Dende la Estaya n´Asturianu d´Asturbulla queremos pescudar ente dellos coleutivos y movimientos sociales d´Asturies qu´anden naguando por una lliberación social, económica, política o identitaria del País, conociendo dende ellos mesmos cuála ye so razón de ser, sos señes d´identidá, la llucha principal qu´entamen y sos porgüeyos más carauterísticos.
1. Redacción: ¿Qué ye Atropar la Cai? ¿Cómo se vos ocurrió la idega? Nacho- Por defininos de dalguna podriamos dicir que somos un movimientu propagandisticu. Nun somos un coleutivu que s’aconceya nin nada, solo facemos propaganda independentista y de tolo que conlleva esa independencia (antifacismu, antiracismu, feminismu, ecoloxismu, hestoria, llingua, etc…). La verdá que se m’ocurrió tres dar una charra en Lleida sobre’l independentismu asturianu convidáu por un llocal de la ciudá. Les hores de viaxe guiando’l coche dan pa muncho y busqué la forma de mecer los mios estudios de marketing cola mio pasión: Asturies. La envidia de ver la ciudá de Lleida enllena de propaganda catalana fizo’l restu.
2. ¿Cuálu ye´l vuestru mou de furrulamientu?Nacho- Pues esto ye lo mas cenciellu, Cada mes editamos un modelu de pegatina. Facemos tacos sigun el valor de la mesma (por exemplu la primer pegatina vendiamosla en tacos de 10 pegatines, la ultima en tacos de 20) Depués cada un merca los tacos que quier a euro cada tacu y pega pel so barriu o pueblu, asina, una persona que gaste un par d’euros al mes, menos qu’una cerveza, al final del añu puede tener pegaes mas de 300 pegatines nel so barriu dando visibilidá al independentismu que, por desgracia, nun ye visible. Amás tenemos el blogue col que votamos los modelos si hai varios, un mail pa que mos manden diseños…me prestaria que muncha xente m’apurriera idees.
3. ¿Cualos son los vuestros obxetivos algamaos? ¿Cuálos queréis algamar a curtiu y mediu plazu?Nacho- El primer oxetivu yera asentase, dir dandonos a conocer pasu ente pasu. N’Uviéu por exemplu, tamién tamos llogrando que les pegatines de partíos facistes nun se vean, lo que ye una satisfación personal. L’oxetivu a mas llargu plazu ye que l’independentismu medre, mas rapaces se sumen a la corriente soberanista y que mas xente se dea cuenta de la hestoria que tién el nuesu pueblu y que’l centralismu del estáu español ta afogandonos. Si sumamos una persona en cada sitiu onde se pegó yo me doi por satisfechu.
4. ¿Qué diagnósticu facéis de la realidá asturiana? ¿Qué otros preseos de lliberación podíen ponese a puntu?Nacho-L’estáu español ta faciendo un trabayu perfeutu d’asimilación nel nuesu país. Faen que la mocedá tenga qu’emigrar y asina perdemos a los mas combativos. Prexubilaciones pa los “vieyos guerreros”. Los Mass Media criminalicen a tou dios…. Tamos muncho peor que fai 10 años y a peor vamos: incineradora, banzaos, Campa Torres…toles agresiones sal-yos de baldre. El principal preseu que se podia poner yera’l d’aportar a un acuerdu global ente’l movimientu soberanista, nel que toos acudamos a les convocatories que faen los coleutivos, que siamos una piña en defensa de los nuesos intereses dexando de llau les diferencies que siempre tién qu’haber. Un bon preseu pa ello sedria l’apertura de llocales independentistes, ensin sigles, abiertu a tolos soberanistes, lo que ensin dulda pondria en contautu a tolos indepens de la zona y fadrien un trabayu de base tan importante y necesariu.
5. ¿Cómo véis la situación del movimientu nacionalista, soberanista y/o independentista n´Asturies anguaño?Nacho- Nun voi descubrir la dinamita: división, invisibilidá, amenorgamientu… Nun hai defensa de postures comunes, caún cellebra una cosa, nun hai sofitu d’unos a otros… que voi dicir que nun se sepa. La llucha de sigles nun beneficia a naide mas que a los de siempre que tan en casa frotando les manes y mientres nun trabayemos cola verdá per delantre y ensin referentes, con seriedá, nun hai nada que facer.
6. ¿Qué opinión vos merez el movimientu ciudadanu Pola Xuntanza? ¿Creyéis que ye posible o deseyable dalguna xuntanza a curtiu o mediu plazu? ¿O al menos una unidá d´aición o del Frente patrióticu?Nacho- Yo como militante de base puedo dicir lo que vivo na cai. Los rapaces que militen en movimientos sociales o, inclusive, los que nun militen nun tan mui pola xuntanza pero non porque sía mala, sinon porque tan desencantaos colos partíos asturianos. Ye difícil tener apreciu por xente que desconoces o que solo conoces de los cibermedios. Per otru llau yo nun creo que sía posible la xuntanza pa esti añu. Esta tién que llegar del trabayu en comuña, d’una unidá d’aición qu’aporte a una xuntanza y nun me paez a min que la xente d’Andecha-UNA- Bloque se conozan o trabayen xuntos. Oxala arranquen al Bloque de los brazos d’IX, oxala UNA cambiase’l so discursu hacia postures mas d’izquierdes y oxala Andecha salga d’esi circulu autodestructivu…¿deseyable? claro que si, pero soi pesimista por natura anque oxala aportase esa unidá d’aición.
7. ¿Qué papel podíen desendolcar los medios contrainformativos, como por exemplu esti, o otros, a la hora de concienciar o informar sobre la lliberación d´Asturies? Nacho- El problema de tolos contramedios ye que son medios pasivos, nadie va entrar n’Asturbulla o Glayíu porque sí. La cosa ye facer campaña y dase a conocer na cai pa que la xente s’avece a entrar nos contramedios a informase y que non tire pela prensa hispana. Dexando esto yo entro a diariu en Glayiu, Infoasturies, Aruelu y Asturbulla como parte de la mio formación como militante y creo que tol mundu tenia que facelo pa saber nel país nel que viven y la so realidá. D’Asturbulla prestariame que dieran una mayor visión de la nación que somos pero supongo qu’eso ye la decisión de los que la rixen non mia. Eso si, quitaria los foros o los pondria solo pa xente que s’identifique porque hai demasiau intoxicador, policies o nazis, y los demas entren al trapu. Lo que ta nidiu ye que los contramedios son ferramientes mas qu’amañoses pa los movimientosa sociales.
8. Hai munchu protagonismu de motivos hestóricos nes vueses pegadielles: ¿Por qué? ¿Qué visión tenéis del Ochobre de 1934, tema tan controvertíu? ¿Acusáronvos dellos de dir mui atrás a la gueta d´estos motivos de concienciación? ¿Podíamos rescatar figures como Gonzalo Peláez, por exemplu, de cara a l´aición política güei?Nacho- Nosotros nun somos Kosovu, nun somos una nación moderna, tenemos una hestoria que cuntar, que defender. ¿Asturies sedria como ye ensin el 34, 1808, los Ástures y milenta coses más? Los movimientos soberanistes son identitarios y nosotros nun podemos ser una esceición. Sobre la revolución d’Ochobre la visión nun ye otra que la de que ye una revolución asturiana, contra la republica española y que son los asturianos quienes tienen que defendela. Evidentemente nun ye una revolución independentista, pero si socialista asturiana lo que desembocó qu’Asturies fora a lo llargu d’unos dies llibre, que m’espliquen a min como encaxa esto dientro del republicanismu hispanu. Cola primer pegatina si qu’hebo xente per Internet que criticó que falase de la edá media pero como ya dixi nel so día la izquierda abertzale homenaxea al rei Sancho como primer rei d’Euskal Herria y los catalanes homenaxeen a los patriotes del Fosar de los Comunes. Sedria estupido nun reclamar la llingua asturiana porque tién mil años…pues la historia ye lo mesmu. Gonzalo Pelaez ye’l primer independentista de la hestoria del nuesu país, si nun lo recuperamos nosotros que me digan quien. Yo propondría la creación del Dia de la independencia y tolos soberanistes mos axuntasemos n’Abril na Plaza la Catedral d’Uviéu pa dar a conocer a esti paisanu.
9. ¿Cómo véis a la mocedá asturiano en materia de llucha política? ¿Cómo podíamos llegar toos, -escritores, medios dixitales, partíos soberanistes, coleutivos d´axitación- a ellos, a los xóvenes?Nacho- Pues la mocedá nun tien futuru y sabense condergaos a emigrar o a ser un bon ciudadanu p’algamar un puestu de funcionariu. Tamien dicir que como toa mocedá son idealistes, quieren lo meyor p’Asturies y si ta desmovilizada ye pola falta de trabayu y de cercania pa con ellos. Sedria importante crear un sindicatu d’estudiantes que represente de verdá los valores de revolución y xusticia. En cuanto a los coleutivos de mocedá yo creo que furrularian meyor si non fueren venceyaos a partíos,cosa que los mozos refuguen bastante.
10. ¿Tenéis sofitu o simpatíes de dalguna formación política o social asturiana?Nacho- Nengun sofitu oficial, osea, esto nun sal de nengun coleutivu o partíu. Evidentemente yo tengo la mio militancia y los mios compañeros de SOFITU apoyenme y me merquen pegatines, pero tengo vendíes a xente d’UNA_MOCEDÁ, DARREU, CAA, ANDECHA, BxA, PARTÍU CARLISTA o FAI!. Tamién dicir que’l 90% de les pegatines que vendo ye a xente ensin militancia, lo que me presta muncho saber que coneutamos con ellos nel mesmu discursu.
11. Con unes señes d´identidá tan fuertes les de los asturianos, creyéis, como dicen dalgunos articulistes, que la nacionalidá d´Asturies ye una nacionalidá neutralizada adré y que´l País ye dafechu una colonia del estáu español?Nacho- Somos un país colonizáu con toles lletres. Como ya dixeron unos monxos hai sieglos: Asturies son les indies. España mos quier pa da-yos mano d’obra barato, elletricidá barato y enseguida, col TAV, un llugar pa que los madrilanos merquen pisos baratos y convertinos nel Benidorm del norte. El nun tener una defensa en comuña de les señes d’identidá mos fae debiles y la izquierda nacional tién qu’entamar a encadarmar la defensa.
12. ¿Qué pensáis de la crisis institucional qu´anguaño vive esti Estáu? ¿Qué se pue facer pa camudar l´estatus d´Asturies nél, como país sometíu?Nacho- Lo increible ye que un estáu como l’español siga tando en pie. Ta prauticamente dividido en dos ente los qu’acepten la plurinacionalidá del estáu y los que tovía creen aquello d’una, grande y llibre. Arriendes, sigui siendo un estáu continuador d’una dictadura xabaz, que nun depuró responsabilidades y que les grandes fortunes de l’estáu ficieronse demientres la dictadura y que siguin calteniendo el sistema de sovención como forma d’enriquecese. Ye una mierda d’estáu que nun hai per onde lo garrar y dende la mas izquierda españolista a la mas derecha españolista tan fundiendolo y Asturies con él. L’unicu futuru ye: trabayu, trabayu y más trabayu. Que la izquierda nacional asturiana espierte y que convenza a los asturianos/es qu’ensin la independencia nun tenemos futuru.
Gracies y bona suerte cola iniciativa.
Asoleyau n'Asturbulla.
Si, la fola racista y xenófoba sigue medrando. Y paez que chisca'l mundu del nacionalismu asturianu. La fola de populismu aporta'l mundín pequeñu nel que movemonos tolxs patriotes. La xente güei ablucada foi a llamai l'atención al mozu que repartió esti insultu a la tolerancia y los valores d'esquierda y la rempuesta foi una sola " nun se, nun digasme, solo sofito, nun teo nada que ver". ¿Que tipu de chifladura dio-y al autor de la famosa pegadiella?. ¿ Nun dicen ser socialistes ? ¿ Que xaciu tien nun supuestu socialista asoleyar campañes xenófobes y racistes ?
Podemos pensar qu'esto que faen llamar Ensame Socialista Astur nun ye namai qu'un friki nostalxicu que quier resurdir l'antiguo Ensame. Podemos pensar qu'esto de nomar Ensame a esto ye una perda de tiempu, que d'Ensame tien pocu, ye ciertu, ye una persona namai. Pero tenemos que tar soyertes tamién a estes conductes, faltoses pal movimientu nacionalista/ independentista, carauterizau tradicionalmente pola so participación en movimientos antifacistes/racistes, y peligroses. Peligroses por xugar con un tema mui delicau nesti tiempu, onde la crisis afuega inda más a les families de clas obrera y onde munchos lacayos del sistema traten de tapecer, por un puñau de votos les vergoñes del poder con discursos intolerantes, antisolidarios y racistes dafechu. Peligrosu pola facilidá d'asimilación d'esi discursu nuna sociedá desinformada y despolitizada dafechu.
