Conceyu Abiertu por Mieres denunció la situación de la plantilla d'Enferbus

Abusos empresariales pa colos trabayadores.

Conceyu Abiertu por Mieres vien d'asoleyar un comunicáu de sofitu pa cola plantilla d'Enferbus, "empresa concesionaria de les rutes d’autobús qu’enllacen Mieres, L.lena y Uviéu cunta anguaño con impagos nos salarios de Febreru, Marzu y una paga estraordinaria, asina como otros atrasos, hores estres y festivos trabayaos que s’averen a los 100.000 euros de deuda".

Según despliquen, "La situación nun ye nueva nesta compañía, que nel añu 2009 obligó a los y les trabayadores a entamar una fuelga que duró diez meses col enfotu d’ameyorar les sos condiciones llaborales, polo que dende Conceyu Abiertu por Mieres queremos solidarizanos cola plantilla d’ésta empresa na so llucha por que se cumplan les condiciones llaborales pautaes, les que-yos correspuenden llexítimamente".

Amás, dende CA por Mieres denuncien "la pasividá de les instituciones públiques y organismos como’l Consorciu de Tresportes d’Asturies, que nun actúen énte los abusos empresariales de los dueños d’Enferbus calteniendo les llinies esplotaes pola empresa y, polo tanto, los ingresos, que queden nes manes del empresariu, y nun aporten a los y les trabayadores" .

Nel so comunicáu tamién se pon enfotu "en que la problemática d’Enferbus nun ye única nel nuesu conceyu, y ye que pesie al amenorgáu texíu económicu del nuesu conceyu, con cada vegada menos actividá y un mayor númberu de paraos y paraes, hai numberoses empreses, grandes y pequeñes, que nun cumplen lo pautao colos trabayadores", polo que treslladen la "solidaridá pa toos ellos y elles, asina como l’esmolecimientu d’ésti movimientu ciudadanu pa que les instituciones públiques, tanto l’Ayuntamientu de Mieres, como les Conseyeríes pertinentes, pongan en marcha les midíes necesaries pa protexer a la clas trabayadora mierense de los abusos empresariales".

Fonte: Infoasturies.net

Deteníes tres persones por facer un graffiti nel "Toru d'Osborne" de Llanes

Simboloxía española FUERA DEL PAÍS!!!

Prindaos pola Guardia Civil española.

Ayeri una patrulla conxunta de la Guardia Civil y la Policía Llocal de Llanes sosprendió alrodiu de la 1:30 de la madrugada a tres persones faciendo una pintada nel controvertíu "Toru d'Osborne" asitiáu nel conceyu llaniscu, y declaráu "Bien d'Interés Cultural" -BIC- énte un más qu'evidente refugu popular a un símbolu publicitariu d'una compañía de bebides, asina como al maltratu animal de la tauromaquia col que ta rellacionáu.

Asina, les fuercies policiales güeyaron lluces averaes al toru, prindando a un vecín llaniscu de 63 años, a un ciudadanu palentín residente en Gasteiz, de 44 años, y a una muyer vecina de Zamudio (Bizkaia) de 44 años d'edá, que foron identificaos y denunciaos por "daños escontra un BIC".

Fonte: Infoasturies

Sofita les radios llibres.

Contra los censores demócrates de sofa y puru ¡movilízate! ¡Sofita les radios llibres el sábadu 21 n'Uviéu!

SuperPública n'aición na toma posesión de Gotor.

UNIVERSIDÁ: ¡PÚBLICA, LLAICA, ASTURIANA Y DE CALIDÁ!

Darréu participó nel Aberri Eguna entamáu pola rede Independentistak

La organización de mocedá independentista Darréu tuvo presente al traviés d’una delegación de militantes nos actos organizaos pola rede Independentistak con motivu del Aberri Eguna –Día de la Patria Vasca- n’Euskal Herría, énte un ambiente vindicativu y de calter popular qu’enllenó les cais d'Iruñea.

Asina, la mocedá independentista asturiana tuvo presente nos diversos actos organizaos, siendo’l principal la manifestación a favor de la independencia d’Euskal Herría que cuntó col sofitu de les principales fuercies polítiques del movimientu independentista vascu.

Fonte: www.darreu.org

Documental: El Polvorín Asturiano.

Documental que trata la llucha obrera demientres el desmantelamientu de Naval Xixón, los despidos masivos de Duro Felguera, la crisis social de los primeros años 90... Anguañu la situación ta pior, y anque pasu ente pasu la llucha va re-organizándose y la xente esconsona queda entá muncho camín pa ver estes escenes de compromisu col futuru del país y del pueblu. La llucha d'unes persones que son un exemplu a siguir pa los/es asturianos/es que vienen, encamentamos la so visión completa.

Güei apaecía la noticia de que la resistencia pacífico ( si, lo de Ghandi) ye considerada agresión a la autoridá y que convocar actos críticos y de rempuesta n'internet ye motivu de procesar a una persona como integración en banda criminal. Hai unos díes tamién, delitos de vandalismu yeren propuestos como equiparables a "terrorismu" pol Gobiernu l'Imperiu.

Énte esta escalada represiva y esta crisis social, económica, nacional, cultural ya ideolóxica nun queda otra qu'armase d'idees positives pal Pueblu Trabayador Asturianu y tolos pueblos y entamar a llantar resistencia consciente, organizada, revolucionaria y nacional a les imposiciones españoles. Les llibertaes del ciudadanu de les que tantu falaben estos demócrates de salón yá son hestoria. El Réxime Españolista-Capitalista xenocida del PPSOE y tola oligarquía yá quitaron la mázcara. Agora tocanos a nós.

YÁ LO DICÍAMOS HAI BIEN DE TIEMPU: ¡¡ESTÁU ESPAÑOL FACISTA Y REPRESOR!!

¡PUXA LA LLUCHA D'ASTURIES Y LOS TRABAYADORES!

¡LLUCHA POLA REPÚBLICA SOCIALISTA ASTURIANA!

¡TAMOS FARTXS D'AGUANTAR ESCESOS, MISERIA, DESESPERANZA YA IMPOSICIONES!

El CS La Semiente sigue en flor en primavera

La programación d'esta selmana cunta cola continuación de la "Semana Atea" y una charra sobre la Estratexa Universidá 2015

La Selmana Atea organizada polos coleutivos anarquistes Grisú y Orbayu y que cunta cola esposición “Viñetes atees: l'ateísmo nel arte gráficu”, cellebra esti miércoles 11 cola proyección del documental “Rocio”, de Fernando Ruiz Vergara, a partir de las 20 hores. El xueves día 12 tamién a les ocho la tarde, hai organizada una charra sobnre la “Estratexa Universidá 2015” con estudiantes de les Asamblees de la Universidá d'Uvieu, onde van dar la so visión sobre la continuación del Plan Boloña na Xunión Europea, así como de la organización estudiantil na Universidá y las movilizaciones que vienen, tanto nel estau español como n'Asturies, cola recien estrenada campaña del #yomemuevo / #yomuevome.

Fonte: Infoasturies.net

Asesináu un mozu bilbaino de 28 años pola Policia Autónoma Vasca

Iñigo Cabacas Leciranzu, de 28 años d'edá, cellebraba la victoria'l so equipu'l pasáu xueves en Bilbo cuando la Ertzaintza cargó violentamente contra la montonera de xente, aficionaos del Athletic Club, que taben de folixa por motivos fubolísticos. La carga sigún testigos foi desproporcionada y nun procedía de denguna de les maneres, ye dicir, la policía buscó y alcontró ella sola los incidentes.
El mozu, que morrió hai unes hores, tuvo ingresáu dende la nueche del xueves hasta güei a causa del golpe recibiu na tiesta que según testigos y familiares ficieron-y un "furacu na tiesta", disparando la policía a menos de venti metros a la tiesta d'esta persona inda sabiendo'l peligru que tienen les boles de goma emplegaes poles fuercies de represión.
Asina'l mozu yá morrió, y anque se va abrir una investigación yá pue atalantase dende yá l'arbitrariedá que vamos poder ver nesa investigación. Caberamente, cuando más en dulda tan les estructures de poder y más refugu hai ente la xente a los grandes gobernantes y capitalistes la violencia policial ta medrando muncho. La brutalidá policial facista yá se llevó una vida inocente más, nesti casu n'Euskal Herria, pero agora cola nueva llexislación cualesquier persona pue ser catalogada como terrorista y los retayos económicos nun solo nun afeutaron a la policia, sinon qu'amás medró'l presupuestu de la represión y el mieu. Magar d'agora vamos entamar a ver noticies como esta si nun somos quien a decatanos que función tie la policia nun Estáu como esti nel que vivimos y nun sistema como'l que sofrimos.

Descanse en paz Iñigo. Solidaridá dende Asturies.
POLICIA ASESINA. DISOLUCIÓN CUERPOS DE REPRESIÓN FORIATOS.

La Coordinadora Ecoloxista d'Asturies esixe al Gobiernu qu’acote al pastoréu los montes quemaos

El mes de marzu tan negativu que vivió Asturies no que respeuta a los incendios forestales lleva a la Coordinadora Ecoloxista a esixir al Gobiernu’l cumplimientu de la normativa. Ésta obliga a acotar pal pastoréu los montes quemaos.

Hasta 331 incendios sufrió’l país namái na selmana última del mes, siendo la mayor parte d’ellos provocaos por ganaderos pa xenerar pastos. Según datos recoyíos poles Brigaes d’Investigación d’Incendios Forestales del Principaáu d’Asturias (BRIPAS), dependiente de Bomberos d’Asturies, y los informes anuales de la memoria de la Fiscalía de Mediu Ambiente, el 83 por cientu de los focos tienen el so orixe nesta práutica, lo que lleva a la Coordinadora Ecoloxista d’Asturies a esixir al Gobiernu que faiga cumplir la normativa, en concreto l’artículu 66.2 de la Llei de Montes y Ordenación Forestal d’Asturies, que diz que “la conseyería competente en materia forestal acotará al pastoréu los montes incendiaos”.

“Lo único que pidimos ye que se desendolque’l marcu normativu contempláu en dicha llei y se veden tolos montes incendiaos por un periodo mínimu de 5 años, porque la política actual de vedaos que se ta faciendo nun tiene sentíu nengún; namái ye de cara a la galería”, apunten los ecoloxistes, qu’afirmen qu’apenes s’acota un 10 por cientu de lo quemao y que, al añu siguiente, llevántase la veda. “Ye absurdo dafechu, yá que durante’l primer añu naide va aprovechar los pastos”, yá que tovía nun salieren dende l’incendiu.

Por último, la Coordinadora recuerda qu’Asturies, tres Galicia, ye’l territoriu del Estáu que sufre más incendios en rellación a la so superficie, con unos 2.000 focos añales qu’acaben con una media de 10.000 hectárees. L’asociación ecoloxista lleva dellos años defendiendo una serie de midíes p’acabar con esta situación, con trés llinies d’actuación nidies: persuasión y información, midíes alternatives pa la xeneración de pastos y, una vegada asentada estes dos, midíes coercitives. D’esta forma, pretende involucrar a vecinos, ganaderos y Alministración na llucha contra’l fueu.

Fonte: Asturies.com

Les comarques del Nalón y el Caudal rexistren 15.819 paraos y paraes

Cifra hestórica de desemplegu.

Los datos del desemplegu n'Asturies nel mes de Marzu dexaron un nuevu espoxigue del paru nes comarques mineres, onde'l paru medró penrriba de la media nacional -0,45% nes cuenques, 0,4% n'Asturies- hasta asitiase nes 15.819 persones, cifra hestórica pesie a la importante cayida poblacional nes comarques del Nalón y el Caudal nes caberes décades -25.000 habitantes menos-.

Poro, les cuenques mineres rexistraron en Marzu 72 paraos y paraes más, lo que dexa 1.969 demandantes d'emplegu más anguaño qu'ún añu atrás. La cifra más alta hasta'l momentu yera de la época de la reconversión industrial, cuando nel añu 1994 se rexistraron 15.167 paraos y paraes.

Ésta situación ta provocando'l movimientu de los paraos y les paraes en llucha pol emplegu, mediante aiciones como la recuperación de la hestórica asociación Adepavan.

Procesu soberanista n'Africa

El MNLl Azawad declaró la independencia del norte de Mali

Dixebra protagonizada por un grupu Tuareg.


El Movimientu Nacional de Lliberación del Azawad vien de declarar la independencia d'un territoriu constituyíu pol norte de Mali, un tarrén desérticu de 850 mil kilómetros nel qu'ésti grupu "rebelde" d'orixe tuareg fizo pública la so dixebra de la zona sur d'esi estáu africanu, col refugu de Francia, la Xunión Africana y la Xunión Europea a l'aición independentista.

Mali vien de sufrir un güelpe d'estáu militar qu'anguaño domina'l territoriu non independizáu, ye dicir, la zona sur, que sirvió como desencadenante definitivu pa que'l MNLlA declarare la independencia d'una zona con grandes deficiencies en cuantes a abastecimientu d'agua y lletricidá.

Fonte: Infoasturies.net

Biblioteca dixital de Frayando Cadenes

Nesta biblioteca vas poder atopar dalgunos testos marxistes, anti-imperialistes, antifacistes, nacionalistes o simplemente asturianos non españolistes. El finxu d'esta entrada, a la que vas poder acceder continamente al travíes d'una imaxe-enllaz a la mandrecha d'esti blogue ye espardir lliteratura crítica, principalmente de cálter revolucionario. L'envís de tou esto ye que les persones del soberanismu asturianu y toles persones con un mínimu de concencia crítica puean acceder a dalgunos testos clásicos en formatu dixital y en llingua asturiana. La torna de lliteratura crítica y revolucionaria ye una forma más de normalizar y dignificar el nuesu idioma nacional y camentamos que ye una forma de contribuyir a la pervivencia de la propia llingua dende les nueses posiciones polítiques ya ideolóxiques.

Como podrás ver, nesta biblioteca nun hai muncho entá, pero pasu ente pasu vamos facer por dir enanchandola con dellos autores y/o publicaciones que consideremos relevantes. L'oxetivu ye facer dientru del Blogue Frayando Cadenes un espaciu que sirva de biblioteca patriota, n'asturianu y de perfil revolucionario. S'asoleyaran fragmentos, conferencies, artículos, investigaciones o llibros d'autores estremáos, pero tamién pue ser que s'espublicen testos propios d'organizaciones si s'atalanta necesariu o interesante. En casu d'asoleyar dalgo nesta biblioteca en llingua castiellana s'alvertirá na espublización. Si quies aportar tú tamién nun duldes n'unvianos la to dixitalización y/o torna al corréu frayandocadenes@gmail.com Esti blogue espubliza material d'otres fontes, señalando l'orixe del documentu nesi casu y citando la fonte.

Academia de la Llingua Asturiana

Institución que se creó en 1980 y ye l'espaciu más institucionalizáu que tien l'idioma'l país. Trabaya n'investigación, llabor editorial, educativa, organización d'eventos, pedagoxía, campu normalizador o nel campu los drechos civiles, ente otres xeres.

Informe sobre la represión y non reconocencia de los drechos llingüísticos n'Asturies.

Vladimir Ilich Ulianov "Lenin"

Fundaor, importante teóricu y cabezaleru del Partíu Bolchevique. Dirixió la Revolución Socialista Rusa de 1917 y aportó grandes obres y construcciones teóriques al socialismu científicu entamáu por Marx y Engels.

Tres fontes y tres partes integrantes del marxismu

                                                                    

El nuesu programa (Torna y dixitalización del blogue "Andecha Obrera")

Les xeres del proletariáu na presente Revolución (Torna y dixitalización blogue "Andecha Obrera")

Karl Marx

Co-fundaor de la práutica y filosofía del socialismu científicu. Afitó los pegoyos del marxismu y fundó la Lliga Comunista y la I Internacional.

La nacionalización de la tierra

James Connolly

Cabezaleru nacionalista y revolucionario irlandés. Destacó por amestar les idees soberanistes y patriótiques de la Irlanda a la gueta la independencia coles idees y la práxis marxista. Bona parte del nacionalismu políticu irlandés parte d'ellí.

Socialismu y Nacionalismu

¿Antipatrióticu?

Fidel Castro Ruz

Dirixente de la Revolución Cubana. Ye dende hai décades un de los mayores ideólogos y referentes del movimientu revolucionario internacional, sobre manera n'America Llatina. El so gran valir destaca na defensa d'un patriotismu cubanu de calter socialista. Un de les grandes personalidaes del sieglu XX y parte'l XXI y gran referente a la hora d'espeyar les contradicciones del imperialismu mundial.

Los superrevolucionarios

Conceyu Bable

Conceyu Bable foi una asociación política y cultural asturiana, mui cercana a postures nidiamente nacionaliegues y qu'axuntó a munches persones esmolecíes pola cultura del país, la llingua, el bientar xeneral d'Asturies y la soberanía de la nación ente 1974 y la década de los 80. Primer organización nacionaliega constituyía nesti país.

Avilés, el primer conceyu en colingar la bandera d'Asturies

Conceyu Nacionalista Astur

El Conceyu Nacionalista Asturianu (CNA) foi'l primer partíu políticu d'Asturies nacionaliegu dafechu y socialista revolucionario. Algamó más de 8.000 votos pal senáu en 1979 y tuvo actividá ente 1976 y 1981, cuando dellos militantes fueron represaliaos nuna gran operación de la policia española. Espublizó una revista propia baxo'l títulu Asturies Dixebrá.

Documentu "Autonomía" (1980)

CNA al Pueblu Trabayador de Mieres (Agostu de 1979)

Recuerdos d'ayeri y güei, entrevista a Gerardo Sánchez, vieyu militante del CNA fecha pol periódicu GÜEI en 2001.

Revista "Asturies Dixebrá", muerganu del CNA. Númb. 1. Mayu 1979.

Ho Chi Minh

Cabezaleru del Partíu Comunista de Vietnam y del movimientu pola lliberación nacional de la so patria. Derrotó a los imperialistes franceses y afitó bases guerrilleres de gran caláu. Morrió enantes de ver al so pueblu trunfar contra l'enemigu imperialista yanki.

Programa del Partíu Comunista d'Indochina

Carta al Presidente de los Estáos Xuníos

Aiciones que tienen de faese y que nun tienen de faese

Georgi Dimitrov

Cabezaleru comunista búlgaru. Foi presidente de la III Internacional y dirixió la llucha antifacista en Bulgaria, onde foi presidente. Aportó obres alredor de la ñatura'l facismu, coles que comprender meyor el cáncanu facista y xenófobu y la so relación col gran capital.

El calter de clas del facismu

Antonio Gramsci 

Ñembru fundaor del Partíu Comunista Italianu. Arrestáu en 1926 y condergáu a venti años de prisión polos facistes aportó grandes obres y conceutos sobre la hexemonía de vanguardia marxista, les griesques de posiciones o'l papel de la inteleutualidá.

La internacional Comunista

Exércitu Republicanu Irlandés

Canalización de la llucha armada del pueblu irlandés na so llucha de lliberación nacional escontra l'Imperiu Británicu. Exércitu popular nacionaliegu y tradicionalmente izquierdista, anque finó con munches dixebres d'estremaes ideoloxíes.

El llibru verde  (torna y dixitalización del Blogue "Acción y Política")

Movimientu Comunista d'Asturies

Partíu comunista fundáu en 1975 col so I Congresu, mui averáu ideolóxicamente al maoísmu y que furrulaba a nivel estatal. N'Asturies actuó baxo'l nome "Movimientu Comunista d'Asturies" en determinaes ocasiones foi abondo cercanu a la cuestión nacional. Foi pali que pali arrenegando de la llínia orixinal y depués la so bas social formó Lliberación, integrada anguañu n'Izquierda Xunida.

Asturies nagua pola llibertá (1977)

Gaspar Melchor de Xovellanos

Pernomáu ilustráu xixonés, figura clave de la ilustración n'Asturies y nel Estáu Español y represaliáu políticu, consecuencia de ser un adelantáu al so tiempu. Nunca renegó de la identidá del país, les sos instituciones y la so autonomía, anque la hestoria española tapez la so figura y españoliza a la mésma d'una forma esaxerada.

El Xovellanos Asturianista

Yasser Arafat



Cabezaleru de la Organización pa la Lliberación de Palestina (OLP), de l'agrupación armada Al Fatah, Presidente de l'Autoridá Palestina y Premiu Nobel de la Paz.

Mensaxe a Fidel Castro

Andecha Astur

Organización política fundada en 1990 de calter nacionalista y socialista revolucionaria qu'ainda güei prosigue'l so llabor. Desenrrolló un gran llabor na defensa de los drechos llingüísticos, l'axitación en clave nacional, la denuncia política de la represión o l'amestura de presupuestos marxistes de tipu socialista al nacionalismu asturianu. Anguañu prosigue la so actividá.

Intervención d'AA na charra-alderique "Asturies y la Constitución Española".

El procesu autonómicu n'Asturies: Erbies y propuestes pal so analís.

Partíu Comunista de los Trabayadores d'Asturies

El Partíu Comunista de los Trabayadores d'Asturies ye'l nome que recibe la federación qu'hai nel nuesu país del Partíu Comunista de los Trabayadores, partíu que surdió de la oposición d'izquierda (OPI) dientru'l PCE.

Puxando por Asturies (1977)

Noam Chomsky
Llingüísta, filósofu y activista estáuxunidense. Perconocíu en tol mundu pola so actividá teórica crítica escontra'l sistema capitalista vixente y escontra la política esterior de los EEXX. Autodenomáu políticamente como anarcosindicalista, si bien los sos xuicios y les sos aportaciones teóriques nun tienen un puntu de partida marxista ye bien ciertu que la so obra tien gran valir a la hora de desmontar el papel imperialista d'Estáos Xuníos nel mundu.

Diez estratexes de manipulación mediática

Documentu: Programa del Partíu Comunista d'Indochina (1930).

Esti blogue ufre a los sos llectores el Programa del Partíu Comunista d'Indochina (1930) en formatu PDF y tornáu a la llingua d'Asturies. Nesti curtiu pero interesante ya hestóricu documentu'l partíu d'Ho Chi Minh espresa'l so programa a curtiu-mediu plazu na fas de llucha d'emancipación nacional y social. Un programa que venció al imperialismu francés y yanki a bas de muncha llucha y sangre, siendo Vietnam un pueblu qu'humildó y dexó n'evidencia al imperialismu más agresivu y xabaz.

El documentu tien abondo valor hestóricu, y anque nun ye un gran material formativu espeya perbien como tien de ser un programa revolucionario y como dirixise al pueblu. Como podemos ver, el tio Ho y los sos collacios y collacies s'espresaben nun llinguaxe mui corriente, cola fin d'averase al pueblu y de nun elitizar los sos discursos. Lo ciertu ye qu'esi aspeutu quiciabes fuere definitivu pa la victoria del so partíu y del pueblu de Vietnam y l'algame de la so soberanía nacional y social. El camín qu'emprendió Vietnam na so llucha tien de ser exemplu pa toles naciones oprimíes del mundu, pues nun hai independencia nin soberanía nacional ensín independencia y soberanía económica.

El documentu pues descargalo nel enllaz d'enrriba o nel que vien darréu:

https://rapidshare.com/files/809506005/programa_PCICH_oh_chi_min_.pdf
https://rapidshare.com/files/809506005/programa_PCICH_oh_chi_min_.pdf
https://rapidshare.com/files/809506005/programa_PCICH_oh_chi_min_.pdf
https://rapidshare.com/files/809506005/programa_PCICH_oh_chi_min_.pdf

El capitalismu sigui colos sos asesinatos

Un ciudadanu griegu, fartu de recoyer comida de la basoria y pasar les penuries que ta imponiendo'l capital a les persones decidió quitase la vida con un tiru na tiesta. Los medios recoyeron la noticia porque nun hai más remediu y porque la situación en Grecia ye yá incaltenible pal capitalismu.

Hai un mes, en Xixón, pasó lo mesmu, con una persona que suicidose nun conocíu centru comercial de la villa asturiana. Los medios de comunicación asturianos pasaron de la noticia, yá que los psicólogos encamentaron nun dar bombu al casu. Esi home, taba a les puertes del deshauiciu y dexó un cartelu nel que dicía que foi imposible pa él pagar la hipoteca.

El sistema capitalista crea nes persones estes circunstancies y situaciones y los sos medios de manipulación espeyan la so verdá, parcialícenla y a vegaes, como ye'l casu, escuendenla y nun asoleyen un res al respeutu. Nesti casu nun interesaba espeyar les bondaes d'esta democracia y del llibre mercáu. El mieu entama a aportar a les estructures, les bases o los pegoyos del sistema capitalista español. Solo fai falta que la xente entame a comprender que la problemática de fondu ye qu'hai un conflictu ente clases sociales y que los más tan oprimios polos menos, los cuales tan emplegando "la crisis" como escusa perfecha pa robar tolos drechos y prestaciones sociales a los más, algamáes con muncha sangre y muncha llucha. Hai d'aparar les agresiones del capital y preparar l'ataque del pueblu, con trabayu, organización, concienciación y formación. Asturies sedrá la tumba'l capital.

El Gobiernu d´España mete un retayu a los presupuestos d´Asturies del 8,8%

Los Presupuestos Xenerales del Estáu pal 2012 acuten p’Asturies una inversión de 506,95 millones d’euros, un 8,8% menos que la que recibió l´añu pasáu.

Asturies nun ye´l País onde más se nota la tisoria del Gobiernu d´España a la hora de controlar el déficit públicu, ye´l segundu, per detrás de la comunidá autónoma de Castiella-La Mancha, onde menos cai la inversión, si nun se cuenten los dos únicos países que van recibir más fondos que l’añu pasáu: País Vascu y Galicia.

La infraestructura que va llevar una suma mayor del Estáu ye la Variante de Payares, onde va invertir anguaño 210,58 millones d’euros, 25,38 millones d’euros más que nel 2011. Otra de les más importantes ye la inversión na Autovía del Cantábricu, que pasa de los 94 millones que recibió l’añu pasáu a los 67 millones d’esti añu, repartíos ente los tramos Llanes-Pendueles, Pendueles-Unquera, Navia-Tapia, Outur-Vil.lapedre, Muros-Las Dueñas y l’enllaz de San Roque. Nos presupuestos d’esti añu aparecen partíes nueves en comparanza col añu anterior, como 40,4 millones destinaos a pagar espropiaciones, 34 millones d’un empréstamu por El Musel y 5,8 millones destinaos a l’Autopista del Mar. En materia de comunicaciones ye tamién significativa la medría na inversión nel Aeropuertu d’Asturies, que xube de 4,4 millones a 12,8.

Una partida rellacionada cola financiación territorial que sí sube en comparanza col añu 2011 ye la de les tresferencies a les Comunidaes Autónomes, que medra nun 9,7%, hasta algamar los 27.734 millones d’euros. Sicasí, los Presupuestos Xenerales del Estáu nun recueyen la cesión de tributos estremada por comunidaes, polo que nun ye posible saber en que midida varia esta cantidá en comparanza col añu 2011. Sí se conoz el montante destináu a Asturies con cargu al Fondu de Suficiencia, un mecanismu destináu a cubrir la diferencia ente la necesidá de financiación de cada autonomía y qu’anguaño va tar nos 299 millones d’euros, 10 millones menos que nel 2011. Nel otru mecanismu destináu a iguar los desequilibrios económicos ente comunidaes, los Fondos de Compensación Interterritorial, Asturies ve menguaos los ingresos nun 18%, hasta llegar a los 24.838 euros.

Amás, el ministru de Facienda y Alministraciones Públiques, Cristóbal Montoro, na rueda de prensa depués de la presentación de los presupuestos nel Congresu, mostróse inflexible tocante a los topes de déficit de les Comunidaes Autónomes. En concreto, sobre los pactos pa formar Gobiernu n’Asturies y Andalucía aseguró que los alcuerdos ente los partíos van tener que respetar los compromisos de déficit públicu y alvirtió que, si dalguna fuercia nun ta convencida d’ello, que nun se meta nel Gobiernu, nuna alusión velada a Izquierda Xunida, que yá mostrara la so oposición a los topes de déficit impuestos a les Comunidaes Autónomes, al considerar que respetalos diba obligar a recortar en servicios esenciales, como sanidá, educación y bienestar social.

Conceyu Abiertu por Samartín denuncia’l descontrol económicu de la Casa Conceyu

La Sindicatura de Cuentes d’Asturies espublizó un informe nel que se recueyen les conclusiones de la so fiscalización a cuatro conceyos, énte ellos el de Samartín del Rei Aurelio, depués de qu’en 2008 nun presentaren de mena afayaíza les sos cuentes.


Nel informe del organismu, ésti espeya que la Casa Conceyu de Samartín nun rinde cuentes correutamente, amosando numberosos desequilibrios presupuestarios que lleven a situaciones de déficit, asina como’l desendolcu de procedimientos de contratación d’obres y servicios que nun tan argumentaos enforma.

Poro, dende Conceyu Abiertu por samartín queremos denunciar éstes deficiencies qu’afeuten negativamente a la xestión del Ayuntamientu y, en consecuencia, a los servicios qu’ésti ufierta a los ciudadanos y ciudadanes, anguaño en recorte en munchos casos pola falta de presupuestu.

Asina, dende ésti coleutivu ciudadanu consideramos que nun ye de recibu la escuridá cola que se manexa’l gobiernu llocal del PSOE a la hora d’escoyer nos concursos a les empreses que desendolquen obres y servicios nel nuesu conceyu, al mesmu tiempu que desiximos al consistoriu, énte too, honestidá y seriedá na xestión económica y de los presupuestos, intentando qu’éstos, más alló de que seyan más o menos modestos, seyan realistes, y atiendan a una bona xestión de los recursos.

Sicasí, dende CA por Samartín creyemos que diches deficiencies correspuenden a un problema estructural del sistema representativu col que mos atopamos, y ye que la realidá amosa que los representantes de los ciudadanos y ciudadanes nel nuesu conceyu, como en tantos otros, basen les sos actuaciones esclusivamente nos sos intereses políticos y elleutorales, y non nel bientar del ciudadanu y na xestión afayaíza de los sos recursos, aspeutu que mos perxudica a tolos habitantes de Samartín del Rei Aurelio.

Conceyu Abiertu por SMRA

Trabayadora del Bar Business recibe sentencia favoratible

Primer sentencia del casu.

El conflictu del Chigre Business con delles trabayadores resultó favoratible pa los intereses de la trabayadora, que como bien despliquen dende la CSI "A la trabayadora despidida reconózse-y el derechu a cobrar les cantidaes debíes, amás de la categoría como camarera, les hores extras non cobraes, la nocturnidad y les cotizaciones. Coles mesmes, una segunda despidida llogró un alcuerdu bien satisfactoriu, evitando dir a xuiciu y encurtiando asina los plazos de cobru".

Asina, dende'l sindicatu de clas asturianu, presente en tol procesu, camienten que "La llucha d'estos tres trabayadores foi exemplar en tou momentu, recordemos que fueron xulgaes por insultos y vexames y tienen otra causa abierta acusaes de faer pintaes nos distintos negocios d'esti empresariu". Nun sector tan precariu y dificil como ye'l de la Hostelería, esto sirve pa demostrar que con llucha, solidaridá y sofitu mutuu tou ye posible, y organizaes ganense batalles" .

La plantilla d'Alcoa torna a cortar la carretera

En protesta pol ERE qu'entama na planta avilesina.

La plantilla de la factoría avilesina d'Alcoa cortó güei la carretera durante media hora en refugu al Espediente de Regulación d'Emplegu qu'escomenzó a aplicase güei, y nel que los y les trabayadores denuncien la desorganización que tan sufriendo n'aplicación del procesu regulador.

Dende Alcoa, los representantes sindicales reclamen una nueva Tarifa Llétrica Industrial que garantice la competitividá de la factoría, la consideración del seutor metalúrxicu como estratéxicu, y la execución d'inversiones que garanticen el futuru de la compañía énte l'amenaza de desllocalización.

Fonte: Infoasturies

La reconstrucción del nacionalismu n'Asturies

Na cabera Tertulia García-Rendueles foi analizada l'actual situación de desastre elleutoral comu consecuencia de trés factores qu'afecten fondamente al propiu movimientu nacionaliegu asturianu aniciáu nos años 1970 cuestionando inclusive la so mesma esistencia dientru d'un contestu xeneral de desideoloxización y crisis social:

I) La progresiva disolución de les posiciones nacionaliegues, soberanistes y tresformadores nel marcu d'un falsu posibilismu que, carauterizáu ambiguamente comu asturianista, autonomista y progresista, arrenuncia a toa perspectiva de confrontación col Estáu español ensin ser quien a xenerar unos mínimos avances nacionales en déngun ámbitu social.

II) La sustitución del trabayu socio-políticu dende la base, en collaboración colos movimientos populares, por unes pantasioses espeutatives elleutoralistes, lo que vien xenerando un oportunismu tácticista astrayíu de cualisquier triba de coherencia estratéxica.

III) L'enclín de tolos seutores organizaos del nacionalismu asturianu a convertise en vanguardies autoreferenciales que terminen convirtiéndose en locomotores ensin vagones.

Esti escenariu dende la perspeutiva de los tertulianos namás pue ser modificáu mediante la superación de los francimientos atropaos en tantos años, un relevu políticu y la progresiva articulación d'una estratexa societaria comu Movimientu de Lliberación Nacional atalantando asina que construyir la Nación Asturiana comu suxetu colectivu dende la heteroxeneidá social ye daqué más que costruyir organizaciones nacionaliegues nel ámbetu partidista.

Ello asina asumiendo que nun se pue pretender xenerar dengún marcu políticu de calter "ampliu” o de pretensión más o menos “unitaria” ensin un trabayu previu d'atracción de colleutivos y presones, considérase afayaizo a curtiu plazu l'articulación d'un Partíu políticu de cuadros que, ensin pretender ser l'espaciu definitivu, tega comu finalidá al mediu plazu'l desendolcu de dinámiques d'aición colleutiva dende la base al traviés de la dinamización d'organizaciones seutoriales nos distintos ámbetos sociales (sindical, cultural, ecolóxicu, etc.). Y namásdempués va poder venir la configuración al llargu plazu d'un Frente Ampliu de calter nacional-democráticu (onde puedan entrar dende grupos procedentes de la social-democracia asturianista fasta de la izquierda obrerista tradicional siempres y cuando asuman l'autodetermín non como un simple drechu democráticu sinón tamién comu una ferramienta estratéxica pa camudar l'estáu de les coses n’Asturies) coles mires de da-y una traducción política a l'acumuladura de fuercies sociales realizada nes organizaciones seutoriales.

www.n-ast.org

El paru medró otru mes más n'Asturies

Mete mieu la vixencia d'esta vieya semeya...

35 persones más en situación de desemplegu.

El Ministeriu d'Emplegu y Seguridá Social del gobiernu estatal vien d'espublizar los datos rellativos al desemplegu nel mes de marzu, con cifres de nueu negatives n'Asturies y nel conxuntu del estáu. Asina, el paru nel nuesu país medró en 35 persones, asitiándose en 99.388 paraos y paraes, que faen averase inda más haza les 100.000 persones en situación de desemplegu.

En cifres porcentuales, l'espoxigue ye del 0,04%, demientres que nes cifres interanuales, nos caberos 12 meses el paru medró en 11.648 persones, un 13,28% más. Los principales seutores destructores d'emplegu foron la industria (-116) y l'agricultura (-39). En cuantes al repartu por xéneros, 50.357 paraes son muyeres, y 49.031 homes.

Fonte: Infoasturies.net