, tres el recursu presentáu’l pasáu domingu polos representantes de Conceyu Abiertu del Nalón proclamó como oficiales les candidatures presentaes n’asturiano de Conceyu Abiertu por Llangréu y Conceyu Abiertu por Samartín del Rei Aurelio. Los representantes de Conceyu Abiertu basándose na sentencia 48/2000, de 24 de febreru, del Tribunal Constitucional (BOE nº 76, 29 de marzu de 2000), solicitaron se proclamasen les candidatures de Conceyu Abiertu por Llangréu y Conceyu Abiertu por Samartín del Rei Aurelio, tal y comu se presentaron inicialmente, en llingua asturiana.

Esta sentencia del Tribunal Constitucional del añu 2000, sentó un precedente hestóricu, y anuló’l determín de la Xunta Ellectoral Provincial d’Asturies de nun proclamar les candidatures de la organización política Andecha Astur al Congresu los Diputaos y al Senáu pola mesma razón. Nesta sentencia se reconoz que nun proclamar les candidatures n’asturiano supondría una vulneración del drechu de les persones a acceder a los cargos públicos en condiciones d’igualdá.

Dende Conceyu Abiertu del Nalón, lamentamos esti nuevu casu tan claru de represión escontra la llingua asturiana, otru claru intentu de desaniciu de los nuesos raigaños. L’emplegu de la llingua asturiana, arriendes de ser un drechu humanu evidente, ta proclamáu comu drechu fundamental na Declaración Universal de los Drechos Humanos, el Conveniu Européu de Drechos Humanos, la Costitución española y el mesmu "Principado" lu recueye na "llei d’usu y promoción del bable/asturianu”. Afortunadamente, nesta ocasión tenemos que tar contentos porque gracies al recursu presentáu por Conceyu Abiertu, los drechos que como ciudadanos y ciudadanes asturianos/ es mos correspuenden fueron respetaos.

Dende Conceyu Abiertu pol Nalón animamos a tola ciudadanía a sumase a nós, a participar nos conceyos abiertos del so conceyu o a crear uno nueu, animamosvos a qu’apostéis por una braera democracia participativa municipal que controle les instituciones y recupere la esencia d'una política llocal fecha por y pal pueblu.

www.conceyuabiertu.org

Manifestación 1u de Mayu.

Cartelu de la manifestación del 1u de mayu, ensín sindicatos de lliberaos que s'enriquecen a costa'l paru y roblen pautando cola patronal los retayos sociales y los despidos. ¡ Dica'l sindicalismu de clas y patriota asturianu!

PUXA ASTURIES ROXA

CAÑA ESCONTRA ESPAÑA

IX Folixa del 1eru Mayu en Llangréu.

La vindicación llingüística asturiana aporta al Polu Norte.

El pasáu 9 d'abril nel Polu Norte xeográficu (90º llatitú Norte) y a una temperatura de - 32º C tuvo presente la petición de la oficialidá pa la lllingua asturiana, mediante un cartelu col llema "L'asturianu llingua oficial".

El deportista asturianu Fernando González foi quién quiso alcordase de vindicar la oficialidá de la Llingua Asturiana en tan simbólicu llugar, aprovechando la so participación nel Maratón del Polu Norte, onde quedó nuna meritoria cuarta posición y tuvo a mui pocu de repetir victoria como fixera nel Himalaya.

FONTE: Infoasturies

Endavant OSAN

Organización Socialista de Lliberación Nacional. PPCC.

La Xunta Ellectoral de Llaviana refuga les candidatures de Conceyu Abiertu n'asturianu pese a la sentencia del Tribunal Constitucional

Nuevu casu de represión llingüísitica nunes elleiciones anque esta vegada el proceder de la Xunta ye anticonstitucional gracies a la sentencia 48/2000 de 24 de febrero de Tribuna Constitucional.

La Xunta Ellectoral de Zona de Llaviana comunicó ayeri a los representantes de Conceyu Abiertu énte la mesma que nun daba por válides les candidatures presentaes nos conceyos de Samartín del Rei Aurelio y Llangréu por emplegar l’asturianu na documentación requería al efeutu. Concretamente, lo que s’argumenta dende la XEZ de Llaviana ye que “nun s’utiliza nenguna de les llingües oficiales del Estáu español”. De momentu, ye l’únicu casu nel que se refuguen les llistes de Conceyu Abiertu por esta razón, ya que nin la Xunta Ellectoral Provincial nin nenguna de les otres de Zona nes qu’hai presentaes candidatures de Conceyu Abiertu comunicaren nada al respeutu.

Magar que nun ye definitivu, Conceyu Abiertu quixo facer públicu y denunciar el determín tomáu pola XEZ de Llaviana porque supón "l’enésimu ataque escontra la llingua asturiana y aquellos ciudadanos que la empleguen". Ye más, Conceyu Abiertu "llamenta" que los responsables de la XEZ de Llaviana "tovía nun conozan la sentencia 48/2000, de 24 de febreru, del Tribunal Constitucional (BOE nº 76, 29 de marzu de 2000) qu’anulaba’l determín de la Xunta Ellectoral Provincial d’Asturies de nun proclamar les candidatures de la organización política Andecha Astur al Congresu los Diputaos y al Senáu pola mesma razón, al considerar que se taba vulnerando’l drechu de les persones a acceder a los cargos públicos en condiciones d’igualdá, sentando un precedente hestóricu".

Conceyu Abiertu retrucará al determín de la Xunta Ellectoral de Zona de Llaviana sofitándose nesta sentencia y confía en que’l prósimu llunes, 25 d’abril, se proclamen les sos candidatures nos conceyos de Samartín del Rei Aurelio y Llangréu.

Conceyu Abiertu preséntase a les eleiciones con candidatures a la Xunta Xeneral y en nueve conceyos

Mariu Arbesú, Antón Fuertes y Daniel Cueli candidatos nes trés circuscripciones ellectorales

Conceyu Abiertu va participar nes eleiciones del prósimu 22 de mayu a la Xunta Xeneral d’Asturies presentando candidatures nes tres circunscripciones eleutorales nes que se dixebra’l país. Pol centru Mariu Arbesú (Noreña 1978), pol occidente Antón Fuertes (Cangas del Narcea, 1948) y pol oriente Daniel Cueli (Piloña, 1978). Nes elleiciones municipales, Conceyu Abiertu presenta candidatura en 9 conceyos: Uviéu, Grau, Sieru, Llangréu, Samartín del Rei Aurelio, Mieres, Villaviciosa, Noreña y Xixón.

El candidatu a la presidencia, Mariu Arbesú tien fechos estudios de Maxisteriu y anguañu trabaya nuna empresa del sector del vidriu; foi cabezaleru del movimientu xuvenil independentista asturianu y candidatu por Andecha Astur a l’alcaldía Noreña delles veces y participa activamente en movimientos sociales y culturales del país. Antón Fuertes candidatu pola circuscripción occidental, llicenciáu en Socioloxía, ye direutor del Departamentu d’Estudios y Formación de la Confederación Xeneral de Pequeñes y Medianes Empreses del Estáu Español (COPYME) y ún de los fundadores del Conceyu d’Asturies en Madrid. Daniel Cueli, candidatu pol oriente, diplomáu en Maxisteriu y llicenciáu en Pedagoxía, trabaya comu Axente de Desarrollu Local anguañu.

Nes eleiciones municipales, Conceyu Abiertu presenta de candidatu n'Uviéu a Rafael Trabanco, en Grau a Fernando Romero, en Sieru a David Fernández, en Llangréu a Paloma García, en Samartín del Rei Aurelio a Xulio Llaneza, en Mieres a Paula Martín y Villaviciosa a Xandru Vega.

En Noreña preséntase baxo la fórmula d’agrupación d’eleutores comu Conceyu Abiertu por Noreña siendo’l candidatu Pablo Pérez)y en Xixón preséntase dientro de la coalición Conceyu d’Unidá Popular de Xixón, (CUPX) xunto a Izquierda Anticapitalista, Frente de la Izquierda ya independientes, ocupando’l representante de Conceyu Abiertu, Javier Cubero, el puestu númberu 3 de la llista.

130 persones avalen la candidatura de Conceyu Abiertu por Noreña

Pablo Pérez Fonseca candidatu a l'Alcaldía de Noreña En malpenes cinco díes, 130 noreñeneses avalaron la candidatura de Conceyu Abiertu por Noreña que se va presentar a les prósimes elleiciones municipales del 22 de amyu baxo la fórmula d'agrupación d'ellectores pa elllo yeren necesarios 100 avales, al ser Noreña un conceyu de menos de 10.000 habitantes.

La candidatura popular noreñense va encabezala Pablo Pérez Fonseca de 31 años, Llicenciáu en Bioloxía y trabayador autónomu, tres ser escoyíu ayeri, xueves 14 d'abril, nel conceyu abiertu cellebráu na Casa la Cultura de Noreña.

Fonte: Infoasturies.net

Clásicu pero resistente a too.

Carlos Puebla- Y en eso llegó Fidel.

PUXA ASTURIES PUXA CUBA

Darréu entama una campaña contra'l desmantelamientu de Les Cuenques.

La militancia de la organización xuvenil Darréu, nos conceyos de la Cuenca del Nalón y la Cuenca del Caudal, alcordó entamar una campaña pública y organizada denunciando la falta d'espectatives nes Cuenques Mineres. La campaña tien de llema principal "Por unes Cuenques pa vivir y Trabayar ", y ciéntrase na denuncia "de la murnia situación social que carecemos nesta zona del país, onde la crisis ta siendo inda más xabaz coles clases populares". Dende la mocedá independentista y socialista asturiano de les cueques mineres echen a andar esta campaña "que quier espeyar na cai la voz d'una mocedá que se resiste a aceutar les espectatives de futuru escases y precaries que s'ufren nestos conceyos a los y les xóvenes, que mos ñegamos a dexar que desmantelen el pocu texíu industrial que queda en Les Cuenques y que vamos facer tolo posible por denunciar esta crisis que carecemos dende una perspectiva moza y fondamente crítica, tanto cola situación, como colos sos responsables" desplica Darréu nun comunicáu onde finca en que "ye perimportante organizar una rempuesta popular n'El Nalón y El Caudal énte la situación d'anguañu de crisis total de los nuesos conceyos, y eso pasa por facer de la mocedá un frenti de llucha más dinámicu y activu, que puxe pol so futuru y pola tresformación social". Darréu anicia la campaña asoleyando una primer tirada de 2.000 pegadielles vindicatives, asina como otros materiales d'información y propaganda. "Nun queremos qu'esto quede nuna simple campaña de propaganda vindicativa, polo que vamos a acompañar a esta dinámica d'actos estremaos, propuestes de xunidá d'aición a otros ámbetos xuveniles, políticos y sociales, contautu con trabayadores en conflictu y organización de la mocedá nos nuesos conceyos", despliquen.

XXIII Conciertu pola Oficialidá

La XXIII edición del Conciertu pola Oficialidá va xuntar a lo meyor de la música n’asturianu. Va haber tou tipu d’estilos: dende’l rock más combativu pasando pela música tradicional asturiana y la canción d’autor. Blima, Llangres, La Bandina, Toli Morilla, Misiva, K-Nalón, La Col.la Propinde y La Tarrancha van poner más d’ocho hores de música, reivindicación y folixa, en dos escenarios independientes que van alternar les actuaciones ensin tiempos muertos nin descansu. El XXIII Conciertu pola Oficialidá va abrir les puertes a les 19:00 del prósimu sábadu 16 d’abril, nes instalaciones de la Feria de Muestres de Xixón. El preciu de la entrada ye de 8€ pa la entrada anticipada y de 10€ na puerta. Les entraes tarán a la to disposición a partir d’esta fin de selmana nos chigres que vienen darréu: Uviéu La Casa Posafuelles, Malayerba nunca muere; Xixón: Café Trisquel, El Barucu; Avilés: El Cafetón; Candás: La Gueta; Tinéu: Mesón Cervantes; Cangas: Bar Azul; La Puela: Café Centro; Mieres: L’Abellugu; La Pola (L.lena): La Palmera; La Pola Siero: Abre César; Grau: Bar Piero’s; L’Infiestu: Bar Maybe; L’Entregu: Tom Mallory.

Mañana presentación Conceyu Abiertu por Llangréu

Esti próximu vienres 8 d'abril va tener llugar la presentación pública de Conceyu Abiertu por Llangréu. La presentación cellebrarase na Casa la Cultura de Sama, de magar les 20:00 hores. Nun actu públicu y participativu va presentase esti nuevu proyectu políticu ciudadanu, abiertu y de base llangreana. Nel trescursu del actu, promotores de Conceyu Abiertu van esplicar qué ye Conceyu Abiertu por Llangréu y abrirase un alderique sobre propuestes y problematiques municipales. Conceyu Abiertu por Llangréu ta formáu por un grupu de ciudadanos llangreanos procedentes de distintos ámbitos políticos, sociales, sindicales, culturales y de movimientos populares de diversu tipu que, conscientes de la ineficacia de les polítiques municipales actuales y pasaes, y de la pergrave crisis permanente que venimos sufriendo los vecinos de Llangréu, "en resultes d’una xestión corrupta y clientelar qu'amosaron y amuesen los partíos políticos (PSOE, PP y IU)" y que consideren"que llegó'l momentu de buscar nueves maneres de facer política entamando un movimientu municipalista al traviés de los llamaos conceyos abiertos", espliquen. Conceyu Abiertu por Llangréu ñaz col enfotu de crear un movimiento ciudadanu dende la base, "somos persones de a pie, que vivimos el día a día, que queremos volver a disfrutar de lo que foi na so época esti conceyu, llenu de trabayu ya entusiasmu". Conceyu abiertu apuesta por una renovación xeneracional del gobiernu municipal. "Toos y toes somos necesarios, entre toos y toes debemos construyir esa alternativa que seya capaz de sacanos de la llaceriosa situación na que nos atopamos". Conceyu Abiertu por Llangréu pretende construyir una alternativa que garantice un futuru pal pueblu llangreanu.

Presentóse Conceyu Abiertu por Noreña col oxetivu d'entrar nel Ayuntamientu.

Esti martes presentóse'l Conceyu Abiertu por Noreña na Casa la Cultura de la villa. Mariu Arbesú foi l'encargáu d'esplicar a los presentes en que consiste'l movimientu ciudadanu sociopolíticu Conceyu Abiertu y como se ta encadarmando en bien de conceyos del país col oxetivu de que la política se faiga dende la base y acercar les decisiones a la ciudadanía y avanzar hacia la democracia directa. Pablo Pérez ún de los promotores de Conceyu Abiertu por Noreña desplicó'l sofitu d'Andecha Astur Noreña a la plataforma Conceyu Abiertu y los exes fundamentales de democracia participativa y la tresformación social. Tres les intervenciones abrióse l'alderique sobre propuestes concretes y problemátiques del propiu conceyu dende la falta d'un reglamentu de participación ciudadana, calces de participación de les asociaciones na vida política, problemes de vivienda, la necesidá d'atayar el paru dende l'ayuntamientu con bolses de trabayu, cuestiones de mediu ambiente o patrimoniu...y cuestiones que se van dir incluyendo nel programa de Conceyu Abiertu por Noreña. A la fin, decidióse volver a convocar un nuevu conceyu abiertu la selmana que vien onde siguir concretando propuestes y facer la llista ellectoral. Fonte: Infoasturies

Cencerrada popular escontra’l pensionazu

Los sindicatos Corriente Sindical d’Isquierda (CSI) y Sindicatu Unitariu y Autónomu de Trabayadores de la Enseñanza (SUATEA) convoquen una cencerrada popular escontra’l nomáu "Pensionazu", que va entamar el prósimu xueves 7 d’abril, a les 19:00 h. n’El Parche d’Avilés (plaza del Ayuntamientu), y que va percorrer les cais céntriques de la ciudá pa desixir, delantre de les sées del PSOE, el PP, la Patronal, la Banca, y les centrales sindicales CCOO y UXT la retirada de la Reforma les Pensiones.

Dende los sindicatos CSI y SUATEA denuncien que "tamos nel paru o trabayando una montonera d’hores por un sueldu que nun llega a la fin de mes. Abondes vegaes, trabayamos más hores de les que tamos aseguraes/os y por menos perres de les qu’afita’l conveniu. Tamos perdiendo les viviendes porque nun podemos pagar les hipoteques o los alquileres. En toles families hai dalguna presona en paru (cuandu non tola familia), malpenes podemos pagar el recibu la lluz, el gas o l’agua y, en xeneral, ca vegada trabayamos más, pagamos munchu más y cobramos menos". Dambos sindicatos aseguren que "rebaxaron o conxelaron los sueldos, xubieron los precios, retayaron les aídes societaries, tán desmantelando y privatizando servicios públicos como la sanidá, la educación o l’asistencia a mayores y discapacitaes/os y quitáron-yos l’aída a los paraos y paraes ensin ingresos". Por si fuere pocu, "ficieren una Reforma Llaboral qu’abarató’l despidu, fizo medrar el paru, precarizó’l trabayu y les condiciones llaborales y, a la escontra de lo que mos dicíen, amenorgó los contratos indefiníos y aumentó los temporales. Pero non contentos con ello, apretáronnos más les tuerques y obligáronnos a xubilanos a los 67 años con pensiones de miseria. Y tóu ello fízolo’l Gobiernu del PSOE xunta la Banca y la Patronal, cola complicidá del PP. Y amás d’ello, cuntaron col consentimientu de CCOO y UXT. Estos dos sindicatos sabrán por qué lo ficieron y a cambiu de qué (ye un secretu a glayíos: a cambiu de sovenciones, lliberaos y puestos de privilexu en tolos estamentos económicos y llaborales)". Afiten que tóu esto ye por culpa de la cris, porque yá nun hai perres, "pero paez ser que nun hebio cris p’apurrí-y a la Banca Privada 150.000 millones d’euros. Tampoco paez haber cris pa les 35 mayores empreses del Estáu, qu’algamaron en 2010 más de 50.000 millones d’euros de beneficiu, parte de los cuales gastáronlos en facer despidos, EREs y reconversiones de plantía. Y agora, demientres el Gobiernu’l PSOE anuncia retayos sociales nuevos, pretenden "saniar" les Caxes d’Aforros con más dineru públicu pa dempués privatizales (yá lleven inyeutaos 11.200 millones y entá tan iguando otra remesa)". Pa la Corriente y el sindicatu d’enseñanza, la cris remánase como disculpia. "Disculpia pa esplotar, pa privatizar, pa precarizar, pa despedir, p’arruinar a los y les trabayadores, p’apretar cá vegada más la bota sobro los nuesos pescuezos, en resume, pa facer que los ricos seyan más ricos y los probes más probes". Pa estos sindicatos, n’Asturies llevamos en cris permanente los caberos 30 años y hai xeneraciones enteres que lleven tola so vida nuna cris de la que nun son a salir. Poro, con motivu de les elleiciones conceyeres y nacionales del prósimu 22 de mayu, llamen a movilizase, porque "nun podemos siguir asina. Tenemos de para-yos los pies. Hai de salir a la cai a amosa-yos el nuesu descontentu. Tenemos de salir a lluchar escontra ellos, porque enxamás mos van dar nada poles bones; enxamás mos van dar nada si nun-yos lu arrancamos". Amás, aseguren qu’entamarán una consulta popular sobro la Reforma les Pensiones y la política económica y llaboral del Gobiernu, "pa que s’escuche la braera voz de los y les trabayadores". Dicha consulta entamarase na capital el sábadu 14 de mayu, con una gran movilización xeneral de trabayadores y ciudadanos/es que-yos faiga "pescanciar a ’los que manden’ (políticos, banqueros, grandes empresarios...) que les coses nun pueden siguir igual, qu’esta vegada nun val prometer y nun cumplir, qu’esta vegada namás tienen dos alternatives: gobernar pa los y les trabayadores y los ciudadanos/es o colar pa casa".

Fonte: Aruelu.