Artículu de Pepe Sánchez: ¿Quién paga la cris?

Ye un fechu oxetivu qu’esiste una fonda cris económica, o meyor, una fonda cris del sistema económicu nel que se sofita la sociedá d’anguañu, tantu la política, comu la cultura y les diferencies societaries.

Sí, hai una fonda cris económica, pero’l Bancu Santander asoleya los segundos meyores resultaos de la so hestoria y los demás bancos algamen grandes beneficios. Inclusu, coles perres de les arques públiques mercárense bancos nel estranxeru y fasta se permiten el luxu de facese cola escudería Ferrari. Pero créditos nun dan, por aquello de los morosos.

Sí, señores, tamos nel fondu la cris y los grandes empresarios ganen dalgún qu’otru millón menos y, al empar que señalen al culpable, los y les trabayadores, desixen reformes llaborales, despidu de baldre, mayor productividá y amenorgamientu los salarios, ello ye, trabayar más pa cobrar menos y ensin protestes, a la cai ensin idemnización.

El Gobiernu diz tener les igües: xubir l’ IVA y l’ IRPF , lo qu’apareya recortar los salarios netos direutos ya indireutos, xubir la edá xubilación, lo qu’apareya amenorgar les pensiones y torgar la entrada nel mercáu llaboral de la mocedá, amás d’esaniciar la pensión de viudedá, facilitar el despidu, lliquidar la negociación coleutiva y otres guapures asemeyaes.

Sí, en cris tamos y parez qu’a los qu’ha salvase ye a los bancos y a los grandes empresarios. Poro, ¿quién carez la cris y quien quieren que la pague?. Los ricos lloren, pero, bramente, carecémosla y pagámosla los y les de siempres, los y les trabayadores, los y les que tenemos un emplegu y los cuasique 5 millones de paraos y paraes, los y les que nun ficimos un res pa prevocar la situación d’anguañu nin pa que se mos castigue. D’esta mena, al 90% la población, que somos namás que trabayadores, sacrifícasenos, xunto col nuesu trabayu, el nuesu sueldu, los nuesos drechos y la nuesa vida, pa que la ínfima minoría siga enriqueciéndose más y más.

Sí, señores, les economíes de los y les trabayadores tan en cris, munches yá direutamente en quiebra. Y, enriba, los mesmos que mos echen al paru, desixen el cobru de les hipoteques ensin demora denguna.Toos y toes sabemos que la probitú xorrez alarmantemente y tan viviéndose milenta de situaciones dramátiques: la xente humilde pierde’l so emplegu y dempués la so casa, queden desahuciaos ensin escrúpulu dengún. Tan xorreciendo comu la espuma los embargos, la execución de les hipoteques y los desahucios. La cris prevocada polos ricos cae comu una llábana nos costazos de los y les trabayadores, de los xubilaos y xubilaes, inclusu de los neños y neñes.. Entá más, la mesma alministración desahucia a trabayadores en paru de los sos pisos d’alquiler pa rentes baxes.

¿Ú la democracia?, ¿ú la defensa los porgüeyos de la mayoría?. Ye una situación que por cenciella solidariedá nun pue consentise. Poro, ye necesario que s’atienda urxentemente, a lo menos, a la petición paliativa de la paralización darréu de los procesos d’embargu y desahuciu a los y les trabayadores afeutaos pola cris y el desemplegu y la suspensión del pagu de les hipoteques y los sos intereses a los paraos y paraes.

La cris que la paguen los banqueros y los grandes empresarios, los braeros culpables de la situación d’anguañu.

Pepe Sánchez ye'l responsable d’Organización de Corriente Sindical d'Izquierda-Avilés

140.000 persones viven baxo l'umbral de la probeza n'Asturies

De les daqué más d'un millón de persones censaes, oficialmene hai 140.000, el 14% de la población, que viven per debaxo del umbral de la probeza, una categoría na qu'entren quienes sobreviven con una renta añal inferior a 6.278 euros, ingresos nos que la estadística gubernamental fixa el llistón. Pese a ser unos datos mui duros, Asturiesta tien una tasa de probeza menor al del conxuntu del Estáu onde un 20% de la población ye probre, anque per enrima de la del País Vascu por exemplu onde los probress son 'namás' el 8%.

Son datos qu'asoleya l'Institutu estatal d'Estadística, que tamién espeyen que quienes caltienen los sos salarios en Asturias, reciben cantidaes superiores a la media estatal por mor de la influencia nes estadístiques qu'exercen les prexubilaciones mineres y siderúrxicas o la estabilidá de los sueldos de los funcionarios.

El mapa asturianu de la probreza, centráu hasta va poco en coleutivos denomaos 'marxinales' y en dalgunos barrios urbanos, agora inclúi families que llevaban una vida cómoda relativamente y que d'un día pa otru quedó ensin ingresos pola perdida d'empléu. El perfil nuevu de probre ye la de una persona parada, principalmente muyer, con fíos, y que nun pertenez a un sector consideráu marxinal.


Fonte: Infoasturies

El réxime clientelar y l'enchufismu políticu 'problemes importantes a iguar' p'Andecha Astur

Dende Andecha Astur consideren "indecentes y sangrantes" los niveles "d’enchufismu", de "clientelismu políticu" y "amiguismu" a los que ta llegando’l "rexime de la FSA y de los que lu caltienen".

Pa la organización política asturiana, los últimos fechos, la denuncia de que tol personal de la Procuradora Xeneral del ‘Principado’ foi nomada "a deu" o’l nomamientu tamién "a deu" del direutor nuevu del Muséu Etnográficu de Grandas "espeyen perbién la situación y la calidá democrática que sufrimos".

Andecha Astur xúnese a la denuncia pública del Conceyu por Otra Función pública n’Asturies (COFPA) sobre’l nomamientu "a deu" de tola plantilla de la Procuradora Xeneral "y la que yá fixera de lo xeneralizao de la situación d’emplegar na alministración ‘comisarios políticos’ del rexime".

De la mesma Andecha denuncia, ensin entrar a valorar los sos méritos profesionales o personales, la destitución del Pepe El Ferreiro como direutor del Muséu Etnográficu de Grandas de Salime, "pa, por cuestiones polítiques, nomar a deu, ensin sacar la plaza a convocatoria pública, un direutor nuevu adictu al rexime, cola complicidá d’IU".P'Andecha Astur la situación "yá fiede" y considera que "tolos partíos parllamentarios, PSOE, IU-BA-LV y PP, ensin esceición son responsables, toos gobiernen y/o gobernaron y, en mayor o menor medida, caltuvieron el sistema, creando y engordando una élite agradecida".
"Dende la izquierda nacionaliega camentamos que’l del clientelismu políticu, la deucracia, ye un problema importante a iguar y combatir", remata la nota de prensa Andecha Astur.

Fonte: Infoasturies.

L'Alcade de Sieru dimite

El alcalde de Sieru, Juan José Corrales, presentó güei la so dimisión énte la Comisión Executiva l'agurpación del conceyu PSOE .

Depués de una "reflexón fondera", l'alcalde pidió perdón polos fechos a los ciudadanos sierenses. Corrales anunciólo esta tarde nuna rueda prensa na Agrupación Socialista, onde compareció col secretariu xeneral del PSOE del conceyu, Roberto García.

Corrales anunció que va dar desplicaciones énte'l Plenu Municipal al restu de los grupos políticos que componen la corporación. El tovía alcalde dixo que la so situación personal pudo contrubuyir a comenter los fechos, pero qu'asume "honestamente" les consecuencies polítiques que d'ellos se deriven.


Fonte: Infoasturies.

Escándalu 'etílico-políticu' del alcalde de Sieru

Triplicaba la tasa d'alcohol permitíu y sedrá xulgáu por un delitu contra la seguridá del tráficu.


L'escándalu etílicu de Juan José Corrales españó ayeri y espandióse per tol país, y pel estáu, salpicando dafechu a la Federación Socialista Asturiana (FSA). Dempués d'un día "duru" de folixa en Les Comadres de La Pola, l'alcalde Juan José Corrales (PSOE) estrellóse borrachu a les 6.30 de la mañana del vienres col so coche oficial, con una tasa de 0,75mg/l. Al rexidor sierense nun se-y ocurrió otra que la de garrar el coche pa dir a Llugones, onde reside. Argüelles foi la final del so trayectu, l'alcalde "comióse" la retonda d'esta llocalidá, que fai tamién d'entrada a Noreña, y estrozó'l coche nun accidente que nun tuvo consecuencies pa la so salú pero qu'entovía nun se sabe les que tendrá na so vida política.

L'Alcalde de Sieru foi treslladáu a l'Hospital Central onde se constató que nun sufría mancadures. El rexidor dará esplicaciones públiques nun tardando y recapacita sobre'l so futuru políticu en so casa. Daes les circustancies, Corrales nun acudió a la cena a la que taba invitáu ayeri y que servía como actu de despedía d'un sarxentu de la Guardia Civil destináu en La Pola.

L'escandalu etílicu de Juan José Corrales pue pasá-y factura política y dende la FSA ya se considera'l casu como grave, sobremanera pola "exemplaridá" que se-yos supón a los cargos públicos. Espérase un bon espolín políticu nesti conceyu asturianu, mui importante por estensión y por población, pa mañana y la selmana que bien. La comparecencia pública de Corrales ye mui esperada y l'escándalu ye parte de les conversaciones y chancies de tola población asturiana.

Xuristes pide la igua de la "faltona discriminación" de Llanera

Xuristes pol Asturianu, tres tener conocimientu del casu de Llanera, desixi-y al Alcalde que tramite’l pidimientu y retire la delegación de competencies a quien nun cumple cola llegalidá.

L’Aconceyamientu calificó de “discriminación llingüística faltona”, que la Conceyala de Cultura y Muyer de Llanera, Belén Rodríguez López, nun ceda l’usu d’una sala de la Casa Cultura a la organización Fai! por presentar l’escritu n'asturianu. Pa Xuristes, l’actitú de la Conceyala ye “intolerable nun cargu públicu d’una Alministración democrática”.

Poro, encamiéntan-y a l’Alcalde de Llanera a tomar les midíes afayadices pa “cortar pela freba colos despropósitos burocráticos denunciaos pente medies d’ordenar darréu’l trámite y resolución del pidimientu y retirar la delegación de competencies a quien nun sabe facer un emplegu axustáu a drechu, tolerante y democráticu de les mesmes”.

Xuristes pol Asturianu camienta que l’Ayuntamientu de Llanera ta vulnerando gravemente cuatro drechos de la ciudadanía. Primeru, el derechu a nun ser discrimináu per razón de la llingua, “porque la Conceyala entendió dafechu lo que se-y pidía, talu que lo acredita la rempuesta que dio, polo qu’ésta, nos sos términos, nun pue tener otru oxetivu que la discriminación llingüística”.

Segundu, el drechu al emplegu na vida pública de la llingua rexonal, dientro del territoriu del que ye propia y tradicional, calificáu como derechu imprescriptible y recoyíu na Carta Europea de les Llingües Rexonales o Minoritaries. “Esti Conveniu Internacional foi robláu por España, gobernando’l Partíu Popular que tamién lo fai güei en Llanera”, señalen.

Como tercer puntu, falen del drechu a empobinase n’asturianu a l’Alministración municipal, reconocíu na Llei d’usu y nel réxime xurídicu de les Alministraciones Públiques y del procedimientu alministrativu común. Pa finar citen el drechu a ser tratáu con respetu peles autoridaes y funcionarios, “obligaos a facilita-y l’exerciciu de los sos drechos” esclarien.

Dende l’Aconceyamientu, camienten que’l gobiernu local de Llanera actuó “como si entá tuviere vixencia’l Decretu 2929/1975, testu aprobáu pela dictadura franquista pa regular, torgar más bien, l’usu de les llingües rexonales españoles”.

Del mesmu mou, dicen llamentar los fechos, tres denunciar un casu asemeyáu en Xixón nun fixo’l mes. Lo que pa Xuristes amuesa la discriminación llingüística que vienen careciendo los ciudadanos asturfalantes nos sos trámites burocráticos.

Fonte: Asturies.com

Y la entruga del millón ye... ¿onde ta la Xunta Pola Defensa de la Llingua Asturiana?

Fai! convoca una concentración en Llanera

El próximu sábadu 13 de febreru la organización d’esquierda soberanista Fai! tien convocada una concentración tres del secuestru permanente de los espacios públicos de Llanera per parte de la so corporación y dempués d’un escandalosu casu de censura llingüística, onde l’alministración del conceyu prohíbe la espresión n’asturianu.

Fai! vien de presentar, en rueda de prensa celebrada esti miércoles día 10 nel local de les asociaciones vecinales de Llanera, una movilización a la que sigún los convocantes lleguen “dempués d’una bayura de despropósitos y neglixencies alministratives per parte de los rexidores de Llanera”. El descontentu de Fai! ta xeneráu poles torgues constantes que per parte de la conceyala de Cultura Belén López se vienen dando pal usu d’espacios públicos como la casa la cultura o de la mocedá de Posada.

La organización convocante espardió ente la prensa un pliegu de documentos nos que s’incluyía una cronoloxía onde se detallen les comunicaciones ente les partes pa solicitar l’usu d’un espaciu públicu, que vien siendo reiteradamente refugáu.

Nel primeru de los casos l’ayuntamientu diera’l vistu bonu d’entamu pa posteriormente retirar el permisu ensin dar nenguna esplicación per escrito, al tiempu que de manera oral, la propia conceyala afirmaba, n’actitú censora, que “nosotros tenemos que saber quiénes usen los nuestros locales y qué temes van tratar nellos”.

De la mesma manera, Fai! solicitare un espaciu pa facer un mural promoviendo l’asociacionismu nel conceyu col lema “Faciendo Asturies dende Llanera”. Esti mural, confeccionáu el mes pasáu, yá foi esborriáu probablemente énte lo “pernicioso y negativo” del so mensaxe.

Nesta segunda ocasión, nin siquiera se ñega l’usu d’equipamientos del pueblu, sinón que directamente nun s’almite la propia solicitú por tar escrita n’asturianu, violando los derechos a la non discriminación llingüística de les y los asturfalantes, recoyíos na Declaración Universal de los Derechos Humanos, asina como nel estatu d’autonomía d’Asturies, la llei d’usu y la mesma constitución española.

Énte esti panorama, Fai! tresmitió al Aconceyamientu de Xuristes pol Asturianu (AXA) un dossier con una rellación de los fechos pa que dende l’asociación se tomen les midíes oportunes no que cinca a la defensa llegal de los derechos llingüísitcos.

Por tolo espuesto, Fai! convoca una concentración que col lema “DEMOCRACIA PA LLANERA: pol usu de los espacios públicos y escontra la represión llingüística” va celebrase esti sábadu 13 de febreru a les 12.30 hores delantre l’ayuntamientu en Posada.

Al tiempu, la organización fai un llamáu al sofitu y a la participación de toles persones y organizaciones vecinales, polítiques y culturales que vienen careciendo los métodos antidemocráticos de la corporación dirixida pol popular José Avelino Sánchez, asina como a les qu’en toa Asturies sufren les mesmes discriminaciones per parte de l’alministración pol fechu d’espresase n’asturianu.

Tamién se quier dar les gracies a tolos entes, asociaciones y organizaciones (Vecinos d’Agüera, Conseyu de la Mocedá del Principáu d’Asturies, UNA Mocedá, Izquierda Xunida de Llanera, Aconceyamientu de Xuristes pol Asturianu), asina como a tolos ciudadanos qu’a títulu personal ufrieron el so sofitu inmediatu a Fai!.

Darréu de la concentración, y nel mesmu sitiu, Fai! va a informar a la xente con tolos detalles d’esta coyuntura, abriéndose a la busca en comuña de propuestes pa superar esta situación insostenible onde se busquen continuamente formes de torgar la participación y les reivindicaciones ciudadanes.

Cronoloxía de los fechos:

29 d’avientu:

Miembros acreditaos de Fai! nel conceyu entreguen na Casa’l Conceyu la solicitú pa la confección d’un mural y un llugar pa cellebrar l’asamblea na Casa la Cultura o Casa de la Mocedá de Posada.

L’alministración ínstalos a dir a la Casa la Cultura y entrugar si ellí hai sitiu disponible pa esi día y hora, lo que se confirma ensin problema per parte del funcionariu encargáu, qu’avisa a un compañeru pa que’l día de l’asamblea se permita l’usu d’un proyector.

Na vuelta a la Casa’l Conceyu, confírmase-yos a los funcionarios la disponibilidá de la Casa la Cultura y entrégase la solicitú. Nesi intre espétase-yos a los militantes de Fai! que "l’asturianu nun ye cooficial y que quiciabis nun l’aceuten". Darréu d’esto, p’asegurase consulten telefónicamente y dicen que sí, que nun hai problema. Queda afitáu l’actu, diséñase un cartelu que s’esparde pelos núcleos de población más importantes del conceyu y fáise una convocatoria pública, na que s’avisa tamién al traviés d’una llista de corréu a xente del conceyu.

4 de xineru:

Pónense en contautu con una militante de Fai! per teléfonu dende la Casa’l Conceyu pa espetar que "la solicitú nun pue tar n’asturianu" y qu’asina nun pue quedar. Oblígase a los organizadores, con una convocatoria na cai, a tornar l’escritu al castellán. Sicasí, los militantes de Fai! en Llanera entreguen una fueya billingüe, onde, na parte superior, ta l’escritu n’asturianu y, na inferior, en castellán.

7 de xineru

Nueva llamada per parte de los funcionarios del conceyu, que telefónicamente comuniquen que la solicitú ta denegada. Inmediatamente y énte la gravedá de los fechos demándase-yos una contestación per escrito, que devuelven col siguiente testu manuscritu y qu’esclaria mui poco: "Habló Belén Concejala con el Alcalde. (se lo deniega). Se les avisó x teléfon. 7/01/10. (denegado).

Al tiempu, avísase de que "va a llamavos la conceyala", xusto tres de dar un mensaxe contradictoriu del tipu "vete a vela a la Casa la Música agora" nel que la funcionaria se corrixe al "decatase de que ta de vacaciones -casualmente- esi día y el siguiente".

Fáise otra petición pa que, teniendo en cuenta que l’actividá ta convocada y publicitada, s’ufra un sitiu alternativu y torna a repetise la solicitú pa mural. El pidimientu ta namás n’asturianu. Avísase de que "si nun se traduz nun va ser aceutáu", a lo que’l representante de Fai! se ñega.

La conceyala, -que casualmente ruempe de sópitu, ente la gravedá de la crisis alministrativa xenerada, el so periodu de descansu vacacional y entra pela puerta de la Casa’l Conceyu- llama telefónicamente a los representantes de Fai! pa dicí-yos qu’aconceyaron "ella y l’alcalde" y que la solicitú ta "denegada". Diz entós, nuna clara postura censora, "qu’ellos tienen que tar informaos de lo que va facese nos sos llocales y que se-y tien que facer un escritu nel que se diga de qué se va falar, de qué va tratar l’asamblea y cómo va ser y qué va dicir el mural que se faiga".

D’urxencia, y como última midida, Fai! entrega un nuevu escritu nel que se fala brevemente de los motivos polos que públicamente se va cellebrar l’Asamblea, asina como pa poné-y final con un mural qu’afale la participación y la implicación de la población de Llanera nes problemátiques del so conceyu. El testu ye entregáu y la téunica municipal informa de qu’ella, l’alcalde y la conceyala van aconceyar pa decidir finalmente.

Pa finar, a les 14.30, trancando yá les dependencies públiques, confirmen la denegación de la solicitú per cuarta vegada consecutiva. Entrúguense les razones y nin siquiera s’aporten contestaciones per escrito, nin s’informa oralmente de les razones qu’impiden el derechu a la llibre reunión en dependencies públiques.

25 de xineru de 2010

Una militante de Fai! en Llanera torna a presentar un escritu solicitando nuevamente l’usu de la “Casa la Mocedá” de Posada. La solicitú ta escrita íntegramente n’asturianu y va dirixida otra vegada a la conceyala de Cultura Belén López. Nel mesmu momentu, la funcionaria d’alministración vuelve a desixir la presentación del testu en castellán, a lo que la militante se ñega, instando a que se-y devuelva per escrito una contestación oficial del ayuntamientu.

28 de xineru de 2010

La militante recibi una fueya col asuntu “Requiriendo escrito en Castellano”, na que se comunica que “dicho escrito debe de presentarlo en Castellano” firmáu pola conceyala. Paradóxicamente, l’escritu emitíu por Belén López, en castellán, contién seis faltes d’ortografía meciendo, nesti testu, puñalaes a la norma de la so llingua de cabecera al tiempu qu’impide la espresión na llingua propia a la ciudadanía asturiana.

Tini Areces " Naide se cree qu'Asturies ye España y lo demás tierra conquistada".

Vidiu de la selmana pasada, onde nuna conferencia del FORUM EUROPA nuesu GRAN presidente SOCIALISTA fala alredor del nacionalismu asturianu dexando dalgunes perles que comentar y analizar, anque p'analis fondu el que fai él del nacionalismu asturianu.

El vidiu entama cola risa de Tini yá a la primer entruga, debía ser que fartose a tortiella yá enantes de dir a la conferencia.

"Asturies es España y lo demás tierra conquistada, la frase nosotros la decimos pero nadie se lo cree jeje"

Pues non, naide se lo cree si tien dos deos de frente, pero tal paez qu'esa frase cuadonguista vos lleva dando décades de resultaos nes urnes. Por supuestu qu'Asturies nun ye España, nin lo demás tierra conquista, principalmente porque España nun esiste. Pero bono los políticos eso sabeislo de sobra.

"Nos llena de orgullo eso de decir: Asturias es España y lo demás tierra conquistada".

Enllenarate a ti d'arguyu Tini, porque lo que ye a los asturianos en la so mayor parte, o bien da-yos igual o bien da-yos vergoña. Fala por ti, nun fales en coleutivu, yá que nun yes naide pa falar en nome d'un pueblu que condergues al desaniciu. Y ye ciertu, nun mos llena d'arguyu, nun hai más que ver delles encuestes pa ver la identificación de lxs asturianxs con españa. A un asturianu una frase cola pallabra España le ye indiferente, nun enllena-y d'arguyu.

" Asturias es una región bellisima que tiene una imagen positiva(..)Asturias a pesar de sus problemas, de su conflictividad...lo cierto es que tiene una imagen positiva, y esa imagen positiva queremos conservarla".

Equí fala d'Asturies como rexón, cosa insultante pa ún de los primeros Estaos europeos independientes, con plantegamientos asina como p'algamar nel Estatutu la reconocencia de nación hestótica. Lo de la imaxen positiva tién razón, el día que'l pueblu asturianu garre concenxa de si mesmu camudará enforma la cosa y los caciques s'esmolecerán. Hasta entós tola razón pa Tinín.

" Yo trato de transmitir que además de la Asturias de la imagen positiva, de la naturaleza privilegiada, de esos espacios, de nuestra hospitalidad, de nuestra forma de ser(...) hay una Asturias innovadora, profunda, que se desconoce y que camina hacia el futuro...".

Tamién podríes tresmitir la imaxen de l'Asturies de los ERES, los 81.000 paraos, el Sama-Velilla, la regasificadora, la represión llingüistica, la emigración forciada de la mocedá, el desaniciu cultural y del padremuñu, la persecución policial...

" Asturias es una comunidad con una identidad profundisima, podriamos haber hecho de eso un arma reivindicativa, territorial, sin duda con plena legitimidad(...)pero no se ha hecho ¿ por que ? porque Asturias se siente profundamente integrada en España. Es una comunidad que reclama su identidad, la demuestra...porque tenemos una inmigración de hace más de dos siglos...porque en el mundo hemos sabido lo que ha sido ir a otros lugares y ser acogidos, y tener una visión amplia de la vida. Creo que nos ha ayudado mucho".

Si Tini, Asturies ye un país con una identidá fonda. De la que nun yeres un vividor de la política dibes a les manis pola llingua, debe ser que nun ye que pudieres o non facer un arma vindicativa d'eso, sinon qu'algamaste una vía rápida pa vivir a costa de tolxs asturianxs, vendiendote al PSOE. Ye lo que tien l'ambición.
Fales d'inmigración ¿ tú ? Pues controla lo que-y pasa a dalgunos manteros ya inmigrantes que tan siendo espulsaos n'Asturies y que recibieron agresiones nestos caberos años de la to policia. Por ciertu Areces, nada tien que ver qu'un país reclame los sos drechos coleutivos y la so personalidá con nun abrise a la inmigración. Los únicos xenofobos qu'hai n'Asturies sois vosotros, la FSA y demás enxendros políticos, xenofobos colos inmigrantes y por si nun ye pocu con tolo que güela a asturianu.

"El nacionalismo en Asturias tiene poco futuro"
Ye ceo pa xulgar eses pallabres, de momentu axela tú y dexa de reprimir a la mínima cualesquier actu independentista, que ye lo únicu que sabeis facer. Si vos esmolez sedrá por dalgo, y daqué de pensar vos darán eses pequeñes espresiones nacionalistes.

Discriminación llingüistica na Casa conceyu de Llanera

La conceyalía de Cultura y Muyer, de la popular Belén López, vien de torgar por segunda vez el drechu a poder facer usu de les istalaciones públiques a la organización soberanista Fai! por mandar les sollicitues en llingua asturiana. Pa denunciar esti fecho, Fai! va dar una rueda de prensa en Llanera güei a les 17 hores en Llugo Llanera.

Mañana miércoles 10 de febreru a les 17 hores nel local "Cafamilu" de les asociaciones vecinales del conceyu de Llanera (c/ Severo Ochoa de Llugo de Llanera) tendrá llugar una RUEDA DE PRENSA onde la organización d’izquierda soberanista "Fai!" va a denunciar la política de prohibición que per parte del Ayuntamientu de Llanera se vien aplicando al usu de les instalaciones públiques (Casa la Cultura, Casa la Mocedá), fechos que se repiten dende hai tiempu con tol movimientu asociativu del conceyu.


Belén López (PP), conceyala Cultura y MuyerPer segundu mes consecutivu esta organización vien pidiendo un espaciu pa facer una charra pública que vien siendo torgáu, de manera gravísima, pola "Conceyala de Cultura y Muyer" del Partido Popular Belén López. Ellí aportaráse a tolos presentes un pliegu con una cronoloxía de los fechos y con documentos onde la propia alministración con firma de la conceyala se niega a almitir les solicitúes por tar redactaes en llingua asturiana, negando la so presentación nel rexistru por nun tar "EN CASTELLANO", amás de l’actitú claramente antidemocrática que l’alcalde y la corporación municipal ta manteniendo.

Demientres l’actu darase anuncia de la convocatoria d’una movilización na cai pa esta selmana contra’l secuestru de les instalaciones públiques a los coleutivos de Llanera y contra la represión llingüística. Amás, comentaránse los apoyos que la organización ta teniendo d’otres instituciones, asociaciones y partíos qu’esta situación antidemocrática ta xenerando.


Fonte: Aruelu.

Campaña d'Hostelería de la Corriente Sindical d'Izquierda

La Estaya d’Hostelería de la Corriente Sindical d’Izquierda ta llevando alantre una campaña d’información a los y les trabayadores del seutor y de denuncia de la precariedá llaboral y pésimes condiciones de trabayu que carecen la gran mayoría d’estos y estes trabayadores. Pa la CSI, la patronal de la hostelería "impón unes condiciones llaborales inaceutables: xornaes llaborales interminables, abondes vegaes de 50 y 60 hores selmanales, la mayoría les hores estres nun son remuneraes, nun s’asegura a los y les trabayadores pola totalidá les hores trabayaes, los trabayos de fin de selmana realícense de vezu ensin contratu, cúntase namás que con un díi de descansu selmanal y la mayoría les vegaes los sueldos nun algamen los mil euros mensuales".

Pero’l braeru problema’l seutor, pa La Corriente, ye la falta ferramientes que garanticen el cumplimientu les normatives llegales que regulen la xera llaboral. Asina, el Conveniu Coleutivu caberu, vixente fasta’l 2011, "tórnase en papel moyáu porque incúmplese dafechu na gran mayoría les empreses".

A too ello hai d’amestar "les torgues coles que nos atopamos al denunciar les irregularidaes ya incumplimientos" delantre la Ispeición de Trabayu, que fai "casu omisu de cualisquier denuncia presentada, y, con esta actitú, permite, tolera y tórnase cómpliz de la situación d’inxusticia ya indefensión de la gran mayoría los y les trabayadores del seutor", denuncia el sindicatu asturianu.

Asina les coses, la CSI asoleyó un cartelu y un periódicu (“La Voz del Chigre”) que ta repartiendo en mano per tolos centros de trabayu de la comarca (bares, cafeteríes, hoteles, yaeso) y nos que s’informa a los y les trabayadores de los sos drechos, ufiertándo-yos sofitu xurídicu y sindical pa la igua de los sos conflictos y reivindicaciones llaborales.

Pa finar, la CSI va entamar al empar una campaña de denuncia delantre Ispeición de Trabayu, "de toes aquelles empreses hosteleres qu’incumplen la normativa llaboral vixente nel Conveniu Coleutivu y va pedir les responsabilidaes alministratives y xudiciales que procedan escontra Ispeición de Trabayu y Direición Xeneral de Trabayu si éstes persisten na so actitú de permisividá y tolerancia delantre los fraudes cometíos pola patronal de la hostelería", espliquen.

Fonte: infoasturies

Darréu presenta n'Uviéu " Ochobre'l 34: Memories d'un país".

La organización moza independentista presenta esti prósimu vienres 12 de febreru'l so documental autoxestionáu n'Uviéu. El documental asoleyose coincidiendo col DMR'09 y foi presentáu en dellos sitios hasta anguañu.

Esti vienres toca-yos n'Uviéu proyeutalo, na llibrería Paraxuga, a partir de les 20:30 hores. Dempués de la proyeición del documental Darréu entama una espicha en Paraxuga.

Ayeri garró'l cargu Roberto Colunga.

Ye'l primer diputáu que diz ser " nacionalista d'izquierdes".

El nuevu diputáu, perteneciente al Bloque por Asturies, secretariu xeneral d'esti mesmu tomó ayeri cargu del so escañu na Xunta Xeneral. Roberto Colunga pasa asina a ser el primer diputáu que diz ser nacionalista d'izquierda. Na toma de posesión xuró acatar la so responsabilidá como diputáu, la Constitución Española y l'Estatutu d'Autonomía. Fixolo n'asturianu.

El so trabayu d'enantes desendolcabase nel Conceyu de Xixón, como asesor de la oficina de la política llingüistica. El mesmu diz que tien un compromisu cola oficialidá hasta les últimes consecuencies. De momentu ayeri'l " faigo promesa" dexó ablucaos a los peridístes qu'averaronse a la toma de posesión, pocos acostumaos a sentir la llingua na Xunta.

Habrá que facer siguimientu, y val más nun tener denguna ilusión nun diputáu que ta integráu na Coalición IX-LV-BpA, pero hai que da-y tiempu y ver que papel desendolca nestos años que-y queden nel escañu, y a ver si ye un firme defensor de la oficialidá como dixo nel so día a los medios asturianistes y nacionalistes. Poco diz del Bloque por Asturies qu'Areces riase na cara del nacionalismu asturianu/independentismu cuando tan gobernando con el y autodenomense nacionalistes d'izquierdes. Paciencia. Y si llevamos la sorpresa dientru lo que cabe meyor.

Meyor solu, que mal acompangau.

El presidente de la española quier llevar al planu políticu la decisión soberana de la federación asturiana. "Ye como si Areces propunxera qu'Asturies se independizare d'España".

La Federación Asturiana de Bolos cellebró una asamblea xeneral estraordinaria, na que se trató como puntu del orde del día principal la separtación de la Federación Española de Bolos. La dixebra afitóse con 28 votos a favor, once en contra y cinco abstenciones. L'independizase xustificólo Desiderio Díaz, presidente de la Federación Asturiana de Bolos, esplicando que se trata de un organismu que «nun nos aporta nada económicamente y xenera un trabayu escesivo».

Según Díaz, agora «nun va pasar nada fuera lo normal», porque dende la federación asturiana se van tramitar namás llicencies asturianes "y tolos esfuerzos van dedicase a les ocho modalidaes que se xueguen n'Asturies». El siguiente pasu de la Federación Asturiana de Bolos va ser «dexar en suspensu» tol articuláu estatutariu que seya paralelu cola española.

Pela so parte el preseidente de la Federación Española de Bolos, José Luis Boto, calificó como «ridícula» la situación y declinó opinar «mientres nun se pronuncien el presidente del 'Principado' y el direutor xeneral de Deportes». Colo que pretender treslladar el problema al planu políticu valorando que la situación yera asemeyada a que «Álvarez Areces propunxera qu'Asturies s'independizare d'España».
La Federación cántabra tamién.

Nun va muncho, n'avientu de 2009. la Federación de Cantabria decidiere tamién, nuna asamblea similiar, separtase de la Federación Española. Noticia que recoyimos n'InfoAsturies.



Fonte: infoasturies

Casi 160.000 asturianos viven oficialmente n'otros territorios del Estáu

Según los datos del padrón municipal de 2009, más de 160.000 asturianos tan empadronaos n'Ayuntamientos d'otros territorios. N'Asturies la población más númberosa ye la Llionesa.

Colos datos últimos del Institutu estatal d'estadistica del 2009, hai cuasique 160.000 asturianos y asturianes que fixaron la so vivienda oficialmente fora del país. La mayoría, 42. 215 persones tán en Madrid; en Castiella y en Lleón viven más de 22.300. En Galiza son más de 17.300 los asturianos empadronaos, 15.000 en Cataluña y dalgo más de 11.000 los que tan nel País Valencianu. La colonia Asturiana n'Andalucía supera les 10.000 persones.

Hacia donde menos emigren los asturianos y asturianes son les ciudaes de Ceuta y Melilla, onde malpenes se superen los 300 asturianos empadronaos nos sos ayuntamientos. En concreto hai 169 en Ceuta y 162 en Melilla.

Por contra, ente la población d'otros territorios del estáu empadronada n'Asturies, la comunidá lleonesa ye la más numberosa. Unos 26.000 gallegos y gallegues tan empadronaos n'Asturies, dalgo más qu'asturianos en Galiza, la mayoría son de Lugo y los que menos d'Ourense. La población andaluza n'Asturies superó por primer vez la barrera de les 12.100 persones.

Sicasí, la cifra rial d'asturianos y asturianes que viven fuera d'Asturies ye mayor de la que dan les cifres oficiales del padrón yá que muncha población, sobre manera la más moza, caltienen el empadronamientu nos sos conceyos d'orixe pese a tar emigraos trabayando fuera.

Fonte: Infoasturies

Ayuda humanitaria p’Haití, militares p’Afganistán y espulsiones d’inmigrantes n’Asturies

El gobiernu español tien 21 misiones militares, lo que representa ún de los mayores despliegues dempués de la etapa colonial. La crisis pon en cuestión el sistema de pensiones pero non el gastu militar.

El vienres pasáu, 29 de xineru, desfilaron peles cais de La Pola Siero xóvenes militares acuartelaos en Cabo Noval, que van mandalos a Afganistán. Ente los 500 soldaos que van participar nesta misión hai inmigrantes allistaos nel exércitu español que, paradóxicamente, escaparon de conflictos armaos nos sos países d’orixe —alimentaos pol keynesianismu de guerra— o de "catástrofes humanitaries" y que l’Estáu español yá solo almite como carne de cañón, yá sía na zanxa o nel campu de batalla.


El reversu del discursu humanitarista alcuéntrase n’intervenciones militares, na espulsión d’inmigrantes n’Asturies (más de 40 persones mandaes a centros d’internamientu estatales nel mes de xineru) y na represión de quien denuncie tolo anterior.

Ello ye qu’a los que nun quieren qu’Asturies fabrique armes o asesinos profesionales retúvolos la policía nos alredores de la Casa la Cultura. Yeren una amenaza porque desfilaben con pancartes y non con fusiles; porque s’oponen a aumentar la edá de xubilación al tiempu que se reduz la esperanza de vida a golpe de bayoneta; porque s’oponen a les tropes d’ocupación n’Asturies o n’Afganistán.


Artículu de la CSI

Sigue medrando’l paru n’Asturies

Xineru finó con 5.088 paraos más, lo que supón una xuba del 6,71 por cientu, la mayor nel conxuntu del Estáu

Los datos del Institutu Estatal d’Emplegu (Inem) del mes de xineru vuelven a mostrar que la destrucción d’emplegu n’Asturies nun tien frenu. Otru mes más, les cifres del paru vuelven a medrar, nesta ocasión un 6,71 por cientu, lo que supone 5.088 paraos más nel país. El númberu total de persones ensin emplegu ye 80.925.

Esta xuba ye la mayor del conxuntu del Estáu, situándose cerca Nafarroa (6,46 por cientu) y Euskadi (5,84 por cientu). Mentes, nel lláu contrariu, tan les Illes Balears, que ven como’l paru descendió en xineru un 0,56 por cientu. La media estatal de crecimientu de paru sitúase nel 3,1 por cientu, cifra que dobla Asturies.

fonte: infoasturies.

Xosé Luís Méndez Ferrín o el chovinismu llingüisticu.

El señor Xosé Luís Méndez Ferrín, presidente de la Real Academia Galega manifestose nuna entrevista a Europa Press a favor de la oficialidá de la llingua asturiana. Declaró "a mín personalmente dame rabia, muncha rabia que l’asturlleonés seya cooficial en Mirando do Douro y reconocíu pola República Portuguesa, y l’asturianu nun lo seua n’Asturies dafechu". Hasta equí too bien, pero'l mesmu dempués na entrevista fala d'un supuestu gallegu nel Eo-Navia, que ye la unica llingua que pa é falase nesa fastera, l’occidente d’Asturies ye otra cosa, y tien que tener un tratamientu especial, y nós apoyamos les normes del gallegu d’Asturies del Navia-Eo".

Ferrín diz que l'Academia de la llingua asturiana trata d'asturianizar el gallegu d'Asturies. El supuestu gallegu pa el. Ferrín pon de preba pa xustificar les sos babayaes que nel occidente naide diz "ye", sinon que o bien falen en gallegu o en castellán. Según Ferrín los eo-naviegos "nun falen nunca asturianu".

Dempués d'esta riestra d'argumentos de pesu, Ferrin llucese con otra frase: "L’asturianu ye l’asturianu y forma parte d’una unidá llingüística venerable, antigua, que sobrevive hasta Portugal, y Lleón, y tien que ser oficializáu dafechu, non vergoñosa ya insuficientemente como lo ta agora; l’asturianu tien que ser llingua oficial y el gallegu tamién tien que ser llingua oficial d’Asturies".

El desfile militar de La Pola, un fiascu.

L'actu militarista y propagandísticu malpenes xuntó público y ente un despliegue policial descomanáu hebo protestes antimilitaristes.

De cutre, triste y ranciu se pue calificar el desfile militar organizáu pol Ayuntamientu de Sieru ayeri. Pa los y les polesos l'actu paso desapercibíu si nun fuere poles molesties que'l pieslle d'una decena de cais céntriques un día llaborable y el despliegue policial causaron. La televisión pública del 'Principado' fizo d'altavoz del actu d'exaltación del exercitu y los sos valores desplegando en La Pola un despliegue impresionante, desproporcionáu y costosu. La parada militar tuvo la so rempuesta na cai y decenes de persones amuesaron en La Pola la so refuga al actu y al exercitu.


Les autoridaes, los mandos militares y un pequeñu grupu de ciudadanos, la mayoría d'edá avanzada, foron los únicos a los que-yos debió prestar l'actu d'ayeri en La Pola. La TPA tampoco debería tar contenta por desplazar tal despliegue audiovisual a La Pola, con metros y metros de cableáu unidades móviles,...si nun fuere pol interés ideolóxicu que-y puedan dar los que manden nel Ente lo d'ayeri nun pue ser más qu'un fiascu.


A la mayor parte de la ciudadanía presta-yos más el desfile del antroxu o la cabalgata de reis que ver a 150 uniformaos diendo al trote pela cai. Nun llevantó pasiones el desfile, más bien tolo contrario. Nes selmanes anteriores organizaciones y coleutivos abondo amuesaron la so refuga al actu, estos díes nes cais viéronse cartelos contra'l desfile y el mesmu día del actu hebo prtestes antimilitaristes pese al intentu de silenciales, torgales y criminalizales con un fuerte despliegue policial . Pese a la presión policial hebo protestes

Les protestes militaristes centráronse na Casa de Cultura per onde pasó'l desfile a pocos metros en dos ocasiones y en la plaza d'abastos onde acabó'l desfile. Los concentraos en la Casa la Cultura, con cartelonos con llemes d'Exérctitu Non, Asturies Antimilitarista o Pa cabalgata la de reis, xiblaron y glayaron al so pasu llemes antimilitaristes ya independentistes. Foron identificaos por antidisturbios y reteníos na entrada d'una Casa Cultura acordonada por fuercies policiales. Tamién hebo protestes na plaza d'abastos onde finaba l'actu y taben tolos participantes nelli.

El nuevu coronel al mandu del Acuartelamientu del Cabo Noval, Francisco Rosaleny, anunció l'unviu d'ente 400 y 500 soldaos a Afganistán.

Fonte: Infoasturies

Andecha Astur denuncia la retirada 'humildante' de la Bandera d'Asturies de la Casa Conceyu de Sieru

Andecha Astur considera humildante la retirada de la bandera asturiana de la Casa Conceyu y la represión de les protestes antimilitaristes.

Andecha Astur Sieru ta acabante de asoleyar un comunicáu nel que denuncia la retirada de la bandera asturiana de la Casa Conceyu de Sieru dexando namás la bandera monárquica española nun actu que considera "humildante y ofensivu pa tolos ciudadanos del nuesu conceyu y pa con tolos asturianos y asturianes". Amás, denuncia el despliegue policial, les identificaciones y persecuciones arbitraries, l'intentu de callar les voces de los ciudadanos críticos y lo que ye más grave una multa alministrativa a un militante d'esta organización por pasear pela acera dientro del cordón policial.

Andecha considera inaceptable qu'ayeri ondeare namás la bandera española, incluso hores dempués de termináu l'actu militar y se quitare la d'Asturies y la del propiu conceyu no que considera "un actu españolista de lo más rancio". La bandera española quedó sola na Casa conceyu como se ve na semeya esapareciendo la de Sieru, l'asturiana y la de la comunidá europea, ironicamente en plena presidencia española de la XE.

Andecha Astur responsabiliza a Antonio Trevín delegáu del gobiernu español n'Asturies y al alcalde de Sieru de Juan José Corrales, los dos del PSOE de los actos represivos y de la ofensa de retirar la bandera asturiana de la Casa Conceyu polo qu'esixe disculpes públiques y responsabilidaes.


Fonte: Infoasturies.

Despliegue policial sin precedentes, identificaciones y retenciones mientres el desfile militar

Un manifestante foi multáu alministrativamente por pasear pela acera a lo llargo del control policial

Los ciudadanos y ciudadanes que quixeron concentrase, exercitando'l so drechu a espresase llibremente pa amuesar, la so refuga al exércitu nel actu convocáu por Darréu sufrieron indetificaciones, siguimientos, retenciones,... Según Darréu, la fuerte presencia policial "condicionó enforma la concentración antimilitarista" con "retenciones a ciudadanos en tol pueblu , identificaciones y retirando munches vegaes pancartes y cartelos de calter antimilitarista". Pa la organización xuvenil "esto ye una amuesa más de la democracia que tenemos n’Asturies, onde la refuga a un espectáculu públicu belicista ye perseguíu con tol despliegue represivu posible y onde nun pue aparecer una voz crítica".


Alredor de les 12:00 hores, militantes independentistes xuntáronse delantre la Casa de Cultura de La Pola, "pero enantes de tar naide ellí yá taba la policía española, que retiró too tipu de propaganda y pancartes de rempuesta al actu" espliquen dende Darréu que sorraya "los ellí aconceyaos foron identificaos y retenios pola policía fasta que finara l’actu del exércitu español".

Otros ciudadanos qu'intentaron averáse al actu antimilitarista tamién foron "reteníos ya identificaos o perseguíos por conocíos miembros de la brigada d'información, ensin poder aportar a la concentración". La policia acabó arrequexando a los y les manifestantes na entrada de la Casa Cultura énte'l plasmu de los usuarios de les instalaciones onde s'alcuentra la biblioteca, intentando asina torgar lo más posible la so visibilidá.

Na zona de la Plaza d'abastos, onde tamién hebo protestes, "siguieron les persecuciones a la ciudadanía crítica por parte de la policía y les identificaciones y tres dellos xestos chulescos por parte de la policía, disolvióse l’actu antimilitar" esplica Darréu nel so comunicáu. "Denunciamos la descomanada presencia policial en La Pola. Denunciamos les persecuciones policiales y el llimitáu drechu que tuvimos a espresanos llibremente, ya manifestanos escontra’l desfile torgando la policía l’accesu a les inmediaciones al desfile a tou aquel que paeciera 'sospechosu'".

Pela so parte, el muerganu Antirepresivu Sofitu denunció "la ocupación y ostentación de fuercia" fecha na mañana d'ayeri pola policía española "cola sida del desfile militar del so exercitu nes cais de La Pola".


Al empar, la organización antirrepresiva solidarizóse "con tola xente que foi a manifestar la so refuga al actu y que sofrió identificaciones, que foron reteníos mas de 30 minutos p'acallar les protestes y qu'un d'ellos, militante d'Andecha Astur, foi multáu alministrativamente por pasear pela acera a lo llargu del control policial".

Sofitu finca en que "L'exercitu d'ocupación paseó per cais vacies de públicu y enllenes de furgones de policies españoles armaos".

Fonte: Infoasturies.