Conceyu Abiertu por Noreña escontra'l fracking-resquiebra hidráulica

Darréu llama a la mocedá a iguar ella mesma la toponimia si nun hai solución política

El Ministeriu de Fomentu ayeri tresmitió al Pueblu Asturianu la so negativa a usar la toponimia oficial, que ta n'asturianu, pa la rotulación de los nomes de los llugares nes víes de circulación que-y atañen n'Asturies. Poro, espeyen la so intención de siguir imponiendo topónimos artificiales y castellanizaos nel nuesu país.

Énte esta situación dende la mocedá d'izquierda soberanista Darréu llamamos a la mocedá asturiano a rebelase. Nun queda otra que garrar la iniciativa popular escontra esta corripia de déspotas y criminales, los cuales faen lo que-yos peta y desprecien vides, drechos y cultures col únicu fin d'esborriar del mapa tolo que salga del status quo españolista y capitalista.

Asina, valoramos como una fuerte agresión esti determín del Ministeriu de Fomentu y llamamos a los mozos y les moces d'esti país a iguar ellos mesmos la toponimia y poner nes víes de circulación los nomes de los nuesos conceyos o pueblos como son y siempre fueron. Si nun van atender a razones tendremos qu'iguar la situación pela nuesa propia cuenta. Asina pues, encamentamos a los xóvenes el optar pola desobediencia civil y pola iniciativa ya iguar de forma direuta, si nun van poner igua dende Madrí, remocicando l'actual toponimia que sal na cartelería y camudándola poles formes naturales n'asturianu.

¡N'ASTURIES N'ASTURIANU!

¡TOLOS CARTELOS VAMOS IGUALOS!

¡LLINGUA NACIONAL, LLINGUA OFICIAL!

FONTE: Darréu

Tres mozos de Figaréu imputaos agora pol 14P

Reciben citaciones xudiciales por mirar cómo la Guardia Civil retiraba una barricada.

 

Durante la fuelga xeneral del pasáu 14P la Guardia Civil identificó en Figaréu a tres mozos que miraben cómo los axentes retiraben una barricada incendiaria nesa población. Seis selmanes más tarde vino la sorpresa pa los rapazos cuando agora reciben una notificación xudicial pola que se-yos abre un espediente nel que podríen condenalos a una multa d’ente 300 y 30.000€. Conceyu Abiertu por Mieres denuncia estos fechos y amuesa’l so sofitu a los imputaos.
 

Demientres la xornada de fuelga xeneral del pasáu 14 de payares, tres mozos fueron identificaos en Figaréu mentantu miraben como la Guardia Civil trataba d’acabar con una barricada qu’un grupu de piquetes plantó nesta llocalidá del conceyu. Nesi intre, la Guardia Civil identificó a estos xóvenes, los cuales nun taben faciendo absolutamente nada. Esi día nel Conceyu de Mieres yá hebo munches otres identificaciones y un deteníu. Pues bien, estos tres mozos acaben de recibir una notificación de multa d’ente 300 y 30.000 euros. El so delitu foi tar na cai observando lo que pasaba.

 La organización soberanista Conceyu Abiertu por Mieres quiso "amosar el nuesu sofitu a estos mozos y pidir a la vecindá del nuesu conceyu la so solidaridá pa con ellos. Consideramos propiu d’un sistema antidemocráticu, autoritariu, reaccionariu y déspota esti tipu de midíes de calter represivu". Les motivaciones recibir anguaño l’avisu de multa tán bien nidies pa CA: "l’únicu fin ye amedrentar a la xente y aparar la rempuesta social a los recortes, les imposiciones y l’agresiva fola neolliberal que l’Estáu español ta llevando alantre. Dende Conceyu Abiertu por Mieres acusamos a la Guardia Civil d’abuso de poder y creemos que cola represión nun pueden facer nada. Entendemos que’l Pueblu Trabayador Asturianu y de Mieres ta esconsonando cada día más y cuando un pueblu llucha pola xusticia y la dignidá nun hai represión qu’apare a la xente".

FONTE: Glayiu.org

Que los árboles nun te torguen ver la viesca

Asina reza un dichu que nos sollerta de la necesidá de nun perdenos nos detalles en desterciu del oxetivu. Tamién esiste otra versión: "Al neciu cuando-y señalen la lluna mira’l deu" que vien dicir básicamente lo mesmo. Y nun ye que nun tea acordies con esti dichu, que lo toi, sinón que toi en contra de "escaeceme" de los árboles pa ver el monte.Y esplico.
A la de falar de crear "daqué" n’Asturies capaz de llevar el ritmu, si decidimos a llantar cara en tolos terrenes de xuegu, siempres surde la gran dulda de si dientro del aparatu d’IU hai sitiu pa desenvolver les polítiques que se reclamen dende los mmss.
De mano hai que plantegase y recordar el pasáu d’esta formación política surdida del PCE, xuntu con AP, l’antepasáu del PP, que fueron los máximos opositores a l’autonomía d’Asturies, a la que consideraben una rexón más de la gran España o Castiella o Lug sabe qué, y nun se-y puede considerar más qu’un coautor del Estáu lliberal que güei nos azota con otra de les sos crisis. Pero nun voi centrar, nin tanto, en fai 30 años.
Hai namás unos pocos años IU aceptaba entrar nel gobiernu d’Asturies faciendo de muleta al PSOE en xurando y prometiendo la oficialidá de la llingua asturiana, y fizolo ensin ella. ¿La resultancia? Cárcele pa Candido y Morala amás de la mayor fola de represión dende la dictadura na que la policía, lliteralmente, esperábanos nes puertes de les nueses cases p’acosanos, fomentaba la política de la subvención apostando pol capitalismu "bonu", miraben pa otru llau cuando Areces llamaba lleendes urbanes a los mozos o se destruyía la nuesa mariña en planes urbanísticos d’ayuntamientos alloriaos y entraba nel conseyu de Cajastur mientres yera destruyíu dende adientro.
Igual nun lo vemos porque Évole nun lo denuncia en Salvados, pero negar la so responsabilidá ye negar la mayor ya inda nun-yos escuché pidir perdón sinón un "Aceptábemos unes coses pa salvar otres" que nun se alloña enforma del discursu "Ye lo qu’hai que faer" que tanto se critica a Rajoy. Y esto nun lo digo yo, dizlo el mesmu Julio Anguita nuna entrevista
<http://cordopolis.es/julio-anguita-...>

"¿Cuál foi’l fallu de la esquierda? Qu’entró nes instituciones y consideró que son respetables. Les instituciones nun son n’absolutu respetables. Eso ye mentira. Tán al serviciu del poder económicu"

A última hora, IU apurriría un gran pesu sociolóxicu pero sería, a la llarga, un gran llastre que se alloña del allugamientu estratéxicu lóxicu "Nun esperar que l’enemigu nun nos ataque sinón construyir daqué que nun sía atacable." y evidentemente IU ye, por si, bien atacable, como sufrieron los compañeros del SAT cuando-yos recordaben, en toles entrevistes, que la so federación diera’l gobiernu d’Andalucía al PSOE, al PSOE de les prexubilaciones y que llevaba 30 años ensin solucionar el problema de la tierra n’Andalucía.

A última hora, IU apurriría un gran pesu sociolóxicu pero sería, a la llarga, un gran llastre que se alloña del allugamientu estratéxicu lóxicu "Nun esperar que l’enemigu nun nos ataque sinón construyir daqué que nun sía atacable." y evidentemente IU ye, por si, bien atacable, como sufrieron los compañeros del SAT cuando-yos recordaben que la so federación diera’l gobiernu d’Andalucía al PSOE

Tamién debemos replanteanos si IU, como dicen, camudó.
La so entrega al PSOE del gobiernu asturianu paez indicar lo contrario amás d’unes cuantes noticies que-yos azotaron nos pocos conceyos que dirixen:

• En Mieres gasten dineru público pa sofitar a una participante d’un programa televisivu y vuelven cobrar el IBI a los mozos que merquen vivienda, una llei qu’ellos propunxeron na oposición.
• En L.lena despiden a una trabayadora por quedar embarazada y porque tenía un contratu de tres años, y ye qu’al paecer les muyeres tienen de quedar embarazaes cuando nun tienen contratu, que ye lo suyo.

Tampoco en Madrid tan llibres de pecáu aceptando’l vetu d’UPyD a Amaiur por pidimientu del PSOE...
Nun hai qu’escaecer, como denuncia’l compañeru Xose n’otru artículu
<http://www.glayiu.org/fusion-de-con...>
, qu’el so brazu sindical, CCOO, pide la fusión de conceyos, abrazando’l discursu de la estrema derecha de que la culpa de la crisis tienla conceyos como Llaviana o Llangréu.
Y yá nun ye solo la mentira económica de qu’un conceyu mayor daría meyor serviciu, los uvieínos tenemos unes faroles coyonudes pero non plan d’empléu, sinón que se alloña de cualesquier espíritu de lo que se ta pidiendo nes cais: "Más democracia" y la prueba de qu’estos nun s’enteraron de nada nos últimos años: Ante una crisis na que’l poder concéntrase en cada vez menos manes ellos proponen menos manes... Vamos, qu’anque medios allegaos redacten noticies grandones del sofitu de "líderes" del 15M al so partíu la cosa camudó poco.
En cuanto al futuru, los sos oxetivos, son bien tibios, cuando non frios. Nun se siquier si s’atreveríen a pidir al PSOE una consulta pola República a cambéu del gobiernu o si va ser abondu con felicitar al Rei pol so cumpleaños recordando-y qu’ellos son repúblicanos.
Nun se a vós pero a min danme la sensación de que nun tienen nengún oxetivu. Esto ye, el PP quier vender tolo público y asonsañar el modelu EEXX. El PSOE, sicasí, prestai más crear empreses privaes con perres públiques pa colocase. Pero IU? De verdá, que quieren? Que la cosa camude por arte de barrabiellu? De verdá que cuando Lenin falaba del izquierdismu debía pensar nellos.
En definitiva: si los mmss d’Asturies queremos camudar les coses, pero camudales de verdá, si decidimos a dexar de ser ferramientes de resistencia pa ser d’ataque
<http://empotronau.blogspot.de/2012/...>
, tenemos que partir de la premisa de la victoria, non de les medies tintes, que para eso quedamos en casa y votamos cada 4 años, o non, que pal casu ye lo mesmo.
Hai que considerar los beneficios de les nueses acciones, arrincar un cachín de tierra más a esos famosos "mercaos", y que sía esto lo que nos motive, non el llograr una manifestación mayor o menor o llograr un diputáu o un lo que sía.
Hai que saber que ye la nuesa fuerza lo que nos detien y les nueses acciones son lo que-yos detienen a ellos. Podemos faer lo que suañemos, ellos namás lo que-yos dexamos. Tenemos de afaenos na nuesa inadaptación, ye mentira qu’hai que moderase pa llegar alto, abrazando les nueses contradicciones anteponiendo la ciencia a la utopía. Sabemos que claudicar ye la muerte. Nun esiste victoria en ceder pa tocar el poder. Tenemos de odiar tanto como amamos pero ensin cayer en manipulaciones de sentimientos, emociones o razones. Usemos el corazón pero caltengamos la mente fría.
*Unes hores depués d’acabar esti artículu Gaspar Llamazares ufre al PSOE facer un "frente d’izquierda". Siento que perdí el mio tiempu desenmazcarando a IU cuando ellos solinos lo faen tan bien...

Artículu de Nacho Muñiz en Glayiu.org

Reforma educativa y llingua asturiana: l'asaltu final.

Ente les munches crítiques que puén facese del anteproyectu de la nueva Llei Orgánica pa la Meyora de la Calidá Educativa (LOMCE), que d’equí a poco vamos desplicar nun artículu más estensu, hai un aspectu, el de la cuestión llingüística, que tien especial importancia p’Asturies.
Por desgracia, paez que’l debate de la LOMCE, con toles gravísimes agresiones que contién pa la escuela pública, la propia calidá de la enseñanza y la dignidá de los sos trabayadores, ta centrándose na cuestión de cómo queda la llingua catalana nel nuevu diseñu llegal. Como yá ye persabío, el gobiernu catalán refuga dafechu la LOMCE nesi aspectu (nos otros non, porque coinciden básicamente cola so visión privatizadora y reaccionaria) y amenaza cola insubmisión, yá que supondría un torpedu a la llinia de flotación del procesu d’inmersión llingüística que vive esta comunidá dende hai trenta años. Pasa igual na Comunidá Autónoma Vasca y, con menos contundencia pero tamién con resquemor, nes demás comunidaes con llingua cooficial: Galicia, Navarra, País Valencianu y Baleares, que tamién ven peligrar la so política d’inmersión llingüística. Pero n’Asturies, onde la política llingüística en cuenta d’inmersión pasa namás per chiscar un poco, les consecuencies del diseñu llegal que mos vien serín directamente catastrófiques.
L’actual anteproyectu (versión del 3 d’avientu de 2012, con añadíos del día 4), afitaría tanto na escuela primaria como na ESO y el Bachilleratu trés tipos de materies: “troncales”, “específiques” y “d’especialidá”. Les “troncales”, con unos conteníos diseñaos n’esclusiva pol gobiernu central (Ciencies Naturales, Ciencies Sociales, Matemátiques, Llingua Castellana y Primera Llingua Estranxera) tienen qu’ocupar como mínimo un 50% de les hores llectives totales (na práctica munches más). Les “específiques” serín dos, obligatories de garrar: Educación Física y Relixón (o la so alternativa, agora llamada “Valores Culturales y Sociales” en Primaria y “Valores Éticos” na ESO). Tamién entrarín nesti bloque otru grupu d’asignatures, nel casu de Primaria dos pa escoyer una (Educación Artística y 2ª Llingua Estranxera), y nel casu de la ESO (de 1º a 3º), elexirín ente una y tres d’ente seis (Cultura Clásica, Educación Plástica y Visual, Música, Tecnoloxía, 2ª Llingua Estranxera o Iniciación a l’Actividá Emprendedora y Empresarial). Quedarín depués les asignatures del tercer bloque, les “d’especialidá”, que serín, nel casu de les comunidaes con otra llingua cooficial, esa mesma llingua y, como muncho, otra más diseñada pola conseyería d’Educación correspondiente. En 4º de la ESO, anque la configuración prevista del cursu ye más enguedeyada, siguen los tres bloques. En Bachilleratu, tamién.
¿Ú’l güecu pal asturianu? Lo lóxico sería suponer que nesi tercer grupu, pero como la llingua tien de ser voluntaria y hai qu’ufrila a escoyer ente otra, y nesi tercer grupu nun taría, por ser namás una, entós habría que metela nel grupu segundu, el de les específiques, pero resulta qu’esi grupu ta zarráu: son les asignatures que pon l’anteproyectu, nin más nin menos ¿Ú’l güecu entós pal asturianu, repetimos? En nengún sitiu. El güecu ye ceru. Y equí nun val poner como escudu la Llei d’Usu, porque una llei orgánica d’ámbitu estatal ye de rangu superior al d’una de rangu autonómicu.
Conclusión: l’únicu marcu posible pa que la llingua asturiana y el gallegoasturianu sigan tando presentes nel sistema educativu ye la oficialidá de les mesmes, pa poder agospiase al “bloque segundu” de materies. La precariedá llegal que vien padeciendo la llingua asturiana per más trenta años d’autonomía podría acabase, bien perriba bien perbaxo: o la reconocencia definitiva como llingua oficial d’Asturies, con toles consecuencies qu’eso implica pal sistema educativu, o la so anulación definitiva nel mesmu.
Ye la hora de la unidá. Esta ye una más de les munches razones poles qu’hai que baltar esta llei indigna, pero tien una importancia simbólica que va acuyá de la propia comunidá educativa. El llamáu a la movilización tresciende asina a esta y tien de llegar a la sociedá asturiana entera. Hai que salir a la cai, con más fuercia que nunca, a dar la cara, anque namás seya por dignidá individual y colectiva

Faustino Zapico

Espublizáu en Glayiu.org

SOLIDARIDÁ

IAS refuga la LOMCE y llama a defender la llingua asturiana.

Izquierda Asturiana fai un llamáu a tola comunidá educativa y al conxuntu de la sociedá asturiana a movilizase en defensa de la presencia del asturianu na enseñanza.

L'actual anteproyectu de llei d'educación (LOMCE) dexa fuera la posibilidá de que l'asturianu tea presente como materia a impartir.

La condición de llingua non oficial del asturianu va facer imposible, col nuevu marcu, la so inclusión nel currículum.

Una vez más pagamos les consecuencies de que'l asturianu nun seya oficial.

Esti pue ser l'asaltu final a un idioma milenariu que muerre adulces ente la desidia y la hipocresía de la clase política asturiana.

Vamos entamar aiciones lo más unitaries posibles pa valtar esta agresión.

FONTE: Perfil de facebook d'IAS.

Fusión de conceyos: l'ataque definitivu

Dende qu’españó esta crisis capitalista nel Estáu español y s’agravó ainda más con ésta la crisis permanente que vive’l nuesu país, Asturies, llevamos bien de tiempu sintiendo falar a políticos, sindicalistes y tamién ciudadanos de la posibilidá de fusionar conceyos, desaniciar mancomunidaes o unificar servicios públicos. Hai una idea xeneral de desllocalizar y globalizar les coses en pro d’un supuestu aforru y d’una supuesta eficiencia potencial.

El maltar surdío dende’l Pueblu colo que llamen dende los mass-media como “clas política”, los reiteraos llamaos a l’austeridá y la inoperancia de dalgunos servicios son el caldu de cultivu d’esti tipu de posicionamientos. ¿Pero estes iniciatives s’afiten no anteriormente comentáu o hai dalgo más allá? ¿Hai cuestiones ideolóxiques detrás?

Asturies cunta n’actualidá con 78 conceyos y 18 mancomunidaes estructuraes. Los 78 conceyos nun se tienen por qué correspuender a la realidá nacional asturiana, partiendo de la bas de qu’hai conceyos que tan fuera de l’alministración asturiana onde hai un fondu sentimientu de pertenencia al nuesu país y per otru llau hai una serie d’ámbitos territoriales que quieren conformar un conceyu propiu, como ye’l casu hestóricu de Llugones. Ciertamente, la estensión xeográfica y demográfica de los conceyos asturianos ye bien peculiar, yá que se trata d’unos conceyos pergrandes en cuantes a estes dos variables si facemos una comparanza seria y posada colos municipios del restu l’Estáu español.
Como dicía, determinaos ámbitos sociopolíticos, comunicativos y sindicales empobinaron dende hai unos años a nivel estatal y nacional midíes nesti sen, pel momentu ensín muncha práutica. Un sector radical son los defensores de desaniciar les Comunidaes Autónomes y recentralizar l’Estáu español de forma pura y dura, tornando al centralismu del franquismu. Esi tipu de plantegamientos nun hai que descuidalos pol so peligru, pero entá tienen pocu sofitu de la xente y tan, pel momentu, lloñe de ser más que la ilusión de cuatro tardo-franquistes. Toi falando de grupos mediáticos como Intereconomía y otros canales o medios d’ultradrecha. Pero tamién tenemos a los y les señores d’UPyD, con plantegamientos iguales, anque munches vegaes na canalización del so discursu nun falen d’esta idea n’abertal.

Per otru llau, y equí ta’l principal peligru anguañu, tan los partidarios de fusionar conceyos y crear nes autonomíes macro-municipios partiendo d’esi amiestu de conceyos. Esta opción cada día ta más en boca y son munchos los ámbitos que reclamen actuaciones nesti sen, les más de les vegaes, renegando de qu’estes fusiones vayan acompañaes de idees de recentralización del Reinu d’España. El supuestu parasitismu, la duplicidá de servicios públicos o’l númberu de trabayadores municipales de cada conceyu son los principales argumentos. Pero nun hai más ciegu que’l que nun quier ver y hai que falar d’otres coses a colación d’estes propuestes.

Nesti sen, otra vuelta sal el nome d’UPyD. Esti partíu reaccionario punxo como condición pa ser llave de gobiernu, depués d’algamar un diputáu na Xunta Xeneral, gracies a La Nueva España, la fusión de conceyos. Finalmente’l PSOE fixo qu’estos sofitaren igual a Javier Fernández arrenunciando al tema de la fusión de conceyos, pero l’alderique yá ta xeneráu na sociedá asturiano y UpyD nun escuende les sos intenciones de llevar alantre esta idea cueste lo que cueste. Amás el PSOE ya Izquierda Unida, que son los partíos que xunto UpyD remanen anguaño Asturies, nun creo que seyan grandes defensores de los conceyos asturianos, yá que lleven tola vida amosando colos fechos un xacobinismu, centralismu ya inclusive españolismu como pocos.

Y miren que casualidá. Nes anteriores selmanes, les xuntes comarcales d’UXT y CCOO nel Valle’l Nalón, sindicatos averaos a PSOE ya IU respeutivamente, insisten en fusionar los conceyos d’esti valle asturianu no que sedría un solo Ayuntamientu. Hai una insistencia absoluta dende estes centrales sindicales nel Valle’l Nalón en fusionar tolos municipios d’esta cuenca minera. Nun voi insistir muncho en dicir qu’estos sindicatos, anque se supón que tienen sensibilidá en cuestiones identitaries y determináu federalismu, son igual de centraliegos que partíos como’l PSOE o IU. Esti posicionamientu coincide con otros que federaciones o xuntes comarcales d’estos sindicatos burocratizaos fixeron n’otres partes del Estáu Español.

Hai que dicir que toes estes intenciones vienen empobinaes por distintes sensibilidaes, eso si, siempre dientru d’esi statu quo español y neolliberal o claudicante col neolliberalismu. Pa rematar, l’Estáu Español plantegó entamar una reforma de les alministraciones llocales. Fai unos meses dende Madrí Rajoy y la so banda de criminales tresmitieron a la opinión pública la intención de desaniciar les mancomunidaes y too ello depués d’esborriar del mapa el 30% del númberu de conceyalíes nos municipios del Estáu. Agora se supón que los conceyos podrán decidir, ver veremos, el númberu de puestos de conceyales. Esti ye’l panorama que tenemos. Con esto quieren que combayemos.
Son idees mui complementaries toes estes qu’acabo d’esponer y que tienen enfotos comunes: alloñar la política y la “democracia” de les mases, recentralizar l’estáu y caltener l’orde vixente con un retrocesu democráticu ensín precedentes. Entren agora nesti asuntu intereses políticos, económicos, ideolóxicos y corporativos. La cosa mete mieu al pánicu, sí.

Énte esti panorama ¿qué podemos dicir?. En primer llugar, atalanto qu’hai muncha xente de la izquierda alternativa n’Asturies a favor de fusionar conceyos. La rede clientelar de la FSA fai que muncha xente, quemada con esi partíu-empresa, pueda sofitar determinos que-yos quiten privilexos, en principiu, a los señores de Javierín Fernández. Pero lo ciertu ye que’l PSOE nun pierde un res. ¿Qué puede perder la FSA-PSOE en la Cuenca’l Nalón si fusionen los cinco conceyos? Imaxinen, tendríemos un partíu, un sindicatu dominante y un alcalde sofitando los mesmos intereses. Quiciabes los alcaldes que vayan a perder el so puestu nun tean muncha gana de que-yos quiten esi puestu, si, pero’l PSOE de Javier Fernández y la Federación Socialista Asturiana tan a favor dexuru. Nun-yos esmolez un res qu’esta idea vaya medrando, tien de presta-yos pola vida afitar ainda más el so poder nun ñeru propiu, como ye’l Valle’l Nalón.

Tenemos qu’esterrar la posibilidá de puxar poles fusiones de conceyos d’Asturies na izquierda d’esti país. Nun vamos ganar naide que tea nel espectru políticu alternativu y coherente. Esto namás que va alloñar la institución municipales de los intereses del pueblu y va a afitar ainda más el bipartidismu (PSOE-PP) y les sos marques blanques (FORO-IU).

Nesti sen, hemos de tener nidio que la fusión de conceyos, cuando sal de partíos de calter ultradrechista, como UpyD, y sal de partíos y sindicatos que lleven remanando la vida social de los asturianos depués de décades de llexitimación del orde burgués y español vixente, nun puede traer nada bono pa les clases populares, como tolo que tan avezaos a facer. Nun podemos esperar a que los intereses de los mesmos de siempre nun tean detrás d’esto, nun podemos baxar la guardia por qu’hai evidencies, munches evidencies.

Hemos puxar, güei más que nunca, polos nuesos conceyos asturianos. Los conceyos asturianos son parte de la nuesa identidá. Conformen la nuesa identidá como vecinos y vecines de los nuesos pueblos y afiten na xente un sentimientu identitariu de pertenencia mui sanu y prestosu, sacantes llocalismos cada vegada más esborriaos del mapa. Pero nun queda ehí namás el tema. Los conceyos asturianos son la estructura que vertebra la nuesa nación dende hai munchos años, son los pegoyos sobre los que s’afita’l país asturiano, cola so pluralidá y la so cadarma organizativa propia. Desaniciar agora los conceyos sedría como facer por desaniciar bona parte de la nuesa cultura tradicional o desaniciar l’idioma d’Asturies. Arrenunciar a los conceyos ye arrenunciar a una parte clave de la nuesa identidá como pueblu estremáu nel mundu. Munchos y munches, nun tendrán gran sensibilidá colo que toi acabante d’esponer y nun se si-yos importará muncho. Son llibres de tener la so visión, pero si arrenuncien d’ello tarán asimilando al empar el nacionalismu más reacionariu, esencialista, arcaicu y chovinista: l’español.

Per otru llau, como yá dexe ver enantes, arrenunciar a los nuesos conceyos ye tragar ainda más nel procesu de esmantelamientu de drechos fundamentales que tamos viviendo. El conceyu ye la institución política que más cerca tien el vecín d’un conceyu, xunto la colación o parroquia. Pues bien, faciendo conceyos o municipios monstruosos, como se vien plantegando, namás que va servir pa alloñar al ciudadanu más de la política, yá seya esta municipal, nacional, estatal o internacional.
Facer conceyos más grandes, tanto no demográficu como no xeográficu, nun val pa otra cosa qu’alloñar la Casa Conceyu de la xente, ye pura llóxica. Pensemos en cualesquier problema vecinal que demanden resolver los vecinos nun gran conceyu, onde l’alcalde nun se sabe nin onde vive o nun conceyu pequeñu, onde tol mundu conoz a la persona que lleva l’alcaldía y puede presionar meyor a esa persona.

Esta ofensiva ye un recorte en toa regla a la democracia, la llibertá y los drechos de les clases populares. Unes clases populares mui quemaes y que, o bien yá pasen de siguir la política, suponiendo esto un golpe definitivu, o bien escueyen alternatives polítiques populares y braeramente tresformadores. Claro, la fusión valdría p’alloñar a los partíos y organizaciones polítiques asturianes y de clase de la institución conceyil. Sedría mui dificil, cola fusión y la supresión de conceyalíes, qu’opciones alternatives a los de siempre algamaran daqué nos conceyos. Sedría una muria mui alta la qu’afitaríen a la unidá popular y a la democracia participativa y popular nos nuesos conceyos. Ye un golpe mui duru a alternatives nueves y que quieran facer les coses dende la base y d’otra manera distinta a la partitocracia del espectáculo.

Nun seyamos inocentes. El retrocesu “democráticu” que tamos viviendo nun ye un mensaxe panfletariu que dalgunes persones empleguen pa mancar al PP o los de la FSA. Ye una realidá qu’amás ta mui viva y va siguir alantre. Namás hai de salir un pocu a la cai. Y tampocu seyamos inocentes aislando esta propuesta de fusionar conceyos d’esti retrocesu de los drechos y llibertaes algamaos pol Pueblu Trabayador con muncho sangre y sacrificiu. Nun ye casualidá que surda agora, nesta dómina de conflictividá y progresiva radicalización del orde vixente, onde’l populismu y el pseudo-facismu tornen pela puerte grande. Asimilar propuestes d’esta natura ye perder lo pocu que tenemos, tornar a tiempos mui escuros y alloñar pa siempre una salida coleutiva, digna y tresformadora a esti orde de les coses.

Pola nuesa identidá como vecinos y como país tenemos que defender los conceyos. Polos nuesos drechos fundamentales y pola posibilidá d’algamar escenarios que posibiliten una tresformación social y nacional de verdá hai que defender los conceyos. Pola viabilidá socioeconómica tenemos que puxar polos conceyos d’esti país. Pol progresu social, la democracia popular y participativa y el futuru d’Asturies hai que defender con muncho enfotu y fuercia el conceyu asturianu. Hai soluciones muncho más afayaices pa los intereses de les y los trabayadores asturianos qu’esta midía. Ye l’ataque definitivu: recuperemos la dignidá, puxemos polos conceyos, faigamos conceyu, faigamos país y construyamos clase.

Xose A. González

Espublizáu en www.glayiu.org

Yá sabeis.

Entama la "Selmana de llucha contra la represión y polos drechos"

Un garrapiellu de coleutivos entamen esta selmana un conxuntu d'actividaes enfotaes na llucha contra la represión y en defensa de los drechos.

Según se denuncia "Nes pasaes fuelgues xenerales del 14 payares y del 29 marzu, 8 militantes de la CSI y 7 militantes de la CNT fueron imputaos pola so participación activa en diches fuelgues y la so defensa de los drechos de la clase obrera". Como consecuencia, manifiesten que "Agora ye'l momentu de solidarizanos con estes presones y demosar que les nueses meyores armes son la llucha y la solidaridá. Por ello, les organizaciones CSI, CXT, CNT-Xixón, SUATEA, FUSOA, PLATAFORMA ESCONTRA LA REPRESIÓN Y POLES LLIBERTAES, C.S. SESTAFERIA, LA SEMIENTE, ALAMBIQUE, CAMBALACHE, convocámosvos a una SELMANA DE LLUCHA".

Calendariu d'aiciones

Llunes 10 y martes 11 d'avientu: repartida de panfletos en Xixón. Quedada nos locales de CSI-Xixón a partir de les 18:30.
Martes 11 d'avientu: rueda de prensa de la Plataforma contra la represión y poles llibertaes” de magar les12:30 h. na Plaza. del Conceyu de Xixón.
Miércoles 12 d'avientu: “Pasucais escontra la represión”, con salida na Casa Sindical de Xixón a les 19:00 h.
Xueves 13 y vienres 14 d'avientu: concentraciones de sofitu a los imputaos nes fuelgues xenerales del 14 de noviembre y del 29 de marzu. Sedrán nps Xulgaos de Poniente de Xixón a les 09:00 h

---

Alrodiu d'esta aniciativa, la CSI asoleyó'l comunicáu que vien darréu:
Les coses tán asina: despídennos, emprobécennos, desahuciennos, quítennos la nuesa salú, tórnennos en man d'obra analfabeta y, si protestamos, múltennos, túndennos, detiénennos y encarcélennos. Ellos son los braeros criminales.

Prefieren ver cómu nos suicidamos a protexer el nuesu drechu a una vivienda y a una vida digna. Les persones nun importen, namás son man d'obra y mercancía. Nun valimos nada.

Retayen en Sanidá y faen que perdamos la nuesa salú. Retayen n'Educación pa convertinos en man d'obra analfabeta. Retayen en Servicios Sociales y abandonen a la so suerte a quien tienen más necesidaes. Despídennos y mándennos a comer de la basoria. ¡Tán “fundiendo Asturies” y desguazando la nuesa tierra. Y agora, saquéennos les pensiones.

Seis millones de presones en paru nel Estáu español y más de cien mil n’Asturies, coles sos families, suponen la fame pa la tercer parte la población.

Banqueros, especuladores, grandes empresarios y políticos ensin escrúpulos, fáense millonarios. Ellos nunca van entrar na cárcel porque la llei y la policía protéxenlos.
Agora quieren que paguemos la cris qu'ellos crearon. El capitalismu siempres quier más y tan robándonos los drechos que la clas obrera algamó con una llucha de cientos d'años. Quieren que paguemos los platos rotos d'una cacía na qu'enxamás comimos. La mal llamada “delda pública”, ye la so delda: que la paguen ellos.

Gabino de Lorenzo y la so policía lleven la represión a niveles intolerables. Les pasaes fuelgues del 14 payares y del 29 marzu, munches persones, resultaron tundíes, deteníes y encausaes por salir a la cai a defender los sos derechos; por pidir un trabayu, por querer salir del paru y de la probeza. Tán imputaes por defender el pan y los drechos de toes y toos. Agora, nun podemos dexales soles. Hai que consiguir la so absolución y que se castigue a los braeros culpables de la cris, a quienes s'arriquecen a la nuesa costa y a quienes nos conderguen a la miseria.

Fonte: infoasturies.net

Conceyu Abiertu por Llangréu en solidaridá col coleutivu trabayador d'Aguas de Langreo

La empresa mixta Aguas de Langreo (51 % Ayuntamientu / 49% Aqualia) decidió retirar esti añu la paga estra de Navidá a los sos emplegaos, qu'axunten una plantiya de 42 persones. Los y les trabayadores anuncien qu'en nengún momentu la empresa, controlada pol gobiernu llocal, intentó negociar con ellos y que tan acabantes de conocer esti recorte llaboral por mediu de la prensa. Asina, l'Ayuntamientu y Aqualia tomaron esti determín de forma unilateral y executaron esti recorte al coleutivo trabayador d'Aguas de Langreo.
Les y los trabayadores de la empresa que ye la encargada del suministru d'agua nel nuesu conceyu anunciaron que van entamar movilizaciones y van llevar el casu al xulgáu. Dicen que nun alquieren grandes sueldos yá de por sí y que la retirada d'esta paga especial, ganada cola so fuercia de trabayu durante tol añu, va suponer que munches families vayan pasalo realmente mal.

Dende Conceyu Abiertu por Llangréu queremos manifestar que:

- Esta midía de recorte respuende a la hipocresía del gobiernu llocal de l'alcaldesa de los 3700 euros mensuales, que recorta nes condiciones llaborales y nos sueldos de los trabayadores municipales pero sigue destinando bien de dineru públicu a obres faraóniques o gastos superfluos.
- Nun ye la primer vegada qu'hai conflictos nesta empresa y que'l gobiernu del Conceyu de Llangréu espeya perbien la so natura déspota y anti-obrera. Esti gobiernu llocal inclusó despidió a dellos trabayadores fai más d'un añu pola so actividá crítica dientru d'Aguas de Langreo.
- El fechu de que nun negocien colos trabayadores y qu'estos últimos tean d'enterase al travíes de la prensa de la retirada de la paga de navidá ye vergoñosu. Animamos a la plantiya a denunciar estes agresiones a les sos condiciones llaborales y el calter autoritariu de la direición de la empresa, controlada como yá diximos pol Ayuntamientu.
- Unviamos la nuesa solidaridá a los trabayadores y llamamos a la xente de Llangréu a facer lo mesmu.
- Plantegamos y abrimos l'alderique de lo conveniente que sedría una xestión pública, xusta y tresparente del serviciu d'agües nel nuesu conceyu.

Manifiestu nacional de Darréu nel Día de la Constitución Española.

¡Abaxu la Constitución Española de 1978! ¡Puxa la soberanía política y económica d'Asturies!

Un añu más, dende la organización de mocedá de la izquierda soberanista Darréu queremos pidir l'abolición de la Constitución Española de 1978 por...

ser esta:

• Antidemocrática. La redaición y el supuestu consensu d'esti cuerpu constitucional foi a puerta zarrada y ensín consultar al conxuntu la sociedá. Los partícipes fueron PSOE-UCD-AP-PCE y PDC. La mayoría de les persones qu'integraben estos partíos procedíen del franquismu y nel casu'l PCE nun supuso más qu'una traición y una forma de lliquidar esi partíu. La Constitución del 78 amás pon munchos pilancos a la participación popular y na práutica nun hai separtación de poderes, yá que'l control políticu controla al poder xudicial. Namás el 61% de los asturianos votaron nesi referendum, el 39% restante paez que nun esistieron.

• Nacionalista Española. La Constitución Española va a la escontra de cualesquier procesu democráticu d'autodetermín en dalgún de los pueblos que formen l'Estáu. Considera'l Reinu d'España como “patria común e indivisible” y amás da-y llexitimidá al exércitu español pa finar con un procesu democráticu de llibre determín pola fuercia militar. El Poder Central ye amás l'únicu espaciu de decisión a la hora de que les nacionalidaes o pueblos del Estáu quieran avanzar na so autonomía o soberanía, polo que nun hai autonomía real y los estatutos d'autonomía furrulen namás como instrumentos de la propia CE'78.

• Capitalista y monárquica. España ye según la C'78 un “Estáu Social y de Drechu”, pero na realidá hai una definición perambigüa y si facemos un analis rigurosu y críticu podemos ver como la Constitución llexitimiza y nun pon torgues a cualesquier abusu imperialista y neolliberal. Nun hai más que ver la situación d'anguañu. Amás afítase nel Estáu Español una monarquía corrupta y heredera directa del franquismu qu'enxamás decidimos ente toos. En plenu sieglu XXI el Reinu o'l Principáu son instituciones fondamente arcaiques.

Asina, dende Darréu creemos que con esta Constitución Asturies pierde. Atalantamos esti testu como un simple llaváu de cara de la reforma franquista que nun supuso nengún cambiu real. El Pueblu Trabayador Asturianu tien d'entender qu'esta Constitución de 1978 ye un instrumentu más del capitalismu y del nacionalismu español más autoritariu. Contra esti modelu constitucional dende la mocedá soberanista y revolucionario tenemos una propuesta clara: la soberanía política y económica real d'Asturies. Llamamos a la mocedá a construyir en cada barriu, pueblu o ciudá un contrapoder dende la base. Un contrapoder que seya'l motor de tresformación social y nacional qu'Asturies necesita pa salir de la situación na que vive secuestrada pola oligarquía española.

¡El constitucionalismu d'anguañu ye'l franquismu d'antañu! ¡Puxa Asturies llibre y socialista!

Sound System + Pinchotéu solidariu.

Esti vienres 7 d'avientu, nel CSOA La Madreña, Sofitu entama un pinchéu solidariu amenizáu con dellos dj's cola música más rebelde. L'actu entamará a les 19:30 hores nel centru social uvieín y ye en solidaridá con Violeta, la muyer acusada por da-y un mazcatu a Tini Areces. Violeta, qu'en principiu nun entrará na cárcele, necesita'l to sofitu pa superar la situación económica xenerada por mor d'esti nuevu casu de represión de Tini y la FSA de las JONS. Animaivos a collaborar con Violeta y Sofitu.

¡Solidaridá activa!

¡Oficialidá darréu!

Pasucais escontra la farsa constitucionalista española.

El prósimu xueves 6 d'avientu, en Mieres, Darréu cellebra'l que va ser l'únicu actu críticu pa cola Constitución Española de 1978 d'estos díes empobináu pola izquierda nacional asturiana. Va ser un pasucais informativu, onde la mocedá soberanista y revolucionario informará al Pueblu de Mieres sobre la so visión del procesu reformista del franquismu y visibilizará la gran farsa constitucional, al serviciu de los mesmos intereses que'l franquismu más puru y duru: el capitalismu, el nacionalismu español más reaccionariu y la oligarquía facista y parasitaria.

El cortexu'l pasucais saldrá de la Plaza de Requexu de la villa de Mieres del Camín a les 12:30 y va percorrer les principales víes mierenses. Dende Darréu piden a la mocedá asturiano la so asistencia pa tornar la situación y afitar n'Asturies un procesu de soberanía y de llucha pol poder popular.

Villaviciosa acoyó la concentración contra la resquiebra hidráulico

La Plaza'l Güevu acoyó el sábadu la concentración de la Plataforma Anti-Fracking, en refugu de l'aplicación d'esa actividá nel nuesu país.
 

El pasáu sábadu de magar les 12:00 un garrapiellu de coleutivos y persones convocaes pola Plataforma Asturiana Anti-Fracking concentráronse na Plaza'l Güevu de Villaviciosa, en refugu de la posible aplicación de la resquiebra hidráulico n'Asturies. Esta actividá afeutaría a numberosos conceyos del nuesu país, ente ellos los de la comarca sidrera na que s'asitia la villa.

Los y les participantes dexaron nidiu'l so refugu a la llegada de la resquiebra al nuesu país, polos sos perxuicios mediuambientales, al tiempu que desixeron la suspensión de toles actividaes en cursu, quitar los permisos y torgar los proyeutos nuevos d'investigación y esplotación. Con ello pondríase fin a una amenaza ecolóxica real pal patrimoniu natural asturianu, y pa la salú de les persones afincaes nel territoriu asturianu.

Numberosos coleutivos tuvieron presentes, como grupos ecoloxistes, el grupu de mediuambiente del movimientu 15-M, o Conceyu Abiertu, qu'al traviés de la plataforma conceyil maliaya llamó a la participación nesti actu. Como ye conocíu, la formación municipalista vien desendolcando la so campaña contra'l fracking, que cuntó con bona acoyida pente los y les asistentes.

Charra Anti-resquiebra

Nesa mesma llinia, Conceyu Abiertu desendolcó'l pasáu xueves una charra nel conceyu maliayu contra la resquiebra hidráulico, mediante la esposición d'una charra a cargu de Paloma García, na que se desplicó lo que ye'l fracking, y les sos consecuencies, too ello cola presentación previa d'un responsable de Conceyu Abiertu por Villaviciosa. Posteriormente, emitiose'l documental "La solombra'l fracking", alrodiu d'esta problemática.

Querella de los sindicatos escontra la violencia policial nel 14P

Los sindicatos CSI, CGT, CNT y SUATEA presentaron una querella criminal escontra les Unidaes d’Intervención Policial (UIP) polos fechos de la pasada fuelga xeneral. "La fuerza policial esproporcionada, les detenciones y l’asaltu a la Casa Sindical fueron el puntu cimeru a l’actitú provocadora y desafiante de la Policía ante quienes informaben a los y les trabayadores sobre los motivos de la fuelga" diz la CSI.
[Semeya Pedro Menéndez]
 

El pasáu 14 payares viviéronse momentos de gran tensión en Xixón cuando el piquete informativu de CSI y CGT fue víctima d’una violenta intervención de la Policía Nacional. Na cai Llangréu, a les 10:30 de la mañana, los axentes antidisturbios pretendieron detener a una persona, pa lo que nun dudaron en puñar escontra les ochenta persones, aproximadamente, que formaben parte del piquete. Hasta aquel momentu, y dende les cinco de la madrugada, nun se produxera nengún incidente col llabor informativu de los sindicalistes. "Les cargues policiales adquirieron tal violencia que dellos y delles trabayadores tuvieron de ser atendíos polos servicios del SAMU, llamaos ante la gravedá de les mancadures y contusiones provocaes, llegando, inclusive, a tener qu’hospitalizar a delles de les persones mancaes", afirmen dende la CSI. "Ente les persones cutíes y deteníe, atópense trabayadores d’a pie, miembros de comités d’empreses como TSK, SERIDA, Xixón Una Ciudá pa Toos o’l Presidente del Comité d’Empresa de la RTPA, empresarios autónomos, padres y madres de familia, tresportistes, miembros de les Executives sindicales, profesionales de distintos sectores económicos y cualquier persona que s’atopara na redolada".

Depués del episodiu violentu na cai Llangréu, socediéronse les carreres y cargues policiales escontra los sindicalistes, hasta la mesma entrada de la Casa Sindical. Ellí, dellos axentes irrumpieron al asalto na antoxana del edificiu, pa poder siguir cola cuelma a los trabayadores. Metanes, na Plaza L’Humedal facía irrupción la Policía Municipal de Xixón, prindando a otres tres persones de la que corríen hacia la Casa Sindical. "La gravedá de asocedío’l día 14 llevónos a presentar denuncia de manera conxunta nel Xulgáu de guardia, y a ella incorporáronse los graves partes de mancadures emitíos pelos centros hospitalarios en que fueron atendíes".

Los demandantes afirmen que "les unidaes de la UIP, non solo realizaron cargues de forma inxustificada ya indiscriminada, sinón que detuvieron a cuatro persones ensin motivos razonables y, darréu a tou ello, imputaron, de forma gratuita, a otres cuatro persones por fechos que, namás dende la más absoluta parcialidá, podríen llegar a calificase como desordes públicos, resistencia a l’autoridá, etc., pos per parte los manifestantes nun se produció un solu desperfecto qu’afectara a establecimientos comerciales, nin un dañu a persones que motivaren l’actuación de la Fuerza Público. Pero la Policía remana recurrentemente estes imputaciones como cortina de fumu pa despintar les sos actuaciones escomanaes y fora de too control racional. Dende una lóxica fondamente antidemocrática, primero péguennos y depués denúnciennos. Basta ver les imaxes tomaes por periodistes a quien se trató de torgar el so trabayu o por ciudadanos que fueron testigos de les cargues policiales pa comprobar cómo les mal llamaes fuerces del orde cuten con saña a persones que tienen inmovilizaes nel suelu, con evidente riesgu pa la so integridá física".

La querella criminal enancharáse tamién al allanamientu de la Casa Sindical pola Policía.
"Los emplegaos públicos tienen la obligación de cumplir y faer cumplir la llegalidá vixente, y los cuerpos policiales, sobremanera, tienen d’acatar les normes integrantes del ordenamientu xurídicu de forma más escrupulosa si cabe, habida cuenta de que namás ellos tán lexitimados pa emplegar la fuerza dientro de les llendes que l’ordenamientu xurídicu-yos impón, ostentando amás les sos declaraciones, presunción de veracidá frente al restu los comunes. Con éses, el cumplimientu de la llegalidá vixente esixe respetar celosamente los Derechos Fundamentales recoyíos pola Constitución Española, ente los que s’inclúin el drechu de fuelga y el de manifestación, y el tratu igual a tolos ciudadanos; nun siendo posible que s’emplegue mayor violencia colos manifestantes y güelguistes que, nel lexítimu exerciciu de los sos derechos, salen a la cai a protestar en defensa de la sanidá, la educación pública y el trabayu, que colos abusos patronales que retayen el drechu de fuelga con amenaces y despidos, colos corruptos y estafadores o con los autores de los graves delitos económicos qu’abonden a lo llargo d’esti mal llamáu “Estao de derechu”.

Los sindicatos denunciantes emplazaron tamién "a les unidaes de antidisturbios, como a los sos mandos policiales y responsables políticos, col Delegáu del Gobiernu y el Ministru del Interior a la so cabeza, a plantegase por qué la población de Xixón se volcó coles persones deteníes esi día y permaneció delantre de la Comisaría de policía hasta la so lliberación".

FONTE: glayiu.org

Conceyu Abiertu por Uviéu solidarízase colos trabayadores de Parques y Xardinos despedíos

La empresa FCC, al traviés d’una de les sos subcontrates, vien de despedir a seis trabayadores encargaos del caltenimientu de Parques y Xardinos dientru de los servicios municipales del Ayuntamientu d’Uviéu. La empresa argumenta motivos llaborales, fechu que refuga’l Comité d’Empresa, y los seis trabayadores, que s’atopen acampaos nel Parque San Francisco.

Dende Conceyu Abiertu por Uviéu queremos treslladar la nuesa solidaridá incondicional pa colos trabayadores afectaos por una decisión que paez nidiamente inxusta, al tiempu que mos paez imprescindible denunciar la complicidá del Ayuntamientu d’Uviéu pa con esti tipu d’atropellos empresariales.

 

La privatización d’estayes pertenecientes al Ayuntamientu d’Uviéu, xunío a la impunidá cola qu’actúen empreses como FCC pa colos sos trabayadores, amosen a les clares que ye urxente la municipalización de toles estayes anguaño en manes privaes. L’Ayuntamientu nun puede permitir que nestos tiempos la institución municipal seya cómpliz de la destrucción d’emplegu, y menos si esta se da nunes condiciones inxustes

 

Poro, desiximos la realmisión de los seis trabayadores depedíos, y animamos al pueblu uvieín a amosar la so solidaridá y sofitu pa con esta causa averándose a la zona d’acampada, porque la llucha d’estos trabayadores ye la llucha de los y les ciudadanes d’Uviéu que s’atopen en paru o situación de precariedá llaboral.

 

Fonte: www.conceyuabiertu.org

 

 

El Montepío aplica un ERE nel xeriátricu de Felechosa

El Montepío de la Minería Asturiana presentó un ERE qu'afeuta a 64 trabayadores del so xeriátricu asitiáu en Felechosa, debío a la poca ocupación de les sos instalaciones.

El Montepío ta acabante d'aprobar un Espediente de Regulación d'Emplegu qu'afeutará a 64 trabayadores de les instalaciones coles que la entidá cunta en Felechosa, nel conceyu d'Ayer. Ellí ta asitiada la residencia "La Minería", inaugurada nel mes de Mayu y que n'actualidá cunta con unos 60 usuarios y usuaries, que contrasten cola capacidá total del centru p'acoyer hasta 300 persones.

Los responsables desplicaron que n'actual situación "hai más trabayadores que residentes", fechu pol que ven necesario entamar esti ERE a l'aspera d'una mayor ocupación, que nun se ta dando, según el camientu de la direición del Montepío, pola situación de crisis. L'Espediente dexará cada 3 meses provisionalmente en paru a 18 trabayadores d'estes instalaciones que costaron 30 millones d'euros.

La seición de CSI na RTPA anuncia movilizaciones

La seición sindical de CSI na radiotelevisión pública asturiana anuncia nueves movilizaciones en defensa d'un ente públicu al serviciu de la ciudadanía.

La seición de la Corriente Sindical d'Izquierda na Radiotelevisión Pública d'Asturies RTPA anuncia "la puesta en marcha de movilizaciones contra los despidos de los compañeros y compañeres declaraos en cesión illegal polos tribunales". Pa CSI "Esti despidu supon na práctica l’aplicación d’un ERE tapáu. Más de 40 indemnizaciones de puestos de trabayu que se van a externalizar pagues col dineru de tolos asturianos".

Ye por ello que marquen yá nel calendariu una cacerolada pa esti vienres 30 de Payares a les 13:30 na entrada de RTPA, demientres que'l llunes 3 d'Avientu la movilización sedrá a les 16:30 nel mesmu llugar, pa recibir al Conseyu d'Alministración del ente públicu. La realmisión de los y les despidíes de mena irregular, amás de la puesta en marcha d'una comisión d'investigación que depure responsabilidaes son dalgunes de les vindicaciones.

FONTE: Infoasturies.net

 

Por una tierra llibre.

Los trabayadores de Enferbus, reclamen a la empresa lo que ye d’ellos.

Dende Conceyu Abiertu por Mieres, va meses, llanzamos un comunicáu que denunciaba'l precariu estáu de los autobuses en cuantu a materiales como asientos ensín denguna estabilidá, suelos que funden cuando pises, ventanes que dexen pasar l'agua y frenos que chirríen qu'asusten. Queremos equí entos, centranos nel problema del trabayador, que sofre al llau de los viaxeros estes deficiencies. Non solu tien de conducir un mediu de tresporte que dexa muncho que desear en cuantes a seguridá, sinón que faenlo soportando una deuda nos pagos que se resume n'una media de 1600 euros por paga de ca trabayador, y que na so totalidad fai una suma de más de 200.000 euros.

Declaraciones tomáes por diversos medios de comunicación, a varios trabayadores d'esta plantilla, aseguren que les acusaciones nun puen erradicar solo n’esto, sinon que la empresa suma deudes tamién cola seguridá social y proveedores.

La direutiva de la empresa, pela so parte, fai usu del silenciu y nun se pronuncia al respeutu, ante denguna de les reclamaciones. Dende Conceyu Abiertu por Mieres desiximos que s'asuman les responsabilidaes pertinentes por parte la patronal, y dean la cara ante les más de doscientes denuncies presentaes pola plantilla. Con esti comunicáu queremos acercar a la ciudadanía del conceyu de Mieres, tanto si se sirven del serviciu d'esta empresa comu si non, cual ye la realidá n’esti casu, y tresmitir tol apoyu que necesiten estos trabayadores. Necesitase un compromisu real, y un brazu nel que puean confiar los afectaos, yá que dende arriba lo únicu que reciben ye indiferencia, falta de tresparencia y robos. Esti brazu tien de tar compuestu por tolos coleutivos y presones, ente los que nos incluimos, pa que les fuercies pasen a ser una sola fuercia, la de la xusticia.

¡Desiximos responsabilida, desiximos pagos y desiximos xusticia!

El SOMA sofita'l despidu de 44 trabayadores en Rioglass Solar

Los afiliaos del SOMA votaron a favor de la cabera propuesta de la direición, demientres que'l restu de la plantilla apuesta por siguir lluchando p'amenorgar les cifres.

83 trabayadores de Rioglass Solar pertenecientes al sindicatu SOMA-FITAG-UGT realizaron una votación na que que sofitaron les caberes condiciones plantegaes pola direición de la empresa, ente les que s'atopen 44 despidos de trabayadores nes sos plantes de Mieres y L.lena. 63 afiliaos votaron a favor, 17 a la escontra y 3 en blanco, polo que too paez indicar qu'esti sindicatu, mayoritariu nel Comité d'Empresa, aceptará diches condiciones. Pel so lláu, CC.OO diba a facer una votación asemeyada a la del SOMA, pero finalmente quedó aplazada.

Pel so lláu, un coleutivu de trabayadores refugó rendise, y desmarcáronse de los sindicatos apostando por continuar la llucha p'amenorgar la cifra de despidos, y consiguir unes meyores condiciones en cuantes a les indemnizaciónes p'aquellos trabayadores que seyan obligaos a colar de la empresa. Amesten que nun ye de recibu que la empresa permita aiciones como la contrata d'una compañía propiedá del direutor de RR.HH pa llabores de llimpieza, cuando esi llabor puede facelu la propia plantilla. Poro, frayen los criterios de los afiliaos del SOMA respeuto a los del restu de trabayadores.

Mengüen en dos tercios les beneficiaries de l'ayuda de 400 euros

Demientres que nel mes de Xunu yeren más de 9.000 los y les beneficiaries, la cifra menguó anguaño hasta les 3.100 persones.
 

Dende que'l gobiernu central aprobara la prórroga de l'ayuda de 400 euros p'aquelles persones que s'atopen en situación de desemplegu les consecuencies de les nueves condiciones pa percibila ficiéronse bien visibles n'Asturies. Asina, demientres que nel mes de Xunu yeren más de 9.000 les persones que se beneficiaben d'esta ayuda económica, n'actualidá la cifra ye de malapenes 3.100 persones, o lo que ye lo mesmo, aprosimadamente un terciu de les qu elo facíen va cólo cinco meses.

Les nueves condiciones impuestes pa percibir esta cantidá ficieron más notable'l descensu de perceptores, situación que dexa n'una mayor precariedá a miles de persones que s'atopen en situación de desemplegu nel nuesu país. Más de 100.000 paraos y paraes, y decenes de miles de persones en riesgu d'esclusión social pola falta d'ingresos económicos -o la precariedá de los mesmos- conformen una murnia realidá pa la sociedá asturiana.

Fonte: Infoasturies.net

 

Charra contra'l fracking de Conceyu Abiertu por Villaviciosa

Esti xueves viniente Conceyu Abiertu por Villaviciosa tien de cellebrar una charra a les 20:00h. n´el Centru Cultural Capistrano de La Villa. N´esti actu vamos desplicar que ye eso del “Fracking”, asina como falar de les sos consecuencies y lo que pue suponer pa los nuesos conceyos. Na charra intervendrá un miembru de la agrupación política Conceyu Abiertu por Villaviciosa a modu de presentador y Paloma Garcia, Llicenciada en Ciencies de La Mar, Teúnicu Superior en Prevención de Riesgos Llaborales, Conseyera de Seguridá y militante de Conceyu Abiertu, que sedrá la encargada de falanos del tema a fondu y presentanos un documental sobre esta teúnica d´estración de gas del subsuelu tan peligrosa y contaminante que sedrá proyeutau en dichu actu.

D´otra miente dende Conceyu Abiertu por Villaviciosa queremos amosar el nuesu sofitu a la concentración Anti-fracking, promovía pola Plataforma asturiana anti-fracking, pal prósimu sábadu 1 d´Avientu a les 12:00h. en Villaviciosa y facer un llamau pa que toa la ciudadanía participe. Conceyu Abiertu participará n´esta concentración con un nutriu númberu de militancia.

Conceyu Abiertu respuende al SUP considerando inalmisibles les sos mentires

La organización soberanista y conceyera respondió a les declaraciones públiques del SUP, que pide la identificación de les persones que participaron na concentración solidaria frente a la comisaría xixonesa'l 14 de Payares.

Conceyu Abiertu quixo "amosar públicamente'l nuesu asombru énte les declaraciones asoleyaes en dellos medios de comunicación d’ámbitu asturianu, sobre los fechos acaecíos na Fuelga Xeneral del pasáu 14 de Payares". Depliquen que "Esi día la policia antidisturbios incumplió numberoses lleis y normes de rangu llegal, saliendo a la cai como “antipiquete” patronal y gubernamental, queriendo torgar dafechu derechos fundamentales como’l de Lliberta Sindical ya’l de Manifestación como lo demuestra’l fechu de qu’estes unidaes policiales nun llevaben el Númberu d’Identificación Personal".
Manifiesten dende Conceyu Abiertu que "Nun contentos con ello, el “Sindicato Unificado de Policía (SUP)” lleva dellos díes intentando facer un llaváu de cara énte la criminal actuación de los sos compañeros faciendo por treslladar la responsabilidá a los fuelguistes, criminalizando una protesta social exemplar y que taba teniendo llugar ensin nengún incidente, hasta que los miembros de la U.I.P. entamaron a golpes cola xente que pillaben delantre, tal como puen atestiguar sindicalistes, activistes políticos, periodistes, vecinos y tola xente que perellí pasaba nesi momentu".
Denuncia la organización municipalista que "la policía polo menos protagonizó delles illegalidaes", desplicando que "qu’abusó de les sos atribuciones, causando grave dañu a los ciudadanos mandando a dellos a centros de salú y hospital. Amás tamién mintieren sobre la realidá de los fechos pa xustificar el so papel". Denuncien tamién que la policía "Atentó ensin motivu escontra la Llibertá Sindical y de Manifestación" y "Dende primera hora de la mañana y ensin xustificación posible, les decenes de miembros de la U.I.P. qu’acosaren a los fuelguistes".
Poro, Conceyu Abiertu desixe la "rectificación y disculpes públiques" del SUP, "El posicionamientu nidiu y ensin medies tintes por parte de les asociaciones policiales, si quieren ser consideraes como democrátiques pol conxuntu del Pueblu, escontra toes aquelles midíes que torguen la identificación" y "La dimisión del delegáu del Gobiernu español n’Asturies Gabino de Lorenzo y de l’alcaldesa de Xixón Carmen Moriyón, como másimos responsables políticos d’estos llamentables fechos que nun puen repetise enxamás".

Fonte: Infoasturies

La Xunión Europea llama a fortalecer el so poder militar

El Parllamentu Européu aprobó esta selmana un resolvimientu que llama a les fuercies de la Xunión Europea a fortalecer el so poder militar. Los parllamentarios proponen nun retayar los presupuestos pa la defensa. Podría trayer una perda de soberanía de los estaos nos asuntos militares.
 

El resolvimientu dicta que la Unión Europea tien de responder a los cambeos xeoestratéxicos y les amenaces a la seguridá global, usando toles midíes qu'esisten, inclusive les fuercies militares, p'asegurar la paz y seguridá de los sos ciudadanos. Tamién se sorraya que crisis económica d’anguañu nun puede ser la sida p'amenorgar los presupuestos pa la defensa, pa evitar el descensu estratéxicu.

Esta votación supon que pue ser creáu un nuevu mandu operativu na XE y que Bruxeles va tener l'autoridá d'interferir en distintes crisis, inclusive nos conflictos más intensos. Non tolos miembros del Parlamentu emponderen el resolvimientu, indicando que dellos países pueden vese venceyaos en conflictos militares nos que nun tengan interés. Tamién hai voces crítiques por mor de la violación de la soberanía de los estaos.

La Xunión Europea trata de sobreponese de la crisis económica con estrictes midíes d'austeridá y retayos sociales. Anguaño, Europa traviesa ún de los desafíos más ventureros de tola so esistencia, ensin poder llegar a un alcuerdu sobre'l proyectu de presupuestu de la XE pal períodu 2013-2020.

Conceyu Abiertu por Xixón refuga l'actuación policial durante'l 14P

Dende Conceyu Abiertu por Xixón queremos expresar la nuesa mas rotunda conderga pola actuación de la Policía Nacional, les Xunidaes d'Intervención y de la Policía Municipal de Xixón durante la Fuelga Xeneral del pasau 14 de payares. A lo llargo de tol día de fuelga, estos cuerpos dexaron bien nidio el so calter represivu, asina como'l serviciu que-yos dan Los d'Arriba, tapeciendo la llibertá informativa de los Piquetes. Primero mediante l'acosu y la intimidación, identificando caprichosamente y ensin motivos, y dempués cargando, golpeando, mancando y deteniendo a dellos sindicalistes.

Asina asocedió en Xixón, xustamente cuando'l Piquete de la CSI, SUATEA, CGT y CNT ya empobinabase a la Ca Sindical pa preparan la manifestación convocada a les 12 hores pola izquierda sindical. Daba la impresión que la Policía tenía marcada pa la mañana del 14P, una cuota golpes, ferios y detenios, teniendo d'apurar poco enantes del repliegue de los piquetes. Primero na cai Llangreu onde ensín mediar pallabra cargaron contra los sindicalistes, golpeando indiscriminadamente a persones indefenses, produciéndose un feriu y dellos mancaos, amás d'un deteniu. Poco dempués sedría na cai de Sanz Crespo, delantre de la Ca Sindical, onde intentaron quita-y la cámara a un fotógrafu provocando otru incidente, volviendo a cargar sobre los allí congregados, golpeándo-yos y lo que ye absolutamente intolerable: un posterior asaltu a la Ca Sindical, en cuyes escaleres y antoxana, alcontrabense numberosos sindicalistes que impidieron l'asaltu de la Policía Nacional del "so llar".

Esta aición absolutamente intolerable de la Xunidá d'Intervención de la Policía Nacional, saldose con numberosos mancaos y un feriu con la tiesta ensangrentada polos fuertes golpes recibios y que tuvo de ser treslladau al Hospital, además d'otros tres compañeros detenidos pola Policía Municipal que también cargó con saña desmedio.

Por tolo ocurrio y equí dicho, Conceyu Abiertu por Xixón, amás de felicitar pola lliberación de los cuatro detenios impuesta pola valiente y solidaria movilización de los miles de manifestantes que arodiaron la Comisaría durante dos hores, desixe:

> La llibertá ensin cargos de los cuatro detenidos de Xixón, y del que lo fuera en Uxo.
> La dimisión inmediata de Gabino de Lorenzo, Delegau del Gobierno n'Asturies y postreru responsable de la actuación de la Policía
> La dimisión inmediata de Rafael Felgueroso, Conceyal de Seguridá Ciudadano del Aytu. de Xixón

 

www.conceyuabiertu.org

 

 

Darréu denuncia'l continuismu franquista nesti 20 de payares.

Otru 20 – Payares de neofraquismu vixente n'Asturies.

Fai 37 años morriera'l dictador Francisco Franco, tres 40 años d'un terror sistematizáu militarista, facista y españolista. La Dictadura Franquista sigue siendo impune y la so supuesta tresformación y ruptura entá güei nun llegó. Les señes d'indentidá del franquismu yera un españolismu arcaicu, la confesionalidá del Estáu, la defensa de los porgüeyos de la oligarquía y la represión policial. Güei, depués de tantos años, vemos con esmolición la situación d'anguañu y nun podemos dende la mocedá soberanista dicir otra cosa qu'esi sistema franquista sigue vivu.

Dende Darréu atalantamos que tres l'añu 1975 nun vivimos nin n'Asturies nin l'Estáu Español nenguna transición como lleven tantos años vendiéndonos. Les maniobres qu'asocedieron depués del añu 1975 evidencien un gran montaxe empobináu pola burguesía y la oligarquía españolista y cola collaboración de munchos axentes cómplices. La situación d'opresión nacional y social que vivimos n'Asturies nun camudó enforma y coses tan mínimes como la reconocencia oficial d'un idioma milenariu nun se dan na realidá.

Na mal nomada transición el Réxime de Franco llavó la so cara ya incorporó a nuevos seutores de la élite político-social y económica al so xuegu, lo que-y servía como maniobra de llexitimidá énte la xente, los medios de comunicación y la comunidá internacional. De tal manera, afitaron un sistema sociopolíticu que diz ser democráticu y tar al serviciu de toes y toos por igual, con una Constitución vergoñosa y yá de por sí reaccionaria que supuestamente “aprebamos toos” y un xefe d'Estáu que ye heriederu direutu del xeneral Franco.

Dende Darréu caltenemos que'l sistema sociopolíticu del Reinu d'España sigue sirviendo a los mesmos intereses qu'enantes del 20 de payares de 1975. La defensa de la unidá política y territorial del Estáu Español y los intereses económicos del bloque oligárquicu son les razones de ser d'esta farsa que denomen “democracia española”. La misión sigue siendo la mesma pal Estáu Español y sigue teniendo los mesmos dueños na solombra. Les mázcares que'l neofranquismu punxo a lo llargo d'estos años son munches, pero pasu ente pasu y gracies a la situación d'evidencia que vive'l capitalismu paez ser que van cayendo.

Pa la Mocedá Independentista Revolucionario d'Asturies la propia esistencia del Estáu Español ye un fechu antidemocráticu y que va a la escontra de los intereses de los pueblos. La cárcele de pueblos que ye'l Reinu d'España namás tien un camín democráticu: Reconocer el drechu d'autodetermín a tolos pueblos que tien embaxo la so tiranía y facer qu'esos procesos seyan democráticos, populares y ensín cuestionar los sos resultaos.

Poro, nesti 20 de payares, dende Asturies y dende la mocedá d'izquierda soberanista Darréu queremos denunciar la farsa neofranquista na cual vivimos. El continuismu nel Estáu Español ye bien evidente y caltenemos que la mocedá asturiano tien de saber que'l so papel ye ser crítica y combativa nesti sen.

La moceda d'esti país nun podemos permitinos, enviendo'l futuru que mos ufierten, inorar que'l xefe d'Estáu qu'impón una institución colonialista nel nuesu pueblu foi escoyíu a deu por un xeneral facista.

Tampocu podemos tolerar qu'Asturies siga siendo una nación a la que nun se-y reconocen los sos llexítimos drechos nacionales o llingüísticos, como podríen ser el drechu d'escoyer el nuesu modelu d'autogobiernu, el propiu autodetermín o la oficialidá'l nuesu idioma.

Nun podemos tolerar que los mesmos torturadores d'antañu o los sos fios seyan quienes dirixen les fuercies represives españoles n'Asturies y reprimen la llucha social, nacional y obrera qu'hai nesti país.

Nun tenemos que tolerar tampocu que la bandera de la vergoña siga ximielgándose por Asturies ensín el refugu popular. Esa bandera, la bandera del Reinu d'España, ye la bandera que representa la gran victoria del continuismu franquista de los borbones.

Dende Darréu, caltenemos que nun podemos permitir que la mocedá asturiano permaneza impasible énte la situación d'emprobecimientu, miseria y violencia que'l sistema capitalista xenera sobro les clases populares tolos díes al travíes d'esi Estáu Español.

L'alternativa a esta gran farsa pasa por entamar dinámiques de participación social que quieran puxar por Asturies como la entidá nacional que ye, polos porgüeyos de les clases populares y pola tresformación social y revolucionaria de la nuesa sociedá. La única alternativa al continuismu franquista pa Darréu pasa pola emancipación nacional y social d'Asturies. Frenti a la “democracia a la española” hemos de da-yos “soluciones a l'asturiana”.

¡Abaxu la reforma franquista vixente y los sos responsables!

¡PUXA ASTURIES LLIBRE Y SOCIALISTA!

Conceyu Abiertu por Mieres pide la llibertá del deteníu n'Uxo

L'arrestáu foi llamáu a declarar nel xulgáu de Mieres acusáu de "terrorismu y atentáu contra l'autoridá".

Conceyu Abiertu desixió la lliberación del deteníu n'Uxo cuando participaba nun piquete informativu durante la xornada de fuelga xeneral del día 14 y que foi llamáu a declarar nel xulgáu de Mieres na mañana d'ayeri acusáu de "terrorismu y atentáu contra l'autoridá".

Tres prestar declaración, la Fiscalía desestimó los cargos anteriormente mentaos, pero caltién qu'esta persona incurrió en "desórdenes públicos" y soliciten una pena de cárcele d'ente 6 y 36 meses.
La formación llama "a la ciudadanía d'esti conceyu y d'Asturies a tresmitir la so solidaridá col compañeru deteníu ayeri" y desixe la absolución ensin cargos pola dinámica de "represión indiscriminada que vivimos nel 14P".

"Enviendo esta doble forma de midir y manexar la situación dende'l poder políticu y policial atalantamos como de xusticia y democráticu'l pidir la total absolución de los compañeros deteníos ayeri y la retirada de los cargos que-yos imputen".

FONTE: Queyeho.com

Darreú pidió l'absolución de tolos deteníos el 14P

Darréu fizo públicu'l sofitu a "les persones que fueron prindaes pola policia española n'Asturies. Primeru de too queremos tresmitir la nuesa solidaridá y llamar a la mocedá asturiano a facer lo mesmu p'asina amosar que la mocedá nun va dexar soles a estes persones imputaes".

Dende Darréu desixen "l'absolución dafechu d'estes persones, ye dicir, la llibertá total y ensín cargos pendientes. Nuna situación onde los lladrones y esplotadores faen lo que-yos peta y salten la so propia llei ensín consecuencies, vemos como les persones de clas trabayadora topen cada pocu cola represión de les fuercies d'ocupación españoles n'Asturies. Les persones que piden un futuru que mos tan ñegando sistematicamente dende los despachos de poder políticu y la oligarquía son víctimes de la represión más descomanda".

Despliquen dende Darréu que "nesta xornada de fuelga n'Asturies la policía detuvo a delles persones queriendo imputa-yos cargos propios d'un montaxe policial facista, agredió a decenes de persones y provocó de manera continua al Pueblu Asturianu pa tratar asina de crear conflictu y criminalizar la rempuesta social. incluso antidisturbios españoles quinxeron entrar a bas de golpes na Casa Sindical de Xixón, sitúación qu'enxamás pasó dende los tiempos de Franco. Toos estos fechos antidemocráticos y reaccionarios fueron orquestaos pol Delegáu de Gobiernu Gabino de Lorenzo, quien dende la solombra ta tratando d'amedrentar, condergar y encarcelar a la disidencia asturiana. Nesti sen, pidimos la dimisión de Gabino de Lorenzo".

Pa finar, manifestaron que "el capitalismu español cada vuelta va mostrase más agresivu n'Asturies y nel restu l'Estáu, frutu de la so actual situación de debilidá y evidencia. L'Estáu Español enxamás atendió a razones y menos en situaciones asina. Poro, tenemos de tener nidio que ye clave nesti momentu exercer la solidaridá activa con toles persones que tan siendo represaliaos y les que van venir y tar soyertes. Va siguir evidenciandose que l'aición policial, al serviciu de la oligarquía española y los políticos que la representen, va escontra los intereses del Pueblu Trabayador Asturianu. Siendo nós más, siendo la gran mayoría social tenemos de decatanos que ye necesariu si queremos construyir un procesu democráticu n'Asturies pidir la retirada de les fuercies policiales represives y d'ocupación d'Asturies. Dende Darréu hai muncho tiempu que llevamos reclamando esta midía, pues estes fuercies represives namás sirven a los porgüeyos de los capitalistes pero enxamás a los del Pueblu".

Fonte: Infoasturies

Rueda prensa de los sindicatos de clas d'Asturies

Por mor de la xabaz represión del 14 payares.

Asturies paró pola fuelga xeneral

Durante la xornada d'esti 14 de Payares el pueblu asturianu respondió, una vegada más, a la convocatoria de fuelga xeneral, asitiándose a la tiesta estatal en cuantes a seguimientu.  

Esti miércoles 14 de Payares Asturies afrontó una convocatoria de fuelga xeneral que, dende'l principiu, taba previsto que fora masiva. Y asina foi, con movimientu sindical dende enantes del entamu oficial de la fuelga xeneral a les 00:00. Enantes d'esa hora servicios como la recoyida de basories n'Uviéu nun furrularon, fechu que foi repitiéndose a lo llargo de la nueche en numberosos enclaves de l'actividá llaboral nel nuesu país.

Durante'l día, los tresportes furrularon con servicios mínimos, que malapenes se desendolcaron durante les primeres hores, y que xunto con un paru casi total nel seutor industrial conformaron la espina dorsal de la movilización xeneral n'Asturies. Los piquetes informativos percorrieron los principales puntos llaborales y comerciales del país, consiguiendo que se baxaran les persianes de numberosos establecimientos. Nes cuenques mineres el paru foi absolutu, lo mesmo que n'Avilés, demientres que n'otros puntos importantes como Uviéu o Xixón el seguimientu foi tamién mayoritariu, anque dalgo menor que nes llocalidaes anteriormente citaes.

A les 12:00 CSI, CNT, CGT y SUATEA desendolcaron el so manifestamientu de la Plaza L'Humedal, depués d'una mañana movida pol asaltu policial a la Casa Sindical, con cuatro deteníos como bagaxe. Amás, CCOO, UGT y USO intentaron remanar la manifestación de la izquierda sindical asturiana convocando manifestación a la mesma hora, fechu que nun impidió'l desendolcu de la movilización. L'actu foi multitudinariu, con unes 25.000 persones qu'enllenaron el Náuticu pa escuchar los discursos de les distintes fuercies sindicales convocantes.

Depués, turnu pa la solidaridá, treslladándose una bayura de persones frente a dependencies policiales hasta que foron lliberaos los compañeros deteníos, aición solidaria que cuntó col sofitu de cientos de persones, que vivieron momentos de tensión colos destacamentos policiales ellí presentes. Finalmente, los cuatro deteníos foron puestos en llibertá, conformando xunto a un prindáu en Mieres los únicos represaliaos cola detención n'Asturies.

Tamién a les 12:00 La Felguera vivió la convocatoria "Arrodia l'INEM" d'ADEPAVAN, sofitada por un númberu importante de persones. Tamién L.lena y Llugones desendolcaron una aición asemeyada, sumando asina a los y les paraes coles sos propies movilizaciones de vindicación y denuncia.

Yá pela tarde Uviéu tuvo de nueu piquetes informativos previos al manifestamientu del sindicalismu mayoritariu, que foi masivu. Unes 100.000 persones enllenaron les cais d'Uviéu. Tal foi la cantidá de xente, que cuando la cabecera del actu yá finara'l recorríu, l'Avda Galicia y Plaza d'América, llugares d'entamu de la marcha, taben abarrotaos de xente que nun entamara entovía a caminar.

Nesi manifestamientu hebo presencia del Bloque Anticapitalista, coleutivu críticu que portó la so propia pancarta. Tamién hebo presencia del coleutivu de muyeres del carbón en llucha, PCPE, PCA, USO, CGT, SUATEA, Sindicato de Estudiantes, Asamblees Universitaries, y otros coleutivos, asociaciones y organizaciones.

Nesta xornada tamién hebo llugar pa les barricaes nes cuenques mineres, en llugares como Uxo, Figareo, nel centru Valnalón o n'Autovía Minera, nuna xornada na qu'Asturies tuvo a la tiesta del estáu en cuantes a cifres de seguimientu, nos centros de trabayu y nes movilizaciones convocaes nes cais. El pueblu asturianu tornó a responder a la movilización.

P'atopar más datos, noticies ya informaciones, consulta l'especial de Glayiu.org , o'l twitter d'InfoAsturies (@infoasturies).

Rueda de prensa de la plataforma municipalista y d'izquierda soberanista Conceyu Abiertu

Rueda de prensa de Conceyu Abiertu escontra'l desmantelamientu industrial d'Asturies, polos drechos sociales y llamando a la fuelga xeneral del 14-P.

www.conceyuabiertu.org

Rueda prensa de los sindicatos de clas asturianos.

Andecha anuncia "sofitu críticu" a la fuelga xeneral del 14P

Andecha Astur decidió dar un "sofitu críticu" a la fuelga xeneral convocada pal viniente 14 P al atalantar que les postreres midíes adoptaes pol gobiernu español suponen "una agresión ensin precedentes a los drechos sociales de la ciudadanía dientru d’una dinámica de perda xeneralizada de drechos y llibertaes sociales".
 

Sicasí, dende Andecha Astur considérase que’l calter estatal de tala convocatoria "desvirtúa fondamente la rialidá asturiana, pretendiendo enartala dientru d’un conxuntu estatal, cuandu resulta nidio que la situación que carez Asturies y que vien producía dende enantes de la cris, respuende non yá a una situación económica concreta sobro la qu’habría enforma que dicir, sinón a la resultancia d’una política sociu-económica aplicada pol Estáu español n’Asturies empobinada a la destruición del texíu sociu-económicu asturianu y que tien de resultes el paru, la precariedá nel emplegu y la emigración forzada de decenes de miles d’asturianos, inclusive nes dómines de 'España va bien'".
P'Andecha, "ye nidio que siguir defendiendo la seutorialidá de los conflictos sociu-llaborales asturianos, negándose a integralos nun tou común, que contemple la especificidá del marcu llaboral asturianu, llévamos a una dispersión de fuerces y en definitiva a una indefensión".

Per otra parte, dende Andecha Astur atalanten que la convocatoria ta "fuertemente desprestixada" al partir principalmente de los sindicatos UGT y CCOO, cuyos dirixentes "prauticaron una dinámica sindical que los convierte en cómplices necesarios na destruición del texíu sociu-económicu asturianu, y que per ende, desacreditalos dafechu".

Ello ansina, Andecha Astur sofita de forma crítica esta convocatoria de fuelga xeneral del 14 P y llama a la convocatoria d’una fuelga xeneral específica d’ámbetu nacional asturianu, "acullá de la dinámica de cubrir l’espediente, que faiga posible la fin de l’actual situación, que mos llibere de les politiques d’esterminiu que ta aplicando l’Estáu español n’Asturies y que tán llevando a la sociedá asturiana a una situación de sufrimientu y precaridá inaceutables, y que garantice un futuru dignu pal nuesu Pueblu".

FONTE: INFOASTURIES.NET

INTERVENCIÓN DE DARRÉU NEL HOMENAXE A LOS MÁRTIRES DE CARBAYÍN

Un añu más, esti ye'l segundu, venimos nel mes de payares a homenaxar a los Mártires de Carbayín y a tolos nuesos compatriotes que cayeron dignamente contra la bestia capitalista, facista y españolista. Como dicimos, esti ye'l segundu añu pero asperamos que dende Darréu y dende la izquierda soberanista sigamos acudiendo tolos años a esti llugar a ufrir un dignu homenaxe a estos heroes del Pueblu Trabayador Asturianu.

 

Na nueche'l 24 d'ochobre de 1934, nel procesu sistemáticu de represión a la Comuñá Asturiana qu'entamó l'Estáu Español, 24 persones fueron llevaes a La Curuxona procedentes de Ciañu y Sama. Depués de que la Guardia Civil baxara a estes persones del camión fueron enterraos vivos depués de la más xabaz tortura. Los facistes uniformaos ataron a estes persones con cuerdes y na escuridá emplegaron machetes y bayonetes pa mutilar y tortura a estes persones hasta la más doliosa muerte. Munchos, cuando yeren enterraos, tovía taben vivos. Lo asocedíu esi día, por supuestu, cuntó cola total complicidá'l poder capitalista, reaccionariu y españolista.

 

Estes persones fueron torturaes y asesinaes pola so militancia y compromisu anti-capitalista y por lluchar y pensar nuna Asturies meyor y un mundu más xustu. Esa foi la razón que tuvo l'Estáu Español pa asesinar impunemente a estes persones, trabayadores y revolucionaries, y tamién, como non, pa tratar de tapecer estos fechos. Poro, nun podemos escaecer l'exemplu d'estos heroes, que morrieron pasando pola peor de les muertes pero enxamás doblaron la rodiella énte l'enemigu facista y capitalista.

Al igual qu'anguañu, en 1934, cuando asocedió esta salvaxada, namás propia d'un Estáu fondamente reaccionariu, la dominación social exercida pol sistema pol sistema capitalista cada vegada taba más cuestionada pola esplotación, represión, miseria y probitú qu'ufría a les clases populares. Los paralelismos hestóricos son incuestionables y mos revelen la natura inmovilista y violenta que tien el capital y el Bloque Oligárquicu Español como señes d'identidá.

Depués de 78 años, siguimos sofriendo la represión del mesmu sistema socioeconómicu,al empar que'l mesmu estáu, España, sigue imponiendo al nuesu país les recetes y midíes que namás beneficien a la burguesía y tornen más na miseria y la esclavitú al Pueblu Asturianu. Dende Darréu queremos tresmitir una entruga a la mocedá asturiano: ¿ Por qué siguimos escoyendo capitalismu y España cuando namás signifiquen miseria y xabaz represión? ¿ Nun sedremos más llibres cuando optemos por desaniciar la esplotación capitalista y la opresión nacional?

Nesti sen, dende Darréu tenemos nidio que'l camín de la llibertá namás ye un: el de la soberanía política y económica d'Asturies como nación, construyendo un procesu popular col qu'algamemos una República Asturiana al serviciu de les y los trabayadores, non de los esplotadores y caciques. Y nesta ambiciosa pero irretrucable xera nun podemos más que tomar exemplu de la entrega revolucionaria y el valir d'estes persones que güei homenaxeamos. Ellos son la lluz qu'alluma'l camín de la llibertá'l nuesu pueblu y ellos nun querríen ver que la mocedá asturiano d'anguañu s'acobarda contra la oligarquía española de güei. Tenemos que confiar que con llucha, voluntá y compromisu el futuru ye de nueso, como'l futuru ye d'ellos, de los Mártires de Carbayín, por pertenecer yá por méritu propio a la hestoria d'Asturies. Que nun caigan nel escaezu, que vayan con nós pa siguir na llucha.

¡PUXA LOS MÁRTIRES DE CARBAYÍN!

¡PUXA ASTURIES LLIBRE Y SOCIALISTA!