Exemplu gráficu de lo qu'entiende la OTAN por llabor humanitaria y procesu de democratización.

Les semeyes que vienen darréu tienen yá unos meses pero dende equí hai enfotu pa contribuir na so difusión. Son d'ochobre del añu pasáu na ciudá libia de Sirte y son un bon espeyu pa ver lo que ye una "intervención humanitaria" en favor d'un procesu de "democratización" nel país africanu.

Estes imáxenes, xunta munches asemeyaes que se puen atopar guetando a fondu por internet nun son les que salen nos grandes medios de comunicación, propiedá del imperialismu y de los oligarcas capitalistes. Unos medios que satanicen a los libios lleales a Gaddafi pero inoren les matances xabaces de les tropes colonizadores anque ye evidente yá'l fondu imperialista de la invasión. Esti ye'l rostru humanu del capitalismu y estes son les sos humanitaries consecuencies sobre cuerpos y vides civiles.

Caberamente tamos asistiendo a que les tropes "rebeldes" nun tienen tantu sofitu popular y que decenes de negocios surden baxo les alfombres informatives del sistema en beneficiu de grandes empreses occidentales. Esta ye la realidá, la realidá del neocolonialismu. El mesmu colonialismu modernu que sofitaron el PSOE y los sindicatos antiobreros CCOO y UGT, los mesmos que fai unos años s'atrevíen a dicir non a la guerra n'Irak y falaben d'esa intervención militar como d'imperialista inclusu. ¡ Puxa la hipocresía!

90.500 paraos y paraes n'Asturies en 2011 según la EPA

Sigue la sangría n’Asturies, nuevos datos pa la contestación social.

Según la Encuesta de Población Activo espardida güei pol "Institutu Nacional d'Estadística", la cifra de paraos y paraes rexistraos nel caberu trimestre de 2011 algamó cifres inda piores que les vistes en feches anteriores. Asina, Asturies zarró l'añu con 90.500 trabayadores en situación de desemplegu, un espoxigue de 10.900 paraos y paraes a lo llargo del añu 2011. Del mesmu mou, Asturies ye la comunidá cola tasa d’actividá más baxa con solu un 51’3%.

Los datos qu’espubliza güei l’INE nun podíen ser más murnios, ya que según esti muérganu estatal, la nación asturiana ta algamando cifres totalmente escandaloses y que de siguir asina, nun sería d’estrañar que provocaren serios conflictos sociales a nun tardar, inclusu esmolez que nun se tean dando ya. Como pue vese nesti informe, nel caberu trimestre del añu 2011, Asturies rexistró 5.000 nueves persones a la gueta d’emplegu, superando ya asina los 90.500 paraos y paraes, con una tasa oficial de paru que ye del 18’9%.

Si bien a primera vista estes cifres puen paecer meyores que los d’otres comunidaes, nun podemos escaecer otres estadístiques privaes espublizaes hai a penes unos díes o l’históricu del INE onde reflexábase la sangría poblacional d’Asturies, cola tasa de natalidá más baxa d’Europa y milenta mozos y moces que tuvieren qu’emigrar del país cada añu pa poder algamar un puestu de trabayu. Colos datos de paru y esa sangría presente, aínda hai otru datu que llama munchu l’atención y que tampocu convida al optimismu sobre una posible recuperación del país y ye qu’Asturies, ye la comunidá con una tasa d’actividá ente la población más baxa de tol estáu, con solu un 51’74%, per delantre del 53% de Melilla o’l 54’71 d’Estremadura.

Colos datos de paru y esa sangría presente, aínda hai otru datu que llama munchu l’atención y que tampocu convida al optimismu sobre una posible recuperación del país y ye qu’Asturies, ye la comunidá con una tasa d’actividá ente la población más baxa de tol estáu, con solu un 51’74%, per delantre del 53% de Melilla o’l 54’71 d’Estremadura.

Fonte: Infoasturies

Patronal y sindicatos UGT y CC.OO. roblen nuevos recortes

Na tarde d’ayeri 25 de Xineru algamaren el segundu alcuerdu “pal emplegu y la negociación colectiva” que supón nuevos ataques nel ámbitu llaboral.

Les organizaciones patronales CEOE y CEPYME xunto colos dos sindicatos españoles Comisiones Obreras (CC.OO.) y Unión General de Trabajadores (UGT) roblaren n’actu públicu na tarde d’ayeri un nuevu alcuerdu en materia llaboral, que según califiquen dende dellos ámbitos sindicales ayenos a estes organizaciones, ye una “nueva baxada de pantalones” que supón otra vuelta un ataque ensin precedentes a los drechos llaborales de los y les trabayadores nel estáu español y poro, tamién n’Asturies.

Asina destaquen del alcuerdu firmáu la total ausencia de crítica hacia’l papel principal que protagoniza la empresa privada, responsable cimera del esbarrumbe económicu provocáu pola naturaleza especulativa de la so actividá y onde nuevamente la patronal refuga la so culpabilidá, y señalando esplícitamente al pueblu –cola robla de les dos organizaciones sindicales mentaes- al señalar como “dificultaes observaes p’aumentar l’actividá económica y creación d’emplegu” “l’adeudamientu de les families cola so incidencia sobre’l consumu y la inversión agregada” y la “delda pública”, pa rematar a la fin, señalando como elementu determinante na perda de competitividá “el mayor crecimientu de los precios interiores y de los salarios nominales nel estáu español en rellación colos países de la zona euru y del restu de la X.E.”

Nesti sen, el documentu introduz una serie nueva de midíes y afonda n’otres de recién alcuerdu onde vencéyase la recuperación económica n’esclusiva a la “recuperación de los márxenes económicos” esto ye, a les ganancies empresariales, non al traviés de la mayor productividá mediante meyores técniques nel procesu productivu, sinón favoreciendo’l consumu y les aides públiques a la empresa privada. Además demanden más esfuercios por parte de los trabayadores asalariaos afondando na famosa “flexibilidá llaboral” onde la negociación nes empreses primará penriba del conveniu coleutivu, al atalantar a aquella como “l’ámbitu más afayaízu pa configurar estes materies” siendo esta flexibilidá un conteníu mínimu a incorporar polos convenios y onde según despliquen, esta flexibilidá tendrá como consecuencies na materia salarial “qu’un porcentaxe de la cuantía salarial, va facese depender de la situación y resultaos de la empresa”. Del mesmu mou, la revisión salarial ya nun va tar venceyada al IPC como hestóricamente se vien demandando, sinon qu’introducen un porcentaxe máximu anual pa los tres años vinientes de solu un 0’5%, mui perbaxu de la inflación que carecemos y que s’asuca pa esa dómina, lo qu’en términos real supón un descensu nel poder adquisitivu de les families y onde almítise la capacidá del patrón pa revisar incluso esta roína medra nel so porgüeyu. A lo cabero, en cuantes a negociación coleutiva reconozse la “facultá patronal pa inaplicar na empresa les condiciones de trabayu ya pautaes nos convenios sectoriales, concretamente condiciones d’horariu; distribuición de la xornada; réxime del trabayu a turnos; sistema de remuneración; sistema de trabayu y rindimientu; funciones; asina como les causes pa la inaplicación de les condiciones salariales”.

Fonte: Infoasturies.net

El BNG sigue la ofensiva chovinista nel Occidente Astur.

Güei EuropaPress asoleya una noticia que ye más que grave pa los intereses del Pueblu Asturianu y la nuesa nación. Fai referencia a l'asamblea que'l Bloque Nacionalista Galego va cellebrar esti fin de selmana qu'entra nel país vecín. Nesi aconceyamientu los galleguistes van anovar los muérganos de direición y aprebarán les sos nueves tesis polítiques y organizatives. El documentu de bas, empobináu pola UPG recueye una propuesta pa espandir la estructura organizativa a eso qu'ellos llamen la "Galiza Irredenta", ye dicir, territorios d'Asturies y parte de Castiella y Lleón que reclamen como parte de la nación gallega. Ye persabíu la intención d'anexonar territorios como la Tierra d'Eo-Navia o Ibias por parte del nacionalismu gallegu dende hai yá añós, pero nun ye hasta agora cuando la principal fuercia política d'esi país lleva eso a la praxis política.

La coalición socialdemócrata y nacionaliega quier afitar una estructura nos conceyos del occidente asturianu que se presupón que-y permitirá presentase a les eleiciones de conceyu n'Asturies y tratar de siguir llanzando cantos de sirena y esborriando la identidá asturiana del occidente astur. Per otru llau, esta ofensiva imperialista y anexionadora del galleguismo vien de la man d'un más qu'amosable pasotismu por parte del nacionalismu asturianu, con dalguna esceición como'l seutor d'Andecha Astur, siempres mui firme na defensa de la asturianidá del occidente y la denuncia pública del procesu de galleguización. Si'l nacionalismu asturianu, tanto no políticu como no cultural, foi pasota énte esti procesu nun fai falta que faigamos referencies a los políticos y partíos del Réximen, los que nun solo miraron pa otru llau sinon que sofitaron dalgunes iniciatives del galleguismu d'una forma evidente.

Ciertamente nun se pue ñegar qu'esti procesu ta en marcha, y con independencia de lo que salga nesta asamblea estraordinaria del BNG, lo ciertu ye que'l nacionalismu gallegu va siguir enfotándose na estratexa chovinista y aculturizadora d'esa parte d'Asturies tan escaecía. El Bloque Nacionalista Galego, con otres organizaciones de la redolada, s'autodefín con estes maniobres como una fuercia socialfacista y chovinista, pues reclama territorios qu'enxamás pertenecieron a Galicia ya inora la fonda identidá propia al empar que marcadamente asturiana d'esos conceyos. Pesie a tar nidio que'l 99,99 % de los y les habitantes del occidente se sienten asturianos el nacionalismu gallegu quier más guerra. La principal torga ye que nun tien enemigu activu. El nacionalismu asturianu nun atendió adecuadamente a estes agresiones nin afitó na defensa del territoriu un de los campos de trabayu conxuntu. Agora nun val llamentase.

Obviamente, dende esti espaciu nun vamos arrenunciar a la solidaridá internacionalista ente pueblos, pero énte too ta la defensa del nuesu país contra inxerencies estranxeres, venga l'imperialismu de Madrí o dende Galicia. Asturies y Galicia comparten una trayeutoria cultural basada en gran parte na cultura celta y nes formes tradicionales de vida y trabayu. Tamién comparten una gran hestoria d'emigración forciada y espoliu castellanu y depués español. Los vínculos na llucha pol autodetermín y la xusticia social nos nuesos respeutivos pueblos son evidentes pero estes coses son les que torguen eses posibilidaes. Esperemos que'l nacionalismu gallegu respete nun futuru'l nuesu país y los nuesos paisanos y paisanes, con independencia de lo que diga'l BNG, esa coalicion pseudo-nacioanlista y reformista que nun sabe yá ú ta ideolóxica y políticamente. Esperemos pues qu'esi nacionalismu gallegu consecuente y que brega daveres contra l'Estáu Español respete la sensibilidá astur de los asturianos d'Eo-Navia o Ibias, entre otres zones, y guíe la aición y estratexa baxo criterios de clas ya internacionalistes, y non, como pasa en gran parte agora, baxo criterios chovinistes orquestaos dende'l BNG.

Decenes de persones identificaes por participar nun actu de protesta

Crónica ya información apurrida pola Corriente Sindical d'Izquierda.

El vienres día 20 unes cincuenta persones participaron nun actu de protesta contra una agresión de calter facista nel conceyu de Castrillón, nel que se demandaba ante'l mesmu Conceyu de Piedres Blanques una condena pública d'esti tipu d'agresiones.

A pesar del so calter simbólicu -permaneciose tol tiempu na Plaza d'Europa- y de que se comunicara por escritu a la Policía Local, un númberu importante d'efectivos de la Guardia Civil fixo actu de presencia cola orde espresa d'identificar a les persones manifestantes, lo que podría conducir a un espediente de sanción importante.

Esti casu forma parte d'una serie d'actuaciones nes que'l derechu de manifestacion ye recotáu en llugar de protexíu: detención illegal d'inmigrantes, suspensión de conciertos de calter políticu, intimidación d'activistes por medio d'identificaciones... Amás, les ordenances ciudadanes" de les distintes llocalidaes tán convirtiéndose na principal ferramienta pa xustificar la criminalización de la protesta social n'Asturies. La llegada a la Delegación del Gobiernu español de Gabino de Lorenzo ta suponiendo la estensión de les práctiques represives d'Agustín de Luis n'Uviéu al restu de Asturies.

*Corriente Sindical d'Izquierda

Documental "La Doctrina del Shock"

Presentamos nesti blogue esti singular documental, ablucante dafechu. La sotitulación ye en castellán. El documental, inspiráu nel llibru "La doctrina del shock", de Noami Klein, cunta los procedimientos de control mental emplegaos n'Estaos Xunios y parte d'occidente. Estes téuniques, carauterizaes pola so brutalidá fueron iniciativa de los "Chicago Boys".

El propósitu del documental ye desplicar como s'emplegó intencionadamente esta técnica n'ambitos socio-económicos, aidando a reescribir la hestoria y asina poder l'imperiu saquear inda más les colonios y países en víes de desenrollu. Tamién sitúa estes xabaces teúniques na cayida del campu socialista de la URSS y otros países soberanos del capitalismu internacional. Encamentamos la so visión.

El camarada Lenin sobre la izquierda centraliega

"L'erru de la izquierda centraliega reside nel fechu de que, por temor a face-y el xuegu al nacionalismu burgués de les naciones oprimíes, benefició non solamente'l propiu nacionalismu burgués, sinon tamién al nacionalismu ultra-reaccionariu de la nación opresora".

Lenin.

La realidá:

L'únicu camín pa salvar l'idioma sigui siendo la oficialidá. ¿Hasta cuando los asturfalantes van siguir siendo ciudadanos minusvaloraos? ¿En que país del mundu hai complexu de les sos propios señes d'identidá? ¿Como se pue dicir un asturianu y perseguir una llingua que recibe'l nome d'asturianu?

Pinchoteo por Palestina.

Esti vienres, nel centru social Sestaferia, Xixón, organizaremos una cenuca/pinchoteo cola fin de financiar l´ayuda llegal ante la última foleada represiva israelí en Cisxordania. Precios populares, ambiente prestosu y dalguna sorpresina más.

Los tribunales d'esceición españoles conderguen a A.O.R.

Condergáu a un añu de prisión.

El mozu independentista asturianu A.O.R, acusáu d'enaltecimientu del terrorismu y humildación a les víctimes foi condergáu pola "Audiencia Nacional" española a un añu de cárcel, tres consideralu autor de los comentarios nuna rede social polos que foi incrimináu y, polo tanto, culpable de los delitos propuestos pol tribunal d'esceición.

Tres un procesu carauterizáu pol secuestru sistemáticu d'esti ciudadanu asturianu pa facelu "declarar" y rexistrar el so llar, nel que foi treslladáu de mena forciada a Madrí y posteriormente acusáu, finalmente foi xulgáu nel pasáu mes d'Avientu y vistu pa sentencia.
Asina, dende l'AN consideren que "los comentarios amosaos enaltecen el terrorismu y afalaguen a los asesinos de dos guardies civiles" -en referencia a miembros de la organización armada ETA- , anque consideren que los sos mensaxes tuvieren "difusión llimitada", polo qu'imponen al ciudadanu asturianu "la pena mínima" nesti nuevu casu de represión del estáu por mor d'una opinión.

Fonte: infoasturies

Fraga morrió como un heroe de la democracia y ensín ser xulgáu por crímenes contra la humanidá.

El facista Manuel Fraga morrió ayeri plácidamente na cama de la so casa a los 89 años d'edá. Güei tolos medios alienantes del Estáu Español faen alcordanza d'esti políticu como de "los pas de la democracia española" y lu traten como una figura exemplar. La posición de los medios del sistema ta nidio que va ser esa, nun van morder la man del amu que-y da de comer.

Lo que ye braeramente humildante ye'l comunicáu del PSOE al respectu, qu'una vegada más amuesa les sos incoherencies y la nula dignidá política. Asina, dende los sos sofas progres llamenten enforma la muerte d'esti personaxe, dalgo que pue entendese. Lo que nun ye fácil d'entender ye la visión que fixo'l PSOE nesi comunicáu de Fraga, que nel mesmu sen de los medios de manipulación considera al Fraga como un demócrata íntegru y agradez la so aportación a la Constitución de 1978. Una vegada más sal a la lluz la escura hestoria del PSOE na transición, etapa na cual aparten ya inclusu lliquiden a cualesquier tipu de socialismu marxista del so partíu y pauten col franquismu la prolongación del Réximen de Franco llavando la cara d'esi Réximen con una riestra de reformes qu'enxamás fueron ruptures. Poro, tamos énte un exerciciu d'humildación a munchos y munches militantes hestóricos del PSOE que quedaron nes cunetes de munches carreteres del Estáu y por supuestu d'Asturies por deicisión d'esti señor qu'ayeri morrió ensín ser xulgáu por crímines contra la humanidá. Esa ye la izquierda que representa'l PSOE y la so catadura moral. Ta ca vegada más nidio qu'enantes el capitalismu emplegó'l facismu pa poder salvar les sos poltrones y agora empleguen la democracia burguesa lliberal que tantu defende'l PSOE y el PP. Ye too lo mesmu, solo cambia la dinámica hestórica d'encubrimientu de la esplotación del home pol home y de la opresión de los pueblos. Igual de murnia ye la impunidá cola que Fraga finó como la poca vergoña d'esa supuesta izquierda corrupta de los ricos que ye'l PSOE.

Como non, llamentar la muerte d'esti señor a estes altures de la partida, ensín ser xulgáu nin condergáu enxamás polos sos múltiples crímenes, tortures y una represión de la que nunca arrenunció nin ñegó. Nesti filu alxuntamos un documental sobre los crímenes de Gasteiz del 3 de marzu, una de les munches matances contra la clas obrera de les qu'esti paisanu gallegu foi responsable.

Llamazares quier riise de los falantes de llingua asturiana.

El diputáu d'Izquierda Xunida en Madrí Gaspar Llamazares sorprendió esti vienres a la comunidá asturfalante con unes declaraciones del periódicu selmanal Les Noticies. Nesti mesmu periódicu declaró "voi usar l'asturianu nel Congresu col fin d'ayudar a facelo visible". Una vegada más, una declaración d'un altu cargu d'Izquierda Xunida suena a chancia ente los y les asturfalantes.

Hai que dicir, que Llamazares nun ye portavoz del so grupu parlamentariu, polo que les sos intervenciones sedrán escases y menos relevantes que les de por exemplu Cayo Lara. Per otru llau, d'alcuerdu cola llexislación del Estáu Español nun ta permitío falar asturianu nel Congresu, cenciellamente por tratase d'una llingua non oficial. Per otru llau, les pallabres de Llamazares son pocu creibles pol fechu de qu'enxamás se carauterizó esti políticu d'izquierda reformista por emplegar la llingua n'ambientes públicos y/o formales. Poro, ye normal les reticencies que xeneren estes declaraciones ente los asturianos. Hai qu'amestar a too esto la so actual impopularidá y la mala imaxe que tien incluso ente los sos votantes, polo que pue ser una estratexa más de Llamazares y d'Izquierda Xunida pa utilizar la llingua y elementos comunes al asturianismu pa facer llaváu de cara.

Nun podemos escaecer a colación d'estes declaraciones qu'Izquierda Xunida ye un de les responsables de que l'asturianu nun seya llingua oficial y de que'l so diputáu Llamazares nun puea emplegar la llingua. Tenemos que facer memoria y nun escaecer los años d'Izquierda Xunida combayando col PSOE-FSA nel Gobiernu del Principáu d'Asturies faciendo una política etnocida y siendo igual de responsables que la españolista FSA. Tamién dicir que na Xunta Xeneral los diputáos d'Izquierda Xunida enxamás falaren asturianu, polo que una vegada más caen pol so propiu pesu. Demientres toos estos años nel gobiernu asturianu, pesie a les sos promeses eleutorales enxamás ficieron un res pa normalizar la situación del nuesu idioma. Poro, ye una irresponsabilidá qu'esti señor, afincáu en Madrí y totalmente ayenu a la realidá asturianu mos venga con cuentos y cancios de sirena. Meyor dexaben de vender imaxe en Les Noticies y poníense a emplegar l'asturianu na Xunta Xeneral. Eso si que sedría positivu pa la visibilidá social del idioma, y non estes mentires y chancies.

¡Llamazares mentirosu y oportunista! ¡Izquierda Xunida, Izquierda Fundida!

La XDLA pide a la Xunta de Toponimia qu’intervenga pa que se respete la toponimia en La Vuelta

El miércoles tuvo llugar n’Iruña la presentación del percorríu de La Vuelta d’esti añu, con dos etapes en territoriu asturianu. La XDLA encamienta a la Xunta Asesora de Toponimia pa qu'intervenga pa qu'Unipublic respete la toponimia oficial.

Ye vezu cuando se dan a conocer los percorríos de les grandes vueltes ciclistes que se detallen les ciudaes y pueblos principales y altos de montaña pel que trescurre caúna de les etapes. Estos trayeutos tienen una repercusión pergrande nos medios de comunicación, qu’esparden denominaciones de llugares que munches vegaes nun son correutes, más nel casu asturianu, onde la toponimia castellana sustitúi na inmensa mayoría de les veces a la tradicional y oficial. Por esti motivu, la Xunta pola Defensa de la Llingua Asturiana (XDLA) solicita a la Xunta Asesora de Toponimia pa que medie con Unipublic, empresa organizadora de La Vuelta, pa que respete les denominaciones asturianes.

Dende esti coleutivu llamenten qu’estos díes tolos medios de comunicación, nacionales, estatales e internacionales, tean falando de les dos etapes asturianes (La Robla-Llagos d’Enol y La Ercina, el domingu 2 de setiembre; y Xixón-Cuitunigru, el llunes 3) –tán consideraes como les que van decidir la ronda– utilizando los nomes incorreutos ‘Lagos de Covadonga’, yá estendida inclusive ente muncha xente asturiano, ‘Gijón’ y ‘Cuitu Negru’ o ‘Cuitu Negro’. Amás, ente los pasos intermedios tampoco se respeta la toponimia, pa lo que la XDLA pon los exemplos siguientes: ‘Alto de San Lorenzo’ por San Ḷḷourienzu, ‘Alto de Tenebredo’ por Tenebreo y Alto de Ortiguero por Ḥortigueru, ente otros. “Ye'l momentu de que la Xunta Asesora de Toponimia intervenga énte los organizadores de La Vuelta pa que se respeten los nomes auténticos igual que se fai nes etapes gallegues, catalanes, vasques, etc., porque depués de la popularización nos medios de formes enquivocaes ye mui difícil volver a recuperar les reales, les qu'usó la población local hasta que se fixeron famoses. Si nel casu de L'Angliru se respetó la forma tradicional, nun s'entiende que nel casu de Cuitunigru namás se respeta la primer metá del topónimu”, espliquen. La XDLA considera qu’un eventu deportivu de tanta repercusión “ye una una bona oportunidá de facer llegar a un bon númberu de xente'l valor de la toponimia tradicional asturiana”.

Por último, la organización cívica de defensa del idioma anima a la Xunta Asesora de Toponimia conformada el 22 d’avientu a “completar los espedientes toponímicos de tolos conceyos y ponese a trabayar con otru tipu de topónimos con menos implicaciones llegales o reglamentaries como son los accidentes xeográficos”. Les persones que conformen esti órganu son Alfredo Ignacio Álvarez Menéndez, direutor Xeneral de Política Llingüística, como presidente; José Miguel García Arias, direutor Xeneral d'Ordenación del Territoriu y Urbanismu, como vicepresidente; y María Antonia Pedregal Montes, xefa del serviciu de Política Llingüística, como secretaria. Completen la Xunta como vocales Cristina Bellón del Rosal, direutora xeneral d'Alministración Llocal; Ramón d’Andrés, en representación de la Universidá d'Uviéu; Ana María Cano, en representación de la Academia de la Llingua Asturiana; Julio Concepción Suárez, en representación del Real Institutu d'Estudios Asturiano; Fernando Álvarez-Balbuena García, profesor de la Universidá d'Uviéu y espertu en toponimia asturiana; y Felipe Fernández García, caderalgu d'Análisis Geográficu Regional de la Universidá d'Uviéu y espertu en cartografía temática.

Na semeya, parte del ascensu a Cuitunigru, tovía ensin asfaltar.

Fonte: Asturies.com

¿La primavera árabe o la primavera de la OTAN?

Cásique tola izquierda ta fantasiada pola reciente "primavera árabe". Surden supuestos movimientos populares nesos países qu'echen abaxo supuestes dictadures. Recibimos bien el casu de Túnez, onde'l pueblu paecía comandáu por una especie de Revolución entamada poles fuercies contraries al presidente Ben Alí (aliáu a la centroizquierdista Internacional Socialista, de la que forma parte'l PSOE), incluso dellos comunistes la vieron bien pola participación del Partíu Comunista de los Obreros Tunecinos (de la CIPOML, una especie d'internacional hoxhaista). A la fin, col fracasu de les fuercies progresistes, demostrose lo qu'había: yera una revolución islámica.

N'Exiptu más de lo mesmo; persecuciones a la escontra los cristianos coptos, apaición na escena política de los Hermanos Musulmanes (organización internacional fundamentalista islámica, con una supuesta posición mayoritaria haza la metodoloxía pacífica anque formen parte d'ella grupos terroristes como Hamas) y una dictadura militar.

Recordemos una cosa, solo los países seculares (Libia, Siria, Yemen...) tovieron problemes al rodiu de les revueltes. Les fundamentalistes y medievales monarquíes de la península arábiga nun pasaron por eso, tolo que tovieron foron movilizaciones pequeñes, pacífiques y probablemente finxíes nes que se pidíen pequeñes reformes. Como comentó Abú Mohamed, representante políticu iraquí, qu'"Al Qaeda nun forma parte de la resistencia sinón de la ocupación". Quedó bien demostrao el papel imperialista d'esa organización si ye qu'esiste realmente y nun ye una especie de títere de los americanos como apuntaron Robin Cook, xefe del MI6, y l'académicu francés Thierry Meyssan.

Una cosa que destapa a los "revolucionarios" d'esta primavera ye qu'ente los sos firmes aliaos tan la OTAN y les monarquíes enantes citaes. Otra ye que les vindicaciones nun son democrátiques nin populares nin nada paecío, son relixoses. Preténdese la imposición d'un Estáu Islámicu.

Los "rebeldes" libios demostraron bien nidio tanto durante les revueltes como depués que'l so Conseyu Nacional de Tresición nun ye más qu'un aperu del neolliberalismu y del fanatismu. Agredieron a xente de raza negro, sofitaron bombardeos de la OTAN, engañaron al mundiu altraviés de los medios de comunicación falando de falses agresiones del gobiernu de la Yamahiriya, impunxeron la sharia (llei islámica)... Al igual que ta pasando en Túnez, según les declaraciones del primer ministru Hamadi Yebali, del Movimientu Enhanda, autodeclaráu como islamista "moderáu", nes que se va introducir la mesma llexislación basada nel Corán, cola esceición de los turistes que tendrán una llei especial p'atrayer turismu. La consecuencia en dambos países ye un retrocesu de los drechos de los trabayadores, n'especial de les muyeres, y un avance del neolliberalismu y la privatización de tou bien públicu (en Libia la inmensa mayoría yera propiedá estatal).

Respeuto a Gadafi, el mundiu pasó de querelu a odialu. Enantes pa la izquierda yera un home que llevara la democracia direuta y la economía socialista a Libia, yera el Ché africanu, tenía'l sofitu de Mandela, llevó alantre la revolución socialista árabe xunta Nasser... pero namái que lo dixo la tele, pasó a ser el diañu en persona.

Agora toca Siria. La anguaño imperialista y proamericana Lliga Árabe nun fai más que xugar xunta los sos aliaos del Atlánticu Norte. Al-Yazeera, el canal de televisión panarabista afincáu en Qatar, anguaño controláu pola familia real d'ellí, foi afalagáu pol gobiernu de los Estaos Xuníos pola so "cobertura" de les "revueltes" de Libia y, de fechu, tuvo estrechamente vinculada cola CNN (la ruptura nun foi por temes ideolóxicos sinón más bien territoriales).

El presidente siriu d'anguaño, Bashar Al Assad, nun tenía dengún interés en ser políticu realmente. Tuvo una educación como oftalmólogu, trabayu que desendolcó en Londres. Anque la opinión oficial ye que foi una especie de sucesión la cosa nun foi asina. Los seutores más antiimperialistes del Partíu del Renacimientu Socialista Árabe (Partíu Baaz) llamáronlu pa tornase presidente. N'aquel momentu había guerres de poder ente'l seutor propiamente siriu ya'l pro-Iraquí (ente otres coses anticomunista, collaboracionista con EEXX y drechista). Al igual que'l so pá, Hafez Al-Assad, ye un presidente mui popular, socialista, lláicu y antiimperialista

Hai varies evidencies pa demostrar que'l casu Siriu ye'l d'una revuelta entamada dende fuera. Por exemplu, el grupu de facebook "The Syrian Revolution 2011" anunció el conocíu como Día de Cólera en febreru d'esi mesmu añu, esclusivamente n'inglés, como tolos conteníos. Cuando entamó rinchar emplegaron l'árabe, pero demostrose bien lo qu'había. Esa mesma convocatoria foi espardida por Al-Yazeera. Nun tuvo nengún ésitu. El Mundo, pela so parte, faló de grandes movilizaciones, cosa desmentida pola CNN, yá que dicíen los organizadores que pasara pal siguiente mes.

Otru exemplu foi el de la bloguera lesbiana, opositora y siria, Amina Abdulah, que la detuviera l'exércitu y la torturala por criticar al gobiernu d'Al-Assad. Pero a diferencia de dellos casos, como'l de Zaina Hosni, que salió pela tele porque la oposición, Human Rights Watch y Amnistía Internacional la dieron por secuestrada, torturada, asesinada y tarazada en cachos depués, ella nunca pudo salir pola tele, nunca la conocimos en persona, porque nin yera lesbiana, nin muyer, nin siria. Yera un estadounidense partidariu de les fuercies antigubernamentales llamáu Tom McMaster. La semeya emplegada yera la d'una moza croata.

Los casos de manipulación de vítimes son munchos y nun podemos velos toos, pero vamos ver ún de los más llamativos. En Latakia, na zona costera, hebo movilizaciones a la escontra del gobiernu. Al-Assad dixo personalmente a la policía que nun emplegare armes de fueu si hubiere que disolvela. La seguridá del Estáu salió a la cai solo con porres. Los manifestantes pacíficos sacaron armes de fueu, asesinaron a 12 policíes y mancaron de gravedá a otros tantos. Los medios occidentales falaron de que'l gobiernu ficiere un bombardéu naval sobro la ciudá. Ensin comentarios.
Too esto xunta que s'empleguen imáxenes de conflictos n'otros países como si foren en Siria, al descubrimientu de la Intelixencia Rusa de qu'esisten llaboratorios d'imaxes en Hamburgo y nel Líbano y la formación de bandes armaes financiaes por la OTAN (según wikileaks) y probablemente por Turquía también, faen que la credibilidá de los opositores baxe a cero. Teamos d'alcuerdu o non con Bashar Al-Assad y col gobiernu siriu, ye evidente qu'esiste una campaña a la escontra del antiimperialismu. Como diz Eduardo Luque nel númeru caberu d'El Viejo Topo; "dicir nin OTAN nin Al-Assad ye dicir, na práutica, sí a la OTAN".

Testu propiu del Blogue marxista y nacionaliegu "Estratexa y Táctica".

Delles encuestes nel blogue.

El blogue d'izquierda soberanista Frayando Cadenes ufre delles entrugues a les persones que visiten esti espaciu dixital. Les cuestiones, espublizaes en mou d'encuesta cunten con delles problemes plantegaos alredor del fenómenu nacional y el soberanismu asturianu. Son entrugues mui básiques. S'agradez enforma que los lleeutores dean rempuesta a les cuatro cuestiones plantegaes.

Munches gracies d'antemán a toes y toos.

¡ Llingua nacional, llingua oficial !

Semeya d'archivu d'Andecha Astur. Panelón d'AA na Plaza'l Güevu de Villaviciosa desixiendo la oficialidá. Xunetu de 1997.

Javier Fernández denoma "nacionalista catalana" a Carme Chacón

Nueva ofensiva de la FSA en favor de la corriente más centraliega.

L'aparatu dirixente de la Federación Socialista Asturiana púnxose en marcha pa sofitar la candidatura de Rubalcaba a la Secretaría Xeneral del PSOE, en contraposición a l'hasta agora única candidatura rival, la lliderada pola ex-ministra Carme Chacón. A la robla del Secretariu Xeneral de la FSA, Javier Fernández, ente los avales presentaos por Rubalcaba pa poder presentar la so candidatura, hai qu'amestar les declaraciones radiofóniques realizaes pol mesmu personaxe. Nelles afirmó que "si Chacón fuere senadora como yo, nun taría sentada colos compañeros del PSOE, taría n'Entesa acompañada por nacionalistes catalanes, lo que ye dalgo valoratible".

Pela so parte, la otra cara organizativa visible de los "socialistes" d'Asturies, Jesús Gutiérrez, tamién amosó'l so sofitu al ex-ministru del gobiernu, declarando que "el so modelu de partíu y d'estáu, asina como la so política fiscal, ta en consonancia cola que venimos defendiendo dende Asturies". Son d'amestar tamién los sofitos públicos a Rubalcaba d' Antonio Trevín, Paz Fernández-Felgueroso, el portavoz uvieín Alfredo Carreño o la diputada María Luisa Carcedo, zarrando files escontra les voces menos centraliegues a les que, otra vegada más, denomen "nacionalistes".

Fonte: Infoasturies.net

Gabinín quier esfarrapar Asturies darréu col AVE y pide priesa...

De Lorenzo esixe conocer una fecha “concreta y firme” pa la llegada a Asturies de l’alta velocidá

Gabino de Lorenzo, nel so actu de toma de posesión como delegáu del Gobiernu estatal n’Asturies, esixó conocer una fecha “concreta y firme” pa la llegada del AVE al país. La ministra Mato encomendó-y a collaborar con Álvarez-Cascos.

L’ex alcalde d’Uviéu, que sustitúi nel cargu a Francisco González Zapico, referióse a la llegada de l’alta velocidá a Asturies como dalgo "imprescindible". Asina, y tres esixir conocer una fecha "concreta y firme" pal aterrizaxe del AVE nel nuesu país, encargó a los téunicos un trabayu que deberá ser "completu, pero cenciellu", nel que se reflexe la situación esacta de caún de los tramos, asina como los problemes téunicos o económicos qu’afeuten al ritmu de les obres.

El delegáu nuevu tamién faló de l’Autovía del Cantábrico: "De Moscú a Lisboa pue llegase per autopista, esceuto nos cuellos de botella asturianos, qu’han d’eliminase". Por esti motivu, comprometióse en redautar, "a la mayor brevedá", un informe sobre l’estáu de los tramos paralizaos tanto nel oriente como nel occidente. Ante la mirada atenta del presidente del país, Francisco Álvarez-Cascos, indicó que’l trabayu presentaráse "al Gobiernu d’España y a la sociedá asturiana".

Tamién taba presente nel actu la ministra de Sanidá, Servicios Sociales e Igualdá, Ana Mato, qu’encomendó a De Lorenzo a collaborar con Álvarez-Cascos al precisar na so intervención que los responsables públicos tán pa solventar problemes y non pa xeneralos, polo que "dende’l Gobiernu hai que collaborar con toos". D’igual forma solicitó que los esfuerzos se centren en garantizar y meyorar los servicios sociales, reclamando la collaboración de los gobiernos autonómicos y estatal.

"Nun tomé posesión pa intercambiar cueru nun combate cuerpu a cuerpu con nenguna institución nin representante institucional. Reitero la mio voluntá de trabayar en sintonía col Principáu y col so presidente, Álvarez-Cascos, colos 78 ayuntamientos d’Asturies, colos empresarios y colos sindicatos", comprometióse De Lorenzo na so intervención posterior.

Fonte:Asturies.com

Nueva web de CSI-Mocedá

La estaya xuvenil del sindicatu asturianu de clas Corriente Sindical d'izquierda estrena páxina web. Asina, la direición de la nueva páxina de CSI-Mocedá ye que vien darréu:

http://csimoceda.wordpress.com/

¡ENCAMENTÁMOSTE VISITALA!

Casi 40.000 asturianos y asturianes trabayen con contratos parciales

11,7% del total de trabayadores n'Asturies.
La modalidá de contratu parcial, que la patronal empresarial y los "sindicatos" CC.OO y UXT pretenden fomentar na prósima reforma llaboral, cunta n'Asturies con 39.900 persones acoyíes a esti tipu de contratu, lo que supón un 11,7% de los trabayadores ocupaos anguaño nel nuesu país.
Al entamu de la "crisis económica" del capitalismu, yeren 42.100 persones les acoyíes al contratu parcial, descendiendo la cifra nestos años por factores como la mengua na ocupación llaboral del pueblu trabayador asturianu o l'apueste esclusivu del empresariáu pola fórmula del despidu p'aforrar costes.
Contratu a tiempu parcial.
Ta consideráu como contratu parcial aquel nel que s'alcuerda la prestación de servicios durante un númberu d'hores al día, selmana, mes o añu menor del 77% de la xornada a tiempu completu reflexada nel Conveniu Coleutivu del seutor o, nel so defeutu, na xornada tope llegal de 40 hores selmanales.

Fonte: Infoasturies