Ayeri Llunes 30 de Xineru de 2011 un presidente d’Asturies o de la comunidá del Principado sorprendiónos a munchos cuando fexo usu por primera vegada del artículu 25.3 del Estatutu d’Autonomía dende la so introducción na redaición actual nel añu 1999 y que posibilitaba a un presidente asturianu disolver por primer vegada nesta dómina política la Xunta Xeneral d’Asturies, convocando eleiciones anticipaes.
La situación politicusocial de l’Asturies d’anguañu nun ye especialmente esperanzadora: 90.500 persones en paru, otres 130.000 en riesgu d’esclusión social, los y les milenta que tuvieren qu’emigrar, la tasa de natalidá, la baxada de la población y l’abandonu de les zones rurales y la so forma de vida son dalgunos exemplos, pero lo peor de tou... la resignación. Tou esti barullu de númberos son bien murnios, pero lo peor ye la nula rempuesta, la desmovilización de la xente nesti país, especialmente d’aquello que venimos llamando izquierda nacionaliega, que sacantes d’un par d'estrelles rellumantes, paez qu’alcontrámonos echando un pigazu que pola duración más bien paez un estáu de coma. Na mayoría de los casos da pena venos y en xeneral, solu destacamos pola nuesa incapacidá p’articular un movimientu seriu, con capacidá de permanencia nel tiempu, con braeru espíritu xunitariu y aglutinador y qu’además seya dende l’entamu exemplu de democracia, tresparencia y participación. Enque paeza lo contrariu depués de lo dichu hasta esti puntu, nun soi nada pesimista, sinón qu’atalanto que solu soi realista. Sigo pensando que la razón ta del nuestru llau y que si bien nun fuimos quien a rentabilizar años de trabayu, si algamemos condicionar enforma la vida política d’Asturies y de los conceyos onde desendolquemos el nuesu trabayu. Y pienso que sigue siendo tan necesariu como siempres que seyamos quien a dar les rempuestes colectives que necesita esti país y que muncha xente demanda d’un movimientu políticu alternativu a lo que ya hai p’Asturies en clave nacional y con atención a los problemes de la sociedá de conforma esa nación. Pero hai que facelo bien y non a lo xo.
Ensin más, voi meteme nel matu: el 25 de Marzu, esto ye dientro de 54 díes, hai unes nueves votaciones a la Xunta Xeneral. ¿Hai tiempu y vamos ser quien a entamar daqué conxuntu pa esi día? A la primera entruga, digo que sí. A la segunda nun se que dicir, yo y muncha xente que conozo se que vamos trabayar por ello, pero tarrezo qu’otra vuelta nun se vaya permitir. Dende equí prestaríame llanzar una propuesta a otres persones que, como yo, nun somos más que militantes o simpatizantes de base pero que camiento que precisamente somos los que tenemos que dar un puñetazu enriba la mesa, ya qu’a la fin, somos o debíamos ser tan protagonistes ya importantes como cualquiera dientro d’una organización. Ye’l nuesu deber empobinar a aqueyxs cabezalerxs de les nueses organizaciones y tamien lxs compañerxs que nun tean pol llabor, pa qu’aconceyemos d’una vegada y poner les cartes de caún enriba la mesa, non solu pa quitar les mázcares si ye que l'hai, ye que sinón nós mesmos taremos defendiendo la xunidá de pallabra pero afitando la dixebra coles nueses aiciones o pola nuesa omisión. Como propuesta, valdríame que la fueya de ruta fuere más o menos asina: primero delles persones “de pesu” tienen qu’aconceyar, a ser posible con un par de testigos apartidistes pa evitar repetir esperiencies pasaes, faciendo un poquiñín d’axente moderador y alcordar una fecha y pautar unos muérganos pa poder convocar y sacar alantre un conceyu abiertu de calter nacional, enantes del procesu eleutoral claru está, al estilu d’otros que tuvieren llugar en delles partes del mundu en momentos asemeyaos. Un conceyu onde podamos xuntanos y aldericar, pa salir d’elli colo que pa mi ye imprescindible: un documentu que recueya un alcuerdu de mínimos no políticu y una parte organizativa y de participación que tien que ser más ambiciosu de lo que tamos avezaos nesi sen internu.
No políticu nun voi estendeme, pues como dixi primero, tien de ser un alcuerdu de mínimos. Por exemplu y espero qu’esto nun sirva pa la crítica de baldre, pues dígolo ensin enclín dalu y cola meyor intención, del estilu del decálogu asoleyáu por Conceyu Abiertu, daqué perfectamente asumible non solu pa una organización d’izquierda nacional, sinón tamién pa otres como puen ser les ecoloxistes, feministes o otres organizaciones sectoriales que pudieran xunise a esti alcuerdu qu’esencialmente tien que respetar les demandes históriques del nacionalismu o soberanismu asturianu nel ámbitu políticu y cultural, ensin escaecer les reformes sociales que tamién llevamos años demandando de forma conxunta. Equí deberíemos escaecer lo que nos separta y guapamene podría llegase a esi conceyu con un documentu de consensu. Ye sin embargu la parte organizativa dende un entamu la que más m’esmolez poles diferencies y la costume y onde camiento que teníamos que tener más procuru, de puertes adientro polos posibles discutinios y n’especial de puertes afuera n’atención al contestu nel que tamos nesti entamu del añu 2012. Nun podemos cayer nel erru de querer ser una plataforma, coalición de partíos o llamáilo como queráis, nel sentíu clásicu y como les conocimos hasta agora. Primero, porque la nula esperiencia previa de trabayu conxuntu, además del conflictu esistente y abiertu ente “families” del movimientu nun paecen aconseyar la converxencia inmediata na mesma organización, además de que como ya dixi más arriba, los proyectos finales d’unos grupos y otros nun son lo mesmos, siendo esta propuesta pa una converxencia solu de mínimos políticos a comuña y non de fusión d’organizaciones, onde además hai que da-y pallabra a muncha xente que nun ye anguañu militante d’organizaciones pero que si ta nel día a día ehí y que tamién tien daqué qu’aportar, afondando na rellación del movimientu cola sociedá y nun cayendo na endogamia a la que tamos avezaos. Y nun falo nin d’atraer representantes d’esti o aquel movimientu nin de metenos nosotros a escacicar dientro d’otres organizaciones, sinón de facer qu’a mediu plazu toes estes lluches pasen pol nuevu movimientu que tamos por facer, qu’atopen agospiu equí con nós. Pero solu se suma dende’l respetu y la integración de la minoría, non coles práctiques comunes de fagocitar a otra xente simplemente pa enanchar lo de nueso sin importanos nin atender al resultáu de les nueses aiciones. Pero ye qu’además d’esto, el sistema xerárquicu y vertical clásicu del partíu que tenemos unos y otros nun paez ser el más afayaízu nun momentu hestóricu onde inclusive capes de la sociedá que taben totalmente al marxe de la vida política y desideoloxizaes dafechu, pasaren a formar parte d’ella y a tresformala col horizontalismu y la democracia direuta y participativa como bandera. Nun atender a esti fechu sería totalmente absurdu y llevaríanos a querer ponenos a construyir un movimientu fondamente reaccionariu, avieyáu y con un fedor a ranciu nada atrayente dende l’entamu, al nun atender al fechu de que’l movimientu popular ta nun estáu más avanzáu nesi sen y vien desendolcando dende hai casi un añu fórmules de participación que refuguen los lideralgos y les xerarquíes. Recuperar a la fin la bandera de la democracia que siempres foi de la izquierda y que la drecha robó primero y terxiversó depués convirtiendola nun sistema de "gobiernu democráticu" o meyor nuna dictadura encubierta, o como dicen delles persones, una “dictablanda”. Además ye dende la formula del conceyu , la que diba permitinos dotar de conteníos políticos les propuestes, faciendo camín al andar y non castiellos de cartes que nun lleguen a nacer. Tien qu’haber espacios d’opinión y alderique, ye positivu inclusu la formación de corrientes d’opinión (que non fraiciones) dientro del movimientu pa enriquecer a esti. Si depués del alderique algamamos alcuerdos, la xente qu’asuma xeres de direición, o meyor execución de lo alcordáu pola xente tien que representar a tol mundu, con espaciu pa les minoríes faciendo asina por integrales. Inclusu tien qu’haber plebiscitos dientro la organización pa temes importantes, por qué non, preguntemos a la xente na cai que-y prestaría que ficiera esti movimientu, garremos como dixi la bandera de la democracia y normalicémosla igual que tenemos asumíu qu’hai que lo facer cola llingua.
Ye d’esta forma como personalmente entiendo la xunidá d’aición, con un esquema totalmente flexible que respete la soberanía de les organizaciones y la so militancia y simpatizantes, asina como los plantegamientos totalmente llexítimos de caúna d’elles, pero tamién, que mos permita encarar con una mínima perspeutiva un procesu eleutoral estraordinariu en 2012 pero sobre tou, el de 2015 que ya ta ehí y onde nuevamente’l nacionalismu asturianu nun va tener gran cosa que rascar a nun ser que seyamos quien a dir de la mano con una propuesta y campaña daveres fresques y que seya quien a interesar a la xente, fundamentalmente a la mocedá. Una mocedá que lo que ta demandando pela so cuenta na cai ye participar de tol procesu previu a y tamién de la toma de decisiones, non siendo peones qu’acudan al toque de corneta cuando’l partíu lo demande como desgraciadamente munches vegaes pasó y pasa.
Un proyectu en definitiva que tien que nacer con vocación de futuru pa estes eleiciones nacionales y sobre tou pa les vinientes dientro de tres años, pa lo que tendrá que ser dinámicu n’atención al trescursu del tiempu y los cambios sociales, o nun será.
El nuevu ERE podría endurecer les sos condiciones pa los trabayadores. 
