Contra'l capital y la so patronal: LLUCHA OBRERA Y POPULAR

Conceyu de Mieres

L'Estáu quier eliminar les parroquies rurales asturianes

Les 39 parroquies rurales d'Asturies y el restu d'entidaes locales menores del estáu, del norte principalmente, van desapaecer cola reforma de la Llei Reguladora de les Bases de Réxime Llocal del gobiernu español que pretende esaniciar les 3.725 entidaes, que se van manifestar en Madrid el prósimu 10 de setiembre pa esixir que se reconsidere la reforma de la llei.

Nuna asamblea celebrada en Pravia, les parroquies afitaron un calendariu de movilizaciones qu'amás de la protesta en Madrid recueye la solicitú d'una entrevista col delegáu de Gobiernu español n'Asturies, Gabino de Lorenzo. El presidente de la Federación Asturiana de Parroquies, Andrés Rojo,sorrayó que la supresión de les collaciones asturianes nun sentíu tien nengún dende'l puntu de vista económicu ya que nun suponen gastu y que tampoco respuende a nengún otru tipu de llóxica, ye "suprimir por suprimir".
Los representantes d'estes instituciones tradicionales, presidente y vocales, son escoyíos por sufraxu direutu y nun reciben salariu dengún pol llabor. Rojo considera la reforma totalmente inxusta dafechu. N'Asturies hai un total de 39 parroquies rurales distribuyíes en 16 conceyos. Apiguren una población que ronda los 12.000 ó 14.000 habitantes. Pravia y Cuideiru, con 10 y 8 respectivamente alluguen la mayoría d'esti tipu d'entidaes locales na comunidá autónoma asturiana, siguíos de Casu, Teberga o Somiedu con 3 caún, Cabranes con dos y Piloña Ponga, Cabrales, Ayande, Cangas del Narcea, Eilao, Degaña, Villayón y Valdés, con una.
La parroquia ye la división alministrativa tradicional inmediatamente inferior al conceyu como recueye l'Estatutu d'Autoniomía nel so artículu sestu. Nél prevé la reconocencia de la personalidá xurídica de les parroquies rurales como forma tradicional de convivencia y asentamientu de la población asturiana.
En desnrollu de dichu artículu, díctase la Llei 11/1986, de 20 de payares, pola que se reconoz tala personalidá xurídica y que prevé nel so articuláu el procedimientu de reconocencia, les competencies de la parroquia rural, el réxime orgánicu y funcional de les mesmes y los recursos de les parroquies. En total hai 856 parroquies perteneciemtes a la comunidá autónoma asturiana.

Estrayíu d'Infoasturies.net

La plantilla de Starglass sofitó dafechu la xornada de fuelga

La plantilla de la factoría de Starglass en Sovilla sofitó masivamente la convocatoria de fuelga alcordada n'asamblea polos trabayadores, y que ye la primera d'un total de 54 hasta finales d'añu.

Como yera d'asperar, la plantilla de la división de vidrio d'automoción de Rioglass, Starglass, con planta na llocalidá de mierense de Sovilla, secundó dafechu la xornada de fuelga convocada depués de decidise n'asamblea de trabayadores, na que ye la primer xornada de paros d'un total de 54 hasta finales d'añu, con feches ensin decidir pa qu'asina la empresa nun pueda axustar la so producción al calendariu de movilizaciones.

La xornada nun tuvo les aiciones de protesta asperaes por mor de la muerte d'un miembru del Comité d'Empresa, anque según testimoniu de trabayadores de la compañía la plantilla cuntó col sofitu de trabayadores d'HUNOSA y de Rioglass Solar, onde desendolcaron un piquete informativu sobre la problemática de la so compañía hermana, Starglass.

Los trabayadores protesten pol recorte unillateral d'ente 180 y 210 euros del so salariu, xustificao pola empresa debío a la so "falta de lliquidez". Esta problemática améstase a los continuos problemes pa los trabayadores con EREs y cambios nes sos condiciones llaborales que-yos ficieron tomar la determinación de lluchar por aparar los abusos patronales.

FONTE: Infoasturies.net

Sigue la iniciativa ¡ye perfácil!

Concentración contra los recortes na educación pública

Coleutivos pa la defensa de la educación pública convoquen una concentración n'Uviéu coincidiendo cola entrega de medalles pal Día d'Asturies, esti vienres 7 de Setiembre a les 18:30 hores.

Los coleutivos pa la defensa de la educación pública n'Asturies siguen alantre coles so movilizaciones contra los retayos de fondos públicos realizaos nesti importante seutor públicu. Pa continuar cola dinámica de protestes, la "Marea Asturverde", xunto a l'Asamblea d'Empleaos Públicos de la Conseyería de Bientar Social, convoquen una concentración de protesta pa siguir denunciando la situación de recorte de medios, fondos, personal y, en definitiva, calidá de la estaya educativa asturiana.

Poro, coincidiendo col actu institucional d'entrega de medalles pal Día d'Asturies, esti vienres 7 de setiembre a les 18:30 llamen a concentrase nel Auditoriu Príncipe Felipe d'Uviéu baxo'l llema "Nos sumamos, contra los recortes". La combatividá de los y les trabayadores del seutor públicu asturianu sigue alantre, en denuncia polos descomanaos "axustes" que ta realizando'l gobiernu asturianu formáu pola FSA col sofitu d'UPyD ya IU.

FONTE: infoasturies.net

Darréu quier facer públicu’l so sofitu al actu que Conceyu Abiertu entama esti 8 de setiembre.

La organización de mocedá independentista revolucionario Darréu quier tresmitir de forma pública’l so sofitu al actu qu’entama esti prósimu sábadu 8 de setiembre Conceyu Abiertu, nel cual se pretende reivindicar y cellebrar el Día de la Nación Asturiana. Dende les 14:00 hores van principiar una bona riestra d’actos nel Parque La Llaguna de la llocalidá de L’Entregu, nel Conceyu de Samartín del Rei Aurelio.

 

Darréu caltién qu’esta convocatoria ye la más afayaiza nesti día, yá qu’esta plataforma de ciudadanos apuesta nesti Día d’Asturies pola soberanía, la democracia directa y la igualdá social escontra’l folclorismu sucursalista y cuadonguista del Gobiernu del Principáu. La nuesa organización coincide con Conceyu Abiertu na importancia de tomar los conceyos como espaciu de llucha y tresformación social cola fin de construyir una Asturies llibre, soberana y socialista.

L’apuesta del soberanismu d’izquierda pol municipalismu tien de ser sofitáu nesti actu y la mocedá tien de ser protagonista nesa tresformación d’Asturies y los conceyos, polo que como organización de mocedá atalantamos que yera necesariu anunciar de forma pública’l nuesu respaldu a esta iniciativa popular que va acoyer a L’Entregu como espaciu afayaizu. Asina pues, llamamos a la mocedá asturiano a participar nesti actu esti prósimu 8 de setiembre pa reclamar la nuesa soberanía como nación y pueblu cola fin de finar con tanta opresión capitalista-españolista.

 

www

Concentración solidaria colos mineros represaliaos

Dellos coleutivos convoquen a la ciudadanía a una concentración solidaria nos xulgaos de Gráu, con motivu de la declaración neses instalaciones de nueve mineros acusaos de varios cargos.

Un conxuntu de coleutivos sindicales, de defensa de la minería, y antirrepresivos convoquen a la ciudadanía a participar nuna concentración que tendrá llugar el prósimu martes 4 de setiembre, de magar les 10:45 hores nos xulgaos de Gráu, en solidaridá con nueve mineros que tendrán qu'entrar nesi enclave pa declarar por dellos cargos de los que-yos acusa les autoridaes xudiciales.
Estos nueve mineros tan acusaos de causar desorde público y participar en cortes de carreteres fechos a l'altura La Vega d'Anzu, nel marcu de la fuelga minera desendolcada nos meses pasaos, y que se vien cobrando decenes de represaliaos y represaliaes pola realización d'aiciones en defensa del seutor mineru y los puestos de trabayu que d'elli dependen.

Fonte: Infoasturies

Conciertu antirrepresivu pal 8 setiembre.

Conceyu Abiertu entama un día d’Asturies alternativu en Samartín del Rei Aurelio

El Día de la Nación Asturiana treslládase esti añu a L’Entregu con un actu políticu na cai.

 

El prósimu 8 de setiembre, Díi de la Nación Asturiana, Conceyu Abiertu entama un actu alternativu al qu’organiza’l Principáu en Cangues d’Onís. D’esta manera, la organización prepara un actu políticu nel conceyu de Samartín del Rei Aurelio, onde se cellebrará un actu nel parque “La laguna” de L’Entregu de magar les 14:00h. Nel actu políticu intervendrá un voceru de la organización en Samartín, conceyu qu’acueye l’actu, y un voceru nacional, asina cómo’l conceyal de Noreña y otros representantes de los dixebraos conceyos onde la organización tien presencia. Amás d’ello, tendrá llugar una xinta popular pa los y les asistentes.

 

Conceyu Abiertu considera que l’ocho de setiembre, agora más que nunca, tien que ser un día de vindicación, un día pa vindicar la figura de los conceyos asturianos na reconstrucción nacional y social del nuesu país y la gueta de la soberanía y de la plena democracia p’Asturies.

 

Que’l gobiernu d’Asturies organize una fiesta en Cangues y vaiga a misa a Cuadonga, sirvirá como entretenimientu o distraición, pero nun mos sirve pa nada políticamente a los asturianos. L’ochu setiembre ye un día pa recordar qu’Asturies ye una nación y que como tal tien unos drechos. Tenemos que críticar necesariamente al gobiernu asturianu nel día de tolos y toles asturianes porque escaez facer lo más importante: tien que reivindicar políticamente Asturies y les sos instituciones que s’atopen baxo amenaza del centralismu español, tien que recordar que somos una nación hestórica europea, que tenemos drechu al autodetermín y que nestos momentos d’imposiciones, de recortes, d’ataques a la yá de por sí curtia autonomía que tenemos, d’amenaces a los conceyos y mancomunidaes y de desaniciu de lo público, ye precisamente cuando con más puxu tenemos que desixir al gobiernu d’Asturies, qu’actúe como tal, que dexe de ser cómpliz y que mos defienda.

 

Enxamás un gobiernu central llegare tan lloñe amenazando d’intervenir les cuentes d’Asturies, ye dicir, d’intervenir la nuesa autonomía. Y de fechu, imponiéndomos illegalmente, atentando contra la so propia constitución española recortes inasumibles que ponen en riesgo el sistema públicu de sanidá y educación sobre’l que tenemos competencies.

Eses amenaces necesiten rempuesta y Conceyu Abiertu ta encadarmándose pa organizar una rempuesta. Poro, animamos a tolos asturianos y asturianes esmolecíos pol futuru del so país a igualu con nosotros en clave social. Un bon entamu puede ser compartiendo con nós en L’Entregu (Samartín del Rei Aureliu) esti prósimu 8 de setiembre, día de la nación asturiana.

 

Fonte: www.conceyuabiertu.org

Ésitu na 2ª xornada de fuelga en ThyssenKrupp

La xornada de fuelga convocada es ti sábadu pol Comité d'Empresa de ThyssenKrupp Norte na so fábrica de Baíña tuvo de nueu un seguimientu total ente los trabayadores, na so llucha por un conveniu coleutivu dignu que dende la empresa se-yos niega.

Los y les trabayadores de la fábrica de Thyssenkrupp Norte na llocalidá de Baíña, nel conceyu Mieres, taben llamaos a una nueva xornada de fuelga que tuvo llugar esti sábadu, col enfotu de reclamar un conveniu coleutivu que recueya una xubida salarial del 3,4% en llugar del 1,4% ofrecíu pola empresa, y que nel casu de la plantilla fuera del conveniu xube hasta'l 3,5%.

Ye por ello que'l Comité d'empresa, formáu por CSI, CC.OO y UGT, convocó esta nueva xornada de movilización que, una vegada más, cuntó col sofitu de la totalidá de la plantilla, qu'aparó los trabayos de la factoría durante tola xornada como midida de presión pa que la empresa negocie colos trabayadores unes meyores condiciones.

Fonte: Infoasturies.net

Andecha celebró’l 75 aniversariu de la declaración de soberanía del Conseyu d’Asturies y Lleón

Alredor de venti persones averáronse’l sábadu al monolitu d’homenaxe a la declaración de soberanía del Conseyu d’Asturies y Lleón asitiáu por Andecha Astur nel puertu Tarna. El día 25 cumplíense 75 años d’esti fechu.

Los militantes y simpatizantes de la formación nacionalista axuntáronse alredor del monolitu d’homenaxe, onde depositaron un ramu de flores. Darréu tuvo llugar la intervención política, na que’l secretariu xeneral de la organización emponderó’l comportamientu de les persones que conformaron el Conseyu Soberanu d’Asturies y Lleón pola so defensa d’Asturies y del pueblu asturianu. Por último, comentó que l’Estáu español pon en peligru la sobrevivencia del país y fixo un crítica a les formaciones con representación na Xunta Xeneral. Pa finar l’actu, sonó la ‘La flor del agua’.

El Conseyu d’Asturies y Lleón firmó la declaración de soberanía’l 24 d’agostu del 1937, qu’entraría en vigor el día siguiente pese a la oposición de los gobernantes de la República española. Dende esi momentu y hasta’l 20 d’ochobre, el presidente Belarmino Tomás y el so executivu tomaron les riendes del país, acuñando inclusive moneda propia. La entrada de les tropes ‘nacionales’ en Xixón el 21 d’ochobre supunxo la fin del Conseyu.

Fonte: Asturies.com

Caña, caña, caña, Asturies nun ye España.

Concentración solidaria ya internacionalista Asturies-Sudáfrica

Andecha entama un actu d’homenaxe al Conseyu Soberanu d’Asturies y Lleón nel so 75 aniversariu

Esti sábadu cúmplense 75 años de la declaración de soberanía del Conseyu d’Asturies y Lleón. Por esti motivu, Andecha Astur entama un actu homenaxe nel monolitu asitiáu pola organización en Tarna en recuerdu a esta institución.

D’esta forma, la celebración d’esti homenaxe que tolo años fai Andecha Astur y que nun primer momentu tenía como sede Xixón, torna al puertu Tarna depués de que nel 2011 tuviera llugar n’El Brañiḷḷín, onde llevantóse otru monolitu “con una placa que recuerda a los homes y muyeres que defendieron neses montañes una Asturies llibre y socialista”. La cita ta prevista pa les 13 hores del sábadu.

El Conseyu Soberanu d’Asturies y Lleón foi’l resultáu d’una reaición énte la situación na que s’atopaba l’Estáu, en plena Guerra Civil, col nuesu país aisláu pol avance del exércitu nacional. El 24 d’agostu fírmase la declaración de soberanía –anque la fecha na que se diz qu’entró en vigor foi’l día siguiente– y Asturies y Lleón pasaben a ser independientes del Gobiernu de la República. Belarmino Tomás, dende la presidencia, organizó un Executivu que tuvo vixente hasta’l 20 d’ochobre, cuando les tropes de Franco tomaron Xixón y los miembros del Conseyu viéronse obligaos a colar per El Musel. “Nesti 75 aniversariu de la Declaración de Soberanía, nunos intres nos que de nuevu tamos viendo que l'Estáu español supón el principal problema pa la sobrevivencia del pueblu asturianu, y cuandu se fai más qu'evidente que siguir xuncíos al proyeutu políticu d'España namás que supón afondar nel procesu d'asimilación y xenocidiu del nuesu pueblu, Andecha Astur fai un llamamientu al conxuntu de la sociedá asturiana non sólo a participar na reivindicación d'esa fecha y esi fechu hestóricu, sinón a trabayar díi ente díi pa recuperar la nuesa soberanía y poder decidir llibre y democráticamente'l nuesu futuru, ensin más llendes que les que voluntariamente querramos ponemos, llibres de xugos y d'imposiciones españolistes”, afirma la formación nacionalista nun comunicáu.

 

Fonte: Asturies.com  

Charra desplicativa sobre'l dineru y el sistema económicu

L'asociación "Acción Popular Organizada pa la Reprocidá Mutua n'Asturies-Agrupación Nava", en collaboración con Conceyu Abiertu por Xixón, organicen una charra desplicativa que xirará alrodiu'l dineru: cómo surdió, quién lu crea, quién lu controla, quién lu reparte, ú va, a quién beneficia la so escasez, y otres munches custiones, como les rellacionaes cola deuda de los países, por qué tolos países tan endeudaos, el furrulamientu de los mecanismos de deuda, etc., too ello dende una perspeutiva didáutica cola que difundir y esparder una concencia sobre'l furrulamientu del sistema monetariu actual.


Amás, tamién tendrán espaciu otres custiones como'l trueque, l'orixe de los bancos, la reserva fraccionaria, y alternatives al actual sistema, tales como los bancos de tiempu, cooperatives integrales, economía del bien común y otros munchos aspeutos. La cita tendrá llugar el prósimu vienres 24 d'Agostu de magar les 19:00 nel Llar l'Ayalga, asitiáu na Cai Decanu Prendes Pando 11 Baxu, Xixón.

Dende Conceyu Abiertu por Xixón animamos a tola ciudadanía a asistir y participar nesta charra de gran interés nos momentos actuales de crisis sistémica, debío a que nesta actividá va a poder afondase nun mayor entendimientu del modelu actual, asina como posibles alternatives y maneres de crear una economía más sostenible y racional.

SUATEA convoca una movilización en defensa de la educación pública y contra los recortes pal llunes n'Uviéu

La plaza la Escandalera, n’Uviéu, va ser el llunes puntu de salida d’una marcha convocada por SUATEA en defensa de la escuela pública y contra los despíos d’interinos. Darréu va haber una asamblea frente a la Conseyería d’Educación

A lo llargo de la xornada’l Sindicatu Unitariu y Autónomu de Trabayadores de la Enseñanza d’Asturies (SUATEA) va tratar la propuesta de modificación d’horarios del profesoráu, el recorte “drásticu” del númberu de Centros de Profesoráu y Recursos, y de profesores. D’igual forma, va aldericar la negativa por parte de l’Alministración a contratar profesoráu d’apoyu en Primaria. Ante esta situación, el sindicatu comentó que va proponer que se garantice que les guardies y los programes educativos tengan caráuter llectivu, que la biblioteca funcione con profesoráu a lo llargo de tol horariu del alumnáu y que se sigan promoviendo les actividaes pa garantizar l’atención afayadiza a los escolinos, ente otres cuestiones.
La movilización va principiar al meudía d’Escandalera, onde ta prevista una concentración contra los recortes, y va continuar cola marcha hasta la sede de la Conseyería d'Educación, Cultura y Deporte, puntu nel que va tener llugar l’asamblea.

Democracia a la española y OLÉ

Conceyu Abiertu por Mieres refuga de forma directa la xubía, d'un 18%, del billete d'autobús

Consideramos esti incrementu del preciu abusivu, anti-popular y pocu efectivu.

El preciu'l billete d'autobús en Mieres pasará del actual preciu, 1,10 euros a 1,30 pa tresportes ente distintos nucleos de población del conceyu. Pel so llau, los tresportes interurbanos pasen de 55 céntimos d'euro a 65 centimos. La xuba de precios tamién afecta a los distintos servicios especiales. Esto significa una xuba de los precios del tresporte públicu del conceyu d'un 18%, dos años depués de que l'anterior gobiernu llocal, del PSOE, xubiera yá los precios nun 10%. El Principáu dio permisu al conceyu p'aplicar esta midía de recorte, que salió d'un plenu municipal.

Dende Conceyu Abiertu por Mieres queremos facer públicu'l nuesu fondu refugu a esta midía de xubir los precios del autobús públicu urbanu nun 18%. Recordamos qu'esta midía, si ye aplicada, como too paez indicar, fadrá qu'en dos años el preciu del tresporte públicu de Mieres medre n'un 28 % y nun podemos descartar más recortes nesti serviciu. Nun queremos escaecer amás que munchos vecinos y vecines lleven bien de tiempu amosando la so quexa non solo pola xuba de precios, sinón tamién pol recorte de servicios a munchos puntos del conceyu.

Dende la nuesa formación ciudadana atalantamos esta midía como abusiva, yá que'l preciu d'un serviciu d'estes característiques tien de ser popular, teniendo en consideración que ye l´únicu mediu de tresporte pa muncha xente y que pa desenrrollar les xeres de la so vida cotidiana munches persones dependen d'esti serviciu públicu. Ciertamente, son sobre manera les clases populares les que dependen d'esti serviciu d'autobuses del conceyu y va ser, una vegada más, la mayoría social y popular del Conceyu de Mieres quien pague los escesos y pufos de los gobiernos llocales. Nel pior de los momentos y con un futuru inciertu pal conceyu y la so ciudadanía, la propuesta yá aceptada pol Principáu d'Izquierda Unida ye impopular y abusiva.

Conceyu Abiertu por Mieres quier espresar, y con nós munchos ciudadanos y ciudadanes, el descontentu social esistente en Mieres coles midíes d'austeridá municipal y les reformes o recortes que tan llevando alantre nel conceyu'l gobiernu d'IU-LV. Vamos viendo como les persones que xubieron al poder baxo'l llema “soluciones d'izquierda” nun aparen d'aplicar midíes y reformes derechistes. Esta nueva reforma, nesti casu aplicada al tresporte públicu, constitu-y un nuevu ataque al bolsiellu de la mayoría social mierense y al drechu de tener un tresporte públicu dignu y de calidá pa toes y toos. Camentamos que la midía a la llarga va salir permal y qu'esta estratexa va facer que la imaxe social del tresporte públicu municipal salga mui perxudicada, dándose un amergamientu de la clientela d'esti serviciu. La escusa de finar cola delda municipal sigue na mesa y vendrán nuevos recortes en Mieres que sufrirán los y les trabayadores demientres los especuladores y responsables de la llaceriosa situación de les arques municipales siguen ensín pagar la so responsabilidá n'actual crisis municipal, al igual que pasa a nivel global con la gran crisis capitalista. El gobiernu d'Anibal Vázquez paez que quier qu'asina seya.

www.conceyuabiertu.org

Casi 6.500 persones dexaron Asturies nel segundu trimestre por razones de trabayu

Nel segundu trimestre del añu 6.475 trabayadores con domiciliu n'Asturies marcharon del país por motivos llaborales, al ser contrataos fuerea de les nuestres fronteres. Nesi mesmu períodu, aportaron a Asturies un total de 3.924 persones d'otros territorios, lo que dexa un saldu negativu, ente abril y xuno, de 2.551 contraos.

Tolos sectores sin escepción rexistraron más trabayadores qu'emigren d'Asturies de los que inmigren nel segundu trimestre del añu. Nel sector Servicios marcharon 4.633 persones por 3.014 que llegaron; nel de la Construcción marcharon 1.165 y llegaron 402; nel de la Industria marcharon 503 y llegaron 399; y nel sector Agrícola y Pesqueru marcharon 174 y llegaron 109.

Por grupu ocupacional, los que presenten un saldu negativu más importante (-668) son los Artesanos y Trabayadores Cualificaos d'Industries Manufactureres, Construcción y Minería, seguíos del grupu de Trabayadores non cualificaos (-568) y Trabayadores de los Servicios de Restauración, Personales, Protección y Vendedores de Comerciu (-465).

Fonte: lesnoticies.com

Conceyu Abiertu por Uviéu considera un absurdu l’actuación del Ayuntamientu na división en distritos del conceyu

L’Ayuntamientu d’Uviéu decidió va unos meses dividir el conceyu en distritos, concretamente en siete colos que, según manifestó la Casa Conceyu, l’enfotu yera “dar puxu a la participación ciudadana nes decisiones del Ayuntamientu”, mediante la formación de Conceyos de Distritu que daríen voz a esos territorios nes actuaciones municipales.

Sicasí, dende Conceyu Abiertu por Uviéu tamos viendo cómo l’Ayuntamientu nun predica col exemplu nin amuesa la veracidá de les sos intenciones, al refugar toles reclamaciones presentaes por más de media docena d’asociaciones vecinales que básicamente poníen enfotu na composición de los citaos “Conseyos”, encamentando a una mayor presencia de les asociaciones vecinales y vecinos independientes nes mesmes, fechu que dende l’Ayuntamientu yá dieron por descartáu.

Poro, consideramos absurda l’actuación del consistoriu uvieín nesti procesu, al nun facer nengún casu a les propuestes y alegaciones vecinales, dando por válido únicamente lo qu’ellos proponen. Ensin entrar nel plan mesmu, con cuya distribución podríemos tar en desalcuerdu en dellos aspeutos, creyemos que lo mínimo que puede facer l’Ayuntamientu ye predicar col exemplu, teniendo en cuenta les propuestes vecinales.

Si yá partimos dende la base con una actitú institucional poco receptiva al diálogu vecinal, nun podemos ser optimistes respeuto a la efectividá y utilidá real de la división en distritos, que podría ser válida si de verdá s’afonda na democracia participativa, fechu que duldamos.

FONTE: www.conceyuabiertu.org