Iván Lago y David Tejerina son miembros de l’asamblea que xestiona’l Centru Social Sestaferia de Xixón. Esti proyectu celebra siete años d’existencia basaos nuna filosofía alternativa y cola cultura y llingua asturiana siempre presentes.
Vamos al principiu de too ¿Por qué nació’l Centru Social Sestaferia va siete años?
Iván. Bueno, nació sobre too porque había una necesidá de crear un espaciu de reunión que sirviera pa dinamizar, pa facer actividaes y pa que d’ehí surdieren otres iniciatives.
Yera un momentu nel que les okupes nun taben saliendo palantre y vióse como una opción el buscar un local n’alquiler y crear ehí esa idea que teníemos.
A lo primero de too entamemos con un ciber pa dar serviciu gratuitu d’Internet, que d’aquella taba empezando; una pequeña barra, pal consumu diariu de la xente que pasaba per ehí; y un almacén pa tener archivu d’organizaciones, local de reunión pa colectivos y actividaes: charres, proyecciones, etc. Eso ye un poco lo que motivó l’arranque de Sestaferia.
El proyectu de Centru Social nació tamién con unos oxetivos ideolóxicos ¿Cuála ye la “filosofía” de Sestaferia?
Iván. Pues l’oxetivu ye, dende una perspectiva anticapitalista, dar cabida a toa una serie de movimientos alternativos que quieran dar una respuesta diferente al estáu de les coses. Tamién servir d’espaciu a colectivos que nun taben cómodos notros sitios – como pue ser la sindical, o’l Conseyu de la Mocedá-; y sacar alantre un proyectu autoxestionáu, ensin subvenciones, que se financia namás coles cuotes de los socios y pola actividá del local.
Eso ye lo básico, tampoco yera un proyectu ambiciosu nel sentíu que nun nos punximos un montón d’oxetivos; sinón partir d’unes premises pa cubrir unes necesidaes básiques. Y llueu nun poner llímite a quien quiera usar esti espaciu, más allá de lo que nos plantearan coincidiera un poco cola llínia que tenemos.
¿Por qué l’autoxestión pa sacar alantre’l proyectu?
Iván. Ye un poco tamién parte de la mentalidá de la mayoría de los socios qu’entamaron el proyectu. Amás, nun entendíemos que pudiera ser d’otra forma porque creemos que la independencia ye necesaria pa, nun momentu dau, salir criticando cualquier cosa o plantando cara al Ayuntamientu o Principáu o cualquier institución. Porque sinón, les crítiques tán coaccionaes nel momentu nel que tas metiendo perres del bolsu que dependen d’esa institución. Siendo autosuficientes garantizamos esa capacidá de crítica.
Los Centros Sociales tienen davezu oxetivos de dinamizar el barriu, espardiendo’l mensaxe del Centru ente los vecinos ¿Cómo ye la rellación de Sestaferia col vecindariu?
David. Col barriu la rellación mayor ye cuando entamamos les fiestes d’El Carmen, que facemos una comida popular autoxestionada con 300 raciones de fabes, que repartimos de mou gratuitu. Yá llevamos cinco años faciéndola y, al traviés d’eso, sí que se dan rellaciones cola xente mayor y cola xente que vive nel barriu.
Lo que pasa ye que tamién ye un barriu raru, porque pasó de ser una zona con cases antigües a agora entrar les nueves construcciones, con pisos de 40 ó 50 millones y entós caro, va variando la xente que vive nel barriu. Entós más vida facémosla cola xente que ye d’equí de tola vida, que non colos “nuevos ricos” que lleguen agora.
Iván. Tamién hai que dicir que, hasta que nun empecemos a facer les fiestes, la xente tenía como un poquiñín de recelu, nun s’atrevíen a entrar nel local. Y, dende que ficimos les fiestes d’El Carmen, entamamos a tener muncha más rellación colos vecinos y empezaron a venos como xente más cercano.
Na llínia d’esto que señaláis; dende’l movimientu de centros sociales ¿Cuál creéis que ye la clave de les actividaes a facer pa entrar en conexón col barriu y tresmitir el mensaxe del proyectu del Centru?
Iván. Hai que tener en cuenta a la xente que quies llegar. Entós cuando organices una cosa política mui concreta, vas tener un públicu marcáu. Pero si quies tener rellación real cola xente del barriu, tienes que facer otru tipu d’histories más abiertes. Sicasí, en les fiestes d’El Carmen, tenemos unes premises: son unes fiestes llaiques; autofinanciaes; repártense fabes pero ensin preciu establecíu, polo que cualquier persona pue sentase a xintar anque nun tenga perres; esos son los valores que tresmitimos al barriu y que, amás, la xente ye mui receptivo. Tolos años vien la xente mayor a date les gracies por montar estes fiestes y facer coses pol barriu.
Entós creemos qu’esto tien un valor porque crees una conciencia; puen facese coses al marxe de la sociedá del consumu, ensin esparabanes nin creando una movilización de la virxen, pero sí que tien un valor. Esi ye’l camín p’abrise, porque podríemos facer una cosa con una carga más política, pero evidentemente nun díbemos tener la mesma repercusión.
David. Tamién hai que dicir qu’anque munches de les actividaes nun sean estrictamente polítiques, al traviés d’elles llegues a la xente y xeneres un gusanín que pue facer que dempués s’involucren en temes mas políticos. Ye una manera de llegar a otra xente qu’a lo meyor si ficieres directamente temes de la izquierda clásica, pues nun llegaríes.
Dixisteis que nacisteis, ente otres coses, pa dar espaciu a coletivos ¿Qué organizaciones pasaron per Sestaferia?
David. Pues unos cuantos… COSAL, FUSOA, Refugaya, la Xunta pola Defensa de la Llingua Asturiana, l’asociación d’amigos del Canabbis, Sofitu… lo más nuevo ye’l grupu de baille tradicional que se reúnen pa baillar tolos llunes. A esi nivel yo creo que’l local ta bastante consolidáu.
Iván. Tamién faen asamblees puntuales xente como’l colectivu de paraos, cuando’l tema de Fer, xornaes de música asturiana…; vamos que nun hai un llímite nin una llínia política estricta que tengamos de requisitu pa que la xente puea participar equí. Ye un ámbitu mui ampliu; nun s’exise que la xente que quiera facer coses piense como nós, anque bono, otra cosa ye si vien el PSOE a pedir espaciu… esto como mínimu xeneraría una polémica que tendría que debatise n’asamblea.
Yá que cites l’asamblea ¿Too’l furrulamientu ye asambleariu?
Iván. Sí. Por exemplu nós güei tamos falando equí pero nun somos nengún cargu, namás xente de l’asamblea. Equí tolos socios tienen posibilidá d’espresase, con un funcionamientu horizontal.
David. Esti sistema - como lo de nun tener subvenciones nin lliberaos- fai que les coses vayan más lentes, pero creemos que ye seguru, afitáu y con unos criterios de conciencia claros.
Y falabéis tamién d’ociu alternativu ¿Qué actividaes destacaes se desendolcaron nesti tiempu?
Iván. Lo más destacao son les fiestes populares d’El Carmen, pero destaca tamién por exemplu los actos homenaxe a la Revolución d’Ochobre que ficimos nel 70 y 75 aniversariu. Tamién foi mui importante la campaña d’apostasía. Y llueu yá a nivel más concretu pues xornaes de música asturiana; charres, con importante presencia de la izquierda llatinoamericana – por mor de la rellación col COSAL-, de Palestina… nun se, son munches coses y ye complicáu facer un resumen.
David. Tamién ye importante la distribuidora que tenemos de llibros, discos, y demás material alternativu. Agora va salir tamién otra cosa interesante que ye d’un sociu del local qu’entamó a facer un documental sobre movimientos alternativos n’Asturies n’estremaos ámbitos. Entemez música, centros sociales… y sal Cambalache, la revista Atlántica XXI, el Diagonal-Asturies, la xente de L’Arcu la Vieya, tamién Xune Elipe… y quería presentar el documental nel Festival de Cine de Xixón. Nun se sabe si’l festival va garralo, pero sinón va presentase en Sestaferia, anque si sal nel festival tamién lo proyectaremos equí.
La cultura y la llingua asturiana tamién tienen presencia en Sestaferia…
Iván. Home, eso pa nós ye básico. Forma parte de Sestaferia dende la so fundación. Tolos materiales qu’editamos van n’asturianu o como muncho en billingüe y siempre fuimos mui sensible con ello. El fechu de que la Xunta Pola Defensa de la Llingua Asturiana s’aconceye equí pues ye una muestra del apoyu total de Sestaferia a la llingua.
Tamién destaca una actividá novedosa que ye’l grupu de baille tradicional. Ye un grupu formáu por xente mozo que tolos llunes axúntase equí pa baillar. Nun ye un colectivu de recuperación, sinón un grupu de xente que-yos presta’l baille y que nun conocíen los bailles tradicionales y decidieron xuntase equí pa deprender a baillar.
David. Nel tema de cultura asturiana tamién ta la idea de facer un taller prácticu de facer sidra. Al final esti añu nun se va poder facer, pero d’equí a un tiempu vamos facelo. Tamién na distribuidora tenemos muncha música asturiana y llibros de Trabe, Suburbia… de munches editoriales de lliteratura asturiana.
¿Qué tal la rellación colos otros centros sociales d’Asturies?
David. Tenemos muncha rellación con Cambalache y con Picu Rabicu y L’Arcu la Vieya d’Uviéu. Tamién col CSOA La ReFLEXón mientres duró. Yo creo que con colectivos con tol mundu.
Iván. Sí, lo único que lo que nun existe ye una rede y una coordinación permanente ente tolos centros, pero sí que se busquen compartir actos como por exemplu cuando vien un autor a Asturies, pues que fale un día en Cambalache y otru equí. Cuando surden estes oportunidaes avisamos a los otros centros porque-yos pue interesar compartir actividaes.
Esti domingu 31 celebráis el séptimu aniversariu ¿Qué va haber nel actu?
Ivan. Va facese una folixa amagüestu, porque siempre nos presta facer coses rellacionaes cola cultura tradicional asturiana. Va haber castañes, sidra dulce, frixuelos, música tradicional en directo – con miembros de dellos grupos folk como Felpeyu-, va tar el grupu de baille convidando a baillar a la xente, va presentase un vidiu sobre les fiestes d’El Carmen…Tamién la facemos conxuntamente cola tienda de comerciu xustu Picu Rabicu, que celebren el so décimusegundu aniversariu.
Pa dir acabando… ¿Un balance d’esti tiempu?
David. Agora creo que tamos nun momentu potente del local y que puen salir munches coses nueves que xeneren ilusión. Tuvimos altibaxos nestos siete años pero agora van dase munches actividaes y espectatives nueves. Tamién algamemos que dempués de too esti tiempu sigamos calteniendo unos 60 socios, pagando una cuota mensual y eso te da una fuerza porque se ve que la xente valora’l proyectu. Amás que furrulamos por voluntariáu y cadún tenemos el nuesu trabayu y los nuesos problemes diarios, lo qu’implica compromisu personal.
Per otru llau queremos dir faciendo actividaes más potentes, actividaes que llenen xente. Porque a veces montes daqué y te tires una tarde sólo y nun te vien nadie, entós eso casi nun paga la pena. Tamién tenemos que meyorar tema de la comunicación, qu’ehí tenemos déficits pa dar a conocer el proyectu y amás hai qu’añadir que los medios de comunicación convencionales tampoco reflexen les nueses actividaes, cuando se tán faciendo coses importantes y con muncha participación.
¿Y les perspectives y oxetivos de futuru?
Iván. L’oxetivu ye esparder la existencia d’esti espaciu, un llugar abiertu pa toos los que quieran buscar un espaciu alternativu al marxe del sistema. Equí hai un sitiu onde namás hai que traer un proyectu en positivo y ganes de trabayar y nós vamos dar cabida a toos esos movimientos alternativos.
Amás, nestos tiempos de crisis hai que dase cuenta que fai falta trabayar al marxe de la sociedá del consumu porque tamos nuna dinámica onde les perres son lo únicu qu’importa y que lo mueven too; y sí qu’existe posibilidá de cultura, d’ociu y de desarrollar proyectos alternativos ensin necesidá de ser los más radicales.
David. Equí hai varies apuestes y tienes por exemplu’l Conseyu de la Mocedá que recibe una montonera perres del ayuntamientu y nun dexa de ser – como dixo dalguien nel so día – un espaciu de formación de cuadros del PSOE; y tienes la nuesa apuesta, que lo que tenemos punxímoslo nós, nun debemos nada a naide. Podemos dicir con arguyu a cualquier vecinu que, preste-y o nun-y preste lo que facemos, nós nun vivimos a costa del Estáu. Tamos a la escontra d’él y amás nun vivimos d’él.
Fonte: Asturies.com
