Conciertu antirrepresivu pal 8 setiembre.

Conceyu Abiertu entama un día d’Asturies alternativu en Samartín del Rei Aurelio

El Día de la Nación Asturiana treslládase esti añu a L’Entregu con un actu políticu na cai.

 

El prósimu 8 de setiembre, Díi de la Nación Asturiana, Conceyu Abiertu entama un actu alternativu al qu’organiza’l Principáu en Cangues d’Onís. D’esta manera, la organización prepara un actu políticu nel conceyu de Samartín del Rei Aurelio, onde se cellebrará un actu nel parque “La laguna” de L’Entregu de magar les 14:00h. Nel actu políticu intervendrá un voceru de la organización en Samartín, conceyu qu’acueye l’actu, y un voceru nacional, asina cómo’l conceyal de Noreña y otros representantes de los dixebraos conceyos onde la organización tien presencia. Amás d’ello, tendrá llugar una xinta popular pa los y les asistentes.

 

Conceyu Abiertu considera que l’ocho de setiembre, agora más que nunca, tien que ser un día de vindicación, un día pa vindicar la figura de los conceyos asturianos na reconstrucción nacional y social del nuesu país y la gueta de la soberanía y de la plena democracia p’Asturies.

 

Que’l gobiernu d’Asturies organize una fiesta en Cangues y vaiga a misa a Cuadonga, sirvirá como entretenimientu o distraición, pero nun mos sirve pa nada políticamente a los asturianos. L’ochu setiembre ye un día pa recordar qu’Asturies ye una nación y que como tal tien unos drechos. Tenemos que críticar necesariamente al gobiernu asturianu nel día de tolos y toles asturianes porque escaez facer lo más importante: tien que reivindicar políticamente Asturies y les sos instituciones que s’atopen baxo amenaza del centralismu español, tien que recordar que somos una nación hestórica europea, que tenemos drechu al autodetermín y que nestos momentos d’imposiciones, de recortes, d’ataques a la yá de por sí curtia autonomía que tenemos, d’amenaces a los conceyos y mancomunidaes y de desaniciu de lo público, ye precisamente cuando con más puxu tenemos que desixir al gobiernu d’Asturies, qu’actúe como tal, que dexe de ser cómpliz y que mos defienda.

 

Enxamás un gobiernu central llegare tan lloñe amenazando d’intervenir les cuentes d’Asturies, ye dicir, d’intervenir la nuesa autonomía. Y de fechu, imponiéndomos illegalmente, atentando contra la so propia constitución española recortes inasumibles que ponen en riesgo el sistema públicu de sanidá y educación sobre’l que tenemos competencies.

Eses amenaces necesiten rempuesta y Conceyu Abiertu ta encadarmándose pa organizar una rempuesta. Poro, animamos a tolos asturianos y asturianes esmolecíos pol futuru del so país a igualu con nosotros en clave social. Un bon entamu puede ser compartiendo con nós en L’Entregu (Samartín del Rei Aureliu) esti prósimu 8 de setiembre, día de la nación asturiana.

 

Fonte: www.conceyuabiertu.org

Ésitu na 2ª xornada de fuelga en ThyssenKrupp

La xornada de fuelga convocada es ti sábadu pol Comité d'Empresa de ThyssenKrupp Norte na so fábrica de Baíña tuvo de nueu un seguimientu total ente los trabayadores, na so llucha por un conveniu coleutivu dignu que dende la empresa se-yos niega.

Los y les trabayadores de la fábrica de Thyssenkrupp Norte na llocalidá de Baíña, nel conceyu Mieres, taben llamaos a una nueva xornada de fuelga que tuvo llugar esti sábadu, col enfotu de reclamar un conveniu coleutivu que recueya una xubida salarial del 3,4% en llugar del 1,4% ofrecíu pola empresa, y que nel casu de la plantilla fuera del conveniu xube hasta'l 3,5%.

Ye por ello que'l Comité d'empresa, formáu por CSI, CC.OO y UGT, convocó esta nueva xornada de movilización que, una vegada más, cuntó col sofitu de la totalidá de la plantilla, qu'aparó los trabayos de la factoría durante tola xornada como midida de presión pa que la empresa negocie colos trabayadores unes meyores condiciones.

Fonte: Infoasturies.net

Andecha celebró’l 75 aniversariu de la declaración de soberanía del Conseyu d’Asturies y Lleón

Alredor de venti persones averáronse’l sábadu al monolitu d’homenaxe a la declaración de soberanía del Conseyu d’Asturies y Lleón asitiáu por Andecha Astur nel puertu Tarna. El día 25 cumplíense 75 años d’esti fechu.

Los militantes y simpatizantes de la formación nacionalista axuntáronse alredor del monolitu d’homenaxe, onde depositaron un ramu de flores. Darréu tuvo llugar la intervención política, na que’l secretariu xeneral de la organización emponderó’l comportamientu de les persones que conformaron el Conseyu Soberanu d’Asturies y Lleón pola so defensa d’Asturies y del pueblu asturianu. Por último, comentó que l’Estáu español pon en peligru la sobrevivencia del país y fixo un crítica a les formaciones con representación na Xunta Xeneral. Pa finar l’actu, sonó la ‘La flor del agua’.

El Conseyu d’Asturies y Lleón firmó la declaración de soberanía’l 24 d’agostu del 1937, qu’entraría en vigor el día siguiente pese a la oposición de los gobernantes de la República española. Dende esi momentu y hasta’l 20 d’ochobre, el presidente Belarmino Tomás y el so executivu tomaron les riendes del país, acuñando inclusive moneda propia. La entrada de les tropes ‘nacionales’ en Xixón el 21 d’ochobre supunxo la fin del Conseyu.

Fonte: Asturies.com

Caña, caña, caña, Asturies nun ye España.

Concentración solidaria ya internacionalista Asturies-Sudáfrica

Andecha entama un actu d’homenaxe al Conseyu Soberanu d’Asturies y Lleón nel so 75 aniversariu

Esti sábadu cúmplense 75 años de la declaración de soberanía del Conseyu d’Asturies y Lleón. Por esti motivu, Andecha Astur entama un actu homenaxe nel monolitu asitiáu pola organización en Tarna en recuerdu a esta institución.

D’esta forma, la celebración d’esti homenaxe que tolo años fai Andecha Astur y que nun primer momentu tenía como sede Xixón, torna al puertu Tarna depués de que nel 2011 tuviera llugar n’El Brañiḷḷín, onde llevantóse otru monolitu “con una placa que recuerda a los homes y muyeres que defendieron neses montañes una Asturies llibre y socialista”. La cita ta prevista pa les 13 hores del sábadu.

El Conseyu Soberanu d’Asturies y Lleón foi’l resultáu d’una reaición énte la situación na que s’atopaba l’Estáu, en plena Guerra Civil, col nuesu país aisláu pol avance del exércitu nacional. El 24 d’agostu fírmase la declaración de soberanía –anque la fecha na que se diz qu’entró en vigor foi’l día siguiente– y Asturies y Lleón pasaben a ser independientes del Gobiernu de la República. Belarmino Tomás, dende la presidencia, organizó un Executivu que tuvo vixente hasta’l 20 d’ochobre, cuando les tropes de Franco tomaron Xixón y los miembros del Conseyu viéronse obligaos a colar per El Musel. “Nesti 75 aniversariu de la Declaración de Soberanía, nunos intres nos que de nuevu tamos viendo que l'Estáu español supón el principal problema pa la sobrevivencia del pueblu asturianu, y cuandu se fai más qu'evidente que siguir xuncíos al proyeutu políticu d'España namás que supón afondar nel procesu d'asimilación y xenocidiu del nuesu pueblu, Andecha Astur fai un llamamientu al conxuntu de la sociedá asturiana non sólo a participar na reivindicación d'esa fecha y esi fechu hestóricu, sinón a trabayar díi ente díi pa recuperar la nuesa soberanía y poder decidir llibre y democráticamente'l nuesu futuru, ensin más llendes que les que voluntariamente querramos ponemos, llibres de xugos y d'imposiciones españolistes”, afirma la formación nacionalista nun comunicáu.

 

Fonte: Asturies.com  

Charra desplicativa sobre'l dineru y el sistema económicu

L'asociación "Acción Popular Organizada pa la Reprocidá Mutua n'Asturies-Agrupación Nava", en collaboración con Conceyu Abiertu por Xixón, organicen una charra desplicativa que xirará alrodiu'l dineru: cómo surdió, quién lu crea, quién lu controla, quién lu reparte, ú va, a quién beneficia la so escasez, y otres munches custiones, como les rellacionaes cola deuda de los países, por qué tolos países tan endeudaos, el furrulamientu de los mecanismos de deuda, etc., too ello dende una perspeutiva didáutica cola que difundir y esparder una concencia sobre'l furrulamientu del sistema monetariu actual.


Amás, tamién tendrán espaciu otres custiones como'l trueque, l'orixe de los bancos, la reserva fraccionaria, y alternatives al actual sistema, tales como los bancos de tiempu, cooperatives integrales, economía del bien común y otros munchos aspeutos. La cita tendrá llugar el prósimu vienres 24 d'Agostu de magar les 19:00 nel Llar l'Ayalga, asitiáu na Cai Decanu Prendes Pando 11 Baxu, Xixón.

Dende Conceyu Abiertu por Xixón animamos a tola ciudadanía a asistir y participar nesta charra de gran interés nos momentos actuales de crisis sistémica, debío a que nesta actividá va a poder afondase nun mayor entendimientu del modelu actual, asina como posibles alternatives y maneres de crear una economía más sostenible y racional.

SUATEA convoca una movilización en defensa de la educación pública y contra los recortes pal llunes n'Uviéu

La plaza la Escandalera, n’Uviéu, va ser el llunes puntu de salida d’una marcha convocada por SUATEA en defensa de la escuela pública y contra los despíos d’interinos. Darréu va haber una asamblea frente a la Conseyería d’Educación

A lo llargo de la xornada’l Sindicatu Unitariu y Autónomu de Trabayadores de la Enseñanza d’Asturies (SUATEA) va tratar la propuesta de modificación d’horarios del profesoráu, el recorte “drásticu” del númberu de Centros de Profesoráu y Recursos, y de profesores. D’igual forma, va aldericar la negativa por parte de l’Alministración a contratar profesoráu d’apoyu en Primaria. Ante esta situación, el sindicatu comentó que va proponer que se garantice que les guardies y los programes educativos tengan caráuter llectivu, que la biblioteca funcione con profesoráu a lo llargo de tol horariu del alumnáu y que se sigan promoviendo les actividaes pa garantizar l’atención afayadiza a los escolinos, ente otres cuestiones.
La movilización va principiar al meudía d’Escandalera, onde ta prevista una concentración contra los recortes, y va continuar cola marcha hasta la sede de la Conseyería d'Educación, Cultura y Deporte, puntu nel que va tener llugar l’asamblea.

Democracia a la española y OLÉ

Conceyu Abiertu por Mieres refuga de forma directa la xubía, d'un 18%, del billete d'autobús

Consideramos esti incrementu del preciu abusivu, anti-popular y pocu efectivu.

El preciu'l billete d'autobús en Mieres pasará del actual preciu, 1,10 euros a 1,30 pa tresportes ente distintos nucleos de población del conceyu. Pel so llau, los tresportes interurbanos pasen de 55 céntimos d'euro a 65 centimos. La xuba de precios tamién afecta a los distintos servicios especiales. Esto significa una xuba de los precios del tresporte públicu del conceyu d'un 18%, dos años depués de que l'anterior gobiernu llocal, del PSOE, xubiera yá los precios nun 10%. El Principáu dio permisu al conceyu p'aplicar esta midía de recorte, que salió d'un plenu municipal.

Dende Conceyu Abiertu por Mieres queremos facer públicu'l nuesu fondu refugu a esta midía de xubir los precios del autobús públicu urbanu nun 18%. Recordamos qu'esta midía, si ye aplicada, como too paez indicar, fadrá qu'en dos años el preciu del tresporte públicu de Mieres medre n'un 28 % y nun podemos descartar más recortes nesti serviciu. Nun queremos escaecer amás que munchos vecinos y vecines lleven bien de tiempu amosando la so quexa non solo pola xuba de precios, sinón tamién pol recorte de servicios a munchos puntos del conceyu.

Dende la nuesa formación ciudadana atalantamos esta midía como abusiva, yá que'l preciu d'un serviciu d'estes característiques tien de ser popular, teniendo en consideración que ye l´únicu mediu de tresporte pa muncha xente y que pa desenrrollar les xeres de la so vida cotidiana munches persones dependen d'esti serviciu públicu. Ciertamente, son sobre manera les clases populares les que dependen d'esti serviciu d'autobuses del conceyu y va ser, una vegada más, la mayoría social y popular del Conceyu de Mieres quien pague los escesos y pufos de los gobiernos llocales. Nel pior de los momentos y con un futuru inciertu pal conceyu y la so ciudadanía, la propuesta yá aceptada pol Principáu d'Izquierda Unida ye impopular y abusiva.

Conceyu Abiertu por Mieres quier espresar, y con nós munchos ciudadanos y ciudadanes, el descontentu social esistente en Mieres coles midíes d'austeridá municipal y les reformes o recortes que tan llevando alantre nel conceyu'l gobiernu d'IU-LV. Vamos viendo como les persones que xubieron al poder baxo'l llema “soluciones d'izquierda” nun aparen d'aplicar midíes y reformes derechistes. Esta nueva reforma, nesti casu aplicada al tresporte públicu, constitu-y un nuevu ataque al bolsiellu de la mayoría social mierense y al drechu de tener un tresporte públicu dignu y de calidá pa toes y toos. Camentamos que la midía a la llarga va salir permal y qu'esta estratexa va facer que la imaxe social del tresporte públicu municipal salga mui perxudicada, dándose un amergamientu de la clientela d'esti serviciu. La escusa de finar cola delda municipal sigue na mesa y vendrán nuevos recortes en Mieres que sufrirán los y les trabayadores demientres los especuladores y responsables de la llaceriosa situación de les arques municipales siguen ensín pagar la so responsabilidá n'actual crisis municipal, al igual que pasa a nivel global con la gran crisis capitalista. El gobiernu d'Anibal Vázquez paez que quier qu'asina seya.

www.conceyuabiertu.org

Casi 6.500 persones dexaron Asturies nel segundu trimestre por razones de trabayu

Nel segundu trimestre del añu 6.475 trabayadores con domiciliu n'Asturies marcharon del país por motivos llaborales, al ser contrataos fuerea de les nuestres fronteres. Nesi mesmu períodu, aportaron a Asturies un total de 3.924 persones d'otros territorios, lo que dexa un saldu negativu, ente abril y xuno, de 2.551 contraos.

Tolos sectores sin escepción rexistraron más trabayadores qu'emigren d'Asturies de los que inmigren nel segundu trimestre del añu. Nel sector Servicios marcharon 4.633 persones por 3.014 que llegaron; nel de la Construcción marcharon 1.165 y llegaron 402; nel de la Industria marcharon 503 y llegaron 399; y nel sector Agrícola y Pesqueru marcharon 174 y llegaron 109.

Por grupu ocupacional, los que presenten un saldu negativu más importante (-668) son los Artesanos y Trabayadores Cualificaos d'Industries Manufactureres, Construcción y Minería, seguíos del grupu de Trabayadores non cualificaos (-568) y Trabayadores de los Servicios de Restauración, Personales, Protección y Vendedores de Comerciu (-465).

Fonte: lesnoticies.com

Conceyu Abiertu por Uviéu considera un absurdu l’actuación del Ayuntamientu na división en distritos del conceyu

L’Ayuntamientu d’Uviéu decidió va unos meses dividir el conceyu en distritos, concretamente en siete colos que, según manifestó la Casa Conceyu, l’enfotu yera “dar puxu a la participación ciudadana nes decisiones del Ayuntamientu”, mediante la formación de Conceyos de Distritu que daríen voz a esos territorios nes actuaciones municipales.

Sicasí, dende Conceyu Abiertu por Uviéu tamos viendo cómo l’Ayuntamientu nun predica col exemplu nin amuesa la veracidá de les sos intenciones, al refugar toles reclamaciones presentaes por más de media docena d’asociaciones vecinales que básicamente poníen enfotu na composición de los citaos “Conseyos”, encamentando a una mayor presencia de les asociaciones vecinales y vecinos independientes nes mesmes, fechu que dende l’Ayuntamientu yá dieron por descartáu.

Poro, consideramos absurda l’actuación del consistoriu uvieín nesti procesu, al nun facer nengún casu a les propuestes y alegaciones vecinales, dando por válido únicamente lo qu’ellos proponen. Ensin entrar nel plan mesmu, con cuya distribución podríemos tar en desalcuerdu en dellos aspeutos, creyemos que lo mínimo que puede facer l’Ayuntamientu ye predicar col exemplu, teniendo en cuenta les propuestes vecinales.

Si yá partimos dende la base con una actitú institucional poco receptiva al diálogu vecinal, nun podemos ser optimistes respeuto a la efectividá y utilidá real de la división en distritos, que podría ser válida si de verdá s’afonda na democracia participativa, fechu que duldamos.

FONTE: www.conceyuabiertu.org

Asturies nación: dizlo tol mundu.

Boicó a los collaboraores cola tortura y l'españolismu

N'Ast fai un llamamientu públicu a boicotear a los establecimientos que tan sofitando la tortura de toros en Xixón, xabazada inhumana que namás se caltién en Xixón pol fianciamientu de la Casa Conceyu a esta espresión del españolismu.

N'Ast encamienta al Pueblu Asturianu a espresar la so refuga a la tortura animal y al españolismu boicoteando a tolos establecimientos onde se publicite esta tortura animal, y mui concretamente a los participantes nel "menú taurino" entamáu baxo'lnome de "Jornadas Gastronómicas Gijón de toros", cuyu llistáu s'apurre darréu:
- SIDRERÍA AGUADO (C/Aguado, 19).
- SIDRERÍA BOBES (C/ Reconquista, 9).
- SIDRERÍA CABRANES (Avda. Pablo Iglesias, 23).
- SIDRERÍA EL KIERCHE (C/ San Bernardo, 29).
- SIDRERÍA EL POZU L'ARENA (C/ Aquilino Hurlé, 30).
- SIDRERÍA LLABIEGU (Ribagorza, 27).
- SIDRERÍA EL LLAVIANU (C/ Donoso Cortes, 6).
- SIDRERÍA NACHO (C/ Aguado, 36).
- RTE. AS DE PICAS (Casino, C/ Fernández Vallín).
- RTE. BELLAVISTA (Av. José Garcia Bernardo, 256).
- RTE. CIUDADELA (C/ Capua, 7).
- RTE. EL CANDIL (C/ Numa Gilhou, 1).
- RTE. EL JAMONAR (C/ Begoña, 38).
- RTE. EL SAUCO (C/ Valencia, 20).
- RTE. LA ZAMORANA (C/ Hermanos Felgueroso, 40).
- RTE. TERRAZA DE VIESQUES (C/ Compositor Facundo de la Viña, 16).
- TRYP REY PELAYO (C/ Avda. Torcuato Fernández Miranda, 26).
- RTE. EL PASEO (C/ Paseo de Begoña, 8).
- RTE. CASA JUSTO (C/ Hermanos Felgueroso, 50).
- LA POSADA DE SOMIÓ (Nogales, 318).
- BAR SOMIÓ (Crtra Piles-Infanzón).
- CASA SUNCIA (Camín de Cabueñes, 971 ).
- SOMIÓ PARK. (Carretera Xixón-Altu l'Infanzón).
- LA NUEVA FUEYA (C/ Marques de Urquijo, 12 ).
- LLAGAR DE BEGOÑA (C/ San Bernardo, 81).
- VINATERÍA LUCENSE (C/ Aguado, 30).
- VINATERÍA EL BOCHINCHE. (C/ Manso,18).
- PARRILLA ANTONIO (C/ Roncal, 1).
- PUENTE ROMANO (C/ Marqués de Casa Valdés, 21).
- RTE. CASA VICTOR (Carmen, 11).
- HOTEL ABBA PLAYA GIJÓN (Paseo Doctor Fleming, 37).
- HOTEL LEÓN (Avda. de la Costa, 45).
- LA CAPILLA. HOTEL PALACIO LA LLOREA (Ctra. Villaviciosa).

MÁS:

- SIDRA EL GAITERO invita a un "tercio" con cada menú.
- Idea: "Fenicia Marketing" facebook.com/feniciamarketing

Collaboren:

- Ayuntamiento de Gijón/Xixón.
- El Comercio.
- Onda Cero Gijón.
- Circuitos Taurinos S.L.

Conceyu Abiertu por Mieres, Llangréu y Samartín del Rei Aurelio esixen l'absolución total de les persones imputaes nel conflictu de la minería.

Depués de dos meses de fuelga indefinía nel sector mineru n'Asturies y onde trabayadores y ciudadanía entamaron aiciones reivindicatives d'estremáu calter el papel del Gobiernu del Estáu Español y el Ministeriu d'Industrial foi intransixente, zarráu y autoritariu. Non solo pola ensín razón a la hora de da-y una salida al conflictu y negociar, sinón tamién pola represión política y policial qu'hebo na cai y que siguirá habiendo nel nuesu país. 

 

Alredor de cien ciudadanos y ciudadanes, los más trabayadores del carbón, fueron estes selmanes imputaos con estremaes causes xudiciales consecuencia de les movilizaciones sociales que se dieron pola continuidá de la minería y pol futuru de les cuenques mineres. La represión tuvo delles espresiones: detenciones, golpes, siguimientos, violencia simbólica, etc. Esta represión respondió a les intenciones d'esti nuevu golpe de muerte a los nuesos conceyos y el conxuntu de les cuenques mineres, nesti casu empobináu dende Madrid de la mano del PP y col silenciu compliz del PSOE n'Asturies.

Dende Conceyu Abiertu por Mieres, Llangréu y Samartín del Rei Aurelio queremos esixir l'absolución total de toles persones imputaes nestes selmanes de llucha minera y social yá qu'entendemos que l'escenariu d'anguañu ye otru. Atalantamos que la retirada de los causes xudiciales ye una reivindicación irrenunciable y sedría una midía democrática y que fadría xusticia col enfotu puestu por munches persones nes cuenques mineres nes movilizaciones. Amás queremos recordar que munches d'estes persones son vecinos y collacios de los nuesos conceyos y pueblos que tan pasando por una situación económica pergrave.
 

 

Marcha pola Educación Pública.

Contra'l racismu policial nel occidente'l país.

Los responsables podríen tener esta faz perfechamente

Nos últimos meses, la Policía Nacional de L.luarca llevó a cabu numberoses redaes racistes en localidaes como L.luarca, A Veiga, Trevías y Cadavéu. Inmigrantes de diverses nacionalidaes, que lleven tiempu viviendo na zona y desenvolviendo actividaes tan imprescindibles como'l cuidu de persones mayores, vieron cómo la policía nacional identificába-yos pela cai, a la salida de la compra, na parada l'autobús ya inclusive nes sos propies cases –valiéndose de los datos del padrón municipal–.
Un grupu de persones y colectivos sociales tubieron en L.luarca, pa denunciar estes redaes y a los sos responsables, empezando pol xefe de la policía nacional de L.luarca, Ignacio Ramón González-Cachón Delgado, y el Delegáu de Gobiernu en Asturies, Gabino de Lorenzo.

Esti ye'l testimonio que quixeron dexar patente y del que queremos faénos ecu:

Denunciamos estes redaes, de primeres, porque son illegales. Numberosos organismos de derechos humanos certificaron la esistencia d'estos controles d'identidá en tol territoriu español y confirmaron el so calter illegal. Tanto ye asina qu'el mesmu sindicatu policial viose obligáu a criticalos por esponer a los mesmos axentes a ser denunciaos por práctiques illegales. El pasáu 20 de mayu, una circular del Ministeriu del Interior reconocía la esistencia de diches actuaciones y decretaba la so prohibición, p'asina torgar “práctiques que traigan una restricción indebida de los derechos y llibertaes de los inmigrantes”.
Sicasí, como pudimos comprobar, estes redaes siguen llevándose a cabu. La máxima espresión d'estes irregularidaes ye la de llevar les identificaciones a les mesmes cases de les persones inmigrantes, aprovechándose del posible desconocimientu del so derechu a la inviolabilidá de la casa.

Denunciamos estes redaes de calter racista, amás, porque son inhumanes y porque son l'entamu d'un círculu viciosu de violación de los derechos humanos. Cuando la policía detien a una persona por escarecer de documentación, puede tenela inclusive hasta dos nueches nel calabozu. Cónstanos qu'hubo detenciones por esti motivu na comisaría de L.luarca, a pesar de que la mentada circular del Ministeriu del Interior señala la improcedencia de treslladar a dependencies policiales a inmigrantes que, entá escareciendo de permisu de residencia, identificárense.
L'apertura d'un procedimientu d'espulsión puede terminar nuna multa alministrativa, yá de por sí una carga económica enorme pa persones que tán tratando de sobrevivir en condiciones bien precaries. Pero la policía de L.luarca, en coordinación cola Delegación de Gobiernu, trata de llevar entá más allá los procesos, promoviendo que persones inmigrantes, dempués de sufrir el calabozu, sían llevaes a Madrid ya internaes nun Centru d'Internamientu d'Estranxeros (CIE). Numberosos informes rellaten qu'estos centros son peores que les cárceles, a pesar de ser oficialmente centros “non penitenciarios”. Nellos les condiciones de salobridá son detestables, hasta'l puntu de que se producieron albuertos de muyeres embarazaes que taben internaes; nos meses d'avientu y xineru pasaos produciéronse dos muertes en CIEs por cuenta de una asistencia sanitaria desaparente.
La policía y la Delegación de Gobiernu pretenden unviar a un d'estos centros a una muyer nixeriana, residente en L.luarca. Esta muyer, que sufrió un llargu periplu hasta llegar a Europa –fuxendo de la probeza–, sufre agora la violencia d'un sistema que la trata como a una criminal: ta obligada a presentase dos veces al mes na comisaría de L.luarca y nel xulgáu de Navia, y espónse a una inminente detención ya internamientu. Dende'l CIE puede ser incluyida n'un de los vergonzosos vuelos de repatriación qu'entama'l gobiernu español. Esisten evidencies –vídeo y testimonios– de los malos tratos y palices sufiertes por inmigrantes nel aeropuertu de Barajas nel momentu de la espulsión. Un compatriota d'esta vecina de L.luarca, Osamuyi Aikpitanyi, morrió afogáu n'un d'estos vuelos dempués de que la policía punxéra-y na boca cinta de pegar pa evitar les sos protestes.

¿Por qué estes persones fuxeron de Nixeria? Porque se ven sumíes na probeza, mientres del so país salen millones y millones de barriles de petróleu y grandes cantidaes de gas p'asegurar el nuesu enorme consumu enerxéticu. Na zona d'estración petrolera, la esperanza de vida nun llega a los cuarenta años. Nel postreru mediu sieglu, produciéronse arramaos de petróleu equivalente a un desastre del Prestige cada añu y mediu.

¿Por qué son hostigadas pola policía? Mientres la última década haise promovido un sofisticáu sistema represivu pa xenerar mieu ya inseguridá ente la población inmigrante, garantizando d'esa manera que se conviertan en fuerza de trabayu barata pa sectores imprescindibles de la economía española.

Vecines y vecinos de L.luarca, faemos un llamamientu a manifestar el nuesu refugu a la persecución y detención de persones inmigrantes; llamamos amás a la solidaridá con toles persones que sufrieron les redaes y, güei especialmente, cola vecina nixeriana que ta amenaciada d'internamientu y espulsión.

NON A LES REDÁES RACISTES
NON A LES ESPULSIONES
NENGUNA PERSONA YE ILLEGAL

http://www.asturies.com/noticies/el-gobiernu-dexa-ensin-cobertura-sanitaria-a-los-estranxeros-en-situaci%C3%B3n-irregular

El Conseyu de Gobiernu aprobó esti vienres el Real Decretu qu’esclúi de la cobertura sanitaria a los estranxeros en situación irregular. L’Executivu escúsase nun aforru supuestu de 1.000 millones pa tomar esta midida discriminatoria.

El Real Decretu regula la condición d'aseguráu y de beneficiariu a efectos de l'asistencia sanitaria pública nel Estáu, con cargu a fondos públicos, al traviés del Sistema Nacional de Salud, pol que s'esclúi de la cobertura sanitaria pública a tolos estranxeros que s'atopen n'España en situación illegal. El Ministeriu de Sanidá asegura garantizar "la universalidá de la sanidá pa tolos españoles y los estranxeros con residencia llegal" gracies a l'aprobación d'esti Real Decretu que regula la condición d'aseguráu y beneficiariu d'asistencia sanitaria con cargo al Sistema Nacional de Salud. Con esta midida, la ministra Ana Mato afirma que se dio "un pasu de xigante" pa ufiertar cobertura a la población. Amás, considera que se garantiza d'esta manera "un control mayor y tresparencia", porque clarifica la prestación de los servicios sanitariu y sociosanitariu.

Per otru llau, otru de los oxetivos que'l Ministeriu de Sanidá señala que se va a cumplir gracies a l'aprobación del Real Decretu ye asegurar la solvencia, viabilidá y sostenibilidá nel futuru de la sanidá pública frente a les dificultaes económiques. Añadió que va ponese fin "a la multiplicidá de normes que regularon la prestación", indiquen dende esti organismu. Sobre la tarxeta sanitaria, ésta "va ser interoperable en tolos servicios de salú del territoriu estatal, y xunto a la historia clínica dixital, va sirvir de ferramienta pa que los profesionales sanitarios puedan tener los datos d'un paciente anque se tresllade fuera de la so autonomía de residencia".

Fontes del Ministeriu aseguren que cola midida, l’Estáu "va afacese a la normativa europea y pon frenu al turismu sanitariu". Con ello, evítase "l'usu fraudulentu" polos ciudadanos estranxeros de los servicios de salú, manifiesten. Amás, esta cartera pretende xenerar un aforru de 1.000 millones d'euros cola aplicación de la reforma, lo que "va redundar na meyora de la dotación del Fondu de Cohesión Sanitaria del Sistema Nacional de Salud, que ye la ferramienta pa compensar a les comunidaes autónomes pola asistencia a estranxeros", indiquen. Pero los cambios nun acaben ehí, porque tres sentir los encamientos del Tribunal de Cuentes, va impidise que'l sistema de salú siga sufragando l'asistencia sanitaria de los europeos que yá la tienen cubierta. Otra manera, los españoles que s'atopen nesta coxuntura van sufrir la mesma situación nel estranxeru.

Sicasí, el Real Decretu sí contempla l'atención d'urxencia, por enfermedá o accidente; l'atención nel embaranzu, partu y postpartu; y l'asistencia sanitaria a menores de 18 años de ciudadanos en situación irregular. Gracies a esto, la cobertura ufiertada "va ser más amplia que la de la mayoría de los países europeos", sostienen dende la institución.

FONTE: Asturies.com

CSI énte'l conflictu de la minería.

Los y les trabayadores de la minería asturiana decidieron finar la fuelga y tornar al trabayu.

Cada trabayador y trabayadora sabe cuála foi la so actitú y la so aportación presonal demientres esti conflictu. Cada Trabayador y trabayadora sabe cuála foi l’actitú de toos y caún de los sindicatos. Cada trabayador y trabayadora sabe cuála foi la conducta y les direutrices de tolos dirixentes sindicales.

Nun ye l’intre reproches, pero sí de tener nidies delles realidaes:

1-El Gobiernu impuso, de momentu, les sos condiciones.
2-Los oxetivos que se plantegaben los sindicatos, al entamu la fuelga, nun s’algamaron de denguna les maneres.
3-El conflictu pesllóse en falsu y va tornar a recrudecese en pocos meses.

Na CSI nun damos esta llucha por finada y nin siquier pescanciamos comu un fracasu’l camín andáu fasta equí. El conflictu’l carbón deprendiónos que la xunión y la firmeza los y les trabayadores pueden engabitanos a algamar un futuru estremáu del que nos tienen preparáu.

Nesi sen, l’absolución dafechu de tolos imputaos en causes xudiciales remanecíes de les movilizaciones, ye una reivindicación inrenunciable.

Les movilizaciones tienen de continuar, porque la resinación enxamás traxo nada bono pa la clas obrera. Manifestaciones, paros temporales, xornaes de llucha, aiciones contundentes..., too ello puede servinos pa preparar, ensin munchu desgaste, les condiciones favoratibles pa un nuevu conflictu que, ensin dubia, va tornar a coyer protagonismu.

Pa ello, ye necesario que los dirixentes sindicales de CCOO y SOMA-UXT camuden d’actitú, defendiendo los drechos reales de los y les trabayadores y abandonando vieyes postures que namás van tornar traenos pieslles de pozos y perda de puestos de trabayu.

Les direiciones de CCOO y SOMA-UXT tienen la obligación de defender, perriba cualisquier sigla, los drechos ya intereses comunes del conxuntu los y les trabayadores y abandonar toa actitú ispirada nos intereses particulares de cualisquiera de los dos sindicatos o de los sos propios dirixentes.

De nun ser asina, queda nes manes de los y les trabayadores desbancar a estos dirixentes sindicales, afondar na propia autoorganización obrera y tornar a garrar, coles sos propies manes, unes riendes qu’enxamás debieren soltar.

Pero nes condiciones nes que tamos, dengún seutor, nin siquier el seutor mineru, va ser quien a iguar los sos problemes por sí solu. Los y les trabayadores de la mina necesiten urxentemente abrir el so conflictu a la participación y el sofitu d’otros seutores sociales y llaborales, porque esto yá tornó nuna llucha de tola sociedá asturiana.

Nun podemos siguir lluchando per separtáu en cada empresa o seutor, porque esto namás va empobinanos a la derrota. Ye necesario xunir a tolos y toles trabayadores d’empreses en conflictu ya incorporar a esa griesca al seutor más perxudicáu de toos: les presones en paru o con trabayos precarios.

Tenemos d’asumir y sofitar que cualisquier presona, de cualisquier seutor llaboral, minera o non, parada o non, tien d’amestase a cualisquier conflictu de cualisquier seutor. Trátase de sumar lluches y voluntaes.

La pallabra “rendición” nun ta nel nuesu dicionariu. La hestoria d’Asturies escribióse y va escribise con otres pallabres: firmeza, solidaridá y llucha obrera.

Andecha considera zarráu en falsu'l conflictu mineru

Una vegada más quedó n’evidencia que la estratexa de les direiciones sindicales de CCOO y SOMA-UGT lleven al esmantelamientu dafechu del seutor.
El determín de poner fin a la fuelga de la minería ensin tener algamáu nin el más mínimu de los oxetivos sindicales plantegaos y col trunfu de les condiciones impuestes pol Estáu español supon el zarru en falsu del conflictu mineru que, con toa probabilidá, tornará enfoscase nos prósimos meses.
Frente a quien da esta llucha por terminada y consideren fracasada la reivindicación, Andecha Astur quier destacar l’esfuerzu y l’exemplu de los mineros, y sopelexar el so convencimiento de que los únicos que fracasaron fueron les direiciones sindicales de CCOO y SOMA-UGT, que cola so enfermiza sumisión a los dictaos de Madrid seutorializaren el conflictu y porvocaren el so aisllamientu social y xeográfico, nuna dinámica suicida qu’agora tenemos que pagar toos.
Nesi senu Andecha Astur torna a faer un llamamientu a diches direiciones sindicales por que lleven alantre’l cambiu d’actitú que non solo la minería, sinón tola sociedá asturiana-yos demánda; que ruempan cola so dependencia de Madrid y dean en defender los drechos ya intereses de los trabayaores asturianos, abandonando dinámiques que namás tornarán trayemos zarros de pozos y perda de puestos de trabayu.

Ye nido que siguir defendiendo la seutorialidad del conflictu y negase a integralu dientru’l conxuntu de conflictos llaborales esistentes nel nuesu país, asumiendo la especificidá del marcu llaboral asturianu, non solo costitúi una torpeza que mos lleva de fracasu en fracasu, sinón una collaboración y complicidá coles polítiques d’esterminiu que ta aplicando l’Estáu español n’Asturies y que tán llevando a la sociedá asturiana a una situación de sufrimientu y precariedá inaceutables.

A lo último, Andecha Astur quier remembrar la necesidá de consiguir l’absolución de tolos imputaos en causes xudiciales derivaes de les movilizaciones, reivindicación inrenunciable que complica y agrava’l conflictu en sigo mesmu.

Conceyu Abiertu por Uviéu contra la supresión de les llinies 6 y 16 de TUA

L’Ayuntamientu d’Uviéu aprobó tiempu atrás el nuevu “Plan de movilidá” nel que se recoyíen les nueves rutes de los autobuses municipales d’Uviéu, xestionaos pola empresa TUA. Nesi plan, que ta xenerando descontentu en bastantes seutores vecinales al ser regresivu respeuto al serviciu prestáu por TUA, hai grandes afectaos como los vecinos y vecines de les zones rurales del Narancu, que según esi nuevu plan veríen suprimíes les dos llinies que presten el gruesu del serviciu a diches zones rurales, la llinia 6 y la 16.

Na so sostitución, la Casa Conceyu quier poner “taxis llanzadera” que tresporten a los vecinos y vecines hasta la parada de bus más cercana, col consiguiente costu económicu que s’amestaría al del billete, fechu pol que los afeutaos y afeutaes tan recurriendo dichu plan pa la so modificación y rectificación de cara al caltenimientu del serviciu de tresporte col qu’anguaño cunten.

Dende Conceyu Abiertu por Uviéu apoyamos l’aición ciudadana, porque consideramos inxusto qu’una vegada más seyan les zones rurales les grandes escaecíes nes polítiques de cualquier tipu que desenrrolla l’Ayuntamientu. El gobiernu llocal non sólo nun atiende les peticiones de zones como Limanes p’ampliar el serviciu municipal hasta elles, sinon qu’elimina’l yá esistente dexando vendíos dafechu a unos vecinos y vecines que tuvieron años y años lluchando pa consiguir eses llinies d’autobús.

D’otru lláu, refugamos dafechu l’argumentu de que son llinies con pocu usu o poco rentables. Tamos falando d’un serviciu públicu, de los básicos qu’ufierta un Ayuntamientu de les dimensiones del uvieín, y precisamente ye a eses zones más aisllaes y minoritaries onde nun se puede abandonar a la so suerte a les persones. Amás, nun entendemos pa qué nos caberos años l’asignación municipal del Ayuntamientu a TUA medró en más del 100%, si a la fin vamos a guianos por criterios de rentabilidá y de regresión n’aquelles estayes vinculaes a espacios minoritarios.

Otra vegada, como facemos casi siempre pol fechu de que son dos custiones primordiales na política que Conceyu Abiertu por Uviéu quier p’ameyorar la vida y el bientar nel nuesu conceyu, queremos enfotanos en dos puntos básicos:

1     1) L’Ayuntamientu nun fae nengún casu a los vecinos y vecines nes sos aportaciones y vindicaciones, fae lo que-y peta siguiendo criterios amiguistes y de beneficiu a les concesionaries privaes de los distintos servicios. Con participación y capacidá d’influencia vecinal podríemos crear un Plan de Movilidá equilibráu, afayaízu, y pa toos y toes.

2      2) Cuando un serviciu públicu básicu ye xestionáu por una empresa privada, surden deficiencies, inxusticies, y na más que voluntá d’algamar beneficios económicos y non sociales. Non más espoliu empresarial al patrimoniu de tolos vecinos y vecines.

Con too ello, tresmitimos el nuesu apoyu a los vecinos y vecines, encamentándolos a siguir lluchando pol que les minoríes poblacionales del nuesu conceyu algamen los servicios que merecen, que nun son nin más nin menos que la so equiparación colos del restu de ciudadanos y ciudadanes.

Fonte: www.conceyuabiertu.org