La emigración forciada nun dexa de medrar.

Según datos del institutu d'estadistica Asturies perdió ente xineru y xunu 1.775 habitantes. Los datos a 1 de xineru falen d'un númberu de resisdentes de 1.057.145 presones nel nuesu pais, lo qu'amuesa una gran perda. Dafechu el seutor más perxudicáu ye'l que llenda la población ente los 21 y 30 años, que pasó de tener 134.446 a 130.529 habitantes. Poro, esti seutor, el de mocedá, rexistró la perda de cuasi 4 millares de xóvenes.

La población más mayor medró y la mocedá sigue batiendo rexistros negativos, lo qu'amuesa la necesidá de los xóvenes a la guetar una vida más digna fuerda d'Asturies. A la par, queda rexistráu lo vieya que ye la población asturiana. Estos datos son los más negativos dende 2002, qu'entamó a espublizase l'estudiu.

Manifestación de solidaridá con Cuba el 22/07/09 a les 20:00 dende’l Humedal en Xixón

Cuando se va cumplir el 50 aniversariu de la Revolución Cubana, el Comité contra'l bloquéu y de solidaridá con Cuba d'Asturies convoca un manifestamientu esti miércoles en Xixón. El Comité que conformen m´s d'una veitena de coleutivos ente asociaciones, sindicatos, partíos y otres organizaciones fain un llamáu a la sociedá asturiana a movilizase en solidaridá con Cuba el miercoles na Plaza l'Humedal de Xixón a les 20:00 hores.

El llema de la convocatoria ye "50 años de Revolución" y los coleutivos que conformen el comité contra'l bloquéu y de solidaridá con Cuba son: Asoc. Astur-Cubana "Barolome de las Casas", Asoc. "26 de julio", Asoc. "Paz y Amistad", Asoc. Cien por Cien Cubanos", Asoc. "Soldepaz-Pachakuti", Asoc. "Paz y solidaridad" OSPAARAL, COSAL-Xixón, Soc. Cultural Gijonesa, CSI, SUATEA, USO, SE, PCA, Andecha Astur, PCPE, UNA, DARREU, CJC, JCA, UJCE, Conceyu de la Mocedá de Xixón.

El textu asoleyáu pol comité ye'l que vien darréu:

Escomenzaba en 1959 un nuevu alborecer pa los cubanos, pal restu d'América Llatina y pal mundu enteru. Poníase per delantre la construcción d'un futuru de llibertá, igualdá, dignidá y, sobre too, un horizonte distintu, nel qu'aquellos que siempres tuvieren esplotados, vilipendiaos y marxinaos, ello ye, la gran mayoría de la población, tuviera capacidá de dirixir y gobernar pa si mesma.

Tinía llugar l'entamu d'una tresformación socialista y democrática de la sociedá cubana, encabezada por un grupo de xóvenes revolucionarios que por suerte güei tovía siguen al nuestru llau.

Fidel, Raúl, Ramiro, Almeida, “Gallego” Fernández, etc. y otros qu'anque siguen guiando'l nuesu pensamientu yá nun tán ente nós como el Che y Camilo, son los que consiguieron conxuntamente col esfuerzu del so pueblu revolucionariu la construcción d'un modelu distintu pa Cuba enormemente más xustu que'l sistema socioeconómicu capitalista d'anguañu.

-La construcción d'una sociedá más xusta na que los trabayadores son los dueños del so trabayu y na que la produición proyectase en pos del beneficiu colectivu y social.

-Un país nel que la educación y la sanidá son gratuites y un derecho universal pa toos.

-Una sociedá na que los neños nun tán desnutríos nin tán sometíos a xornaes de trabayu interminables o a una esplotación sexual brutal.

-Una Cuba que a pesie les sos dificultades económiques, a causa del bloquéu imperialista yanki, solidarízase col restu del mundu esportando aida humanitaria, educativa, mélica o asistencial a aquellos países que más lo necesiten (N'África, Asia o América Llatina).

- La realidá d'un sistema social pa los trabayadores y los sectores sociales más humildes, y non pa una élite económica y militar opresora que namás quier perpetuarse nel poder como observemos recientemente nel cruel güelpe d'estáu perpetráu contra'l noble pueblu d'Hondures. Nun sólo col sofitu indirectu del imperiu norteamericanu sinon tamién col silencio sobre los fechos de los medios de comunicación y los gobiernos europeos, claramente al serviciu de les sos burguesíes.

-Una democracia na que nun sólo se deposita una papeleta cada cuatru años pa elexir a unos representantes, sinon na que el pueblo elixe a los sos candidatos y éstos puen ser revocaos en cualaquier momentu si nun cumplen coles funciones emanaes de la soberanía popular.

Una revolución que pesie a llevar 50 años resistiendo nun entornu hostil, namás a unas poques milles de la potencia más voraz y sanguinaria que xamás conociéremos hasta entoncienes, ye capaz de siguir calteniendo viva la realidá de qu'otru sistema social nun sólo ye posible, sinon necesariu. El Socialista.

Sóbrenmos los motivos pa defender a Cuba y a la so Revolución. Ye por ello que dende'l Comité contra'l bloquéu y solidariedá con Cuba facemos un llamáu al conxuntu de la sociedá asturiana a que se movilice y solidarice con esti pueblu que tan altu exemplu de dignidá, fraternidá ya igualdá sigui allumando al conxuntu de la humanidá.w

Ye una pena que'l cartelu nun tea n'asturianu pero bono.

Andecha Astur califica de "marioneta" al gobiernu asturianu na negociación del financiamientu autonómicu

La organización política asturiana sorraya que la militancia antiasturiana d’Areces y la FSA-PSOE "cuéstanos caro", al perder 29 millones d’euros por nun ser l’asturianu llingua oficial.

Andecha Astur denuncia’l “miserabilismu políticu” de los políticos del “Principado”, de los partíos políticos representaos na Xunta Xeneral, "qu'almiten un sistema de financiamientu que por definición ye contrariu a los intereses d'Asturies y del Pueblu Asturianu" y el papel d'Areces y la FSA-PSOE, "cuyu servilismu torna a quedar n'evidencia de nueu y ye qu’enantes siquiera de saber cifres yá-yos paecía perfechu’l tratu".

Dende la postura, tocántenes a financiación, qu’históricamente defende Andecha Astur, "que nun ye otra que la de xestionar los propios recursos ensin tener que vivir de les miseríes que mos unvíen dende la metrópoli, de la dependencia, mientres nos someten al traviés d’una economía colonialista", Andecha Astur asoleyó'l so posicionamientu énte’l nuevu módelu de financiamientu autonómicu del Estáu español y el papel xugáu polos gobernantes del “Principado”.

Andecha Astur quier denunciar publicamente’l “miserabilismu políticu” de los políticos del “Principado”, de los partíos políticos representaos na Xunta Xeneral, "qu'almiten un sistema de financiamientu que por definición ye contrariu a los intereses d'Asturies y del Pueblu Asturianu". Denuncien tamién el papel d'Areces y la FSA-PSOE, "cuyu servilismu torna a quedar n'evidencia de nueu y ye qu’enantes siquiera de saber cifres yá-yos paecía perfechu’l tratu".

Queda bien claro, p'Andecha, que’l poder de negociación del "Principado" col Estáu español "ye nulu" y qu’Areces y la FSA son "una simple marioneta del PSOE, qu'antepón los intereses del partíu a los d'Asturies". Pa los nacionaliegos "queda claro, otra vuelta, qu’Asturies necesita pesu políticu nel Estáu y qu’esto namás s’algama al traviés de posicionamientos nacionales. Asturies necesita una voz que la defenda como nación y que construya un país de progresu envede convertimos nun país y un pueblu, dependiente, espolíau y esplotáu".

Too ello "asoleya el perpocu pesu políticu d'Asturies nel conxuntu del estáu anguañu" afirma Andecha Astur. Un pesu, dicen, que sigue "menguando mientres se consolida’l denomáu estáu de les autonomíes, del bienestar, la segunda restauración borbónica y sufriendo un desmantelamientu industrial sangrín dientro d’una cris socio-económica, cultural, demográfica, ambiental… constante". P'Andecha Astur "con gobernantes marionetes ye imposible que cualaquier alcuerdu de financiamientu (o d’otru calter) pueda responder a los intereses d'Asturies y del Pueblu Asturianu" y atalanten que "los responsables másimos de la destrucción de la Asturies dinámica, del trabayu y el progresu ye imposible que la puedan defender con honradez". Andecha creye que'l "provincialismu" de la FSA-PSOE "y del restu de la élite política lleva a Asturies a ser una simple marioneta, ensin personalidá propia, que nun pinta nada".

Andecha Astur acaba'l so comunicáu sorrayando que la "militancia antiasturiana" de Vicente Álvarez Areces y la FSA-PSOE ta costándomos percara. Asina, "por negase a reconocer un derechu humanu al Pueblu Asturianu, como’l que la so llingua seya oficial, perdemos namás y ná menos que 29 millones d’euros añales. Simplemente un escándalu".

Protesta silenciada na inauguración de los tuneles del TAV en Campumanes

Una trentena persones, vecinos y vecines de L.lena, concentráronse en Campumanes na inauguración de los túneles del TAV del ministru español de Fomentu, col llema "L'AVE: ¡destruyendo L.lena a alta velocidá! Y pronto, la costa asturiana". Los manifestantes tovieron en tou momentu arrodiaos por gran cantidá d'efectivos de la Guardia Civil. La protesta vecinal escontra "l'estrozu'l TAV en Campumanes" foi silenciada dafechu polos munchos medios de comunicación que cubrieron la inauguración de los tuneles por Pepiña Blanco.

Casique un añu dempués de la visita de Zapatero los vecinos siguin coles mesmes reclamaciones. "En L.lena tamos pagando una bona parte de los daños ambientales y sociales causaos pol AVE y el so supuestu ‘interés públicu xeneral’, entemecíu col interés empresarial de les multinacionales constructores" que tovieron presentes na ceremonia d'inauguración. "A nós los vecinos por supuesto nun nos convidaron. Nin siquiera sabemos aún si la llínea será d'alta velocidá pero les obres son d'enorme magnitú y daños p'Asturies. L'altu gastu lleutricu qu'esto va a conllevar y los enormes daños causaos hasta agora fain de la Variante Payares un proyectu de tresporte nada adecuáu al desarrollu caltenible que nos venden dende'l gobiernu" denuncien.

Los manifestantes tienenlo claro "Queremos un serviciu de tresporte públicu de calidá y adecuáu a les nuestres necesidaes riales. Nun podemos sacrificar el mediu rural y los sos servicios mínimos de comunicación" y nun atalanten como "mientras nos estrocen el Valle del Güerna, los alcaldes de los conceyos costeros siguen discutiendo si'l tren d'alta velocidá tien o non impautu. Si vinieren al Conceyu L.lena nun-yos quedaríen duldes". Pa los vecinos "por muncho que seya d''interés públicu', la variante nunca foi un proyectu tresparente y democráticu y quieren que se-yos incluya nel procesu "y que consulten a la xente donde, cómu y que coses tienen qu'arreglar".

asoleyáu n'Infoasturies

Arbitrariedá provocatible y faltona escontra la ciudadanía asturfalante

Casu nuevu de discriminación: Les publicaciones n'asturianu puntuén menos de la metada que les feches en cualesquier llingua del mundu, viva o muerta, nes oposiciones al Cuerpu de Mayestros del "Principado", según denuncia l'Aconceyamientu de Xuristes pol asturianu.

Per Resolución de la Viceconseyería de Modernización y Recursos Humanos, de data 23 d’abril, modificada per otres del 30 d’abril y 3 de xunu (BOPA de 24 d’abril, 3 de mayu y 4 de xunu respeutivamente), l’Alministración del Principáu d’Asturies convocó a concursu-oposición pal ingresu nel Cuerpu de Mayestros, estableciendo ente los méritos a valorar na fas de concursu les “espublizaciones rellacionaes cola especialidá a la qu’opta l’aspirante” (separtáu 3.2.1 del bloque III), fasta 0,35 puntos y les “espublizaciones sobre otra especialidá a la qu’opta l’aspirante” (separtáu 3.2.2 del bloque III), fasta 0,15 puntos. Nada recueyen les bases sobre la llingua emplegada.

Por embargu, nel intre de xustificar les puntuaciones provisionales de los opositores, l’Institutu Asturianu d’Alministración Pública “Adolfo Posada” -muérganu nel que, casualmente, ocupa un altu cargu funcionarial, per nomamientu “a deu”, la muyer d’Álvarez Areces- ensin sofitu llegal dalu alcuerda que “les espublizaciones n’asturianu, magar seyan de la especialidá, baremaránse pel separtáu 3.2.2”.

Al acabu: les espublizaciones rellacionaes cola especialidá feches en cualquier idioma del mundiu (vivu o muertu) puen algamar fasta 0,35 puntos nel concursu pal accesu al Cuerpu de Mayestros del Principáu d’Asturies, pero si la llingua emplegada na espublización foi la propia del país, l’asturiana, entós la puntuación másima posible ye de 0,15 puntos.

La discriminación, "arriendes d’inconstitucional, antiestatutaria, provocatible y faltona, ye dafechamente arbitraria porque nun tien sofitu nes bases del concursu-oposición" denuncien dende dende l’Aconceyamientu de Xuristes pol Asturianu, qu'encamienta:

1^u. A los opositores afectaos que recurran la Resolución del Institutu “Adolfo Posada”, de 9 de xunetu, no que cinca a la menor valoración de les espublizaciones en llingua asturiana. Pa ello puen cuntar col asesoramientu, tanto en vía alministrativa como contenciosa, de los nuesos xuristes.

2^u. A los sindicatos de la enseñanza que desixan les esplicaciones del casu a la Conseyera d’Alministraciones Públiques y Voz del Gobiernu, responsable cabera d’esta sangrina discriminación.

Xunetu internacionalista de Darréu

La organización xuvenil Darréu ta convidada a participarnesti mes de xunetu n'actos nos Paisos Catalans, Galiza y Cantabria entamaos por mocedaes independentistes. Delegaciones de Darréu van tar nel Rebrot'09 qu'entama Maulets, nel Día de la Patria Galega con AMI y nel Día Nacional de Cantabria con Regüelta.

Esti mes de xunetu ye un mes d'actos internacionalistes pa la organización independentista asturiana y delles delegaciones van participar n'actos organizaos por organizaciones xuveniles independentistes coles que caltién rellación. Asina, esta fin de selmana, del 16 al 19 de xunetu, Darréu va tar en Berga nel Rebrot'09, el 24 y 25 de xunetu en Compostela nel Día de la Patria Galega y el 27 y 28 de xunetu nel Día Nacional de Cantabria nel Puente Sanmiguel.

La organización asturiana va aprofitar estos viaxes internaconalistes pa siguir afondando nes rellaciones coles mocedaes independentistes catalanes, gallegesy cántabres y con otres delagaciones internacionales presentes nos estremaos actos.

www.glayiu.org

"El güelpe n'Hondures ye'l primeru"

El Procurador pa la Defensa de los Derechos Humanos de Nicaragua, Omar Cabezas, alertó a los mandatarios de llatinoamerica, que lo que pasó n'Hondures "malpenes ye'l comienzu" y que puen desarrollase planes desestabilizadores en gobiernos d'izquierda.

Cabezas caltíen que'l gobiernu norteamericanu y el so sistema imperialista "ta detrás d'esa xugada". "Esti güelpe sofítalu la embaxada de los Estaos Xuníos y los sectores más venceyaos a la industria armamentista, a la xente de los grandes bancos que quebraron y al Pentágonu", dixo Cabezas.

Cabezas avisó que "Esto ye l'entamu d'una corriente de la más reaccionaria de los Estaos Xuníos pa devolver a América Llatina a como taba nos años 70, con esto quiero dicir que vienen güelpes d'estáu en toa América Llatina, amás van a recurrir a los asesinatos".

El precurador foi más allá afirmando que: "Dexo de llamame Omar Cabezas, si nun van sobre'l físicu, sobre'l cueru d'Hugo Chávez y Daniel Ortega, nun m'equivoco, van sobre'l d'Evo y sobre'l de Correa, como que la toi viendo, presidente Ortega cuídese, presidente Chávez cuídese, que van sobre ustedes y que tamién se cuide'l de Guatemala y el del Salvador", expresó.

El defensor de los Derechos Humanos, dixo tener conocimientu que l'embaxador norteamericanu n'Hondures, antes del güelpe, aconceyó colos sectores golpistes.


estrayíu d'Infoasturies

Blogue de los trabayadores de Vesuvius

El blogue de Vesuvius fízose cola intención de que la problemática qu'afecta a los trabayadores de Riañu en Llangréu se conoza fuera de les cuenques y d'Asturies, yá que Vesuvius Internacional cortó la comunicación interna ente les factoríes que tien per tol mundu.

Yá se pue siguir tola problemática de los trabayadores asturianos de Vesuvius al traviés de la rede nel blogue http://vesuviussomostodos.blogspot.com/ onde hai información, videos,...

Vulcano quier zarrar Juliana, según los trabayadores.

El sector Naval en pelligru d'extinción

Los trabayadores de Factoríes Juliana aprobaron un calendariu de movilizaciones ante la postura de la empresa, que "se niega a llegar a acuerdos" porque "Vulcano tien como únicu fin zarrar l'astilleru". Primero tocó-y a Naval Xixón y agora too apunta que Juliana tamién sobra nos planes urbanísticos de Xixón. Tres el zarru de Naval Xixón, Juliana ye'l últimu astiilleru del Conceyu y cuerre grave pelligru.

"Esiximos a la SEPI que faiga a la compañía cumplir los sos compromisos porque ye la responsable última d'esta situación pola mala venta del astilleru", afirmen dende'l Comité d'empresa que tienen claro que "Vulcano vino a Xixon sólo pa facer caxa sin interesa-y el futuru de les instalacioens xixoneses".

"Los trabayadores namás queremos defender el futuru del astilleru, pero paez qu'eso nun interesa porque lo que realmente se quier ye pesllar les instalaciones", dixo'l presidente del Comité d'empresa.

Según esplicó a Europa Press René Rodríguez, les movilizaciones vienen tres el conceyu celebráu cola direición de la empresa na que nun se llegó a nengún acuerdu, ya que "la empresa sigue con acitú represiva, dura y cruel contra los trabayadores". Nesti sen, indicó que la compañía caltién la sanción que-y impunxeron como presidente del comité por "nun collaborar cola compañía", polo que'l próximu llunes va tentar d'acudir al Xulgáu númberu trés de Xixón. El calendariu de movilizaciones peslláu polos trabayadores contempla paraes pa tolos martes y xueves, de 7.30 a 9.30 hores y de 12.00 a 14.00 hores.

Manifestamientu pol aniversariu del CSOA "La Reflexón"

Sábadu 11 a les 19:00 hores en Xixón

El 11 de Xunetu de 2008 un grupu de mozos y moces recuperaben pa su usu social l’antiguu edificiu de la Fábrica de FLEX nel barriu de La Calzada en Xixón. Dende aquella fecha, y hasta’l fatídicu 5 de Xunu nel qu’una xueza decidió que l’edificiu tenía que volver a les manes del su dueñu “llegal” pal su “usu y disfrute”.

Esto ye, volver a cerralu pa poder especular bien con él, desarrolláronse nel antiguu edificiu de la FLEX, rebautizáu como Centru Social Okupáu y Autoxestionáu La ReFLEXón, cantidá de talleres, charres, comedores veganos, folixes, conciertos, una pista de skate, una tienda de gratuidá…

"Pero les idees nun se pueden desaloxar, y el CSOA La ReFLEXón nel exiliu sigue vivu" y pa cellebrar l’aniversariu d'esti proyeutu ta convocada una manifestación que va tener llugar el prósimu sábadu, día 11, a partir de les 19 hores na Plaza l’Humedal de Xixón.

APN vuelve a amosar la so “asturianía”

Otra vuelta, la organización política Asturianistes por Nava (APN) ta acabante d’amosar que d’asturianista tien pocu y que nun tien nada que ver con aquella formación qu’encabezare nel so intre l’ex-alcalde de Nava, Xulián Fernández Montes, desvinculáu dafechu de la mesma dende cuantayá.

Y ye qu’esta mesma selmana’l so Secretariu Xeneral, Nisén Díaz, aprovechó les sos crítiques al gobiernu navetu polo probetayo del programa d’actos del Festival de la Sidre, que se cellebra’l prósimu sábadu, pa desixir tamién que los cartelos del eventu “tendríen de tar escritos tamién en castellán, nun sólo n’asturianu, al ser una folixa d’interés turísticu nacional”. Yá nel mes de mayu tuviemos otru exemplu de l’asturianía d’APN cuandu pidieren nel Plenu municipal “un reconocimiento d’altu nivel, nun descartando da-y el títulu de fíu adoptivu o la presea d’oru del conceyu a Pedro de Silva” por ser “el presidente de la primera autonomía d’Asturies y saber conxugar comu naide’l pasu de la política a la vida privada”. Ver pa creyer.

Concentración en solidaridá con Hondures en Xixón

Esti xueves 9 de xunetu va facese una concentración a les 20:00 hores nel xixonés paséu de Begoña en solidaridá col pueblu hondureñu. La concentración s'entama dende colleutivos asturianos en solidaridá con América Llatina. Dempués de la concentración, a les 21:00 hores cellebrarase un conceyu pa informar de la situación n'Hondures y facer un analís d'esta mesma.

Avilés, el primer conceyu en colingar la bandera d´Asturies

Foi nel añu 1977 y ensin dengún actu oficial

Avilés, la tercer ciudá d´Asturies, conocía pol nomatu de la villa del Adelantáu tamién podía ser conocida como la primer villa d´Asturies que tres la muerte del dictador fizo amuesa de los simbolos d´identidá del nuesu país, anque más bien a callandinos y nun arguyosa de lo de so.

orría l´añu 1977 y la ciudá cellebraba les sos populares fiestes del bollu cuando la mayoría de la xente qu´asistía al discursu del alcalde delantre la Casa Conceyu sintió como esti finó les sos pallabres col glayíu de “Puxa Asturies”, foi ensin dulda una de les coses más comentaes d´eses fiestes del bollu. Unes fiestes nes que la villa alboreció enllena de cartelos qu´entrugaben a los avilesinos “¿Qué fais pela llibertá d´Asturies?”, a lo que s´afitaba con lletres más grandones “¡¡llucha pela so autonomía!!”.

Nun foi sicasí esi día cuando la bandera asturiana colombró dende´l balcón del ayuntamientu. Según pallabres del alcalde eso diba facese´l 15 d´abril por coincidir col tercer centenariu de la fechura del edificiu. De toes toes, los asturianistes llograron que la carroza onde diben la Xana y la Xanina de les fiestes ondeara la bandera del país.

Hebo qu´esperar hasta´l 21 d´Abril de 1977 pa qu´Avilés convirtiérase nel primer conceyu d´Asturies con una bandera asturiana asitiada nún edificiu hestóricu. Anque nun hebo actu oficial nin muncho menos: la bandera asturiana colocose a les diez de la nueche, con una plaza del Parche cuasi ensin xente y dempués de dellos díes na que la corporación municipal taba dando “llargues” a tola xente qu´amosaba´l so interés en que la bandera ondeara na Casa Conceyu.

Reproducimos equí la crónica que dende les páxines de Conceyu Bable n´Asturias Semanal (númberu 409, páxina 31. Del 7 al 14 de mayu de 199) facíen sobre la colocación de la primer bandera d´Asturies nún edificiu oficial:

Avilés: la primer bandera astur, oficial nun conceyu la nación asturiana

Avilés ya tien esñalando al aire la primer BANDERA ASTURIANA oficial que se pon nunca casa conceyu d´Asturies. Nel balcón principal tán les banderes del estau español, d´Avilés y la nuestra –la de tolos asturianos: L´asturina-.

Too entamo per febreru d´esti añu, cuando Conceyu Bable Avilés, PSPA y dellos conceyales pedimos por separau, la collocación de L´Asturina nel auntamientu: a lo que l´alcalde mos dixo naquella ocasión, que diba ser nun dí renomau como yera el dí Pascua –Fiestes del Bollu n´Avilés-. Esi dí, 10 d´Abril, tábemos embaxo la ca´l conceyu d´Avilés un grán númberu presones con banderes asturianes, qu´esperábamos ver como sacaben pel balcón principal la bandera tolos asturianos: pero l´encerrisque fo pergrande al ver como l´alcalde entamó dice-mos a los qu´allí tábemos, que la fecha oficial de collocación L´Asturina diba ser pal prósimu 22 d´Abril –300 aniversariu la casa conceyu-, vienres pa más señes; esti retrasu paició-mos permal dao que, como´l dí Pascua, nun se volvía atropar tanta xente peles cais d´Avilés. Amás la fecha´l 22 yera mala perque esi dí la xente trabaya y l´atu d´izala nun diba ser tan popular como´l pasau dí Pascua.

En fin, val más sero que ñunca; llego´l 21 y a pesar de too, muncha xente comenta la falta d´información del autamientu, ya que nun apaez nos papeles la hora de collocación, nin lo saben los informaores de guardia d´esta casa consistorial. Nusotros mesmos entrugamos-i a un encargau... A les 8 la tardi!... y él dixo-mos qu´entá nun se sabía un res d´una cerimonia pública de collocación al dí siguiente.

Dan les 10 de la nueche del 21, tábemos tres collacios falando per casualidá en Parche (la Plaza la ca´l conceyu) y vemos cómo a lo llaino, con noturnidá, premeditación y alevosia, cuando nun había xente –en toa la plaza tres collacios-, y EN SIN DENGUNA SOLENIDÁ, icen la BANDERA ASTURIANA, antipopularmente, ya que nun fexeron un atu públicu pal so ice; anti too, ya que lo fexeron en plena nueche como queriendo que la xente avilesino nun lo supiere, como dándo-ios vergoña poner la nuesa bandera astur.

A les diez de la nueche xube la BANDERA ASTURIANA –enantes de la fecha oficial-, abaxo, na plaza, na más que tres collacios y dalgún transeúnte, aplaudimos y glayamos PUXA LA BANDERA, PUXA ASTURIES!...

Siñor alcalde: Les coses nun se fain a medies, la BANDERA ASTURIANA merecía un atu públicu, ú la xente la recibiera colos honores que se merez... ¿Nun ye asina siñor alcalde?...

De toos moos Avilés ya tien l´enseña nacional astur. A nusotros prestaríe-mos que pronto esñalare l´asturina en tolos conceyos del PAIS ASTUR...

¡¡¡PUXA ASTURIES LLIBRE!!!

Solidaridá pa col Pueblu Hondureñu

Represión a los medios de comunicación, represión armada por parte les fuercies de seguridá, güelpe d'estáu, muertos, militares peles cais, violencia dende'l gobiernu, Zelaya sigui ensín tornar...
¿ Obama na solombra ?

Puxa la llucha'l pueblu hondureñu!

Un independentista acosáu pola Guardia Civil

Un independentista foi acosáu poles fuercies de seguridá del estáu ayeri de nueche cuando viaxaba nel so vehiculu direición Galiza. El ciudadanu asturianu foi persiguíu pola Guardia Civil ensin motivu demientres más de media hora p’acabar multándolu ensin motivu dengún.

L´acosu entamó en Villapedre (Navia), onde una patrulla de la Guardia Civil escomenzó a persiguir el vehiculu del independentista, cuya decoración debió resultar sospechosa pa los axentes. Yá a l´altura de Barres (Castropol), esto ye, más de 40 km más alantre, la patrulla d’esti cuerpo militar español decidió dar l´altu pa proceder, d’entamu, a un interrogatoriu acerca´l destín y saber si viaxaba acompañáu pa dempués rexistrar el vehiculu y comprobar la documentación y l’estáu del ciudadanu, pa lo que-y ficieron una prueba d´alcoholemia. Viendo que taba too en riegla, la guardia civil decidió denuncialu finalmente con 300€ de multa y la retirada de 4 puntos del carné, cola escusa d’una supuesta “condución neglixente” , motivu de multa comodín perutilizáu pola guardia civil cuando quier multar enin motivu obxetivu a un conductor.

Cuando los axentes notificaron la denuncia al ciudadanu asturianu retrucó con un “Todo pola patria, porque lo que ye por nós, nada. Me cago en dios” momento qu’aprofitaron pa menancialu con una citación xudicial nun tardando por “faltar a la autoridad, que somos nosotros”, en pallabres testuales de los axentes.

Nun tamos énte un casu aislláu, y nun ye’l primer casu d’acosu de les fuerces de seguridá del estáu a independentistes asturianos cuando viaxen nos sos vehiculos y les denuncies y multes ensin motivu. El delitu paez ser la decoración de los vehiculos con pegadielles de calter nacionaliegu como puen ser pegadielles de matricula d'AS, de la bandera asturiana cola estrella, d’Asturies,…

Esta actitú demuestra la esistencia d’un acosu pa col movimientu independentista-nacionaliegu asturianu. Esto “lloñe d´amedrentanos, tenemos qu´enfrentanos a ello”, en pallabres del ciudadanu asturianu acosáu nesta ocasión y que se punxo en contautu con InfoAsturies pa denunciar el casu y que ya punxo en manes d’un abogáu.

Estrayíu d'Infoasturies.

Fai! Asturies asoleya nel so sitiu web la siguiente noticia, en referencia a la so asistencia al manifestamientu del arguyo gai:

Col Arguyu LGTB, 40 años dempués de Stonewall

Fai! acudió a la marcha convocada por Xente Gai Astur el 27 de xunu pa reivindicar la llucha del coleutivu LGTB. Nesta data remémbrense los fechos d'hai 40 años cuando nel pub Stonewall de Nueva York la policía fexo una más de les avezaes redaes d'acosu al coleutivu que retrucó a la represión con una revuelta en llucha pola llibertá sexual qu'inda sigui anguaño. Ufrimos un vidiu y delles semeyes de la manifestación de Xixón. ¡Asturies namás sedrá llibre si desaniciamos toles fobies!

Dende Fai! creemos qu'esta llucha ye tan propia y prioritaria como cualisquier otra de les que desendolquen los movimientos sociales y tamos dispuestos y dispuestes a siguir dando la cara por un presente y un futuru d'igualdá, non discriminación y normalización del coleutivu LGTB, por muncho que manque a les capes más retrógrades ya inmovilistes de la sociedá.

Pa finar, ufrir tol nuestru sofitu a la causa que defende XEGA, que tamién ye la nuesa, la de los y les que queremos una Asturies llibre: de muyeres y homes llibres de prexuicios nel campu sexual y afectivu.

¡PUXA'L 28 DE XUNU!

¡PUXA LA LLUCHA DEL COLEUTIVU LGTB!


Amás escolinguen un vidiu del actu: http://www.youtube.com/watch?v=F3AOSYBiy-o

Atopaos un millón de sellos incautaos al Conseyu Soberanu

Más d'un millón de sellos del Conseyu d'Asturies y Lleón, soberanu dende'l 25 d'agostu de 1937, foron inventariaos nel "Centro Documental de la Memoria Histórica" de Salamanca, según informó el Ministeriu español de Cultura. El conxunu filetélicu tien un gran valor y calsifióse en 19 tipos de sellos con motivos diversos.

El Centru Documental conserva una gran coleición de sellos procedentes de les incautaciones feches pol exércitu franquista, la mayor parte d'ellos son emitíos pol Conseyu d'Asturies y Lleón o Conseyu Soberanu d'Asturies y Lleón. Los exemplares foron incautaos ente ochobre y payares de 1937, na Conseyería de Facienda del Conseyu Soberanu polos equipos qu'actuaron en Xixón tres la ocupación de la ciudá poles fuerces del exércitu franquista.

Los sellos taben dende 1987ensin inventariar nun armariu precintáu pol valor del conxuntu filatélicu, hasta que en xineru de 2008 un investigador solicitó conocelos polo que se solicitó autorización pa quitar el precintu. Concedida l'autorización pertinente, ante notariu, abrióse l'armariu y entamó'l llabor d'ordenación, descripción y reinstalción más fayaiza de la coleición.

Revisada, clasificóse en 19 tipos de sellos -aprosimadamente 1.100.000 unidaes- en función de los motivos, lleendes, tintada y el valor facial y sobrecargu. Los motivos de los sellos son diversos: ún d'ellos presenta na mitad superior un barcu pesqueru navegando haza la izquierda y rede, y la mitá inferior a un agricultor arando con dos gües, aludiendo a la dualidá campu-costa del territoriu. Otru grupu de sellos presenta na mitá superior una carabela navegando haza la derecha ente dos palmeres, y na mitá inferior figura una plantación de tabacu. Otros temes qu'apaecen son el yunque, la paleta y pinceles de pintor, el farol, el símbolu de Mercuriu y espigas, dalguna inclúi proclames polítiques antifacistes

Contra'l zarru d'Albo en Candás

El centru de Candás vivió ayeri al mediu día una manifestación de los y les trabayadores de la fábrica d'Albo, a la que se xunieron unos 300 vecinos y vecines en solidaridá según recueye asturiasverde.com.

La empresa de conserves ye la última que queda en Candás, llocalidá que na primer mitá del sieglu XX foi la capital de la industria conservera d' Asturies. Los y les trabayadores anunciaron que van lluchar pa que nun se pieslle una industria que nun sólo xenera un bon númeru de puestos de trabayu sino que tamién ye parte de la hestoria y la esencia de Candás.

José Luis Rendueles gana’l XII Concursu de Cuentos pola Oficialidá del Asturianu

Pablo Rodríguez y Xosé Lluis Campal, segundu y tercer premiu

José Luis Rendueles Antón foi'l ganador del Concursu de Cuentos pola Oficialidá del Asturianu, que convoca’l Conceyu Bimenes y qu’esti añu llegó a la so duodécima edición. El primer premiu, dotáu con 800 euros, foi pa la so obra “Atadures”. L’autor yá ganare esti mesmu concursu nel añu 1999.

El segundu premiu, dotáu con 500 euros, foi pal cuentu “La viesca de la nieve gris”, de Pablo Rodríguez Alonso, y Xosé Lluís Campal Fernández algamó’l tercer premiu, al que se-y apurren 350 euros, con “La pantasma’l pasáu”.

La entrega de premios va tener llugar na Casa la Cultura de Santuyano, de magar les 19’45 hores, el prósimu vienres, día 3. L’actu, nel que se fadrá llectura pública del cuentu ganador y que cuntará cola presencia de José Emilio González Aller, Alcalde de Bimenes, finará cola actuación del monologuista Carlos Alba, que representará la so obra “La matazuga”.

Güelpe d'Estáu n'Hondures

Secuestru del presidente d'Hondures y los embaxadores de Venezuela, Cuba y Nicaragua.

El presidente d'Hondures, Manuel Zelaya, alcuéntrase en Costa Rica, como ratificó per teléfonu a teleSUR. "La Fuerza Armada traicionóme" denunció. Según el so propiu testimoñu pela mañana d'esti domingu homes armaos entraron en so casa y col usu de la fuercia sacáronlu del país. "Toi en San José de Costa Rica, fui víctima d'un secuestru de dalgún grupu de militares hondureños. Nun creo que l'Exércitu te sofitando esta aición", dijo n'esclusiva a teleSUR.

Zelaya cree que esto "foi un complot d'una élite mui voraz, una élite que lo único que ta deseando ye caltener al país aislláu y con un extrem de probreza". El presidente secuestráu esti domingu dixo que "la cúpula de les FF.AA. triciónome, ultraxáronme, invadieron mio casa ésta mañana. Amenazaron con disparame, ye un secuestru brutal contra la mio persona, ensin nenguna xustificación".

Sobre'l so secuestru dixo "Xubiérome a un vehículu, lleváronme a la base aérea, xubiéronme a un avión". Zelaya eclarió que nun pdió nengún asilu en Costa Rica, "ye un secuestru" sentenció. Pesie al güelpe d'Estáu perpetráu contra elli Zelaya afirmó a a teleSUR que a dir "a Managua como presidente d'Hondures, el mio periodu fina en 2010" y mientres sigue siendo'l "presidente electu dende cualaquier llugar del mundu".

Tamién foi secuestrada la canciller d'Hondures, Patricia Rodas, nesta acción tamién foron capturados los embaxadores de Cuba, Venezuela y Nicaragua quienes tras ser golpiaos foron dexaos en llibertá. Pela so parte Rodas foi llevada a la base aérea de Tegucigalpa. L'embaxador de Venezuela n'Hondures Armando Laguna confirmó er teléfonu a teleSUR que foron secuestraos y golpiaos por integrantes de les Fuerces Armaes encapuchaos y armaos.

Rempuesta Popular

Frente a la casa presidencial entamaron a concentrase xente pa reclamar la presencia del Presidente de la República Manuel Zelaya. Según el director de l'Axencia Bolivariana (ABN), Freddy Fernández, quien s'alcuentra n'Hondures con motivu de la consulta democrática que s'efectuaría esti domingu.

“La organización popular ta concetrándose frente a la Casa Presidencial. Na ciudá vense columnes de fumo en dalgunos puntos, lo que demuestra la protesta de la xente por esta aición. Hai helicóteros sobrevolando la ciudá y fuerte presencia de militares con arma de guerra na casa presidencial”, detalló Fernández.

Fernández informó tamién que pel momentu tolos canales privaos de televisión y les emisores de radio, quitando los que tan col güelpe d'Estáu “sacáronlos del aire” y que nun hai nenún mediu qu'informando sobre lo que pasa na república centroamericana.