La CSI participa na fuelga pero nun va firmar al día siguiente nenguna reforma llaboral

Los sindicatos UXT y CC OO tienen convocada una xornada de fuelga en protesta polos recortes económicos alcordaos pol gobiernu a les emplegaes y emplegaos públicos. Énte ello, la Corriente Sindical d’Izquierda realiza’l posicionamientu públicu siguiente: per una parte llama a participar na fuelga porque, al marxe de quién la convoque, les midíes del gobiernu suponen una agresión intolerable que nun tien que quedar ensin respuesta; per otru llau, les nueses sigles nun van apaecer nos carteles anunciadores de la mesma, porque consideramos qu’UXT–CCOO son collaboradores necesarios nesta situación por munchos motivos.

¿Por qué participar na fuelga?


Porque, al marxe de quién la convoque, les midíes del gobiernu suponen una agresión intolerable pa les persones emplegaes públiques y esta agresión nun tien que quedar ensin respuesta; d’ehí’l nuesu llamamientu a la participación nesta y en cualquier otra movilización que se convoque, como elementu de protesta y d’oposición a eses midíes.

Amás, sabemos que na alministración del Principáu tán preparándose otres midíes que se van aplicar de manera inminente: basándose nuna supuesta redistribución d’efeutivos que se ta planificando pa poder contribuyir al aforru adicional de 150 o 200 millones d’euros na alministración autonómica, va producise la imposición de reducciones de plantía que van venir daes pola amortización de places y el cese d’interinos, asina como pola movilidá forzosa de personal fixo a otros departamentos.
Pero’l que más de 6 millones de pensionistes vayan ver conxelaos los ingresos y la reforma llaboral inminente convierte’l problema en xeneral, non solo de los emplegaos públicos. Y ehí ye onde tien que se dirixir la respuesta a estes agresiones, na convocatoria d’una fuelga xeneral, porque’l conflictu yá ye con tola sociedá.

¿Por qué nun convocamos esta fuelga xunto con UXT y CC OO?


Sicasí, les nueses sigles nun van apaecer nos carteles anunciadores de la mesma, porque consideramos qu’UXT – CC OO son collaboradores necesarios nesta situación por munchos motivos:

Por tener permitío a l’alministración facese tan fuerte nestos años que decide midíes de manera unillateral cada vez más davezu ensin que se-y ponga reparu dalu.
Por tener firmao un estatutu básicu del emplegáu públicu (xunto con CSIF), que sepultó dafechu la poca capacidá negociadora que teníemos nes alministraciones públiques empara de favores como miles de lliberaos sindicales, subvenciones millonaries…
Por permanecer pasivos delantre el deterioru brutal del mercáu llaboral (firmando reformes llaborales anteriores, pautando EREs, tolerando la mayor tasa d’emplegu temporal y precariu d’Europa, horarios con xornaes aparrantes y sueldos míseres, despidu de quien esixe los drechos mínimos…).
Por permitir que les coses llegaren a esti estremu nesti Estáu nel qu’hai yá 5 millones de paraos –el 20 % de la mano d’obra activo– ensin faer más nada que ruedes de prensa nes que, con cara de circunstancies, los dirixentes amuésense esmolecíos pola situación económica, desmovilizando a la clas obrera.
¿D’aú vien esta situación?

El gobiernu del PSOE, presionáu polos poderes económicos y los grupos financieros internacionales, aprobó unes midíes económiques que pretenden reducir el gastu públicu y saniar l’estáu de cuentes del Estáu. Dempués vendrá’l despidu semigratuitu, la reforma de la Seguridá Social, y mayor precariedá na contratación llaboral.

La crisis actual provocada polos emporios financieros y los especuladores tamién mos toca a nós, pese a que nestos últimos años el gobiernu atesteronaba en dicir qu’equí nun pasaba nada y que too diba perbién. Ello ye que se marafundió’l dineru público con midíes populistes y nada progresistes (cheques naciellu, ordenadores pa toos, 400 euros de reducción xeneralizada nel IRPF, ayudes pa mercar coches…); nun daba más que se precisare o non, o los ingresos de los beneficiarios... Por nun se poner a falar de les privatizaciones encubiertes a traviés de la esternalización de los servicios públicos per aciu d’empreses-chiringuitos que taragañen cientos de millones d’euros pa sustituyir el trabayu de los emplegaos públicos por trabayadores con condiciones llaborables míseres pa ellos y privilexaes pa los directivos.

¿Qué fai’l gobiernu?

Les midíes impuestes pol PSOE van escontra los de siempre: les y los trabayadores. Ponse nel disparaderu a los emplegaos públicos, culpándomos por tener (dellos) un trabayu estable, escaeciendo a los miles de temporales qu’agora pretenden poner na cai. Rebaxen los salarios una media del 5 % esti añu, pese a que práuticamente yá teníemos conxelaes les nueses retribuciones (por mor d’un alcuerdu con UXT, CC OO y CSIF, qu’agora incumplen); conxelen les retribuciones yá devaluaes pal añu que vien. Conxelen la mayoría de les pensiones pese al Pautu de Toledo, paralicen gran parte de les inversiones públiques, reducen l’aportación a la cooperación al desarrollu, pretenden entamar el copagu de los gastos sanitarios... Nun se diz un vierbu de cuála va ser l’aportación de los que más tienen, nun se diz un vierbu de les grandes bolses de fraude fiscal, nun se diz un vierbu de pidir responsabilidaes a los causantes de la crisis. Equí paguen los de siempre: les y los trabayadores.

¿Cómo respuenden los sindicatos mayoritarios?

Énte estes midíes, los “sindicatos mayoritarios” llancen en solitario una convocatoria de fuelga en tol sector públicu pal 8 de xunu qu’entra, y dempués llamen a los demás a sumamos a la mesma, mientres siguen sentaos col gobiernu y patronal negociando otra reforma llaboral, que nun pue consistir más que nuna vuelta de tuerca más a la xente trabayador. Énte esta agresión continuada na CSI entendemos que nun hai res que negociar y que nun cabe más que la FUELGA XENERAL y la confrontación xeneral énte un gobiernu y una Xunión Europea que nun son quien a atacar a los responsables verdaderos de la crisis. Tarrecemos qu’esti tipu de convocatories sectoriales sían la sida pa nun llanzar una respuesta contundente, qu’esta convocatoria sirva de sida y que suponga una apa pa pautar, dividir y desmovilizar en nome de la “responsabilidá”.

¿Qué fai la Corriente?

Paralelamente, n’Asturies, dende la Corriente Sindical d’Izquierda entamemos movilizaciones de manera unitaria con toles centrales sindicales con representación na alministración –sacante UXT y CC OO, que dende l’empiezu foron por llibre–, que remató nes manifestaciones del 19 de mayu y del 2 de xunu n’Uviéu, nes que participaron miles de persones emplegaes públiques. Y comprometémosmos a siguir nel mesmu camín de resistencia y llucha.

Sobren los motivos

Insistimos: esti ye un problema global qu’afeuta a la sociedá en conxuntu; sobren los motivos pa movilizase y nun quedar callaos. Pero ye que, puestos a recortar ¿por qué nun recorten –o suprimen, según el casu– los sueldos vitalicios de los políticos, los gastos militares, les subvenciones y los lliberaos institucionales de sindicatos, partíos políticos y organizaciones empresariales, los beneficios de la banca, les subvenciones a la Ilesia católica, los conciertos con colexos privaos, el presupuestu de la Casa Real, los chiringuitos innumerables, etc., etc., etc.?

*Estaya de l'Alministración Autonómica de la CSI

Fai! tuvo na concentración escontra la incineradora de residuos en Xixón

La organización d'esquierda soberanista acudió a la convocatoria de la Plataforma de Ganaderos y Afectaos escontra la Incineradora y del Consorciu Cívicu pa refugar la instalación d'un fornu de residuos na enésima midida contra'l patrimoniu ambiental y la salú de los y les asturianos/es. Na pancarta de Fai! podía lleese "La puxarra ta pa reciclar, non pa gobernar". Analís de Fai!:

PSOE-PP-IX,
la basoria qu'afuega en Caliao,
que quema en Serín,
y que mos tira de la llingua...

Les bilurdies del Gobiernu y la prensa asturianos.

1. La capacidá del vertidoriu de Coxersa escosará nel 2015.
Falso. Lo que ta escosando ye'l frenti de vertíos d'anguaño. Y hai qu'adicar que nel mesmu vertidoriu hai delles plantes de tratamientu de desechos. De los aprox 3.000.000 tonelaes añales de residuos industriales cuasi toos poseyen vertidorios controlaos y específicos non xestionaos por Coxersa, y el restu (un 14% del total) son urbanos. Sicasí Coxersa namás recicla'l 10% (52.286 de 526.000 tonelaes) de los residuos urbanos, ún de los porcentaxes más baxos del Estáu Español. El problema ye la incompetencia (convenida) na xestión de residuos nestos caberos años per parte de la direición de Coxersa (Santiago Fernández) y de la conseyería de mediu ambiente presidida por Belén López. Amás la planta sedría incompatible col reciclaxe, dao qu'obligaría a quemar el 85% de los redisuos domésticos.

2. La incineradora acabaría col problema de los vertidorios.
Falso. Principalmente porque precisaría d'otros dos más onde almacenar les povises y la escoria xenerao altamente contaminante.

3. La so instalación crearía munchos puestos de trabayu.
Falso. El reciclaxe y la recoyida selectiva xeneraríen 10 veces más puestos de trabayu amás de que los ayuntamientos recibiríen más beneficios al xestionar estos recursos.

4. La incineradora nun ye contaminante nin perxudicial pa la salú.
Falso. Aumentaría la emisión de CO2 en 600.000 tonelaes al añu. Otros gases qu'emitiría como dioxines, furanos y metales pesaos son altamente canceríxenos, bioacumulables y alteradores hormonales y del ADN. Arriendes d'ello, la so cercanía a importantes noyos urbanos, rurales y semirurales (habiendo nesi radiu de 10km una población de 600.000 habitantes) contaminaría estes zones perxudicando a ganaderos y agricultores y introduciéndose na cadena alimentaria.

5. Nun hai otra solución.
Falso. De les 526.000 tonelaes añales de basoria 226.000 son desechu orgánicu domésticu y 100.000 tonelaes correspuenden a la basa de depuradores. Combinando l'almacenamientu en vertidoriu, el reciclaxe y la biometanización nuna planta capaz de tratar alrodiu 300.000 tonelaes, cuya construcción precisa la metá qu'el d'una incineradora y el so mantenimientu hasta 6 vegaes menos, nun habría falta de quemar residuu dalu.

6. Entós ¿Por qué quieren construyir una incineradora?
Por cada tonelada incinerada l'alministración ha pagar 60€ a la empresa xestionadora de la planta incineradora. Los contratos con estes empreses suelen ser d'ente 25 y 30 años, polo que ye un negociu mui rentable pa éstes y por consiguiente pa los políticos y amigos propietarios d'élles. Los que nun vamos salir tan beneficiaos vamos ser los asturianos, pos amás d'incrementase la tasa de basoria 5 veces, vamos financiar col nuesu dineru una instalación tóxica que va menguar la nuesa salú, conxelar les futures polítiques de reciclaxe y financiar a una empresa privada dende les arques públiques.

UN AÑU D’USU Y DISFRUTE

Fai un añu un xulgáu de Xixón dictaba sentencia sobre’l desaloxu de la nave que tiempu atrás albergó les instalaciones de la fábrica FLEX nel barriu de La Calzada, y que’l 11 de Xunetu de 2008, tres 10 años d’abandonu, suciedá y goteres, un piñu de mozos y moces decidieron recuperar pal usu comunitariu y social de la xente. En dicha sentencia, la xueza encargada del casu ordenaba a los y les activistes contra la especulación que desaloxaran l’edificiu y que-y lu reintegrarán al su “lexítimu” dueñu, Construcciones Llorente SL, pa qu’ésti pudiere llevar a cabu “l’usu y disfrute” de les sus instalaciones. Amás, por mor d’unes identificaciones arbitraries de la policía díes antes del desaloxu, delles persones fueron acusaes d’un delitu de “usurpación” y tán agora mesmo a la espera de xuiciu.

Pasó tou un añu enteru dende aquel desaloxu, dende aquel 5 de Xunu de 2009, y les instalaciones de la FLEX, que durante 11 meses abellugaron al Centru Social Okupáu y Autoxestionáu La ReFLEXón, vuelven a ser un sumideru de suciedá y abandonu, un edificiu gris, apagáu y ensin vida. Les charres, los talleres, los conciertos, les proyecciones cinematográfiques, les xintes populares, el mercáu de gratuidá, los recitales de poesía, l’autoxestión, la solidaridá y el trabayu en comuña dieron pasu de nueu al abandonu y la especulación, gracies al interés, o desinterés, según se mire, de Construcciones Llorente y de la mal llamada Xusticia.

Pero’l CSOA La ReFLEXón nun morrió aquel 5 de Xunu. El CSOA La ReFLEXón siguió y sigue vivu. Porque la especulación nun acabó aquel día, y porque la decisión de llevar a cau un movimientu horizontal, asambleariu y anticapitalista nes instalaciones de l’antigua fábrica de FLEX nun fue’l caprichu d’una xente. Aquella xente siguió buscando sitios afayaízos pa denunciar la especulación inmobiliaria y llevar alantre el su proyectu anticapitalista, ocupó simbólicamente un edificiu na Cai Los Moros pa festexar l’aniversariu del proyectu y desechó unos cuantos más por tar en condiciones ruinoses. Pero la búsqueda continúa, porque son innumerables los edificios qu’hai en Xixón abandonaos a la espera de tiempos meyores pa los intereses especulativos, y más que va haber de siguir estos tiempos de recortes sociales, desempléu y precariedá. El tiempu danos y siguirá dándonos la razón, y nós siguiremos denunciando la especulación inmobiliaria y lo inxusto d’esti sistema capitalista.

En Xixón, a 5 de Xunu de 2010. L’asamblea nel exiliu del CSOA La ReFLEXón.

Inspección nun dexa poner clase d'asturianu n'Infantil

Xulio Llaneza, mayestru del Colexu Públicu Elena Sánchez Tamargo de La Pola Llaviana denunció públicamente que la Inspección Educativa nun permite al centru implantar l'asignatura de Llingua Asturiana n'Educación Infantil, basándose en que nun ta nel Currículu pa esti nivel educativu. El docente recordó que'l propiu Tribunal Superior de Xusticia d'Asturies refugó un recurso del sindicatu Suatea contra esti currículu por esti vacíu, señalando la resolución que la Llingua si taba incluyida dientru del conceutu cultura asturiana.

Xulio Llaneza Fernández aprofitó la so intervención nel actu d'entrega de los premios de l'Academia de la Llingua -foi ganador del premiu de recoyida oral de Léxicu- pa denunciar la situación. "Un día llegó la direutora esplicando que la inspectora dixo-y que nun se pue dar asturianu n'Infantil porque nun está nel currículu", declaro más tarde a l'axencia Europa Press.

"Tamos dando asturianu con una bona aceptación en primaria, con alredor de 70% de alumnos que lo escueyen. Pensamos la posibilidá d'empicipiar n'infantil, porque tenemos profesores titulaos, con una interina a tiempu completu, y unos cuantos más fixos que tenemos la capacitación y el equipu directivu yera favorable a ello, y sabemos qu'hai otros sitios n'Asturies onde lo dan" esplicó.

Fonte: Infoasturies.

L’Imperiu y la Mentira

Nun me quedó otra alternativa qu’escribir dos cavilgues sobre Irán y Corea, qu’espliquen el peligru inminente de guerra col emplegu de l’arma nuclear. De la mesma, espresé yá la opinión de qu’unu d’ellos podía iguase si China decidía vetar el resolvimientu qu’Estaos Xuníos promueve nel Conseyu de Seguridá de Naciones Xuníes. L’otru depende de fautores qu’escapen a toa posibilidá de control, por cuenta de la conducta fanática del Estáu d’Israel, convertíu por Estaos Xuníos a la so actual condición de fuerte potencia nuclear, que nun acepta control nengún de la superpotencia.

Cuando se produz la primer intervención d’Estaos Xuníos pa entartallar la Revolución Islámica en xunu de 1953, en defensa de los sos intereses y los del so estrechu aliáu’l Reinu Xuníu, que llevó al poder a Mohammad Reza Pahlevi, Israel yera un pequeñu Estáu que nun s’apoderó tovía de cuasi tol territoriu palestín, parte de Siria y non poco de la vecina Xordania, defendida hasta entós pola Lexón Árabe, de la que nun quedó nin la solombra.

Güei los cientos de cohetes con oxives nucleares, sofitaos polos aviones más modernos que-y suministra Estaos Xuníos, amenacien la seguridá de tolos Estaos de la rexón, árabes y non árabes, musulmanes y non musulmanes, que tán al algame del ampliu radiu d’aición de los sos proyeutiles, que pueden cayer a pocos metros de los sos oxetivos.

El domingu 30 de mayu pasáu, cuando escribí la reflexón L’imperiu y la droga, nun asocediera tovía’l brutal ataque contra la flotilla que tresportaba cebera, melecines y artículos pal millón y mediu de palestinos sitiaos nun pequeñu fragmentu de lo que fuera la so propia Patria mientres miles d’años.

La inmensa mayoría de les persones inverten el so tiempu y lluchen pa enfrentar les necesidaes que-yos impon la vida —ente elles l’alimentu, el derechu a la recreación y al estudiu, y otros problemes vitales de los familiares más allegaos—; nun pueden detenese na busca d’información sobre lo que ta asocediendo nel planeta. Unu velos en cualesquier parte con espresiones de nobleza y col enfotu de qu’otros s’encargarán de buscar soluciones a los problemes que los aforfuguen. Son capaces d’allegrase y sonrir. Allegren d’esta forma a los que tenemos el privilexu de reparar con ecuanimidá les realidaes que nos amenacien a toos.

L’inventu perestrañu de que Corea del Norte fundiera la corbeta sudcoreana Cheonan —diseñada con teunoloxía punta, dotada con un ampliu sistema de sonar y sensores acústicos somarinos—, n’agües asitiaes frente a les sos costes, culpábala del bederre fechu que costó la vida de 40 marinos surcoreanos y decenes de mancaos.

Nun yera fácil pa mi desentrañar el problema. Nun tenía, per un sitiu, la forma d’esplicame que fuera posible pa gobiernu dalgunu, por muncha autoridá qu’esfrutara, utilizar los mecanismos del mandu pa dar la orde de torpediar una nave insinia. Per otru llau, nun creyí per un segundu la versión de que Kim Jong Il diera esa orde.

Escarecía d’elementos de xuiciu pa llegar a una conclusión, pero tenía la seguridá de que China vetaría un proyeutu de resolvimientu del Conseyu de Seguridá que sancionara a Corea del Norte. Per otru llau nun tenía dulda dalguna de qu’Estaos Xuníos nun puede evitar l’emplegu de l’arma nuclear por parte del gobiernu incontrolable d’Israel.

N’hores avanzaes del día 1u de xunu empezó a descorrese’l velu de lo que realmente asocedió.

Escuché a les 10 y 30 p.m. el conteníu d’un analís agudu del periodista Walter Martínez, qu’ellabora Dossier, programa estelar de la televisión venezolana. Él llegó a la conclusión de qu’Estaos Xuníos fixo creer a una y otra parte de Corea lo que caúna d’elles afirmaba de la otra, coles mires de resolver el problema de la devolución del territoriu ocupáu pola base d’Okinawa que’l nuevu líder de Xapón, faciéndose ecu de les enganíes del país, demandaba. El so partíu llogró un enorme respaldu nes eleiciones por cuenta d’esa promesa de so pa llograr el retiru de la base militar ellí instalada, que ye un puñal claváu dende va más de 65 años nel corazón de Xapón, güei desarrolláu y ricu.

Al traviés de Global Research conócense los detalles verdaderamente estelantes de lo qu’asocedió, gracies al artículu de Wayne Madsen, periodista investigador que trabaya en Washington, que sopelexó información de fontes d’intelixencia nel sitiu web Wayne Madsen Report.

Diches fontes —afirmó— "...abarrunten que l’ataque contra la corbeta de guerra antisomarina de l’Armada surcoreana Cheonan foi un ataque de bandera falsa fechu por que paeciera provenir de Corea del Norte."

"Unu de los propósitos principales pal aumentu de les tensiones na península coreana yera aplicar presión sobre’l primer ministru xaponés Yukio Hatoyama pa que camudare de política sobre’l retiru d’Okinawa de la base del Cuerpu de Marinos d’EE.XX Hatoyama almitió que les tensiones pol fundimientu del Cheonan tuvieron una importante influencia na so decisión de dexar que los marinos de EE.XX permanecieren n’Okinawa. La decisión d’Hatoyama llevó a una división nel gobiernu de la coalición de centroizquierda, un fechu saludáu en Washington, pola amenaza del líder del Partíu Socialdemócrata, Mizuho Fukushima, d’abandonar la coalición pol cambéu d’actitú sobre Okinawa.

"El Cheonan foi fundíu cerca de la islla Baengnyeong, un llugar del estremu occidental alloñáu de la mariña surcoreana, pero frente a la mariña norcoreana. La islla ta altamente militarizada y dientro del algame de fueu d’artillería de les defenses costeres norcoreanes, que ta al otru llau d’una estrecha canal.

"El Cheonan, una corbeta de guerra antisomarina, tenía sonar de teunoloxía punta, y amás operaba n’agües con amplios sistemes de sonar hidrófonu y de sensores acústicos somarinos. Nun esiste evidencia suecoreana de sonar o d’audiu d’un torpedu, somarín o mini-somarín nel área. Una y bones nun hai casi navegación na canal, la mar taba silenciosa nel momentu del fundimientu.

"Sicasí, la islla Baengnyeong alluga una base d’intelixencia militar estaunidense-surcoreana y SEALS [fuerces especiales] de l’Armada d’EE.XX operen dende la base. Amás, había cuatro barcos de l’Armada d’EE.XX nel seutor, parte del Exerciciu Foal Eagle EE.XX-Corea del Sur, mientres el fundimientu del Cheonan. Una investigación de les buelgues metáliques y químiques del torpedu sospechosu amuesa que ye de producción alemana.

"Esisten barruntos de que los SEALS de l’Armada d’EE.XX caltienen una amuesa de torpedos europeos con fines de denegabilidá plausible p’ataques de bandera falsa. Amás, Berlín nun viende torpedos a Corea del Norte, sicasí, Alemaña caltien un programa d’estrecha cooperación de desenvolvimientu conxuntu de somarinos y armes somarines con Israel.

"La presencia del USNS Salvor, unu de los participantes en Foal Eagle, tan cerca de la islla Baengnyeong mientres el fundimientu de la corbeta surcoreana, tamién amena entrugues.

"El Salvor, un barcu civil de salvamentu de l’Armada, que participó n’actividaes d’allugamientu de mines polos marines tailandeses nel Golfu de Tailandia en 2006, tuvo presente cerca del momentu de la esplosión, con un complementu de 12 buzos d’agües fondes.

"Beixín, satisfecha cola afirmación d’inocencia de Kim Jong Il de Corea del Norte dempués d’un viaxe urxente en tren de Pyong Yang a Beixín, barruntu del papel de l’Armada de EE.XX nel fundimientu del Cheonan, asociáu a barruntos particulares respeutu al papel xugáu pol Salvor. Los barruntos son los siguientes:

"1. El Salvor participaba nuna operación d’instalación de mines nel llechu marín; n’otres pallabres, asitiaba mines antisomarinas disparaes horizontalmente no fondero de la mar.

"2. El Salvor taba realizando inspeición rutinaria y caltenimientu de mines nel llechu marín, y asitiándoles nuna manera eleutrónica activu —disparu por gatíu sensible— como parte del programa d’inspeición.

"3. Un buzu de los SEALS asitió una mina magnética nel Cheonan, como parte d’un programa clandestín col enfotu d’influyir la opinión pública en Corea del Sur, Xapón y China.

"Les tensiones na península coreana clisaron convenientemente tolos demás puntos de l’axenda nes visites de la secretaria d’Estáu Hillary Clinton a Beixín y Seúl."

Asina, de forma ablucantemente fácil, Estaos Xuníos llogró resolver un importante problema: liquidar el gobiernu d’Unidá Nacional del Partíu Demócrata de Yukio Hatoyama, pero a un peraltu costu:

1- Ofendió fondamente a los sos aliaos de Corea del Sur.

2- Destacó l’habilidá y rapidez con qu’actuó’l so alversariu Kim Jong Il.

3- Resaltó’l prestíu de la potencia china, que’l so Presidente con plena autoridá moral movióse personalmente y unvió a los principales líderes de China a falar col Emperador Akihito, el Primer Ministru y otres personalidaes eminentes de Xapón.

Los líderes políticos y la opinión mundial tienen una prueba del cinismu y la falta total d’escrúpulos que carautericen la política imperial d’Estaos Xuníos.

Fidel Castro Ruz

Cuasi mediu millar de persones manifestáronse en Xixón contra l'ataque israelí a la 'Flota de la Llibertá'

Al traviés d'una convocatoria rápida y en poques hores por parte del Comité de Solidaridá cola Causa Árabe d'Asturies (CSCA), cuasique mediu millar de persones manifestáronse na tarde del llunes en Xixón en solidariedá con Palestina y en protesta pol ataque del exercitu d'Israel a la flota de la Llibertá, compuesta por seyes embarcaciones con 10 tonelaes d'ayuda humanitaria y unes 750 persones col resultáu de 10 muertos.

Pesie a lo apresurao de la convocatoria por mor del terscursu de los acontecimientos, cerca de quinientes persones concentráronse nel Paséu Begoña a les 20:00 hores. Tres la llectura del comunicáu refugando y condergando l'aición asesina y dexar clara la composición de la Flota de la Llibertá, el CSCA, tomaron la decisión de marchar hasta la Plaza del Ayuntamientu.

Nel percorríu peles cais de Xixón glayaronse consignes como: “¡Boicot a Israel!”, “¡Llibre, llibre, Palestina llibre!”, “¡Toos somos palestinos!” o “¡Vosotros sionistes, sois los terroristes!”

Fonte: INFOASTURIES.

Areces nauguró una fábrica de tortilles

Ye bien conocida l'afición del presidente del "Principado", Vicente Álvarez Areces, a les tortilles. Pues bien, esti llunes, foi unu de los más felices ya importante dende que llegare a la presidencia.

Ensin dubia, foi la nauguración suañada dempués de cientos d'elles (dalgunes ensin los naguaos pinchinos de tortilla) en tantos años de dura dedicación a la política. En Mieres entamaba a furrular una fábrica de la portuguesa Ovofoods que tien de productu estrella la tortilla y que ye la punta de llanza del plan reindustrializador del gobiernín.

Naz nel polígonu de baiña con unes ayudes de más de cinco millones d'euros por ser un proyectu xenerador d'emplegu nes cuenques mineres, la planta va porcesar namás y namenos que trés millones de güevos diarios y tropecientes tortielles. Ensin dubia, cola instalación inaugurada por Areces, Asturies conviertese nun país productor de tortilla

Fai! cellebró la II Folixa " Asturies enxamás vencida".

"Xixón cellebró la II Folixa Asturies Enxamás Vencida

Como taba previsto, la organización d'esquierda soberanista Fai! llevó alantre la II Folixa Asturies Enxamás Vencida el pasáu sábadu 22 de mayu na Casa Sindical de Xixón conmemorando d'esti xeitu'l 202 aniversariu de los acontecimientos del 25 mayu de 1808 n'Asturies.

Esta xornada entamó a les 20:00h nel salón d'actos de la Casa Sindical cola actuación de Da Robotz, con un recintu engalanáu con una bandera nacional de decenes de metros cuadraos que taba escoltada poles enseñes d'otres naciones ensin estáu européees (Euskal Herria, los Paisos Catalanes, Llión, Andalucía, Escocia, Irlanda...) ensin escaecer les de Palestina y el Sáhara. Al tiempu, una referencia a la llucha popular del pueblu de Grecia, con un gran panel nel que se lleía "Pueblos d'Europa irguíivos" n'inglés (Peoples of Europe...¡rise up!) que finaba con un "Asturies írguite".


Mentanto los asistentes diben entrando y disfrutando de la música lletrónico medraba'l baturiciu alrodiu los puestos de material de les organizaciones y espacios convidaes (les organizaciones polítiques UNA, Darréu, CMC, Coordinadora Antifacista d'Asturies, RASH-Asturies y el llocal Cambalache) y de la barra onde se podía consumir bébora y xinta con precios populares.

Soles 23:00 vieno la breda de Galán, raperu natural de Tresona (Corvera), que caleció l'ambiente'l salón coles sos rimes combatives ya iróniques, dándo-y pasu a les afilaes lletres d'Arma X gociando dambos de la devoción del públicu, que pudo esfrutar coles collaboraciones de Delfo (La Tarrancha) nún tema.

Escontra les 2:00 am aportó l'actuación de "La Tarrancha" que col so soníu informal y mestizu preparó'l tarrén pa los aragoneses Mallacán. La mecigaya d'estilos, la so música fiero y identitario foi bien acoyío poles y polos asturianos que s'averaren a la Casa Sindical como bien demostró la grande cantidá de discos vendíos nel puestu instaláu nel conciertu. A mou de dispidida final Xune, cantante del autóctonu más que reconocíu grupu Dixebra, acompangó a esti grupu nel cantar Gora Herria, versión del míticu grupu Negu Gorriak, cosa que foi bien agradecida polos y poles presentes nuna collaboración inédita y que dexó entregaos a los y les presentes.

Dende Fai! queremos agradecer fonderamente a tolos grupos, organizaciones y xente individual poles cellebrar xuntos esta II Folixa Nacional (y toles facilidaes y collaboraciones que y animavos a participar l'añu que vien.

¡PUXA'L 25 DE MAYU!

¡PUXA ASTURIES LLIBRE!

Toles semeyes en: http://www.flickr.com/photos/fai-asturies/ en formatu copyleft, non deriváu comercial."


Estrayiu de la páxina web de Fai!.

L’Imperiu y la Guerra

Va dos díes, en curties pallabres, señalé que l’imperialismu nun podía resolver el pergrave problema del consumu d’estupefacientes qu’azota a la población del mundu. Güei deseo encetar otru tema al mio xuiciu de gran trescendencia.

L’actual peligru de que Corea del Norte seya atacada por Estaos Xuníos, a partir del recién incidente que tuvo llugar nes agües d’esi país, seique pueda evitase si’l Presidente de la República Popular China decide utilizar el derechu de vetu, prerrogativa que nun-y gusta n’absolutu a esi país exercer nos alcuerdos que s’alderiquen nel Conseyu de Seguridá de Naciones Xuníes.

Esiste un segundu y más grave problema pal qu’Estaos Xuníos nun tien respuesta posible: el conflictu creáu tocante a Irán. Ye daqué que se vía venir claramente desque’l Presidente Barack Obama pronunció’l so discursu’l 4 de xunu de 2009 na Universidá Islámica d’A el-Azhar, en El Cairu.

Nuna reflexón qu’escribí entós, cuatro díes más llueu, cuando dispunxi d’una copia oficial del discursu, utilicé numberoses cites p’analizar la importancia del mesmu.

Voi Señalar un númberu d’elles.

"Rexuntamos nun momentu de tensión ente Estaos Xuníos y musulmanes alredor del mundu…"

"…el colonialismu negó-yos derechos y oportunidaes a munchos musulmanes,…la Guerra Fría de cutiu utilizaba a los países de mayoría musulmana como axentes, ensin tener en cuenta les sos aspiraciones propies."

Impresionaben realmente esi y otros razonamientos en boca d’un Presidente afroamericanu, que paecíen verdaes evidentes como les conteníes na Declaración de Filadefia’l 4 de xunetu de 1776.

"Vini equí a buscar un nuevu empiezu pa Estaos Xuníos y musulmanes alredor del mundu, que se base n’intereses mutuos y el respetu mutuu…"

"Como nos diz el Sagráu Corán, ’tengan conciencia de Dios y digan siempres la verdá’."

"…ye parte de la mio responsabilidá como Presidente d’Estaos Xuníos lluchar contra los estereotipos negativos del Islam uquier que surdan."

Siguió asina esbillando temes escabrosos del universu de contradicciones insolubles qu’envolubren la política d’Estaos Xuníos. "Metanes la Guerra Fría, Estaos Xuníos desempeñó un papel nel derrocamientu d’un gobiernu iranín escoyíu democráticamente."

"Dende la Revolución Islámica, Irán desempeñó un papel en secuestros y actos de violencia contra militares y civiles estaunidenses."

"Los estrechos venceyos d’Estaos Xuníos con Israel son bien conocíos. Esti venceyu ye infrayable."

"Munchos esperen, en campamentos pa refuxáu na Ribera Occidental, Gaza y tierres de la redolada, una vida de paz y seguridá que nunca tuvieron."

Güei sabemos que sobre la población de Gaza cai con frecuencia un agua de fósforu vivu y otros componentes inhumanos y crueles, llanzaos sobre la Franxa, con roxura verdaderamente nazi fascista. Sicasí, les afirmaciones d’Obama paecíen vibrantes y n’ocasiones sinceres, en tanto diba repitiéndoles una y otra vegada, metanes febril cuerre cuerre pel mundu, uquier qu’a la so hora programada llegaba l’avión númberu ún de la Fuercia Aéreo d’Estaos Xuníos.

Ayeri 31 de mayu, la comunidá internacional foi conmocionada col asaltu, n’agües internacionales a decenes de milles de la mariña de Gaza, de cásique un cientu de soldaos de les fuercies especiales d’Israel, que baxaron dende helicópteros n’hores de la madrugada, disparando frenéticamente contra centenares de pacífiques persones de diverses nacionalidaes, causándo-yos —según informaciones de prensa— non menos de 20 muertos y decenes de mancaos. Ente les persones atacaes, que tresportaben mercancíes pa los palestinos sitiaos na so propia Patria, había ciudadanos norteamericanos.

Cuando Obama faló na Universidá Islámica d’A el-Azhar del derrocamientu d’un gobiernu iranín escoyíu democráticamente" y darréu añedió que "Dende la Revolución Islámica, Irán desempeñó un papel en secuestros y actos de violencia contra militares y civiles…", referíase al movimientu revolucionariu promovíu pol Ayatollah Ruhollah Jomeini, que dende París, ensin una sola arma, entartalló a les Fuercies Armaes del más poderosu xendarme con qu’Estaos Xuníos cuntaba nel Sur d’Asia. Yera bien difícil que la más poderosa potencia del mundu aguantara la tentación d’instalar ellí una de les sos bases militares, al Sur de la URSS.

Fai yá más de cinco décades, Estaos Xuníos entartallara otra Revolución absolutamente democrática, cuando derrocó’l gobiernu iranín de Mohammad Mossadegh. Esti foi elixíu Primer Ministru d’Irán el 24 d’abril de 1951. El senáu aprobó la nacionalización del petróleu, que fuera la so bandera de llucha, el 1 de mayu d’esi mesmu añu. "Los nuesos llargos años de negociaciones con países estranxeros ―declaró― nun dieron resultancia hasta equí."

Ye obviu que se taba refiriendo a les grandes potencies capitalistes, que controlen la economía mundial. Irán tomó posesión de les instalaciones énte la intransixencia de la British Petroleum, qu’entós llamábase Anglu-Iranian Oil Company.

El país nun tenía posibilidaes de formar téunicos. Gran Bretaña retirara’l so personal calificáu, y respondió con bloqueos de pieces y mercaos. Unvió la so flota de guerra en zafarranchu de combate al país. Como resultáu, la producción petrolera d’Irán menguó de 241,4 millones de barriles en 1952, a 10,6 en 1953. Neses favorables condiciones la CIA entamó’l golpe d’Estáu que derrocó a Mossadegh, hasta la so muerte que tuvo llugar trés años dempués. La monarquía foi reestablecida y un poderosu aliáu d’Estaos Xuníos xubió al poder n’Irán.

Estaos Xuníos nun fixo otra cosa colos demás países que nun seya eso; desque se creó esa nación nos suelos más ricos del planeta, nun respetó nunca los derechos de los pobladores indíxenes qu’ellí vivieron mientres milenios o fueron importaos como esclavos polos colonizadores ingleses.

Toi seguru, sicasí, de que millones de norteamericanos intelixentes y honestos entienden estes verdaes.

El Presidente Obama puede pronunciar cientos de discursos, tratando de conciliar contradicciones que son inconciliables en desterciu de la verdá, suañar cola maxa de les sos frases bien articulaes, mientres fai concesiones a personalidaes y grupos carentes dafechu d’ética, y dibuxar mundos de fantasíes que namái caben na so cabeza y qu’asesores ensin escrúpulos, conociendo los enclinos suyos, semen na so mente.

Dos entrugues obligaes: ¿va poder Obama esfrutar les emociones d’una segunda eleición presidencial ensin que’l Pentágonu o l’Estáu d’Israel, que nel so comportamientu nun acata en nada les decisiones d’Estaos Xuníos, utilicen les sos armes nucleares n’Irán? ¿Cómo va ser la vida nel nuesu planeta dempués d’eso?


FIdel Castro Ruz

Ñaz un nuevu partíu asturianista en Corvera

Esti xueves 3 de xunu preséntase MAS Corvera, una nueva agrupación que quier representar a tol asturianismu del conceyu "siendo una alternativa a los partíos tradicionales".

MAS Corvera defínese como unpartiu políticu de calter local inspiráu nos principios de la democracia social, los derechos humanos y de los pueblos, el desendolcu caltenible y la defensa del mediu ambiente, la xusticia, la paz y la solidaridá internacional.

L’agrupación diz asumir como propia la hestoria y aportación del socialismu democráticu, na defensa de los drechos de los más desfavorecíos y na llucha pola construcción d'una sociedá más xusta y igualitaria, “apostando nidiamente por mecanismos de participación ciudadana, como lo ye la democracia participativa.

La presentación oficial d’esta nueva candidatura asturianista ye’l próximu xueves 3 de xunu a les 16.30 nel Centru Sociocultural de Los Campos en Corvera, na mesma intervendrá’l secretariu xeneral de la formación, Xicu Mata

Fonte: Asturies.com

Vidiu del pasucais del XIII Día d'Andecha en Villaviciosa

Intervención de Mariu Arbesú nel XIII Día d'Andecha por parte d'AA.

Bones tardes collacios y collacies d’Andecha Astur.Bones tardes tamién a los vecinos y vecines de la Villa que s’arrimaron fasta equí esta tarde a acompañanos nesti Díi d’Andecha.Un saludu tamién, como non, a les delegaciones de les estremaes organizaciones que güei nos acompañen: CAA, CSI, BPA, PAS, Los Verdes d’Asturies, FAI y al PCPE d’Asturies que disculparon la so ausencia pero que sí mos unviaron un saludu.Por supuestu tamién a la mocedá de Darréu y los compañeros y compañeres del Conceyu d’Andecha Astur de Villaviciosa.
La verdá qu’hai que reconoce-y a la xente d’Andecha Villaviciosa qu’el sitiu escoyíu pa facer un actu como esti ye perfeutu y más nun día como güei nel que’el tiempu vien acompañándonos.

El 25 mayu de 1808

Andecha Astur siempres celebra’l so Día d’Andecha, el día de la organización, nel sábadu más prósimu al 25 de mayu.

D’esta manera, dende hai yá 13 años, remenbramos esta fecha hestórica: el 25 de mayu de 1808 día nel que Asturies declaró la so soberanía,



Los otros dies nacionales

Nun foi la única vez qu’Asturies declaró la so independencia. Como sabéis, a lo llargo la hestoria, n'ocasiones estremaes, les nueses y los nuesos antiguos decidieron como asturianes y asturianos llibres siguir el camín de la independencia: el 5 d’ochobre de 1934, el 24 d’agostu de 1937 y el 25 de mayu de 1808.

Nadie nun podrá dicir qu’Andecha Astur nun-y da importancia a estes feches hestóriques.

De fechu, camentando nello, estos díes atrás pensé lo guapo que yera qu’Andecha a lo llargo los años fuere, pasu ente pasu, creando un calendariu propiu de dies nacionales nos que recordando la hestoria vindicamos el presente y el futuru d’Asturies:

Asina, el 25 de mayu ye’l día d’andecha.

N’ochobre la mocedá de Darréu entama el Díi de la Mocedá Revolucionario pa conmemorar la revolución asturiana de 1934.

Y el 24 d’agostu organizamos, dende unos pocos años p’acá, un actu politicu recordando al Conseyu Soberanu d’Asturies y Lleón. L’añu pasáu, por primera vegada ficimos l’actu en El Puertu Tarna onde afitamos un monolitu en memoria del Conseyu Soberanu y onde cuntamos cola presencia del nietu de Belarmino Tomas.

Per otru llau, el 8 setiembre en confrontación al Día d’Asturies institucional nós entamamos el Día de la Nación Asturiana.

Podría poner más exemplos d’otros dies de reivindicación nel calenderiu particular d’Andecha Astur como'l Día les Lletres, el Primeru Mayu o’l actu d’ochobre nel cimenteriu Pando ente la tumba de Belarmino Tomás (últimu presidente d’una Asturies llibre y socialista).



Una organización va construyéndose a lo llargo los años

Cuento esto como exemplu de qu’una organización nun se funda y yá tá sinon que va faciéndose a si mesma y como Andecha Astur va construyéndo a lo llargo los años, el so propiu calendariu de feches importantes, los sos símbolos, la so propia personalidá, el so discursu y el so proyeutu políticu.

Por Andecha Astur pasaron, pasen y pasarán muches persones y la organización ye la suma de les aportaciones particulares de ca una d’elles. Toes y cáuna d’eses persones ye importante y aportó daqué na construición de lo que güei ye Andecha Astur.



Andecha Astur cumplió esti añu 20 años d’esistencia.

Que pasaren yá 20 años dende la so creación y que la organización siga tan viva amuesa a les clares lo necesario de la so esistencia. La vivacidá d’Andecha Astur nesti momentu, la ilusión cola que trabayen a diariu los sos militantes y les incorporaciones continues de nuevos militantes y especialmente de xente mozo al traviés de Darréu amuesen lo vixente del proyeutu políticu y la capacidá de la organización pa dir adaptándose a la situación del momentu políticu. Andecha Astur ye una ferramienta útil y necesaria, Andecha Astur si nun esistiere habría qu’inventala y habriamos perdio yá 20 años de compromisu social y políticu con Asturies si fae 20 años, tal día como güei un 25 mayu de 1990 n’Uvieu un grupu de persones nun hubiere decidió entamao con Andecha Astur. Gracies a ellos, a eses persones y a toos vosotros, a los que güei formamos parte d’Andecha Astur por facer que fueren posibles estos 20 años y porque otros munchos más nos queden per delantre.

Un mundiu cambiante

El mundiu ta en permanente cambiu, los cambios si los miramos con un poco de perspeutiva son realmente vertixinosos. Nós como asturianos y asturianes politizaos y sensibilizaos tenemos de tar sollertes a los continuos cambios sociales, políticos y tamién medioambientales que se mos vienen presentando y tenemos el retu d’interpretar de forma crítica y de saber enfrentar cada nueva situación con propuestes polítiques y adaptando'l proyeutu nacionaliegu y d’izquierdes a la nueva realidá.

La Crisis social

Les noticies que mos lleguen a diariu sobre la crisis mundial o'l desaniciu medioambiental nun inviten muncho al optimismu.Nun fai falta lleer los periódicos pa dase cuenta de lo dramátiques de les consecuencies de la crisis n’Asturies. El paru y la emigración yeren un llastre qu’Asturies venía arrastrando dende fai tiempu, pero agora el paru yá nun afecta sólo a la mocedá sinon a otros seutores y capes sociales.

La severidá de la crisis mundial xunido a la vulnerabilidá d’Asturies ensin poder políticu dalu dientru l'Estáu Español situanos na necisidá urxente d’algamar poder pa defendenos como asturianos y asturianes y como trabayaores. La indefensión d’Asturies sin poder políticu ye enorme, nun podemos siguir más tiempu baxo’l rexime de la FSA colos sos complices de gobiernu d’ IU, BPA y los Verdes d’Asturies. Esto ye un mensaxe pal BPA y pa Los Verdes, (agradecemosvos la vuesa presencia equí y defechu invitámosvos porque nos parecía importate que toviereis con nosotros esti día) pero ensin ánimu ofensivu solamente críticu: si de verdá somos ecoloxistes y nacionalistes d’izquierda hai que salise d’esi gobiernu, nel que nunca debisteis entrar, al que nunca debesteis pertenecer.

IU, BPA, Los Verdes con Valledor primero y agora con Jesus Iglesias, Noemi o Roberto Colunga nun puen aplazar los conflictos un día tres otru pa xustificar so la presencia nel gobiernu, refiérome a la oficialidá, l’estatutu, la incineradora, Caliau o al decretazu antisocial de Zapatero.



Falar con toos

Y dempués sí, dempues sí. Una vegada fuera del gobiernu podremos falar, podremos falar y queremos falar con ellos también y por supuestu con toles fuercies polítiques asturianes, col PAS, el BPA, con UNA, col PCPE d’Asturies, con sindicatos, con movimientos sociales, con toos aquellos axentes activos de la sociedá asturiana que coincidamos na necesidá de desterrar d’Asturies definitivamente a la FSA, al PP y a IU.

Nós reafirmámonos na nuesa propuesta que yá presentemos l’añu pasáu por estes feches y a la que nós llamamos XUNIDA D’AICIÓN.



Xunidá d’aición

Y daqué tuvimos que facer bien nesti añu en cuantes a les relaciones con otres organizaciones polítiques porque presta ver la rempuesta tan positiva en cuantes a delegaciones d’otres organizaciones que tan participando güei nel Día d’Andecha. Gracies PAS, gracies PCPE, Fai!, BPA, Los Verdes, CSI, CAA, Partiu Carlista.

La nuesa propuesta de xunidá d’aición presentámosla tal día como güei va un añu nel Día d’Andecha de Ribeseya y el resultáu creo que nun pudo ser meyor. Les organizaciones fueron entendiendo fácilmente la idea d’Andecha. Fuimos quien a trabayar conxuntamente en cuestiones concretes con organizaciones tan distantes entre elles comu lo son el PAS y el PCPE d’Asturies. Y con otres organizaciones queremos dir abriendo esi camín.

Ye necesaria tola collaboración posible pa superar la situación pola que pasa Asturies y la xunidá d’aición lo bono que tien ye que plantega namai la necesidá de converxer n’aquelles campañes o movilizaciones que nun principiu se compartan dende la so propia perspeutiva y con independencia dafechu de cada organización.

Les convocatories elleutorales tienen que ser consideraes dientru d’esa xunidá d’aición. Nesti sen foi esitosu'l Conceyu Abiertu que tuvimos en Xixón y nel que participaron persones independientes y organizaciones aldericando sobre toes estes cuestiones.

Andecha tiende güei la mano a toos y toes vosotres pa, partiendo d’esta dinámica xunitaria pa siguir falando y viendo les diferentes posibilidaes de xuntura, respetando la soberanía de les organizaciones y la validez y llexitimidá de cada proyeutu políticu buscando siempres l’interes d’Asturies y de los nuesos paisanos y paisanes.

Namái. Munches gracies.

Puxa Andecha Astur!!Puxa Asturies llibre y socialista!!

Estrayiu de la páxina web d'Andecha Astur.

Intervención de Paloma García nel XIII Día d'Andecha por parte de la mocedá de Darréu.

Nesti decimotercer Día d’Andecha del que Darréu forma tamién parte, comu nun podía ser d’otra manera, felicitamos a Andecha Astur nel so vixésimu aniversariu polos 20 años andechando, polos 20 años de llucha, polos 20 años defendiendo la tierra, polos 20 años defendiendo al pueblu asturianu y los drechos que comu tal y correspuenden.
Nesti 2010, conmemoramos un fechu perimportante asocedíu na hestoria d’Asturies, va yá 202 años del 25 de Mayu de 1808. Esti día onde’l pueblu asturianu decidió ser soberanu, escoyo’l camín del autodetermín, escoyó’l camín de la llucha, la defensa del pueblu y de les sos istituciones. Ye mui importante conocer la nuesa hestoria y deprender tolo que podamos d’ella, pero entá más importante ye poder facer hestoria, formar parte d’ella, escribila nós, y esto sólo ye posible apostando por proyeutos comu’l d’Andecha Astur y Darréu.

Proyeutos qu’ente otres munches coses, miren pol futuru de la mocedá asturiano, que seyan capaces d’analizar y guetar una solución a la difícil situación na que mos atopamos: emigración a la gueta d’un trabayu dignu, precariedá llaboral, paru, complicáu por nun dicir imposible accesu a la vivienda... Si queremos vivir nuna Asturies con futuru ye imprescindible la llucha de los xóvenes al traviés d’organizaciones como Darréu, hai qu’organizase p’asina poder defendemos.Anguaño tamos frente al fracasu del capitalismu, la cris social ya económica lleva sofriéndose nel nuesu país varies décades, tamos cerca de los 100.000 paraos, más del 14% de la población asturiana vive baxo l’umbral de la probitú, continuen col desmantelamientu industrial, sigue’l desaniciu de l’agricultura y la pesca, y cada vuelta medra más l’esfarrape la ñatura: centrales térmiques, llinies d’alta tensión, parques eólicos, banzaos, regasificadora...

La solución depende de nós, de toos y caún de lxs asturianxs, nes nueses manes tá costruyir l’alternativa popular que camude esta llaceriosa situación. Como independentistes y anticapitalistes, camentamos que la sociedá asturiano podría desendolcase llibremente n’una Asturies independiente y non sometida a los intereses de la burguesia española. Nuna Asturies llibre y socialista.L'Estatutu d'Autonomía que tenemos ta fechu y diseñáu baxo los intereses del gobiernu español en Madrí non pola voluntá popular asturiana. La nuesa llingua entá nun tien l'estatus llegal y políticu que-y cuerrespuende, l’estáu español sigue tratando de ñeganos la nuesá identidá, tratando de prohibinos ser asturianes. Poro, nun mos sirve esti estatutu d’autonomía. Porque somos asturianes y nun mos sentimos españoles. Porque tenemos drechu a espresanos na nuesa llingua.Porque toes y toos somos necesarios nesti camín pola nuesa llibertá animo a la mocedá asturiano a sumase al nuesu proyeutu, a integrase y militar en Darréu y entre toos costruyir esi camín hacia una Asturies soberana, dueña del so destín. ¡PUXA ANDECHA ASTUR!¡PUXA DARRÉU!

Estrayíu de la páxina web d'Andecha Astur.

Andecha Astur cellebró'l so XXI Día d'Andecha con cientos de persones.

Andecha cellebró venti años d'esistencia col día del partiu en Villaviciosa esti sábadu pasáu. Esti día cumplia la so 13er edición y trata de conmemorar la declaración de soberanía de 1808. Nel actu tuvieron presentes delegaciones d'estremaes organizaciones tales como'l Bloque por Asturies, FAI!, la Coordinadora Antifacista, PAS, Partíu Carlista d'Asturies, Los verdes o la Corriente Sindical d'Izquierda. La organización de mocedá Darréu participó activamente nel actu.

Ente les actividaes destacaes del día taben un pasucais, l'actu políticu, una espicha popular y un conciertu. La xornada entamó col pasucais, que percorrió les cais más centriques de " La Villa", onde dellos gaiteros y decenes de militantes y simpatizantes ficieron visibilizar la xornada a los habitantes, ente'l plasmu d'estos pol pasucais, que llamó abondo l'atención.

Darréu d'esto la xente foi averandose a les Escueles Vieyes onde pocu a pocu foi creyandose un bon ambiente hasta qu'alredor de les 20:30 hores entamó l'actu políticu cola presencia d'unes 200 persones. Les organizaciones convidaes dieron el so saludu y tuvieron el so espaciu pa espresar los sos esmoleciomientos y la so visión de la xornada entamada dende Andecha. Tres esto, entamaron les intervenciones de Darréu, Andecha Astur nel Conceyu de Villaviciosa y el voceru nacional d'Andecha.

Entamó Paloma García falando pola organización de mocedá independentista revolucionario Darréu. Nel so discursu señaló la importancia de proyeutos del calter de Darréu, proyeutos asturianos y mozos y señaló la importancia de integrase en proyeutos asina pa defendenos como Pueblu.

Dempués toco la intervención del voceru llocal Xandru Vega que valoró'l trabayu d'Andecha Astur nel conceyu y acsuó de caciques a les alcaldies del PP y d'UAS respeutivamente. Tamién agradeció'l sofitu a toles persones y comercios que collaboraron pa entamar la xornada.

Pa finar, llego'l turnu al voceru nacional d'Andecha Astur Mariu Arbesú, qu'agradeció enforma l'asistencia de les organizaciones y de tolos simpatizantes. El militante d'Andecha valoró dates como'l 25 de mayu, el 5 d'ochobre o'l 24 d'agostu y señaló qu'estes amosaron un gran valor nel llibre determín del Pueblu Asturianu. Valoró tamién los venti años d'Andecha Astur y la estratexa plantegada de xunidá d'aición. Tamién dio-y al Bloque por Asturies y los Verdes la so opinión de que ye de vital necesidá abandonar el Gobiernu d'Asturies y lluchar escontra'l réxime de la FSA, del PP y de IX. L'actu políticu finó cola interpretación de " La Flor del Agua ".

Darréu, hebo una espicha con abonda xente onde los asistentes pudieron aldericar y cenar con un inmeyorable ambiente. La espicha allargose hasta les 22:00 hores. Pasaes les 22:00 h. entamó'l conciertu programáu colos grupos n'Ochobre, Taranus y Dixebra. El conciertu zarrose con alredor de 500 persones con una gran folixa y asina finó'l XIII Día d'Andecha. L'eventu tuvo una valoración positiva por parte de los asistentes y axuntó munches persones a lo llargu del día.

Semeyes: Infoasturies.

Concentración escontra la incineradora

El Conceyu Contra la Incineración, la Plataforma de Ganaderos y Afectaos pola Incineradora y el Consorciu Cívicu entamen el prósimu domingu 6 de xunu, a les 12:30 hores, una concentración na plaza’l Naúticu de Xixón.

Dientro de la campaña que tan faciendo escontra la incineradora de borrafes doméstiques que pretende faer COGERSA (Consorciu pa la Xestión de Borrafes Sólides d’Asturies) col sofitu del PSOE y del PP p’asitiar en Xixón, y baxo’l llema "esta incineradora ye la leche" los coleutivos contrarios a la planta, convidan a participar na concentración escontra la amenaza que supon pa la salú ya’l mediu la incineradora de Serín, que la so construcción afectara a más de 500 esplotaciones ganaderes.

Na concentración fadrá una degustación simbólica de lleche ensin dioxines, lo que quiciabes non se podra faer nun futuru prósimu si entra’n funcionamientu la peligrosa incineradora.

Fonte: Aruelu.

Andecha Astur va cellebrar el XIII Día d'Andecha en Villaviciosa

Andecha Astur entama esta xornada dende va 13 años, como día de conmemoración del 25 de mayu y la soberanía de 1808 y esta edición ye más especial entá, porque nesti 2010 cellebra'l vixésimu aniversariu de l'aniciu de la formación. Nesta ocasión, el Día d’Andecha va cellebrase’l prósimu sábadu 29 de mayu nes Escueles Vieyes de Villaviciosa, onde va tar instalada una carpa.

La xornada va empicipiar a les 18’00 hores y van desendolcase una bona riestra d’actividaes: música del país, espor tradicional, pasucais con banda gaites peles cais de la villa, actu políticu, espicha popular, y rematará con un Conciertu de grupos asturianos, a les 21:30 hores, nel que van participar Dixebra, Taranus y un tercer grupu sorpresa.

Como ye vezu toles actividaes del Día d'Andecha son de baldre quitando la espicha popular que se va cellebrar dende les 20:00 hores y que va tener un preciu de collaboración de 10€.

Dende Andecha Astur animen a los vecinos y vecines de Villaviciosa y a la ciudadanía asturiana en xeneral a "cellebrar con nós esta xornada de convivencia, conmemoración, vindicación y folixa".

Reportaxe n'Asturies.com sobro'l 25 de mayu.

Dende la esquierda independentista hasta los los miembros del PP coles posiciones más favoratibles a la identidá del país, l’asturianismu políticu queda col 25-M como Día d’Asturies.

Asturies.com fixo una encuesta ente delles fuercies y coleutivos políticos del ámbitu asturianista pa saber la so opinión sobre la fecha del 25 de marzu. Día del que fai anguaño 202 años, la Xunta Xeneral proclamó la so soberanía y declaró la guerra al invasor francés, unviando embaxadores a Inglaterra pa recabar apoyos.

Pa Xosé Firmu García, coordinador del Bloque por Asturies en Siero, el Día d’Asturies tien que ser una xornada pa reflexonar cuálos son los elementos que nos convierten nuna comunidá social, qué quier dicir ser asturianu o cómo podemos enfrentar los problemes coleutivos, “el papel pue cumplilu muncho meyor el día 25 de mayu”.

Amás, señala como una virtú de la fecha que caben llectures hestóriques diverses, “poro, ye ideal pa se planteguen y debatan visiones distintes d’Asturies”. Firmu diz qu’hai que dir dando puxu al 25-M, afirmando que si fore festivu diba facilitar la realización d’actos, “pero la custión ye la reivindicación del día, non que seya festivu y acabó”.

Del mesmu mou, fai un llamáu a asociaciones y colectivos pa plantegar esta fecha como alternativa a la institucional, dexando asina de llau’l 8 de setiembre, “una fecha más proclive a dexalu nun asuntu relixosu y que la identidá quede no meramente folixero, amás, nun creo que nengún país celebre dos díes conmemorativos distintos”

Mientres, l’historiador y voceru d’Unidá Nacionalista Asturiana Faustino Zapico, diz que'l 25-M sería una bona ocasión pa facer pedagoxía política y desplicar ente la población asturiana'l significáu históricu d'esi día. Anque diz que dulda que la clase política, “polo demás tan ignorante”, tenga nunca'l menor enfotu nello, “a nun ser qu'empecemos a cambiar les coses”.

Según Zapico, el 8 setiembre, naz como una fiesta relixosa asociada a la Virxe de Cuadonga, “al nun se conocer la fecha exacta de la batalla”. Sicasí, afirma que la mayoría de la población asocia'l día col orixe del reinu ástur.

El voceru d'UNA diz que’l día ta mui afitáu, anque “dame que la mayoría de la xente sigue viéndolu como'l día de la Santina" y ye'l propiu nacionalismu asturianu'l que dende los años 80 lu llama Día de la Nación Asturiana.

Dende’l Circulu Lliberal, el so presidente, Humberto Gonzali, diz que’l 25-M tendría que ser una fecha pa la divulgación de los valires asturianos, “nun hai dulda de que tien más significación que’l 8 setiembre”.

Anque afirma que la fecha nun ye incompatible col 8-S. “Pa la gran mayorías ye’l Día d’Asturies, inclusive antes de que se-y diera oficialmente esti rangu, y ye un día claramente festivu. Ye lo que los asturianos quieren, y ta bien qu’asina siga siendo, lo que nun quita pa que nel 25 mayu afayemos una xornada onde s’afite la personalidá política de la nuestra comunidá”, señala.

Xosé Alberto González, miembru de Darréu, tamién reivindica que’l 25-M seya’l Día d’Asturies. Sicasí, apunta que la mayoría de la población del país consideren el 8-S como'l Día d'Asturies, “nun reivindicalo sedría alloñase del pueblu”.

Asina, diz que la llabor del independentismu y el nacionalismu asturianu ye dar otru puntu de vista. “Lo qu'hai que camudar ye qu'esti día dexe d'afitar l'españolismu cuadonguista y tornalu nuna espresión popular polos drechos nacionales y sociales d'Asturies”, afirma.

Con too, señala qu’hai que tener presente qu'a lo llargo de la hestoria hai muches feches pa reivindicar, como'l 24 d'agostu (Declaración del Conseyu Soberanu d'Asturies y Lleón) o'l 5 d'ochobre( Éntamu de la Revolución Asturiana). “Toes estes feches son compatibles y podríen ser reivindicaes como Día Nacional Asturianu”, solliña.

Dende Fai!, Iyán González recuerda que’l 25-M vieno celebrándose históricamente, “dende enantes de la imposición del ruinu estatutu d'autonomía”, de manera popular por Conceyu Bable, “el soberanismu asturianu embrionariu”. Afirma que conmemorar el 25-M supón devolvé-yos la dignidá a aquelles muyeres y a aquel pueblu que se llevantaron polo suyo, “por esi país que cuando se vía amenazáu enxamás duldó en garrar plenu poder sobre esta tierra pa defendese y decidir el so propiu destín”.

Pal miembru de Fai!, el 8 de setiembre ye un día onde los comercios tan trancaos y nel que la prensa de mases d'Asturies regala colgadielles y azulexos de la Santina, “al tiempu que'l gobiernín organiza un par de conciertos onde, a ser posible, traen a tonadilleres a cuerpu de rei”. Diz que la presencia d'elementos culturales ya identitarios asturianos na conmemoración oficial del 8-S ye cásique nula, “y les principales autoridaes polítiques del país van a una misa qu'echen pela televisión pública”.

Amás, afirma que’l papel que tien que tener el soberanismu d'esquierda ye'l d'aprovechar esi día festivu pa denunciar les polítiques d'aniquilación identitaria n'Asturies. Poro, fai un llamáu a nun acudir a los actos públicos del 8-S “y amosá-yos que nun tamos pa xarana, que nun tienen nada que celebrar y, al tiempu, aparcar esa data como Día de la Nación y promover abiertamente'l recuerdu a la memoria de 1808”.

Fonte: http://www.asturies.com/node/10930

Entrevista n'Aruelu a Atropar la Cai.

1. ALC surde a finales del añu pasáu ¿nestos meses d’actividá tas contentu cola evolución de la iniciativa?. ¿Ta medrando la difusión del material o básicamente avérense les mesmes persones?.

Toi mui contentu, ye más, salió meyor de lo que camentaba. Creyía que nos primeros meses sedría dificil recuperar les perres que representa sacar cada mes un modelu pero la xente respondió bien. Hailos que son "fieles" tolos meses, a los que-y lo agradezo muncho, porque na insistencia ye onde ta l’exitu. Depués cada mes sumasenos daquién y cuando pongo’l puestu de venta en dalgún conciertu la xente interesase por ello, ya inclusive hailos que se gasten 10 euros de sópitu pa incorporase a ALC. Alegrame muncho, "tampoco ye que siamos miles pero ta bien".

2. ¿En qué conceyos d’Asturies ta presente’l vuestru material? ¿Ta ente los oxetivos d’ALC llegar a tolos conceyos?.

Nel blogue tenemos un mapa google nel que voi señalando los llugares onde la xente dizme que pegó. Yo nun fui a tolos sitios a comprobalo, pero vamos, fiome de la xente. Asina, Les Arriondes, Siero, Ḷḷena, Uviéu, Xixón, Candás y dalgún sitiu mas perhí tán señalaos. Esto ye una carrera de fondu pero claro que me prestaría aportar a tolos conceyos, ye munchu dificil pero hai que ser ambiciosu. Polo menos yo voi siguir apostando pola estratexa de campaña continua como forma de medrar siempre que la xente me responda y llegaremos onde queramos.

3. La propaganda al traviés de cartelaes y pegatines tien bien d’años ¿nun crees que nos tiempos de les teunoloxíes nueves esti sistema pierde efectividá?.

Hai que tar en tolos frentes pero la pegatina tien una ventaya que nun tien internet: ye masiva. Por exemplu una Asturina pegada nuna señal de ceda’l pasu van vela tolos conductores que pasen perhí, mientres que los medios dixitales son medios pasivos.

Da visibilidá al movimientu. Siempre digo lo mesmo, pero los nuesos contramedios, (Glayíu, Aruelu, InfoAsturies o Asturbulla) son pa nós. Dificilmente un paisanu va ponese a buscar equí les noticies, tristemente entrará nos medios del réxime. Hai que trabayar eso, nun taría mal la ellaboración d’unos pasquinos d’estos cuatro medios pal so buzonéu o repartu ente’l "pueblu llanu" y que la xente s’avece a informase de la otra verdá nos contramedios.

4. Na entrevista fecha nel mediu dixital Asturbulla comentes delles estratexes emplegaes n’otros países pa xuntar a los militantes como los llocales independintes apartidistes ¿plantegase ALC l’apertura d’ún d’estos llocales o anguaño nun hai capacidá pa llevalu alantre?.

Si nun hai capacidá pa ello entós apaga y vamonos. Yo creo qu’esto ye trabayu del Ensame República Asturiana (ERA) que suma los más de los coleutivos del nuesu espectru ideolóxicu más que d’ALC. Personalmente siguiré defendiendo tala postura. Si tolos que mos sentimos identificaos cola república asturiana apoyamos l’apertura d’un llocal, por exemplu, n’Uviéu, sía la to ciudá o non, dará pie a que toos sofitemos l’apertura d’otru en Xixón qu’amás yá cuntaría cola ayuda del primer llocal. Pa l’apertura del tercer llocal yá cuntaríemos colos ingresos de los dos primeros...Ye que ¿por qué non? Hai que sumar y sumar y los llocales son ingresos, infraestructura y actividaes. Ye pol bien del país. De verdá que me prestaría dalgún día dir a Les Arriondes, por exemplu, y tomame una cerveza nel llocal del pueblu que s’abrió col esfuerzu de los rapazos d’ellí y col sofitu de tolos demás.

5. Esta selmana vais presentar una iniciativa nueva ¿en qué consiste?. ¿Qué proyeutos tien ALC nun futuru?

Camiento que non solo ye importante la visualización n’Asturies sinón qu’hai que buscar el sofitu d’otres naciones. Esta xente pue contate les sos esperiencies, estratexes y demás. A esto hai que sumar qu’aporta’l branu y los asturianos salimos a otres naciones. Ocurrióseme ufrir un modelu estándar de calter internacionalista, que se fadría baxo pidíu. Asina, si un rapaz dizme que va viaxar a Catalunya, si lo desea, podré face-y 250 pegatines por solo 5 € col llema "Hermanu catalán recuerda: Asturies nun ye España" pero tornáu al catalan. Asina col euskera, galego, ingles, gaélicu, castellanu, portugués... lo que me pidan. Yo toi avezáu a viaxar a otres naciones a conocer les sos lluches y siempre voi regalando pegatines, normalmente de los coleutivos asturianos, faciendo d’embaxador, intentando ganame’l ciñu y simpatía de la xente que llucha n’otros países. Nun sé, creo que ye una bona idega afalar que nos nuesos viaxes fuera sigamos siendo activos por Asturies.

6. Asoleyar material requier un esfuerzu económicu ¿cómo afrontais la financiación del mesmu?

Esto ye lo complicao. La verdá que la imprenta tienme mimáu y permiteme pagar a mes pasáu. Si un mes nun cubro pues tocame adelantar el dineru a min, cosa qu’asumo como lóxica porque quiciás nun acerté col modelu o lo que sía. Hasta agora la cosa foi bíen.

Otra cosa que me prestaría esclariar ye que pa recuperar el dineru nun tengo que vender toles pegatines. Más o menos recupero’l dineru vendiendo’l 65% d’elles. Esto permiteme dir "mas desahogáu" porque vender 2.000 pegatines al mes ye dificil. Amás les pegatines sobrantes siguen vendiéndose, anque sía a menor ritmu, los meses siguientes, colo qu’ayuden a pagar les del otru mes. Si’l proyeutu caltiénse nel tiempu cada vez costará menos recuperar el dineru. Si un día da beneficiu empobinaré les perres pa dalguna campaña o dalgo. Espero velo dalgún día.

7. ¿Ves futuru pal independentismu n’Asturies? ¿Por qué crees necesaria esta opción?

El futuru nun ta escritu. De verdá que se puede llegar y convencer a la xente con trabayu y, anque l’enemigu ye mui poderosu, los asturianos quieren muncho a la so tierra, sólo hai qu’enseña-yos que la independencia ye un camín, pa mín, l’únicu camín.

L’independentismu ye’l resultáu de sumar l’amor por una xente y l’amor por una tierra. Como quiero a los asturianos y considerome fondamente socialista nun voi a ufri-yos el magnificu "centralismu democraticu" de la república española. Paternalismu puru y duru, podemos gobernanos solos, ye más, yá lo demostramos, que somos mui capaces. Cuando quieres a una tierra y la so cultura quieres que se caltenga nel tiempu, ensin independencia ye dificil, inclusive con ella (vease Irlanda), porque la mayoría "nacional" nel estáu español, dígase españoles, busquen l’esterminiu de la diferencia, lo estraño pa ellos, dígase asturianos. Si l’estáu español cumpliere colos nuesos oxetivos nacionales y sociales, si mos respetase quiciavis nun sedría independentista, esto ye asina pola so culpa.

8. ¿Consideres que la militancia soberanista ta medrando al marxe de los partíos? Si ye asina, ¿por qué crees que se da esta situación?

L’otru día ví n’Uviéu una pegatina d’ALC, la primera y más grande. Taba a medio arrancar pero un mozu escribiera "Puxa Asturies independiente" nel cachu arrancáu. Cada día hai rapazos que se dan cuenta de qu’España nun-yos satisfaz pero tienen que saber que nun tán solos.

Quiciás l’atomización de los partíos de la izquierda nacional faenlos invisibles, xunto con que nun hai llocales nin prauticamente actividaes nel añu, poca xente animase a militar. Ye mui, mui dificil, dar vuelta a esa situación porque ye la cosa esa que se muerde la cola que dicen per Castiella, nun hai militancia: nun hai actividá. Nun hai actividá: nun captes militantes. Tamien ye ciertu que nel soberanismu asturianu hai munchu llibertariu. El CNA nel so día apostó fuerte por ello y muncha xente militó nun partíu anque paeza una contradicción. Eso quedó pa práu.

9. ¿Cómo valores la posibilidá de que nes eleiciones próximes haya una sola candidaturia xunitaria del nacionalismu asturianu?

Bien, si ye lo que deciden los partíos. El respetu a la soberanía de los coleutivos y partíos pola mio parte ye total, aspero que lo que salga, sía lo que sía, seya lo meyor p’Asturies y pa los asturianos. En verdá eso ye lo importante. Quiciás hai xuntanza y nun s’aporta a la Xunta pero si se sema la semiente d’un trabayu en comuña yá ye un pasu p’alantre.

10. Toles pegatines feches hasta agora tán n’asturianu ¿presentará ALC dalguna campaña n’eonaviegu?

Oxalá, anque necesitaré ayuda cola llingua. Lo ḥodío pela mio parte sedría la distribución d’elles nel occidente. Si cualquier persona ta interesada en facer daqué yo siempre toi abiertu a propuestes y a collaborar.

11. ¿Qué papel crees que xuega la vindicación deportiva dientro del movimientu soberanista? ¿Consideres suficiente la presencia por parte del mesmu nos escasos partíos fechos pola seleición asturiana o n’otros eventos?

Espeya lo que ye’l movimientu. Falta de prevención, organización, trabayu... Sólo los años de la seleición de fúbol ficiéronse cosines y por supuestu l’hestóricu partíu de balonmao escontra España, anque con fatal organización. Intentóse un par de vegaes dar una periocidá a los Asturhinches, nada mui obstentosu, un conciertu poles seleiciones nacionales y una campaña de cartelos o pegatines y, nun sé, sacar material pa hinches como camisetes o bufandes y nun se pudo. Ye una espina clavada, aspero sacala porque la seleición ye de toos.

Munches gracies a Aruelu.com por interesase por ALC, y lo dicho: toi abiertu a idees, propuestes, crítiques y tolo que sía nel mail:

asturiesnation@gmail.com

Blogue d’ALC:

http://atroparlacai.blogspot.com/

XDLA y Xuristes llamen a sumar "pa que se nos sienta n'Europa"

La XPLA y Xuristes faen un llamáu a persones y organizaciones pa sumase a la so campaña énte'l l'Estáu y que "la voz de los asturfalantes se faiga oyir nes instituciones europees"

La campaña conxunta del Aconceyamientu de Xuristes pol Asturianu y la Xunta Pola Defensa de la Llingua Asturiana quier que coleutivos o persones a títulu individual, firmen un documentu dirixíu al Conseyu de Ministros del Estáu pa que cumpla coles recomendaciones del Conseyu d’Europa sobre l’asturianu.

Recomendaciones que foron recoyíes fai dos años nel documentu del Comité d’Espertos sobre’l cumplimientu de la Carta Europea de les llingües minoritaries, testu robláu pol Estáu español.

Ente les cuestiones que recueye l’informe sobre l’asturianu, ta la resquiebra ente la demanda social y la falta d’oficialidá, invitando a les autoridaes a contemplar, en collaboración colos falantes, la posibilidá de meyorar el nivel de proteición que tien l’idioma del país nel Estatutu d’Autonomía.

Agora, la Xunta y Xuristes dan un reblagu a la campaña pa pidir a tol mundu la firma del documentu, “que nun quier sinón facilitar los calces de comunicación colos organismos europeos y col propiu Gobiernu estatal”.

Les firmes pueden mandase a la dirección de corréu info@exunta.org o a la dirección postal; Xunta Pola Defensa de la Llingua Asturiana, Cai La Gascona 12, 3u, 33001, Uviéu, Asturies.

Descarga del documentu:

http://www.exunta.org/spip/article.php3?id_article=350

Fonte: Asturies.com

2 dies pa la "II Folixa Nacional" de Fai!

Fai! entama la II Folixa Nacional "Asturies enxamás vencida" esti sábadu 22 de mayu en Xixón, que consistirá nún conciertu de rock nel que tarán presentes los grupos Mallacán, La Tarrancha, Arma-X, Galán y Da Robotz.

Sigún comentaron dos militantes de Fai! en rueda de prensa, "con motivu de la cellebración del 25 de mayu, y en virtú de la necesidá de reivindicar los fechos de 1808 como día d’Asturies, y en cuenta de cellebrar l’avezáu día de "la Santina", dende la organización d’esquierda soberanista Fai!, esti añu vuelve a entamase, con tola ilusión, un actu de folixa y reivindicación "pa qu’aquel llevantamientu popular encabezáu por dos muyeres nun quede nel escaezu".

La voluntá final de Fai! ye la de recuperar la dignidá d’esti día, que foi hestóricamente cellebráu como Día d’Asturies enantes de la "Trensición", y pa ello algamar la másima representatividá nel actu d’organizaciones del entornu social y políticu asturianu, lo que dende Fai! sedría "un llogru considerable na situación de total indefensión na que s’atopen munches de les reivindicaciones que compartimos na actualidá toes y toos".