DARRÉU llama a la movilización permanente en les cuenques y n'Asturies

Dende la organización de mocedá soberanista y revolucionaria Darréu queremos tresmitir la nuesa postura al rodiu de les convocatories que tamos teniendo en les cuenques y n'Asturies demientres estes selmanes y la creciente situación de conflictividá:

• Sofitamos la fuelga xeneral en les cuenques convocada pa esti llunes 18 y atalantamos que ye necesaria yá una fuelga xeneral nel conxuntu'l país asturianu col calter indefiníu y combativu, yá que ye un erru parcializar la situación o sectorializala, tando en xuegu'l conxuntu del texíu industrial asturianu y les nueses espectatives de futuru como país.

• Darréu ye una organización de mocedá y dende la nuesa perspectiva creemos que ye la hora de que les moces y los mozos de les cuenques y d'Asturies dean un pasu alantre y emprendan una dinámica de movilización activa, combativa y dende espacios y frentes de llucha ayenos a los intereses del Estáu Español y el capital. La mocedá va ser la más perxudicada nesti desmantelamientu industrial y de drechos. El nuesu futuru pinta escuru y ye polo tanto importante nesti sen la llucha de la mocedá pa tornar la situación.

• Magar d'esti prósimu llunes, camentamos que nun se tien d'aparar nada, sinón siguir n'aumentu la escalada de movilización y llucha nes cais y nos espacios propios, yá que nel ámbetu institucional nun podemos esperar nada, tando'l mesmu remanáu y controláu pol neolliberalismu español. La posición chulesca y prepotente del PP o la hipocresía del PSOE nesti conflictu amuesen esti control total de la supuesta “democracia”. Son dambos partíos les cares d'una mesma moneda, la del capitalismu español y l'inmovilismu políticu y social.

• Asina, dende Darréu sofitamos toles movilizaciones de tolos trabayadores en griesca pol so puestu de trabayu y llamamos a la mocedá asturiano a espresar la so solidaridá activa. Otra vuelta, Darréu reclama la soberanía política y económica d'Asturies como nación pa poder construyir una braera democracia popular nesti país, garante d'un sistema socioeconómicu y políticu xustu y al serviciu del Pueblu Trabayador, non de les grandes élites del capital. Solo saliendo de les estructures del capital podremos construyir la alternativa al capitalismu que conderga'l futuru de los pueblos y los trabayadores.

¡PUXA LA LLUCHA DEL PUEBLU TRABAYADOR ASTURIANU!

¡MOCEDÁ LLUCHA POL TO FUTURU!

¡PUXA ASTURIES LLIBRE Y SOCIALISTA!

El FUSOA llama a la globalización de la llucha.

Globalizar la llucha

Dende va yá dos selmanes, los mineros, lo mesmo d'Asturies y Llión que d'otres partes del Estáu, tán llevando alantre una llucha pol so futuru. Anque esti conflictu se nos quier presentar como dalgo meramente sectorial, que incumbe namás a los mineros como tal, los ataques a tolos trabayadores en forma de retayos contínuos faen que esta llucha na minería agora mesmo seya global. Tá en xuegu que nos roben la Sanidá, la Educación y tolos derechos llaborales algamaos durante años de llucha y sacrificiu.

Igual que nel 62 cola Fuelgona, que supunxo l'iniciu de la llucha obrera contra la dictadura franquista dempués de 25 años de derrota, güei, frente a la dictadura cada vuelta más xabaz del Capital, los mineros vuelven a convertise nel símbolu de resistencia que-yos planta cara y nun se dexa vencer.

Los mineros, como los galos d'Asterix, pueden resistir nes sos aldees pero necesiten tol sofitu pa ganar esta batalla. Lo necesiten tanto como los movimientos sociales necesitábemos que dalguien en dalgún llugar y en dalgún momentu se volviere a plantar. Y ahí tán los mineros, resistiendo a la lóxica del Capital y de los sos xestores. Nun podemos dexalos solos.

Somos conscientes, por embargu, de que en cualesquier momentu les cúpules sindicales pueden cerrar el conflictu por cuatro migayes, pero la puerta tá abierta. La llucha laboral convirtióse dende'l primer momentu en política y social.

El día 18 de Xunu ye un día clave. Tá convocada una Fuelga Xeneral en toles cuenques mineres. Dende'l FUSOA (Fondu xUnitariu de Solidaridá Obrera d'Asturies) llanzamos el guante a quien s'anime y quiera garralu y permitímonos 'el luxu' de convocar una XORNADA DE LLUCHA en tol Estáu pa esi día. Facemos un llamáu a tolos colectivos, individualidaes, sindicatos de clase y movimientos sociales a estender la llucha de los mineros y que tolos frentes s'axunten n'unu sólu nel que toos y too tengan cabida.

El capitalismu tiénlo claro, incrementa l'espoliu, poro la nuesa respuesta ha ser xunitaria.

Toos y toes somos mineros, toos y toes a la llucha y en to los frentes .

Astucia y determinación
P'alantre compañeres y compañeros
Puxa Asturies
Puxa los mineros
COMUNICÁU DEL FUSOA

L'Adepavan anuncia actos de protesta durante'l 18-X

Fuelga xeneral nes cuenques mineres.
L'Asociación de Paraos y Paraes del Valle'l Nalon vien d'anunciar al traviés d'una nota prensa de la cellebración el prósimu llunes de la so avezada concentración delantre del Ayuntamientu de Llangréu baxo la denomación de "Los llunes al sol", que tendrá llugar de magar les 13:00 en sofitu a la convocatoria de fuelga xeneral nes cuenques d'esi mesmu día.

Sicasí, nun sedrá la única aición, y ye que tamién anuncien una marcha solidaria tres la concentración, na que caminarán hasta'l Pozu Candín d'HUNOSA p'amosar el sofitu a los mineros enzarraos, y al restu del coleutivu en llucha. Amás, s'amestarán a la manifestación que tendrá llugar pela tarde na Felguera, y animen a tol pueblu a participar.

FONTE: Infoasturies.net

Thyssen Norte retiró l'ERE pol que s'enzarraron 16 trabayadores

Triunfu del coleutivu obreru.
La direición de Thyssen Norte decidió la retirada del Espediente de Regulación d'Emplegu qu'afeutaba a la tola plantilla de la so factoría en Baíña (Mieres), y pol que 16 trabayadores s'atopaben enzarraos nes instalaciones industriales de mena indefinida, hasta la retirada del mesmu, tres atopar la compañía carga de trabayu que nun impidió la so negativa anicial a caltener l'ERE.

Pesie a ello, la intervención de la direutiva de la multinacional nel conflictu, gracies a la presión exercida polos trabayadores y la so xunidá d'aición nes protestes, fizo que la planta asitiada na cuenca'l Caudal decidiera, según informen fontes sindicales, retirar l'Espediente, pa la construcción de 46 pasiellos rodantes con destín árabe.

FONTE: Infoasturies.net

Xueves de combatividá minera y docente

Siguen les fuelgues y enzarros indefiníos de dambos coleutivos.

Los mineros y los profesores interinos d'Asturies realizaron esti xueves de nueu numberoses aiciones de protesta nel país, amás de caltener les sos respeutives fuelgues indefiníes, asina como l'enzarru de mineros nos pozos Santiagu y Candín, y de profesores nel IES Doctor Fleming, cumpliendo estos caberos 4 díes nesa situación, demientres que lo siete mineros acumulen yá práuticamente dos selmanes, ente'l sofitu diariu de cientos de persones que se concentren nesos enclaves.

Los mineros cortaron un día más carreteres y víes de ferrocarril, con aiciones n'A-66 (L.lena), AS-116 (Olloniegu), n', na Autovía Minera (Riañu), na N-630 a l'altura de Morcín, o l'A-64 n'El Berrón. Amás delles víes de ferrocarril foron cortaes, retirándose ensin incidente nunos casos, y obligando a aparar trenes n'otros. A too ello, un grupu de mineros Alemanes visitaron güei instalaciones mineres asturianes, pa conocer la realidá de la llucha minera asturiana y apurrir el so sofitu y solidaridá.

Pel so lláu, los profesores interinos caltienen l'enzarru, siguen alantre cola fuelga indefinía,y llevaron alantre aiciones na cai como'l corte del tráficu a l'altura de la Plaza d'España, n'Uviéu, a non munchos metros de los mineros acampaos. Amás, ta teniendo llugar la xornada de llucha a la que la Plataforma d'Interinos d'Asturies, asina como los sindicatos, llamaron a la movilización xeneral de tol personal educativu, con una manifestación n'Uviéu como caberu actu significativu.

FONTE: Infoasturies

Solidaridá dende Andalucía pa coles lluches d'Asturies

Jaleo!!! ante las luchas mineras y jornaleras: Todo el apoyo a la lucha
obrera y a Somonte!

Desde Jaleo!!! Queremos hacer público nuestro apoyo a la lucha de los
mineros asturianos, la de los trabajadores de trasportes y en general al
pueblo trabajador asturiano que en estos días vuelve a ser un referente de
lucha obrera en todo el Mundo. Nosotros y nosotras como internacionalistas
y socialistas sentimos su lucha como nuestra, Asturias como Andalucía son
dos naciones que no sólo están bajo el control del estado español si no que
vienen históricamente saqueadas por este y ahora también por la Unión
Europea. No puede haber futuro para nuestros pueblos si no es mediante la
lucha, como están enseñando los mineros, y esta tiene que ser por todos los
medios necesarios. Como decía Malcolm X, frente a la violencia capitalista
que arruina a los trabajadores, que desahucia a las familias obreras de sus
casas, que nos ofrece el suicidio o la emigración como solución tenemos que
responder con contundencia con las armas que siempre ha usado la clase
obrera, tenemos que responder con Huelgas, cortes de carreteras,
manifestaciones, petardos, tornillos, solidaridad, y unidad.

Desde Andalucía nuestro mejor apoyo a la lucha minera tiene que ser nuestra
propia lucha por el pueblo trabajador andaluz, porque una victoria obrera
en un país, es una victoria para el proletariado internacional. Nuestra
mejor respuesta a los planes capitalistas de rescates financieros y
recortes tiene que ser la intensificación de la lucha en todos los frentes.
Y el ejemplo más cercano de lucha obrera en Andalucía, lucha que además
está construyendo Poder Popular, es el proyecto de Somonte, que está dando
un ejemplo de dignidad y lucha en Andalucía. Esta lección de dignidad no
está saliendo gratuita a nuestros y nuestras camaradas de Somonte, que
están siendo requeridos para diversos juicios. Jaleo!!! se involucra desde
el 4 de marzo, día de la ocupación, en Somonte, con varios de nuestros
camaradas implicados directamente en esta revolución agraria. Tanto en el
apoyo a este hecho y su difusión, como en su construcción en el día a día
trabajando en la finca. Entre los reprimidos, queremos resaltar a un
camarada jiennense y otro palmeño, ambos de jaleo!!!, que están también
construyendo este futuro dentro de Somonte.

Ante esto, llamamos a la Juventud andaluza y al pueblo trabajador andaluz a
las próximas movilizaciones en solidaridad con los trabajadores de Somonte
organizadas por los comités de cada ciudad en todo el país andaluz:

*- SEVILLA: CONCENTRACIÓN frente al Parlamento de Andalucía el viernes día
15 de Junio a las 10.00h. Sevilla.*

*- GRANADA: CONCENTRACIÓN delegación de agricultura y pesca (Avd. Joaquín
aguaras n2). Viernes 15 de Junio a las 12:00.*

*- POSADAS (Comarca de Palma del Río): CONCENTRACIÓN en los Juzgados de
Posadas a las 10:00. **Los compañeros de **somonte* *tienen que declarar en
los juzgados de Posadas (Córdoba) hay 16 compañeros imputados por daños.*

*-** **CÓRDOBA: CONCENTRACIÓN delegación de agricultura y pesca (c/ Tomás
de Aquino). Viernes 15 de Junio a las 10:00.*

Llamamos apoyar las acciones y movilizaciones en solidaridad con la lucha
de los mineros y apoyamos la Huelga general del 18 de junio en Asturias.

*¡¡Porque solo el pueblo salva al pueblo¡¡*

*¡PUXA LES CUENQUES MINERES! ¡PUXA ASTURIES LLIBRE Y SOCIALISTA!*

*¡¡VIVA ANDALUCIA LIBRE Y SOCIALISTA¡¡*

Andecha Astur llama a la Fuelga Xeneral en toa Asturies

Pide a UGT Y CCOO qu’abandone el so sucursalismu reinal y que tean el valor de defender los porgüeyos d’Asturies y de los trabayaores asturianos per delantre los suyos propios, ampliando a toa Asturies la so convocatoria de fuelga.

Énte la convocatoria de Fuelga Xeneral pal prósimu 18 de xunu circuscritu a les cuenques mineres, Andecha Astur fai un llamamientu a la convocatoria de Fuelga Xeneral d’ámbetu nacional, atalantando que "ye imposible disociar l’actual conflictu na minería del restu conflictos sociollaborales que tan teniendo llugar n’Asturies nin de la ellevadísima tasa de paru, perda de prestaciones sociales y de la sangría que suponen les decenes de miles d’asturianos que se ven forciaos a emigrar".

Andecha Astur fai un llamamientu a UGT y CCOO pa "qu’abandonen d’una vegada’l so sucursalismu reinal, y que nel exerciciu de la soberanía que-yos correspuende comu representantes de bona parte de los trabayaores asturianos tean el valor de defender los porgüeyos colleutivos d’Asturies y de dichos trabayaores asturianos y que por una vuelta sepan anteponelos a los presonales y de sindicatu ampliando a nivel nacional la so convocatoria de Fuelga Xeneral".

Pa la organización d'izquierda nacionalista, llendar el conflictu a les cuenques mineres, comu fain UGT y CCOO, "seutorializa la llucha a niveles inaceutables, lo qu’en postrer estremu favorez l’aisllacionismu del conflictu mineru y debilita la llucha obrera nel nuesu país, al facer de ca conflictu un casu aislláu y ñegar la evidencia d’una confrontación d’intereses a nivel nacional por unos fechos que, si bien ye cierto que se producen dientru d’un contestu internacional, n’Asturies alquier formes propies, non en vanu vienen dándose dende munchu enantes de la cris d’anguañu y respuende a unes polítiques mui concretes del Estáu español p’Asturies empobinaes a l’esaniciu del nuesu texíu económicu, col oxetivu d’algamar la desindustrialización dafechu del nuesu país, la emigración de la nuesa mocedá y un futuru basáu en xubilaos y camareros".

Afayaivos

El blogue Frayando Cadenes, ye un blogue d'Asturies na llingua d'Asturies que parte d'unos presupuestos ideolóxicos y políticos bien llendaos, los de la izquierda soberanista revolucionaria. Poro, el soberanismu y el marxismu son les bases qu'afiten la dinámica y actividá d'esti blogue, un espaciu na rede que quier facer contra-poder a la fola neolliberal y españolista que n'Asturies y nos pueblos del Estáu Español tamos viviendo. Asina, el blogue Frayando Cadenes ye un espaciu na rede que tien dos grandes estayes de trabayu: la xera informativa y la xera formativa.

Nel blogue atopareis información venceyada a la realidá social, económica, cultural o política d'Asturies y del mundu. Si quereis un espaciu n'internet que diga les coses como son, ensín cayer nes grandes mentires y dende una perspectiva popular esti ye'l vuesu sitiu. Equí l'imperialismu nun remana la información como pasa na prensa oficial. El blogue Frayando Cadenes nun solo esparde noticies de medios dixitales asturianos, tamién ufre munches vegaes les sos cróniques propies y amás informa sobre la situación n'otros países, desendolcando nesti sen una bona riestra d'entrevistes internacionales.

Frayando Cadenes tamién ufre una Biblioteca Dixital, un proyeutu que quier ayudar a la formación de los militantes del soberanismu revolucionario asturianu. Un espaciu de documentación alternativa de toles obres y testos que nun atoparás nes grandes biblioteques. Camentamos que la xera formativa ye más que necesaria nel soberanismu asturianu y ye un de los grandes factores que despliquen el mal momentu que vive'l movimientu que puxa pola reconstrucción social y nacional d'Asturies. Poro, la formación política ye clave nesti blogue tamién, cola llingua del país como idioma vehicular d'esta formación, por supuestu, como forma d'aportar nós tamién a la dignificación y revitalización de la llingua asturiana.

Otros aspeutos, como la formación d'opinión o la compilación d'archivu, ente otros, son tamién perimportantes nel blogue Frayando Cadenes. En resume, lo que meyor defín esti blogue y el trabayu que se quier desendolcar pa con el ye contribuyir al espoxigue de la izquierda soberanista d'Asturies y al movimientu revolucionario mundial, dende'l nuesu país y nel idioma'l país. El nuesu correu de contautu ye frayandocadenes@gmail.com . Asina, dende esti espaciu queremos dar les gracies a tola xente que visita'l blogue y dicivos que tais nel vuesu llar.

Continúa la llucha minera n'Asturies

17ª xornada de llucha y fuelga.
Los trabayadores de la minería d'Asturies llevaron a cabu, otru día más, movilizaciones en toa Asturies, tando les sos principales aiciones, un día más, enfotaes nos cortes de carreteres n'Olloniegu, Morcín, Mieres, Cualloto, Tapia, Uxo, Figaréu, Sariegu, Sieru, y otres llocalidaes asturianes, nes que la llucha minera tuvo presente dende primer hora de la mañana. Güei nun hebo cortes na zona'l Güerna tres los duros enfrentamientos cola policía d'ayeri, anque convoys de camiones foron escoltaos pola Guardia Civil pa evitar cortes.

Tamién sigue alantre l'enzarru de siete mineros en Candín y Santiagu, asina como l'acampada n'Uviéu, y amás güei un grupu de mineros foron espulsaos del Congresu de los Diputaos por amosar camisetes vindicatives pa cola so causa. Sicasí, anunciaron que van siguir llevando les protestes al Congresu con mayor intensidá.

D'otru lláu, a nivel políticu, les igües nun paecen cerca de llegar, coles avezaes griesques énte PSOE y PP pa ver quién tien más culpa de la situación. Sicasí, nun paez haber voluntá real dende nengún frente políticu, demientres que la xornada de fuelga del 18-X ta cada día más cerca.

Darréu anuncia'l so sofitu a la fuelga xeneral nes cuenques mineres

La organización de mocedá d'izquierda soberanista Darréu quier amosar el so sofitu a la convocatoria de fuelga xeneral pal 18 de xunu que les xuntes comarcales de los sindicatos mayoritarios CCOO y UXT anunciaren hai unos díes. Asina pues, llamamos a la mocedá de les cuenques mineres a la movilización caltenía pero tamién crítica y revolucionaria. Ye perimportante'l papel de la mocedá na llucha organizada pol futuru d'estos conceyos del país, unes zones yá castigaes de por sí poles imposiciones y los desmanes del neolliberalismu y el sucursalismu españolista, y qu'anguañu tan viviendo episodios de rempuesta popular pola crítica situación de la minería. Poro, nesti sen, dende Darréu queremos espresar una riestra d'idees que consideramos importantes:

Caltenemos que ye perimportante la implicación moza pol fechu simplayu de que son les nueses xeneraciones les que más van sufrir el desmantelamientu de la minería y la industria en les cuenques mineres y nel conxutu del país.

• Per otru llau, apautámonos a esta convocatoria de fuelga xeneral pero nun podemos escaecer el papel determinante de los sindicatos organizadores na situación social que viven anguañu les cuenques y Asturies, sindicatos remanaos por unes cúpules dirixentes totalmente conformes col sistema capitalista y l'status quo vixente, que más alló d'eso, camentamos que solo miren polos sos intereses particulares ya individualistes.
• Respeutu al seutor del carbón, sofitamos les movilizaciones que los trabayadores tan desendolcando y desiximos futuru si o si pal carbón de nueso y atalantamos que la viabilidá d'esti seutor nun ye daqué posible, sinon que tamién necesariu pa les cuenques y p'Asturies. La nacionalización del carbón sedría una forma eficaz d'aparar la inestabilidá de la minería, garantizar el so futuru y reactivar el conxuntu de la economía d'estos valles.
• Per otru llau, queremos denunciar de forma pública la situación d'ocupación policial y militar que tamos viviendo, con numberoses unidaes de Policia Nacional española y Guardia Civil desplazaes al país, que vienen col únicu envís de reprimir les movilizaciones entamaes polos trabayadores del carbón y la clas obrera asturiana en pro del nuesu futuru.
• Dende Darréu creemos que'l siguiente pasu na llucha popular ye la convocatoria d'una fuelga xeneral n'Asturies, qu'afeute a tolos seutores y que seya indefinía, yá que la situación de crisis n'Asturies nun ye temporal nin seutorial, sinon más bien permante y global

¡18 de xunu: FUELGA XENERAL EN LES CUENQUES MINERES!

¡MOVILIZATE Y ACTÚA!

El númberu 1 de la revista "Asturies Dixebra" (1979), del CNA, na nuesa biblioteca.

Portada de la revista dixitalizada.

La Biblioteca Dixital del Blogue Frayando Cadenes ufre dende güei un nuevu documentu hestóricu del nacionalismu/soberanismu asturianu d'izquierda. Nesti casu ufrimos a tolos/es lleutores un exemplar escaneáu y dixitalizáu de la Revista "Asturies Dixebra", cartafueyu del CNA. L'exemplar ye'l númberu 1, que data de mayu de 1979. L'estáu d'esti exemplar ye un pocu delicáu pero la llectura y la perceición de les imaxes nun podríen ser meyores. L'archivu ta en formatu PDF como ye vezu na nuesa biblioteca.

El Conceyu Nacionalista Astur, nesti muérganu analiza lo que foi'l Primeru de Mayu de 1979, la situación de discriminación llingüística, la situación llaboral o cultural. Tamién nesti númberu 1 del cartafueyu "Asturies Dixebrá" podemos atopar analis de militantes del CNA en clave internacional, como la situación en Palestina. Entrevistes, reportaxes alredor del canciu asturianu o testos reivindicativos cientraos na situación del barriu carbayón Ciudá Naranco, xunto a otres coses, completen esti documentu.

Camentamos que la recuperanza y la publicación de los archivos hestóricos del soberanismu asturianu ye un trabayu clave nel movimientu de reconstrucción social y nacional, polo que dende esti modestu espaciu n'internet queremos aportar el nuesu granín de sable. Agradecer nesti sen el trabayu de los compañeros y compañeres de Andecha Astur en Noreña, los cuales cunten con un bayuroso archivu hestóricu alredor de la izquierda nacionaliega, onde puen atopase de forma física documentos como esta revista y otros documentos de gran valir.

Dos trabayadores finaos n'accidentes llaborales

Nueves víctimes de la siniestralidá llaboral.
La siniestralidá llaboral asturiana vio güei espoxigar les sos cifres poles muertes de dos trabayadores en sendos accidentes de trabayu de distintu calter. El primeru d'ellos, de 56 años d'edá, morrió nel so puestu de trabayu, na Fábrica d'Armes de Trubia, tres que-y cayera enrriba la carga de la parte trasera del so camión, siendo achapláu por carga de munición que tresportaba a otru llugar de les instalaciones.

La segunda víctima -tamién de 56 años- tuvo llugar nel Polígonu Sánchez Cimas II de Corvera, na empresa Asturiana Diseño Modular, tres que-y cayere enrriba un cable d'unos 150 kilos de pesu, falleciendo práuticamente al momentu pola gravedá del sucesu.

Sigui d'esta mena la sangría de muertes nel tayu rexistraes nel nuesu país dende va años, con una de les tases de siniestralidá llaboral más altes del estáu español. Pesie a ello, les midíes de seguridá nel trabayu son cada vegada menos ameyoraes polos recortes de presupuestu nesta estaya baxo'l pretestu de la crisis.

FONTE: Infoasturies

La clas trabayadora asturiana caltién la dinámica de llucha.

Nueva xornada de fuelga minera con múltiples aiciones obreres

Cortes de carreteres, ferrocarriles, y solidaridá internacional viniente de Gran Bretaña.
L'entamu de la selmana dexó una nueva xornada de fuelgas minera carauterizada pol corte de carreteres, principalmente na zona centro y sur del país, asina como de ferrocarriles, viéndose obligada Renfe a suspender temporalmente los viaxes programaos. Nel casu de les carreteres, l'aición tuvo centrada principalmente nos accesos a la meseta, con cortes en dambos llaos del cordal gracies a l'aición de los mineros lleoneses. Colos dos caberos deteníos n'El Bierzu, yá son un total d'ocho los represaliaos pola Guardia Civil.

D'otru lláu, los siete mineros enzarraos nos pozos Santiago y Candín caltienen la so forma de protesta, igual que los y les acampaes na Plaza d'España d'Uviéu. Tamiñen se realizaron manifestaciones nos principales Ayuntamientos de les zones mineres d'occidente.

Amás, un grupu de destacaos sindicalistes mineros británicos anunciaron la formación d'un "Comité de solidaridá" pa cola llucha minera nel estáu español, según anunciaron nuna carta espublizada nel periódicu The Guardian. Na citada carta los mineros británicos denunciaron l'apagón informativu esistente nel so territoriu respeuto al conflictu del carbón nel estáu español, y afitaron que "ye'l momentu de devolver el sofitu solidariu y financieru que mos apurrieron énte 1984 y 1985".

Seguimientu mayoritariu na primer xornada de fuelga de profesores interinos

Fuelga, enzarros ya intentu d'acampada.

El coleutivu de profesores interinos afrontaron güei la primer xornada de fuelga indefinida con un seguimientu que, a falta de cifres concretes, ye calificáu de mayoritariu por fontes sindicales que siguieron el procesu. La xornada non sólo tuvo compuesta pola fuelga, sinon que tamién s'entamó un enzarru indefiníu nel IES Doctor Fleming d'Uviéu, que según les intenciones de los participantes caltendrase demientres dure la fuelga.

D'otru lláu, un coleutivu de profesores interinos intentaron acampar na Plaza d'España xunto al grupu de mineros que se caltienen acampaos dende va aprosimadamente una selmana. Sicasí, les fuercies policiales impidieron l'aición de los profesores, al nun cuntar con permisu pa ello.

Mañana siguirá la fuelga nuna nueva xornada de llucha en defensa del puestu de trabayu de tolos y toles profesores interines d'Asturies, amenazaes polos recortes de fondos gubernamentales na educación pública.

Trabayadores de seguridá d'Alcoa acamparon en protesta énte la factoria avilesina.

Piden que se garantice'l pagu de los sos salarios.

Trabayadores de los servicios de seguridá d'Alcoa na so fábrica asitiada n'Avilés entamaron una acampada frente a la factoría pa desixir el cobru de les nómines que'l Grupu Sequor, concesionariu d'esi serviciu na factoría avilesina, adeuda a los y les trabayadores, según despliquen, debío al cambiu d'accionistes na empresa, entamando los nuevos una descapitalización y cobru de los servicios pa quedase col beneficiu íntegru.

Ye por ello que los trabayadores reclamen qu'Alcoa camude de compañía de seguridá, en beneficiu d'otra que cumpla coles sos obligaciones respeutu al pagu del salariu de los trabayadores. Ye por ello que los trabayadores desendolcarán una acampada indefinida hasta la igua del conflictu, pesie a lo que nun dexarán de cumplir les sos xornaes llaborales mediante la rotación n'acampada.

D'otru lláu, los trabayadores de la industria auxiliar d'Alcoa yá amosaron la so solidaridá y sofitu pa cola plantilla de seguridá acampada, y anuncien, nun entamu, el desendolcu de concentraciones periódiques nel llugar d'acampada.

FONTE: Infoasturies

El gobiernu del PSOE en Cuideiru anuncia un recorte del 10% de plantilla

Primer midida del nuevu alcalde.

Gabriel López, nuevu alcalde de Cuideiru tres la dimisión de Francisco González, acusáu de prevaricación, anunció que'l so gobiernu, integráu pol PSOE, desendolcará un recorte del 10% de la plantilla cola qu'anguaño cunta la Casa Conceyu, al considerar qu'esta ta "sobredimensionada", y ye necesario realizar un amenorgamientu nel emplegu públicu apurríu pol Ayuntamientu nel conceyu.

La midida, según desplique, ta amparada nel plan de pagu a proveedores diseñáu pol gobiernu estatal, nel qu'a cambiu de fondos colos que pagar los pagos retrasaos a proveedores, los distintos Ayuntamientos deberán desendolcar un "Plan d'axuste" col que, de mena común, se despiden emplegaos municipales.

FONTE: Infoasturies

L'estáu español, rescatáu pol FMI y la Xunión Europea

Hasta 100.000 millones d'euros de rescate.

El gobiernu español presidíu por Mariano Rajoy solicitó a los sos socios de la Xunión Europea el rescate del so sistema bancariu, tres dellos díes d'incertidume al respeuto, y numberoses presiones de les principales potencies de la Xunión Europea. Asina, la XE, pon a dimposición del estáu español un préstamu d'hasta 100.000 millones d'euros, a cambiu de restricciones, perda de soberania, ya intervención na so economía, a lo menos na estaya bancaria, anque too paez indicar que la influyencia de les instituciones de la XE llegará más a fondu.

Amás, el Fondu Monetariu Internacional tamién intervendrá nel procesu, según dicen, en llabores de supervisión de la economía estatal, qu'agora puede emplegar hasta 100.000 millones destinaos a aquelles entidaes bancaries que lo necesiten. Poro, l'estáu español ye'l cuartu interveníu pola XE y el FMI, tres Irlanda, Portugal y Greciam, coles sos repercusiones direutes nel nuesu pais.

FONTE: Infoasturies

Darréu entama la campaña "España ye crisis"

Nueva campaña de la organización de mocedá pa "denunciar la grave situación que sofre Asturies y la mocedá del país".

Darréu vien d'anunciar l'entamu d'una nueva campaña entitulada "España ye crisis", col enfotu de "denunciar les inxustes y agresives imposiciones capitalistes que ta sufriendo Asturies del Estáu Español, imposiciones les cuales nun faen otra cosa que fundir al Pueblu Asturianu aínda más y desaniciar lo pocu que queda n'Asturies d'actividá económica y llaboral". Poro, dende la organización independentista atalanten que "la mocedá va ser el coleutivu más desfavorecíu y feble gracies a les imposiciones que ta viviendo'l nuesu país de les grandes estructures del neolliberalismu más radical: L'Estáu Español, la Xunión Europea, Banco Central Europeu o'l Fondu Monetariu Internacional".

Con esos argumentos afiten "qu'España ye la nuesa crisis, yá que ye'l Reinu d'España, cola so cadarma estatal la instrumentalización perfecha de les agresiones a los drechos sociales y políticos de los y les trabayadores que quieren vivir y trabayar n'Asturies. Ye tamién España l'instrumentu que tan emplegando los grandes poseedores de capital pa facer pagar la so crisis capitalista al Pueblu Trabayador y de pasu desaniciar el pocu nivel de democracia qu'esistía. En definitiva, ye España quien impón a los pueblos primíos que tien secuestraos midíes alloñaes de les necesidaes de la gran mayoría social, midíes más bien averaes a los intereses de los grandes monopolistes y capitalistes, los mesmos que remanen l'ámbitu políticu, social, mediáticu y por supuestu económicu. Les menacies d'intervención del Estáu Español pa con Asturies nun son más qu'una escalada de les agresiones del gran capital, agresiones les cuales, dientru del Estáu Español, nun puen ser entendíes al marxe de la situación d'opresión nacional que vivimos dellos pueblos".

Por too ello, Darréu camienta "una solución a esta grave situación social y económica que traviesa Asturies: la soberanía política y económica del país. Ensín esa necesaria soberanía pa la nuesa patria nun vamos aparar enxamás les imposiciones de los grandes poderosos, los mesmos que quieren siguir calteniendo esti capitalismu en crisis y qu'axiten la bandera del españolismu más reaccionariu".

Pa finar, la mocedá soberanista llama "a la mocedá asturiano a participar con nós d'esta campaña pa construyir la nuesa soberanía como país, la cual permita al Pueblu Trabayador Asturianu tener autonomía y llibertá pa desendolcar un modelu social, económicu y políticu al serviciu de les necesidaes de los y les trabayadores".

FONTE: Infoasturies

Leición d'Engels.

Aplicable a les fuercies d'inseguridá que tan viniendo estos díes a reprimir y perseguir al Pueblu Trabayador Asturianau, nuna situación que ye cuasi d'ocupación militar. ¡Colen d'Asturies policies españoles! ¡Col tolete nun van amedrentar a naide!

Un programa de radio va informar sobre les noticies del movimientu de reivindicación llingüística

Delles emisores van incorporar a la so programación un espaciu que va informar sobre l’actualidá del movimientu de reivindicación llingüística. Iniciativa pol Asturianu promueve esti programa que tamién va poder sentise per Internet.

‘Iniciativa pol Asturianu nes ondes’ ye’l nome que va llevar esti programa mensual d’una hora de duración del que va ser responsable Samuel Gradín, periodista con una esperiencia amplia tres el so pasu per La Voz de Galicia y la RPA. Nél van dase a conocer toles noticies d’actualidá del movimientu de reivindicación llingüística y de les actividaes qu’entame la organización que trabaya na normalización del idioma. Tamién va haber sitiu pa entrevistes, música y una seición p’aprender asturianu.

Les emisores que van sumar esti espaciu a la so programación son, de momento, Radio Sele, Radio Ujo y AllerFM, anque se mantienen negociaciones con otres cadenes radiofóniques pa tratar de llegar a la mayor audiencia posible. Amás, tamién van colgase los programes n’Ivoox pa la so escucha o descarga. Tovía nun se conocen los horarios del primer ‘Iniciativa pol Asturianu nes ondes’, que va incluyir una entrevista a Inaciu Galán, presidente de la organización, que va falar de los seis primeros meses de vida d’Iniciativa pol Asturianu; y otra a Denis Soria, vocal de dominiu llingüísticu, que va tratar sobre les rellaciones entamaes con otros coleutivos de Lleón, Zamora y Miranda do Douro.

FONTE: Asturies.com

Nuevu documentu na biblioteca, nesti casu del MCA

La Biblioteca Dixital  del blogue Frayando Cadenes cunta con otru nuevu documentu, nesti casu, del Movimientu Comunista d'Asturies, concretamente del Comité de Xixón. El documentu ye d'abril de 1977 y ta entituláu "Asturies nagua pola llibertá". El documentu nun tien gran valor hestóricu nin políticu, pero sirve p'asitiar la posición d'esti partíu nel periodu de la "pre-autonomía".

Nesti sen, y al rodiu del MCA, una fuercia política estatalista pero que caltuvo ciertu grau de compromisu cola cuestión nacional, asperamos poder ufrivos nun futuru documentos importantes d'esti coleutivo dixitalizaos. Pel momentu, ehí vos dexamos en formatu PDF esi mensaxe del MCA a la sociedá asturiana y xixoniega respeutu a la autonomía d'Asturies.