IX Folixa del 1eru Mayu en Llangréu.

La vindicación llingüística asturiana aporta al Polu Norte.

El pasáu 9 d'abril nel Polu Norte xeográficu (90º llatitú Norte) y a una temperatura de - 32º C tuvo presente la petición de la oficialidá pa la lllingua asturiana, mediante un cartelu col llema "L'asturianu llingua oficial".

El deportista asturianu Fernando González foi quién quiso alcordase de vindicar la oficialidá de la Llingua Asturiana en tan simbólicu llugar, aprovechando la so participación nel Maratón del Polu Norte, onde quedó nuna meritoria cuarta posición y tuvo a mui pocu de repetir victoria como fixera nel Himalaya.

FONTE: Infoasturies

Endavant OSAN

Organización Socialista de Lliberación Nacional. PPCC.

La Xunta Ellectoral de Llaviana refuga les candidatures de Conceyu Abiertu n'asturianu pese a la sentencia del Tribunal Constitucional

Nuevu casu de represión llingüísitica nunes elleiciones anque esta vegada el proceder de la Xunta ye anticonstitucional gracies a la sentencia 48/2000 de 24 de febrero de Tribuna Constitucional.

La Xunta Ellectoral de Zona de Llaviana comunicó ayeri a los representantes de Conceyu Abiertu énte la mesma que nun daba por válides les candidatures presentaes nos conceyos de Samartín del Rei Aurelio y Llangréu por emplegar l’asturianu na documentación requería al efeutu. Concretamente, lo que s’argumenta dende la XEZ de Llaviana ye que “nun s’utiliza nenguna de les llingües oficiales del Estáu español”. De momentu, ye l’únicu casu nel que se refuguen les llistes de Conceyu Abiertu por esta razón, ya que nin la Xunta Ellectoral Provincial nin nenguna de les otres de Zona nes qu’hai presentaes candidatures de Conceyu Abiertu comunicaren nada al respeutu.

Magar que nun ye definitivu, Conceyu Abiertu quixo facer públicu y denunciar el determín tomáu pola XEZ de Llaviana porque supón "l’enésimu ataque escontra la llingua asturiana y aquellos ciudadanos que la empleguen". Ye más, Conceyu Abiertu "llamenta" que los responsables de la XEZ de Llaviana "tovía nun conozan la sentencia 48/2000, de 24 de febreru, del Tribunal Constitucional (BOE nº 76, 29 de marzu de 2000) qu’anulaba’l determín de la Xunta Ellectoral Provincial d’Asturies de nun proclamar les candidatures de la organización política Andecha Astur al Congresu los Diputaos y al Senáu pola mesma razón, al considerar que se taba vulnerando’l drechu de les persones a acceder a los cargos públicos en condiciones d’igualdá, sentando un precedente hestóricu".

Conceyu Abiertu retrucará al determín de la Xunta Ellectoral de Zona de Llaviana sofitándose nesta sentencia y confía en que’l prósimu llunes, 25 d’abril, se proclamen les sos candidatures nos conceyos de Samartín del Rei Aurelio y Llangréu.

Conceyu Abiertu preséntase a les eleiciones con candidatures a la Xunta Xeneral y en nueve conceyos

Mariu Arbesú, Antón Fuertes y Daniel Cueli candidatos nes trés circuscripciones ellectorales

Conceyu Abiertu va participar nes eleiciones del prósimu 22 de mayu a la Xunta Xeneral d’Asturies presentando candidatures nes tres circunscripciones eleutorales nes que se dixebra’l país. Pol centru Mariu Arbesú (Noreña 1978), pol occidente Antón Fuertes (Cangas del Narcea, 1948) y pol oriente Daniel Cueli (Piloña, 1978). Nes elleiciones municipales, Conceyu Abiertu presenta candidatura en 9 conceyos: Uviéu, Grau, Sieru, Llangréu, Samartín del Rei Aurelio, Mieres, Villaviciosa, Noreña y Xixón.

El candidatu a la presidencia, Mariu Arbesú tien fechos estudios de Maxisteriu y anguañu trabaya nuna empresa del sector del vidriu; foi cabezaleru del movimientu xuvenil independentista asturianu y candidatu por Andecha Astur a l’alcaldía Noreña delles veces y participa activamente en movimientos sociales y culturales del país. Antón Fuertes candidatu pola circuscripción occidental, llicenciáu en Socioloxía, ye direutor del Departamentu d’Estudios y Formación de la Confederación Xeneral de Pequeñes y Medianes Empreses del Estáu Español (COPYME) y ún de los fundadores del Conceyu d’Asturies en Madrid. Daniel Cueli, candidatu pol oriente, diplomáu en Maxisteriu y llicenciáu en Pedagoxía, trabaya comu Axente de Desarrollu Local anguañu.

Nes eleiciones municipales, Conceyu Abiertu presenta de candidatu n'Uviéu a Rafael Trabanco, en Grau a Fernando Romero, en Sieru a David Fernández, en Llangréu a Paloma García, en Samartín del Rei Aurelio a Xulio Llaneza, en Mieres a Paula Martín y Villaviciosa a Xandru Vega.

En Noreña preséntase baxo la fórmula d’agrupación d’eleutores comu Conceyu Abiertu por Noreña siendo’l candidatu Pablo Pérez)y en Xixón preséntase dientro de la coalición Conceyu d’Unidá Popular de Xixón, (CUPX) xunto a Izquierda Anticapitalista, Frente de la Izquierda ya independientes, ocupando’l representante de Conceyu Abiertu, Javier Cubero, el puestu númberu 3 de la llista.

130 persones avalen la candidatura de Conceyu Abiertu por Noreña

Pablo Pérez Fonseca candidatu a l'Alcaldía de Noreña En malpenes cinco díes, 130 noreñeneses avalaron la candidatura de Conceyu Abiertu por Noreña que se va presentar a les prósimes elleiciones municipales del 22 de amyu baxo la fórmula d'agrupación d'ellectores pa elllo yeren necesarios 100 avales, al ser Noreña un conceyu de menos de 10.000 habitantes.

La candidatura popular noreñense va encabezala Pablo Pérez Fonseca de 31 años, Llicenciáu en Bioloxía y trabayador autónomu, tres ser escoyíu ayeri, xueves 14 d'abril, nel conceyu abiertu cellebráu na Casa la Cultura de Noreña.

Fonte: Infoasturies.net

Clásicu pero resistente a too.

Carlos Puebla- Y en eso llegó Fidel.

PUXA ASTURIES PUXA CUBA

Darréu entama una campaña contra'l desmantelamientu de Les Cuenques.

La militancia de la organización xuvenil Darréu, nos conceyos de la Cuenca del Nalón y la Cuenca del Caudal, alcordó entamar una campaña pública y organizada denunciando la falta d'espectatives nes Cuenques Mineres. La campaña tien de llema principal "Por unes Cuenques pa vivir y Trabayar ", y ciéntrase na denuncia "de la murnia situación social que carecemos nesta zona del país, onde la crisis ta siendo inda más xabaz coles clases populares". Dende la mocedá independentista y socialista asturiano de les cueques mineres echen a andar esta campaña "que quier espeyar na cai la voz d'una mocedá que se resiste a aceutar les espectatives de futuru escases y precaries que s'ufren nestos conceyos a los y les xóvenes, que mos ñegamos a dexar que desmantelen el pocu texíu industrial que queda en Les Cuenques y que vamos facer tolo posible por denunciar esta crisis que carecemos dende una perspectiva moza y fondamente crítica, tanto cola situación, como colos sos responsables" desplica Darréu nun comunicáu onde finca en que "ye perimportante organizar una rempuesta popular n'El Nalón y El Caudal énte la situación d'anguañu de crisis total de los nuesos conceyos, y eso pasa por facer de la mocedá un frenti de llucha más dinámicu y activu, que puxe pol so futuru y pola tresformación social". Darréu anicia la campaña asoleyando una primer tirada de 2.000 pegadielles vindicatives, asina como otros materiales d'información y propaganda. "Nun queremos qu'esto quede nuna simple campaña de propaganda vindicativa, polo que vamos a acompañar a esta dinámica d'actos estremaos, propuestes de xunidá d'aición a otros ámbetos xuveniles, políticos y sociales, contautu con trabayadores en conflictu y organización de la mocedá nos nuesos conceyos", despliquen.

XXIII Conciertu pola Oficialidá

La XXIII edición del Conciertu pola Oficialidá va xuntar a lo meyor de la música n’asturianu. Va haber tou tipu d’estilos: dende’l rock más combativu pasando pela música tradicional asturiana y la canción d’autor. Blima, Llangres, La Bandina, Toli Morilla, Misiva, K-Nalón, La Col.la Propinde y La Tarrancha van poner más d’ocho hores de música, reivindicación y folixa, en dos escenarios independientes que van alternar les actuaciones ensin tiempos muertos nin descansu. El XXIII Conciertu pola Oficialidá va abrir les puertes a les 19:00 del prósimu sábadu 16 d’abril, nes instalaciones de la Feria de Muestres de Xixón. El preciu de la entrada ye de 8€ pa la entrada anticipada y de 10€ na puerta. Les entraes tarán a la to disposición a partir d’esta fin de selmana nos chigres que vienen darréu: Uviéu La Casa Posafuelles, Malayerba nunca muere; Xixón: Café Trisquel, El Barucu; Avilés: El Cafetón; Candás: La Gueta; Tinéu: Mesón Cervantes; Cangas: Bar Azul; La Puela: Café Centro; Mieres: L’Abellugu; La Pola (L.lena): La Palmera; La Pola Siero: Abre César; Grau: Bar Piero’s; L’Infiestu: Bar Maybe; L’Entregu: Tom Mallory.

Mañana presentación Conceyu Abiertu por Llangréu

Esti próximu vienres 8 d'abril va tener llugar la presentación pública de Conceyu Abiertu por Llangréu. La presentación cellebrarase na Casa la Cultura de Sama, de magar les 20:00 hores. Nun actu públicu y participativu va presentase esti nuevu proyectu políticu ciudadanu, abiertu y de base llangreana. Nel trescursu del actu, promotores de Conceyu Abiertu van esplicar qué ye Conceyu Abiertu por Llangréu y abrirase un alderique sobre propuestes y problematiques municipales. Conceyu Abiertu por Llangréu ta formáu por un grupu de ciudadanos llangreanos procedentes de distintos ámbitos políticos, sociales, sindicales, culturales y de movimientos populares de diversu tipu que, conscientes de la ineficacia de les polítiques municipales actuales y pasaes, y de la pergrave crisis permanente que venimos sufriendo los vecinos de Llangréu, "en resultes d’una xestión corrupta y clientelar qu'amosaron y amuesen los partíos políticos (PSOE, PP y IU)" y que consideren"que llegó'l momentu de buscar nueves maneres de facer política entamando un movimientu municipalista al traviés de los llamaos conceyos abiertos", espliquen. Conceyu Abiertu por Llangréu ñaz col enfotu de crear un movimiento ciudadanu dende la base, "somos persones de a pie, que vivimos el día a día, que queremos volver a disfrutar de lo que foi na so época esti conceyu, llenu de trabayu ya entusiasmu". Conceyu abiertu apuesta por una renovación xeneracional del gobiernu municipal. "Toos y toes somos necesarios, entre toos y toes debemos construyir esa alternativa que seya capaz de sacanos de la llaceriosa situación na que nos atopamos". Conceyu Abiertu por Llangréu pretende construyir una alternativa que garantice un futuru pal pueblu llangreanu.

Presentóse Conceyu Abiertu por Noreña col oxetivu d'entrar nel Ayuntamientu.

Esti martes presentóse'l Conceyu Abiertu por Noreña na Casa la Cultura de la villa. Mariu Arbesú foi l'encargáu d'esplicar a los presentes en que consiste'l movimientu ciudadanu sociopolíticu Conceyu Abiertu y como se ta encadarmando en bien de conceyos del país col oxetivu de que la política se faiga dende la base y acercar les decisiones a la ciudadanía y avanzar hacia la democracia directa. Pablo Pérez ún de los promotores de Conceyu Abiertu por Noreña desplicó'l sofitu d'Andecha Astur Noreña a la plataforma Conceyu Abiertu y los exes fundamentales de democracia participativa y la tresformación social. Tres les intervenciones abrióse l'alderique sobre propuestes concretes y problemátiques del propiu conceyu dende la falta d'un reglamentu de participación ciudadana, calces de participación de les asociaciones na vida política, problemes de vivienda, la necesidá d'atayar el paru dende l'ayuntamientu con bolses de trabayu, cuestiones de mediu ambiente o patrimoniu...y cuestiones que se van dir incluyendo nel programa de Conceyu Abiertu por Noreña. A la fin, decidióse volver a convocar un nuevu conceyu abiertu la selmana que vien onde siguir concretando propuestes y facer la llista ellectoral. Fonte: Infoasturies

Cencerrada popular escontra’l pensionazu

Los sindicatos Corriente Sindical d’Isquierda (CSI) y Sindicatu Unitariu y Autónomu de Trabayadores de la Enseñanza (SUATEA) convoquen una cencerrada popular escontra’l nomáu "Pensionazu", que va entamar el prósimu xueves 7 d’abril, a les 19:00 h. n’El Parche d’Avilés (plaza del Ayuntamientu), y que va percorrer les cais céntriques de la ciudá pa desixir, delantre de les sées del PSOE, el PP, la Patronal, la Banca, y les centrales sindicales CCOO y UXT la retirada de la Reforma les Pensiones.

Dende los sindicatos CSI y SUATEA denuncien que "tamos nel paru o trabayando una montonera d’hores por un sueldu que nun llega a la fin de mes. Abondes vegaes, trabayamos más hores de les que tamos aseguraes/os y por menos perres de les qu’afita’l conveniu. Tamos perdiendo les viviendes porque nun podemos pagar les hipoteques o los alquileres. En toles families hai dalguna presona en paru (cuandu non tola familia), malpenes podemos pagar el recibu la lluz, el gas o l’agua y, en xeneral, ca vegada trabayamos más, pagamos munchu más y cobramos menos". Dambos sindicatos aseguren que "rebaxaron o conxelaron los sueldos, xubieron los precios, retayaron les aídes societaries, tán desmantelando y privatizando servicios públicos como la sanidá, la educación o l’asistencia a mayores y discapacitaes/os y quitáron-yos l’aída a los paraos y paraes ensin ingresos". Por si fuere pocu, "ficieren una Reforma Llaboral qu’abarató’l despidu, fizo medrar el paru, precarizó’l trabayu y les condiciones llaborales y, a la escontra de lo que mos dicíen, amenorgó los contratos indefiníos y aumentó los temporales. Pero non contentos con ello, apretáronnos más les tuerques y obligáronnos a xubilanos a los 67 años con pensiones de miseria. Y tóu ello fízolo’l Gobiernu del PSOE xunta la Banca y la Patronal, cola complicidá del PP. Y amás d’ello, cuntaron col consentimientu de CCOO y UXT. Estos dos sindicatos sabrán por qué lo ficieron y a cambiu de qué (ye un secretu a glayíos: a cambiu de sovenciones, lliberaos y puestos de privilexu en tolos estamentos económicos y llaborales)". Afiten que tóu esto ye por culpa de la cris, porque yá nun hai perres, "pero paez ser que nun hebio cris p’apurrí-y a la Banca Privada 150.000 millones d’euros. Tampoco paez haber cris pa les 35 mayores empreses del Estáu, qu’algamaron en 2010 más de 50.000 millones d’euros de beneficiu, parte de los cuales gastáronlos en facer despidos, EREs y reconversiones de plantía. Y agora, demientres el Gobiernu’l PSOE anuncia retayos sociales nuevos, pretenden "saniar" les Caxes d’Aforros con más dineru públicu pa dempués privatizales (yá lleven inyeutaos 11.200 millones y entá tan iguando otra remesa)". Pa la Corriente y el sindicatu d’enseñanza, la cris remánase como disculpia. "Disculpia pa esplotar, pa privatizar, pa precarizar, pa despedir, p’arruinar a los y les trabayadores, p’apretar cá vegada más la bota sobro los nuesos pescuezos, en resume, pa facer que los ricos seyan más ricos y los probes más probes". Pa estos sindicatos, n’Asturies llevamos en cris permanente los caberos 30 años y hai xeneraciones enteres que lleven tola so vida nuna cris de la que nun son a salir. Poro, con motivu de les elleiciones conceyeres y nacionales del prósimu 22 de mayu, llamen a movilizase, porque "nun podemos siguir asina. Tenemos de para-yos los pies. Hai de salir a la cai a amosa-yos el nuesu descontentu. Tenemos de salir a lluchar escontra ellos, porque enxamás mos van dar nada poles bones; enxamás mos van dar nada si nun-yos lu arrancamos". Amás, aseguren qu’entamarán una consulta popular sobro la Reforma les Pensiones y la política económica y llaboral del Gobiernu, "pa que s’escuche la braera voz de los y les trabayadores". Dicha consulta entamarase na capital el sábadu 14 de mayu, con una gran movilización xeneral de trabayadores y ciudadanos/es que-yos faiga "pescanciar a ’los que manden’ (políticos, banqueros, grandes empresarios...) que les coses nun pueden siguir igual, qu’esta vegada nun val prometer y nun cumplir, qu’esta vegada namás tienen dos alternatives: gobernar pa los y les trabayadores y los ciudadanos/es o colar pa casa".

Fonte: Aruelu.

La CSI gana les eleiciones a la xunta de personal funcionario

A lo llargo de la xornada d'ayeri, 30 de marzu, tuvieron llugar les eleiciones pa escoyer la Xunta de Personal Funcionario del "Principáu d'Asturies". Un total de 2017 funcionarios y funcionaries (de los 4.201 que teníen derechu al votu), averaronse a les urnes pa escoyer una Xunta de 29 delegaos. Nesta votación la CSI llogró 7 delegaos (frente a los 4 de 2007), quedando per delantre del restu de fuerces sindicales: USIPA y CSIF con 6 delegaos, CCOO y UXT con 5, y USO que pierde'l so representante.

Recibimientu mañana nel Naúticu de Xixón al ministru español de trabayu.

La CSI llama a recibir al ministru de trabayu con too´l calor que´l Pueblu Asturianu sabe dar a sus visitantes. El Xueves 31 de Marzu va visitanos el ministru de trabayu. Como nun podía ser d´otra miente, la CSI convoca nel Náuticu de Xixón a les 09:30 de la mañan, una concentración pa dale un calurosu recibimientu, y comenta-y un par de cosines sobre la reforma llaboral y de les pensiones...

Echa a andar un nuevu conceyu.

Caxastur: Concentración contra la so privatización.

Arqueoloxía de la discriminación

La Xunta pola Defensa de la Llingua Asturiana acaba de plasmar al comprobar l’ausencia del asturianu y l’incumplimientu de la toponimia oficial en toles instalaciones y señalética del reinauguráu, depués de munchos años, Muséu Arqueolóxicu d’Asturies.

La Conseyería de Cultura vuelve a rise de la llegalidá y del patrimoniu que tien el mandáu de protexer. Depués de 12 años de retrasos y polémiques, y 20 millones d’euros gastaos, nin siquiera ye quien a cumplir unos mínimos razonables nel respetu a la ciudadanía.

Amás, el silenciu cómpliz de la Dirección Xeneral de Política Llingüística, dependiente d’esa mesma Conseyería, dexa en papel moyao la so supuesta “promoción” del idioma y la toponima oficial. Al otru día d’inaugurase un Muséu onde nun se respeta la toponimia oficial, la Dirección Xeneral de Política Llingüística fai una rueda de prensa pa esplicar cómo promocionen la toponimia oficial. Nun pueden reclamar credibilidá cuando la humillación nel departamentu propiu ye la norma que marca la so inoperancia. ¿Cómo pue un departamentu l’Alministración, la mesma qu’aprueba nel BOPA la toponimia oficial, incumplir sistemáticamente la llegalidá toponímica? Nun hai más que ver los paneles: "Morillón" (pol oficial Moriyón), "Gamonedo" (pol oficial Gamonéu), "Cabañaquinta" (pol oficial Cabanaquinta), etc.

Por eso, dende la Xunta pola Defensa de la Llingua reclamen la rectificación inmediata de tolos elementos d’información, señalización y descripción del Muséu Arqueolóxicu d’Asturies p’adaptalos a la llegalidá vixente en materia de toponimia. De la mesma manera, esiximos la presencia de la llingua asturiana n’igualdá de condiciones coles demás llingües presentes nel Muséu, porque l’unicu billingüismu qu’entienden los responsables de Cultura paez ser col inglés.

Fonte: Aruelu.

Presentación de Conceyu Abiertu por Gráu

La Casa Cultura de Gráu acueye esti llunes 28 de marzu l'actu presentación de Conceyu Abiertu por Grau. De magar les 19:30 hores va cellebrase un conceyu abiertu, al que tan convocaos tolos vecinos y vecines de Grau, onde se va desplicar que ye un conceyu abiertu y qué ye Conceyu ABiertu por Grau amás d'aldericar sobre los conflictos llaborales a nivel municipal y otres problemátiques del conceyu.

Este sábadu preséntase Conceyu Abiertu por Xixón.

Conceyu Abiertu por Xixón preséntase esti sábadu 26 de marzu a las 12:00 hores nun actu públicu que se va cellebrar en la Campa Torres.

Darréu, a les 13:30 hores, cellebrárase una espicha nel Centru Social L’Ayalga, asitiáu na cai Prendes Pando, 11, a la que tola sociedá xixonesa y asturiana ta convidada.

Nesti actu quieren presentase les propuestes p'ameyorar la situación del conceyu y de la política municipal de cares a la relación alministración-ciudadanía, siempres dende la perspectiva de braera democracia popular.

Fonte: http://www.conceyuabiertu.org/

Unos 2.000 estudiantes manifiéstense n'Uviéu

Unos 2.000 estudiantes universitarios tomaron ayer el cientru d'Uviéu na manifestación más numberosa de los últimos años.

Convocaos poles asamblées d'estudiantes de la Universidá estudiantes de toles facultaes de la Universidá concentráronse na Plaza d'España pa llueu aniciar un percorríu que los llevaría hasta les puertes de la Xunta Xeneral primero y al claustru del Edificiu Históricu de la Universidá dempués, onde finó la movilización estudiantil contra'l Plan Boloña.

Les Asamblées d'Estudiantes movilícense contra «un modelu universitariu hostil que quita fondos pa beques y los sostituye por préstamos» o que «impón un endurecimientu brutal del Réxime de Permanencia» o que supón «la espulsión de la Universidá pa quienes nun puean permitirse una dedicación esclusiva», ente otres munches custiones. Tamién hebo profesores que sofitaron la protesta "En defensa de la Universidá pública'

El rector Vicente Gotor y la vicerrectora Paz Suárez Rendueles, recibieron a una nutrida delegación de representantes estudiantiles. Gotor comprometióse a «contratar profesoráu pa desdoblar grupos en casu de masificación» y a estudiar el Reglamentu de Permanencia col Conseyu Social, además de a revisar planes d'estudios y títuloseos que se suprimieren optatives. Gotor amosó la so "preocupación polos precios públicos de los créditos", anque dixo que yera competencia del "Principado" que la xubida del preciu de la matrícula fore esti cursu un 5,5% el másimu permitíu.

Fonte: Infoasturies.