De los resultaos del 25M munchos destacaremos como lo más llamativo l’altu índiz d’abstención. Pero, ¿cómo interpretar l’abstención? El sistema elleutoral, incluso con una participación de tan sólo’l 30%, da por llexítimos los resultaos elleutorales. Poro, hai quien valora l’abstención como un actu d’inconsciencia, d’apatía, de conformidá col estáu de les coses y de conformidá colos que ganen les elleiciones. Sicasí, pa otros l’abstención ye l’alternativa de los descontentos, de los que refuguen el sistema o nun s’identifiquen con denguna de les opciones polítiques. A la fin l’abstención, mui de xuru nel casu d’Asturies, representa un poco de los dos estremos.
Párome a analizar l’abstención porque camiento no que vien darréu: Los que tampoco nun creemos nel sistema pero sí presentamos candidatures con fuerte conteníu ideoloxicu alternativu terminamos por ser de siempres los que más sofrimos el castigu de l’abstención.
Los resultaos de les opciones polítiques que nos presentamos a les elecciones plantegando alternatives más ideoloxizaes p’Asturies tuvimos en xeneral un sofitu insignificante mientres que los grandes partios institucionales -PSOE, IU, FORO y PP- anque perdieran cuantitativamente en númberu de votos repártense igualmente’l mesmu númberu d’escaños del que se compón la Xunta Xeneral. Poro, camiento que nun se pué falar de castigu a la clase política cuando ellos, independientemente de l’abstención, tienen garantizada la so poltrona. Aporto asina a la primera conclusión: sí ye cierto que l’abstención revélanos qu’esiste una creciente disconformidá col sistema pero nun ye cierto que l’abstención supunxera un castigu a la clas política.
Pero nun sólo eso, el tipu d’electores de la drecha o de la falsa izquierda que representa’l PSOE ye un eleutoráu mui fiel y que participa siempres cásique a preba de fuéu (el casu del PSOE ye mui paradigmaticu d’esto ganando les elleiciones n’Asturies pesie a los casos de corrupción y la so responsabilidá direuta na crisis asturiana). Pela contra, el coleutivu de xente que nun participa, aunque ye difícil de dixebrar en qué gráu lo fai por apatía o d’una forma activa y consciente (equí ye de destacar tamién l’ésitu ente los minoritarios de la formación Escaños en Blanco), tien un componente en xeneral muncho más críticu col sistema y cola clas política, que fae d’esi coleutivu que s’abstien precisamente’l públicu potencial d’aquelles formaciones crítiques tamién col sistema pero que proponen otres alternatives polítiques xeneralmente n’Asturies dende la izquierda, el soberanismu y l’ecoloxismu (Andecha, Bloque-UNA, PCPE, EQUO…).
Dalguien dixo una vez: “Yo nun sé lo que quiero, pero sé lo que nun quiero”. Qu’haya un abanicu d’opciones polítiques con idegues, con propuestes alternatives, con militantes implicaos trabayando por defendeles, con cierta estructura por conceyos y que la gran mayoría de los disconformes prefieran abstenese o votar Escaños en Blanco (EB) posiblemente seya porque n’Asturies la gran crisis yá nun ye sólo la económica, social o política, sinon la crisis ideolóxica. Falten idegues y falten referencies creyibles.
Queda munchu qu’analizar sobre los resultaos del 25M, ésto ye solo un apunte pero selemente y con más tiempu dirán apaeciendo más opiniones y va xenerase más alderique. Dicir que faigo esta aportación con animu constructivu y pa contribuyir a un diálogu seriu y posáu sobre la tema de construyir una alternativa política n’Asturies qu’ilusione y nos puea sacar del pozu.
Ánimu a la xente que tien idegues, que trabayó, que defendió na campaña la so opción política y que votó pensando n’Asturies y nel pueblu asturianu o que s’abstuvo activamente pensando lo mesmo. ¡Contra’l facismu, l’imperialismu y el capitalismu la llucha ideolóxica continúa!
*Mariu Arbesú ye militante d'Andecha Astur y candidatu a la presidencia d'Asturies por Conceyu Abiertu nes elleiciones de Mayu de 2011 .
