-¿Por qué IAS decidió salir d’UNA y nun entrar nel procesu
Compromisu?
En gran midida nun tamos porque nun podíemos tar como IAS. Realmente,
Izquierda Asturiana formaba parte de la UNA, una federación de partíos que, nel
momentu qu’entra nel procesu de converxencia col Bloque y adopta la forma
xurídica de federeación, se convierte nuna federación de federaciones y eso
veíamos que nun yera factible. La UNA actuaba como un partíu políticu na
práutica y ésa yera una de les razones poles qu’había diferencies dientro d’IAS.
Cuando se montó la UNA, hai cuatro años, foi como una federación de partíos na
que les organizaciones integrantes tuvieren entidá propia. Na práutica eso nun
se cumplió y había un sector d’Izquierda Asturiana que nun tabemos mui
conformes. Nun se diera un debate internu que llevara a la conclusión de
qu’había que facelo asina.
Al mesmu tiempu, tamién había xente disconforme cola forma na que se llegó
a l’alcuerdu col Bloque por Asturies l’añu pasáu. Nós nun nos oponíamos a una
coalición col Bloque y con otros sectores pa que fora más amplia que Bloque-UNA,
pero tamién entendíamos que tenía que ser sobre unes bases polítiques
determinaes. Como depués de les eleiciones en cuenta d’haber una reflexón
autocrítica sobre qué ye lo que se fixo mal o qué ye lo que se dexó de facer,
diose una fuxida p’alantre –en gran midida por mieu a reconocer el fracasu– que
ye resultáu d’una política equivocada dende va tiempu. Nun ye que les
equivocaciones d’UNA empezaren cola coalición col Bloque, sinón que llevábamos
años equivocándonos, tanto Izquierda Asturiana como la UNA. Y considero que la
coalición col Bloque foi otra equivocación más.
Por último, hubo una situación política nueva n’Asturies y creo que nun se
reaccionó ante ella. El discursu que teníemos armáu, por exemplu, va dos años,
cuando fiximos el penúltimu congresu, yera bastante correutu, pero nun supimos
adecuanos al cambiu del ciclu políticu, la entrada de Cascos y depués la salida,
la entrada del PP a nivel estatal, la crisis… Vemos que frente a una situación
mui nueva nun hai análisis sobre lo qu’hai que facer y lo único que se fai ye
tirar p’alantre. Una prueba d’ello foi dir a les eleiciones últimes, nes que
tuvimos un resultáu bastante malu –ye verdá qu’había unes condiciones mui
revesoses– y al final, la última fuxida p’alantre ye escenificar la converxencia
Bloque-UNA disfrazándolu d’un proyeutu mui ampliu que nun ye tanto dende’l
momentu que pasaba pola práutica disolución de la IAS y, en too casu, cola
ausencia d’un debate internu, porque yo creo qu’un procesu unitariu de verdá nun
se monta en dos meses.
-Ye nesi momentu, en mayu, cuando IAS negocia una ruptura pautada
cola UNA.
Sí, una ruptura pautada foi la decisión que tomamos el 19 de mayu nuna
asamblea de militantes: la Izquierda Asturiana salía de la UNA, dexaba vía
llibre a la UNA pa que se tresformara nun partíu que participara nesi procesu na
midida qu’ellos queríen y nós recuperábamos plenamente la soberanía política y
empezábemos a actuar en solitariu col compromisu de nun facelo públicu hasta
depués del congresu de Compromisu.
-Nesi Alcuentru Nacional tamién dieron vía llibre a los militantes
que quixeran participar en Compromisu.
Lo que decidimos nesa asamblea foi qu’IAS como tal salía de la UNA y del
procesu Compromisu, y que los compañeros d’IAS que sí queríen participar
quedaben na UNA. Depués, a lo llargo del mes que pasó, la xente d’IAS que
quedábemos dibemos dándonos de baxa na UNA y la xente d’IAS que quería siguir na
UNA diba dándose de baxa n’Izquierda Asturiana.
-¿Hubo muncha xente qu’abandonó IAS pa entrar nel procesu
Compromisu?
Básicamente la xente que queda n’UNA ye la del conceyu de Xixón, yá que’l
restu práuticamente siguimos toos. Trátase d’una separación amistosa. Nun hai
enfrentamientos personales, sinón diferencies polítiques.
-¿Cuál va ser el papel agora d’Izquierda Asturiana?
No que tamos agora ye en recuperar xente que quedó pel camín, sobre manera
xente que nun veía ya’l procesu d’UNA de va cuatro años y qu’agora ta volviendo;
tamién xente nuevo que nunca tuviera. Al mesmu tiempu tamos nun procesu de
debate, porque lo que queremos ye centranos na actividá política con toles
consecuencies. El papel fundamental que creemos que tenemos que facer agora ye
un discursu sobre lo que ta pasando n’Asturies; sobre la crisis. Recuérdame
muncho, hai venti años, cuando empezamos a montar IAS. El problema que veíamos
yera que la izquierda asturiana taba totalmente ausente de les movilizaciones
qu’había, que fueron movilizaciones mui gordes: unos porque taben con un
proyeutu eleutoral, el PAS; y otros porque taben a otra cosa que tenía poco que
ver colo que taba pasando n’Asturies. Y por desgracia, creo que venti años
depués ta pasando dalgo mui paecío. Polo tanto, lo que queremos ye una
organización pa la movilización social, formar militantes nos movimientos…;
volver a los movimientos sociales, el sindical, el llingüísticu… En tolo que se
mueva perhí tien qu’haber militantes d’Izquierda Asturiana o de la izquierda
asturiana en xenérico, dando un discursu y aportando una visión asturiana dende
la izquierda.
-¿Y mirando a les eleiciones?
Non priorizamos agora mesmo construyir un proyeutu eleutoral. Llegará o
non, pero nun tamos mirando pal 2015. Ési foi ún de los grandes errores que
siempre se cometieron; siempre se pensaba en clave de les eleiciones
autonómiques siguientes que supuestamente diben ser les definitives o nes que
diba a sonar la flauta. Creo que ye mui difícil acumular fuercies no eleutoral
cuando no social l’asturianismu ta reculando; dalgo evidente. Y nesi contestu,
pensar que porque armes un proyeutu unitariu mui guapu va sonar la flauta,
creemos que ye dalgo inocente. Ye poner el carru per delante los gües.
Lo que tamos faciendo ye tar na manifestación pola minería y el futuru de
les cuenques, na manifestación pola educación… Tar onde tenemos xente pa tar;
non desembarcar. Si vamos a la ‘mani’ pola eduación ye que tenemos xente
n’educación y, nel casu de les cuenques, lo mesmo: ye porque tenemos xente nes
cuenques.
-¿Hai espaciu nel espectru políticu asturianu pa una opción
política nacionalista/asturianista?
Yo pienso qu’hai espaciu pa una izquierda que piense en clave asturiana. Un
discursu nacionalista tien que reformulase muncho. Yá decíamos venti años atrás
que n’Asturies había un mimetismu brutal qu’anguaño siguimos reproduciendo en
munches ocasiones, y nun nos damos cuenta de per ónde va la sociedá asturiana.
Nun hai más que ver toes estes banderes que vemos –por mor de la Eurocopa–. Ye’l
resultáu d’una sociedá qu’en munches ocasiones pue ver con simpatía munches de
les reivindicaciones de la izquierda asturianista, pero que toes xuntes venles
como dalgo raro.
Creo qu’hai que reformular l’asturianismu. El proyeutu asturianista que
s’empezó a formular nel 74 necesita una refundación y posiblemente cambiar unes
cuantes coses. En qué midida o non, eso ye lo que tenemos que discutir.
L’asturianismu políticu ye agora más débil que nunca teniendo más xente cercano
que nunca.
-¿Cómo ve al Gobiernu actual del país?
Veólu débil porque nun ye resultáu d’una mayoría amplia; la investidura
salió gracies al votu de dos organizaciones mui contraditories ente elles, como
Izquierda Unida y UPyD. Si PSOE y Izquierda Unida llegan a sumar los 23, sí que
sería un Gobiernu bastante fuerte porque Izquierda Unida taría nél tragando con
tolo que tuviera que tragar, pero nun se da esa situación y pue intentar agora
escenificar esa posición d’oposición d’izquierdes. Amás, el PSOE va tener
qu’apoyase nel PP p’aplicar los recortes, polo que Foro va quedar como la
fuercia qu’hexemonice la oposición, al menos la que nun ye d’izquierdes. Si
Cascos aguanta, yo creo que va desembarcar equí como el ‘Mesías’.
-¿Cuála ye la so opinión sobre’l rexonalismu de
Foro?
Foro bebe de la doctrina asturianista del 1918, con mui pocos cambios.
Coinciden hasta na consideración diglósica del asturianu como una cosa más que
ta ehí, decorativa. Ye un rexonalismu tamién mui nacionalista español, pero
qu’al mesmu tiempu intenta articular un discursu autóctonu… En too casu, creo
que ye una fuercia que quita presencia al PSOE y al PP, y eso ye bono. A Foro
nun se-y pue pidir más que lo que ye: un sector del PP que marchó y articuló un
discursu mui duru contra’l comederu montáu pol PSOE y el PP, lo que-y sirvió pa
ganar munchos votos y derrotar el bipartidismu n’Asturies. De fechu, dos
elementos fundamentales de l’axenda del asturianismu, como la llingua y
l’autogobiernu, Foro nin los toca.
