Andecha Astur presenta la so candidatura a les elleiciones europées.

Mario Arbesú, Arturu Xosé Bermeyu y Paloma García ocupen los primeros puestos d’una llista qu’integren 55 asturianos y asturianes.

Andecha Astur presentó la so candidatura a les elleiciones europées del 7 de xunu esti llunes tres la decisión unánime del Conceyu Xeneral Estraordinariu que la formación nacionalista asturiana cellebró esti sábadu pasáu.

Mario Arbesú* foi escoyíu primer candidatu por unanimidá. Los siguientes puestos de la llista ocúpenlos los tamién trabayadores Arturu Xosé Bermeyu y Paloma García. La llista al Parllamentu Européu d’Andecha Astur confórmenla un total de 55 asturianos y asturianes ente los qu’alcontramos trabayadores, estudiantes, “llendes urbanes”, persones desemplegaes, autónomos,… y una bona representación de persones del ámbitu sindical, cultural, social… conformando una candidatura plural y comprometía.

Andecha Astur, pese a formar parte de la coalición Europa de los Pueblos y ser una de les sos organizaciones fundadores, decidió a la fin concurrir con una candidatura propia al nun consiguir, "pese a los grandes avances na negociación caltenía col BNG, un alcuerdu satisfactoriu y que garantizare dafechu la defensa de los intereses d’Asturies". Pese a esta falta d’alcuerdu ellectoral dende la coalición esiste "un compromisu pa siguir siendo la voz d’Andecha Astur n’Europa y pa poder siguir trabayando temes asturianos que yá tán xestionaos o los que se puedan siguir llevando a instancies europées nos años prósimos".

Con too ello, Andecha Astur decidió presentase en solitariu, como yá ficiere en 1999, ufiertando asina "una candidatura nacionalista seria a tolos asturianos y asturianes residentes nel Estáu, que se presenta col aval del trabayu desendolcáu n’Europa por Andecha Astur y la trayectoria de trabayu y firmeza d’Andecha Astur na defensa de los intereses y derechos d’Asturies y del Pueblu Trabayador Asturianu".

"Si’l sofitu ellectoral a Andecha Astur siempres ye de resistencia, esti añu tien tamién un sentíu de reafirmación d’esti vieyu Pueblu européu, reforzando asina la posición asturiana a nivel internacional. Asturies esiste y resiste", sorraya la organización nacionalisa asturiana.

* Trabayador de 30 años, sindicáu na Corriente Sindical d’Izquierda (CSI) y con una llarga trayectoria política dientro d’Andecha Astur siendo’l candidatu a l’Alcaldía de Noreña en delles ocasiones

Manifestación pola oficialidá nel Día de les Lletres. Vienres n'Uviéu.

La Xunta pola Defensa de la Llingua Asturiana entama un manifestamientu esti prósimu vienres 8 de mayu coincidiendo col Día de les Lletres Asturianes. El manifestamientu entamará a les 19:00 hores na RENFE o Estación del Norte uvieina. La Xunta pide a la sociedá asturiano la movilización polos sos drechos llingüisticos y civiles. El llema escoyíu pala convocatoria ye: "Agora tenemos la pallabra pola oficialidá de la Llingua Asturiana". Al finar l'actu, delantre'l Teatru Campoamor entamarán los actos de l'Academia de la llingua. Axuntamos cartelu:

OFICIALIDÁ!

Morrió otru trabayador asturianu nel tayu

Un trabayador mozu de 28 años morrió ayeri mentanto trabayaba nes obres d'una carretera nel Conceyu de Cuideiru.

L'acidente llaboral mortal foi en La Rondiella, El mozu finó tres volcar col dumper col que taba trabayando por un desnivel d'unos 50 metros. Anque los sanitarios desplazaos al llugar tovieron mientres 45 minutos reanimándolu nun pudieron facer ná por salvar la so vida.

Miles de persones pol repartu del trabayu y la riqueza en Xixón nel Primeru Mayu

El soberanismu y l'independentismu asturianu participó nun mesmu bloque.

Tres una pancarta col llema «Ante la crisis, repartu del trabayu y la riqueza» más de 3.000 persones manifestáronse esti Primeru Mayu en Xixón convocaos polos sindicatos Corriente Sindical d’Izquierda (CSI), Confederación General del Trabajo (CGT) y SUATEA-SF.

La marcha salió de la plaza l’Humedal y finó na Plaza Mayor. Los y les manifestantes refugaron dafechu’l cierre d’empreses, los despidos y les ayudes económiques que’l Gobiernu español vien proporcionando a la banca. Na movilización obrera también participaron, anque non como convocantes, Andecha Astur y PCPE, ente otres organizaciones polítiques. También participaron trabayadores d’empreses con conflictos como Nestlé y Obrerol.

Los sindicatos reclamaron la implantación de la renta básica, el repartu la riqueza y del trabayu, la garantía de los derechos básicos o la suspensión del pagu d’hipoteques a los paraos ente otres medíes Dende los sindicatos convocantes criticaron a UGT y CC OO a quienes acusaron de tar «cola patronal y el so Gobiernu ». El responsable d’organización de CSI, Alonso Gallego, señaló que n’Asturies entamó «un procesu de movilizaciones que tendrá continuidá nos prósimos meses» cola «avalancha de regulaciones d’emplegu y cierres d’empreses».

Bloque soberanista.

Como s’anunciare, esti añu nel Primeru Mayu delles organizaciones, colectivos y persones a titulu individual soberanistes ya independentistes formaron un bloque dientro la marcha. Nelly cientos de persones xuntaron les vindicaciones de clas coles nacionales y tres un baberu col llema “La clas obrera asturiana pola independencia y el socialismu” marcharon xuntos. Nel bloque soberanista nel Primeru Mayu asitiaronse organizaciones como Andecha Astur, Darréu, Fai!, Sofitu o UNA.

DARREU asoleya pegadielles nueves pol socialismu pal Primeru Mayu

DARREU vien d'asoleyar miles de pegadielles escontra la cris y pol socialismu que va estrenar nel manifestamientu del Primeru Mayu en Xixón.

Como ye vezu, Darréu sofita la convocatoria de CSI, CGT y SUATEA nel día de la clas obrera y esti añu va ser parte del bloque soberanista que se va formar.

Bloque soberanista nel 1ºu Mayu.

Esti 1º Mayu, dia del trabayador/a, estremaes organizaciones del ámbitu soberanista/independentista d'Asturies tienen alcordao dir xuntos a la ya tradicional manifestación convocada por sindicatos d'esquierdes en Xixón.

Por ello, y anque cada organización ye llibre de portar baberu y banderes propies, toos xuntos caleyaremos nun bloque tres un baberu xunitariu que mos identifica a toos: EL PUEBLU ASTURIANU POLA INDEPENDENCIA Y EL SOCIALISMU.

Convidamos a too aquel que se sienta identificau con esta idega a xunise a nós nel dia de la clas obrera.

PUXA ASTURIES LLIBRE YA SOCIALISTA!!
PUXA LA CLAS OBRERA!!

Reapertura del Llar d’Andecha de Noreña

El Llar d’Andecha de Noreña vuelve abrir les sos puertes mañana vienres tres dos selmanes d’obres de meyora y acondicionamientu del centru social y cultural. La reapertura coincide coles fiestas del Picadillu y del Sabadiegu de Noreña. Demientres la fin de selmana va haber folixa nel Llar y mañana vienres cellebraráse una espicha de repaertura pela nueche.

De magar la selmana que vien el Centru Social nacionaliegu entama un nueva dómina y va tar abiertu de llunes a sabadu a partir de les 18:00 hores, con serviciu de biblioteca, xuegos de mesa, chigre... Nel Llar d'Andecha, na céntrica cai noreñense Javier Lauzurica tienen la so sede los conceyos d'Andecha Astur y de Darréu de Noreña y Sieru.

Deteníu un trabayador de Diasa

Un grupu de trabayadores de Diasa supuestamente intentó ayeri cortar l’autovía Uviéu-Campumanes a la altura de Mieres. Según recueye la prensa, la Guardia Civil torgó que los trabayadores pudieren acceder a la calzada y detuvo a un trabayador qu’intentó aparar el tráficu.

Al paecer, los axentes del cuerpu militar español llocalizaron unes 50 ruedes y dos bidones de combustible, material que supuestamente diba ser utilizáu pa facer una barricada na autopista. Los trabayadores de la empresa farmaceutica lleven más de trés meses ensin cobrar y el futuru de la factoría sigue nel aire.Los voceros de la plantiya señalaron que la so intención yera «facer una movilización pacífica xunto a l’autovía». Tres la intervención policial afirmaron sentise «perseguíos ya instigaos». «Los delincuentes nun somos nós, sinon los responsables d’esti conflictu llaboral».


DIASA EN LLUCHA!

Los 14 de Cangues llibres yá na primer xornada del xuiciu

A les diez de la mañana entamó'l xuiciu a los 14 de Cangues que diba durar fasta'l prósimu 24 d'abril. A les 10:45 hores yá se fexo pública la resolución al retirar la fiscalía retiró tolos cargos penales y calteniendo los delitos de faltes. El xuiciu finó a les 11 de la mañana y los acusaos tendrán que pagar multes d'ente 150 y 400 euros caún.

La defensa de los acusaos aceptó la retirada de cargos y les condergues por faltes tres reconocer el fiscal lo desproporcionao de l'acusación. Esti sábadu 18 d'abril más de 1000 persones caleyaron baxu la lluvia nUviéu pa pidir l'absolución de los 14 de Cangues y güei llunes yá tán llibres.

La Coordinadora Antifacista d'Asturies va cellebrar l'absolución con una folixa güei a les 19:00 hores na Casa Sindical de Xixón.

Estrayíu d'Infoasturies.

Darréu Llangréu amuesó la so refuga a la presencia del rei español nel conceyu

Aparte del sofitu a les convocatories d'Esame República Asturiana n'Uviéu pa refugar la presencia del rei español n'Asturies. La mocedá independentista llangreana amuesó tamién nes cais la so refuga énte la presencia del Rei d'España nel so conceyu. Más semeyes na web de Darréu.

Sábadu 18 abril: Manifestación pola absolución de los 14 de Cangues que serán xulgaos del 20 al 24 d'abril

Ente'l 20 y el 24 d'abril 14 mozos asturianos van enfretase a una petición fiscal que suma 35 años de cárcel por participar n'un acto de refuga del facismu, el racismu y el nazismu en Cangues d'Onís en setiembre de 2005.

N'estos casi 4 años numberoses iniciatives van ponese en marcha n'Asturies, gran parte dientru la campaña del 35. El sábadu 18 d'abril, a les 18:00 hores, va partir una manifestación dende la estación de la Renfe n'Uviéu pa pidir l'absolución de los 14 de Cangues.

L'Ensame República Asturiana énte la visita del rei d'España a Asturies

Esti Xueves 16, el rei d'España, va venir a Asturies a inaugurar la tercera fase de les obres d'ampliación de la Clínica Fernández-Vega.

Dende el Ensame República Asturiana, consideramos esto como una humillación al pueblu asturianu, porque n'Asturies nun pinta nada nin un rei, nin una clínica privada onde faise servicios de baldre y importantes descuentos a miembros de la Guardia Civil y cures.

Poro, convocamos esti miércoles día 15 una concentración de refuga a la visita del rei n'Uviéu na Plaza Escandalera a les 19.30 hores.

Tamién convócase otra concentración el día 16 n'Uviéu na Plaza arzobispu Gabino Díaz Merchán a les 11.30 hores.

Aberri eguna 09

La izquierda patriota vasca tornó a tomar les cais desixendo una estratexía nacional que-yos empobine dica la independencia y el socialismu.

Darréu escontra l’aculturización d’Asturies

Nos caberos dies apaeció la noticia de que nel Conceyu de Xixón va cellebrase La Feria d’Abril entamada dende les alministraciones públiques asturianes. La noticia nun sorprende a nadie, nin a nós mesmos pero énte esti actu flamenquista dende Darréu caltenemos los siguientes plantegamientos:

- Qu’esti tipu de festexos, de calter flamenquista, nun son más qu’una estratexa d’aculturización nel nuesu país, una estratexa pola que puxa la clas política asturiana, pa desaniciar la nuesa cultura ya implantar n’Asturies otra foriata, de la cual aprópiose l’españolismu hai munchisimos años yá.

- Qu’al mesmu tiempu qu’estes manifestaciones culturales flamenquistes son potenciaes dende les alministraciones públiques, y cada añu son más les feries d’abril que s’entamen nos Conceyos Asturianos, les folixes típiques asturianes son escaecies dende los nuesos ayuntamientos. El padremuñu asturianu ye valtiao, la nuesa cultura arrequexada y la nuesa llingua cuasique prohibía.

- Poro, énte esti escaecimientu de la nuesa llingua y cultura llariegues, y esti fenómenu de da-y puxu a esti tipu de manifestaciones culturales foriates dende Darréu refugamos esta Feria de Abril. La nuesa razón ye que nun ye namai qu’una folixa cola que los políticos d’esti país traten d’imponer una cultura que nun ye la nuesa. Mentanto faen eso, desanicien la nuesa cultura y llingua y condérguenla a esapaecer.

- Creemos qu’esti tipu de manifestaciones culturales, nesti casu estes, de calter andaluz, son respetables y totalmente tolerables, como les de cualquier pueblu del mundu o cualesquier ciudadanu o ciudadana. Pero a la vegada, camentamos que nesti casu nun son más qu’una forma d’imposición d’una cultura foriata sobre la nuesa propia llariega. Asina, dende el respetu a esta folixa, creemos que la ciudadanía asturiana, n’especial pa nós la mocedá, debe refugar estos festexos hasta que la nuesa cultura nun dexe de tar marxinada y escaecía polos políticos.

- Asina, llamamos a la mocedá y a la población xixonesa a nun acudir a esti festexu, entamáu pol propiu ayuntamientu, yá que diendo, a la par que tamos contribuyendo a un procesu d’aculturización españolista, tamos matando a la nuesa cultura, ello ye, a la nuesa identidá nacional, que ye lo que-yos interesa a los políticos que tenemos nesti país.

¡¡LA IMPOSICIÓN DEL FLAMENQUISMU N’ASTURIES YE COLONIALISMU!!

ACULTURIZACIÓN D’ASTURIES ¡¡ NON !!

¡¡ LA MOCEDÁ ASTURIANO POLA SO CULTURA !!

http://www.darreu.org

Resultaos de la cabera encuesta.

Nesta cabera encuesta nel blog entrugábemos sobro'l movimientu de lliberación nacional asturianu, la esistencia d'esti y la so situación. Un 15 % de los votos caltienen que hai un movimientu de lliberación nacional afitáu ya claramente anque pequeñu, ya cimentáu.

Otru 36 % creye que'l movimientu de lliberación asturianu ye pequeñu y ta en procesu hembionariu pero ta sentando yá les sos bases de cara haza'l futuru prósimu.

La opción mayoritaria, con un 47 %, ye la que caltién que nun se pue falar entá de mov. de lliberación nacional y fai falta muncho trabayu entobía.

Gracies a la xente qu'entró y votó qu'esta vegada foi muncho más que'n otres ocasiones.

Salú ya dixebra.

Unes 1500 presones manifiestense en Xixón escontra'l paru y la crisis capitalista.

Unes 1500 persones dieronse cita güei nes cais de Xixón baxo el llema: Contra la crisis del paru, Hai que paralos saliendo a la cai.

Una manifestación xunitaria convocada por: CSI, CXT, SUATEA, PCA, PCPE, ANDECHA ASTUR, UNA Y FUSOA, na que protestose pola medra del númberu de paraos, la precariedá llaboral, el cierre de empresas y los despidos, la represión...

Tamién participaron les trabayaores y trabayaores de Nestle, Obrerol, Diasa Pharma, Naval Xixón.

Fai! Fixo un muralon col llema " Free Asturies"

La muerganización soberanista fixo esti mural a la entrada de la capital d'Asturies.

Aprobada la Mención d'Asturianu en Maxisteriu

La Xunta d'Escuela de Maxisteriu aprobó güei de tarde la Mención d'Asturianu nos nuevos estudios adaptaos al espaciu européu d'educación por una mayoría abultada, 58 de los 87, alredor de les 2/3 partes de la Xunta votaron a favor.

L'Asturianu entró nos cursos reglaos de maxisteriu tres aprobar la mención la Xunta de la escuela universitaria nuna votación na que namás 26 persones votaron contra la inclusión de la especialidá d'Asturianu nos estudios ufiertaos. Pelaso parte 3 miembros de la Xunta votaron en blanco.

Concentración pol asturianu en Maxisteriu

Lo mesmo que pasó nel conceyu anterior de la Xunta d'Escuela de Maxisteriu onde se decidía sobre la presencia o non de la nues Llingua nos estudios de maxisteriu, una concentración va esixir esi martes de tarde'l tratu igualitariu pa la llingua d'Asturies.

La Xunta pol Defensa de la Llingua tien convocada una concentración esti martes a partir de les 16 hores col oxetivu d’esixir un tratu igualitariu pal asturianu na Escuela de Maxisteriu. L'actu vindicativu coincide cola importante votación que va decidir l'estatus que va tener la llingua asturiana nos estudios de la Escuela.

Txomin Goñi condergáu por faltes y non por delitos, como quería el PSOE de Llanes.

“Una victoria importante pa siguir denunciando la especulación y la corrupción n’Asturies”.

El Xulgáu de lo Penal d’Uviéu dictó sentencia pol xuiciu contra Txomin Goñi, por presuntos delitos nun Plenu del Ayuntamientu de Llanes nel que s’aprobó’l Plan Parcial de La Talá. El fallu conderga’l dirixente vecinal por una falta de perturbación del orde públicu y una falta de “lesiones” con multes de 1000 € y 180 € pa indemnizar a un policía municipal. Llibra asina la pitición de dos años y mediu del Ayuntaientu de Llanes.

L’acusación particular, l’Ayuntamientu de Llanes (PSOE), pidía 2 años y 5 meses de cárcele al imputái dellos delitos y delles faltes. Pesie a que la Fiscalía yá retirare los sos cargos de delitu dexándolos en simples faltes, al considerar non axustada a derechu la decisión de l’Alcaldesa de desagospiar a un ciudadanu pol simple fechu de llevar una camiseta denunciando la illegalidá del plan parcial.

L’Agrupación de Colectivos Asturianos (ACA), l’Agrupación de Vecinos y Amigos de Llanes y la Plataforma escontra la Represión y les llibertaes asoleyaron un comunicáu conxuntu tres la sentencia. Pa los colectivos “ye más qu’evidente qu’esti resultáu xudicial tien muncho que ver cola gran movilización ciudadana y allarma social creada pola petición de 2 años y medio de cárcele por denunciar la especulación urbanística y la destruición de la costa que ye patrimoniu de toos”.

Pa los colectivos “la recoyida de miles de firmes de apoyu a Txomin Goñi, el repartu masivu de fueyes informatives, la gran repercusión n’Internet, la presencia constante de ciudadanos acompangandolu nos sos 15 díes de fuelga fame, la importante concentración na entrada de los Xulgados el día del xuiciu, son fechos qu’amuesaron la repulsa de los ciudadanos” y entrúguen “¿Cómo se pue pedir cárcel pa los que denuncian la especulación y non pa los especuladores?”.

Los colectivos tienen claro que “sin esti rechazu ciudadanu a la penalización de Txomin, güei tendríemos un grave precedente marcáu na piel d’un ciudadanu pa torgar que la rempuesta social a los abusos de poder s’abra pasu”.

Los colectivos ciudadanos y sociales qu’acoimpangaron a Txomin Goñi agradecen a tolos que sofitaron el casu “que consideramos una victoria importante pa siguir denunciando la especulación y la corrupción n’Asturies”.