Fuelga Xeneral n'Euskal Herria y en Galiza

Los sindicatos vascos y gallegos convoquen fuelga xeneral nos sos respeutivos paises pal prósimu 29 de marzu en rempuesta a la última reforma llaboral española aprobada estos díes.

N'Euskal Herria la mayoría sindical (ELA, LAB, ESK, STEE-EILAS, EHNE ya HIR) yá rexistraron la convocatoria de fuelga xeneral mientres que la Confederación Intersindical Galega (CIG) pel momentu namás l'anunció. Los sindicatos nacionalistes consideren tibia la postura de los sindicatos españoles mayoritarios (UGT y CCOO) y consideren que la fuelga xeneral ye una obligación pa defender a los trabayadores y desemplegaos d'una nueva agresión.

Fonte: Infoasturies

Disparidá nel soberanismu p'afitar un Día Nacional Asturianu.

Nesti blogue presentose una pequeña encuesta hai unes selmanes cola que se quería saber la opinión de los visitantes alredor de la data nacional asturiana. Los resultaos amuesen la yá perconocía disparidá'l respeutu qu'hai nel nacionalismu asturianu con esta cuestión. Decenes de persones participaron na encuesta y a elles queremos agradece-yos la participación y el visitar el blogue.

A la entruga ¿Cuál consideres que ye'l día más afayaizu pa cellebrar la festividá nacional asturiana? un 27 % daría como rempuesta l'8 de setiembre. Con dalgo d'autoridá s'impón nesta encuesta'l 25 de mayu, representando'l 47 % de les rempuestes. Otres dates menos tradicionales pa cellebrar el día de la nuesa nación pero que merecen la pena que s'atalanten son el 5 d'ochobre, con un sofitu del 15 % y el 25 d'agostu, sofitáu solo por un 1 %. La propuesta d'otra data representa al 7 % de lxs encuestaxs.

El Gobiernu de Rajoy miente nel déficit

El gobiernu español refugó les acusaciones que salieron de l´axencia Reuters
La Xunión Europea podría multar al Estáu español

L’axencia de noticies Reuters asoleyó ayeri una información onde diz que´l gobiernu español subió artificialmente los datos de déficit hasta´l 8%, dos puntos por enrriba, pa conseguir meyorar les opciones de cumplir los oxetivos marcaos por Europa. El gobiernu de Mariano Rajoy fizo esti apañu p´acusar a José Luis Rodríguez Zapatero de mentir y xustificar la suba, por exemplu, del IRPF.
Si son braeres estes informaciones, la Xunión Europea podría multar al Estáu español, que fizo esto pa tener meyores datos esti añu. Amás, la multa podría ser tamién por retrasar les midíes d’axuste hasta depués de les eleiciones andaluces. El retrasu d’estes midíes fai albidrar a Europa qu´el crecimientu español va ser peor a llargu plazu.
Según un comisariu européu citáu por Reuters, les multes escontra España son inevitables si ye verdá esto, pero´l vicepresidente de la Comisión Europea, Oli Rehn, dixo que les informaciones nun son verdá dafechu, y que yá se ta estudiando´l casu de la economía española. Tamién negó la información el Ministeriu d’Economía español, qu´anunció que fadrá públicu un comunicáu pa desmentiles.
Nos primeros díes del gobiernu de Mariano Rajoy l’executivu fizo públicu qu´el déficit taba disparáu en más de dos puntos, pero dellos ministros ficieron públiques cifres que nun coincidíen.

Fonte: Aruelu

Enllaz: Revista Contracorriente Febreryu.

http://www.csi-asturies.org/documentos/Contracorriente_%2023_febreru.pdf

Calcando nel enllaz pues acceder a la revista al númberu 23 de la revista Contracorriente, correspondiente al presente mes de fereberu. La revista ye'l muérganu de la Corriente Sindical D'Izquierda y preséntase na direición URL anterior en formatu PDF. Encamentamos la so llectura y tamién el so espardimientu.

Rioglass Solar presentará un nuevu ERE tres l'aprobación de la reforma llaboral

El nuevu ERE podría endurecer les sos condiciones pa los trabayadores.

Rioglass Solar, empresa con fábriques nos conceyos de Mieres y L.lena presentó la pasada selmana un Espediente de Regulación d'Emplegu pol que'l conxuntu de los 200 trabayadores en plantilla se veríen afeutaos durante trés meses, amás de sufrir 16 despidos, según la compañía, a causa de "los problemes de financiación de los clientes".

Sicasí, la direición de la compañía retiró l'Espediente presentáu col enfotu de beneficiase de les meyores condiciones pa la clas empresarial que supón l'aprobación de la Reforma Llaboral dende'l gobiernu español. Asina, dende'l coleutivu de trabayadores esiste'l miéu de que cola nueva normativa la empresa imponga unes condiciones muncho más dures, amás de nuevos despidos.

Dende la representación sindical refuguen la midida, amás de custionar la so llegalidá y afitar que "nun val too" na negociación del "procesu regulador", qu'agora podrá ser aprobáu ensin mediación d'una autoridá llaboral competente colos perxuicios pa los trabayadores qu'ello puede suponer.

Fonte: infoasturies.net

Conciertu-Presentación d'I.R.A

Entama Nora Antifa Records.

El coleutivu Nora Antifa Records anuncia un conciertu de presentación con motivu del primer discu asoleyáu pola banda asturiana de hardcore-punk I.R.A -Insurgentes Revolucionarios Asturianos-, que tendrá llugar esti sábadu 18 de febreru de magar les 20:30 hores nel Clú Xuvenil de Villa asitiáu en Riañu (Llangréu). El "preciu de sofitu" del conciertu cuntará con dos modalidaes: 5 euros si se merca sólo la entrada, y 8 euros si s'amesta'l nuevu discu del grupu I.R.A.

Xunto a la banda asturiana actuarán otros cuatro grupos: Rojo Dos (Vigo HxC), Adizión Etílika (Punk Asturies), Acid Mess (Punk Uviéu) y Zigua (Punk Ska Xixón). Amás, anuncien precios populares, asina como informen de la esistencia d'autobuses "curuxa" Llaviana-Uviéu y Llaviana-Xixón con pasu per Villa.

Andecha Astur preséntase a les elleiciones nacionales del 25M

Énte la imposibilidá de facer efeutiva la xunidá d’aición pa esta convocatoria elleutoral y poder ufiertar a la sociedá asturiana una única alternativa nacionaliega, Andecha Astur decide presentase a estes elleiciones nacionales na so llinia d’izquierda nacionaliega, col comencimientu de que ca vuelta ye más necesaria esa xunidá d’aición en defensa d’Asturies.

Andecha Astur considera que la iniciativa que supunxo’el “Manifiestu 25M” marca definitivamente un enantes y un dempués na dinámica del nacionalismu asturianu, al plasmar en términos claros y concisos un analís de la rialidá necesariamente compartíu por toa aquella presona o organización que defenda una alternativa nacionaliega d’izquierda p’Asturies. Ello asina, dende Andecha Astur non solo compartimos esi analís, sinon que dende yá manifestamos la nuesa voluntá de siguir nesa llinia una vuelta pasáu’l paréntesis elleutoral, y fadrémoslo comu agora, ensin dengún condicionamientu previu, y con una voluntá cierta d’aportar a alcuerdos.
Asina mesmo, dende Andecha Astur agradecemos a los firmantes del manifiestu non solo la iniciativa y la propuesta ensigo mesma, sinon tamién el valor demosáu al facer plantegamientos en clave de país y non en clave d’organización.

Andecha Astur considera que, anque tovía mui lloñe d’algamar los sos oxetivos, el “Manifiestu 25M” yá algamó’l so primer ésitu, al permitir que los representantes de Bloque-UNA s’aconceyaran por primer vegada na hestoria con Andecha Astur, lo que valoramos positivamente y pesia considerar un erru la so inmediata refuga a facer dengún plantegamientu o a continuar coles conversaciones, tamos ciertos que na midía que los militantes d’estos partíos políticos puean analizar el “Manifiestu 25M” y posicionase al respeutu, dirán dándose los pasos precisos pa que s’imponga’l sentíu del deber comu nacionaliegos d’izquierda p’algamar la xunidá d’aición que mos desixe una Asturies ca vuelta en situación más crítica.

Ello asina, Andecha Astur,por unánime alcuerdu de los sos militantes, aconceyaos a tal efeutu una vuelta conocíu’l manifiestu, asúmelu dafechu, perafítase na so defensa y reitera la so dimposición a trabayar nesa llinia ensin más condicionamientu que la defensa de los porgüeyos d’Asturies y el Pueblu Trabayaor Asturianu.

Según encuesta d'esti blogue, la preferencia por un modelu d'Estáu Asturianu ye'l socialismu.

La preferencia nel soberanismu asturianu en cuantes a modelu d'Estáu dixebráu asturianu ye unánime. Nuna encuesta plantegada nesti blogue, l'80 % de los encuestaos opten por un modelu d'Estáu Socialista si güei Asturies fuere una nación independiente dafechu.

Per otru llau, un 13 % preferiríen un modelu Social Demócrata mentantu qu'un 5 % de los votantes opten por un modelu neolliberal.

Como podemos ver, el modelu marxista de socialismu sigui imponiéndose nel soberanismu asturianu d'alcuerdu con estos resultaos y ye nesta dómina de crisis capitalista cuando quiciaves haya que vindicar más que modelu d'Estáu queremos, pues nin queremos simplemente separtanos del Estáu Español, nin queremos un Estáu tan miserable ya inxustu como'l impuestu n'Asturies depués de tantes décades.

Agradecer a toles persones que votaron y animales a siguir el blogue.

Nun ye una crisis, esto ye una estafa.

Vidiu de la manifestación del pasáu xueves convocada polos sindicatos de clas. Na convocatoria participaron cuasi que 2.000 persones y foi valorada polos organizadores como l'aniciu d'un nuevu ciclu respeutu a la movilización social y popular nesti país.

II Folixa Antroxera - C.S. Sestaferia.

¡Puxa l'Antroxu Autoxestionariu!

Comunicáu de la manifestación de CSI, CXT y SUATEA.

Mañana, el Gobiernu va aprebar una nuea Reforma Llaboral; un nueu castigu a la clas obrera. Tenemos millones y millones de paraos, sueldos de miseria, contratos d’esclavos, millones de presones a la raya la indixencia, una mocedá ensin futuru y cuásique ensin presente. Too ye poco pa satisfacer l’avaricia de políticos, banqueros y empresarios.

Cola privatización de la Sanidá, namás van poder tener salú aquellos que tean perres pa pagala. Nun podemos dexar la nuesa Salú nes manes de mercaderes y negociantes, porque la nuesa Salú nun ta en venta.

Los recortes na Enseñanza Pública y la so privatización, va tornanos a les dómines nes que namás que los más pudientes acedíen a la educación. Quieren tornar los centros escolares n’empreses y “chiringuitos” empobinaos a facer caxa, pero lo que ta en xuegu ye la educación de los nuesos fíos y fíes.Y los Servicios Sociales, cenciellamente van desanicialos, comu yá demuesaron colos 152 despedíos del Centro Especial d’Emplegu “APTA”.

Los partíos políticos del parllamentu asturianu son una braera vergoña y nun mos sirven pa nada; namás-yos importen los sos cargos y los sos sueldos millonarios.

Los sindicatos mayoritarios, CCOO y UXT, tampoco van engabitanos, porque son cómplices del Gobiernu, de la Banca y de la Patronal. Traicionen a la clas obrera y apauten lo que faiga falta a cuenta de caltener los sos “chiringuitos”.

Poro, la única igua, lo único que mos queda a los y les trabayadores ye la xunidá y la llucha. La llucha na cai, la llucha nes empreses. El presente ye de paru, probitú y represión. Cola llucha obrera hai un camín abiertu, cola llucha obrera hai futuru.

Conceyu Abiertu propón una ordenanza pal usu del asturianu en Noreña

Conceyu Abiertu por Noreña acaba de presentar a los demás grupos municipales (PSOE, IPÑ, PP, FDLI, FAC y IDEAS) una propuesta d’Ordenanza municipal pal usu de la llingua asturiana nel Conceyu de Noreña pa que puedan estudiala y facer les propuestes qu'estimen convenientes enantes d'unviala a los órganos de decisión del Conceyu. La formación política nacionalista espera poder reunise con representantes de tolos partíos y recoyer les sos impresiones pa que la ordenanza sobre l'usu del asturianu pueda aprobase por unanimidá.

De llograr l'aprobación nel Plenu, diba ser la primer vez que Noreña se dote d’una normal local sobre la llingua propia onde se reconozan los derechos llingüísticos de tolos vecinos y vecines, se regule l’usu na Casa Conceyu y s'afiten delles midíes de promoción y normalización. Por too ello, Conceyu Abiertu ve conveniente que la propuesta puedan aprobala tolos grupos, al ser la llingua asturiana «patrimoniu de tolos noreñenses independientemente de la so ideoloxía», señala la formación.

Pa consiguir que salga alantre esti puntu del so programa electoral, Conceyu Abiertu por Noreña vieno estudiando les ordenances sobre l'asturianu aprobaes n'otros conceyos d'Asturies de manera que'l testu presentáu s'axuste a la llexislación vixente y puedan asumilu tanto los grupos de la oposición como'l propiu gobiernu municipal, formáu por PSOE y IDEAS. La organización nacionalista destaca que, «nestos tiempos de crisis, les ordenances nun supondríen un costu económicu al Conceyu», sinón que bona parte de les actuaciones diben depender namás que de la voluntá política. N'aprobándose, les midíes podríen dir poniéndose en práctica paulatinamente, «según los medios disponibles», esplica Conceyu Abiertu.

Los promotores ven la necesidá d'aprobar estes ordenances pa que nun se repitan delles situaciones producíes a últimos del añu pasáu, cuando l'alcalde de Noreña, César Movilla (PSOE), se negara a almitir les mociones n'asturianu del representante nacionalista y los grupos municipales refugaren almitir a trámite una solución provisional presentada por Conceyu Abiertu mentes nun se redactaren unes ordenances definitives. A esta negativa reaccionaron con crítiques tanto l'Academia de la Llingua Asturiana como delles asociaciones de defensa de la llingua y la cultura asturianes.

Fonte: Lesnoticies.com

Recuperando la cai.

Exemplar movilización güei entamada pola Corriente Sindical d'Izquierda, SUATEA y CGT baxo'l llema "Esto nun ye una crisis, ye una estafa" en Xixón. Probatiblemente cuasi que 2.000 persones (inclusu más), nun ambiente de ganes de lluchar y combativu. Cada vegada más xente ye cosciente que la dignidá nel trabayu y el futuru pa esti país nun van de la man del capitalismu nin de los sos sindicatos verticales UGT y CCOO. ¡Norabona a los organizaores!

¡Puxa'l Pueblu Trabayador Asturianu!

Alemaña cuestionó´l papel del rei d´España Juan Carlos I nel 23-F

Un documentu del embaxador alemán de la dómina, asoleyáu pol selmanariu alemán ’Der Spiegel’, amuesa un rei comprensivu y simpatizante colos golpistes

El selmanariu Der Spiegel asoleyó na so edición en papel un informe enviáu pol embaxador alemán n´España en 1981, Lothar Lahn, nel qu´esplica qu´el rei Juan Carlos amosó comprensión colos protagonistes del golpe d’estáu del 23 de febreru de 1981. La revista básase nun informe enviáu pol embaxador al gobiernu del socialdemócrata Helmut Schmidt, y que non fae muncho quedó desclasificáu. Descríbese´l conteníu d’una charra ente Lahn y el rei´l 26 de marzu de 1981 nel que Juan Carlos, lloñe d’amosar refugu o enfadu colos golpistes, amosaba “comprensión y simpatía”.

El rei, según Lahn, tamién-y aseguró: “Los líderes del golpe namás queríen lo que toos queríamos, concretamente´l restablecimientu de la disciplina, l’orde, la seguridá y tranquilidá”. Y echaba toes culpes del golpe d’estáu al presidente del gobiernu español, Adolfo Suárez.

El rei confesó al embaxador alemán que diba mira d’influyir nel gobiernu y los tribunales pa evita-yos un castigu severu a los golpistes, y que´l 23-F había qu´escaecelu lo enantes posible.

Fonte: aruelu.com

La nuesa hestoria.

Andecha Astur asume'l manifiestu 25M y la necesidá d'una candidatura única

La organización nacionalista asoleya un nidiu enfotu d'algamar un alcuerdu políticu a la vegada que pide la participación de mediadores p'algamar una única candidatura de forma urxente.

Andecha Astur vien d'asoleyar na so web una nota de prensa qu'unvia a los medios d'información, onde la organización d'izquierda nacionalista valora positivamente'l manifiestu por una única candidatura de la izquierda nacionalista pal 25M y pide a les persones que lu roblen la so mediación ente les organizaciones pa resolver positivamente'l conflictu y que toles partes sigan avanzando nel mesmu sen.

Nel so comunicáu Andecha Astur "comparte dafechu colos firmantes l’analís fechu y camienta qu’esiste una necesidá urxente d’algamar una candidatura nacionalista d’izquierda xunitaria como forma de facer frente a la crisis d’Asturies" faciendo además una valoración positiva del manifiestu y onde califica l'actitú de los firmantes de "valiente y afortunada", agradeciendo'l pasu alantre dau. Sicasí y dada la complexa situación que vive anguañu Asturies, con aconceyamientos y movimientos a contrareló pa esclariar el futuru inmediatu de les tres fuercies polítiques que taríen intentando algamar un alcuerdu, Andecha fae un llamáu a estes o cualesquier otra persona que tea en disposición, pa que dean un pasu alantre que facilite l'alcuerdu, encamentando "a los mesmos firmantes a siguir calteniendo’l necesariu protagonismu nel procesu a desendolcar mediando ente les organizaciones polítiques".

Nota completa d'Andecha Astur:

"Andecha Astur asume'l manifiestu 25M y la necesidá d'una candidatura única
Encamienta a los firmantes a qu'actúen de mediadores ente organizacionesAndecha Astur valora positivamente’l manifiestu robláu por 12 persones representatives del nacionalismu d’izquierdaAndecha Astur comparte dafechu colos firmantes l’analís fechu y camienta qu’esiste una necesidá urxente d’algamar una candidatura nacionalista d’izquierda xunitaria como forma de facer frente a la crisis d’Asturies.Agradez la valiente y afortunada iniciativa de los firmantes y camienta qu’el pasu dau por estes doce persones pué ser puntu d’alcuentru de magar el qu’avanzar na xunidá d’aición elleutoral.Ye de destacar que’l númberu de firmantes ensin ser mui eleváu ye, por embargu, mui representativu de diferentes seutores del nacionalismu asturianu d’izquierda y encamienta a los mesmos firmantes a siguir calteniendo’l necesariu protagonismu nel procesu a desendolcar mediando ente les organizaciones polítiques".

Dellos nacionalistes representativos asoleyen un manifiestu pola formación d'una única candidatura'l 25 de marzu

Importantes movimientos de cara a la conformación d'una candidatura única.

Doce persones representatives de tendencies nacionaliegues tan acabantes de roblar una carta abierta conxunta col enfotu de qu'Unidá Nacionalista Asturiana, Andecha Astur y Bloque por Asturies "abran un procesu de diálogu nes prósimes hores" pa presentar nos prósimos díes "una única y ámplia coalición ellectoral" de la que formen parte "tolos partíos asturianistes, nacionalistes d'esquierdes, verdes y a la que se sumen indepndientes y organizaciones sociales". Los firmantes son Mariu Arbesú, Fernando Ornosa, Antón Fuertes,Inaciu Llope, Iyán González, Xune Elipe, Xulio Llaneza, David Rivas, Dulce Xil, Xosé Ambás, Xicu Mata y Pablo Pérez y la "Carta abierta, al nacionalismu asturianu, a los movimientos sociales, ecoloxístes y a tola sociedá asturiana" ye la que sigue:
CARTA ABIERTA AL ASTURIANISMU, AL NACIONALISMU ASTURIANU, A LOS MOVIMIENTOS SOCIALES, ECOLOXISTES Y A TOLA SOCIEDÁ ASTURIANA
Los abaxo firmantes, persones esmolecíes dende va tiempu, social, cultural y políticamente pol nuesu país MANIFESTAMOS:
La necesidá imprescindible de facer un esfuerciu pa presentar nes eleiciones del 25 de marzu de 2012, una alternativa política a les organizaciones presentes na Xunta Xeneral, poles que nun mos sentimos representaos y qu’antroxen la vida de los asturianos y asturianes, condergándonos a un abismu del que nun vamos poder salir en décades.
Afalamos a toles organizaciones del espaciu políticu del nacionalismu d’esquierda (UNA, Andecha Astur y Bloque por Asturies) a qu’abran un procesu de diálogu nes prósimes hores, cola urxencia que necesita esti momentu políticu de fonda crisis social, cultural, medioambiental y política.
Pidimos la presentación nos prósimos díes d’una única y amplia COALICIÓN ELECTORAL de la que formen parte tolos partíos asturianistes, nacionalistes d’esquierdes, verdes y a la que se sumen persones independientes y organizaciones sociales. Pidimos que nun haya esceiciones, escaecer el pasáu y que se faiga un exerciciu de responsabilidá política pa ver lo esencial: presentar una alternativa política dende Asturies pa SOLUCIONAR los problemes d’Asturies.

FIRMEN

Mariu Arbesú

Fernando Ornosa

Antón Fuertes

Inaciu Llope

Iyán González

Xune Elipe Raposo

Xulio Llaneza

David Rivas

Dulce Xil

Xosé Ambás

Xicu Mata

Pablo Pérez

6.070 persones más ensin emplegu en xineru n'Asturies

Asturies a piques de llegar a les 100.000 persones paraes.

L'añu empicipia como acabó l'anterior. En xineru de 2012 el paru medró un 6,70%, 6.070 persones, algamando un nuevu récord con 96.607 persones rexistraes nes llistes de desemplegu. La xubida ta penriba de la media estatal (4,1%) y en 2011, el paru medró en 10.599 personas, un 12,32%, cuatro puntos perenriba de la media estatal. En xineru aumentó'l desemplegu en tolos sectores, n'especial nel de servicios con 4.822 persones más. Na construcción hai 723 persones paraes más, na industria 400, n'agricultura y pesca 33 y el colectivu sin emplegu anterior hai 92 personas más.

Arbesú: “Hai una oportunidá nueva pa intentar una candidatura única lo más amplia y abierta posible”

Mariu Arbesú, candidatu de Conceyu Abiertu a les eleiciones nacionales últimes, considera que’l 25-M ye "una oportunidá nueva pa intentar una candidatura única lo más amplia y abierta posible”. La plataforma va aconceyar esti sábadu.

“Esta situación pillónos de sorpresa y de momento nun tratamos el tema, dalgo que vamos facer el sábadu nun conceyu”, esplica Arbesú, qu’añade que “la primer valoración que se pue facer ye que tamos ante una oportunidá nueva pa intentar una candidatura única lo más amplia y abierta posible. El nacionalismu d’izquierdes tenemos agora esa responsabilidá”. Na xunta d’esta fin de selmana ta prevista la toma de decisiones concretes nesi sen, anque Arbesú avanza que “tamos dispuestos a negociar y a falar con tol mundu”.

“Depués de la esperiencia de mayu quedó nidio que nel nacionalismu o nos ponemos d’alcuerdu nuna candidatura o’l votu va volver a dispersarse. Creo que ye’l momentu afayadizu pa plantegar unos puntos mínimos mui básicos en clave asturiana” cola fin de, más allá de los resultaos que s’algamen en marzu, “sentar unes bases de cara al futuru”, continúa Arbesú. Al respeuto, recuerda que Conceyu Abiertu ye “una plataforma de persones” y “una ferramienta válida que podría utilizase”, pero destaca qu’han de ser les organizaciones les que deben ponese d’alcuerdu p’algamar una candidatura única del nacionalismu.

Por último, el cabezaleru de la candidatura de Conceyu Abiertu na cita coles urnes de mayu, llamenta la situación na que s’alcuentra’l país “con 90.000 paraos” y critica que, por culpa “del sistema políticu nel que ta sometíu Asturies, que nun-y permite desarrollase económica nin políticamente”, se llegue a esta convocatoria d’eleiciones.

Fonte: Asturies.com

Primeres protestes n'Alcoa pol ERE

Llucha polos puestos de trabayu.

La plantilla de la fábrica avilesina d'Alcoa sofitó ayeri de mena masiva la convocatoria de protesta entamada polos representantes sindicales del coleutivu, por mor del Espediente de Regulación d'Emplegu que la direición mundial de la compañía quier desendolcar nes sos plantes d'Avilés y A Coruña, col enfotu de menguar la producción, nel casu asturianu, hasta les 45.000 tonelaes sobre una capacidá total de 90.000 na so factoría n'Asturies.
Asina, la plantilla cortó la carretera y fizo una concentración ente les 10:30 y les 11 hores de la mañana, como midía de presión ente les negociaciones pa definir les condiciones finales del ERE. Dende la representación sindical ponen como condiciones irrenunciables p'aceutar l'Espediente qu'ésti seya asumíu por tola plantilla, pa que l'impautu ente los trabayadores seya menor, y la reparación de les cubes que s'aparen, como ferramienta p'asegurar la producción d'aluminiu na fábrica avilesina.
Tamién anuncien que se trabaya na convocatoria d'una manifestación n'Avilés pa la defensa del seutor productor d'aluminiu primariu n'Asturies, asina ocmo'l desplazamientu d'un bon númberu de trabayadores a la fábrica gallega en sofitu de la manifestación que se cellebrará mañana n'A Coruña, asemeyada a la plantegada n'Avilés.

Fonte: Infoasturies