¡FUERA FACISTES DE LA UNIVERSIDÁ!

Les Asamblees d’Estudiantes de la Universidá d’Uviéu queremos denunciar y amosar el nuestru fonderu refugu énte los intentos d’infiltración y sabotax al movimientu estudiantil per parte de grupos facistes. Del mesmu mou, queremos amosar la nuestra indignación énte la perdeficiente actuación policial, qu’amosó especial enfotu en sofitar al grupu de neonazis que s’interponíen nel camín de la marcha nel so trescursu pela Plaza d’España, poniendo en peligru la seguridá de los y les manifestantes al esponelos a la confrontación col grupu de facistes.
 

Les Asamblees d’Estudiantes de la Universidá d’Uviéu queremos denunciar y amosar el nuestru fonderu refugu énte los intentos d’infiltración y sabotax al movimientu estudiantil per parte de grupos facistes y d’estrema derecha. Nesti sen, consideramos d’especial gravedá lo asocedío esta mañana durante la llexítima convocatoria del Conseyu d’Estudiantes de la Universidá d’Uviéu, énte la Conseyería d’Educación del Principáu d’Asturies, en protesta escontra la “Llei Wert” y les polítiques mercantilizadores y retayadores de derechos na Educación Pública. Denunciamos qu’una quincena de militantes d’una organización d’estrema derecha, asoleyando banderes y símbolos fascistes, intentaron reventar l’actu de los y les estudiantes de la Universidá d’Uviéu, provocando a los manifestantes mediante xestos, insultos y cánticos como “Fuera los negros de la universidá”, “Fuera los obreros de la universidá” y “Fuera los guarros de la universidá”.

Del mesmu mou, queremos amosar la nuestra indignación énte la perdeficiente actuación policial, que lloñe de defender a los manifestantes que teníen l’autorización oficial de manifestación, torgó’l desarrollu normal previstu pola convocatoria nel so desplazamientu hacia la Conseyería d’Educación. N’efeutu, la Policía Nacional amosó especial enfotu en sofitar al grupu de neonazis que s’interponíen nel camín de la marcha nel so trescursu pela Plaza d’España, poniendo en peligru la seguridá de los y les manifestantes al esponelos a la confrontación col grupu de facistes. Refugamos del mesmu mou l’actitú represora per parte del cuerpu policial, al intimidar, amenazar e identificar inxustificadamente a estudiantes qu’exercíen el so llibre derechu de manifestación de mou pacíficu y exemplar, llegando a identificar a miembros del Conseyu d’Estudiantes, convocante oficial.

Con too, consideramos la convocatoria too un éxitu del movimientu estudiantil y cellebramos el comportamientu de los y les asistentes a la serie de movilizaciones que nesti día tán asocediendo nel contestu de la Xornada de Llucha Estudiantil pola Educación Pública na Universidá asturiana. La Xornada entá nun finó, tovía queda munchu recorríu y tiempu pa l’acción y la reflexón, pero estos fechos, lloñe d’amenorgar la nuestra actitú combativa y antirepresora pola defensa de los nuestros derechos, afálenla.

Les Asamblees d’Estudiantes de la Universidá d’Uviéu somos agrupaciones estudiantiles llibres sofitaes nos principios de participación, cooperación, solidariedá y horizontalidá, defensores de la igualdá total ente les persones y de los Derechos Humanos. Quede claro: nun vamos tolerar los intentos de manipulación del movimientu estudiantil per parte d’organizaciones y persones qu’afalen ideoloxíes de calter racista, xenófobu, homófobu, sexista, facista, totalitariu, segregador y violentu.
Nun nos engañen les sos mázcares:

¡FUERA FACISTES DE LA UNIVERSIDÁ!

Darréu sofita la convocatoria de fuelga na Universidá d'Uviéu

La organización de mocedá Darréu amosó'l so refugu a los retayos del gobiernu y la "Llei Wert", al tiempu que llamen a secundar la fuelga universitaria del 7-P.
 

Dende Darréu manifiesten "el nuesu sofitu a la fuelga convocada pa esti miércoles na Universidá d'Uviéu contra la Llei Wert y les agresiones neolliberales a la Educación Pública. Esta convocatoria ta convocada pol Conseyu d'Estudiantes y poles Asamblees d'Estudiantes de la Universidá d'Uviéu y llama a que naide vaya a clase y tamién a movilizase. Dende Darréu sofitamos la convocatoria".

En cuantes a los motivos p'apoyar la movilización, despliquen qu' "Atalantamos que la Llei LOMCE o Llei Wert ye un pasu más na manipulación ideolóxica que supón el Sistema Educativu Español. La Educación, como nun escondió'l ministru Wert, va "españolizase" y como non, va privatizase ainda más. Esta reforma, supón una involución de calter reaccionariu tanto a nivel político como económicu y social. Nun podemos escaecer tampocu qu'esti procesu de reforma ta empobináu sobre un escenariu que yá yera de manipulación, control, privatización y precariedá".

Pa finar, la organización de mocedá afita que "llamamos a la mocedá a lluchar contra esta reforma y contra los recortes a los servicios públicos, entamando pola Educación, pero tamién a crear y a construyir una alternativa a esti estáu de les coses. Nesi sen, llamamos a la mocedá asturiano a entamar la griesca por una Educación del pueblu y pal pueblu, que supondría un modelu públicu, de calidá, asturianu y afitáu na llaicidá".

Fonte: Infoasturies

Cuba cellebró la 2ª vuelta de les elleiciones municipales

El pueblu cubanu tuvo ayeri una nueva cita elleutoral al cellebrase la 2ª vuelta de los comicios municipales, con una participación de más del 85%.

Los y les cubanes participaron ayeri nuna nueva cita elleutoral con motivu de la 2ª vuelta nos comicios de calter municipal, pa la elleición de los y les representantes del Poder Popular. Según la Comisión Elleutoral Nacional (CEN), un 85,52% del pueblu cubanu participó nel procesu, lo que supón unes 866.000 persones del millón que taba convocáu a exercer la democracia na islla caribeña.

Dende'l CEN destacaron la tranquilidá de la xornada, con sólo dalgunos incidentes derivaos de les inclemencies meteorolóxiques qu'atacaron la rexón durante díes pasaos. 1.160 conceyales foron escoyíos nestos comicios, realizaos en 136 de los 186 municipios colos que cunta Cuba, lo que supón trece de les quince provincies que componen el país.

Fonte: infoasturies.net

 

DARRÉU homenaxeará a los Mártires de Carbayín

La organización de mocedá Darréu entamará un homenaxe a los Mártires de Carbayín, que tendrá llugar el prósimu sábadu 10 de Payares nel cimenteriu de la llocalidá.
 

Darréu desplica que "Con esti actu dende Darréu pretendemos homenaxear a estos heroes del Pueblu Trabayador Asturianu que son los Mártires de Carbayín, pero tamién dignificar la memoria de toos aquellos y aquelles compatriotes que llucharon por una Asturies y un mundu meyor y más llibre y que dieron lo meyor de les sos persones lluchando contra'l capitalismu y el facismu. Dende la mocedá independentista revolucionario vemos con almiración la memoria d'estos homes y muyeres que llevaron hasta'l final el so compromisu militante y fueron represaliaos y asesinaos pol bloque oligárquicu español".

Poro, l'enfotu de la organización política de mocedá independentista sedrá rendir homenaxe a estos héroes d'Asturies, el prósimu sábadu 10 de Payares de magar les 13:00, nel cimenteriu de Carbayín Altu, asitiáu nel conceyu de Sieru, baxo'l llema "El meyor homenaxe ye siguir cola llucha".

FONTE: Infoasturies

AdePaVaN llama a "arrodiar l'INEM" el 14 de Payares

L'AdePaVaN convoca a los y les ciudadanes a arrodiar el Serviciu Públicu d'Emplegu de La Felguera'l 14 de Payares, coincidiendo cola fuelga xeneral convocada pa esi día.

L'Asociación de Paraos/es del Valle'l Nalón acaba d'asoleyar una aniciativa na que convoca a los y les ciudadanes a "arrodiar l'INEM", o lo que ye lo mesmo, el Serviciu Públicu d'Emplegu de La Felguera, asitiáu na Cai Florentino Cueto Felgueroso, de magar les 12:00 de la mañana, nuna aición entamada polos paraos y paraes de la cuenca'l Nalón, una vegada más en movimientu con esta aniciativa simbólica.
La fecha escoyía pa la protesta ye'l 14 de Payares, día nel que ta convocada una fuelga xeneral tanto a nivel asturianu como estatal, y que tamién va a tener llugar n'otros estaos como Portugal dientru d'una "xornada de llucha" entamada a nivel européu. Organizaciones sindicales como CGT o CSI yá amosaron el so sofitu a la fuelga convocada pola "Cumbre Social".

FONTE: Infoasturies

STOP Wertgoña

Demientres estes selmanes, el ministru d’Educación, José Ignacio Wert, ta en boca de munchos y munches y lo ciertu ye que nun ye pa menos. L’actitú d’esti señor, en xeneral, ye dafechamente descarada y nun destina un segundu a tratar de disimular la so identidá neofranquista pura y dura. Falanos del conceutu “españolizar” como oxetu de la Educación o diz coses como “España sedrá cristiana o nun sedrá”, ensín dulda, un llingüaxe bien reaccionariu y con un fedor a nacional-catolicismu que tira p’atrás. Amás de tar na más estrema drecha del Partido Popular esti señor debe tener un grave déficit d’atención, pues cada vuelta qu’abre la boca xube’l pan.
 

Ciertamente, cada vuelta qu’un de los partíos del Réxime xube al poder nel Estáu español nun tarda nada n’entamar una reforma educativa, cuestión que, por supuestu, da-y al sistema educativu español una bona riestra de problemátiques que yá son estructurales, consecuencia de la inestabilidá que xenera la situación, aparte d’otres cuestiones de fondu como’l déficit d’afondamientu pedagóxicu qu’hai nel Reinu d’España a la hora de llevalu al sistema educativu/formativu regláu. Quiero dicir con esto, qu’aparte d’unes cuestiones yá tradicionales, lo ciertu ye que la inestabilidá de la llexislación educativa nun dexa de ser una torga pa desendolcar les lleis vixentes, totalmente deficitaries de por sí, pero hai una tendencia xeneralizada a dir de mal en peor.

La nueva llei, la LOMCE o tamién nomada “Llei Wert” supón un claru retrocesu más a lo yá reculáu de por sí. Estudiantes, profesores y otros sectores sociales lleven denunciando dende hai munchos años el procesu de desmantelamientu de la educación pública nel Estáu español y gracies a les midíes del neolliberalismu européu y los serviles partíos PSOE y PP tamos llegando yá a lo que podríemos llamar la llenda de l’alvertencia a la resistencia. ¿Qué quier dicir esto? Si bien la privatización de la enseñanza lleva denunciándose dellos años, con tol fundamentu’l mundu, por ciertu, ye agora cuando s’abre un nuevu escenariu, y gracies a la escusa de la crisis socioeconómica, gran caballu de batalla del neolliberalismu, tamos inmersos nun plenu procesu de privatización, ideoloxización y recentralización pura.

El ministru d’Educación nun se corta, al igual que’l so gobiernu, en tapecer esta realidá. Nun vamos ser nós agora tan sumamente inocentes de seguir el xuegu al sistema y atender a razones pela so parte y relativizar na xusta midía les coses. Nun ye que quieran acabar con un drechu básicu como la Educación, ye tovía más grave. Amás d’esto quieren despoxar al sistema educativu español de la poca democracia que tenía ya instrumentalizalu de forma política ya ideolóxica, dalgo que ye inherente a cualesquier sistema educativu, pero non, camiento, a esti nivel. En 1970, la Llei Xeneral d’Educación, de Villar Palasí, superaba, nuna pequeña parte, ciertos conteníos que’l facismu impregnaba na Educación y se supón que facía la Educaciónm drechu de toos y toes. Esti proceder nun foi iniciaitiva nin benevolencia’l Réxime, sinon más bien un xestu “aperturista” haza Europa p’asina facer un favor a los intereses económicos de la oligarquía española. Esti momentu, cola “Llei Wert”, recuerda muncho a 1970, pero non p’avanzar haza 1971 sinon pa tornar a 1969. El desmantelamientu de la educación pública y la clara instrumentalización españolista y burguesa de la enseñanza, si ye por ellos, polos cabezaleros del Réxime, nun se para.

Obviamente, nun podemos escoyer la opción de quedar de brazos cruciaos mentantu roben un drechu a la xente, tenemos que defender la educación pública, dalgo que por ciertu, yá ta faciéndose n’Asturies dende hai tiempu, anque quiciabes d’una forma mui moderada y con una perspectiva de defensa d’un sector públicu, ensín entrar d’una forma crítica a otres cuestiones de fondu. Hai que defender la educación pública como un drechu básicu que ye, pero nun podemos llendanos a eso namás, la fola represiva y adoctrinadora neolliberal y españolista avanza ensín atender a razones. Wert tien nidio que pa el la educación ye un muérganu de tresmisión de los valores que representen a los sectores más reaccionarios del Estáu español. Esta ye la realidá y énte eso nun podemos facer namás que lluchar d’una forma imaxinativa, clara, crítica y combativa por una educación de cálter críticu que tea enfotada nel pueblu y pa los pueblos. Les compañeres y los compañeros del 11x12 teníen claro que puede facese oposición al Réxime y defender l’enseñu públicu dende’l soberanismu y la izquierda tresformadora. Demosaron una gran capacidá de convocatoria y ficieron al estudiantáu dir más allá nes crítiques al señor Wert y el so garrapiellu de rates reaccionaries. Ficieron una convocatoria fuerte no ideolóxicu y tamién fuerte no reflexivu, contra un gobiernu tamién ideoloxizáu y que nun escuende’l so propósitu de desaniciar l’aprendizaxe reflexivu na educación.

N’Asturies tenemos que tomar exemplu d’esperiencies como’l 11x12, y entamar una dinámica de defensa de la educación pública más contundente y más clara nos plantegamientos políticos ya ideolóxicos de la mesma ( ausentes cuasi siempres d’estes lluches). A nós, la mocedá asturiano, lleven españolizándonos munches décades, pesie a la sorpresa de munchos énte la declaración de Wert nel Congresu los diputaos. Asturies nun esiste nel currículum qu’ufre’l Principáu a los axentes educativos y los conteníos al rodiu d’Asturies tan enllenos de los mesmos mitos españolistes de siempres.

Poro, ye necesariu entamar una llucha pola educación pública, pero una llucha que mereza la pena, que ponga n’evidencia la natura reaccionaria del Estáu español y los sos gobiernos y la gran problemática plurinacional que tien l’Estáu nes sos coraes, claro, con poques ganes d’iguala. Lluchemos por una enseñanza llibre, crítica, asturiana, llaica y que sirva como motor de tresformación social. Necesitamos escoyer esti modelu de defensa na educación, yá que, como decía’l gran educador brasileñu Paolo Freire: “La educación de les mases faise dafechamente fundamental ente nós. Educación que, llibre d’alienación, seya una fuercia pal cambiu y pa la llibertá. La opción, polo tanto, ta ente una ’educación’ pa la ’domesticación’ alienada y una educación pa la llibertá. ’Educación’ pal home-oxetu o educación pal home-suxetu”.

Artículu espublizáu en Glayiu.

Más de 57.500 paraos/es n'Asturies ensin ingresos

Según los datos de la EPA recientemente asoleyaos, los y les paraes de llarga duración n'Asturies superen yá nidiamente más de la metá del total.

Los datos de la Encuesta de Población Activo ellaborada pol Institutu Nacional d'Estadística amosen, amás de los murnios datos xenerales de desemplegu, una allarmante situación en cuantes al númberu de paraos y paraes de llarga duración. Asina, el númberu de desemplegaos/es que lleven nesa situación más d'un añu superen yá les 57.500 persones que nun reciben nengún tipu de prestación.
nos caberos cuatro años, el porcentaxe de desemplegu de llarga duración medró n'Asturies dende'l 32% hasta más del 54%, fechu qu'amosa la gran incidencia de la ·crisis" na clase trabayadora del nuesu país. Al drama del paru hai qu'amestar el de la emigración, non recoyíu nestos datos, pero que sumen miles de persones que colen d'Asturies a la gueta de trabayu.

FONTE: Infoasturies.net

 

La Corriente Sindical d'Izquierda cellebró'l so VI Congresu.

La Corriente Sindical d’Izquierda d’Asturies vien de cellebrar esti fin de selmana el so VI Congresu. Coincidiendo col so 30 aniversariu, el sindicatu de clase asturianu debatió les llínees d’actuación pa los prósimos 4 años y escoyó les persones que conformarán los sos muérganos directivos. Samuel Fernández foi reellexíu como secretariu xeneral de la CSI, al frente d’una comisión executiva renovada.

La Corriente Sindical d’Izquierda nació hai 30 años cuando dellos cuadros y afiliaos fueron espulsaos de Comisiones Obreres al oponese a los Pactos de La Moncloa. Con gran pesu nos sectores del metal y la mediana industria históricamente, anguaño la central asturiana ye un espeyu de la reordenación económica del Principáu: espoxigó un 55% l’afiliación nos años caberos, 4.000 afiliaes y afiliaos, más de 400 representantes sindicales, y tien importantes secciones n’Alministración pública y en Caxastur, onde arrasaron nes últimes elleiciones sindicales, en detrimentu de la gran empresa y el sector naval.

 Nesti VI Congresu debatiéronse cinco ponencies sobre aspectos organizativos y llínea d’acción sindical. El tonu común a toes elles foi la necesidá de construir la llucha sindical en momentos d’enorme retrocesu de los derechos llaborales como los d’anguaño, y la urxencia de vertebrar un movimientu colos sectores más desfavorecíos de la sociedá civil, como son los desempleaos y los trabayadores precarios.

Namás concurría una llista al órganu de direición, que se podía considerar como continuista. Nella converxen hestóricos del movimientu obreru asturianu, como Juan Manuel Martínez Morala o’l propiu Samuel Fernández, una renovación xeneración encarnada por sindicalistes más mozos como Daniel Suárez (Hostelería), Marcelino (Servicios), Chelo (Alministración pública), Paco y una representación de sectores como’l de los trabayadores precarios y los paraos.

En pallabres de Samuel Fernández, mui críticu cola trayectoria del sindicatu nos cuatro años que lleva al frente, "el proyectu de la Corriente tien que ser la manifestación, la barricada, la movilización, tolos díes que podamos. Tenemos otru retu, la fuelga xeneral. Tenemos que salir a la cai, convoque quien convoque".

Al Congresu de la CSI asistieron representaciones de los sindicatos LAB (Euskal Herría), SAT (Andalucía), Co.Bas (Madrid), Coordinadora Sindical (Madrid), CIG (Galiza), CUT (Colombia) y del sindicalismu británicu que ficieron intervenciones pa desplicar les sos diferentes ámbitos d’acción.

Dientro’l congresu ún de los momentos más emotivos, foi cuando Igor Urrutikoetxea, responsable de Rellaciones Internacionales de LAB, entregó a Marín, de CSI-Minería, una bandera de Chile firmada polos mineros chilenos como muestra de solidaridá colos mineros asturianos en llucha.

FONTE: Glayiu.org
 

La XDLA pide a les alministraciones que sigan les recomendaciones del Conseyu d’Europa

El tercer informe del Conseyu d’Europa sobre’l cumplimientu de la Carta Europea de Llingües Minoritaries recomienda una proteición llegal mayor al asturianu. La XDLA encamienta al Gobiernu y a la Xunta Xeneral a que tomen nota.

Cuatro años depués de la espublización del segundu informe, la situación no que respeuta a la proteición llegal del asturianu mantiénse igual. Esto ye, nin los gobiernos que tuvo’l país nesti tiempu nin la Xunta Xeneral fixeron casu a les recomendaciones llanzaes pol Comité d’Espertos del Conseyu d’Europa en materia llingüística. “Mentes qu'al Executivu socialista de Patxi López lu emponderen dende Estrasburgo y lu ponen como modelu a siguir nel ámbitu español, el Gobiernu d’Asturies, tamién en manes del PSOE, recibe un tirón d’oreyes por nun dar pasos alantre col reconocimientu de los derechos llingüísticos de los falantes. Mesmamente, al lleer l’infome pue vese cómo en política llingüística tamos dando pasos atrás cola sida de la crisis económica”, espliquen dende la Xunta pola Defensa de la Llingua Asturiana (XDLA).

El coleutivu ciudadanu amuesa’l so malestar pol enfotu nulu del Gobiernu n’apurrir datos al Conseyu d’Europa sobre l’asturianu. Asina, l’informe señala qu’Asturies, pese al pidimientu del organismu, nun treslladó’l númberu de falantes del nuesu idioma “cuando esisten estudios sociollingüísticos sobre Asturies que muestren que nel 2002 esistía un 20 por cientu de falantes y que’l 60 por cientu de la población taba a favor de la oficialidá”. Al respeutu, la XDLA encamienta al Executivu a la ellaboración d’un estudiu nuevu “que permitiera que, pal cuartu informe, el Conseyu d’Europa contara colos datos más afayadizos”.

Amás, destaca qu’otros datos espublizaos pol informe, con allabancies por parte del Conseyu d’Europa, son falsos. Asina, el documentu cifra’l númberu de servicios de normalización en 18 nel momentu d’ellaboración del informe cuando nunca llegó a haber un númberu tán altu –anguaño furrulen 14–. Nesi sen, tampoco nun recueye la mengua perimportante nes subvenciones que reciben estos servicios dende’l 2008. La presencia nos medios de comunicación y la educación son otros puntos qu’analiza l’informe, que reclama la necesidá d’aprobar la especialidá d’asturianu. Por último, destaca la creación de la Unidá de Traducción que, recuerda la XDLA, vieno al traviés de los tribunales y non por iniciativa del Gobiernu.

FONTE: Asturies.com

Los borbones a los tiburones.

Asturies dixo NON a los Premios Principiegos

Durante la tarde d'esti vienres centenares de persones enllenaron la Plaza La Escandalera p'amosar el so refugu a la monarquía, los "Premios Príncipe de Asturias", y la política de retayos a la clase obrera desendolcada polos distintos gobiernos.
 

De magar les 17:00 ciudadanos y ciudadanes d'Asturies foron llegando a la Plaza La Escandalera, arrodiada de "llecheres" policiales nun dispositivu inda mayor de lo avezao. Distintos coleutivos de funcionarios y funcionaries, con representación de coleutivos mélicos, de la "marea verde" -en defensa de la educación pública-, o la Corriente Sindical d'Izquierda, cuyes banderes enllenaben los primeros puestos de la protesta.

Según pasaben los minutos aportaba más y más xente a la concentración, na qu'otros coleutivos como'l 15M, CSOA La Madreña, CSA La Semiente, Darréu, Conceyu Abiertu, Compromisu, PCPE, PCE, Frente Cívico, Xunta Moza o Izquierda Xunida tuvieron presentes. La protesta foi n'aumentu según pasaben los minutos, y algamó'l so puntu clave cola llegada de los príncipes d'españa al Teatru Campoamor ente glayíos de "fuera fuera", xiblíos y otros cánticos de calter antimonárquico.
Tamién recibieron xiblíos y abucheos otros conocíos premiaos como los futbolistes Xavi e Iker Casillas, nun actu de protesta qu'allargose de mena plena haza dalgo más de les siete de la tarde, momentu nel que munchos coleutivos abandonaron l'actu, anque la concentración siguió alantre cola presencia d'un garrapiellu de persones que continuó la protesta.

Con estos actos el pueblu asturianu dexó patente'l so refugu a los Premios Príncipe de Asturias, a la institución monárquica, y al sistema al que representen, y que ta cargando'l pesu de los retayos esclusivamente sobre les clases populares, al tiempu que gasten importantes cantidaes n'actos propagandísticos como esti.

FONTE: Infoasturies.net

El presupuestu de los Premios Príncipe, pa los servicios sociales

Dende Conceyu Abiertu queremos amosar el nuesu refugu a la cellebración que cada añu se produz n’Uviéu con motivu de los “Premios Príncipe de Asturias”, unos galardones que, según consideramos, respuenden principalmente a una operación de llaváu de cara pa la institución monárquica, cada día más deteriorada nel conxuntu del estáu español.

Amás, esti criteriu afeuta especialmente a Asturies, a cuyu pueblu se mos impuso la institución del “Principado”, una figura política qu’entendemos respuende a valores arcaicos y antidemocráticos inherentes a la propia institución monárquica. Dende Conceyu Abiertu queremos afitar qu’Asturies nun ye un “Principáu”, nin el pueblu asturianu siervu o vasallu de nenguna figura que nun seya formada y participada pol propiu pueblu.

Nesi sentíu, tamién queremos denunciar la situación de probitú democrática na que s’atopa Asturies, con cientos de persones represaliaes nos caberos meses por distintos conflictos sociales y llaborales como puede ser el casu del mineru. Nestos díes de parafernalia, Uviéu enllénase de fuercies policiales qu’entorpecen o incluso impiden el normal desendolcu de la vida de los y les ciudadanes pal regocixu d’unes élites ayenes a la realidá na que viven les clases populares.

Y ye que nuna Asturies con 100.000 paraos y paraes, na que dende Xineru de 2011 tuvieron qu’emigrar 17.000 mozos y moces, na que perdemos miles d’habitantes al añu, nun país cada día más avieyáu y con menos perspeutives de futuru, nun podemos facer más que denunciar la política del “pan y circu” a la que dende les instituciones estatales, asturianes y municipales mos somorguien en toles ocasiones que pueden.

Consideramos que nestos tiempos de dificultá pal conxuntu del pueblu trabayador asturianu, ye una obscenidá y una burlla a la ciudadanía’l fastuosu despliegue de medios económicos y humanos, con sovenciones millonaries a una fundación qu’escapa al control públicu y que nun sabemos mui bien en qué emplega caún de los euros del pueblu que-yos apurren les instituciones.

A too ello, queremos amestar que’l pueblu asturianu nel so conxuntu nun se ve representáu por una serie de valores –represores, machistes, homófobos, autoritarios- tresmitíos pola institución monárquica, fechu pol que calificamos como una humildación al pueblu asturianu esti eventu.

Dende Conceyu Abiertu camentamos que ye pernecesario que les nueses instituciones dediquen el so tiempu, esfuerzu, enfotu y el nuesu dineru na creación d’un texíu económicu que dea salida llaboral digna a la bayura de paraos y paraes qu’enllenes les llistes del desemplegu nel nuesu país.

Creyemos que ye más importante poner fin a la marxinación y represión na que vemos sometida a la nuesa cultura, identidá, y a la nuesa llingua. Represión y marxinación a la que contribuyen estos premios qu’en nengún casu tienen en cuenta los nuesos rasgos propios.

En definitiva, hai que poner les mires en custiones que de verdá afeuten a los problemes diarios de los y les asturianes, y non n’eventos elitistes ayenos al pueblu y que sólo sirven pa l’autoafirmación de les instituciones que mos llevaron a l’actual situación. En consecuencia, dende Conceyu Abiertu vemos necesaria una movilización lo más amplia posible, en númberu de participantes y en variedá d’aiciones, pa denunciar la situación y amosar el refugu del nuesu pueblu pa con esta llaceria

DARRÉU PIDE ACABAR COLA FARSA DE LOS PREMIOS, LOS PRÍNCIPES Y EL PRINCIPÁU

- Los Premios Principe d'Asturies son un descomanáu eventu, nel sen mediáticu y económicu, que tienen como función dar a la comunidá internacional una imaxe moderna de la monarquía española, presentando a los borbones como figures democrátiques y averaes a la cultura.

- Estos Premios de Pandereta son financiaos con dineru públicu, al travíes d'una fundación totalmente opaca que nun rinde cuentes a naide. Millones d'euros de toos van destinaos a esti “paripé” mentantu n'Asturies tenemos más de 100.000 persones en paru, 17.000 asturianos emigraron dende xineru y el porcentaxe de families baxo l'umbral de la probitú ye alarmante.

- Una institución arcaica, como la monarquía, en plenu sieglu XXI necesita d'esti tipu d'ostentaciones pa confundir a la xente y caltenese nel poder. La monarquía representa unos valores reaccionarios y elitistes contrarios a la democracia, la igualdá social y les llibertaes.

- El Principáu d'Asturies ye igualmente una institución arcaica y españolista, pues representa la subordinación de la nuesa nación al Reinu d'España y a la so corona. Lo orixe d'esti títulu p'Asturies vien de la perda d'una serie de guerres cola Corona de Castiella, depués de qu'Asturies lluchara pola so independencia.

- Por supuestu, esta gran comedia que son los Premios Principe, sirve pa españolizar a la población d'esti país y nun dexa de ser otro de los instrumentos que tien l'Estáu Español p'aparar el posible xorrecimientu de la conciencia nacional asturiana.

 

Por estos motivos y otros, dende Darréu, la mocedá d'izquierda soberanista, queremos llamar a la mocedá a refugar los Premios Principe. Tamién queremos llamar a lluchar pa mandar al basureru de la hestoria a los principes, a la monarquía española y al propiu Principáu d'Asturies, entendiendo que'l camín pa la llibertá y la dignidá d'esti pueblu nun pasa por otru sitiu que por algamar la REPÚBLICA ASTURIANA; SOCIALISTA Y SOBERANA, p'asina superar el sistema capitalista y salir del Estáu Español.

 

DARRÉU SOFITA LA CONCENTRACIÓN POPULAR BAXO'L LLEMA " NIN RECORTES, NIN PRIVILEXOS".

 

De manera popular, hai convocada una concentración de refuga pa colos Premios Principiegos baxo'l llema " Nin recortes, nin privilexos", esti vienres 26, a les 18:00 hores énte'l Teatru Campuamor, na Plaza la Escandalera d'Uviéu. Dende Darréu sofitamos la convocatoria y llamamos a la mocedá a participar pa dexar claro a estos parásitos arcaicos que n'Asturies sobren. Per otru llau, queremos facer un llamáu a la izquierda soberanista y nacionalista asturiana en xeneral pa movilizase nesti día y tener el so espaciu, como fai unos años teniemos nesti tipu de convocatories col Ensame República Asturiana.

 

WWW.DARREU.ORG

Vidiu del DMR'12

Conciertu solidariu colos represaliaos pol conflictu mineru

La Corriente Sindical d'Izquierda entama esti sábadu en Xixón un conciertu solidariu pa colos obreros represaliaos nel conflictu mineru.
 

Esti sábadu 20 d'Ochobre la Corriente Sindical d'Izquierda entama un conciertu solidariu pa colos represaliaos nel conflictu mineru de los pasaos meses, con más d'un cientu de deteníos, procesaos, multaos o acusaos en dalgunos casos a penes d'años de cárcel. Poro, el sindicatu de clase asturianu CSI garra l'aniciativa p'atropar fondos destinaos al coleutivu de represaliaos.

Nesti conciertu van a actuar los catalanes KOP xunto con Officer Down, Tragic Vision, Odio Visceral ya I.R.A., toos ellos tocando por solidaridá. El preciu del bonu sofitu pa ver el conciertu ye de diez euros, nun actu que va a entamar a les 19:00 na Sala Buda de Xixón.

El capitalismu español mata a la clase obrera asturiana

 

 

Darréu pola Educación Pública, Asturiana, Llaica y de Calidá.

MOCEDÁ ASTURIANA: ¡LA LLUCHA YE'L CAMÍN!

Darréu puxa por aparar los retayos que’l gobiernu español ta faciendo na educación pública, amás de pa impedir la implementación del nuevu modelu educativu, la LOMCE, que supón una mayor mercantilización de la enseñanza, menor accesibilidá económica a los estudios superiores pa la clase trabayadora, y un nuevu sistema educativu nel que se suprimen –o siguen ensin incluyise- enseñances, conteníos, etc. de gran valir ya importantes pa los y les estudiantes d’Asturies.

Dende Darréu-Mocedá Independentista queremos señalar non sólo al gobiernu español, sinon tamién al asturianu, formáu pol PSOE col apoyu d’Izquierda Unida y UPyD, como cómpliz nunos casos, y culpable directu n’otros, de l’aplicación n’Asturies de toes estes midíes impuestes dende Madrid, y que’l gobiernu asturianu nun fizo nada por aparar o suavizar; al contrariu, ta yendo más allá de lo desixío.

Consideramos que necesitamos avanzar haza una mayor soberanía del pueblu asturianu, p’asina construyir una educación pública, llaica, de calidá, de baldre, y verdaderamente al serviciu del pueblu trabayador asturianu. Y cola soberanía, debemos caminar tamién haza’l socialismu, l’únicu sistema col que toos y toes vamos consiguir plenu ya igual accesu a esa enseñanza que queremos y desiximos. Sólo col socialismu vamos a evitar la mercantilización.

Por too ello, dende Darréu creyemos que tola mocedá asturiana tien que lluchar cada díi, nos sos centros d’estudiu, na cai, y en toos aquellos espacios afayaízos pa consiguir un meyor futuru pa la xuventú asturiana, non sólo na educación, sinon tamién una vegada que mos incorporemos al ámbitu llaboral.

LA LLUCHA YE’L CAMÍN DE LA MOCEDÁ OBRERA

PUXA ASTURIES LLIBRE Y SOCIALISTA

 

FONTE: www.darreu.org

Conceyu Abiertu refuga la práutica del Fracking n'Asturies

Conceyu Abiertu asoleyó un comunicáu amosando'l so refugu a nivel nacional escontra'l Fracking, téunica pa la gueta de gas qu'emplega sustancies tóxiques y canceríxenes, amás de provocar un impautu y dañu mediuambiental pergrande, según les esperiencies desendolcaes nos Estaos Xuníos.

Pa Conceyu Abiertu "La resquiebra hidráulica produz un impautu que nun ye almisible dende’l puntu de vista ecolóxicu y mediuambiental, y amás d’ello, si mos treslladamos a custiones puramente económiques, tamién ye una práutica refugable dafechu, al nun ser más qu’una operación na que’l beneficiu van a sacalu una serie de sociedaes pertenecientes a empreses multinacionales privaes, que nin van a xenerar actividá económico nin puestos de trabayu, polo que xunío al impautu mediuambiental, el pueblu asturianu debe refugar una actividá que mos agrede a tolos niveles".

Nesa llinia, afiten que "vemos necesaria la movilización a nivel d’Asturies, dao que’l Fracking afeuta a dellos conceyos del país, polo que ye imprescindible, d’un lláu, consiguir la concenciación de la sociedá sobre esta llaceriosa actividá, y d’otru lláu, un compromisu de les instituciones municipales, autonómiques, y si ye preciso estatales, pa que nun permitan el desendolcu de la resquiebra hidráulica nel nuesu territoriu".

En consecuencia, despliquen que "dende Conceyu Abiertu yá presentamos en Villaviciosa una instancia p’algamar el refugu unánime de les fuercies con representación nel Ayuntamientu, y siguiremos trabayando nesa doble vertiente de presión a les instituciones, y aición na cai pa concenciar y movilizar a la sociedá al traviés de distintes aniciatives y actividaes".

Pa finar manifiesten que "Tamién ye importante la unidá de los axentes sociales, ecoloxistes, políticos y sindicales p’algamar la suficiente fuerza que permita l’aición en comuña pa defender el nuesu mediu natural", y que "tamos trabayando pa dar una rempuesta afayaíza ante esti problema de tolos y toles asturianes".

FONTE: Infoasturies

Entrevista a Xose A. González, militante de Darréu, nel Día de la Mocedá Revolucionario'12

Con motivu de la cellebración del Día de la Mocedá Revolucionario 2012 el pasáu sábadu nel parque uvieín de San Pedro los Arcos, dende InfoAsturies falamos con Xose A. González, militante de la organización de mocedá independentista y revolucionario Darréu, organizadora de los actos del DMR en conmemoración y vindicación de la revolución asturiana d'Ochobre'l 34.

FONTE: Infoasturies.net

Conceyu Abiertu contra la práutica del "Fracking" n’Asturies

Dende Conceyu Abiertu tamos entamando la movilización a distintos niveles escontra’l “Fracking” o resquiebra hidráulica, una teúnica consiste en realizar una perforación vertical na tierra hasta algamar la capa del estratu, pa a continuación efectuar una perforación horizontal al traviés della. Dempués, incorpórense esplosivos pa provocar pequeñes francedures ya inyéctense miles de tonelaes d’agua a muncha presión, xunto con arena y aditivos químicos tóxicos (onde la mayoría les vegaes se desconoz el conteníu exautu d’estos químicos), ente los que s’empleguen benzenos, xilenos o cianuros, hasta llegar a unas 500 sustancies químiques, munches d’elles canceríxenes, mutaxenes, y con otres propiedaes mui emolecedores). Esti agua a presión france la roca lliberando’l gas que llueu, xunto col agua, l’arena y los aditivos tornen a la superficie.

 

La resquiebra hidráulica produz un impautu que nun ye almisible dende’l puntu de vista ecolóxicu y mediuambiental, y amás d’ello, si mos treslladamos a custiones puramente económiques, tamién ye una práutica refugable dafechu, al nun ser más qu’una operación na que’l beneficiu van a sacalu una serie de sociedaes pertenecientes a empreses multinacionales privaes, que nin van a xenerar actividá económico nin puestos de trabayu, polo que xunío al impautu mediuambiental, el pueblu asturianu debe refugar una actividá que mos agrede a tolos niveles.

 

Nesi sen, dende Conceyu Abiertu vemos necesaria la movilización a nivel d’Asturies, dao que’l Fracking afeuta a dellos conceyos del país, polo que ye imprescindible, d’un lláu, consiguir la concenciación de la sociedá sobre esta llaceriosa actividá, y d’otru lláu, un compromisu de les instituciones municipales, autonómiques, y si ye preciso estatales, pa que nun permitan el desendolcu de la resquiebra hidráulica nel nuesu territoriu.

 

Asina, dende Conceyu Abiertu yá presentamos en Villaviciosa una instancia p’algamar el refugu unánime de les fuercies con representación nel Ayuntamientu, y siguiremos trabayando nesa doble vertiente de presión a les instituciones, y aición na cai pa concenciar y movilizar a la sociedá al traviés de distintes aniciatives y actividaes.

 

Tamién ye importante la unidá de los axentes sociales, ecoloxistes, políticos y sindicales p’algamar la suficiente fuerza que permita l’aición en comuña pa defender el nuesu mediu natural.

Poro, dende Conceyu Abiertu refugamos a nivel nacional la resquiebra hidráulica, y como consecuencia tamos trabayando pa dar una rempuesta afayaíza ante esti problema de tolos y toles asturianes.

 

FONTE: www.conceyuabiertu.org