Nos caberos díes conocimos la noticia de que’l gobiernu arxentín va a
recuperar el control de la petrolera YPF mediante la espropiación del 51% de les
acciones de la compañía, anguaño nes manes de la multinacional Repsol que,
curiosamente, y siguiendo un camín ximielgu al d’YPF, foi vendida pol estáu a
preciu saldu con motivu del procesu de privatización d’empreses públiques
desendolcáu n’infinidá d’estaos a lo llargo de los años d’ofensiva neolliberal
que güei inda sufrimos con fuercia.Llama muncho l’atención ver la reaición de munchos collacios y collacies, vecinos y vecines, compañeros y compañeres… d’indignación énte’l “robu arxentín d’YPF”, identificando asina la petrolera privada Repsol pa con España, y a min namái sentir estes reaiciones siempres se me vien a la tiesta “la roja”, la seleición española de fútbol como exemplu bien nidiu del forofismu descomanáu de delles persones pa con determinaos símbolos.
Toos y toes conocemos a persones que, con motivu del tornéu futbolísticu de turnu, saquen al balcón la bandera del estáu, fechu qu’enxamás repiten n’otra fecha cualquiera, y como lo de la bandera, otres munches aiciones y fechos esceicionales que respuenden más a dinámiques de manipulación mediática ya imposición qu’a l’aniciativa propio. Y nesti “conflictu petroleru”, paezme que tamos énte un casu similar, onde en llugar de sacar al balcón la bandera roxigualda, saquen a pasear una riestra d’argumentos que, a poco que se profundice, vese nidiamente que son frutu del bombardéu mediáticu y la enquivocada identificación d’intereses privaos pa colos del pueblu.
L’identificar una compañía multinacional, especuladora, qu’agrede ensin esmolición dala los drechos llaborales o mediuambientales, col estáu español, ye una amuesa clara de cuál ye la utilidá d’ésti ente: caltener una serie de símbolos, costumes, etc, garraos a distintos pueblos, pa crear con ellos una concencia de patriotismu haza l’estáu hexemónicu que sirva pa defender los intereses de la burguesía, de les élites polítiques, económiques y sociales, qu’a la fin nun son más que l’interés priváu d’unos pocos.
A too ello, cuando daquién fala del tema Repsol-YPF echando pestes pa los arxentinos y falando de que “mos robaron”, yo pongo un exemplu nidiu: “imaxinái que nós cuntamos con bayuroses reserves petrolíferes, pero éstes son esplotaes por, vamos a poner, una compañía privada de Bélxica…¿veríeis mal que l’alministración pública algamara’l control d’eses riqueces naturales, evitando que’l beneficiu vaya a manes ayenes y equí sólo quede l’esfarrape mediuambiental?”. Pienso que si se fae la preba camudando los papeles d’arxentina y l’estáu español, un bon númberu sofitaría la midida del estáu arxentín en casu de que les reserves de combustible tuvieren equí.
Ta claro que cualquier soberanista aplaudiría la midida d’Arxentina, porque a la fin nun ye más que recuperar la soberanía sobre los recursos regalaos a entidaes privaes, como tamién lo ta qu’hai una parte perimportante de la sociedá que sigui’l discursu mediáticu d’ “ataque a españa” ensin decatase del tresfondu del asuntu, y de qu’en realidá los intereses de la clase trabayadora nun pierden ren por ello, y en tou casu fadríenlo aquelles persones que cunten con una participación en Repsol a les que’hai que dicí-yos que la soberanía del pueblu arxentín ye muncho más importante que les sos plusvalíes.
Tou esti rollu d’enrriba, anque a primer vista pueda paecer que non, tamién tien la so aplicación n’Asturies, y ye que, ¿hai meyor exemplu de país cuyos recursos naturales foron, son, y posiblemente sedrán espoliaos poles oligarquíes del estáu español, nunos casos, y poles élites económiques dueñes d’empreses de diversos países, n’otros?.
Entruguemos a los asturianos y asturianes: ¿paéz-vos bien que seya una empresa privada la que controle los yacimientos d’oru, quedando col beneficiu, y dexando esfarrape mediuambiental? ¿Tais a favor de que, pesie a que somos un país sobreproductor d’enerxía llétrico, valga lo mesmu o más el recibu qu’en territorios que nun producen enerxía? ¿Creyéis conveniente permitir a Repsol facer prospeiciones na costa asturiana a la gueta de petróleu, sabiendo que sedríen ellos los que quedaríen cola inmensa mayoría del beneficiu de la so esplotación, y cuntando col desaniciu mediuambiental qu’amestaría?
Son entrugues que, d’otra manera, tamién pueden dar una visión al soberanismu asturianu, asina como una estaya de trabayu importante pal nuesu movimientu, debío qu’al mio paecer tamos nuna época na que la xente paez tar más receptivo a temes de calter económicu, enerxéticu, etc. y qu’a la fin supón un nichu onde trabayar fórmules soberanistes pa la nuesa nación, por supuestu ensin escaecer temes identitarios, culturales, sociales, etc, tamién perimportantes.
Poro, equí dexo la mio reflexón, sobre trabayar nesta estaya pa desmontar les mentires ya intereses del estáu español y les élites a les que representa, amás de ser una ferramienta p’afondar na concencia soberana del pueblu asturianu, anguaño bien amenorgada, too ello afondando en que non sólo val con estatalizar la mayoría d’acciones d’una compañía, sinon qu’hai que consiguir un repartu del so beneficiu que repercuta dafechu nes clases populares.
Adrián Calvillo
