Concentración de la CSI escontra la reforma llaboral

La Corriente Sindical d’Izquierda convoca una concentración pública escontra la Reforma LLaboral que’l Gobiernu ta apautando anguañu coles organizaciones empresariales y los sindicatos CCOO y UXT.



Esta concentración va tener llugar el prósimu vienres 29 de xineru, n’El Parche (plaza l’Ayuntamientu) d’Avilés, entamando a les 19:00 hores. Pa la C.S.I., esta nueva Reforma Llaboral "apareya otra vuelta de tuerca más na estratexa de facer pagar a los y les trabayadores los costes d’una crisis de la que nun son culpables y que namás se debe a l’avaricia y la irresponsabilidá de la patronal y a la pasividá’l Gobiernu, CCOO y UXT ante los sos desmanes".

El despidu de baldre, l’allargamientu la edá xubilación, la reforma y amenorgamientu les pensiones, abaratar y facilitar entá más los Espedientes de Regulación d’Emplegu, nuevos contratos basura o rebaxar les cotizaciones empresariales a la Seguranza Social, son dalgunes de les custiones que se tan negociando y que 'van suponer más precariedá llaboral y peores condiciones de vida y trabayu pal conxuntu los y les trabayadores. A la fin, un nuevu ataque a los drechos de la clas obrera, cola complicidá activa de los dirixentes de CCOO y UXT' esplica'l sindicatu asturianu.

Según CSI, la patronal quier más beneficios, el Gobiernu necesita “paz social” y los sindicatos mayoritarios precisen subsistir, precisen financiación pa continuar coles sos estructures, los sos lliberaos y los sos privilexos. 'Asina, too apunta a un alcuerdu ente ellos que van pagar los y les trabayadores con más paru, más desigualdaes sociales, más probitú y más represión' camienta'l sindicatu.

Ante too ello, dende la CSI vese necesario que la clas obrera atope 'la so fuercia comu coleutivu, tornando´l llugar de trabayu nel escenariu de la llucha social y faciendo un sindicalismo alternativu que-y ponga frenu a esta nueva agresión'.

Noticia d'Infoasturies

Darréu entama una concentración escontra la parada militar en Sieru esti vienres, y ufierta un espaciu xunitariu a otros coleutivos.

Darréu escontra’l paséu de les fuercies d’ocupación en La Pola Sieru

La organización revolucionario ya independentista Darréu quier amosar la so refuga al desfile militar que l’exércitu español fadrá esti prósimu 29 de xineru en La Pola Sieru. La parada militar del Reximientu Príncipe vien d’una moción del Partido Popular sofitada pol PSOE. Asina l’equipu de gobiernu de La Pola Sieru pidió’l desfile a Cabo Noval y nel acuartelamientu aceptaron dafechu.
El paseín de les tropes españoles sedrá pela Cai Alcalde Parrondo, perimportante via de La Pola, y cerca de la Plaza Cubierta. La finalidá pal ayuntamientu de Sieru ye rindir homenaxe a los 154 militares que fueron en supuesta misión de “ paz “ al Líbano y vindicar el papel de cabo Noval.
Dende Darréu queremos amosar la nuesa refuga a esta Parada Militar en La Pola Sieru, asina como cualesquier otra manifestación militarista n’Asturies. Caltenemos que l’equipu de gobiernu entama esti circu públicu con otros fines a los que dixeron. En primer llugar, l’equipu de gobiernu ufierta a les tropes d’ocupación salir a la cai p’asina face-y la publicidá a l’exércitu español de mena masiva y descarada. Ye una verdá que munchos mozos y moces n’Asturies acaben metiéndose nel exércitu por que nun atopen dengún trabayu y ye la única mena de nun emigrar del país. Con esti ensalzamientu militar l’ayuntamientu polesu quier tapecer la realidá de la emigración forciada y ufiertar una opción que resulta ideal pa los partíos PPSOE, como ye que la mocedá entre a formar parte del exércitu español, una mena de desmovilizar a los mozos y moces ya incluso como ye vezu ideoloxizar a estxs manipulándolos. Esta mena de desmovilización conviértese nun importante sofitu a l’españolismu n’Asturies y trata de llantar na sociedá un modelu violentu, autoritariu y españolista. Ye bien sabíu los roles de les fuercies armaes españoles pa colos sos integrantes realizando una fuerte aición d’adoctrinamientu dientro la xera diaria, lo que nun resulta estrañu si tenemos en cuenta qu’enxamás se depuraron a los altos cargos y oficiales que ya taben na direición del exércitu en vida del dictador Francisco Franco.
Darréu tamién quier denunciar que l’exércitu facista español nun solo invade países alloñaos como Afganistán, los Balcanes o’l propiu Líbano, tamién cumple la so función de fuercia d’ocupación na nuesa nación. Ye l’exércitu español, el cual tien como finalidá defender los intereses del réxime capitalista baxo’l que vivimos y perenriba de tou defender a ultranza( a sangre y fueu) la unidá de la “nación” española. La mesma constitución española, de calter neofranquista, da-y a l’exércitu español la responsabilidá de garantizar esta unidá, asina como los porgüeyos de la corona borbónica. D’otra miente nun queremos escaecer que clas de xente ta metía nel exércitu, yá que ye evidente la fuerte presencia d’elementos d’estrema drecha y neonazis nes sos files, nun hai falta recordar que’l caberu muertu antifacista nel estáu español, como tantos otros y otres, morrió a manes d’un neonazi que yera militar de profesión.
Tamién queremos denunciar l’altu gastu públicu que supondrá esta amuesa d’españolismu y autoritarismu yá que como siempres sedremos toes y tolos que paguemos tol montaxe y tol adornu “patriota” d’esti tipu de manifestaciones qu’además suel zarrase con un convite pa les “autoridades”. Camentamos amás que’l desfile camudará enforma esi vienres la vida polesa y munches cais veránse cortaes y el mal tráficu sedrá un esmolecimientu más pa los habitantes del conceyu, sobremanera palxs trabayadores. Esti tipu d’actos yá tuvieron llugar en La Pola nel añu 1996 y l’añu 1998, dando munchos problemes ente la población.
Asina, pidimos a la población asturiano y polesa qu’esprese la so indignación y el so refugu, sobremanera a la mocedá, nes cais de Sieru demientres trescurra l’actu en La Pola y qu’avérense a la concentración que dende Darréu vamos a entamar nel mesmu desfile faciendo una voz discordante con ellí y tratando de refugar esti actu español n’Asturies. Asina, tamién queremos convidar a qu’otres organizaciones antimilitaristes, independentistes o d’izquierdes convoquen la so concentración de mena llibre y conviértase tou nuna concentración conxunta ente distintes fuercies que nun ven normal esti despropósitu militarista. Llamamos a la xente a movilizase nes casi de Sieru esti prósimu 29 de xineru escontra la parada militar d’estos ellementos autoritarios militares.

¡Nin Cabo Noval, nin fuercies d’ocupación nel nuesu país!
¡Puxa Asturies llibre y socialista!

Falta por comfirmar la hora a la que realizarase la parada militar y el sitiu xustu pa la concentración.

Represión na charra d'UPyD nel 'Club de Prensa Asturiana' de 'La Nueva España'

Una militante d'Andecha Astur foi detenida por querer facé-y una entruga a Rosa Díez nun actu públicu na sede del periódicu más vendíu n'Asturies.

La muyer asisitió como públicu al actu públicu que se cellebraba nel Club de Prensa Asturiana del diariu La Nueva España n'Uviéu y por llevantar el brazu pa facer una entruga a la llider del partíu ultraespañolista 'Unión, Progreso y Democracia', Rosa Díez, nel turnu d'entrugues. Nesi intre, ensin tiempu siquiera pa poder entrugar, dos miembros de les fuercies y cuerpos de seguridá del Estáu, 'de paisanu', sacáronla pola fuercia de la sala ensin que naide tratare d'impedir la aición represiva y antidemocrática y ensin que los reporteros y/o periodistes presentes recoyeren la información nes sos cróniques.

Según la versión policial, la militante independentista negóse a ser identificada depués de que la sacaren de sópitu y pola fuercia del 'Club de Prensa Asturiana', dalgo falso dafechu según la represaliada, que foi treslladada a comisaría onde pasó más de dos hores retenía ensin más motivu que'l de querer facé-y una entruga a mediática Rosa Díez, que, por ciertu, pese a ser una autodeclarada 'demócrata' nin siquiera entrugó por que dos individuos 'anónimos' sacaben pola fuercia a una persona de la sala, ensin dengún motivu.

Depués de tar en dependencies xudiciales munchu más tiempu del necesariu pa facer una identificación, la ciudadana asturiana foi puesta en llibertá , obviamente ensin cargu nengún, y foi a un centru mélicu pa que-y ficieren un parte de mancadures y güei va poner una denuncia en Xulgáu dada la gravedá de los fechos y el so calter represivu y de torga de llibertaes fundamentales.

Nun podemos dexar de facenos delles entrugues: ¿Ye delitu pidir la pallabra pa facé-y una entruga a Rosa Díez nun actu públicu? ¿Por qué la policia secreta decide secuestrar a una ciudadana asturiana por llevantar el brazu? ¿Qué interés tien la policía española en que naide-y pueda facer denuguna entruga quiciaves molesta a la cabezalera d'un partíu ultra como UPyD? Sía como fuere, los fechos tán ehí pa vergüenza de la Delegación del Gobiernu n'Asturies.

Sofitu denuncia la detención d'una militante nacionalista asturiana nun actu de Rosa Díez

Na tarde d'esti xueves 21 de febreru, foi detenida una hestórica militante independentista asturiana nel trescursu d'un actu políticu entamáu nel Club de Prensa d'Uviéu pol partíu de la drecha ultranacionalista española, UPyD, nel que participaba la so cabezalera Rosa Díaz.
Los fechos asocedieron cuando la militante asturiana llevanto la mano pa poder facer una entruga, nesi intre dos miembros de la seguridá de la diputada, dambos pertenecientes a la policía española, tiráronse a por la muyer sacándola a la fuercia del salón y metiéndola nun furgón policial que la treslladó a la comisaría d'Uvieu.
Tres facer los trámites policiales y d'identificación, foi puesta en llibertá a última hora de la tarde. Anguaño tase a l'aspera de conocer les mancaures que-y pudieron facer y si se presentarán denuncies escontra los miembros de la escolta de Rosa Díaz.
Dende SOFITU quier amuesase la solidaridá pa con esta militante y denunciar de pasu esti nuevu casu de represión, onde, una vegada más, l'únicu supuestu delitu ye intentar entrugar y dar la nuesa opinión. Ta visto que pal facismu español ye bien poco afayaizo tolo que nun suene a nacionalismu y a imposición españolista, y d'esto saben mui muncho nel partíu UPyD, que cunta nes sos files con un bon númberu de los personaxes más riacionarios del estáu, amás de munchos miembros de les fuercies represores españoles.
Y como nun podía ser d'otra mena, la televisión del PSOE n'Asturies, TPA, censuró dafechu estos fechos na so noticia del actu, y ye qu'oficialmente n'Asturies nun hai dengún conflictu. Yá sabemos.

Gabino l'actor...

L’alcalde d’Uviéu representó una escena de ‘La verberna de la Paloma’ na presentación del XVII Festival Llíricu d’Uviéu

Gabino con Michael Jackson

Gabino De Lorenzo, alcalde d’Uviéu, volvió a demostrar ayeri que tien más de ‘showman’ que de políticu tres representar una escena de la zarzuela ‘La verbena de la Paloma’ na presentación del XVII Festival Llíricu d’Uviéu que va acoyer el Teatru Campoamor a partir de febreru. El rexidor, que tuvo acompañáu de los actores Arturo Fernández y Luis López Varela, mui popular tres el so pasu pola serie d’humor ‘Camera Café’, apaeció nel Campoamor antroxáu de Don Hilarión –boticariu y vieyu verde na obra y ún de los protagonistes d’esta zarzuela– , con sombreru de copa, bufanda blanca y dos moces del brazu vestíes de ‘chulapas’.

L’actuación de De Lorenzo foi curtia, pero nun dexó indiferentes a los presentes. “Hoy no ligáis”, avisó a Fernández y Varela, pa depués entonar “una morena y una rubia, hijas del pueblo de Madrí”. Ehí finó l’espectáculu y principió la presentación del Festival, nel que tamién participó José Suárez Arias-Cachero, ‘Felechosa’, como conceyal de Cultural del Conceyu d’Uviéu.

La inversión municipal nesti certame de zarzuela ye de 1,4 millones d’euros. La primer obra en representase nesta decimosétima edición va ser ‘Los sobrinos del capitán Grant’, el 16 de febreru, zarzuela que va contar con cinco representaciones sobre les tables del Campoamor.

Fonte: Infoasturies.

La TPA despide a un trabayador fixu

El Comité d’Empresa de la TPA y l’asamblea de trabayadores del medíu de comunicación alcordaron dar anicíu a una serie d’actos de protesta pa demandar la readmisión d’un emplegáu que foi despedíu y tán estudiando la posibilidá de convocar una fuelga sinon se reincorpora’l so trabayu.

L’expediente foi abiertu dempúes de celebrase unes elecciones sindicales onde’l trabayador representaba a una candidatura.

Pal Cómite "la empresa utilizó’l códigu sancionador de manera interesada y desproporcionada" pa despedir al trabayador, cuando’l mesmo códigu recueye la progresión de sanciones, enantes de la toma de medies drástiques. amás, el comité sorrayó que los problemes nel departamentu del despedíu vienen "d’una mala xestión que vien de lloñe".

Fonte: Aruelu.

Sofitu denuncia amenaces de muerte a una moza indepedendentista en Mieres

Dende Sofitu quier denunciase en público los fechos asocedíos fai unos díes nun chigre de Mieres onde una moza independentista sofrió amenaces de muerte d’un supuestu futuru policía español. Ensin conocelu de nada, y avisando que dientro poco sedrá maderu, esti mozu entama una discursión por mor de la ideoloxía dixebriega d’ella, qu’intenta cortar l’asuntu diciendo que nun fala con policíes. Asina y too, elli caltién el so tonu, y ente otres coses diz-y, que tien un hermanu guardia civil español n’Euskadi, y que como-y pase daqué que va dir por ella y pega-y dos tiros porque dientru tres meses tendrá pistola.

Darréu pasar too esto, la moza avérase a denunciar los fechos a la comisaría de la policía española en Mieres, onde l’encargáu de tramitar la denuncia diz que nesi intre nun disponen de dengún coche patrulla disponible pa dir a esi chigre a detener al supuestu autor de les menacies, polo qu’entá se ta a l’aspera de que lu identifiquen y lu detengan, o polo menos lu citen pa facer dilixencies. Esti ye un casu más del facismu policial y parapolicial que l’independentismu asturianu ta careciendo namás pol fechu de nun combayar col pensamientu únicu español que mos quieren obligar a tener. Sofitu ta trabayando yá, tanto política como xudicialmente pa qu’esti nuevu casu nun quede pa práu, magar que sabemos del corporativismu ente los facistes españoles uniformaos.

Otru parque eólicu más p'Ayande

Ye ún de los 88 parques previstos nel occidente del país.

La Coordinadora Ecoloxista d’Asturies personóse nel trámite de suxerencies del Parque eólicu de Corondeño nel conceyu d'Allande onde quieren poner 8 molinos de 2 Mw de 78 metros d'altura y 80 metros de rotor. La Corrdinadora recuerda que nel conceyu ya ta funcionando unu con 59 molinos, ta en construcción el de Carondio con 25 molinos y hai otru en trámite amás d'esti de Corondeño.


La Coordinadora nun se cansa de recordar qu'Asturies ye "escedentaria na producción elléctrica", pese a tener el mayor consumu elléctricu por habitante del estáu. La organización ecoloxista asturiana alvierte qu'estos parques "previstos toos pal occidente", améstense "a las 9 térmiques de gas previstes y a les térmiques que yá tenemos en funcionamientu, lo que nos va facer inda más escedentarios contra los criterios de llóxica enerxética".

Fonte: Infoasturies.

Fai! agradez les espresiones d'encontu énte la censura en Llanera a la cellebración d'una Asamblea y fina dos murales nel conceyu

Noticia estrayía de la so páxina web.


La organización d'esquierda soberanista quier facer llegar el so agradecimientu más fondu a la riestra de ciudadanos de Llanera, conceyales, asociaciones vecinales y de toa triba qu'amosaron la so solidariedá activa pa con Fai! tres de l'anulación per parte de l'Alcalde y la Conceyala de Cultura y Muyer d'una asamblea abierta en Posada. Al tiempu, Fai! fizo dos murales nel conceyu, siguiendo cola so actividá en Llanera.
Tres de la censura que'l conceyu de Llanera, gobernáu pol PP, fizo a la cellebración d'una asamblea abierta na Casa la Cultura, Fai! recibió un bon númberu d'amueses de sofitu de toa mena que van dende'l movimientu vecinal, cola Asociación de Vecinos d'Agüera, pasando pel conceyal d'IU na oposición, que vien de facer una entruga en plenu sobre esti incidente, a la que l'Alcalde retrucó que "la sala taba ocupada esi día" y de ser, posteriormente cesáu del so puestu na Xunta de Gobiernu por amosar l'estáu d'incapacidá del dirixente de la corporación pa llevar alantre'l plenu, asina como de munchos vecinos y vecines a títulu individual.

De la mesma manera, la noticia de la cancelación forzosa, n'actitú antidemocrática, poniendo pilancos a la presentación n'asturianu y posteriormente denegándola supuestamente por tener una temática que molesta a la corporación popular, llegó a organizaciones como UNA-Mocedá, qu'amosaron públicamente un comunicáu de refuga a lo fecho pol Ayuntamientu y d'apoyu a Fai! qu'agradecemos fondamente y que tamién se repitió a nivel personal per parte d'otres persones vinculaes a la esquierda asturiana.

D'igual mena, nun podemos dar más que bones pallabres no que cinca al Conseyu de la Mocedá del Principáu, que vien de pidir una desplicación al conceyu de Llanera y a la so conceyala énte la denuncia pública fecha por una entidá miembru del CMPA y l'esmolecimientu que xeneró esta per parte del so presidente Paulino Feito.

Pa finar, sorrayar tamién l'interés que per parte del Aconceyamientu de Xuristes pol Asturianu no que cinca a la discriminación llingüística y la so predisposición permanente pa denunciar públicamente cualquier represión, mesmo a coleutivos qu'a particulares.

Arriendes d'ello, la militancia de Fai! nel conceyu desafió el clima d'intolerancia y totalitarismu rematando los dos murales vindicativos que vinía reclamando selmanes atrás y que podéis ver de siguío, destacando el llema: "Faciendo Asturies dende Llanera".

Per último, Fai! anuncia que va siguir trabayando pola defensa de los espacios públicos en Llanera, cafie a quien cafie, y pola necesidá d'ufrir soluciones dende postures d'esquierda y soberanistes a los problemes del conceyu.

Tratu "indignu" a un ciudadanu de Xixón por usar l'asturianu

Xuristes pol Asturianu vien de denunciar un casu de discriminación llingüística en Xixón, onde un ciudadanu nun pudo usar l’asturianu y recibió un tratu “indignu” por facer usu d’esti idioma na alministración local. Xuristes pide-y a l’Alcaldesa de Xixón que “corte pela freba cola discriminación llingüística”.

Los fechos sucedieron el 28 d’avientu, cuando un ciudadanu de Xixón foi a notificar un cambéu de vivienda, solicitando un impresu redactáu n’asturianu. Sicasí, nun disponíen d’impresos más qu’en castellán, qu’amás, según informa Xuristes, emplegaben namás que’l topónimu “Gijón”.

L’Aconceyamientu esplica que cuando’l ciudadanu presentó’l documentu a la ciudadana que lu atendió, ésta “españó a rir” tres lleer que nel impresu figuraben les pallabres fíu ya Inaciu, “pasando de la risa a aneciar en correxir Inaciu por Ignacio, magar que nel DNI que se-y amosó figuraba’l nome d’Inaciu como propiu del so fíu”, señalen.

Según Xuristes, tuvo qu’intervenir la superior xerárquica de la funcionaria pa finar colos “malos modales y les burlles y permitir que’l ciudadanu pudiere presentar la comunicación de cambéu de vivienda”.

Pa l’asociación, l’Ayuntamientu vulnera tres drechos del ciudadanu xixonés; El so derechu a empobinase n’asturianu a l’Alministración municipal, reconocíu nel artículu 4 de la Llei 1/1998y nos artículos 3y 4 de la Ordenanza Municipal d’Usu del Asturianu, “porque difícilmente un ciudadanu va poder exercer el so derechu si los impresos d’usu obligatoriu tan escritos en castellán”.

Tamién el so drechu a que l’Alministración Municipal cumpla les normes llegales na so actuación, nesti casu'l Decretu 105/2006, pol que se determinen los topónimos oficiales del conceyu, “siendo’l de la capital el de Gijón/Xixón, que non Gijón”.

Al empar que’l so derechu a recibir un tratu dignu nel intre de facer un trámite dientro d’una oficina municipal “que ye pal funcionariu un deber qu’apareya falta grave’l so incumplimientu”.

Poro, Xuristes encamiénta-y a l’Alcaldesa que dea les instrucciones afayadices pa “cortar pela freba colos despropósitos burocráticos denunciaos pente medies d’ordenar la impresión billingüe de los impresos normalizaos .y controlar qu’en toles dependencies alministratives s’empleguen los topónimos llegalmente establecíos.

Del mesmu mou, “abrir espediente informativu pa comprobar el tratu desconsideráu pa col ciudadanu comunicante al que tien de siguir l’adopción de les midíes oportunes pa que fechos d’esta triba nun se repitan”, sentencien.

Dos firios graves díes dempués del primer muertu nel tayu nel pais.

Ayeri, martes 12 de xineru dos homes resultaron firíos de gravedá a consecuencia de dellos accidentes llaborales. Los fechos asocedieron nos conceyos d'Ibias y Llanera. Afortunadamente la vida de los trabayadores nun paez cuerrer pelligru esta vegada. los homes teníen 29 y 39 años.

L'home firío n'Ibias trabayaba nuna esplotación minera en Tormaleo y paez que foi atropelláu por una vagoneta. Los fechos fueron alredor de les 10 de la mañana, minutos dempués asocedió'l segundu accidente llaboral de la xornada, esta vegada en Llanera, cuando a un mozu cayo-y enriba un montacargues col que trabayaba. Estes dos noticies son alpenes díes dempués de la muerte d'un trabayador n'Aboño.

L'Alcalde y la Conceyala de Cultura de Llanera censuren y torguen un actu de Fai!

Noticia estrayía de la páxina web de la organización soberanista:


L'asamblea que Fai! tinía convocada pa esti vienres 8 de xineru na Casa la Cultura de Posada (Llanera) nun pudo cellebrase arriendes de la so cancelación unillateral y ún día enantes de la so cellebración per parte del Alcalde y la conceyala de cultura. L'anulación del permisu, que fuere concedíu con tolos pilancos por qu'esti se ficiere usando la llingua asturiana, llegó a 24 hores de la cellebración de l'asamblea, que yá llevaba díes publicitada y anunciada al traviés de cartelería, distribuciones de correos y contautos personales ente xente del conceyu.

Cronoloxía de los fechos:

29 d'avientu:

-Miembros acreditaos de Fai! nel conceyu entreguen na Casa'l Conceyu la solicitú pa la confección d'un mural y un llugar pa cellebrar l'asamblea na Casa la Cultura o Casa de la Mocedá de Posada.

-L'alministración ínstalos a dir a la Casa la Cultura y entrugar si ellí hai sitiu disponible pa esi día y hora, lo que se confirma ensin problema per parte del funcionariu encargáu, qu'avisa a un compañeru pa que'l día de l'asamblea se permita l'usu d'un proyector.

- Na vuelta a la Casa'l Conceyu, confírmase-yos a los funcionarios la disponibilidá de la Casa la Cultura y entrégase la solicitú. Nesi intre espétase-yos a los militantes de Fai! que "l'asturianu nun ye cooficial y que quiciabis nun l'aceuten". Darréu d'esto, p'asegurase consulten telefónicamente y dicen que sí, que nun hai problema. Queda afitáu l'actu, diséñase un cartelu que s'esparde pelos núcleos de población más importantes del conceyu y fáise una convocatoria pública, na que s'avisa tamién al traviés d'una llista de corréu a xente del conceyu.

4 de xineru:

- Pónense en contautu con una militante de Fai! per teléfonu dende la Casa'l Conceyu pa espetar que "la solicitú nun pue tar n'asturianu" y qu'asina nun pue quedar. Oblígase a los organizadores, con una convocatoria na cai, a tornar l'escritu al castellán. Sicasí, los militantes de Fai! en Llanera entreguen una fueya billingüe, onde, na parte superior, ta l'escritu n'asturianu y, na inferior, en castellán.


7 de xineru

- Nueva llamada per parte de los funcionarios del conceyu, que telefónicamente comuniquen que la solicitú ta denegada. Inmediatamente y énte la gravedá de los fechos demándase-yos una contestación per escrito, que devuelven col siguiente testu manuscritu y qu'esclaria mui poco: "Habló Belén Concejala con el Alcalde. (se lo deniega). Se les avisó x teléfon. 7/01/10. (denegado).

- Al tiempu, avísase de que "va a llamavos la conceyala", xusto tres de dar un mensaxe contradictoriu del tipu "vete a vela a la Casa la Música agora" nel que la funcionaria se corrixe al "decatase de que ta de vacaciones -casualmente- esi día y el siguiente".

- Fáise otra petición pa que, teniendo en cuenta que l'actividá ta convocada y publicitada, s'ufra un sitiu alternativu y torna a repetise la solicitú pa mural. El pidimientu ta namás n'asturianu. Avísase de que "si nun se traduz nun va ser aceutáu", a lo que'l representante de Fai! se ñega.

- La conceyala, -que casualmente ruempe de sópitu, ente la gravedá de la crisis alministrativa xenerada, el so periodu de descansu vacacional y entra pela puerta de la Casa'l Conceyu- llama telefónicamente a los representantes de Fai! pa dicí-yos qu'aconceyaron "ella y l'alcalde" y que la solicitú ta "denegada". Diz entós, nuna clara postura censora, "qu'ellos tienen que tar informaos de lo que va facese nos sos llocales y que se-y tien que facer un escritu nel que se diga de qué se va falar, de qué va tratar l'asamblea y cómo va ser y qué va dicir el mural que se faiga".

- D'urxencia, y como última midida, Fai! entrega un nuevu escritu nel que se fala brevemente de los motivos polos que públicamente se va cellebrar l'Asamblea, asina como pa poné-y final con un mural qu'afale la participación y la implicación de la población de Llanera nes problemátiques del so conceyu. El testu ye entregáu y la téunica municipal informa de qu'ella, l'alcalde y la conceyala van aconceyar pa decidir finalmente.

- Pa finar, a les 14.30, trancando yá les dependencies públiques, confirmen la denegación de la solicitú per cuarta vegada consecutiva. Entrúguense les razones y nin siquiera s'aporten contestaciones per escrito, nin s'informa oralmente de les razones qu'impiden el derechu a la llibre reunión en dependencies públiques.


VALORACIÓN DE Fai!

- A la corporación del conceyu de Llanera, gobernáu por José Avelino Sánchez, y la so conceyala de "Cultura" y Muyer, María Belén Rodríguez López, del Partido Popular, molésta-yos que nes instalaciones públiques se desendolquen actividaes que "nun controlen".

- Esti tipu de fechos constata qué ye lo qu'entienden la inmensa mayoría de políticos por llibertá d'espresión, d'aconceyamientu, por usu de dependencies públiques, por non discriminación llingüística, por xestión eficaz, por tresparencia, por tratu dignu al ciudadanu, por "democracia": apartar pa otru llau lo que molesta, esbillar lo políticamente correuto y les actividaes que-yos interesen y que nun faigan rescamplar la so xestión asturianófoba y corrupta.

- Queda claro que determinaes ideoloxíes nun tan bien vistes por dicha corporación cuando se censura un actu que pretendía promover l’asociacionismu y l'autorganización nel conceyu, seguramente al decatase de que los principios de la nuesa organización nun tan mui averaos a los del partíu que gobierna.

- Con esto Fai! pide a tolos ciudadanos y especialmente a los vecinos de Llanera’l so sofitu pa poder articular a pesar de toles torgues un movimientu que saque a la lluz los verdaderos problemes del conceyu y los d’Asturies en xeneral.
Desiximos una vegada más una esplicación al alcalde de Llanera y a la conceyala de Cultura y Muyer de por qué se dexó en manes de la Casa de la Cultura la concesión del local pa celebrar l’asamblea pero depués se denegó dicha concesión ensin motivu dalu.

- Afirmámonos na necesidá de facer esti tipu d'actividaes trabayando dende les bases de los conceyos, dexando mui claro que naide nin nada va facer qu'arrenunciemos a da-y la palabra a la xente y al pueblu de Llanera. Fai! yá trabaya pa llograr una nueva convocatoria pa esti mesmu conceyu ensin inxerencies nin censures.

Democracia Nacional camuda'l so nome a Desesperación Nacional

Un responsable de Democracia Nacional n'Asturies presento a una muyer na so llista ensín el so consentimientu. Poro, pidese pena de carcele al personaxe en cuestión y una multa qu'asciende a 1.920 euros.

El so xuiciu va cellebrase esti prósimu xueves 14 de xineru n'Uviéu, nel xulgáu de lo penal. L'acusáu tien pal fiscal el perfil de cabezaleru políticu de Democracia Nacional y presentó'l 20 d'abril de 2007 una llista na Xunta Eleutoral de la so candidatura. Na candidatura metió dientru a la muyer denunciante. Esta mesma asegura nin conocer la candidatura neonazi nin consentir la so inclusión ellí.

Asina, al paecer l'acusáu simuló la robla de la muyer p'asina poder completar les llistes del partiu neonazi foriatu n'Asturies. Gracies a esa robla DN pudo presentase n'Asturies nesa cita eleutoral.
Hai que ver como'l so discursu grandón y de mases del cual quieren presumir contrastia cola cruda rialidá, na cual, aparte de pegar 4 pegadielles coles mesmes frases de siempres y acusar a la inmigración de tolos males, tienen qu'inventase o falsificar consentimientos pa presentase a les eleiciones. Esperemos que la sanción de la seya exemplar, anque pa que confiar na Santa Xusticia Españolina.

Esti nun ye'l primer casu nel que los cabezaleros de DN n'Asturies dan que falar pa mal, Raul Palaciu, representante númberu 1 n'Asturies del Partíu neonazi españól, el cual sal nesta semeya, foi deteníu fai unes selmanes por tar metíu nuna batalla campal en Xixón ente ultres del Sporting de Xixón y del Sevilla. Estos son los anxelinos y demócrates...

Nin un pasu atrás, DESESPERACIÓN SUNORMAL!

Un xoven de 32 años primer muertu n’accidente llaboral en 2010 n’Asturies

Un xoven de 32 años, natural de Tudela-Veguín, morrió esti fin de selmana nun accidente llaboral nuna cementera d’Aboño, conviertiéndose na primer victima mortal del añu n’Asturies. L’añu anterior rexistráronse 17 muertes nel trabayu, con una media de cuatro accidentes llaborales diarios.
Con malpenes diez díes d’entráu l’añu un accidente llaboral llevó la vida d’un xoven de 32 años que cayó d’una tolva de cementu d’unos vente metros d’altura cuando taba faciendo mediciones nella.

L’añu 2009 zarró n’Asturies con 17 muertos n’accidente llaboral, 8 menos qu’en 2008, y 111 ferios graves, rexistrándose alredor de 15.000 los incidentes rexistrables hasta finales de payares, con una media de cuatro accidente llaborales diarios. La construcción sigue siendo’l sector más castigáu onde se rexistraron 8 victimes mortales.

Fonte: Aruelu.

Una encuesta en 27 estaos asoleya un desencantu global col capitalismu

Una encuesta global de BBC World Service amuesa que la insatisfacción col capitalismu de llibre mercáu ta perestendíu, y asoleya namás un 11% de ciudadanos, en 27 estaos camienten que funciona bien y qu’una mayor regulación nun ye bona idega. Namás en dos estaos más d’una de cada cinco persones piensen que’l capitalismu funciona bien como ta según la encuesta: Estaos Xuníos (25%) y Pakistán (21%). La opinión más común ye que’l capitalismu de llibre mercáu tien problemes que puen iguase mediante la regulación y la reforma. Posición caltenida por una media del 51% de les más de 29.000 persones encuestaes por GlobeScan / PIPA. Un 23% considera que'l capitalismu ye fatalmente defectuosu, y necesítase un nuevu sistema económicu (un 43% en Francia, el 38% en México, el 35% en Brasil y 31% en Ucrania).

Nel estáu español un 56% de los encuestaos ve posible la solución al traviés de la regulación y la reforma. El porcentaxe de ciudadanos que ven necesariu un nuevu sistema económicu por ser el capitalismu falamente defectuosu ye del 29%.

En 15 de los 27 estaos la mayoría de los encuestaos naguen porque los gobiernos de los sos estaos seyan más activos tocantenes a la propiedá o control direutu de les principles industriades. Esti puntu vista ta particularmente estendíu n’Estaos de les antigües repúbliques sovietiques de Rusia (77%) y Ucrania (75%), pero tamién de Brasil (64%), Indonesia (65%) o Francia (57%). La propiedá o control directu de las industries pol estáu la mayor oposición concéntrase en EE.UU. (52%), Alemania (50%), Turquía (71%) y Filipinas (54%).

En 22 de los 27 estaos los ciudadanos quieren una distribución de la riqueza más equitativa nun promediu de dos de cada trés (67%) en tolos estaos. En 17 de los 27 estaos quieren que’l gobiernu haga más pa regular les empreses (56%). L’apoyu más baxu a a la redistribución de la riqueza de forma más igualitaria ye en Turquía (9%) . Ente los que nun sofiten un mayor control pal gobiernu nesti área son mayoría en India (60%), Pakistán (66%), Polonia (61 %) y los EE.XX. (59%).

La proporción de persones a favor de ver un gobiernu más activu na regulación de negocios son los más altos en dellos estaos como Brasil (87%), Chile (84%), Francia (76%), España (73%), China (71%) y Rusia (68%) . Namás en Turquía (71%) ye mayoría la opinión de regular menos. Tamién hai oposición alta en Filipinas (47% ), Pakistán (36%), Nigeria (32%) ya India (29%). Los llatinoamericanos tán particularmente entusiasmaos con un papel más activu pal gobiernu nel funcionamientu de la economía, con alredor de 9 de cada 10 que sofiten más redistribución de la riqueza en México (92%), Chile (91%) y Brasil (89%).

Destaca na encuesta que los ciudadanos d’Alemaña y Francia, pesie a compartir puntos de vista asemeyaos en muncho, tán en desalcuerdu cuando se trata de capitalismu de llibre mercáu. En Francia, el 47% cree que se puen iguar los problemes con reglamentación y reforma, mientres que causique la mesma proporción piensa que tien fallos fatales (43%). En Alemania, por embargu, el sofitu a un sistema económicu diferente ye perbaxu (8%), con casi trés de cada cuatro (74%) la sensación de que los problemes del capitalismu puen iguase con regulación y reforma.

La encuesta entrugó tamién, 20 años depués de la caida del muru de Berlín, si la desintegración de la Xunión Soviética foi bona o mala. Mientres qu’un promediu del 54% de los encuestaos dicen que foi bono, ye opinión mayoritaria namás en 15 de los estaos encuestaos. Una media del 22% diz que foi bono, mientres que’l 24% nun sabe. Ente los antiguos integrantes del Pactu de Varsovia, la mayoría de los rusos (61%) y ucranianos (54%) camienten que la desintegración de la Xunión Soviética foi malo pero, cuatro de cada cinco polacos (80%) y casi dos tercios de los checos ven la desintegración como bono (63%). Los europeos en xeneral ven la desintegración soviética como bono, con mayoríes grandes en Alemaña (79%), Reinu Xuníu (76%) y Francia (74%). Nos Estaos Xunión ye onde más xente ve bona (81%) la final de la Xunión de Repúbliques Socialistes Soviétiques. N’Australia (73%) y Canadá (73%) también son d’esta opinión. Fora del denomáu Occidente desendolcáu, el consensu ye munchu menos fuerte. 7 de cada 10 egipcios (69%) diz que la desintegración foi mala. Las opiniones tán dividies n’India, Kenia e Indonesia, con mucha xente indecisa.

Pal presidente de GlobeScan Doug Miller "Parez que la cayida del muru de Berlín en 1989 nun foi la victoria aplastante del capitalismu de llibre mercáu que paecía entoncienes - sobre too depués de los acontecimientos de los últimos 12 meses". Según Steven Kull de PIPA "dalgunes de las característiques del socialismu, tales como los esfuerzos del gobiernu pa igualar la riqueza, pídenles muches persones de tol mundo".

Los resultaos proceden d’una encuesta de 29.033 ciudadanos adultos de 27 estaos (Australia, Brasil, Canadá, Chile, China, Costa Rica, República Checa, Egipto, Francia, Alemania, India, Indonesia, Italia, Japón, Kenya, México, Nigeria, Pakistán, Panamá, Filipinas, Polonia, Rusia, España, Turquía, Ucrania, el Reino Unido y los Estados Unidos de América) que fueron entrevistadas cara a cara o por teléfonu. La encuesta foi fecha pa la BBC World Service pola firma internacional GlobeScan, xunta’l Programa sobre Actitúes Polítiques Internacionales (PIPA) de la Universidá de Maryland. GlobeScan coordinó’l trabayu de campu ente’l 19 de xunu y 13 d’ochobre de 2009.En 9 de los 27 estaos, la muestra lléndase a grandes zones urbanes. El marxe d’erru por estáu ta ente + / -2,2 a 3,5 por cientu, 19 veces de cada 20.


Fonte: Infoasturies.

Dios te llibre de Castiella.

Unes 44.000 persones manifiestense en Bilbo polos drechos de los presos políticos vascos.

Unes 44.000 persones salieron ayeri a les cais de Bilbo en defensa de los drechos básicos pa los presos de conciencia vascos. Los manifestantes denunciaron la estratexa represiva que caltién Rubalcaba y el tratu que se-y ta dando a los presos políticos, como nel casu del desapaecíu Jon Anza. Dende EA a la Esquierda Abertzale sofitaron la convocatoria d'Etxerat.

L'ablucante númberu de xente fizo que Madrí permitiera'l manifestamientu. Dende'l Gobiernu d'España tendrán que ver si quieren oyir a un gran sector de la sociedá vasca o van siguir dando democracia a los de siempres.

Investigaciones nueves sitúen en 40 los desapaecíos asturianos pola dictadura arxentina

L’Axencia Asturiana de Cooperación al Desarrollu alcontró, tres investigaciones nueves, 14 nomes d’asturianos o descendientes d’asturianos que foron secuestraos, torturaos o que desapaecieron nos tiempos de la dictadura militar arxentina, ente’l 24 de marzu del 1976 y el 10 d’avientu del 1983. Con estos nomes, el númberu total de asturianos afectaos polos crímenes de la dictadura, principalmente na etapa de Jorge Rafael Videla, asciende a 40.

José Carlos Alvarez González, María Cristina Bienposto Ventoso, Guillermo Carlos Boitano Brañas, Jorge Caravelos Alonso, Carlos Amador Fernández Aragona, Pablo Gustavo Rueda Calvo, Enrique Ramón Tapia Rodríguez, Felipe Arturo Urueña Alvarez, Emilio Etelvino Vega Gianfelici, Eduardo Villabrille Suárez, Roberto Indalecio Arnaldo Blanco, Gonzalo Abel Carranza García Muñiz, Rodolfo Abel Kremer y María Inés López Gómez son los 14 nomes nuevos a los qu’hai que sumar otros 26 que se conocieron nes primeres investigaciones, nel 2006. La collaboración cola Secretaría de Derechos Humanos de la República Arxentina foi lo que posibilitó dar con los datos d’estes persones, de les que nada más se supo na mayoría de los casos.

La dictadura arxentina finó con más de 300.000 afectaos, la mayoría activistes políticos y sindicales, anque munchos trabayadores nun se llibraron de los crímenes de Videla, Roberto Eduardo Viola, Leopoldo Fortunato Galtieri y Cristino Nicolaides, los presidentes de les cuatro xuntes militares que tuvo Arxentina ente’l 1976 y 1983.

Fonte: Infoasturies.

Andecha Astur y Darréu entamen les IX Xornaes de Formación

Esti prósimu sábadu 19 y domingu 20 d'avientu, AA y Darréu entamen unes xornaes de formación col llema " La Izquierda Asturiana del Sieglu XXI". Van desendolcase en Pintueles( Piloña). Nes xornaes habrá delles ponencies, alderiques y dellos talleres cola fin de meyorar la formación en cuantes a militancia.

Tantu n'Andecha como en Darréu caltienen una postura por tresformar la rialidá na que mos atopamos nacional y socialmente y quieren poner les bases de un movimientu asturianu d'esquierdes pal sieglu XXI. Les dos organizaciones anuncien amás qu'habrá más tiempu nel futuru pa entamar más xornaes asina col preséu d'entamar un movimientu d'esquierdes n'Asturies alcordie les necesidaes de güei día.

El " SI" a la independencia de Catalunya gana con el 95% de los votos

Catalunya torno a amosar el so interés n'algamar un estáu catalán llibre dafechu del español. La participación foi en tornu al 30 %, baxa pol so carauter d'allegal. Esti porcentaxe de participación punxo al si nel 95%, al non nel 3% y al votu en blancu nel 2 %.

La consulta popular taba convocada en 166 conceyos catalanes y la idega ye siguir con estes consultes n'otros conceyos del pais, pero amás, la iniciativa plantegase convocar un referemdum d'autodetermín pal prósimu abril de 2010.