Asturies nación: dizlo tol mundu.

Boicó a los collaboraores cola tortura y l'españolismu

N'Ast fai un llamamientu públicu a boicotear a los establecimientos que tan sofitando la tortura de toros en Xixón, xabazada inhumana que namás se caltién en Xixón pol fianciamientu de la Casa Conceyu a esta espresión del españolismu.

N'Ast encamienta al Pueblu Asturianu a espresar la so refuga a la tortura animal y al españolismu boicoteando a tolos establecimientos onde se publicite esta tortura animal, y mui concretamente a los participantes nel "menú taurino" entamáu baxo'lnome de "Jornadas Gastronómicas Gijón de toros", cuyu llistáu s'apurre darréu:
- SIDRERÍA AGUADO (C/Aguado, 19).
- SIDRERÍA BOBES (C/ Reconquista, 9).
- SIDRERÍA CABRANES (Avda. Pablo Iglesias, 23).
- SIDRERÍA EL KIERCHE (C/ San Bernardo, 29).
- SIDRERÍA EL POZU L'ARENA (C/ Aquilino Hurlé, 30).
- SIDRERÍA LLABIEGU (Ribagorza, 27).
- SIDRERÍA EL LLAVIANU (C/ Donoso Cortes, 6).
- SIDRERÍA NACHO (C/ Aguado, 36).
- RTE. AS DE PICAS (Casino, C/ Fernández Vallín).
- RTE. BELLAVISTA (Av. José Garcia Bernardo, 256).
- RTE. CIUDADELA (C/ Capua, 7).
- RTE. EL CANDIL (C/ Numa Gilhou, 1).
- RTE. EL JAMONAR (C/ Begoña, 38).
- RTE. EL SAUCO (C/ Valencia, 20).
- RTE. LA ZAMORANA (C/ Hermanos Felgueroso, 40).
- RTE. TERRAZA DE VIESQUES (C/ Compositor Facundo de la Viña, 16).
- TRYP REY PELAYO (C/ Avda. Torcuato Fernández Miranda, 26).
- RTE. EL PASEO (C/ Paseo de Begoña, 8).
- RTE. CASA JUSTO (C/ Hermanos Felgueroso, 50).
- LA POSADA DE SOMIÓ (Nogales, 318).
- BAR SOMIÓ (Crtra Piles-Infanzón).
- CASA SUNCIA (Camín de Cabueñes, 971 ).
- SOMIÓ PARK. (Carretera Xixón-Altu l'Infanzón).
- LA NUEVA FUEYA (C/ Marques de Urquijo, 12 ).
- LLAGAR DE BEGOÑA (C/ San Bernardo, 81).
- VINATERÍA LUCENSE (C/ Aguado, 30).
- VINATERÍA EL BOCHINCHE. (C/ Manso,18).
- PARRILLA ANTONIO (C/ Roncal, 1).
- PUENTE ROMANO (C/ Marqués de Casa Valdés, 21).
- RTE. CASA VICTOR (Carmen, 11).
- HOTEL ABBA PLAYA GIJÓN (Paseo Doctor Fleming, 37).
- HOTEL LEÓN (Avda. de la Costa, 45).
- LA CAPILLA. HOTEL PALACIO LA LLOREA (Ctra. Villaviciosa).

MÁS:

- SIDRA EL GAITERO invita a un "tercio" con cada menú.
- Idea: "Fenicia Marketing" facebook.com/feniciamarketing

Collaboren:

- Ayuntamiento de Gijón/Xixón.
- El Comercio.
- Onda Cero Gijón.
- Circuitos Taurinos S.L.

Conceyu Abiertu por Mieres, Llangréu y Samartín del Rei Aurelio esixen l'absolución total de les persones imputaes nel conflictu de la minería.

Depués de dos meses de fuelga indefinía nel sector mineru n'Asturies y onde trabayadores y ciudadanía entamaron aiciones reivindicatives d'estremáu calter el papel del Gobiernu del Estáu Español y el Ministeriu d'Industrial foi intransixente, zarráu y autoritariu. Non solo pola ensín razón a la hora de da-y una salida al conflictu y negociar, sinón tamién pola represión política y policial qu'hebo na cai y que siguirá habiendo nel nuesu país. 

 

Alredor de cien ciudadanos y ciudadanes, los más trabayadores del carbón, fueron estes selmanes imputaos con estremaes causes xudiciales consecuencia de les movilizaciones sociales que se dieron pola continuidá de la minería y pol futuru de les cuenques mineres. La represión tuvo delles espresiones: detenciones, golpes, siguimientos, violencia simbólica, etc. Esta represión respondió a les intenciones d'esti nuevu golpe de muerte a los nuesos conceyos y el conxuntu de les cuenques mineres, nesti casu empobináu dende Madrid de la mano del PP y col silenciu compliz del PSOE n'Asturies.

Dende Conceyu Abiertu por Mieres, Llangréu y Samartín del Rei Aurelio queremos esixir l'absolución total de toles persones imputaes nestes selmanes de llucha minera y social yá qu'entendemos que l'escenariu d'anguañu ye otru. Atalantamos que la retirada de los causes xudiciales ye una reivindicación irrenunciable y sedría una midía democrática y que fadría xusticia col enfotu puestu por munches persones nes cuenques mineres nes movilizaciones. Amás queremos recordar que munches d'estes persones son vecinos y collacios de los nuesos conceyos y pueblos que tan pasando por una situación económica pergrave.
 

 

Marcha pola Educación Pública.

Contra'l racismu policial nel occidente'l país.

Los responsables podríen tener esta faz perfechamente

Nos últimos meses, la Policía Nacional de L.luarca llevó a cabu numberoses redaes racistes en localidaes como L.luarca, A Veiga, Trevías y Cadavéu. Inmigrantes de diverses nacionalidaes, que lleven tiempu viviendo na zona y desenvolviendo actividaes tan imprescindibles como'l cuidu de persones mayores, vieron cómo la policía nacional identificába-yos pela cai, a la salida de la compra, na parada l'autobús ya inclusive nes sos propies cases –valiéndose de los datos del padrón municipal–.
Un grupu de persones y colectivos sociales tubieron en L.luarca, pa denunciar estes redaes y a los sos responsables, empezando pol xefe de la policía nacional de L.luarca, Ignacio Ramón González-Cachón Delgado, y el Delegáu de Gobiernu en Asturies, Gabino de Lorenzo.

Esti ye'l testimonio que quixeron dexar patente y del que queremos faénos ecu:

Denunciamos estes redaes, de primeres, porque son illegales. Numberosos organismos de derechos humanos certificaron la esistencia d'estos controles d'identidá en tol territoriu español y confirmaron el so calter illegal. Tanto ye asina qu'el mesmu sindicatu policial viose obligáu a criticalos por esponer a los mesmos axentes a ser denunciaos por práctiques illegales. El pasáu 20 de mayu, una circular del Ministeriu del Interior reconocía la esistencia de diches actuaciones y decretaba la so prohibición, p'asina torgar “práctiques que traigan una restricción indebida de los derechos y llibertaes de los inmigrantes”.
Sicasí, como pudimos comprobar, estes redaes siguen llevándose a cabu. La máxima espresión d'estes irregularidaes ye la de llevar les identificaciones a les mesmes cases de les persones inmigrantes, aprovechándose del posible desconocimientu del so derechu a la inviolabilidá de la casa.

Denunciamos estes redaes de calter racista, amás, porque son inhumanes y porque son l'entamu d'un círculu viciosu de violación de los derechos humanos. Cuando la policía detien a una persona por escarecer de documentación, puede tenela inclusive hasta dos nueches nel calabozu. Cónstanos qu'hubo detenciones por esti motivu na comisaría de L.luarca, a pesar de que la mentada circular del Ministeriu del Interior señala la improcedencia de treslladar a dependencies policiales a inmigrantes que, entá escareciendo de permisu de residencia, identificárense.
L'apertura d'un procedimientu d'espulsión puede terminar nuna multa alministrativa, yá de por sí una carga económica enorme pa persones que tán tratando de sobrevivir en condiciones bien precaries. Pero la policía de L.luarca, en coordinación cola Delegación de Gobiernu, trata de llevar entá más allá los procesos, promoviendo que persones inmigrantes, dempués de sufrir el calabozu, sían llevaes a Madrid ya internaes nun Centru d'Internamientu d'Estranxeros (CIE). Numberosos informes rellaten qu'estos centros son peores que les cárceles, a pesar de ser oficialmente centros “non penitenciarios”. Nellos les condiciones de salobridá son detestables, hasta'l puntu de que se producieron albuertos de muyeres embarazaes que taben internaes; nos meses d'avientu y xineru pasaos produciéronse dos muertes en CIEs por cuenta de una asistencia sanitaria desaparente.
La policía y la Delegación de Gobiernu pretenden unviar a un d'estos centros a una muyer nixeriana, residente en L.luarca. Esta muyer, que sufrió un llargu periplu hasta llegar a Europa –fuxendo de la probeza–, sufre agora la violencia d'un sistema que la trata como a una criminal: ta obligada a presentase dos veces al mes na comisaría de L.luarca y nel xulgáu de Navia, y espónse a una inminente detención ya internamientu. Dende'l CIE puede ser incluyida n'un de los vergonzosos vuelos de repatriación qu'entama'l gobiernu español. Esisten evidencies –vídeo y testimonios– de los malos tratos y palices sufiertes por inmigrantes nel aeropuertu de Barajas nel momentu de la espulsión. Un compatriota d'esta vecina de L.luarca, Osamuyi Aikpitanyi, morrió afogáu n'un d'estos vuelos dempués de que la policía punxéra-y na boca cinta de pegar pa evitar les sos protestes.

¿Por qué estes persones fuxeron de Nixeria? Porque se ven sumíes na probeza, mientres del so país salen millones y millones de barriles de petróleu y grandes cantidaes de gas p'asegurar el nuesu enorme consumu enerxéticu. Na zona d'estración petrolera, la esperanza de vida nun llega a los cuarenta años. Nel postreru mediu sieglu, produciéronse arramaos de petróleu equivalente a un desastre del Prestige cada añu y mediu.

¿Por qué son hostigadas pola policía? Mientres la última década haise promovido un sofisticáu sistema represivu pa xenerar mieu ya inseguridá ente la población inmigrante, garantizando d'esa manera que se conviertan en fuerza de trabayu barata pa sectores imprescindibles de la economía española.

Vecines y vecinos de L.luarca, faemos un llamamientu a manifestar el nuesu refugu a la persecución y detención de persones inmigrantes; llamamos amás a la solidaridá con toles persones que sufrieron les redaes y, güei especialmente, cola vecina nixeriana que ta amenaciada d'internamientu y espulsión.

NON A LES REDÁES RACISTES
NON A LES ESPULSIONES
NENGUNA PERSONA YE ILLEGAL

http://www.asturies.com/noticies/el-gobiernu-dexa-ensin-cobertura-sanitaria-a-los-estranxeros-en-situaci%C3%B3n-irregular

El Conseyu de Gobiernu aprobó esti vienres el Real Decretu qu’esclúi de la cobertura sanitaria a los estranxeros en situación irregular. L’Executivu escúsase nun aforru supuestu de 1.000 millones pa tomar esta midida discriminatoria.

El Real Decretu regula la condición d'aseguráu y de beneficiariu a efectos de l'asistencia sanitaria pública nel Estáu, con cargu a fondos públicos, al traviés del Sistema Nacional de Salud, pol que s'esclúi de la cobertura sanitaria pública a tolos estranxeros que s'atopen n'España en situación illegal. El Ministeriu de Sanidá asegura garantizar "la universalidá de la sanidá pa tolos españoles y los estranxeros con residencia llegal" gracies a l'aprobación d'esti Real Decretu que regula la condición d'aseguráu y beneficiariu d'asistencia sanitaria con cargo al Sistema Nacional de Salud. Con esta midida, la ministra Ana Mato afirma que se dio "un pasu de xigante" pa ufiertar cobertura a la población. Amás, considera que se garantiza d'esta manera "un control mayor y tresparencia", porque clarifica la prestación de los servicios sanitariu y sociosanitariu.

Per otru llau, otru de los oxetivos que'l Ministeriu de Sanidá señala que se va a cumplir gracies a l'aprobación del Real Decretu ye asegurar la solvencia, viabilidá y sostenibilidá nel futuru de la sanidá pública frente a les dificultaes económiques. Añadió que va ponese fin "a la multiplicidá de normes que regularon la prestación", indiquen dende esti organismu. Sobre la tarxeta sanitaria, ésta "va ser interoperable en tolos servicios de salú del territoriu estatal, y xunto a la historia clínica dixital, va sirvir de ferramienta pa que los profesionales sanitarios puedan tener los datos d'un paciente anque se tresllade fuera de la so autonomía de residencia".

Fontes del Ministeriu aseguren que cola midida, l’Estáu "va afacese a la normativa europea y pon frenu al turismu sanitariu". Con ello, evítase "l'usu fraudulentu" polos ciudadanos estranxeros de los servicios de salú, manifiesten. Amás, esta cartera pretende xenerar un aforru de 1.000 millones d'euros cola aplicación de la reforma, lo que "va redundar na meyora de la dotación del Fondu de Cohesión Sanitaria del Sistema Nacional de Salud, que ye la ferramienta pa compensar a les comunidaes autónomes pola asistencia a estranxeros", indiquen. Pero los cambios nun acaben ehí, porque tres sentir los encamientos del Tribunal de Cuentes, va impidise que'l sistema de salú siga sufragando l'asistencia sanitaria de los europeos que yá la tienen cubierta. Otra manera, los españoles que s'atopen nesta coxuntura van sufrir la mesma situación nel estranxeru.

Sicasí, el Real Decretu sí contempla l'atención d'urxencia, por enfermedá o accidente; l'atención nel embaranzu, partu y postpartu; y l'asistencia sanitaria a menores de 18 años de ciudadanos en situación irregular. Gracies a esto, la cobertura ufiertada "va ser más amplia que la de la mayoría de los países europeos", sostienen dende la institución.

FONTE: Asturies.com

CSI énte'l conflictu de la minería.

Los y les trabayadores de la minería asturiana decidieron finar la fuelga y tornar al trabayu.

Cada trabayador y trabayadora sabe cuála foi la so actitú y la so aportación presonal demientres esti conflictu. Cada Trabayador y trabayadora sabe cuála foi l’actitú de toos y caún de los sindicatos. Cada trabayador y trabayadora sabe cuála foi la conducta y les direutrices de tolos dirixentes sindicales.

Nun ye l’intre reproches, pero sí de tener nidies delles realidaes:

1-El Gobiernu impuso, de momentu, les sos condiciones.
2-Los oxetivos que se plantegaben los sindicatos, al entamu la fuelga, nun s’algamaron de denguna les maneres.
3-El conflictu pesllóse en falsu y va tornar a recrudecese en pocos meses.

Na CSI nun damos esta llucha por finada y nin siquier pescanciamos comu un fracasu’l camín andáu fasta equí. El conflictu’l carbón deprendiónos que la xunión y la firmeza los y les trabayadores pueden engabitanos a algamar un futuru estremáu del que nos tienen preparáu.

Nesi sen, l’absolución dafechu de tolos imputaos en causes xudiciales remanecíes de les movilizaciones, ye una reivindicación inrenunciable.

Les movilizaciones tienen de continuar, porque la resinación enxamás traxo nada bono pa la clas obrera. Manifestaciones, paros temporales, xornaes de llucha, aiciones contundentes..., too ello puede servinos pa preparar, ensin munchu desgaste, les condiciones favoratibles pa un nuevu conflictu que, ensin dubia, va tornar a coyer protagonismu.

Pa ello, ye necesario que los dirixentes sindicales de CCOO y SOMA-UXT camuden d’actitú, defendiendo los drechos reales de los y les trabayadores y abandonando vieyes postures que namás van tornar traenos pieslles de pozos y perda de puestos de trabayu.

Les direiciones de CCOO y SOMA-UXT tienen la obligación de defender, perriba cualisquier sigla, los drechos ya intereses comunes del conxuntu los y les trabayadores y abandonar toa actitú ispirada nos intereses particulares de cualisquiera de los dos sindicatos o de los sos propios dirixentes.

De nun ser asina, queda nes manes de los y les trabayadores desbancar a estos dirixentes sindicales, afondar na propia autoorganización obrera y tornar a garrar, coles sos propies manes, unes riendes qu’enxamás debieren soltar.

Pero nes condiciones nes que tamos, dengún seutor, nin siquier el seutor mineru, va ser quien a iguar los sos problemes por sí solu. Los y les trabayadores de la mina necesiten urxentemente abrir el so conflictu a la participación y el sofitu d’otros seutores sociales y llaborales, porque esto yá tornó nuna llucha de tola sociedá asturiana.

Nun podemos siguir lluchando per separtáu en cada empresa o seutor, porque esto namás va empobinanos a la derrota. Ye necesario xunir a tolos y toles trabayadores d’empreses en conflictu ya incorporar a esa griesca al seutor más perxudicáu de toos: les presones en paru o con trabayos precarios.

Tenemos d’asumir y sofitar que cualisquier presona, de cualisquier seutor llaboral, minera o non, parada o non, tien d’amestase a cualisquier conflictu de cualisquier seutor. Trátase de sumar lluches y voluntaes.

La pallabra “rendición” nun ta nel nuesu dicionariu. La hestoria d’Asturies escribióse y va escribise con otres pallabres: firmeza, solidaridá y llucha obrera.

Andecha considera zarráu en falsu'l conflictu mineru

Una vegada más quedó n’evidencia que la estratexa de les direiciones sindicales de CCOO y SOMA-UGT lleven al esmantelamientu dafechu del seutor.
El determín de poner fin a la fuelga de la minería ensin tener algamáu nin el más mínimu de los oxetivos sindicales plantegaos y col trunfu de les condiciones impuestes pol Estáu español supon el zarru en falsu del conflictu mineru que, con toa probabilidá, tornará enfoscase nos prósimos meses.
Frente a quien da esta llucha por terminada y consideren fracasada la reivindicación, Andecha Astur quier destacar l’esfuerzu y l’exemplu de los mineros, y sopelexar el so convencimiento de que los únicos que fracasaron fueron les direiciones sindicales de CCOO y SOMA-UGT, que cola so enfermiza sumisión a los dictaos de Madrid seutorializaren el conflictu y porvocaren el so aisllamientu social y xeográfico, nuna dinámica suicida qu’agora tenemos que pagar toos.
Nesi senu Andecha Astur torna a faer un llamamientu a diches direiciones sindicales por que lleven alantre’l cambiu d’actitú que non solo la minería, sinón tola sociedá asturiana-yos demánda; que ruempan cola so dependencia de Madrid y dean en defender los drechos ya intereses de los trabayaores asturianos, abandonando dinámiques que namás tornarán trayemos zarros de pozos y perda de puestos de trabayu.

Ye nido que siguir defendiendo la seutorialidad del conflictu y negase a integralu dientru’l conxuntu de conflictos llaborales esistentes nel nuesu país, asumiendo la especificidá del marcu llaboral asturianu, non solo costitúi una torpeza que mos lleva de fracasu en fracasu, sinón una collaboración y complicidá coles polítiques d’esterminiu que ta aplicando l’Estáu español n’Asturies y que tán llevando a la sociedá asturiana a una situación de sufrimientu y precariedá inaceutables.

A lo último, Andecha Astur quier remembrar la necesidá de consiguir l’absolución de tolos imputaos en causes xudiciales derivaes de les movilizaciones, reivindicación inrenunciable que complica y agrava’l conflictu en sigo mesmu.

Conceyu Abiertu por Uviéu contra la supresión de les llinies 6 y 16 de TUA

L’Ayuntamientu d’Uviéu aprobó tiempu atrás el nuevu “Plan de movilidá” nel que se recoyíen les nueves rutes de los autobuses municipales d’Uviéu, xestionaos pola empresa TUA. Nesi plan, que ta xenerando descontentu en bastantes seutores vecinales al ser regresivu respeuto al serviciu prestáu por TUA, hai grandes afectaos como los vecinos y vecines de les zones rurales del Narancu, que según esi nuevu plan veríen suprimíes les dos llinies que presten el gruesu del serviciu a diches zones rurales, la llinia 6 y la 16.

Na so sostitución, la Casa Conceyu quier poner “taxis llanzadera” que tresporten a los vecinos y vecines hasta la parada de bus más cercana, col consiguiente costu económicu que s’amestaría al del billete, fechu pol que los afeutaos y afeutaes tan recurriendo dichu plan pa la so modificación y rectificación de cara al caltenimientu del serviciu de tresporte col qu’anguaño cunten.

Dende Conceyu Abiertu por Uviéu apoyamos l’aición ciudadana, porque consideramos inxusto qu’una vegada más seyan les zones rurales les grandes escaecíes nes polítiques de cualquier tipu que desenrrolla l’Ayuntamientu. El gobiernu llocal non sólo nun atiende les peticiones de zones como Limanes p’ampliar el serviciu municipal hasta elles, sinon qu’elimina’l yá esistente dexando vendíos dafechu a unos vecinos y vecines que tuvieron años y años lluchando pa consiguir eses llinies d’autobús.

D’otru lláu, refugamos dafechu l’argumentu de que son llinies con pocu usu o poco rentables. Tamos falando d’un serviciu públicu, de los básicos qu’ufierta un Ayuntamientu de les dimensiones del uvieín, y precisamente ye a eses zones más aisllaes y minoritaries onde nun se puede abandonar a la so suerte a les persones. Amás, nun entendemos pa qué nos caberos años l’asignación municipal del Ayuntamientu a TUA medró en más del 100%, si a la fin vamos a guianos por criterios de rentabilidá y de regresión n’aquelles estayes vinculaes a espacios minoritarios.

Otra vegada, como facemos casi siempre pol fechu de que son dos custiones primordiales na política que Conceyu Abiertu por Uviéu quier p’ameyorar la vida y el bientar nel nuesu conceyu, queremos enfotanos en dos puntos básicos:

1     1) L’Ayuntamientu nun fae nengún casu a los vecinos y vecines nes sos aportaciones y vindicaciones, fae lo que-y peta siguiendo criterios amiguistes y de beneficiu a les concesionaries privaes de los distintos servicios. Con participación y capacidá d’influencia vecinal podríemos crear un Plan de Movilidá equilibráu, afayaízu, y pa toos y toes.

2      2) Cuando un serviciu públicu básicu ye xestionáu por una empresa privada, surden deficiencies, inxusticies, y na más que voluntá d’algamar beneficios económicos y non sociales. Non más espoliu empresarial al patrimoniu de tolos vecinos y vecines.

Con too ello, tresmitimos el nuesu apoyu a los vecinos y vecines, encamentándolos a siguir lluchando pol que les minoríes poblacionales del nuesu conceyu algamen los servicios que merecen, que nun son nin más nin menos que la so equiparación colos del restu de ciudadanos y ciudadanes.

Fonte: www.conceyuabiertu.org

Conceyu Abiertu por Mieres apoya les prósimes fuelgues de los y les trabayadores de ThyssenKrupp Norte

Les persones qu'integramos Conceyu Abiertu por Mieres queremos amosar el nuesu sofitu públicu a la xusta llucha de les y los trabayadores de ThyssenKrupp de Mieres, llucha que va tomar forma en siete xornaes de fuelga n'agostu y en cuatru en setiembre, convocatories entamaes dende'l Comité d'empresa, onde tienen representatividá los sindicatos CSI, CCOO y UXT.

Les convocatories de fuelga na empresa vienen empobinaes pola unilateralidá de la direición de la empresa y la so ensín razón a la hora de relacionase col coleutivu trabayador y algamar alcuerdos con dichu coleutivu. Concretamente'l conflictu reside en que la direición de ThyssenKrupp nun quier algamar un alcuerdu consensuáu nel conveniu coleutivu colos representantes de la plantiya depués de meses d'intentos. Esta situación ta poniendo en pelligru 301 puestos de trabayu pola mor de la incapacidá de la direición de tolerar los mínimos pidimientos de meyora de les condiciones llaborales que piden los trabayadores.

Dende Conceyu Abiertu por Mieres apoyamos la dinámica reivindicativa d'estos/es trabayadores pol simple fechu de que ta espeyándose la posición zarrada al diálogu y la intercomunicación na empresa per parte la direición. Consideramos la posición de los y les dirixentes de ThyssenKrupp como inmovilista y autoritaria. Amás, depués d'algamar nel exerciciu 2010-2011 un beneficiu record de 4,7 millones d'euros la posición de la direición empresarial ye tovía menos comprensible.

Pa finar, queremos tresmitir fuercia y munchu enfotu a los y les trabayadores nes vinientes xornaes y llamar a la ciudadanía mierense y tamién del conxuntu de les cuenques a la solidaridá cola llucha d'estos. Tamién queremos recordar qu'hai unos meses la empresa plantegó un ERE nesta factoría que tuvo qu'echar atrás gracies a la llucha que desenrrolló'l coleutivu trabayador, lo qu'amosó que la llucha popular y obrera ye l'únicu camín p'aparar el desmantelamientu llaboral y social que vivimos anguañu en Mieres, les cuenques y el restu d'Asturies.

Estrayíu de la páxina web de conceyu abiertu.

Actu pola Educación Pública

Conceyu Abiertu por Uviéu pide cordura na xestión del sistema de llimpieza y les sos sanciones

Va unos díes la sociedá uvieína tuvo conocimientu de l’amenaza del Ayuntamientu a una vecina de la cai Xeneral Elorza con una multa que podría dir ente los 45.001 euros y los 1,7 millones d’euros. El “delitu”, según despliquen dende la Casa Conceyu, ye l’atropu por parte de téunicos de mediu ambiente d’una bolsa de basoria pasaes les nueve de la mañana, atopando nel so interior documentos identificativos de la citada vecina. Poro, dende la Conceyalía de Llimpieza, decidieron abrir un espediente sancionador, que cola aplicación de la Llei de Residuos puede desembocar nuna multa coles cifres enantes citaes.

Dende Conceyu Abiertu por Uviéu consideramos, en primer llugar, qu’una sanción de tal calter por una bolsa de basoria na cai a deshora ye absolutamente inxustificada, y más tres les afirmaciones de la ciudadana afitando qu’ella dexó la bolsa depositada nel cubu. Y lo cierto ye que los cubos de basoria tan espuestos a la manipulación de terceres persones, polo que creyemos qu’en nengún casu se debe aplicar una sanción de tales proporciones, que dende esta formación nun atalantamos dende otru sentíu que’l meramente recaudatoriu. Nun siendo d’otra manera, ye un auténticu sinsentíu una posible aición penatoria de tal calibre por esi fechu. Ta mal dexar la basoria nel primer sitiu que s’atope, pero llamamos a la cordura de les partes implicaes.

Per otru lláu, nel mesmu conceyu nel que se pretende aplicar una “multa exemplar” a una ciudadana por un fechu aislláu, vemos cómo s’acumulen vertederos improvisaos y en plenu crecimientu en zones como San Cloyo, ensin que nin FCC –la concesionaria de les llabores de llimpieza- nin l’Ayuntamientu faigan nada pesie a les continues quexes vecinales. Ehí debería poner la Conceyalía de Llimpieza los sos esfuerzos y consideraciones, nes quexes vecinales, y nes deficiencies que FCC ufre na so xestión.

Tamién vemos cómo la filosofía de llimpieza nel nuesu conceyu ta basada en que “si se mancha más, ponemos más medios pa llimpiar”, en llugar de buscar métodos de calter educativu o incluso un replantegamientu d’aquellos aspeutos que seyan poco eficaces o meyorables, ello xunío al inevitable rasgu mercantil que toma esta estaya dende’l mesmu momentu que ye privatizada.

En definitiva, pidimos menos amenaces mediátiques de sanciones desproporcionaes, y encamentamos a la Casa Conceyu a escuchar les denuncies y suxerencies de la ciudadanía p’algamar una ameyora del serviciu, que pa entamar debería ser desendolcáu y xestionáu pol propiu conceyu, y non por una concesionaria privada.

FONTE: www.conceyuabiertu.org

La represión continúa

Dos militantes de la CSI de la Cuenca’l Narcea, son víctimes de la represión, acusaos de participar en cortes de carretera demientres el conflictu de la minería.

A ún d’éllos impónse-y una sanción que puede dir de 300 a 30.000 euros.

El segundu tien de declarar el prósimu xueves, 2 d’agostu, a les 10:00 h., nos xulgaos de Tinéu, imputáu por dellos delitos derivaos de la so presunta participación nun corte carretera. Dase la circustancia de que yá ye la segunda vegada qu’esti trabayador ta imputáu polos mesmos motivos.

Pa la CSI resulta vergoñosu que la ¿Xusticia? S’ensañe colos y coles trabayadores que namás defenden la so forma de ganase la vida, demientres los braeros culpables d’esta cris continúen enriqueciéndose.

Andecha propón oficialmente retirar el financiamientu al Festival Aériu

Remembra a IU que ye corresponsable d'esta eshibición d'españolismu militarista y entrúgase si vieron la lluz, si carecen “Alzheimer” o a cencielles ye hipocresía.

Andecha Ástur presentó nel rexistru del Conceyu de Xixón una propuesta por que se retire'l financiamientu municipal a la exhibición d'españolismu militarista que supon el Festival Aériu”, recordando que la nuesa ciudá tien el desafortunáu privilexu de ser la primer ciudá europea bombardeada dende l'aire (1934, pol Exércitu de la República española) y de siguío pol Exércitu franquista español (1937), lo que sedríe motivu abondo pa evitar asemeyáu tipu d'actos.

Nel mesmu senu arguméntase qu'esta triba d'espectáculos non promueven precisamente una cultura de la paz y la solidaridá internacional, sinón qu'emponderen l'eshibicionismu de la fuercia militar, amarutando n'acrobacies y espectáculu’l gran poder destructivu de les armes que díi ente díi maten neños y presones inocentes. Por nun citar tamién, nel actual contestu económicu, la necesidá d'amenorgamientu de gastos públicos superfluos.

Per otra parte y énte les declaraciones del voceru del grupu municipal d'Izquierda Unida nel Conceyu de Xixón, Jorge Espina, pidiendo la retirada del financiamientu municipal al Festival Aériu, Andecha Ástur quier recorda-yos que tal exhibición d'españolismu militarista tien el so orixe baxo’l gobiernu de coalición PSOE-IU, y entrúgase si'l so cambiu d'opinión débese a que por fin se dieron cuenta de que, nes sos propies pallabres “los aviones que desfilen nun sirven precisamente pa partir carambelos ente los neños sinón pa participar en guerres onde s'asesina a presones”, si carez dalguna alteración de la memoria, o si a cencielles ye una de les avezaes amueses d'hipocresía a les que mos tien acostumaos esta organización.

Seya que non, Andecha Ástur propón-y a IX qu'en cuentes de faer declaraciones fatues a los medios de comunicación, facilite que llegue al Plenu la nuesa propuesta de retirada de financiamientu, o nel so defeutu que presenten una propia.

FONTE: www.andecha.org

Conceyu Abiertu por Samartín esixe la dimisión del alcalde del conceyu Enrique Fernández

L'alcalde del Conceyu de Samartín del Rei Aurelio, Enrique Fernández, del PSOE, cobró 182,57 euros en conceptu de dieta completa y media dieta de manutención de gastos pol simple fechu d'acudir a la manifestación que se cellebró en Madrid el pasáu 11 de xunetu en sofitu del futuru del carbón. L'escándalu salió a la lluz nun plenu municipal y paez ser qu'otros ediles del PSOE de la Cuenca del Nalón pudieron percibir tamién dineru por esti fechu.

Dende la formación de ciudadanos Conceyu Abiertu por SMRA queremos espresar la nuesa refuga y la nuesa indignación con esta situación. Atalantamos que l'actual alcalde de SMRA Enrique Fernández debería pidir perdón públicamente a los nuesos vecinos y dimitir darréu como forma de rectificar de forma honesta. Poro, pidimos públicamente la dimisión d'Enrique Fernández como alcalde del municipiu depués d'esti casu de corrupción y escándalu éticu. Amás too paez indicar qu'esti alcalde cobró'l so salariu'l 18 de xunetu, día nel qu'en les cuenques mineres teníemos convocada una fuelga xeneral, que por ciertu esti señor dixo sofitar.

Mentantu los trabayadores faen enzarros baxo tierra nos pozos, prenden barricaes, caminen hasta Madrid o s'arriesguen a vivir multes y represión, estos señoritos del PSOE dicen defender el carbón asturianu pero siempres y cuando enllenen el bolsiellu propiu. Esti fechu vergoñosu y tarrecible ye un claru espeyu de la postura del PSOE respectu al problema del carbón o cualesquier conflictu social, onde dicen tar dellau del pueblu y los trabayadores pero siempres tira-yos más la defensa del estáu de les coses, la represión a los movimientos sociales y la corrupción. Dende Conceyu Abiertu por SMRA caltenemos que la presencia d'esti señor en Madrid ye un simple xestu oportunista y partidista y queremos tresmitir al nuesu alcalde que les lluches populares apóyense día a día y col corazón, con altruismu y sinceridá.

Fonte: www.conceyuabiertu.org

Conciertín en Begoña en L'Ayalga

Los datos de la EPA confirmen la necesidá d'una rempuesta clara ¡Fuelga Xeneral!

La crudeza de los datos de la Encuesta de Población Activo desixe rempuestes clares y contundentes por parte del Pueblu Asturianu, cola convocatoria d'una fuelga xeneral d'ámbetu nacional comu primer midía

Losnuevos datos reflexaos na Encuesta de Población Activo referentes al segundu trimestre del añu reflexen la esistencia de 101.800 asturianos en paru, una tasa de desemplegu al 21,03%, y con una tasa de paru xuvenil que yá ye del 44,21%. Per otra parte49.100 asturianos lleven nel paru más d'un añu, y de esta cifra, 24.600 devasen yá los dos. El xorrecimeintu del paru n’Asturies ye del 22,51% interañal.

La crudeza d'estos datos, el comencimientu de que nun son los piores que vamos conocer y la certidume de que los mesmos respuende, non yá a una situación económica concreta sobro la qu'habría enforma que dicir, sinón a les resultancies d'una política sociu-económica aplicada pol Estáu español n’Asturies empobinada a la destruición de texíu sociu-económicu asturianu y que vieno provocando'l paru, la precariedá d'emplegu y la emigración forzada de decenes de miles d'asturianos, inclusive nes dómines de “España va bien”, confirma la necesidá urxente de rempuestes clares y contundentes por parte del Pueblu Asturianu, motivu pol qu’Andecha Astur propón, comu primer midía, la convocatoria d'una fuelga xeneral d'ámbitu nacional.

P’Andecha Astur pretender negar una realidá tan obvia, siguir defendiendo la seutorialidá de les lluches y negase a integrar el conxuntu de conflictos llaborales esistentes nel nuesu país dientru d'un marcu específicu asturianu non solo costitúi una torpeza, sinón qu'a la vista d'evidencies como les que nestos momentos amuesa la EPA, suponen una complicidá coles polítiques d'esterminiu que ta aplicando l'Estáu español n’Asturies y que tán llevando a una situación de sufrimientu y precariedá inaceptables.

 FONTE: www.andecha.org

Conceyu Abiertu por Mieres pide que'l plan d'axuste en Mieres afeute a los partíos políticos del Ayuntamientu

Depués de saber que'l gobiernu llocal de Mieres d'Izquierda Unida, nun va recurrir la sentencia qu'anula l'axuste o recorte municipal sobre trabayadores del conceyu entendemos dende Conceyu Abiertu por Mieres que s'abre un nuevu escenariu. El recorte comtempla 1,4 millones d'euros al añu nos sueldos de los y les trabayadores municipales. Esti recorte nun afeuta a les perceiciones que reciben los partíos políticos con representación nel conceyu, pesie a que l'axuste llocal ye yá de 3'2 millones d'euros.

Dende Conceyu Abiertu por Mieres queremos tresmitir la nuesa posición respeutu a esta situación, la cual mos paez vergoñosa. Agora que paez que sindicatos y alcaldía van sentase p'aldericar camentamos qu'hai de dexar delles coses clares si queremos tener una solución equilibrada al gran problema qu'hai en Mieres. En primer llugar, dexar claro qu'entendemos que ye necesariu que l'axuste afeute de forma direuta a los grupos políticos que tienen representación nel conceyu y nun recaigan sobre los trabayadores públicos municipales. Dende que'l gobiernu d'Anibal Vázquez algamó l'alcaldía de Mieres ta pidiendo sacrificios a los emplegaos y emplegaes del Ayuntamientu y la ciudadanía pero entá nun tocaron los sos sueldos. Poro, Conceyu Abiertu por Mieres considera esti proceder del gobiernu d'IU como unilateral, egoista y pocu éticu nos tiempos que cuerren, y más sabiendo la situación económica y social del Conceyu de Mieres.

Tamién, dende Conceyu Abiertu por Mieres queremos espresar qu'atalantamos necesariu redefinir un plan d'axuste nel conceyu onde los especuladores y los grupos políticos seyan los principales afeutaos, entendiendo la so gran responsabilidá na situación d'endeudamientu que vivimos en Mieres. Los trabayadores municipales nun puen cargar colos años de marafundiar perres y clientelismu cacique, tienen de ser los responsables quienes rindan cuentes. Poro, naguamos por una redefinición del plan d'axustu llaboral mierense que tea en cuenta les necesidaes y la situación llaceriosa de la mayoría social de Mieres. Pa finar, dende Conceyu Abiertu por Mieres pidimos a Izquierda Unida que demuestre a la población del conceyu que son una formación política d'izquierdes, yá qu'hasta agora'l proceder d'IU ta comtemplando munches midíes derechistes. Tamién que los sindicatos interllocutores nel procesu de negociación tean al altor de les circunstancies y nun dean un pasu atrás pa colos intereses de los y les trabayadores.

www.conceyuabiertu.org

Conceyu Abiertu por Mieres llamenta l'ERE nes plantes de Rioglass Solar en Mieres y L.lena

Les ciudadanes y ciudadanos qu'integramos la formación Conceyu Abiertu por Mieres vemos con preocupación la decisión de la direición de Rioglass d'aplicar un ERE nes factories de L.lena y Mieres qu'afeutaría a la totalidá de dambes plantiyes. L'ERE entamará a aplicase dende l'entamu del mes d'agostu y tien poques vistes de ser reversible. Dende la direición de la multinacional argumenten la so decisión na falta d'actividá y la falta pidíos que se tan dando anguañu a estes fábriques.

Dende Conceyu Abiertu por Mieres queremos tresmitir la nuesa solidaridá activa con tolos trabayadores que van sufrir esti plan y que va suponer la estinción de los sos contratos llaborales y la so incorporación a la llarga y escandalosa llista de paraos y paraes que tenemos n'Asturies y nestos conceyos. Vemos esmolecíos y esmolecíes como tol sector llaboral de les comarques mineres y de la zona del Caudal va cayendo rápidamente demientres les empreses siguen teniendo beneficios millonarios. Esti casu ye un más. Si bien Rioglass Astur quier zarrar la so actividá na nuesa comarca, l'añu pasáu abrió una factoría la multinacional n'Estaos Xuníos invirtiendo 33 millones d'euros. Una vegada más les direiciones empresariales pisen los drechos y necesidaes de la mayoría social si pa ello ye necesariu caltener los sos astronómicos beneficios.

Dende la formación mierense tamién atalantamos qu'estos 200 despíos axúntense a una braera sangría de despíos nos caberos meses, lo que fai incaltenible la situación socioeconómica d'esta comarca. El modelu industrial y llaboral qu'afitaron nel conxuntu de les cuenques mineres paez cadudu ya inútil y esto nuna coyuntura onde quieren finar de forma definitiva col carbón asturianu. Amás de solidarizanos colos 200 trabayadores y tresmitir la nuesa opinión sobre'l proceder de la empresa queremos pidir a los sindicatos y los grupos políticos un posición fuerte nesti conflictu, en defensa de los intereses de los y les trabayadores, intereses que son los de Mieres, L.lena y el conxuntu del país.

FONTE: www.conceyuabiertu.org

Asturies yá supera les cien mil persones en paru, según la EPA

El paru medró en 5.100 personas n'Asturies nel segundu trimestre del 2012, según los datos de la Encuesta de Población Activa (EPA), lo que supón una xuba del 5,28% en comparanza col trimestre anterior. Ello fai que'l númberu total de persones ensin empléu nel país llegue a les 101.800 y la tasa de paru tea nel 21,03%.

Nel conxuntu del Estáu, el paru xubió en 53.500 persones nel segundu trimestre del añu en comparanza col primer trimestre, un 0,95%, lo que sitúa'l númberu total de desempleaos en 5.693.100 persones, una cifra nunca vista hasta agora na economía española.

La tasa de paru estatal medró, al acabar xunu, hasta'l 24,63%, una proporción casi dos décimes más alta que la del trimestre anterior (24,44%), según los datos de la EPA que publicó esti vienres, 27 de xunetu, l'Institutu Nacional d'Estadística (INE).

FONTE: Les Noticies