Tini Areces " Naide se cree qu'Asturies ye España y lo demás tierra conquistada".

Vidiu de la selmana pasada, onde nuna conferencia del FORUM EUROPA nuesu GRAN presidente SOCIALISTA fala alredor del nacionalismu asturianu dexando dalgunes perles que comentar y analizar, anque p'analis fondu el que fai él del nacionalismu asturianu.

El vidiu entama cola risa de Tini yá a la primer entruga, debía ser que fartose a tortiella yá enantes de dir a la conferencia.

"Asturies es España y lo demás tierra conquistada, la frase nosotros la decimos pero nadie se lo cree jeje"

Pues non, naide se lo cree si tien dos deos de frente, pero tal paez qu'esa frase cuadonguista vos lleva dando décades de resultaos nes urnes. Por supuestu qu'Asturies nun ye España, nin lo demás tierra conquista, principalmente porque España nun esiste. Pero bono los políticos eso sabeislo de sobra.

"Nos llena de orgullo eso de decir: Asturias es España y lo demás tierra conquistada".

Enllenarate a ti d'arguyu Tini, porque lo que ye a los asturianos en la so mayor parte, o bien da-yos igual o bien da-yos vergoña. Fala por ti, nun fales en coleutivu, yá que nun yes naide pa falar en nome d'un pueblu que condergues al desaniciu. Y ye ciertu, nun mos llena d'arguyu, nun hai más que ver delles encuestes pa ver la identificación de lxs asturianxs con españa. A un asturianu una frase cola pallabra España le ye indiferente, nun enllena-y d'arguyu.

" Asturias es una región bellisima que tiene una imagen positiva(..)Asturias a pesar de sus problemas, de su conflictividad...lo cierto es que tiene una imagen positiva, y esa imagen positiva queremos conservarla".

Equí fala d'Asturies como rexón, cosa insultante pa ún de los primeros Estaos europeos independientes, con plantegamientos asina como p'algamar nel Estatutu la reconocencia de nación hestótica. Lo de la imaxen positiva tién razón, el día que'l pueblu asturianu garre concenxa de si mesmu camudará enforma la cosa y los caciques s'esmolecerán. Hasta entós tola razón pa Tinín.

" Yo trato de transmitir que además de la Asturias de la imagen positiva, de la naturaleza privilegiada, de esos espacios, de nuestra hospitalidad, de nuestra forma de ser(...) hay una Asturias innovadora, profunda, que se desconoce y que camina hacia el futuro...".

Tamién podríes tresmitir la imaxen de l'Asturies de los ERES, los 81.000 paraos, el Sama-Velilla, la regasificadora, la represión llingüistica, la emigración forciada de la mocedá, el desaniciu cultural y del padremuñu, la persecución policial...

" Asturias es una comunidad con una identidad profundisima, podriamos haber hecho de eso un arma reivindicativa, territorial, sin duda con plena legitimidad(...)pero no se ha hecho ¿ por que ? porque Asturias se siente profundamente integrada en España. Es una comunidad que reclama su identidad, la demuestra...porque tenemos una inmigración de hace más de dos siglos...porque en el mundo hemos sabido lo que ha sido ir a otros lugares y ser acogidos, y tener una visión amplia de la vida. Creo que nos ha ayudado mucho".

Si Tini, Asturies ye un país con una identidá fonda. De la que nun yeres un vividor de la política dibes a les manis pola llingua, debe ser que nun ye que pudieres o non facer un arma vindicativa d'eso, sinon qu'algamaste una vía rápida pa vivir a costa de tolxs asturianxs, vendiendote al PSOE. Ye lo que tien l'ambición.
Fales d'inmigración ¿ tú ? Pues controla lo que-y pasa a dalgunos manteros ya inmigrantes que tan siendo espulsaos n'Asturies y que recibieron agresiones nestos caberos años de la to policia. Por ciertu Areces, nada tien que ver qu'un país reclame los sos drechos coleutivos y la so personalidá con nun abrise a la inmigración. Los únicos xenofobos qu'hai n'Asturies sois vosotros, la FSA y demás enxendros políticos, xenofobos colos inmigrantes y por si nun ye pocu con tolo que güela a asturianu.

"El nacionalismo en Asturias tiene poco futuro"
Ye ceo pa xulgar eses pallabres, de momentu axela tú y dexa de reprimir a la mínima cualesquier actu independentista, que ye lo únicu que sabeis facer. Si vos esmolez sedrá por dalgo, y daqué de pensar vos darán eses pequeñes espresiones nacionalistes.

Discriminación llingüistica na Casa conceyu de Llanera

La conceyalía de Cultura y Muyer, de la popular Belén López, vien de torgar por segunda vez el drechu a poder facer usu de les istalaciones públiques a la organización soberanista Fai! por mandar les sollicitues en llingua asturiana. Pa denunciar esti fecho, Fai! va dar una rueda de prensa en Llanera güei a les 17 hores en Llugo Llanera.

Mañana miércoles 10 de febreru a les 17 hores nel local "Cafamilu" de les asociaciones vecinales del conceyu de Llanera (c/ Severo Ochoa de Llugo de Llanera) tendrá llugar una RUEDA DE PRENSA onde la organización d’izquierda soberanista "Fai!" va a denunciar la política de prohibición que per parte del Ayuntamientu de Llanera se vien aplicando al usu de les instalaciones públiques (Casa la Cultura, Casa la Mocedá), fechos que se repiten dende hai tiempu con tol movimientu asociativu del conceyu.


Belén López (PP), conceyala Cultura y MuyerPer segundu mes consecutivu esta organización vien pidiendo un espaciu pa facer una charra pública que vien siendo torgáu, de manera gravísima, pola "Conceyala de Cultura y Muyer" del Partido Popular Belén López. Ellí aportaráse a tolos presentes un pliegu con una cronoloxía de los fechos y con documentos onde la propia alministración con firma de la conceyala se niega a almitir les solicitúes por tar redactaes en llingua asturiana, negando la so presentación nel rexistru por nun tar "EN CASTELLANO", amás de l’actitú claramente antidemocrática que l’alcalde y la corporación municipal ta manteniendo.

Demientres l’actu darase anuncia de la convocatoria d’una movilización na cai pa esta selmana contra’l secuestru de les instalaciones públiques a los coleutivos de Llanera y contra la represión llingüística. Amás, comentaránse los apoyos que la organización ta teniendo d’otres instituciones, asociaciones y partíos qu’esta situación antidemocrática ta xenerando.


Fonte: Aruelu.

Campaña d'Hostelería de la Corriente Sindical d'Izquierda

La Estaya d’Hostelería de la Corriente Sindical d’Izquierda ta llevando alantre una campaña d’información a los y les trabayadores del seutor y de denuncia de la precariedá llaboral y pésimes condiciones de trabayu que carecen la gran mayoría d’estos y estes trabayadores. Pa la CSI, la patronal de la hostelería "impón unes condiciones llaborales inaceutables: xornaes llaborales interminables, abondes vegaes de 50 y 60 hores selmanales, la mayoría les hores estres nun son remuneraes, nun s’asegura a los y les trabayadores pola totalidá les hores trabayaes, los trabayos de fin de selmana realícense de vezu ensin contratu, cúntase namás que con un díi de descansu selmanal y la mayoría les vegaes los sueldos nun algamen los mil euros mensuales".

Pero’l braeru problema’l seutor, pa La Corriente, ye la falta ferramientes que garanticen el cumplimientu les normatives llegales que regulen la xera llaboral. Asina, el Conveniu Coleutivu caberu, vixente fasta’l 2011, "tórnase en papel moyáu porque incúmplese dafechu na gran mayoría les empreses".

A too ello hai d’amestar "les torgues coles que nos atopamos al denunciar les irregularidaes ya incumplimientos" delantre la Ispeición de Trabayu, que fai "casu omisu de cualisquier denuncia presentada, y, con esta actitú, permite, tolera y tórnase cómpliz de la situación d’inxusticia ya indefensión de la gran mayoría los y les trabayadores del seutor", denuncia el sindicatu asturianu.

Asina les coses, la CSI asoleyó un cartelu y un periódicu (“La Voz del Chigre”) que ta repartiendo en mano per tolos centros de trabayu de la comarca (bares, cafeteríes, hoteles, yaeso) y nos que s’informa a los y les trabayadores de los sos drechos, ufiertándo-yos sofitu xurídicu y sindical pa la igua de los sos conflictos y reivindicaciones llaborales.

Pa finar, la CSI va entamar al empar una campaña de denuncia delantre Ispeición de Trabayu, "de toes aquelles empreses hosteleres qu’incumplen la normativa llaboral vixente nel Conveniu Coleutivu y va pedir les responsabilidaes alministratives y xudiciales que procedan escontra Ispeición de Trabayu y Direición Xeneral de Trabayu si éstes persisten na so actitú de permisividá y tolerancia delantre los fraudes cometíos pola patronal de la hostelería", espliquen.

Fonte: infoasturies

Darréu presenta n'Uviéu " Ochobre'l 34: Memories d'un país".

La organización moza independentista presenta esti prósimu vienres 12 de febreru'l so documental autoxestionáu n'Uviéu. El documental asoleyose coincidiendo col DMR'09 y foi presentáu en dellos sitios hasta anguañu.

Esti vienres toca-yos n'Uviéu proyeutalo, na llibrería Paraxuga, a partir de les 20:30 hores. Dempués de la proyeición del documental Darréu entama una espicha en Paraxuga.

Ayeri garró'l cargu Roberto Colunga.

Ye'l primer diputáu que diz ser " nacionalista d'izquierdes".

El nuevu diputáu, perteneciente al Bloque por Asturies, secretariu xeneral d'esti mesmu tomó ayeri cargu del so escañu na Xunta Xeneral. Roberto Colunga pasa asina a ser el primer diputáu que diz ser nacionalista d'izquierda. Na toma de posesión xuró acatar la so responsabilidá como diputáu, la Constitución Española y l'Estatutu d'Autonomía. Fixolo n'asturianu.

El so trabayu d'enantes desendolcabase nel Conceyu de Xixón, como asesor de la oficina de la política llingüistica. El mesmu diz que tien un compromisu cola oficialidá hasta les últimes consecuencies. De momentu ayeri'l " faigo promesa" dexó ablucaos a los peridístes qu'averaronse a la toma de posesión, pocos acostumaos a sentir la llingua na Xunta.

Habrá que facer siguimientu, y val más nun tener denguna ilusión nun diputáu que ta integráu na Coalición IX-LV-BpA, pero hai que da-y tiempu y ver que papel desendolca nestos años que-y queden nel escañu, y a ver si ye un firme defensor de la oficialidá como dixo nel so día a los medios asturianistes y nacionalistes. Poco diz del Bloque por Asturies qu'Areces riase na cara del nacionalismu asturianu/independentismu cuando tan gobernando con el y autodenomense nacionalistes d'izquierdes. Paciencia. Y si llevamos la sorpresa dientru lo que cabe meyor.

Meyor solu, que mal acompangau.

El presidente de la española quier llevar al planu políticu la decisión soberana de la federación asturiana. "Ye como si Areces propunxera qu'Asturies se independizare d'España".

La Federación Asturiana de Bolos cellebró una asamblea xeneral estraordinaria, na que se trató como puntu del orde del día principal la separtación de la Federación Española de Bolos. La dixebra afitóse con 28 votos a favor, once en contra y cinco abstenciones. L'independizase xustificólo Desiderio Díaz, presidente de la Federación Asturiana de Bolos, esplicando que se trata de un organismu que «nun nos aporta nada económicamente y xenera un trabayu escesivo».

Según Díaz, agora «nun va pasar nada fuera lo normal», porque dende la federación asturiana se van tramitar namás llicencies asturianes "y tolos esfuerzos van dedicase a les ocho modalidaes que se xueguen n'Asturies». El siguiente pasu de la Federación Asturiana de Bolos va ser «dexar en suspensu» tol articuláu estatutariu que seya paralelu cola española.

Pela so parte el preseidente de la Federación Española de Bolos, José Luis Boto, calificó como «ridícula» la situación y declinó opinar «mientres nun se pronuncien el presidente del 'Principado' y el direutor xeneral de Deportes». Colo que pretender treslladar el problema al planu políticu valorando que la situación yera asemeyada a que «Álvarez Areces propunxera qu'Asturies s'independizare d'España».
La Federación cántabra tamién.

Nun va muncho, n'avientu de 2009. la Federación de Cantabria decidiere tamién, nuna asamblea similiar, separtase de la Federación Española. Noticia que recoyimos n'InfoAsturies.



Fonte: infoasturies

Casi 160.000 asturianos viven oficialmente n'otros territorios del Estáu

Según los datos del padrón municipal de 2009, más de 160.000 asturianos tan empadronaos n'Ayuntamientos d'otros territorios. N'Asturies la población más númberosa ye la Llionesa.

Colos datos últimos del Institutu estatal d'estadistica del 2009, hai cuasique 160.000 asturianos y asturianes que fixaron la so vivienda oficialmente fora del país. La mayoría, 42. 215 persones tán en Madrid; en Castiella y en Lleón viven más de 22.300. En Galiza son más de 17.300 los asturianos empadronaos, 15.000 en Cataluña y dalgo más de 11.000 los que tan nel País Valencianu. La colonia Asturiana n'Andalucía supera les 10.000 persones.

Hacia donde menos emigren los asturianos y asturianes son les ciudaes de Ceuta y Melilla, onde malpenes se superen los 300 asturianos empadronaos nos sos ayuntamientos. En concreto hai 169 en Ceuta y 162 en Melilla.

Por contra, ente la población d'otros territorios del estáu empadronada n'Asturies, la comunidá lleonesa ye la más numberosa. Unos 26.000 gallegos y gallegues tan empadronaos n'Asturies, dalgo más qu'asturianos en Galiza, la mayoría son de Lugo y los que menos d'Ourense. La población andaluza n'Asturies superó por primer vez la barrera de les 12.100 persones.

Sicasí, la cifra rial d'asturianos y asturianes que viven fuera d'Asturies ye mayor de la que dan les cifres oficiales del padrón yá que muncha población, sobre manera la más moza, caltienen el empadronamientu nos sos conceyos d'orixe pese a tar emigraos trabayando fuera.

Fonte: Infoasturies

Ayuda humanitaria p’Haití, militares p’Afganistán y espulsiones d’inmigrantes n’Asturies

El gobiernu español tien 21 misiones militares, lo que representa ún de los mayores despliegues dempués de la etapa colonial. La crisis pon en cuestión el sistema de pensiones pero non el gastu militar.

El vienres pasáu, 29 de xineru, desfilaron peles cais de La Pola Siero xóvenes militares acuartelaos en Cabo Noval, que van mandalos a Afganistán. Ente los 500 soldaos que van participar nesta misión hai inmigrantes allistaos nel exércitu español que, paradóxicamente, escaparon de conflictos armaos nos sos países d’orixe —alimentaos pol keynesianismu de guerra— o de "catástrofes humanitaries" y que l’Estáu español yá solo almite como carne de cañón, yá sía na zanxa o nel campu de batalla.


El reversu del discursu humanitarista alcuéntrase n’intervenciones militares, na espulsión d’inmigrantes n’Asturies (más de 40 persones mandaes a centros d’internamientu estatales nel mes de xineru) y na represión de quien denuncie tolo anterior.

Ello ye qu’a los que nun quieren qu’Asturies fabrique armes o asesinos profesionales retúvolos la policía nos alredores de la Casa la Cultura. Yeren una amenaza porque desfilaben con pancartes y non con fusiles; porque s’oponen a aumentar la edá de xubilación al tiempu que se reduz la esperanza de vida a golpe de bayoneta; porque s’oponen a les tropes d’ocupación n’Asturies o n’Afganistán.


Artículu de la CSI

Sigue medrando’l paru n’Asturies

Xineru finó con 5.088 paraos más, lo que supón una xuba del 6,71 por cientu, la mayor nel conxuntu del Estáu

Los datos del Institutu Estatal d’Emplegu (Inem) del mes de xineru vuelven a mostrar que la destrucción d’emplegu n’Asturies nun tien frenu. Otru mes más, les cifres del paru vuelven a medrar, nesta ocasión un 6,71 por cientu, lo que supone 5.088 paraos más nel país. El númberu total de persones ensin emplegu ye 80.925.

Esta xuba ye la mayor del conxuntu del Estáu, situándose cerca Nafarroa (6,46 por cientu) y Euskadi (5,84 por cientu). Mentes, nel lláu contrariu, tan les Illes Balears, que ven como’l paru descendió en xineru un 0,56 por cientu. La media estatal de crecimientu de paru sitúase nel 3,1 por cientu, cifra que dobla Asturies.

fonte: infoasturies.

Xosé Luís Méndez Ferrín o el chovinismu llingüisticu.

El señor Xosé Luís Méndez Ferrín, presidente de la Real Academia Galega manifestose nuna entrevista a Europa Press a favor de la oficialidá de la llingua asturiana. Declaró "a mín personalmente dame rabia, muncha rabia que l’asturlleonés seya cooficial en Mirando do Douro y reconocíu pola República Portuguesa, y l’asturianu nun lo seua n’Asturies dafechu". Hasta equí too bien, pero'l mesmu dempués na entrevista fala d'un supuestu gallegu nel Eo-Navia, que ye la unica llingua que pa é falase nesa fastera, l’occidente d’Asturies ye otra cosa, y tien que tener un tratamientu especial, y nós apoyamos les normes del gallegu d’Asturies del Navia-Eo".

Ferrín diz que l'Academia de la llingua asturiana trata d'asturianizar el gallegu d'Asturies. El supuestu gallegu pa el. Ferrín pon de preba pa xustificar les sos babayaes que nel occidente naide diz "ye", sinon que o bien falen en gallegu o en castellán. Según Ferrín los eo-naviegos "nun falen nunca asturianu".

Dempués d'esta riestra d'argumentos de pesu, Ferrin llucese con otra frase: "L’asturianu ye l’asturianu y forma parte d’una unidá llingüística venerable, antigua, que sobrevive hasta Portugal, y Lleón, y tien que ser oficializáu dafechu, non vergoñosa ya insuficientemente como lo ta agora; l’asturianu tien que ser llingua oficial y el gallegu tamién tien que ser llingua oficial d’Asturies".

El desfile militar de La Pola, un fiascu.

L'actu militarista y propagandísticu malpenes xuntó público y ente un despliegue policial descomanáu hebo protestes antimilitaristes.

De cutre, triste y ranciu se pue calificar el desfile militar organizáu pol Ayuntamientu de Sieru ayeri. Pa los y les polesos l'actu paso desapercibíu si nun fuere poles molesties que'l pieslle d'una decena de cais céntriques un día llaborable y el despliegue policial causaron. La televisión pública del 'Principado' fizo d'altavoz del actu d'exaltación del exercitu y los sos valores desplegando en La Pola un despliegue impresionante, desproporcionáu y costosu. La parada militar tuvo la so rempuesta na cai y decenes de persones amuesaron en La Pola la so refuga al actu y al exercitu.


Les autoridaes, los mandos militares y un pequeñu grupu de ciudadanos, la mayoría d'edá avanzada, foron los únicos a los que-yos debió prestar l'actu d'ayeri en La Pola. La TPA tampoco debería tar contenta por desplazar tal despliegue audiovisual a La Pola, con metros y metros de cableáu unidades móviles,...si nun fuere pol interés ideolóxicu que-y puedan dar los que manden nel Ente lo d'ayeri nun pue ser más qu'un fiascu.


A la mayor parte de la ciudadanía presta-yos más el desfile del antroxu o la cabalgata de reis que ver a 150 uniformaos diendo al trote pela cai. Nun llevantó pasiones el desfile, más bien tolo contrario. Nes selmanes anteriores organizaciones y coleutivos abondo amuesaron la so refuga al actu, estos díes nes cais viéronse cartelos contra'l desfile y el mesmu día del actu hebo prtestes antimilitaristes pese al intentu de silenciales, torgales y criminalizales con un fuerte despliegue policial . Pese a la presión policial hebo protestes

Les protestes militaristes centráronse na Casa de Cultura per onde pasó'l desfile a pocos metros en dos ocasiones y en la plaza d'abastos onde acabó'l desfile. Los concentraos en la Casa la Cultura, con cartelonos con llemes d'Exérctitu Non, Asturies Antimilitarista o Pa cabalgata la de reis, xiblaron y glayaron al so pasu llemes antimilitaristes ya independentistes. Foron identificaos por antidisturbios y reteníos na entrada d'una Casa Cultura acordonada por fuercies policiales. Tamién hebo protestes na plaza d'abastos onde finaba l'actu y taben tolos participantes nelli.

El nuevu coronel al mandu del Acuartelamientu del Cabo Noval, Francisco Rosaleny, anunció l'unviu d'ente 400 y 500 soldaos a Afganistán.

Fonte: Infoasturies

Andecha Astur denuncia la retirada 'humildante' de la Bandera d'Asturies de la Casa Conceyu de Sieru

Andecha Astur considera humildante la retirada de la bandera asturiana de la Casa Conceyu y la represión de les protestes antimilitaristes.

Andecha Astur Sieru ta acabante de asoleyar un comunicáu nel que denuncia la retirada de la bandera asturiana de la Casa Conceyu de Sieru dexando namás la bandera monárquica española nun actu que considera "humildante y ofensivu pa tolos ciudadanos del nuesu conceyu y pa con tolos asturianos y asturianes". Amás, denuncia el despliegue policial, les identificaciones y persecuciones arbitraries, l'intentu de callar les voces de los ciudadanos críticos y lo que ye más grave una multa alministrativa a un militante d'esta organización por pasear pela acera dientro del cordón policial.

Andecha considera inaceptable qu'ayeri ondeare namás la bandera española, incluso hores dempués de termináu l'actu militar y se quitare la d'Asturies y la del propiu conceyu no que considera "un actu españolista de lo más rancio". La bandera española quedó sola na Casa conceyu como se ve na semeya esapareciendo la de Sieru, l'asturiana y la de la comunidá europea, ironicamente en plena presidencia española de la XE.

Andecha Astur responsabiliza a Antonio Trevín delegáu del gobiernu español n'Asturies y al alcalde de Sieru de Juan José Corrales, los dos del PSOE de los actos represivos y de la ofensa de retirar la bandera asturiana de la Casa Conceyu polo qu'esixe disculpes públiques y responsabilidaes.


Fonte: Infoasturies.

Despliegue policial sin precedentes, identificaciones y retenciones mientres el desfile militar

Un manifestante foi multáu alministrativamente por pasear pela acera a lo llargo del control policial

Los ciudadanos y ciudadanes que quixeron concentrase, exercitando'l so drechu a espresase llibremente pa amuesar, la so refuga al exércitu nel actu convocáu por Darréu sufrieron indetificaciones, siguimientos, retenciones,... Según Darréu, la fuerte presencia policial "condicionó enforma la concentración antimilitarista" con "retenciones a ciudadanos en tol pueblu , identificaciones y retirando munches vegaes pancartes y cartelos de calter antimilitarista". Pa la organización xuvenil "esto ye una amuesa más de la democracia que tenemos n’Asturies, onde la refuga a un espectáculu públicu belicista ye perseguíu con tol despliegue represivu posible y onde nun pue aparecer una voz crítica".


Alredor de les 12:00 hores, militantes independentistes xuntáronse delantre la Casa de Cultura de La Pola, "pero enantes de tar naide ellí yá taba la policía española, que retiró too tipu de propaganda y pancartes de rempuesta al actu" espliquen dende Darréu que sorraya "los ellí aconceyaos foron identificaos y retenios pola policía fasta que finara l’actu del exércitu español".

Otros ciudadanos qu'intentaron averáse al actu antimilitarista tamién foron "reteníos ya identificaos o perseguíos por conocíos miembros de la brigada d'información, ensin poder aportar a la concentración". La policia acabó arrequexando a los y les manifestantes na entrada de la Casa Cultura énte'l plasmu de los usuarios de les instalaciones onde s'alcuentra la biblioteca, intentando asina torgar lo más posible la so visibilidá.

Na zona de la Plaza d'abastos, onde tamién hebo protestes, "siguieron les persecuciones a la ciudadanía crítica por parte de la policía y les identificaciones y tres dellos xestos chulescos por parte de la policía, disolvióse l’actu antimilitar" esplica Darréu nel so comunicáu. "Denunciamos la descomanada presencia policial en La Pola. Denunciamos les persecuciones policiales y el llimitáu drechu que tuvimos a espresanos llibremente, ya manifestanos escontra’l desfile torgando la policía l’accesu a les inmediaciones al desfile a tou aquel que paeciera 'sospechosu'".

Pela so parte, el muerganu Antirepresivu Sofitu denunció "la ocupación y ostentación de fuercia" fecha na mañana d'ayeri pola policía española "cola sida del desfile militar del so exercitu nes cais de La Pola".


Al empar, la organización antirrepresiva solidarizóse "con tola xente que foi a manifestar la so refuga al actu y que sofrió identificaciones, que foron reteníos mas de 30 minutos p'acallar les protestes y qu'un d'ellos, militante d'Andecha Astur, foi multáu alministrativamente por pasear pela acera a lo llargu del control policial".

Sofitu finca en que "L'exercitu d'ocupación paseó per cais vacies de públicu y enllenes de furgones de policies españoles armaos".

Fonte: Infoasturies.

SOFITU denuncia la ocupación de La Pola Siero por parte de l'exercitu y la policía española

El Muerganu Antirepresivu SOFITU denuncia la ocupación y ostentación de fuercia fecha na mañana de güei pola policía española cola sida del desfile militar del so exercitu nes cais de La Pola Siero. Al empar, quier solidarizase con tola xente que foi a manifestar la so refuga al actu y que sofrió identificaciones, que foron reteníos mas de 30 minutos p'acallar les protestes y qu'un d'ellos, militante d'Andecha Astur, foi multáu alministrativamente por pasear pela acera a lo llargu del control policial. Per otru lláu tamien quier dar sofitancia a los vecinos de La Pola que sofrieron les consecuencies d'esti actu d'imposición españolista del so alcalde.
L'exercitu d'ocupación paseó per cais vacies de públicu y enllenes de furgones de policies españoles armaos.
PUXA ASTURIES LLIBRE Y SOCIALISTA!!
PUXA LA LLUCHA!!
FUERA LES FUERCIES D'OCUPACIÓN!!!

Fonte: Glayiu.

La concentración escontra les fuercies d’ocupación desendolcose en mediu d’un dispositivu represivu ensin precedentes en La Pola

Comunicau de Darréu:



Col mayor despliegue policial que pueda remembrase en Sieru un grupu d’unes 30 persones ficimos una concentración antimilitarista en La Pola esta mañana. L’actu convocáu por Darréu xuntó a un bon grupu de ciudadanos y ciudadanes que camentamos qu’esti actu entamáu dende l’Ayuntamientu de Sieru yera inapropiáu y pocu acertáu.

La fuerte presencia policial condicionó enforma la concentración antimilitarista que teniemos plantegada con retenciones a ciudadanos en tol pueblu , identificaciones y retirando munches vegaes pancartes y cartelos de calter antimilitarista. Esto ye una amuesa más de la democracia que tenemos n’Asturies, onde la refuga a un espectáculu públicu belicista ye perseguíu con tol despliegue represivu posible y onde nun pue aparecer una voz crítica.

Asina, alredor de les 12:00 hores, militantes independentistes xuntáronse delantre la Casa de Cultura de La Pola pa protestar a escasos metros del desfile, pero enantes de tar naide ellí yá taba la policía española, que retiró too tipu de propaganda y pancartes de rempuesta al actu. Darréu, los ellí aconceyaos foron identificaos y retenios pola policía fasta que finara l’actu del exércitu español. Otros ciudadanos polesos que s’averaron dempués al actu antimilitar foron reteníos ya identificaos o perseguíos por conocíos miembros de la brigada d'información, ensin poder aportar a la concentración. Glayáronse dellos llemes como “Asturies Antimilitar” , “ Fuera les fuercies d’ocupación”, “Militares parásitos sociales” o “Menos militares, más trabayu”.

Cuando finó’l desfile les persones que tratamos de refugar l’espectáculu belicista ya imperialista españolista pudimos dir a da-y la despedía al exércitu siguiendo glayando los nuesos llemes. La rempuesta de los militares fueron dellos cortes de manga y varios xestos amenazantes qu’ amuesen la so educación y profesionalidá. Por supuestu fuimos acompangaos en tou momentu pola policía española.

Dempués d’esto siguieron les persecuciones a la ciudadanía crítica por parte de la policía y les identificaciones y tres dellos xestos chulescos por parte de la policía, disolvióse l’actu antimilitar de güei.

Dende Darréu agradecemos fondamente la presencia a tola xente que s’averó a la convocatoria por dar el so sofitu al actu y por dar rempuesta al circu públicu que mos llantaron esti vienres en Sieru. Denunciamos la descomanada presencia policial en La Pola. Denunciamos les persecuciones policiales y el llimitáu drechu que tuvimos a espresanos llibremente, ya manifestanos escontra’l desfile torgando la policía l’accesu a les inmediaciones al desfile a tou aquel que paeciera “sospechosu”.

Desiximos que nun tornen a cellebrase esti tipu d’actos n’Asturies, actos que conceden a los que lleven munchos años guardando la unidá indisoluble de la so España y faciendo que la mocedá vea l’exércitu como una salida a la llaceriosa situación llaboral na que s’atopa. Camentamos que l’exércitu español nun ye más qu’una manera de desmovilizar a la mocedá, caltener la sociedá belicista y violenta na que vivimos col so modelu; y caltener el pensamientu únicu n’Asturies y nel estáu español, el del españolismu y la so fuercia mayor, el capitalismu.

¡ FUERA LES FUERCIES D’OCUPACIÓN! ¡ FUERA MILITARISMU!¡ PUXA ASTURIES LLIBRE ¡

fonte: www.darreu.org

SOFITU: Vistu pa sentencia'l xuciu escontra'l policia español acusáu d'agredir a un mozu independentista

La mañana d'ayeri cellebrose'l xuiciu nos Xulgaos de Llamaquique contra los policies españoles acusaos d'agredir y vexar a un mozu independentista pol unicu motivu de portar una sudadera cola bandera nacional vasca,Ikurriña, y el llema Euskal Herria.
Un garrapiellu de solidarios xuntaronse delantre la puerta los xulgaos con cartelos reivindicativos en solidaridá pa con Miguel F.A., mozu agredíu el pasáu mes de Xunu.
A les 11 entamó'l xuiciu. Miguel F.A. declaró en primer llugar desplicando los fechos asocedíos el pasáu Xunu afitando la so denuncia inicial. Amás relató como la persecución por parte d'estos axentes venía ya d'atras ya que yera esta la tercer vegada que yera identificáu por estos mesmos individuos siendo, en toes elles, oxetu d'amenaces ( Te vamos a identificar cada vez que te veamos), inxuries ya insultos.
Los denunciaos durante tola so declaración ñegaron lo dicho pol denunciante, inclusive que lu metieron nel coche policial, llugar onse foi agredíu fisicamente, o que esta fora la tercer vegada que lu paraben.

Los testigos de la defensa, toos ellos miembros del cuerpu policial, faciendo gala del corporativismu y de comuña pa col facismu afitaron la declaración de los axentes denunciaos.
La defensa recurrió a toa una riestra de manipulaciones pa xustificase como foi la supuesta incautación de 83 gramos de h.achis al mozu reteníu, de la que nun aportaron prueba nenguna, y polo que foi denunciáu Miguel F.A. 9 meses mas tarde.
Tamién acusaronlu de portar un arma illegal (una febiella con forma de puñu americanu), cosa que sorprendió a l'acusación ya que tampoco foi requisada nel so momentu. Tamién cabe destacar que l'abogáu de la defensa reprendió a los sos clientes nes sos contradiciones llevandolos, asina, pel so camín.
El xuez punxo torgues a les entrugues de l'acusación decantandose , nidiamente, pola defensa de los polcies.

SOFITU quier denunciar qu'esti xuiciu foi un nuevu teatru policial y xudicial onde cada personaxe tién asignáu el so papel escontra l'independentimu asturianu. Toles estayes del poder al serviciu d'españa amparense pa defender el so marcu politicu-xuridicu y el so sistema d'esplotación capitalista ñegando, otra vuelta, la división de poderes, exemplu claru de que l'estáu español ye un estáu facista, non de drechu como mos quieren facer creyer. La llei nun ye igual pa to*s.
SOFITU siguí col so llamáu a entamar la resistencia pola lliberación del nuesu pueblu y la llucha pol socialismu.
PUXA ASTURIES LLIBRE Y SOCIALISTA!!
PUXA LA LLUCHA!!

Fonte: Glayiu.

SOFITU:La policía española torga presentar nueves prebes na denuncia d'amenaces de muerte a una independentista en Mieres

Tres conocer nuevos datos del supuestu futuru policía que l'amenazara fae unes selmanes con pega-y dos tiros, la independentista asturiana presentose esti miércoles na comisaría de Mieres p'amestar estos nuevos datos, nome y modelu de coche del acusáu, na denuncia que tien presentada. Asina y too, esti trámite burocráticu nun foi posible, por mor de l'actitú del policía de turnu que se ñegó a completar la denuncia xustificándose con qu'esos datos nun yeren concretos y qu'anguaño los xulgaos tan mui ocupaos y nun se-yos pue dir con estes coses.
Dempués de que'l día los fechos yá se ñegaran a mandar dengún coche patrulla al chigre onde s'atopaba'l denunciáu, esti nuevu pilancu policial nun fae más qu'amosar el calter de los cuerpos represivos españoles y la so ñegativa espresa a, nin siquier, intentar investigar unos fechos cuando unu de los de so ta ente los denunciaos.
Dende SOFITU va presentase nos prósimos díes otra denuncia nos xulgaos de guardia, pa intentar asina qu'esti asuntu nun quede pa práu, anque ta visto, y cada día más, que l'estáu español impide llegalmente por tolos medios que la so xusticia llegue sentar nel bancu los acusaos a dengún de los sos mercenarios.

Fonte: Glayiu

El Conceyu de Xixón nun se punxo en contautu col ciudadanu discrimináu

El ciudadanu de Xixón que sufrió’l sonáu casu de discriminación llingüística diz que “ye total y absolutamente falso” que se punxeran en contautu con él pa aclarar l’asuntu.

“Nun recibí nenguna comunicación nin oral nin escrita per parte del Conceyu de Xixón, nin de naide”, esclaria Ignacio Galán López-Dóriga, el ciudadanu xixonés que’l pasáu 28 d’avientu foi a les dependencies municipales a notificar un cambiu de vivienda, sorprendiéndose al ver como la funcionaria que lu atendía ría al ver delles pallabres escrites n’asturianu.

D’otru llau, camienta que la funcionaria en cuestión, “que fizo mal al tomar l’actitú yá conocida”, nun ye la máxima responsable. “La culpa principal ye de los políticos del PSOE y IU-Bloque por Asturies que gobiernen l’Ayuntamientu de Xixón y que nun punxeron a disposición de los ciudadanos los documentos necesarios pa poder dirixise a esti organismu públicu n’asturianu”, sentencia.

Tamién señala como responsables los encargaos de la Oficina Municipal de la Llingua, “a la que se pidió’l modelu normalizáu n’asturianu necesariu pal trámite, ensin recibir respuesta nenguna”.

El ciudadanu señala que “Churruca” miente a la ciudadanía y usa de cabeza de turcu a una funcionaria, “cuando la so inacción ye la causante d’esti tipu de conflictos”. Del mesmu mou, fala de que “les contradicciones del conceyal Montes Estrada salten a la vista”, al denunciar a los medios de comunicación por nun usar los topónimos n’asturianu, delantre d’un cartelu del propiu Ayuntamientu nel que namás pue lleese “Ayuntamiento de Gijón”.

López-Dóriga esclaria que namás quier dexar constancia “de la manipulación y les mentires del equipu de gobiernu del PSOE y IU-Bloque por Asturies nesta cuestión”. Diz que nun quier nenguna disculpa del Ayuntamientu, “que de toes formes nun se me dio”, namás quier que cumplan colos drechos de los ciudadanos, “ensin que pasen coses asina”.

Fonte: Asturies.com

L'exércitu toma La Pola Sieru.

L'actu tien una fuerte oposición social y dellos coleutivos convoquen protestes antimilitaristes a les 12:00 hores.

Por iniciativa de PP y PSOE, l'exercitu español, en concreto el Regimiento de Infantería Ligera Aerotransportable «Príncipe» número 3, tomará mañana'l centru de la capital del conceyu de Sieru y desfilará coles sos armes pela arteria prinicipal de la villa. La 'parada militar' va crear, demientres tol día, problemes abondo a la ciudadanía por mor del bloquéu del centru de la villa,onde, por exemplu, nun se va poder aparcar dende les 00:00 hores hasta les 16:00 hores. Delles organizaciones amuesaron la so oposición a la cellebración del actu como Andecha Astur, PCA, Darréu, CMC, BA, Nora Antifa,...pero l'alcalde de Sieru censuró a la oposición manifestando que "l'exércitu ye'l principal emblema na defensa de la paz".

La parada militar comenzará na plaza del Ayuntamientu, a les 12 hores, onde'l coronel Francisco Roselany pasará revista a les tropes y saludará a toles autoridaes presentes. Tres l'izáu de la bandera española dende'l balcón de la Casa Conceyu, l'alcalde Juan José Corrales va facer una intervención pa llueu facer un actu conmemorativu a los cayidos del reximientu. A les 12.30 hores, les tropes desplazaránse pela cai Florencio Rodríguez hasta la confluencia ente les cais Torrevieja y Alcalde Parrondo, onde escomenzará'l desfile. Les autoridaes treslladaránse hasta la plaza d'abastos y el desfile entamará a les 12.45, momentu en que les tropes baxarán pola cai Alcalde Parrondo en direición a la plaza d'abastos.

Juan José Corrales, alcalde de Siero declaró publicamente «l'Exércitu ye'l principal emblema na defensa de la paz» y declaróse «arguyosu de los militares que sirven nel acuartelamientu de Cabo Noval», a los que se pretende «homenaxear y dignificar» cola parada militar.

Concentración a les 12 hores

Espérase que persones d'estreamos coleutivos se manifiesten mañana de forma pacífica nes cais de La Pola protestando pola cellebración del actu. Esta selmana la organización xuvenil Darréu convocó una concentración antimilitarista y convidó a otros coleutivos a convocar tamién. Amás de Darréu, Andecha Astur Sieru, los Coleutivos de Mocedaes Comunistes (CMC-CJC) y Nora Antifa, ente otros ficieron un llamáu a concentrase y amuesar la refuga al desfile.

Fonte: Infoasturies.

Concentración antimilitarista mañana a les 12:00 en Sieru

Finalmente la concentración antimilitarista de La Pola Sieru, ente la parada militar del Reximientu Principe sedrá mañana a les 12:00 hores delantre la Casa de Cultural polesa, demientres trescurra'l desfile.