Medios de comunicación, llingua y subvención (II). Radio y televisión

Continúo col análisis de la Resolución de 22 de julio de 2010, de la Consejería de Cultura y Turismo, por la que se conceden y deniegan subvenciones para la Línea 7: A las actividades de medios de comunicación para la normalización social del asturiano o gallego-asturiano.

Tres la primer parte del artículu, nesta segunda voi centrame nes subvenciones a la radio y a la televisión, xebraes en dos estayes y ordenaes de mayor a menor cuantía:

RADIO (dexo de llau les emisiones n’internet d’Asturies.com y Asturnews, qu’entrarán na tercer parte del artículu)

* Emisión de Radio Sele al traviés d’internet y FM (24 hores al día, tol añu)

7.102,70 €

* Programa “A lo cabero la selmana” en Cadena COPE Asturias

6.088,00 €

* Programa “Informativu rexional” n’Onda Cero Radio

6.088,00 €

* Espacios n’asturianu nos programes “Protagonistas Asturias” y “Queremos hablar de Asturias” de la emisora Punto Radio Asturias

5.073,30 €

* Programa “Noticies d’Asturies” n’Europa FM 5.073,30 €

* Programa de radio “Falando a xeito” en SER Occidente

4.058,70 €

* Programa “Cousas Nosas” en Onda Radio Televisión (ORT)

4.058,70 €

* Programes “El Ruxideru” y “Asturies, cosa de nos” nes emisores del Grupo Radio Asturias

4.058,70 €

*Microespacios musicales en “40 Principales Asturias”

4.058,70 €

* Microespacios musicales en Dial Asturias y Dial Eo-Navia 4.058,70 €

* Microespacios “La fala en Dial Eo-Navia” 4.058,70 €

* Programa “Nuesa Asturies” n’Europa FM

3.044,00 €

* Programa “Asturies en xuegu” n’Onda Peñes

2.029,30 €

* Programa “La cai diz” n’Onda Peñes

1.014,70 €

* Microespacios n’Onda Peñes “Esparciendo la llingua” y “Paisaxe museístico astur”

1.014,70 €

* Retresmisión del “Festival Musical Liet 2010” (Radio Sele)

1.014,70 €

TOTAL: 61.894,9 €

Podríemos descatar lo viniente:

* Vuelve a subvencionase de forma prioritaria a los grandes medios por espacios reducíos, incluyíos los que tán más a la escontra de los procesos de normalización llingüística como ye la COPE.

* Magar que ye la que más perres recibe, ye una vergoña que cuasi seya equiparable la subvención a Radio Sele (por 24 hores d’emisión añal) que la d’un programa selmanal de la COPE.

* Merquense "microespacios", requexinos, pa que se pueda sentir música n’asturianu en radiofórmules como los 40. Ye dicir que si nun se-yos dan perres nun la ponen, lo que crea un vezu mui peligrosu y, amás, poco normalizador.

* Dientro lo que cabe, la temática a la que se da subvención ye variada, pero’l tiempu que se-y da la mesma ye escasu enforma.

* Cola fórmula de pidir subvención por programa, un mediu minoritariu como Onda Peñes (con gran compromisu col idioma) algama la metá de la subvención que Radio Sele.

* Nun debemos escaecer la esistencia de la RPA, que tamién pagamos toos, colos sos requexinos de bable y poca o nula presencia de música asturiana fuera de los mesmos. Faise necesario puxar por una radio pública 100% n’asturianu y sofitar que se desendolquen iniciatives como Radio Sele, la primera nesti sen, y con un llargu recorríu nes ondes asturianes.

TELEVISIÓN (dexo de llau les emisiones n’internet qu’entrarán na tercer parte del artículu)

* Programes “El Noticieru” y “Les coses de Kala y Tal” n’Oviedo Televisión 4.058,70 €

* Programa “L’andariegu” en Canal 10

3.044,00 €

* Espaciu “L’asturianu” nel programa “Barrio a barrio” de Canal 10 (propiedá de El Comercio)

1.014,70 €

* Programa “Marcha d’echase” en Canal 10

1.014,70 €

TOTAL: 9.132,1 €

Podríemos descatar lo viniente:

* Nesti mediu la subvención ye cuasi inesistente. Dalgo que ye d’agradecer tres el marafundiu de perres que supón la TPA (non n’asturianu, sinón en pan y circu deportivu). Hai que puxar por una televisión pública con un canal en llingua asturiana n’igualdá de condiciones qu’otros canales: con informativos, doblaxes, programes didátuticos...

* Subvencionense cadenes con cuasi nengun audiencia o dependientes de los grandes medios editoriales (que yá pañaron subvención por prensa escrito), como ye Canal 10.

* En cuenta de pagar pola creación de nuevu material, comprense minutos n’antena (bastante caros, por ciertu).

Artículu de Vitor Suarez.

Sal a la cai enantes de que dexen nella.

Manifestación el 25 de xuneru en Xixón. Salida dende la Plaza l'Humedal a les 19:30 hores. Escontra los retayos sociales. Convoquen: CNT, SUATEA, CGT y CSI.

Charra-alderique " Asturies y la Constitución española"

Ponencies de los militantes qu'intervinieron en :

www.democracyforasturies.blogspot.com

¡ Esti si que ye'l camín, y non pantasmear con sopes de lletres eleutorales ensín fondu!

¡ Faigamos les coses bien !

¿ Cuántos " asturianistes" van picar ?

“el reto gigantesco de devolver a nuestro país a la primera división de la política y de la economía españolas”

“El Principado de Asturias es un país pequeño, alejado y aislado por barreras suficientemente poderosas -incluidas las barreras políticas regionales- como para que sus problemas se conozcan y preocupen, y los asturianos apenas cuentan en las decisiones de los centros de poder, incluidas las direcciones nacionales de los grandes partidos estatales."
“Concedenernos la confianza para sumar y coronar con éxito la aventura ya no depende de mí ni de todos nosotros: será cosa del conjunto de los asturianos. Pero creo que vale la pena el esfuerzo para recuperar el orgullo de ser asturianos. Por mí no va a quedar"

Lo que nos faltaba por ver. Si, el PP estatal tien pánicu a que naide mire polos intereses del país asturianu. Pero un home como Cascos, que llegue equí ensín querer saber muncho del país de so en años y años y faigan esti discursón populista y ¿ federalista?, que se mos pon patriota y too ye de tener poca vergoña. Pero señores, tean soyertes al " asturianismu " políticu ya internauta. Si,si tean soyertes. Que verán lo pocu que tarden dalgunos en ponei la etiqueta d'asturianista másimu y cabezaleru del país, cuando non de nacionaliegu posibilista. Vamos, qu'a ver cuantos " asturianistes" entamen a pedir el votu pa Cascos. Tiempu al tiempu, sinon se cuela nesto del "asturianismu políticu", yá saben...

trabayadores corten los accesos a la estación d'esquí de Payares

Los sucesos na estación iverniza asturiana Valgrande-Payares siguen. Tres los fallos nel telesilla y los cortes de lluz, los trabayadores del complexu empezaron les sos movilizaciones ante la non renovación de 23 contratos por parte del Principáu d'Asturies. Asina, el pasáu día 30, los trabayadores cortaron, per espaciu de tres hores, los accesos utilizando maquinaria de la mesma estación, como pales quitanieves. La corte del accesu a Valgrande torgó, amás, que los dos operarios qu'entren al trabayu a les 7 de la mañana pa comprobar l'estáu de les pistes y emitir el primer parte informativu de la xornada, pudieren llegar a la estación. Dende la dirección del complexu aseguróse que yá s'abrió la investigación pertinente pa identificar a los autores de la protesta.

Pela so parte, dende'l comité d'empresa desmarcáronse d'esta acción anque sí aprofiaron que “si fueron los trabayadores, ye comprensible qu'haya un nivel de crispadura alto y que daquién pueda perder los nervios ante lo que consideramos una inxusticia y un chanchullu”.

Fuelga xeneral n'Euskal Herria el prósimu 27 de xineru.

La mayoría sindical vasca, convocó pal prósimu 27 de xineru una fuelga xeneral en tol país pa facer frenti a les reformes de les pensiones, puxaes pol Gobiernu de Madrí y el Gobiernu vascu, dambos gobernaos pol PSOE. Como vemos una vegada más la mayoría sindical vasca, de forma conxunta y consecuente da-y una lleición a les grandes centrales sindicales españolistes, que nun convocarán una fuelga xeneral más hasta que nun puedan apautala col Gobiernu y tean col agua nel pescuezu.

Como vemos, los sindicatos soberanistas y de clas d'EH son quien a mover por si mesmos una fuelga de verdá, ensín arrenunciar a nada y con capacidá de movilización suficiente. Esa izquierda españolista rancia y centraliega debería deprender de sindicatos como LAB, sincatu patriota, que como munchos tienen d'aguantar qu'esa izquierda estatalista tradicional nomelos pequeñu-burgueses. Pero esi cuentu de desacreditar el soberanismu revolucionariu d'esa forma tan infantil paez que ta finandose-yos.

Feliz añu 2011.

Que l'añu qu'entra seya l'entamu a la fin de la construción política d'un movimientu asturianu qu'afite na soberanía nacional y na xusticia social los sos pegoyos básicos. Que andechemos toxs baxo unes idees d'igualdá personal, coleutiva y que la solidaridá faiga de nós meyores persones y meyores asturianos. Que finen les rocees infantiles y ensín arrenunciar a nada seyamos quien a axuntanos dende'l respetu y la igualdá, pero siempres formandonos y aldericando, sele y tolerantemente.

Pero nun escaezcamos que'l camín d'esti pueblu primiu, como'l de tantos nun ye otru qu'algamar la so independencia política y económica, nun hai otra. Debemos saber xugar les nueses cartes, pero la solución ye bien cenciella: Ser militantes patriotes asturianos día a día y facer práctica política d'ello. Ser revolucionarios, non por que temos alloriaos señores, non. Sinon porqu'esti sistema ye miserable y s'apoya nos más pa facer asquerosamente ricos a una minoría que conderga a esa mayoría popular. Ye necesaria la tresformación política, social y económica.

Finalmente, de nuevu, deseavos el meyor posible, y qu'esti 2011 faiga de nós meyores militantes asturianos, pero sobre too, meyores persones. Recordavos tamién que podeis ponevos con esti blogue en contautu pa lo que vos pete na direción de correu lleutrónicu : frayandocadenes@gmail.com

Asturies, a la gueta'l so determín!

Asturies a la gueta l'Estáu Socialista!

¡ PUXA ASTURIES !

Cuatro guardies civiles condergaos por tortures graves

Penes de cárcele pa cuatro axentes del cuerpu militar español por tortures
L'Audiencia de Gipuzkoa condergó a a cuatro guardies civiles por un delitu de tortures a Mattin Sarasola ya Igor Portu, anque impón-yos condenes mínimes pa estos casos. La resolución xudicial niega credibilidá a la versión oficial que vieno defendiendo'l Ministeriu del Interior d'Alfredo Pérez Rubalcaba dende xineru de 2008.

La sentencia señala al sarxentu Juan Jesús Casas García como autor d'un delitu de tortures graves y de mancadures, polos que-y impón cuatro años y mediu de prisión; al guardia civil José Manuel Escamilla, a dos años y mediu de prisión pol mesmu delitu; y a los agentes Sergio García y Sergio Martínez, a dos años de prisión y ocho díes de llocalización permanente.

Los cuatro foron inhabilitaos por 8 años y a la Guardia Civil y la Policía española, por responsabilidá civil subsidiaria, al pagu de 18.000 euros a Igor Portu y 6.000 euros a Mattin Sarasola «pol daño físicu y psíquicu causáu» a ambos.

Amnistía Internacional lleva años denunciando la esistencia de tortures nel Estáu español por parte de les fuercies policiales.

Fonte: Infoasturies

Los trabayadores del taller de Barros siguen en llucha.

La incertidumbre sigue nel tallerón llangreanu onde dende ayeri les movilizaciones de los trabayadores se tan radicalizando pa ver si d'una vegada por toes la patronal de Duro dexa yá'l so terrorismu. El terrorismu patronal que fai que l'Ayuntamientu de Llangréu faiga xestos de cara a la galería pero a la hora de la verdá mira pa otru llau, pues ye incapaz d'aparar esta situación, como ye incapaz de llevar alantre una xestión democrática y pal pueblu. L'alcaldesa robló nel so día un alcuerdu cola empresa que dabai " carta blanca " a los directivos p'abandonar el Conceyu. ¿ Ye éticu que'l PSOE llocal agora eche pestes contra DF ?

Una vegada más los ciudadanos nun se sienten representaos polos políticos, nin estos son capaces de representar a los ciudadanos. L'únicu procesu que pue tener ésitu pa que los 90 despidos nun se dean y DF nun abandone Llangréu, que nun escaezcamos, ye la cuestión de fondu, ye que Llangréu, el Nalón, les cuenques y toa Asturies enseñen músculo. Cualesquier agresión d'esti calter nun ye pa otra cosa que siguir col desmantelamientu planificau d'Asturies. El conflictu en Barros nun ye namái que'l vivu espeyu de lo que va pasar y pasa nel país enteru. Como asturianos y asturianos nun podemos facer otra cosa que sofitar a los trabayadores en llucha y auto-organizar una rempuesta popular, asturiana y consecuente.

¡Puxa la llucha de la clas trabayadora!

¡ Non al desmantelamientu d'Asturies, puxemos pol país !

Mañana domingu 26 d’avientu Darréu cellebrará’l so III Congresu Nacional

La organización política de mocedá nacionaliego independentista, Darréu, entama esti prósimu domingu 26 una cita perimportante pa tola rede de militantes y simpatizantes. Llega’l III Congresu Nacional de Darréu, que sedrá puntu d’alcuentru ente toles persones que conformamen esti proyeutu políticu que vien desenrrollandose dende l’añu 2004.

El Congresu Nacional de la moceda independentista va cellebrase en Xixón, col enfotu de ser el referente pa la aición política que Darréu escueya facer nel futuru. L’analisis de la so realidá ye perimportante nesti Congresu, nel cual se visionarán y analizarán los aspectos organizativos, tauticos y políticos onde la organización de mocedá cree que ye importante ameyorar. La valoración de los puntos fuertes de Darréu y l’autocrítica son dos pegoyos a tratar nesti aconceyamientu de la mocedá independentista revolucionario.

El resultáu d’esti III Congresu Nacional pue ser lo qu’oriente a Darréu y los sos militantes nos prósimos meses y años, polo que ye fundamental que los militantes y simpatizantes se vuelquen nesti eventu; "pa construyir una alternativa fuerte de calter soberanista hai que construyila dende la mocedá, que ye’l futuru del país, y dende una visión popular revolucionaria, como forma d’analizar la realidá de la nuesa nación y del mundu enteru"

Fonte: Aruelu.

Fai! y Darréu piden conxuntamente la vuelta de la selección asturiana

Les organizaciones soberanistes Darréu y Fai! vienen d’amosar el so descontentu pola nueva ausencia d’un partíu de la selección asturiana de fútbol. Esta nueva crítica súmase a la de Xuventú Asturianista y Bloque por Asturies.

“Un partíu amistosu con otra selección nacional sedría un éxitu bultable”, señalen dende les organizaciones a la par que critiquen que la selección asturiana de fútbol lleve ocho años ensin xugar.

Amás, los nacionalistes destaquen qu’un partíu d’esti calter “podría ayudar al fúbol asturianu” y sorrayen que “la crisis capitalista tamién pasa factura a los clubes deportivos más modestos”.

“El Gobiernu del Principáu d’Asturies y la Real Federación Asturiana de Fútbol los responsbles d’esti murniu panorama pal fútbol asturianu y los sos siguidores”, denuncia’l comunicáu conxuntu de Fai! y Darréu. Al empar, argumenten que “marxinar cualesquier síntoma del fechu nacional asturianu” ye la razón de que nun haiga partíu.

Oficialización y normalización
Por último, les organizaciones independentistes pidieron la oficialización de les selecciones deportives asturianes y la so normalización. Amás d’unes “federaciones que seyan consecuentes cola defensa de los intereses del deporte del País y que nun tean en manes del Réxime españolista del PSOE-IU-PP”.

Fonte: Asturies.com

Comunicau íntegru: http://www.fai-asturies.org/

http://www.darreu.org/

Xuntanza solidaria colos pres.o.s. politicos

El prosimu sabadu 25 el Muerganu Antirrepresivu Popular Sofitu convoca, por segundu añu consecutivu, una xuntanza solidaria xunta la cárcele española de Villabona. Pese a la represión sufrida l’añu pasáu por parte de la delegación del gobiernu español n’Asturies, el nuesu oxetivu ye recuperar esta movilización, que nel pasáu yera habitual, y afitala nel calendariu de movilizaciones de los asturianos mas conscientes, que conoz la realidá na que vive, y concienciaos, que actuen consecuentemente con la so conciencia.

En Sofitu sabemos que’l plan del gobiernu español pasa por tapecer la esistencia de los presos politicos, neto que la tortura, pa dar una sensación de llegalidá y xustificar asina’l so incumplimientu de los "Derechos Humanos". Esta llegalidá, baxo la sida de la llucha contra’l terrorismu, crea lleis que mos afecten a toos, ya sía un trabayador lluchando pol so empléu o un vecín contra la especulación urbanistica y nel futuru entamara a perseguise’l pensamientu peligrosu o les opiniones diverxentes de lo politicamente coreutu como vimos hai poco col mozu xixonés que foi unviáu a la audiencia nacional de Madrid por verter les sos opiniones na so paxina d’una rede social a la que solo teníen accesu los sos amigos y conocíos.

Apostamos pol llema "La unica forma de ser solidariu ye prauticando solidaridá" como una frase que recueye’l nuesu pensamientu y afalamos a acudir esti sabadu con nós ensín medrana a cualquier intentu represivu. Primeru porque ya l’añu pasáu cualquier gastu foi sufragáu solidariamente por mediu d’actos festivos, amás que tolos papeles del actu tan en regla, y segundu porque tenemos que ser conscientes que’l fechu de ser solidarios con una persona represaliada nun ye nengún delituy nun podemos dar al PSOE la grandeza de que nós mesmos lo veamos asina.

Pa finar, si tas interesáu n’acudir puedes contautar con nós en sofitu@nodo50.org

Aiciones propagandístiques en sofitu a los trabayadores de Duro Felguera por parte de Darréu.

Militantes de la organización política de mocedá Darréu, llevaron a cabo demientres esti fin de selmana delles aiciones propagandístiques nel Conceyu de Llangréu en sofitu a los trabayadores de Felguera Construcciones Mecániques, del grupu Duro Felguera. Recordamos, como alvertimos la selmana pasada dende esta organización mediante una nota de prensa que l'únicu fin que la patronal busca ye'l pieslle de la factoría pa dedicase a la especulación. Asina 90 families puen quedar na cai, y el Conceyu de Llangréu nuna situación llaboral inda más llaceriosa de la que vive anguañu.

La mocedá soberanista y socialista de Darréu nel Conceyu de Llangréu nun vamos quedar paraos demientres vemos como van arramplando tol nuesu texíu productivu, renegando al conceyu a un futuru más qu'escuru. Si'l conflictu nun s'igua nun duldaremos en siguir realizando dende les nueses posibilidaes aiciones d'esti tipu, a la par qu'informatives. Tamién queremos dende equí treslladar tol nuesu sofitu a los trabayadores de Barros, y amosar la nuesa más fonda solidaridá. Anque esperemos enquivocanos, nun paez que nin dende'l Gobiernu del Principáu d'Asturies nin dende'l municipal, llideráu por Esther Diaz vayan a facer muncho porque la Duro siga na llocalidá.
Semeyes ya información na páxina web de Darréu.

Muerre l’últimu representante del Conseyu Soberanu d’Asturies

Quiciás el titular pueda resultar estrañu, pero axústase dafechamente a la realidá. Cola muerte del que fuera primer Presidente Autonomicu asturianu, Rafael Fernández, muerre tamién l’últimu representante del Conseyu d’Asturies que, el 24 d’agostu de 1937, se declaró “soberanu”. Asturies vivía, naquel entós, una situación d’acosu y derribu poles tropes franquistes que, depués del paséu militar pol País Vascu y Cantabria, aprestábase a facer lo mesmo nel nuestru país. La resistencia qu’atopó nun tuvo nada que ver colo anterior. Cada metru que conquistaron fue a costa de munchu sacrificiu y muncha perda de vides. Neses circunstancies, y a la vista’l desentendimientu o la falta organización por parte’l poder central, el Conseyu d’Asturies y Lleón decide proclamase “soberanu”. Rafael Fernández, ocupaba nesi momentu la cartera de Facienda, pasando nesi momentu a ocupar la d’Orden Públicu. Pa que los que nun lo conozan lo sepan, esti ye’l testu del “Decretu de Soberanía”:
“Artículo 1º.- El Consejo Interprovincial der Asturias y León, a partir de la fecha y hora de este decreto, se constituye en Consejo Soberano de Gobierno de todo el territorio de su jurisdicción y a él quedan integramente sometidas todas las jurisdicciones y organismos civiles y militares que funcionen en los sucesivo dentro del referido territorio.

Artículu 2º.- El propio Consejo Soberano, a la vista de los acontecimientos favorables que se produzcan en el curso de la guerra, determinará el momento de despegarse de las funciones soberanas que hoy asume.


Artículo 3º.- De este decreto se dará cuenta al Gobierno de la República para su convalidación, sin perjuicio de su absoluta vigencia, impuesta por imperio de las circunstancias, desde este mismo momento de su promulgación. Dado en Gijón a las 24 horas del día 24 de agosto de 1937″

Esti fue, xunto a los doscientos años de Monarquía Asturiana, y la declaración de Guerra a Napoleón, un de los momentos en qu’Asturies fue soberana. Llamentablemente, nun sirvió pa facer frente al avance imparable del fascismu, pues la diferencia en númberu y armamentu yera aplastante. Pero quede afitáu un momentu históricu importante, del qu’agora esapaez l’últimu personaxe vivu que participare. Bien ye verdá que, cuando tornó del esiliu, Rafael Fernández, xenru de Belarmino Tomás, faló a la escontra d’aquella declaración de soberanía, pero’l fechu ciertu fue qu’él formó parte del Gobiernu d’una Asturies soberana. Eso naide lo pue negar. Anque agora la xente fale d’otres coses.


Autor artículu: Vicente G. Oliva, Asturbulla.org

Darréu énte les pallabres hipócrites de Javier Fernández.

Dende la organización de mocedá Darréu queremos treslladar a les moces y mozos del país la nuesa postura alredor de les caberes pallabres de Javier Fernández, onde afirmaba'l que'l oxetivu últimu del PSOE ye facer d'Asturies “ una tierra pa quedase”. Onde tol que quiera pueda trabayar, aseguró'l secretariu xeneral de la Federación Socialista Asturiana.

Como mozos y moces sentímonos indignaos por estes pallabres. Creemos que facer proselitismu dende la FSA-PSOE, prometiendo una Asturies pa vivir y trabayar nun ye éticu nin tolerable por denguna persona que se sienta parte d'esti país. Los máximos responsables políticos d'esti éxodu de compatriotes, que colen del país a la gueta d'unes espectatives de vida más dignes nun son otros que'l Gobiernu, gobernáu anguañu por PSOE ya Izquierda Xunida. Poro, vender agora promeses d'unes espectatives llaborales y sociales segures n'Asturies ye escaecer tola responsabilidá d'ellos mesmos cola emigración forciada.

Como'l so antecesor, Tini Areces, paez ser que Javier Fernández vive n'otru mundu estremáu al de la ciudadanía asturiana. Si Areces falaba de la emigración de mocedá como de “lleenda urbana”, Fernández prefier prometer un futuru n'Asturies a la mocedá ensín que se dean condiciones polítiques, económiques o sociales pa qu'esto fuere posible. El Réximen de la FSA que llevamos careciendo durante décades, yá s'encargó de frayar el texíu económicu y vendelu al “menor postor”.

Asina, Darréu quier denunciar al Gobiernu d'Asturies PSOE-IX como los máximos responsables d'esta situación, que coles sos polítiques d'axentes colonizadores fundieron a la mocedá d'esti país. Javier Fernández nun ye namái qu'un mentirosu más, como foi Tini Areces, al cual dende los sectores populares y soberanistes tenemos que desgastar. Pedimos a la mocedá qu'amuese'l so descontentu coles promeses vacies de la FSA y s'organice en clave nacionaliega y d'izquierda tresformadora. Solo asina, dende'l soberanismu/nacionalismu asturianu podremos ser dueños del nuesu propiu destín, y finar d'una vegada por toes, cola crisis permanente que carez Asturies.

¡ PSOE VENDEPATRIES !

¡PUXA ASTURIES DIXEBRA Y SOCIALISTA!

Fonte: www.darreu.org

CSI Mocedá refuga los despidos en Duro Felguera

Dende CSI Mocedá queremos manifestar la nuesa más fonda solidaridá colos trabayadores de los talleres de Barros de Duro Felguera. El Espediente de Regulación d'Emplegu mediante el cual pretende amenorgase la plantiya nun 60% despidiendo a 90 obreros implica un nuevu pasu na destrucción del texíu productivu asturianu en función de planes y oxetivos que nada tienen que ver colos intereses de la mayoría social.

Lo que se pretende ye preparar primero'l zarru de Barros, y más tarde el d'otros talleres de Duro Felguera n'Asturies, siguiendo cola mesma estratexa políticu-empresarial que se lleva aplicando a lo llargo de décades nesti país: la del desmantelamientu progresivu acompañáu de falses soluciones individuales. Non puede entendese a Barros como un casu aislláu sinón como un pasu más nun procesu que namás conduz a tresformar al valle y a toa Asturies nun verdaderu desiertu industrial, onde a los mozos y moces que nun emigremos estos años últimos fora de Asturies namás correspuéndenos un presente de paru y de sobresplotación llaboral según los casos.

Énte esta situación, acompañada de retayos cada vez más radicales d'ayudes y prestaciones sociales, a los mozos y moces d’Asturies si aspiramos a tener la más mínima opción d'ameyorar les nueses condiciones de vida como colectivu namás mos queda un camín non menos radical: el de la llucha directa, confrontando abiertamente colos responsables gubernamentales y empresariales y xenerando situaciones incontrolables que supongan un coste político y económico pa ellos.

¡Nenguna agresión a Asturies, ensin rempuesta!

Villanueva de la Tercia pide la 'nacionalidá asturiana'

La llocalidá Villanueva de la Tercia, perteneciente alministrativamente al conceyu de Villamanín y a la provincia de Lleón, fartos del maltratu que reciben del ayuntamientu quieren dixebrase de Villamanín y tan dimpuestos a asumir la «nacionalidá» asturiana, pasando a formar parte del Conceyu L.lena: «Si l'Alcalde ta interesáu, que nos convoque y buscaremos xuntos una fórmula", señala Ana Gutiérrez, portavoz de los vecinos, al diariu La Nueva España.

Villanueva de la Tercia ye un pueblu que s'alcuentra ente Villamanín y Payares. La carretera N-630 que crucia el puertu pasa xusto pol mediu de la población y nelli viven dalgo menos de cincuenta families. La Xunta vecinal de Villanueva de la Tercia ta mui molesta pola abandonu que sufren por parte del Ayuntmaientu de Villamanín, gobernáu por Óscar Gutiérrez (PP).

Los vecinos son conscientes que la dixebra ye cuasique dalgo imposible, pero planteguen esta posibilidá convencíos de que ye la meyor solución pal pueblu. Los vecinos d'esta parroquia quieren un cambiu d'aires y tan dimpuestos tanto a incorporase a La Pola de Gordón o a L.lena. "Munchos vecinos residen n'Asturies y taríemos encantaos si nos quieren acoyer", señala Ana Gutiérrez.

Nun ye nueva la situación de que pueblos, parroquies o conceyos del norte de la provincia de Lleón pidan la so incorporación a Asturies dende que se formare l'actual estáu de les autonomíes, habiendo tamién dalgunos casos de zones pertenecientes a Galicia que tamién lo pidieran nel so momentu.

Fonte: Infoasturies

Charra-alderique, 'Asturies y la Constitución Española'

La plataforma ciudadana y soberanista "Democracia p'Asturies" anuncia la cellebración d'una charra-alderique que se va cellebrar esti vienres 17 d'avientu n'Uviéu, a partir de les 18:30 hores nel llocal de la Corriente Sindical d'Izquierda n'Uviéu alredor de la Constitución española "y como afeuta a Asturies esti modelu d' Estáu español y supuesta democracia".

L'actu, que va tar moderáu por Javier Cubero va cuntar con tres ponentes: Nacho González, por parte del Bloque por Asturies, Iván Martínez, militante d'Andecha Astur y Fonsu Suárez militante de la organización Fai!.

Dende "Democracia p'Asturies" conviden a tolos ciudadanos interesaos a acudir a l'actu y "dar la so visión sobre como afeuta la Constitución del Reinu d'España al desendolcamientu del nuesu país, a sentir les opiniones de los representantes d'estes organizaciones polítiques y a dar suxerencies a les mesmes, como tamién a la plataforma democrática".

Fonte> infoasturies.net

Comunicau de Darréu en solidaridá colos trabayadores de Duro Felguera.

Darréu desixe que se garantice'l futuru de Duro Felguera en Llangréu ensin despidos

Noticia asoleyada en www.darreu.org:

El conceyu de Darréu en Llangréu quier treslladar una vegada más, el so sofitu a los trabayadores de Duro Felguera, que nesta ocasión tan asistiendo a una nueva agresión. Una agresión peligrosa enforma, pues la empresa quier reducir la plantilla de los talleres de Barros nun 60%, o lo que ye lo mesmu, despedir a 90 trabayadores de los 150 que conformen l'actual plantilla.

Dende Darréu queremos espresar el nuesu refugu a esti nuevu plan de la direutiva de la empresa, que nun ye más qu'un nuevu intentu pa pesllar les instalaciones de la empresa en Barros y finar cola actividá de la empresa en Llangréu. Ye murnio que'l conceyu que vio ñacer a la empresa seya'l mesmu de la quier facer colar, pa entamar a dedicase a la especulación. Especular y escaecer dafechu, les décades que los trabayadores enriquecieron a los sos dirixentes. Otra vuelta la especulación quier desmantelar una bona parte del nuesu texíu industrial cola escusa de reducir pérdides, anque son conocios los multimillonarios beneficios que s'embolsen los cabezaleros de la empresa.

Poro, dende Darréu desiximos como mozos y moces, y tamién como llangreanos qu'apare esta situación. Que se vea onde foi a parar la financiación pública que se-y dio a Duro Felguera y qué compromisu quier la empresa col Conceyu de Llangréu. Tamién queremos sorrayar el papel hipócrita del gobiernu llocal del PSOE, el mesmu paez tener escuros intereses, pautaos cola empresa en dellos terrenos del conceyu, propiedaes anguañu de la Duro.

Finalmente llamamos a tola mocedá de Llangréu a que se solidarice colos trabayadores afeutaos pol Espediente de Regulación d'Emplegu y qu'amuese'l so sofitu nes convocatories que se vayan a facer. Ye fundamental la unidá ciudadana pa qu'esta estratexa de DF pa dedicase a la especulación, nun se llegue a executar. El mugor d'esti pueblu engrasó les sos máquines munches décades pa qu'ellos tuvieren esos beneficios astronómicos, y agora quieren pesllar Barros pa dempués pesllar Asturies.

¡FUTURU P'ASTURIES! ¡FUTURU N'ASTURIES!

Declarada la oficialidá de la llingua galesa

Dempués d’años d’alderique


Foi la llexislación más complexa y llarga aprobada fasta agora pola Asamblea Nacional de Gales, pero’l pasáu día 7’l galés, la llingua celta mesma del país, pasó a tener l’status de llingua oficial, per primer vegada na hestoria del autogobiernu en Gales. La llexislación, una de les promeses del actual Gobiernu de coalición del Partíu Llaborista (LP) y del Plaid Cymru (PD), inclúi tamién una serie de midíes pa garantizar l’usu del idioma na vida pública.

De primeres, la llei crea un comisionáu pa la llingua galesa, que va sustituyir a la Welsh Language Board, y que va tener como oxetivu principal fader cumplir midíes que garanticen la proteición de los drechos de los falantes.

Tamién inclúi un sistema p’asegurar que los muerganismos públicos y dellos privaos ufierten servicios en galés. D’ente los privaos, trátase principalmente de compañíes elléitriques, de gas y de telecomunicaciones, ente otros, les que tendrán d’axustar col comisionáu pa la llingua qué usu faen del galés.

Otros muerganismos creaos de nuevu son un tribunal de la llingua galesa, nel que los falantes van poder recurrir cuestiones rellacionaes cola provisión de servicios nel idioma, sigún el Welsh Language Partnership Council, un muérganu consultor que va aconseyar col Gobiernu galés sobre la estratexa a siguir sobro la llingua.

Al pesar de que’l Gobiernu considera l’aprobación de la llei marcó "un día hestóricu" pa la llingua galesa, dellos seutores protestaron pola falta d’ambición de la midida. Cymdeithas, la principal organización pa la llingua, ye’l principal esponente. Declararon que falta un principiu fundamental: la reconocencia de los drechos de los falantes. Argumenten que ye una llei que da poder a los funcionarios, pero non a la xente, y que lo que fai falta ye dar servicios llingüísticos "en llugar d’esperar que los falantes protesten" cada vegada que quieran utilizar la so llingua.

De fechu, ún de los diputaos del Plaid Cymru, Bethan Jenkins, presentó una enmienda a la propuesta de llei nesta llínia, que foi refugada por 32 votos a la escontra y 16 a favor. Jenkins proponía un cambéu qu’establecía drechos concretos pa los falantes, y tamién proponía que la oficialidá de la llingua fuera incondicional, yá que nel testu orixinal hai una llista d’esceiciones que condicionen l’status.

Fonte: Aruelu.