Marcha de los trabayadores de Vesuvius

El proximu xueves 18 de Xunu, los trabayaores de Vesuvius iniciarán una marcha dende Riañu hasta Uviéu.
Saldrán a les 08,30 hores dende la fabrica.

Sofitalos y xúnite a ellos!

Entrevista a Patrick Zimmerman

Xunu 12, 2009 por Pablo R. Alonso


Patrick Zimmerman (California, 1981) llegó a Asturies curiosamente’l pasáu 8 de setiembre cola intención de recoyer información pa la so tesis doctoral, que trata sobre’l nacionalismu asturianu dende la transición ("Domesticated Nationalism: Asturian Regionalism and Cultural Politics since the Spanish Transition, 1974-2008."). Hai unes selmanes esti doctorandu de la Universidá Carnegie Mellon de Pittsburgh abandonó'l nuesu país de vuelta pa los Estaos Uníos depués d’un trabayu de campu que lu llevó a entrevistase con bona parte de los protagonistes del asturianismu de los últimos trenta años. Unos meses nos que, por cierto, l’investigador norteamericanu tamién tuvo tiempu pa deprender el nuesu idioma.

Asturies.com quixo falar con Patrick Zimmerman enantes del so regresu pa que tresmitiera a los nuesos llectores la so visión del pasáu, presente y futuru del asturianismu.


La primer pregunta ye obvia ¿Qué lleva a un californianu a interesare por Asturies y el nacionalismu asturianu?

Hai tiempu que m’interesaben los nacionalismos n’España, los problemes no que cinca al Estáu de les autonomíes y la Transición. A partir d’ehí necesitaba garrar un exemplu de nacionalismu pa la mio tesis. En principiu pensé en Galicia o n’Asturies porque había menos coses escrites sobre dambos y nun soi tan presuntuosu como pa creer que podía aportar dalgo importante sobre los dos nacionalismos más estudiaos, el catalán y el vascu. Entós siguiendo los conseyos del mio director de tesis decidí enfocar el mio estudiu namás nún. Intereséme por Asturies por razones epistemolóxiques y tamién personales. Siempre quixera conocer los paisaxes y la gastronomía d’equí. Y nel planu epistemolóxicu interesábame saber lo que pasó y enforma lo que nun pasó: Por qué n’Asturies nun asocedió lo que n’otres partes.

Como diz l’asturianismu políticu nun ta prácticamente estudiáu, quiciás los trabayos más relevantes nesta estaya sean los de Pablo San Martín

Sí, Pablo San Martín ye l’investigador principal. Tamién hai un estudiu inéditu de Tino Brugos, del cuál editó un capítulu nel so llibru ”Conceyu Bable: venti años”, pero’l restu del so trabayu nun lo llei, y la verdá ye que prestaría abondo lleelu.

¿Con qué tesis partía sobre l’asturianismu? ¿Qué esperaba alcontrar?

Bueno, ya sabía qu’había una identidá destacada, una llingua propia, un movimientu obreru contestatariu y pensaba que diba topar más vinculación ente esi movimientu obreru y l’asturianismu. Había dalgún nexu, sobre too ente Andecha Astur y la Corriente Sindical d’Izquierda, más no personal que no organizativu, pero en CC.OO y UGT tan muncho menos interesaos nel asturianismu y eso sorprendióme.

Falando de desconexones, n’alguna entrevista anterior falaba usté de la desconexón qu’hai ente la masa de falantes de la llingua del país y l’asturianismu

Yo creo qu’a lo llargo de los trenta años hai pocos exemplos de xente que voten en razón de la llingua. N’algunos casos puede vese l’asturianu hasta como una prioridá pero non absoluta, y entós cuando la xente “pro-asturianista” vota failo por intereses más cercanos, como los venceyaos a la economía, o por razones ecolóxiques o temes sociales. Entós creo qu’eso esplica un poco les razones pa que’l nacionalismu tenga poco éxitu políticu mientres que tien bastantes éxitos nel ámbitu cultural, como ye que s’implantase na sociedá la percepción de que l’asturianu ye una llingua, ente otres coses polo ye, o la lliteratura que tien bastante éxitu.

¿Hai desconexón tamién ente si movimientu cultural que tien ciertu puxu y el feble movimientu políticu?

Na rellación ente dambos movimientos non, porque munches persones participen de dambos. Lo que faltó ye tomar ventaya de la popularidá de coses como la música asturiana en clave política, por exemplu. Ye obvio que Nuberu, Carlos Rubiera, Dixebra o Llan de Cubel son músicos y grupos abiertamente nacionalistes y la xente que compra los sos discos ye consciente d’ello. Lo que faltó nes formaciones polítiques nacionalistes ye’l saber como tomar ventaya d’ello. Hai más xente que compra esos discos que los que voten nacionalista.

Nel alderique sobre’l nacionalismu asturianu organizáu pola Tertulia Cultural “Pachín de Melás” y nel qu’usté participó xunto a Ignaciu Llope y José Luís Carmona, comentóse qu’hubo dos momentos claves na historia del asturianismu políticu. Ún foi na época de la Transición, especialmente nel añu 77 cola primera convocatoria democrática, y lo que pudo ser y nun foi con aquella Unidá Rexonalista, que podría haber algamao un escañu nel Parlamentu español si llega a realizase la proyectada xuntanza col Partido Socialista Popular y qu’a la fin nun se consiguió, quedando Unidá Rexonalista con 11.000 votos. ¿Esta foi la primer gran frustración del asturianismu?

Fue un momentu que causó bastante decepción y lo mas importante ye que causó tamién que muncha xente marchare pa casa, pa otros partíos más minoritarios o pa sectores más radicales. Nesti casu, con Unidá Rexonalista mostróse cuál yera’l númberu real d’asturianistes en términos de votos. Muncha xente comentó, y yo toi d’alcuerdu, que l’asturianismu políticu tenía más fuerza cuando naide sabía exactamente que fuerza electoral podía tener. Depués de los 11.000 famosos votos del añu 77 yá se supo. Y fueron pocos. Home, si hubiesen sumao los 42.000 del PSP nun yeren pocos. Pero naquellos años hai otru momentu clave: l’atracu al Banco Herrero. Foi un momentu que dio una publicidá increíblemente mala y que marcó, enforma nos primeros años de los 80 y que puede que siga marcando, la visión esterna que se tien del nacionalismu asturianu porque hai xente qu’iguala nacionalismu con ETA. Y el Banco Herrero dio un argumentu a esi pensamientu. Naquel socesu intervinieron xente rellacionada colos poli-milis (ETA p-m) qu’entraron nel Conceyu Nacionalista Astur al traviés del CAR (Comites d’Acción Revolucionaria) tres una votación interna nel CNA, a pesar que la mayoría del vieyu CNA, la so cúpula na que taben xente como Carmona o Dubardu Puente marcharen depués d’esa votación, les sigles del CNA quedaron venceyaes al socesu y eso influyó na percepción de la xente.

¿Durante estos trenta años l’asturianismu podría dicise que “pagó los platos rotos” de nacionalistes catalanes y vascos?

Había ciertu mimetismu, más de lo vasco que de lo catalán. Claramente l’asturianismu na percepción de la mayoría de los ciudadanos vincúlenlo a los demás nacionalismos del Estáu español. Sicasí l’asturianismu nun ta tanto “pagando los platos rotos” de vascos o catalanes, ye que ye un movimientu muncho más mozu que los otros o mesmamente que’l gallegu, nel sentíu de nacionalismu modernu. Si había una corriente rexonalista nos años 20 y 30 pero hai una ruptura absoluta ente esa corriente y lo que ñaz con Conceyu Bable en 1974. Ye más una cuestión de tiempu que de los “vecinos”.

L’otru momentu clave, más recién y quizás más traumáticu foi’l de Coalición Asturiana nel añu 1991. El nacionalismu entra finalmente nes instituciones por mor del pactu ente PAS y UNA, algamando Xuan Xosé Sánchez Vicente un escañu na Xunta Xeneral. Un acontecimientu que pudo significar l’espoxigue definitivu del asturianismu políticu pero que visto casi venti años depués paez que quedó en nada ¿Cómo valora esi momentu?

Como la cume d’un procesu desarrolláu a lo llargo de finales de los 80. Hai que dicir que na historia del asturianismu dende los 80 nunca hubo un solu partíu nacionalista. Nin siquiera nel 91 porque nesi momentu yá esistía Andecha. Sicasí, la xuntura d’Unidá Nacionalista Asturiana col Partíu Asturianista foi probablemente’l momentu de más unidá nel mundu nacionalista: había xente desde de centru-derecha hasta d’izquierdes. D’esa xuntura quedó fuera un sector más radical que formaría Andecha Astur y que quedó fuera por dos razones, nun fiase de Xuan Xosé Sánchez Vicente y por nun aliase con “burgueses”; había razones ideolóxiques y personales. Esos fueros los famosos 9 espulsaos, o que marcharon, de la UNA y que formaron Andecha Astur, por eso nunca hubo una unidá completa. Pero la gran masa de la xente nacionalista d’aquel momentu si formaron parte de Coalición Asturiana. Foi una oportunidá claramente perdida de consolidar un movimientu nacionalista. Depués nel 1995 el PAS en solitariu repitió l’escañu pero hai que conseñar que foi nel peor momentu electoral del PSOE, cuando’l Partido Popular ganó les elecciones autonómiques, la única vez que nun les ganara’l PSOE y eso influyó en que Xuan Xosé conservare l’escañu. Toi convencíu de que si PAS-UNA hubieren siguío en coalición la presencia del nacionalismu asturianu sería más visible y con resultaos electorales meyores que los del añu 1999, anque hai que dicir que nesi añu tampoco hubo una baxada grande de votos del PAS, llueu si la hubo, pero nesi añu perdióse l’escañu y perdióse la visibilidá.

¿Y como ve anguaño’l panorama del movimientu nacionalista asturianu?

Ta nel momentu más baxu. Nel planu cultural bastante activu. Agora tamos viviendo un momentu nel que los primeros escolinos que tuvieren asturianu yá son adultos, tan n’época universitaria o del primer empléu y hai que ver como van funcionar estes nueves xeneraciones. Tamién veo una xeneración asturianista “de la vieya guardia” un poco pesimista, non toos, pero que sienten más esi fracasu. Persones como Xuan Xosé Sánchez Vicente, Ignaciu Llope o Carmona tan bastante pesimistes, como pudimos ver nes intervenciones d’estos dos últimos na tertulia que mencionamos enantes.

Curiosamente hai un furacu demográficu que mencioné yá na tertulia porque hai pocos trentañeros asturianistes (anque realmente hai pocos trentañeros en xeneral n’Asturies) nun sé si porque marcharen hai años desilusionaos del asturianismu o simplemente ye que nun había.

A too ello hai qu’amestar que la idea d’unidá, d’unión, d’axuntar xente del asturianismu garróla en parte Izquierda Unida yá dende la década pasada con postures a favor de la oficialidá o la declaración de cooficialidá en conceyos gobernaos por ellos como Llangréu. Un averamientu al asturianismu que continua anguaño na figura de Valledor.

Un datu llamativu ye qu’ inicialmente titulaba la so tesis “El nacionalismu domesticáu” ¿Por qué esi términu?

Bueno, lo de domesticáu foi una hipótesis inicial según la cuál el PSOE consiguió domesticar un peligru inicial, un peligru pa ellos, la posibilidá d’otru País Vascu: hubo un momentu nos años 70 onde había la posibilidá de crear, bueno quizás otru País Vascu non, pero si otra Galicia. Sicasí, cuando llegué a Asturies ensiguida descarte esi títulu porque decatéme que la causa de la falta d’espoxigue del asturianismu tenia menos que ver con acciones d’arriba, del poder pa colos d’abaxo, que colos propios asturianistes. Nun quiero dicir tampoco que la situación del nacionalismu sía responsabilidá solo de los asturianistes. Dambos tienen responsabilidá.

Y agora’l títulu cambió a “nacionalismu frustráu” ¿Por qué?

Porque veolo nes cares de la xente: frustración, qu’amas foi una palabra que mencionaron polo menos ente un terciu y la metá de les persones qu’entrevisté pa la tesis ensin nenguna incitación o provocación pa dicila: salió espontáneamente. D’ehí’l cambéu.

¿Y cuál ye’l futuru del asturianismu?

Nun sé. Puede que dependa de la demografía. Cuando llegue otra xeneración habrá que ver si mantién la dinámica d’enfrentamientu ente los asturianistes. El futuru veolu positivu, pero a llargu plazu históricu. Dependerá tamién de factores como la normalización llingüística: yá hai un estándar, hai asturianu nes escueles, hai más de 20000 escolinos esti añu recibiendo clases d’asturianu y esto ye un éxitu claru. La normalización social ye lo más difícil. Sicasí, anguaño ye polémico dicir que l’asturianu nun ye una llingua, que ye un dialectu del castellán. Va 35 años dicilo yera normal. Fui mui sorprendente cuando Conceyu Bable dixo qu’equí había una llingua. Esta popularidá que tien la cultura propia, les señes d’identidá, indíquenme qu’entá queden votantes potenciales, pero hai que saber como atraelos.

Una última cuestión en rellación a lo qu’acaba de dicir ¿Falten líderes o referentes nel asturianismu?

Evidentemente los líderes tienen un rol nesti tipu d’histories pero yo creo que si’l movimientu asturianista s’estendiere na masa social surdiríen. Agora mesmo hai munchos líderes nos partíos que nun quieren ser políticos a xornada completa. Ellos creen muncho nel proyectu pero non pa ser, por exemplu, presidentes d’Asturies. Xuan Xosé Sánchez Vicente ye una escepción. Por exemplu na UNA, si preguntes a Llope si él quier ser diputáu probablemente diríate que non, porque él tien la so carrera profesional. Hai munchos más militantes que persones que quieran liderar esa masa militante. Lo mesmo pasa colos líderes d’Andecha Astur.



Estrayíu d'Asturies.com

Entamar l’alderique, construir alternatives

Yá pasó’l 7 de xunu y la resaca eleutoral vien mui dura pa toos aquellos que vivimos, pensamos y actuamos naguando por unes polítiques alternatives a les que’l circu mediáticu y la clase política mos quieren vender día sí y día tamién.

La finada campaña eleutoral bien pudo ser n’Asturies el guión d’una traxicomedia onde nun faltó de ná y sobraron demasiaes coses. Quiciabes nesti país préstanos abondo “La vida de Bryan” con eso del Frente Popular de Judea y el Frente Judaíco Popular, pero les comedies meyor dexales nel cine porque mos vienen enriba los thrillers psicolóxicos.

Los resultaos eleutorales fueron l’ensayu xeneral de lo que va llegar: mayor avance de les polítiques conservadores y neolliberales, retrocesu de los drechos de los trabayaores, más homexeneidá nel discursu dominante, desencantu social xeneral pa cola política, negación de les señes d’indentidá de los pueblos…. Toos somos conscientes d’ello; ye hora de dexar de caleyar a cuatro pates pa entamar a dar pasos eficaces que planteen una rempuesta madura al diluviu que mos vien enriba.

Munchos fueron los ciberalderiques plantegaos a lo llargu d’esta campaña sobre una obsesiva xuntanza. Munches les actuaciones qu’echaben per tierra eses reflexones. Pero al marxen del pasáu y mirado al futuru ye necesariu qu’esta resaca eleutoral mos lleve por nuevos caminos estratéxicos y d’actuación.

Partamos de los fechos y de la realidá. El pueblu y la izquierda asturiana nun ye mayoritariamente nacionalista. Poco sumaríen dos sigles si nun esiste una conciencia nacional ente la izquierda y la población. Pero más se podría facer si, adaptándonos a la realidá sociopolítica d’Asturies, sumárase la fuercia d’esi movimientu obreru asturianu combativu y los sos ámbitos d’aición; una izquierda crítica desencantada condenada tamién al “guetu” si nun toma otros caminos estratéxicos.

Siendo reales hai qu’añadir tamién qu’una completa unidá de les diferentes organizaciones que formen la denominada izquierda alternativa asturiana baxo una única sigla ye daqué que nun lo van compartir mayoritariamente nin organizaciones, nin militantes, nin votantes. En mayor o menor medida se tien un apreciu a unes sigles que representen una estratexa y un discursu políticu trabayáu durante años.

Entós, ¿Qué plantegar?

Si bien ye ciertu qu’esisten diferentes proyeutos políticos, tamién ye verdá qu’una serie de persones y sigles vienen compartiendo dende años atrás abondos espacios n’estremaes actividaes polítiques y sociales. Nestes movilizaciones nun solo coinciden organizaciones polítiques, sinon que converxen tamién movimientos sociales de toa triba: sindical, de mocedá, antirrepresivu, vecinal, antirracista, de reivindicación llingüística….

Milenta personalidaes y coleutivos vienen compartiendo espacios que reivindiquen unos mínimos asumidos pola mayor parte de la izquierda alternativa asturiana: denuncia del desmantelamientu y la emigración asturiana, construcción d’una sociedá más xusta e igualitaria col protagonismu de los trabayaores, defensa de la llingua e identidá asturiana, la democracia participativa, la soberanía de los pueblos, la igualdá ente sexos….

Los citaos son dalgunos exemplos d’una llarga llista de causes qu’axunten. Causes reivindicaes con mayor o menor protagonismu y con unes u otres estratexes, pero a la fin toos ellos puntos ideolóxicos compartidos polos diferentes ámbitos y que xeneren puntos d’alcuentru na so defensa.

Y digo yo… si más o menos podemos tar xuntos nuna manifestación, si tamos fartucos de que mos mexen dende enrriba, si creemos firmemente nunos ideales xustos pero que por falta de coordinación y errores estratéxicos nun lleguen a calar socialmente a niveles más amplios nin algamen representación institucional… ¿Por qué nun converxer toos nunes candidatures eleutorales en base a unos mínimos comunes?

Unes candidatures que garanticen la independencia e identidá propia de los proyeutos particulares de cada una de les sigles que la formen; qu’axunten a partíos políticos, movimientos sociales y xente a nivel individual en base a unos principios asumibles por toos y que nun causen exclusión ente les diferentes sensibilidaes de la izquierda.

En definitiva: unes candidatures d’unidá popular con una estratexa práutica y eficaz que despierte la ilusión y la confianza ente toles persones con ciertes aspiraciones sociales y polítiques en común, que nun signifiquen la desaparición de les ya existentes y estremaes sigles y coles que facer un trabayu responsable y diariu saliendo del “guetu”.

Propuestes constructives

La propuesta ta nel aire; la estratexa de creación y actuación a desendolcar. Ente les organizaciones relaciones de igual a igual, respetu y entendimiento mutuu pol bien común. De cara a la población asturiana conectar con ella a bas d’un trabayu constante y diariu de base: dende’l barriu, dende la cai, dende los conceyos.

Crear conciencia, sumar fuercies y xenerar confianza e ilusión na población. Tomar contautu cola xente con propuestes reales en base a los principios ideolóxicos comunes y llegar a unes instituciones que pueden non ser el fin p’algamar les nueses aspiraciones, pero sí un importante mediu por conquistar pa poder trabayar y construir alternatives.

Queden dos años de trabayu pa materializar esta propuesta. De la voluntá de les persones que formen les colectividaes y d’una actuación responsable en comuña depende demostrar que los enfrentamientos ente compañeros tan bien pal patiu del colexu, pero qu’asina políticamente el camín ye más duru, esclusivu y frustrante.

Sumar más que restar, construir más que destruir, espertar unes conciencies mui adormilaes, xenerar ilusión y trabayu más que frustración y desidia.

Entamemos un periodu de reflexón y alderique, planteguemos alternatives, construyámosles y trabayemos pa qu’un día se faigan realidá.

--------------------------------------------------------

* Xicu Ariza Fernández (Xixón, 1989)Criáu nel barriu d’El Natahoyo anguañu ta emigráu a Leioa (Bizkaia) onde fae estudios de Periodismu na UPV-EHU.Militante de diferentes organizaciones y movimientos sociales dende temprana mocedá ye tamién coordinador del mediu de comunicación musical FNAST.NET y músicu del grupu Falanoncaduca.

Mani obrera en Mieres, VIENRES 12 A LES 19:00

MANIFESTACIÓN DIA 12 DE JUNIO , A LAS 19:00 EN MIERES, CON SALIDA DESDE LA PLAZA DE LA PASERA (IGLESIA S. JUAN)

¡VAN TIRANOS ASTURIES ABAJO!

COLECTIVO DE TRABAJADORES DE LA CUENCA DEL CAUDAL

Los colectivos de trabajadores de la cuenca del Caudal convocamos una manifestación para protestar contra el cierre de empresas en las cuencas y en Asturias entera, contra la crisis y la precariedad.

Denunciamos el fracaso de la REINDUSTRIALIZACIÓN, que conlleva hundir aun más nuestra economía y AUMENTA EL PARO ESCANDALOSAMENTE.

¡¡EXIGIMOS A UNA SOLUCIÓN A LAS ADMINISTRACIONES, COMO RESPONSABLES DIRECTOS DE LA SITUACIÓN EN LA QUE NOS ENCONTRAMOS LOS TRABAJADORES Y EL RESTO DE CIUDADANOS DE ASTURIAS!!!

MANIFESTACIÓN DIA 12 DE JUNIO , A LAS 19:00 EN MIERES, CON SALIDA DESDE LA PLAZA DE LA PASERA (IGLESIA S. JUAN)

¡¡ACUDE POR TU FUTURO Y EL DE TUS HIJOS!!

Los ERE multiplíquense per 4 y los trabayadores afectaos per 9

N'Asturies rexistráronse 216 Espedientes de Regulación d'Emplegu (ERE) ente los meses de xineru y abril, qu'afectaron a un total de 3.393 trabayadores. De xineru a mayu de 2008 los ERE foron 4 veces menos y los trabayadores a los que-yos afectó 9 veces menos.

Nel mesmu periodu de 2008, rexistráronse 50 ERE y el númberu de trabayadores afectaos y afectaes foi de 370. Estes cifres suponen, según datos recoyíos pol ministeriu español de trabayu, que nesti 2009 multiplicáronse por 4 el númberu d'espedientes de regulación d'emplegu n'Asturiaes y por 9 el númberu de trabayadores afectaos por ellos.

Primeres impresiones del candidatu d'Andecha Astur Mariu Arbesú.

El candidatu d’Andecha Astur Mariu Arbesú valorando los resultaos elleutorales afirmó “qu’Asturies pierde porque ganen los de siempres, el PP y el PSOE, los mesmos que la tan fundiendo”.

Arbesú tuvo unes pallabres d’agradecimientu pa los militantes "pol enorme esfuerzu que ficieron los sos militantes y simpatizantes nesta campaña cuando yá llevamos 3 años siguios de elleiciones, y además nun momentu dificil pal nacionalismu d’izquierda."

El candidatu nacionaliegu considera que “nun son bonos resultaos los d’Andecha Astur en particular y nin, en xeneral, los del nacionalismu asturianu y los del conxuntu de fuerzes que se mueven elleutoralmente nel ámbetu de la izquierda n’Asturies, asina diose “un empate a cero” que nun beneficia a nadie y que mos invita a facer una reflexón en cuantes que faese evidente la necesidá d’avanzar políticamente haza taútiques de llucha basaes nun entamu de xunidá d’aición”

Finalmente Mario Arbesú recordó “qu’Andecha Astur apuesta por xenerar esos espacios xunitarios d’alderique y trabayu y nesi sen trabayaremos y contautaremos con toes aquelles organizaciones y coleutivos que seyan receptivos a esta táutica entamando por plantegar una gran campaña de denuncia de la situación de carencies democrátiques y de crisis permanente na que vive Asturies”

“Tinitón” inauguró’l muselón y el nuevu Hospital Universitariu Central.

Esta fin de selmana’l Tinitón Areces tuvo delles inauguraciones perimportantes dientro la campaña ellectoral: el superpuertu d’El Musel en Xixón el sábadu y el nuevu Hospital central n’Uviéu’l domingu. El presidentón tamién tuvo saldando a ciudadanos y ciudanes nel paséu de San Llorienzu esti sábadu.

Col maletín de los fondos europeos en mano presentóse Tinitón Areces nel actu d’inauguración d’El Muselón el sábado pela mañana. Ellí cellebróse un emotivu actu nel que nun faltó la tortiella y el vinu español. Tres cortar la cinta y degustar los productos, como manden los cánones, el presidentón paseó pel paséu de la playa del Arbeyal fotografiándose con grandes y pequeños y saludando a los presentes nun día tán soleyeru.

Siguiendo en campaña, Tinitón averóse tamién pel paséu de la playa de San Llorienzu pa saludar a los y les xixoneses y amuelar la so cercanía a la población. Pel centricu paséu Tinitón dióse autenticu bañu de multitudes.

Yá’l domingu, Tinitón madrugó pa participar n’otru perimportante actu ya inauguró’l carísimu nuevu Hospital Central Universitariu d’Asturies (HUCA). Tinitón xintó lo mesmo que’l día anterior (tortiella y vinu español) quedando bien fartucu. El gran detalle del presidentón foi’l devolve-yos el céntimu sanitariu a los vecinos y vecines que s’averaron a saludalu.

Andecha Astur entamó estos actos de denuncia y parodia dientro de la so campaña ellectoral.

Andecha Astur, Darréu y PCPE-Asturies denucien persecución política en Llangréu.

Esta mañana Andecha Astur, Darréu y PCPE-Asturies dieron una rueda prensa conxunta pa denunciar la persecución política corquestada que carecemos estes organizaciones nel Conceyu de Llangréu, gobernáu pol PSOE, dende va años y que se fai más dura entovía en campaña ellectoral.
Voceros de les organizaciones denunciaron les multes y sanciones que venimos suriendo, los correos amenazantes, l'acosu personal y amenaces a domiciliu a militantes, ensin escaecer la impunidá ya hipocresía de PSOE pa coles sos propies normes de "Llimpieza" .

Na rueda prensa que se desendolcó na Casa la Cultura de Sama desarroláronse estos conteníos nun comunicáu conxuntu que reproducimos darréu:

Les organizaciones polítiques Andecha Astur, Darréu y PCPE-Asturies, queremos manifestar públicamente lo que vien darréu:

1- Que dende fai varios años dambes organizaciones venimos sufriendo una orquestada persecución política por parte del Ayuntamientu de Llangréu, dirixíu por Esther Díaz y el PSOE.

2- Que dambes organizaciones fuimos inxustificadamente multaes pol Ayuntamientu de Llangréu en numberoses ocasiones. Tal inxusticia queda manifiesta nel fechu de que toles sanciones suprimiéronse nos tribunales de xusticia, teniendo’l Ayuntamientu que correr colos gastos xudiciales.

3- Que’l fechu de que’l PSOE utilice’l control del Ayuntamientu pa perseguir a les nueses organizaciones supón un enorme coste económicu pa les arques municipales, costes que dempués paguen coles perres de tolos ciudadanos.

4- Que la conceyalía de llimpieza, amparándose nes normatives pa Llangréu, pretende sancionar con fuertes multes a les nueses organizaciones por pegar cartelos y pegadielles nos mesmos llugares onde’l PSOE pega la so propaganda elleutoral, tal y comu amuesen una gran cantidá de semeyes realizaes en dellos llugares del conceyu.

5- Qu'en dengún momentu’l PSOE recibió denguna sanción económica por parte del Ayuntamientu, esistiendo un doble raseru a la hora d’interpretar les ordenances municipales.

6- Que, xusto enantes de les presentes elleiciones, l’ Ayuntamientu de Llangréu mos unvió un corréu amenazando con sanciones nel casu de poner la nuesa propaganda elleutoral fuera de los paneles destinaos a esi fin.

7- Que, curiosamente, dende que s’istaló fai varios años esta ordenanza sólo se-y concede espaciu nos paneles elleutorales y les faroles al PSOE, PP e IU, dexándonos a les demás muerganizaciones ensin denguna capacidá pa danos a conocer a los/es llangreanos/es.

8- Que, nes dos caberes elleiciones celebrades nel nuesu conceyu, diéronse impugnaciones en varies meses elleutorales al nun esistir les nueses papeletes nelles, torgando la posibilidá de que la xente pueda votanos. Estes impugnaciones enxamás tuvieron rempuesta.

9- Que dalgunos de los nuesos militantes sofrieron un acosu personal pol Ayuntamientu llangreanu recibiendo amenaces nos sos domicilios particulares sobro estos asuntos.

Por too ello, condenamos estes persecuciones antidemocrátiques y represores por parte del Ayuntamientu de Llangréu y del PSOE, xeres de les que se desprende una nidia intención por parte del gobiernu del conceyu d’aniquilar a toes aquelles muerganzaciones polítique que-yos resulten molestes emplegando pa ello'l control del aparatu municipal.

Llangréu, a 1 de xunu de 2009

Andecha Astur, Darréu, PCPE-Asturies

Dempués de la rueda prensa miembros d'Andecha Astur y del PCPE-Asturies entamaron a pegar nos paneles ellectorales carelos de denuncia de l'ausencia d'espaciu que carecemos nos pocos y pequeños paneles oficiales pa facer campaña nos que se pue lleer ¿onde pegamos nós? ¿onde tal nuesu espaciu? y que roblen dambes orgnizaciones.

Actu conxuntu escontra la llei de partíos española

DARREU, Andecha Astur, Local Cambalache, Picu Rabicu, Cordinadora Antifacista d'Asturies, Sofitu, L'Arcu la Vieya, FUSOA y el grupu d'apoyu a Iniciativa Internacionalista entamaron ayeri una rueda prensa conxunta nos llocales de la Casa Sindical de Xixón pa denunciar la llei de partíos y la situación predemocrática que sofren los ciudadanos y ciudadanes d'esti estáu.

Textu íntegru de la rueda prensa conxunta:

Buenes tardes a toes y gracies por acudir a esta rueda de prensa que va consistir na llectura d’un comunicáu de denuncia de la Llei de Partíos, apoyáu por distintos colectivos y organizaciones sociales asturianes.

La sentencia del Tribunal Constitucional qu’anula la illegalización de la llista d’Iniciativa Internacionalista a les elecciones europees ye, ensin dulda nenguna, una buena noticia. A lo menos pa les persones que venimos esmoleciéndonos al ver cómo, nel nome de la llucha contra’l terrorismu, la Llei de Partíos da en ser ferramienta de represión de llibertá ideolóxica, pluralismu políticu y otros principios básicos más contemplaos nun Estáu de derechu. Agora’l peligru ye que los argumentos del TC busquen convertise n’espresión d’un nuevo sentíu común onde la Llei de Partíos “correctamente interpretada apaeza como un horizonte incuestionable que nun se pue perpasar”.

De magar la so promulgación en xunu del 2002, esta Llei -que se presentó como una norma astracta y xeneral, aplicable a cualesquier partíu- descubrióse desiguida como un instrumentu efectivu usáu por PSOE y PP (col silenciu o la complicidá de los más de los partíos) pa facer callar cualesquier opción electoral de partíos políticos venceyaos de dalguna manera a la izquierda abertzale. L’intentu d’illegalización d’II supunxo la primer vez l’usu de la Llei de Partíos fuera del ámbitu específicu d’Euskal Herria, yá que s’aplicaba a una coalición electoral ensin candidatos vascos y promovida por dos partíos d’ámbitu castellanu, que la so llegalidá naide nun cuestionaba.

Les iniciatives xurídiques desarrollaes al amparu del PSOE y el PP, y que tienen al ministru Rubalcaba como impulsor principal, manifiesten el tresfondu partidista d’ésta y otres lleis, mesmo que la nula división ente los poderes político y xudicial.

Del testu constitucional deduzse a les clares que l’únicu límite que la Constitución impón al derechu d’asociación ye’l penal, ello ye, pa esti casu, qu’un partíu políticu busque fines o use medios delictivos. La Llei de Partíos s’extralimita, poro, del ámbitu constitucional; la indeterminación cola que defín lo que son conductes ilícites promueve pa detrás l’arbitrariedá na so aplicación. D’esta manera, cola conocida teoría del entornu criminalízase de manera sistemática cualesquier iniciativa, yá sía dende los movimientos sociales como ye’l casu de les procesaes nel macrosumariu 18/98; o dende los partíos políticos. Asina les coses, listes “contaminaes” por candidatos más menos rellacionaos col “entornu abertzale” contaminen a otres listes (non sólo n’Euskadi, tamién n’Asturies) que al empar contaminaben a otres y asina nuna socesión imparable d’illegalizaciones que son consecuencia de decisiones polítiques que busquen impedir la participación de quien ocupen un determináu espaciu ideolóxicu.

Poro, les organizaciones presentes queremos denunciar la Llei de Partíos y esixir la so derogación, yá que se caracteriza por atacar y restrinxir los derechos básicos d’asociación, participación y espresión.

Pretenden desaloxar el CSOA La ReFLEXón.

Somos los trasgos que habiten les cases abandonaes, la propiedá privada ye un robu, lo de nueso.. arte de maxa'.

Nel autu remitíu güei pol Xulgáu d’Instrucción Nº4 de Xixón a un solidariu, identificáu nuna de les razzies llevaes a cabo pola Policía Nacional, la xueza afita les 12 hores del vienres, 5 de Xunu, como plazu llímite pa proceder al desaloxu "voluntariu o forzosu". Lo fae escudándose en que’l Códigu Penal protexe el 'gocie y esfrute'(sic) de la propiedá, aún tando ésta nun claru estáu d’abandonu, estremu que ye negáu pol propietariu, Construcciones Llorente, S.L.


'El fechizu tá en facelo too coles tus propies manes, convirtiendo cuatro muries n’espacios lliberaos'


Dende l’asamblea del CSOA La ReFLEXón entrugámonos qué gocie y qué esfrute puede esistir nun espaciu abandonáu, onde les goteres, la suciedá, la vexetación y la fauna yéren los auténticos dueños de lo que nel su día foi una fábrica de colchones. Ésta foi zarrada trés d’un ERE fae más de 10 años, abriendo la posibilidá a Construcciones Llorente d’especular col terrenu, manteniendo l’edificiu vacíu a la espera d’una recalificación que ensin dulda-yos xenerará xugosos ingresos. La nuesa presencia molesta a éstos vampiros del trabayu ayenu que aspiren a hipotecar la vida de les persones pa siguir acumulando euros na su cuenta corriente, una noble causa que ye defendía con enfotu pola Xusticia y la Policía.

"Una casa okupada ye una casa encantada, cuando haiga un desaloxu, apaecemos n’otra"

Por ello, convocámosvos el xueves, 4 de Xunu, a les 18.00h, en La ReFLEXón, no que sedrá una rueda de prensa pública siguía d’una fiesta solidaria y combativa.

Si la ReFLEXón ye un delitu, ¡puxa la delincuencia!.

¡Que florezan n’Asturies diez, cien, mil centros sociales espropiados al mesmu Capital que roba les nueses vides!.

¡Nun vais a ser quién pa con nos!

Fer ganó'l recursu

Dende Sofitu asoleyen la noticia del fin del procesu escontra'l militante independentista. El fiscal nun recurrió la sentencia, pero enfotose en recurrir el so non ingresu na carcele, dexuru dempués de presiones de la F$A.

Poro, al nun haber ya posibilidá de recursu dalu, fina’l que foi otru xuiciu farsa mas n’esti estáu d’esceición que ye expaña, onde les noticies nos medios oficiales escribeles la brigada d’información y Antonio Trevín y onde’l linchamientu mediaticu ye afalao poles grandes empreses llamáes "medios de comunicación".

Güei fina l'encierru en Naval Xixón.

Dempúes de convocar asamblea los prexubilaos del sector naval encierru nel astilleru xixonés tomaron la decisión de finar col encierru dempués de que'l comité d'empresa presentara por fin les certificaciones de les pólices de seguros y d'ingresos bancarios.

Tres 21 dies los trabayadores saldrán de l'astilleru a les 19:00 hores dempués de que la empresa garantizara les demandes de los trabayadores.

Alredor de mediu centenar de prexubilaos enzarrárnse va 21 díes, tomaron el control de trés de las cuatru grúes y protagonizaron protestes. Los enzarraos tienen previsto dexar les instalaciones esta tarde dempués de retirar les barricaes nes cais llendantes al astilleru.

Arbesú: "somos nosotros los y les asturianes los que tenemos qu’asumir l'esfuerzu de sacar a esti país alantre"

Dientro de los actos del XII Día d’Andecha, la organización nacionaliega entamó l’actu políticu nel polideprotivu de L’Atalaya que foi’l primer acti importante na campaña ellectoral d’Andecha Astur. L’actu presentólu Daniel Cueli ya intervinieron Marcos Menéndez de la organización xuvenil Darréu, Iván Martínez voceru d’Andecha Astur Ribeseya y Mario Arbesú candidatu d'Andecha Astur a les elleiciones Europées 2009 del prósimu 7 de xunu.

Daniel Cueli presentó l’actu y na introducción desplicó’l sentíu del Día d’Andecha como recuerdu de la declaración de Soberanía del 25 mayu de 1808 y como’l día de la organización. Cueli, na so introiducción, fexo mención al cambeu xeneracional nes responsabilidaes de la organización y homenaxeó a los qu’entamaron va 18 años col proyectu políticu que representa Andecha. Daniel Cueli desplicó tamién el por qué de facer esti añu el Día d’Andecha nel oriente d’Asturies, “Asturies ye tol país y non namás el centru, Andecha Astur tien un proyeutu nacional p’Asturies, pa toa Asturies” y en Ribeseya en particular “ye un reconocimientu de la organización al bon trabayu desendolcáu pol Conceyu d’Andecha demientres estos años y a la militancia nel oriente d’Asturies” desplicó.

Marcos Menéndez treslladó la felicitación de Darréu a Andecha Astur pola cellebración d’una nueva edición del Día d’Andecha, enviando un mensaxe a la mocedá asturiana a participar nel proyeutu políticu que representen Andecha y Darréu. Dende la organización xuvenil independentista pidióse’l votu p’Andecha Astur, “organización que siempres apostó pola mocedá y siempres tien presentes les dificultaes que pasamos los mozos y moces d’esti país”.

Iván Martínez, voceru d’Andecha Astur en Ribeseya, centró la so intervención, sobre too, na política ribeseyana y nel trabayu desendolcáu por Andecha Astur nel Conceyu “Andecha Astur lleva más de 15 años lluchando por difender los verdaderos intereses de Ribeseya, que nun son otros que los intereses de la so xente y vamos siguir faciéndolo” afitó Martínez faciendo tamién delles propuestes municipales.

Sobre temes más xenerales y les propies elleiciones, Iván Martínez remembró que “dende Andecha Astur, volvemos a poner enriba la mesa’l nuesu proyeutu políticu pa Ribeseya y p’Asturies”. Un proyeutu, desplicó, basáu “na xusticia social, con unos servicios sociales públicos y de calidá, con cobertura a tola población que lo demande y onde’l trabayu nun seya un privilexu sinon un auténticu drechu” y un proyeutu “que respete y sofite los seutores tradicionales como la pesca y la agricultura, esencia mesma de Ribeseya y d’Asturies y ensin los que nun podríamos entender esti país, siendo esta además, la meyor forma de fomentar l’ecoloxismu y la defensa de nuestros espacios naturales”. Martínez sorrayó la necesidá de que “seya’l pueblu’l protagonista como lo foi n’otres époques agora escaecies y silenciaes” y fexo un llamáu “a la participación de la sociedá nesti proyeutu abiertu y tresparente, qu’además quier siguir aportando a la sociedá”.

El mitín zarrólu Mario Arbesú, candidatu d’Andecha Astur a les elleiciones europées zarró. El candidatu fexo un repasu a esta última llexislatura europea y el trabayu desendolcáu por Andecha Astur.

“Cola collaboración de Bernad Joan y de Mikel Irujo llevemos dellos temes ente estremaos muerganismos de la Xunión Europea y pudimos posicionamos sobre delles problemátiques asturianes comu les autopistes llétriques Lada Velilla y Soto-Penagos, la ZALIA de Xixón, l’ampliación del puertu del Musel o el conflictu llingüísticu…” desplicó Arbesú amestando que recibieron en Bruselles a dixebraes delegaciones d’Andecha y a grupos de vecinos implicaos en lluches vecinales” y que los dos tuvieron n’Asturies”en delles visites organizaes por Andecha Astur.

“Estos años sirvieron pa poner a preba la nuesa capacidá pa les rellaciones internacionales, asina Andecha Astur xunto con EA y ERC foi de les formaciones más actives dientro d’Europa de los Pueblos” concluyó’l candidatu nacionaliegu sorrayando “qu’Andecha supo aprofitar la so oportunidá nestos años”.

Mario Arbesú desplicó tamién por qué Andecha Astur se presenta en solitariu nestes elleiciones europées. “Estos años foron provechosos pero pa estes elleiciones europees la composición d’Europa de los Pueblos camudó enforma cola entrada del BNG. Pesia lo perconocio de les dificiles rellaciones ente Andecha y el BNG, por razones que toos conocemos, Andecha negoció direutamente llegando a un nivel d’entendimientu ‘suficiente’ “, esclarió’l candidatu d’Andecha. Arbesú foi claru “Nun foi culpa del BNG, foron otros, y hai que dicilo nidio, porque tien que sabese”, sorrayó Arbesú, “foron d’Asturies los que interfirieron, escontra de los intereses asturianos pa qu’Andecha nun se presentare cola coalición” y los que nos “punxeron nuna situación mui comprometida dientru la coalición”. “Desgastáronse tratando de convencer de qu’Andecha tenía impedida llegalmente la posibilidá de presentase a les elleiciones. Cuestión qu’evidentemente ye falsa” pero énte la dulda xenerada, dixó Mario Arbesú, Andecha decidió retirase de la coalición y dir en solitariu.

Arbesú nun escaeció criticar la criminalización sufrida por tol nacionalismu asturianu estes selmanes pasaes. “¿Cómo se pue tener tantu mieu a la democracia?”. Entrugó. “Nun se si tendrán mieu que saquemos mas d’un eurodiputáu” dixo con chancia.

El candidatu d'Andecha quixo dexar enriba la mesa una propuesta de xunida “Independientemente del resultáu qu’algamemos el 7 de xunu”. “Si lo tenemos claro” dixó “al día siguiente de les elleiciones de xunu vamos llevar una propuesta a la sociedá asturiana, a toos aquellos seutores que quieran asumila, asociaciones, coleutivos, sindicatos y partios politicos asturianos que tean fartos de les carencies democrátiques que carecemos n’Asturies, que ten fartos de la crisis socio-economica permanente na que vive Asturies, que tean fartos de los Felgueroso, de los Trevín, de los Areces, de los Valledor”. Con un únicu llema “SOS Asturies” que “tenemos que llevar a tolos requexos d’Asturies” Cada organización “podrá asumir el llema tendiendo a la so interpretación de la rialidá asturiana y utilizando’l so llogotipu, pero toos y toes baxo’l mesmu llema” sorrayó’l candidatu d’Andecha Astur al Parllamentu Européu.

Arbesú desplicó que ye una llamada de SOS “que tenemos que facer necesariamente porque Asturies cuerre’l riesgu de desaparecer, somos la nación mas avieyada d’europa, con menos natalidá, con elleváu indiz d’emigración, el paisaxe ta amenazáu y la llingua nun ye oficial y pue desaparecer. Anturies ta en pelligru de muerte” dexando claro que “naide va a atender la llamada d’ausiliu dende fuera, somos nosotros los y les asturianes los que tenemos qu’asumir el esfuerzu de sacar a esti país alantre”. Arbesú afitó que se va sacar alantre’l “de la única forma posible: decidiendo por nós mesmos, independizándonos, faciendonos dueños del nuesu destín como trabayadores y como Asturianos”.
L’actu políticu finó cola interpretación de “La Flor del Agua”, l’himnu nacional d’Asturies.

Andecha Astur cellebró'l so día en Ribeseya

Andecha Astur cellebró esti sábadu 23 el XII Día d’Andecha nel conceyu Ribeseya qu'esti añu convirtióse nel primer actu ellectoral de la organización ncionaliega. Una xornada enllena d’actos nos que participaron unes doscientes persones. Ribeseya foi engalonada pa la ocasión, con pancartas vindicatives y llogotipos d’Andecha Astur abondo en faroles de la villa. Los actos entamaron pela mañana onde los más atrevíos y atrevíes descendieron el Seya pese a les previsiones de mal tiempu. Les 15 canoes que formaben l’actividá ficieron el descensu y los y les participantes xintaron demientres la travesía de delles hores na qu’hebo tiempo pa la vindicación medioambiental, el deporte y l’entretenimientu. Pela tarde, foi’l momentu del taller de cuatreada y la partía bolos. El veteranu xugador y entrenador llocal José Manuel el de Nocéu foi l’encargáu d’impartir el taller a los y les participantes na actividá, mayoritariamente mocedá, del conceyu y llegaos d’otres partes del país. L’actividá estendióse un par d’hores y nella vindicóse un mayor puxu pa los deportes tradicionales asturianos.

Col polideportivu de l’Atalaya, sede del actu central del Día d’Andecha, preparáu pa la ocasión. Col escenariu d’Andecha montáu, les meses, el chigre… salió’l Pasucais con gaiteros pel centru de Ribseya. Más de mediu centernar de persones acompangaron a los músicos con banderes d’Asturies y d’Andecha peles casi de la villa demientres más de media hora de trayectu. El pasucais volvió al Polideportivu de l’Atalaya onde y la xente yá taba tomando unos culinos de sidra y charrando tranquilamente con música del país. Una actuación de los músicos dientro del polideportivu finó’l pasucais.

A les 21:30 hores entamó la espicha con música del país y a les 22:00 hores entamó l’actu políticu que presentó Daniel Cueli y nel que participaron de Marcos Menéndez de Darréu, Iván Martánez d’Andecha Astur Ribeseya y Mario Arbesú candiodatu a les elleiciones Europées 2009. L’actu políticu finó cola interpretación de “La Flor del Agua”, l’himnu nacional d’Asturies.

Tres el mitín erntamó’l tiempo pa la música con especial protagonismu de músicos de la fastera. El conciertu entamó col Folk de “Pa musquis”, grupu llocal con componentes d’otres bandes como Corquiéu. Dempués con Taranus, con miembros tamién del oriente d’Asturies, entamaron los soníos más elléutricos col so dark Folk. El grupu mozu “Trueba” punxo’l so rock y los yá más veteranos “Agua cero” zarraron el conciertu y el XII día d’Andecha.

25 de mayu de 1808-15 de mayu de 2009.

201 años dempués pasamos de crear los nuesos propios muerganismos soberanos a tener un estatutu de tercera que paez tar fechu dende Madrí. La solución ye siguir lluchando pola soberanía nacional d'esta vieya nación europea.

Una voz que nel altor surdió
amiya fasta la mar
va espardiendo con arrechu son
qu'Asturies alienda entá

Manes xúntense y fain de so
en comuña un mesmu naguar
esti pueblu nun s'escaeció,
¡nel agua la flor ñacerá!
¡nel agua la flor ñacerá!

Eses ñubes prietes d'intención,
torgáronte cuantayá

pero agora va riscar el sol
nun tornarán enxamas.

Nel camín vamos dixebrar
la llaceria del to coral
un camín que s'afitara

¡p'algamar la to llibertá!
¡p'algamar la to llibertá!

Entamó la campaña ellectoral

Los partíos asturianos entamaron la campaña ellectoral n'Asturies

Entamó la campaña ellectoral a les 00:00 hores de güei y desendolcaráse los prósimos 15 díes. Les trés organizaciones asturianes que tán pesentes nestes elleiciones, Andecha Astur, UNA y Bloque por Asturies, participen de forma distinta nos comicios.

Mientres Andecha y UNA presenten candidatura en solitario, el Bloque intégrase con IU na coalición "La izquierda" de la ue tamién formen parte Inicativa per Cataluña o Izquierda republicana.

Andecha Astur emplega pa esta campaña los llemas "Y tu... vas quedar paráu?" y Asturies [r]esiste, mientres qu'UNA escoyó "Da-y voz a Asturies". La candidatura na que s'integra Bloque por Asturies utiliza "Ante la crisis:movilízate por tus derechos".

Como ye sabío nin PAS nin URAS presentaron candidatura nin s'integraron en dengna coalición.

XII Día d'Andecha, en Ribeseya

Andecha Astur cellebra un añu más el "Día d'Andecha" actu que la organización nacionaliega vien faciendo dende va años, llegando esti añu a la XII edición que tendrá como sede Ribeseya.

Un día enllenu d'actividaes na zona de L'Atalaya en Ribeseya con bolos, espicha, mitín, conciertu,...en conmemoración de la declaración de soberanía del 25 de mayu de 1808.

El programa d'actividaes del XII Día d'Andecha entama yá pela mañana con un descensu del Seya vindicativu. Pela tarde, partía de bolos y taller de cuatreada, pasucais peles cais de Ribeseya, espicha, mitín y conciertu.

Nel mitín van participar Mario Arbesú, candidatu d'Andecha Atur a les elleiciones europées, Ivan Martínez d'Andecha Astur Ribeseya y Marcos Menéndez pola organización xuveil Darréu.

El conciertu, d'entrada llibre, axunta folk, rock y punk colos grupos "Pa Musquis" y "Taranus" col folk, "Trueba" col rock y 2Agua cero" col punk.

Cuatro poetes agresivos y asturianos na "1ª Folixa Nacional" de Fai! esti 23 de mayu en Xixón

Cuatro poetes agresivos y asturianos na "1ª Folixa Nacional" de Fai! esti 23 de mayu en Xixón
Xandru Fernández, Sergio Gutiérrez Camblor, Xabel Vegas y Carlos Suari van ser los cuatro poetes asturianos que lleven los sos versos como arma esti sábadu a les 17.30 hores nel CSOA La ReFLEXón, nel marcu de la xornada reivindicativa que Fai! entama pa recuperar una de les feches más significatives pa la historia d'Asturies, la declaración de soberanía d'Asturies en 1808.



POETES AGRESIVOS

(disparen les sos obres contra los que se duermen)



La I Folixa Nacional "Asturies enxamás vencida" presenta l'alcuentru lliterariu "Poetes agresivos (disparen les sos obres contra los que se duermen)", un foru onde cuatro poetes de les lletres asturianes van presentar parte de les sos obres. Creaciones que comparten un momentu y un llugar nel mundu, y que de xuru van dar espaciu pa la reflexón poética y social fecha n'Asturies. Una oportunidá pa la interconexón de sensibilidaes que, cola poesía como arma, disparen intimismu, violencia o ironía contra una socieda anestesiada.

Xandru Fernández ye una de les voces más rescamplantes de la lliteratura asturiana, igual en narrativa qu'en poesía. De la so collecha más postrera destaquen "Servidume", que-y valiera'l premiu Xuan María Acebal en 2000 y "Les vides incompletes", llibru col que repetía premiu la seronda pasada, franciendo bien francíu un silenciu poéticu d'ocho años.

Sergio Gutiérrez Camblor asoleyó'l poemariu "A dixo a B: perversu" cola editorial Trabe y tien ganaos los premios de poesía Constantino Cabal y Elvira Castañón. Amás participó na organización de la Entamada07, un solmenón poéticu con epicentru en Siero.

Xabel Vegas, músicu conocíu pola so trayectoria mesmo en solitariu que col grupu Manta Ray, tien en "Pupiles d'Alfiler" el so campu base pa la creación lliteraria. Esti poemariu electrónicu ye la meyor opción pa lleer parte de la so última creación en forma de poemes y videopoemes.

Carlos Suari acaba de publicar "Orbayu d'alfileres", un volume onde selecciona tola so poesía que nun punxera en papel. Amás de coescribir "Treslallende" va un par d'años, nel cibernéticu "El mio cachu tírolu" yá xuntara dalgunos poemes qu'agora resurden.

Estos "Poetes agresivos" van disparar les sos obres contra los que se duerman, dende les cinco y media la tarde d'esti sábadu 23 nel CSOA La Reflexón de Xixón, dientro del programa de la primer Folixa Nacional "Asturies enxamás vencida" entamada por Fai! y que s'allargará con un mural reivindicativu y un conciertu tola tarde-nueche.

Nuevos enfrentamientos en Naval Xixón

Güei a les 19:00 hores ta convocada un concentración de sofitu a los trabayadores enzarraos.

Ayeri finaben los trés díes de tregua que los enzarraos dieron pa poder llegar a una solución negociada. Al nun cambiar la situación los enzarraos volvieron a les movilizaciones ayeri que la policia intentó torgar cargando con material antidisturbios lo que fexo qu'hubiere incidentes demientre la mañana d'ayeri.

Con too ello, güei martes a les 19:00 hores ta convocada una nueva concentración en solidariedá colos trabayadores énte l'astilleru en Xixón.

EL FISCAL RECURRE LA SOSPENSIÓN DE CONDERGA DE FER

Dende Sofitu- muerganismu antirrepresivu popular- dieron anuncia de la decisión, "cuanto menos increyible", del Fiscal del casu del independenista asturianu Fernando G.R de recurrir la so sospensión de conderga.

Pa Sofitu, "que nel so dia nun recurriese la sentencia (10 meses) fae esta decisión inda mas sorprendente" porque según el coleutiu antirrepresivu "tres pasar, de la que lu detuvierón, más de trés meses na cárcele y quedando-y por cumplir seyes meses y mediu ye dificil que'l xuez acepte la so entrada' prisión".

Dende'l muerganimu antirrepresivu popular camienten qu'esta decisión respuende "a presiones dende Asturies yá que nun esperaben una sentencia tán favorable a Fer que llogró desmontar tola riestra mentires qu'ellaboró la brigada d'información de Xixón xunta con Antonio Trevín".