Un añu más averense les domines de nadal nes que fae unos años tabemos avezaos a ver xugar a la nuesa seleición absoluta de fúbol, y dalgunes otres d'otros deportes escontra otros rivales d'otres naciones del mundiu. Pero dende hai un tiempu p'agora, escasos son los partios de les nueses seleiciones absolutes, cola esceición del partiu l'añu pasau de balonmanu escontra la seleición española, que nun foi namai qu'un show emtamau pol gobiernin pa repartir a la xente banderines del "principau" y d'"españa", manque hebo una bona representación de la hinchada asturiana que fizose notar como poques veces, sofitando a la nuesa seleición y vindicando la oficialidá de la nuesa seleición.
Faen falta más partios de la nuesa seleición aunque seyan los típicos amistosos de nadal, pa dir concienciando a la xente que la nuesa nación merez seleiciones deportives oficiales, que puedan competir internacionalmente y regularmente nes competiciones d'élite. Esto ye posible por potencial deportivu como demostrose munches vegaes que xugaron les nueses seleiciones en fúbol, hockey, voleyball y l'añú pasau en balonmanu, onde la nuesa seleición apuntu tuvo de ganar el partiu a la campeona'l mundiu que ye la seleición "española", xugando esta con 4 "asturianos".
Amás, estos partios son bonos pa los clubes, seya'l deporte que seya, pa promocionar xugadores, pa los mesmos xugadores, pa la afición asturiano y pa tol deporte en xeneral, y pal deporte'l país en particular. Ye vergoñoso que nun seya esto motivu suficiente non ya pa la oficialidá de los equipos nacionales, non yá eso, si non pa que polo menos haya cierta dinámica de partios aunque seyan amistosos nes distintes disciplines.
Ye per necesaria l'asoleye d'una organización xunitaria asturiana que puxe poles nueses seleiciones retrucando la política que tien nesti sen el gobiernin d'Areces y que ponga al nuesu deporte nel so sitiu y tenga l'enfotu nidio d'oficializar les seleiciones. De la mano d'esto debería venir tamién la creación d'un bon proyeutu d'hinches de calter marcadamente independentistes y antiracistes que sofiten a los equipos nos partios y faigan tamién parte'l trabayu pola oficialidá de les nueses seleiciones nacionales. Ye daqué necesariu, ye un motivu pa movese más que suficiente pero hai qu'asumir que polo menos lloñe va quedanos lo d'oficializar la nuesa seleición si nesti país siguimos sofriendo la situación predemocrática que tenemos, na cual niéganos incluso que la nuesa llingua llariega seya oficial dafechu. Pero el camín nun faese si nun emtámase a caleyar, y caleyar entiendese como organizase y lluchar en toles estayes posibles.
¡POR UN MOVIMIENTU QUE SOFITE LES NUESES DEPORTIVES NACIONALES!, ¡POLA OFICIALIDÁ TOTAL DE LES NUESES SELEICIONES!
Una nación, una seleición.
Independencia y Socialismu.
