¿Hasta qué puntu los IES asturianos eduquen a los guah.es nel conocimiento de la so rialidá más cercana, esto ye, l’asturiana? ¿Hasta qué puntu hai una voluntá efectiva de formar ciudadanos con un mínimu de conocimientos sobre la tierra na que viven? La rialidá ye que poca o nenguna.
Nun ye solo que la llingua asturiana nun tea reconocida llegalmente col mesmu status que los demás idiomes que se falen del Reinu d’España. Nun ye solo que tea ausente del sistema educativu como llingua vehicular mientres mos venden la moto de les “llinies billingües” castellán-inglés que son les más de les veces una comedia. Nun ye solo que nun se permita l’usu del asturianu pol profesoráu fuera de la mesma asignatura de Llingua. Ye que, amás, xuégase a la invisibilidá absoluta de la situación llingüística d’Asturies al traviés de los manuales escolares.
¿Cómo va ser un problema lo que nun esiste?
Los llibros de testu d’ESO y Secundaria de Llingua y LLiteratura Castellana, esos mesmos llibros que teóricamente tienen qu’afayase al currículum asturianu, a la de falar de les “llingües y dialectos” que se falen del Reinu d’España tienen, curiosamente, toos ellos el mesmu escaezu. Toos ellos falen del castellán, el gallegu, el vascu y el catalán como llingües oficiales en tol estáu o partes del mesmu. Falen tamién de les variantes llingüístiques d’estos idiomes, y amás con munchu detalle sigún vamos avanzando de nivel escolar. Asina, en tolos manuales fálase del andaluz, del castúo estremeñu, del canariu, del panocho murcianu, y dellos otros. Cítense los sos trazos definitorios, les sos isogloses y les sos influencies lingüístiques.
Sicasí, lo que nun se menta en ningún momentu (y ye fácil comprobalo: ye abondo con mirar los manuales qu’hai nos departamentos docentes de los IES) ye l’asturianu: un idioma clasificáu como talu pola comunidá científica internacional, con una cifra de falantes reconocíos non inferior al cuartu de millón de persones, con un cientu de títulos publicaos tolos años, con una institución académica oficial, con una curtia pero constante presencia mediática en radio, prensa y TV, cenciellamente nun esiste. Nos IES d’Asturies y de tol reinu enséñase que la llingua asturiana nun esiste. Que l’asignatura qu’estudien o estudiaron bien d’ellos nun esiste. Que l’idioma que falen ellos o la so familia nun esiste. Too ello cola bendición de la Conseyería d’Educación, que teóricamente tien de dar el preste a los llibros de testo que s’usen nes escueles del país.
Ye lóxico. Lo que facemos invisible nun ye un problema, y esta administración asturiana tien dende hai trenta años un problema mui seriu cola llingua d’esti país. Xugando a invisibilizala, ayudamos a facela desapaecer, y con ello, el propiu problema.
Nun ye solo la llingua
Pero nun se tapez namás la llingua. L’esaniciu de tolo que güela a asturiano tamién afecta a otres materies. Ente elles, y con gran importancia, la Historia. Anque’l currículum éducativu de les comunidaes autónomes “non históriques”, Asturies ente elles (primera barbaridá: Asturies nun ye “histórica” y polo tanto nun tien Historia) afita que los conteníos propios son del 35% sobre’l currículu xeneral (nes “históriques” ye del 45%) la rialidá ye que nos manuales y programaciones didáctiques que s’utilicen nos IES asturianos rara vez lleguen al 10%, y siempre a lo cabero de la programación, que casualmente ye siempre lo que nunca da tiempu a dar. Y el problema nun ye solo cuantitativu, sinón cualitativu: la Historia d’Asturies que se da ye poca, ye probe, ye anecdótica y ye mala. Y yelo a costafecha, porque pártese de premises errónies dafechu.
Primer error: partiendo de la idea de qu’España esiste dende la nueche los tiempos, más o menos dende Tartessos, o Viriato, la Historia d’Asturies dase dende la concepción d’Asturies como una cachu d’España incluso anantes de la propia esistencia d’España.
Segundu error: consecuencia de lo anterior, entiéndese que lo importante ye la Historia del conxuntu (España) y non de los cachos. Polo tanto, la Historia d’Asturies ye subsidiaria de la española (que, repito, ye anterior a la propia esistencia d’España) y namás debe estudiase n’aquellos aspectos nos que seya necesario pa entender la Historia española.
Tercer error: la Historia como anécdota. La Historia d’Asturies como la sucesión de pingarates que dan color o despliquen determinaos acontecimientos del devenir históricu español, con grandes saltos cronolóxicos que faen imposible una visión de conxuntu.
Resultáu final: Lo importante ye la Historia española, y lo secundario l’asturiana, que namás tien entidá cuando desplica la española. Asina, tien interés la resistencia ástur a los romanos nel sieglu I a.C., dientro del conxuntu de la conquista romana d’Hispania. Lo que pasa depués nun tien la mayor importancia hasta’l sieglu VIII, onde la invasión islámica pon n’acción a Pelayo y los anicios del Reinu de los Ástures, importantes pa entender la mal llamada “Reconquista”. Depués de la fin del reinu ástur, nel sieglu X, vuelve’l mantu de silenciu que dura cásique 900 años, hasta que la ilustración asturiana del sieglu XVIII vuelve a poner Asturies nel mapa… d’España. Depués, otra vuelta’l silenciu, hasta los anicios de la industrialización y el movimiento obreru, la revolución de 1934, la guerra civil, les fuelgues mineres de los sesenta y yá, la desapaición definitiva.
Lo importante… ¿Pa quién?
Nun vamos falar equí, porque’l tema da pa muncho más qu’estes llinies, de cómo s’estudien los conteníos anantes mentaos, munches veces teñíos d’un esencialismu que mete mieu, especialmente cuando se fala del reinu ástur, pesie a que’l paradigma cuadonguista yá ta más que superáu nos ámbitos científicos. Vamos falar de lo que nun s’estudia, porque nun ye visto como importante. La cuestión ye: importante… ¿pa quién?
¿Nun ye importante pa conocer la Historia d’Asturies lo que pasa nel períodu que va dende la invasión romana hasta la islámica, especialmente nos sieglos VI-VIII, de los que l’arqueoloxía ta dando datos perinteresantes dende hai unos años, y que mos falen d’una sociedá organizada y en plena mutación económica que la invasión islámica nun fexo otro qu’afondar? ¿Nun ye importante conocer la Edá Media asturiana, cola apaición de les poles que tanto condicionen el desendolcu económicu posterior? ¿Nun ye importante saber que d’aquella l’asturianu yera la llingua oficial de l’alministración civil y eclesiática? ¿O cómo se conformaron les élites feudales asturianes y la so permanente confrontación coles castellanes, que tien como cimera la brutal guerra qu’estroza Asturies a lo cabero del sieglu XIV y qu’acaba cola creación del Principáu qu’anguaño sufrimos?
¿Nun ye importante saber que na Edá Moderna Asturies yera un país atrasáu y marxináu na monarquía, fonte de mano d’obra migrante, como amuesen los miles d’asturianos en Madrid, tan cruelmente retrataos polos escritores castellanos del “Sieglu d’Oru”? ¿Nun lo será tamién saber que’l sistema estamental nun ye funcional n’Asturies porque la condición de noble d’una parte perimportante de la población facía inviable la división social basada nel nacimientu? ¿O que, a lo cabero del sieglu XVI, hubo una peste que mató posiblemente a un terciu de la población asturiana? ¿O que nel sieglu XVIII, tando los países de la Corona d’Aragón ensin fueros nin antogobiernu nengún, tenía Asturies el so propiu parlamentu dende diba sieglos? ¿O lo que supunxo la llegada del maíz pa una economía asturiana condergada a la fame periódica?
¿Ye importante saber qu’en 1808 Asturies proclamóse soberana dende les sos instituciones lexítimes y ella sola declaró la guerra al Imperio napoleónicu, criando, ente otres coses, l’actual bandera azul y mariella qu’adorna tolos edificios oficiales y que tolos asturianos lleven con arguyu? Suma y sigue. Podín ponese más exemplos, pero con estos ye abondo. ¿La respuesta? Claramente, non. Nun ye importante pa entender la Historia d’España (y repito que nun entramos siquiera a deconstruir esti mesmu conceptu) que n’Asturies, un territoriu de perpocu pesu demográficu, económicu y políticu, morriera va cuatrocientos años un terciu de la población de peste, pero sí lo ye pa entender l’asturiana. Nun ye importante, o más bien funcional, pa desplicar el conflictu nacional en Cataluña, Vasconia o Galicia saber que cuando Cataluña taba ensin institución propia nenguna, Asturies tovía les conservaba. Pero sí lo ye pa entender la Historia d’Asturies.
¿Babayos o ciudadanos?
¿De quién ye la culpa de que nun se dea Historia d’Asturies nos IES asturianos? De l’alministración, en primer llugar, apoderada polos prexuicios ideolóxicos de la España una, grande y llibre, qu’ellabora currículos educativos inaceptables y acientíficos. De la Universidá d’Uviéu, en segundu llugar, que forma a la gran mayoría de los docentes asturianos d’Historia pero que tien la Historia d’Asturies mui ausente de los sos planes d’estudiu, y eso que meyoró la situación abondo si la comparamos con va diez o quince años. De los propios historiadores y docentes de Secundaria, que nun faen –facemos- por rebelase énte una situación ridícula: ¿Ye razonable que los guah.es tengan qu’estudiar la evolución de la Corona d’Aragón na Edá Media y nun estudien nada –repito, nada- de lo que pasó n’Asturies ente los sieglos X y XV? ¿Ye aceptable qu’estudien que la guerra d’Independencia empecipió en Madrid cuando fo n’Asturies?
La enseñanza de la Historia tien como oxetivu formar ciudadanos críticos, conocedores del pasáu colectivu de la so tierra. Hacia esi oxetivu han tar empobinaos tolos esfuerzos educativos. Sinón, tamos formando babayos que ximielguen la bandera y falen al altu la lleva de Pelayo ensin tener la menor noción de lo que tán diciendo. ¿Ye eso lo que queremos? Igual sí, que queda mui guapo sacalos na tele cuando gana Alonso o vien Letizia de visita.
http://faustinozapico.com/blogue/asturies-nes-aules/
(Artículu publicáu nel Boletín nº 160 del mes de mayu de 2011 de SUATEA)
Por Faustino Zapico
