Darréu a la mocedá asturiano.

El PSOE intentó torgar el DMR'09 nun permitiendo cellebralu nel Conceyu de Llangréu

Dende la organización de mocedá revolucionario DARREU queremos dar a conocer la represión y les torgues que dende fai unos meses venimos sufriendo dende parte del Ayuntamientu de Llangréu, y de los d’otros conceyos, de cara a organizar el Día de Mocedá Revolucionario 2009 DMR’09, qu’esti añu amás coincide col 75 aniversariu de la revolución obrera de 1934.

Queremos informar a tola mocedá asturiano de la situación que mos fixo pasar l’Ayuntamientu de Llangréu nestes feches, chando p’atrás un proyeutu y un eventu que nos últimos 3 años venía cellebrandose en Llangréu, con un ésitu inegable y ensin dengún tipu de problema. Somos conscientes que parte d’esti ésitu movilizaor y organizativu ye’l que fixo al PSOE reprimir esti eventu.


El PSOE ye’l culpable de reprimir y torgar esti actu nel so conceyu, yá qu’esi día se-y da a la mocedá la oportunidá de salir a la cai y glayar y espresar los sos problemes y los sos esmolecimientos. Asina, el PSOE de Llangréu, encabezáu por Esther Diaz trata de torgar el DMR’09 nel so conceyu, sabiendo que la grandisima parte de los esmolecimientos y problemes de lxs xóvenes llangreanos y asturianos son culpa del so partíu, de lo qu’ellos representen, y nun xestu d’intolerancia política corten de raigañu esti eventu vindicativu y festivu, cola fin de tapecer les sos vergoñes.

Estes torgues crean na nuesa militancia un desgaste terrible, xusto lo qu’ellos busquen. Un desgaste qu’impida a la xuventú esmolecía dar el pasu a la movilización. La estratexa del PSOE, cola collaboración de policía y d’otres siegles del ayuntamientu nun foi otra que la represión. Pa entamar, un silenciu alministrativu alloriante, que dempués convirtiose en la ñegación de cualesquier permisu, y l’amenaza y cohación finalmente.

L’Ayuntamientu que diz representar a tolxs llangreanxs ñega’l permisu a Darréu de facer una serie d’actos que movilizaron a cientos y cientes de mozos y moces. Movilización qu’actos entamaos dende la alministración llocal raramente, o nunca algamaron tantu nivel de movilización como’l DMR. Nun hai otru motivu más que’l políticu y el mieu políticu pa que l’Ayuntamientu llangreanu recurra a torganos el DMR’09 nel conceyu y recurra a la represión. Represión que día a día medra nel conceyu y n’Asturies con más formes de xixilancia en direutu y con multes y más multes. Represión qu’intentó facer muncho dañu a Darréu ya intentó facer que’l DMR’09 nun se cellebrara.

Pero non, esti desgaste organizativu que sofrió Darréu nun ye mayor que’l de les ganes de sacar el proyeutu p’alantre. Del de les ganes de llucha, y asina, anque nun onde mos prestaría, Darréu va tornar a salir a la cai a espresar los esmolecimientos de la mocedá asturiano, Darréu va tornar a organizar el Día de la Mocedá Revolucionario, y va tornar a remenbrar lo que pasó nesti pais fai 75 años.

Curiosamente’l PSOE ye’l mesmu partíu que en Mieres va participar nunes xornaes sobre la revolución, y ye’l mesmu partiu que si que da permisu a otru eventu sobre’l 34 en Mieres , pero cola izquierda oficial ya interclasista na mesa. Esi ye’l PSOE, y el so doble raseru, la so doble cara. Nun ye lo mesmu’l DMR, de calter popular, qu’otros actos, onde va a sacar rentabilidá política y llavar la imaxen. Esta ye la falsedá de la FSA-PSOE, d’Esther Diaz, Trevín o Vicente Alvarez Areces. Estos son los caciques que mos gobiernen y esta ye la mena tan rastrera d’intentar desmovilizar a los mozos y moces que nin puen trabayar na so tierra, nin tan siquiera pensar y esmolecese cola situación a esti pasu.

Nin que dicir tien de les torgues n’otros conceyos d’Asturies a Darréu cola fin d’organizar el DMR’09, pero ye la ñegación del executivu llangreanu la que más mos esmolez.

Asina, más que nunca, pedimos a la mocedá asturiano salir a la cai los díes 9 y 10 d’ochobre en Xixón. Pedimos a la mocedá que-y de un güelpe al PSOE. Que-y amuese la so indignación y demuestre que con tolos pilancos que’l poder mos ponga nun van dexar que nós mos demos por vencíos, que callemos, que demos la batalla por perdía.

Nun van algamar qu’escaezcamos los nuesos raigaños revolucionarios, qu’escaezcamos el nuesu pasáu de llucha, y que dexemos de lluchar güei por intentar facer lo mesmu que los nuesos antepasáos fai 75 años: Finar con esti sistema d’esplotación del home sobre l’home. Finar col capitalismu y algamar el poder popular.

¡ PUXA’L DÍA DE LA MOCEDÁ REVOLUCIONARIO !

¡ PUXA OCHOBRE’L 34 !

¡ PUXA ASTURIES LLIBRE Y SOCIALISTA ¡

Darréu pidirá la llibertá de los sindicalistes xixoneses Candido y Morala nel DMR'09

Darréu pidirá la llibertá de los sindicalistes xixoneses nel DMR'09

Ente la nueva fase del procesu xudicial escontra los compañeros de CSI Candido y Morala dende DARREU queremos volver a asoleyar la nuesa solidaridá pa con ellos y denunciar el papel que xueguen PSOE ya IU. Dende DARREU queremos animar a la mocedá a participar activamente en cuantes movilizaciones se den en solidaridá colos sindicalistes represaliaos.

Dende DARREU queremos facer un llamáu a la participación nes convocatories d'esta selmana en solidariedá con Candido y Morala, que son les que vienen darréu: Martes 6 d'ochobre va ser na Plaza l'Ayuntmaientu a les 19:00 hores y el miércoles 7 d'ochobre a les 10.00 hores nos Xulgaos de Poniente.

DARREU nun va escaecer la vindicación de llibertá de Candido y Morala nos actos qu'entama con motivu del Día de la Mocedá Revolucionario 2009, los prósimos díes 9 y 10 d'ochobre en Xixón, sobremanera nel manifestamientu peles cais de Xixón y nel VIII Conciertu "Asturies nun escaez".

CANDIDO Y MORALA ¡ LLIBERTÁ !

Regalu de cd d'Adizión Etílika nel DMR'09.

Les primeres doscientes persones que merquen una consumición nel eventu van tener un discu de regalu.

El próximu sábadu 10 nel VIII Conciertu "Asturies nun escaez", de conmemoración de la Revolución de 1934 y d'homenaxe a los y les revolucionaries, que se cellebra na Casa Sindical de Xixón van distribuyíse de baldre 200 discos del grupu "Adizión Etílika" por cortesía del grupu.

Más info: http://www.darreu.org

Vidiu promocional del Día de la Mocedá Revolucionario'09.

Vidiu promocional del DMR'09, entamáu por Darréu los díes 9 y 10 d'ochobre en Xixón. Esti añu'l DMR remenbra la revolución de 1934 nel so 75 aniversariu.

Movilizaciones contra l’encarcelamientu de los sindicalistes Candido y Morala

La Corriente Sindical d’Izquierda va facer delles movilizaciones escontra la intención del Gobiernu del PSOE, d’Antonio Trevín (Delegáu del Gobiernu) y del Ayuntamientu de Xixón, d’encarcelar a los sindicalistes de la CSI, Cándido Carnero y Juan Manuel Martínez Morala, en represalia pol so llabor en defensa de los puestos de trabayu del seutor naval.

Estes movilizaciones van ser:

Concentración pública: el martes, 6 d’ochobre de 2009 a les 19:00 h., na plaza l’Ayuntamientu de Xixón.

Concentración pública: el miércoles, 7 d’ochobre de 2009, a les 10:00 h., nos xulgaos de Poniente de Xixón.

Más información na web de la CSI.

fonte: Aruelu.

Darréu anuncia yá'l so mayor eventu anual. Ya solo queda una selmana y pocu pal DMR'09.

El Día de la Mocedá Revolucionario qu'organiza n'ochobre la organización política xuvenil Darréu, cellébrase esti añu en Xixón el vienres 9 y el sábadu 10 d'ochobre, día central nel que va tener llugar un manifestamientu peles cais de Xixón baxo'l llema "Mocedá nun te rindas. Llucha" y el VIII Conciertu "Asturies nun escaez". El vienres van ser delles les actividaes programaes en Xixón ente les que destaquen les xornaes internacionalistes, una charra-alderique y la presentación d'un documental fechu por Darréu.

Xixón ye la sede del DMR'09. Llangréu venia siendo séde nos últimos años de los actos conmemorativos pero esti añu l'Ayuntamientu de Llangréu nun permitió que l'eventu conmemorativu de la recolución de 1934 qu'organiza dende la mocedá.

El Día de la Mocedá Revolucionario 2009 entama'l vienres 9 d'ochobre con delles actividaes a partir de les 17:00 hores en Xixón. Na casa sindical van facese les xornaes internacionalistes, teatru, charra-alderique sobre la revolución y la proyeición del documental "Ochobre'l 34, memories d'un país" ´de produción propia de Darréu. ´La primer xornada del DMR'09 acaba con una espicha en L'Ayalga- Llar d'Andecha onde va acturar un grupu folk mozu.

El programa del DMR'09 completase cola xornada del sábadu 10, col manifestamientu y la octava edición del festival "Asturies nun escaez". El manifestamientu del Día de la Mocedá Revolucionario 2009 va ser en Xixón el prósimu 10 d'ochobre con salida na Plaza l'Humedal a les 19:00 hores. El llema escoyío pa esti añu ye "Mocedá nun te rindas. Llucha". Al acabu va facese'l mural conmemorativu 1934-2009.

El VIII Conciertu "Asturies nun escaez" va ser en Xixón el sábadu 10 d'ochobre a partir de les 21:00 hores. Taranuss, Adizión Etílika, Escuela de Odio, Kaotiko y Lehendakaris Muertos son los grupos qu'a la fin homenaxearán esti añu a los y les revolucionaries de la Revolución Asturiana de 1934 cuando se cumple'l 75 cabudañu. El preciu del conciertu va ser de 14 euros anticipáu, 17 en taquilla.

Puntos de venta d'entraes anticipaes:

Llaviana: Cervecería Bulldog
L´Entregu: La Yenda
Llangréu: Sidreria Alonso, Tom Malory, Totem Tattoo, B12, L´Aquelarre, L´Espumeru.
Xixón: Barucu, L´Ayalga, La estuera.
Noreña: Los Riegos, Llar d´Andecha.
Sieru: H2, Diañu.
Uvieu: Llibreria Paraxuga.
Mieres: Café-bar La Habana, El Monasterio, Shakes Beer.
Ribeseya: Chigre´l Corquieu.
Villaviciosa: La Bodega II

Vamos dexar de vivir
de gaita sidra y tambor,
de la Santina na cueva
y de castros baxo’l sol.


Óyense voces falando
de pueblos y llibertá,
de roses llorando espines,
de palombes y un riscar.


Xunto la fábrica encesa,
la mina prieta, la mar
y la secha ensin llabrar:
asperámoste pruyendo
por vivir pallabres vieyes
comu pueblu, home y llar.


Prúyemos un pueblu llibre:
que ñome cola xo voz
los sos collacios y el pan.
Prúyemos un pueblu llibre
y una Asturies dixebrá.

Andres Manuel Solar Santurio.

La Coordinadora Antifacista d'Asturies énte'l conciertu "Republicastur"

La coordinadora antifacista asoleya'l comunicáu que vien Darréu en relación col actu que va facese en Mieres:

"La hestoria ye nuesa y nun mos la roba naide. Pola memoria antifacista d’Ochobre 34
En 1934 el pueblu asturianu salió a la cai. L’oxetivu yera “promover y llevar a efectu la revolución social” (Pactu de l’alianza obrera ente UXT, FSA y CNT). Desendolcada dientro d’un procesu mas ampliu nel estáu español, onde la idea yera facer una fuelga xeneral, n’Asturies foi onde’l procesu sedría lleváu hasta les ultimes consecuencies convirtiendose nuna revolución. Na mañana del 5 d’Ochobre españa’l movimientu armau y poco depues declarase la “Republica de Obreros y Campesinos de Asturias” por parte del comite central revolucionariu. El gobiernu de la segunda republica ordenó marchar sobre Asturies a los xenerales Manuel Goded y Francisco Franco provocando una xabaz represión sobre los antifacistes. El 18 d’Ochobre dase por afogada la revolución y abolida la republica asturiana. Foi una esperiencia unica na que se demostro que comunistes, socialistes y anarquistes pueden trabayar xuntos.
Por too ello y ante la cellebración del conciertu Republicastur en Mieres el 17 d’Ochobre la CAA quier declarar lo que vién:

1º Consideramos un error imperdonable, cuando non malintencionáu, la cellebración d’un conciertu homenax a la republica española nuna fecha tan señalada pa los asturianos cuando, guste o non, foi la mesma republica la qu’aplastó la revolución asturiana .Inclusive la fecha, 17 d’Ochobre, paez cellebrar la caida del comite revolucionariu asturianu baxo’l xugu del exercitu español.
2º L’añu pasau esti mesmu conciertu foi organizado en Ribeseya en setiembre y como homenax a los combatientes defensores de la segunda republica. Vemos necesariu honrar a los que, ante’l golpe d’estáu fascista, dieron la so vida y llibertá pol pueblu pero non honrar a la que yera una republica baxo’l poder de la CEDA que mató a miles d’antifacistes . Pa nosotros, antifacistes asturianos, lo consideramos un insultu pa la nuesa memoria coleutiva.
3º Entrugamonos el porqué de la presencia de “personalidaes” como Ignacio Fdez. Toxo de CCOO, que nel so dia roblo’l zarru de Duro Felguera (yera’l secretariu xeneral del metal n’aquella domina y roblo’l despidu de los obreros), Javier Fernandez del PSOE, , Laire Pajín , Candido Mendez d’UXT . Y nos asombra la increible capacidá pa organizar un conciertu con grupos con caché como Barricada y Boicot con una entrada gratuita. Too esto nun mos fae mas qu’entender que la financiación y los espacios pa cellebrar los actos lleguen vía PSOE na so continua estratexa d’alimentar al empar que domen el movimientu español pola tercera república a través d’asociaciones y partíos políticos que se presten a ello.
4º Que mientres esto asocede otres organizaciones alcuentrense con dificultáes por parte del ayuntamientu p’algamar los permisos pertienentes en La Felguera, curiosamente en manes del PSOE.
5º Que son munches les entrugues que mos asalten, y de les cuales, sabemos la rempuesta, pero qu’entendemos que cada persona tién de buscales por si mesmu.
¿Porqué en Mieres el mesmu añu que a otros intenten torgar facelo en La Felguera?¿D’onde sal el dineru pa la organización de tal eventu? ¿ Qu’intereses y organizaciones polítiques tan tres los organizadores? ¿Porque nun hai nin un solu colectivu políticu y sindical asturianu invitau a los actos? ¿Porque nun se fae mención dala a la República de Campesinos y Obreros d’Asturies y solo se fala de la II república? ¿Porque se vende esti actu como unu pola III republica? ¿Porque cuenten con tantes facilidaes pa cellebralo?
Con estes consideraciones, la Coordinadora Antifacista d’Asturies quier facer les siguientes propuestes:

1º La non participación nel mesmu a les organizaciones compañeres de llucha. Consideramos que nun se puede tar nos dos llaos de la barricada y un dia criticar a PSOE ya IX como culpables de la situación que sofrimos los asturianos y al dia siguiente acudir a un actu de parafernalia nel so favor o acusar al PSOE de tar tres la represión n’Asturies y sentase con ellos a glorificar la entrada a sangre y fueu escontra los antifacistes asturianos fai 75 años. Asina tamien-yos pedimos que faigan publica la so refuga a acudir a esti actu.
2º Llamamos a los nuesos militantes, simpatizantes y a tol que se diga antifacista a nun acudir al conciertu nin a nengún de los actos entamaos polos organizadores. Nun acudir a un actu presidíu pol oscurantismu que rodea’l PSOE ye un actu mas de coherencia. Un conciertu gratis nun val vender el nuesu alma y anque´l conciertu sía un éxitu, que lo sedrá, los verdaderos triunfadores de la cellebración d’esti acto sedrá’l PSOE y la so estratexa d’absorver y domesticar un movimientu con fuerte potencial tresformador al traviés de los sos tentáculos representaos n’organizaciones y asociaciones que sirven a los sos intereses.
3º Llamamos a los grupos, principalmente a los asturianos, Desakato, Skontra, Fe de Ratas y Sambre, asina como a Barricada y Boikot a nun tocar esi dia. Consideramos que grupos que se dicen comprometíos o, al menos, con una ideoloxía antifacista nun pueden facer el xuegu al PSOE y a los sos chiringuitos politicos n’Asturies.
4º Dende la Coordinadora Antifacista damos nuncia de la nuesa intención de cellebrar un Ochobre del 34 popular frente a esti Ochobre del 34 folkloricu ya institucionalizáu .Mientres a unes organizaciones nos sangren económicamente al traviés de multes y procesos xudiciales ( como ye’l casu del 35) a otros se-yos recompensa económicamente.
Pola nuesa dignidá!!! Puxa Asturies antifacista!!!

Coordinadora Antifacista d’Asturies"

II Conceyu abiertu del Ensame pola República Asturiana (ERA) la selmana próxima

El xueves de la selmana próxima, día 24, a les 19:00 en ''L'Arcu La Vieya'' (Uviéu) convócase a un segundu conceyu abiertu del Ensame pola República Asturiana (ERA) al envís d'afitar los actos a facer por mor de la celebración de los Premios Príncipe n'Asturies.

L'ERA quier convidar otra vegada a toles organizaciones interesaes, mesmo qu'a particulares, que tean identificaos colos valores republicanos asturianos a acudir.

¡República asturiana, socialista y soberana!

Manifiestu República Asturiana:

Les persones y coleutivos que roblamos esti ’Manifiestu’ queremos espresar lo que vien de siguío:

1) Asturies vive nuna situación antidemocrática dafechu, na que los valores republicanos y los derechos sociales y nacionales vienen siendo negaos y xabazmente reprimíos per parte del estáu español, formáu en Reinu.

2) Una de les espresiones sociales más significatives d'esti fechu ye la denomación institucional d'Asturies como "Principado", figura política impuesta a esti Pueblu qu'afala'l vasallaxe y el servilismu a una institución arcaica, elitista y antidemocrática cola qu'Asturies y les asturianes y asturianos nada ganamos nin tenemos nada que ver.

3) Oponémonos a cualquier tipu de réxime monárquicu, por ser ésti'l paradigma de la desigualdá social y la falta de derechos con impunidá llegal. Tampoco podemos escaecer que la designación del monarca español foi fecha durante’l franquismu, siendo ésti designáu y coronáu a deu directamente pol propiu dictador, ensin qu’entá viéremos enfotu dalu nesta institución predemocrática por pedir perdón tres cuarenta años de fascismu xenocida col beneplácitu del sistema llegal ''constitucional'' actual.

4) Denunciamos el compromisu col capitalismu xabaz, asesín de tolos pueblos del mundu, que remanez de la monarquía española, siendo esta garante de la defensa de les clases privilexaes y de la desigualdá económica, social y de derechos. Refugamos, tamién, les actitúes machistes, homófobes, represores y censores que surden dende la monarquía española, qu'afiten, una vegada más, el so orixe feudal y arcaicu, comportamientos mui estremaos a los que defendemos nosotres y nosotros.

5) Consideramos una humildación a Asturies la celebración de los ''Premios Príncipe de Asturias'', considerándolos una coartada pa ''llavar la cara'' internacionalmente a la monarquía, faciéndola pasar por institución moderna y que respeta la cultura, visión mui alloñada d'una, muncho más cercana a la realidá, de ''familia de vividores a sueldu de toes y toos'' que conocemos perbién y manipulando al traviés de los medios españolistes, al tiempu, la imaxe de la sociedá asturiana. Poro, nun podemos dexar de pidir la crítica pa los gallardonaos por estos ''premios de pandereta'', que faen el xuegu cómpliz a la monarquía española, nin dexar d'ablucar y protestar, tampoco, polos costes de les fartures ''reales'' a cargu de los nuestros impuestos –nestos tiempos de crisis– , asina como de la situación d'estáu y ocupación militar y policial ostentoria que nel nuestru país se xenera con cualaquier ''visita'' de los miembros d'esa familia ''real''.

6) Queremos afitar dende agora mesmo la necesidá d'articular y crear un movimientu republicanu asturianu que lluche pola lliberación d'esti país y refugue cualquier tipu d'opresión nacional y social, como la que constitúi la monarquía española y cualquier réxime monárquicu. Asina, namás entendemos un cambiu de modelu de país pa construyir una República Socialista asturiana onde los valores republicanos d'igualdá, llibertá, accesu a la cultura y llaicismu seyan los finxos que caltengan la nuestra llucha por una Asturies xusta y un mundu de pueblos llibres.

Los conceyos, pegoyos de cualesquier movimientu popular.

Lo visto esta fin de selmana nos Paisos Cataláns pón en manifiestu la importancia de los pueblos y conceyos na política a nivel nacional ya incluso estatal. La consulta popular dió como trunfador al " si " a la independencia. Con un 96,3 % el pueblu d'Arenys de Munt sofitó'l futuru dica la independencia. Agora, la iniciativa soberanista va ser siguía por otros tantos conceyos catalanes. Una fras diz que la casa nun hai de facela pel teyáu, y la verdá qu'esta iniciativa basa neso el so ésitu.

El casu d'Arenys de Munt ye un bon exemplu pa tolos movimientos que traten de ser populares y de mases p'algamar los sos oxetivos. Pa entamar a meter el mieu nel cuerpu a los que mos gobiernen. Ensín dulda son los conceyos los campos d'actuación que debería tener l'independentismu asturianu. El desendolcar campañes, creyar espacios políticos y sociales nes ciudáes, averar postures al restu vecinos, etc. Ye un bon camín p'averase al Pueblu Asturianu, de pueblu en pueblu, pocu a pocu creyando una texíu social que garre de mena sele pero efeutiva fuercia a nivel nacional. L'incidir nes polítiques llocales sedría un trunfu perimportante. Esta asinatura pendiente del movimientu de lliberación del nuesu pais tien qu'entamar a plantegase seriamente, porque ye de lo pocu que queda por inventar nesti pais de gaita y tambor. A ver si asina dexamos de ser un pais de gaita y tambor o non. Los conceyos onde más se trabaya y hai espacios sociales soberanistes suelen ser los que más voten independentista, pero hai qu'enfotase más n'ello. Nun perder un res del discursu, ensín chase p'atrás nos plantegamientos pero dexando de llau'l respetu ya insluso mieu que mete-y a dalgún atopase col aborregamientu xeneralizáu qu'hai. Mirar al pueblu de tú a tú y saliendo de la marxinalidá.

Ye más, ¿ Si los catalanes puen convocar una consulta popular que moviliza a tola prensa estatal, porque non podemos montar nós una consulta popular pola oficialidá ? ¿ Ye'l complexu d'inferioridá o'l mieu a dalgo ? ¿ Tan dificil sedría ? Ye un movimientu bastante masivo n'Asturies, que ganaría en cuasi tolos conceyos d'Asturies y pondría mui colloraos( y non por marxistes) a los perros de la FSA. Ye una idega, modesta, pero una más, lo que ta nidio ye qu'hai que tar más enriba los conceyos, para asina saber que ye lo que falla a nivel nacional, porque les coses o son dende abaxu o nun son.

Salú ya dixebra.

Finó'l míticu comandante de la Revolución Cubana Juan Almeida Bosque.

La Direición del Partíu Comunista y del Estáu comunicó al pueblu cubanu fai unos dies la noticia. Juan Almeida Bosque yera miembro del Partíu y Vicepresidente del Conseyu d'Estáu. Un paru cardio-respiratorio finó cola vida de só.

Almeida s'axuntó al Exércitu Rebaldu con Fidel y "los barbudos" participando siempres en primera llinia de combate. Dende ellí hasta güei entregó la so vida pola revolución y pola memoria guerrillera de los del M-26 J.

Nesti enllaz podeis lleer un reportaxe más estensu so la so vida nel diariu Granma:

http://www.granma.cu/espanol/2009/septiembre/sabado12/almeida.html

Que la tierra te seya leve compañeru.

Adhesión del Conceyu Mozu de Pravia la campaña SOS Asturies

Adhesión del Conceyu Mozu de Pravia la campaña SOS Asturies, el comunicáu asoleyáo perellí ye'l que vien darréu:

"Dende‘l Conceyu Mozu de Pravia, asamblea de mocedá d´esquierdes de la fastera de Pravia, facemos públicu la nuesa adhesión a la campaña xunitaria de SOS Asturies.

Pensamos que ya va siendo hora de trabayar en comuña escontra'l desaniciu cultural del nueso pueblu y escontra les consecuencies de la crisis capitalista, que tan llevando a Asturies al “paraisu” del paru y la represión. Un paraisu onde la mocedá ta llevando la peor parte, con una precariedá nel terren llaboral que supón retroceder 100 años nes conquistes de la clas obrera, onde l'aculturación y el dominiu sobro los medios de comunicación fae que namais conozcamos una parte de les coses (la que-yos convien) n'esta falsa
democracia.

Creyemos que namais na unidá pué algamase un cambeu real que permita que'l pueblu trabayaor asturianu fraye les sos cadenes y algame la so llibertá."

Cientos de persones manifestáronse n’Uviéu baxo’l llema “SOS Asturies”

Convocaos por Andecha Astur, PCPE-Asturies, Corriente Sindical d’Izquierda, Darréu, los Coleutivos de mocedaes Comunistes, la Cordinadora Antifacista d’Asturies, Partíu Carlista d’Asturies y una bona riestra d’entidaes culturales, delles cientos de persones manifestáronse n’Uviéu polos drechos sociales y políticos del Pueblu Asturianu. Al acabu del manifestamientu, un actu políticu presentó la campaña “SOS Asturies”.

Pasaes la una y venti de la tarde salía de la Estación del Norte d’Uviéu l’unicu manifestamientu convocáu pa esti 8 setiembre, Día de la Nación Asturiana. Como novedá d’esti añu dióse la fórmula de convocatoria individual, nun mesmu sitiu y hora, lo que facilitó qu’organizaciones polítiques, sindicales y sociales convocaren y esti 8 setiembre se viere ún de los manifestamientos más númberosos de los últimos años. Los convocantes valoraron positivamente la esperiencia y espresaron el so deséu de siguir sumando al rodiu de SOS Asturies.

La estación del Norte taba a les 13:00 hores enllena de fuerces antidisturbios. MªEulalia García, de la executiva d’UNA, intentó que se prohibiere’l tradicional manifestamientu en base a defectos de forma na petición y alegando que l’actu podría trayer “alteraciones del orde públicu y pelligru pa persones o bienes”. Con too ello, l’actu trescurrió ensin dengún tipu d’incidente baxo una descomanada presencia policial demientes tol recorríu. El manifestamientu percorrió’l centru d’Uviéu y el so cascu históricu, allertando de la dura situación que vive Asturies, estrozada social, cultural y economicamente y puxando polos drechos sociales y políticos del pueblu asturianu. La marcha finó nel Parque del Campillín onde hebo l’actu políticu de presentación de la campaña “SOS Asturies”.

L’actu políticu corrió a cargu de dos mozos que desplicaron l’enfotu de la campaña SOS Asturies de xunir esfuercios y denunciar la destruición exolóxica, social, cultural, llaboral,.. d’Asturies. Tres presentar la campaña abierta, debuxaron la situación, al traviés de la llectura de delles noticies recientes, a cada titular un mozu o una moza diba xubiendo al escenariu con una lletra hasta acabar l’actu col llema xunitariu “SOS Asturies” formáu. La interpretación a gaita de “La Flor del Agua” zarró l’actu políticu que dio pasu a una espicha.

fonte y semeya: Infoasturies

Comunicáu de Sofitu ente los últimos acontecimientos.

Dende'l Muerganu Antirrepresivu Popular Sofitu queremos denunciar l'acosu a dos mozos el pasau xueves cola unica sida de ser independentistes. L'usu que fae l'estau español de la brigada d'información ye una preba mas de del facismu encubiertu que s'escuende tres el nomau estáu de drechu. Les amenaces, les xixilancies illegales, los interrogatorios y demas nun pueden aparar el camín d'esti pueblu hacia la llibertá y llamamos al pueblu asturianu a nun rendise a les amenaces y xuegu puercu al que mos tién avezaos l'estaú español.

No referente a la manifestación del prosimu 8 Setiembre queremos denunciar l'actitú de un grupo de ex-militantes de Andecha Astur que pidio la so anulación acusando a los manifestantes de violentos y de los posibles altercaos. Per mal camín vamos si los asturianos tenemos qu'escudanos na xusticia española y xugar coles sos normes pa solucionar los nuesos problemes, y muncho mas, si-yos facemos el xuegu de la criminalización a los movimientos sociales.

Puxa Asturies Llibre y Socialista!!!

S.O.S. ASTURIES

Una veintena d'organizaciones llamen a manifesáse l'ochu setiembre n'Uviéu baxo'l llema SOS Asturies y anuncien la creación d'un espaciu de xunidá d'aición.

Con una rueda prensa nos llocales de la CSI na Casa Sindical de Xixón una veintena de organizaciones polítiques sindicales y sociales anunciaron la so voluntá d’aniciar "un procesu d’alderique conxuntu al rodiu la necesidá de xenerar un espaciu de xunidá d’aición plantegando únicamente’l lema SOS ASTURIES como puntu d’aniciu" y teniendo en cuenta dende’l entamu "la soberanía de les presones y muerganizaciones que quieran participar, respetando la so propia perceición de la rialidá y los sos analís políticos entendiendo que sacantenes les presones y partios políticos responsables de la situación llaceriosa na que s’afaya Asturies (FSA-PSOE, IU-LV-BA y PP), la propuesta ye abierta dafechu".

L'unicu condicionante que planteguen ye'l de "compartir esta necesidá de trabayu xunitariu en defensa de los drechos personales y coleutivos del Pueblu Asturianu.

Con too ello, les organizaciones que roblen esta declaración convoquen a la sociedá asturiana a manifestase esti 8 de setiembre con un baberu principal compartíu baxo'l llema SOS ASTURIES y convocatoria individual de cada organización magar les 13 hores na Estación del Norte d'Uviéu. L'ocho setiembre va cellebráse un actu políticu de presentación de la nueva campaña y espaciu xunitariu SOS Asturies. Ente la veintena d'organizaciones atópense Andecha Astur, PCPE-Asturies, Corriente Sindical d'Izquierda (CSI), Coleutivu de Mocedaes Comunistes (CMC), Darréu, Cordinadora Antifacista d'Asturies, Partíu Carlista d'Asturies, Asociaciones xuveniles y culturales como N'AST, El Roblón, Bilortu, Atenéu Cultural Xuan María Acebal, Riscar Roxu, Ensame Sidreru, Remanecer, L'Ayalga, o la Fundación Asturies y la Fundación Obrera d'investigación y Cultura, ente otres.

Manifestamientu 8 setiembre SOS ASTURIES Uviéu Estación del Norte 13:00 hores.

Dos independentistes interrogaos pola brigada d'información de Xixón

Dos independentistes foron llevaos a la comisaria de la policia nacional española, ayeri pela mañana, pa ser interrogaos sobre la so militancia política n'organizaciones del movimientu independentista asturianu. Paez que ser independentista ye ser sospechosu.

Axentes de la brigada d'información de la policia española presentáronse en cassa de dos mozos independentistes asturianos. Güei pela mañana foron interrogaos en dependencies poliiciales por dellos axentes ensin razón oxetiva nin acusacióndenguna . L'oxetivu del interrogatoriu yera consiguir información sobre distintos proyeutos políticos y dexar claro que "cuando salgan de casa van tar xixilaos".

Los dos independentistes foron interrogaos hores sobre la so vinculaciónpersonal col movimientu independentista y sobre delles organizaciones, sobremanera sobre los coleutivos xuveniles, "acusádolos" de ser "capos" del independentismu y amuesándo-yos fotos d'ellos participando en manifestaciones llegales, como la manifestación en solidaridá colos sindicalistes Candido y Morala, ente otres.

Los dos mozos foron puestos en llibertá tres un llargu interrogatoriu sobre la militancia ya ideoloxía política de los independentistes y non ensin dexa-yos claro que tovieren "cuidao" porque diben "tar xiixilaos".

Los interrogatorios a mozos independentistes y antifacistes ta siendo dalgo avezao nos últimos tiempos, sobre too, nos territorios dependientes de la brigada d'información de Xixón. Los dispositivos policiales orientaos al control y acosu a la mocedá independentista son cada vuelta mayores y dexen series duldes sobre'l pernomáu "estáu del derechu" ya interrogantes series sobre drechos tán básicos como la llibertá de pensamientu.

fonte: Infoasturies.

Andecha Astur entama la campaña " Esto nun ye plan: 75.000 paraos".

Dende Andecha Astur tan acabantes de da-y anuncia a la so nueva campaña " Esto nun ye plan: 75.000 paraos". Con esta nueva iniciativa Andecha quier denunciar el nuevu Plan E que trata de dinamizar la economía frente la cris y la crisis que sofre'l pais.

Pa la organización independentista esti plan nun ye namai qu'un parche, que bien podía llamase "Plan Zapateru o Plan Tini". Denden Andecha caltienen "que'l Plan E ta valiendo pa que s'enriquezcan los de siempres y nun contribuye un res n'amenorgar el paru, la precariedá y la cris económica permanente na que vivimos".

la organización política señala amás el despilfarru que suponen estes valles que ta poniendo l'executivu español. Sorrayen qu'esti "Plan Español para el Estímulo de la Economía y del Empleo” solo afeutará positivamente n'entidáes bancaries y empreses de la construición.

A.A. amesta tamién que col dineru de toles valles llantáes n'Asturies "podría pagase un sueldu de 1200 euros a más de 100 trabayadorxs durante un añu".

Pa más información sobre esta nueva campaña de la organización política nacionaliega dende A.A. anuncien la direición na rede www.estonunyeplan.com

La XDLLA califica los diez años de presidencia d’Areces como un retrasu palos derechos llingüisticos

Pala xunta pola defensa de la llingua asturiana la situación xeneral del idioma foi de mal en peor, col perconocíu retrocesu nel númberu de falantes al cortase la tresmisión interxeneracional y la falta de derechos fundamentales de les persones qu’usen l’asturianu.

Dase’l casu "qu’asistimos, inclusive, a la persecución de l’Alministración a ciudadanos qu’escueyen llibremente la llingua asturiana pa la so vida normal" sorrayen dende la XDLLA.

Pala xunta "la política arecista, nesti tiempu, nun foi nunca a pasar de les declaraciones d’intenciones retóriques y vacíes, de les visiones de la llingua museístiques y acomplexaes. Too ello traxo como consecuencia unes actuaciones llingüístiques pa cubrir l’espediente, omitiendo les sos obligaciones y, munches veces, tomando decisiones, por acción o omisión, perxudiciales pal futuru del idioma. Nun se vio nenguna midida efectiva p’ameyorar la situación del asturianu nel sistema educativu (sigue la precariedá en tolos niveles), nos medios de comunicación (con una presencia marxinal nos medios públicos) y nos diferentes organismos de l’Alministración (qu’escaecen sistemáticamente lo necesario que ye la tresversalidá de les polítiques llingüístiques)".

L’avance producíu cola oficialización de la toponimia de dellos conceyos, exemplu de participación ciudadana y procuru técnicu, vese burlláu de contino pola falta sistemática de cumplimientu poles propies instancies del Principáu y poles entidaes vinculaes directamente a ésti (la Radiotelevisón del Principáu d’Asturies, Caxastur... ente otres).

Por eso, cuando ta acabando la triste y buxa etapa d’inoperacia política del arecismu, la XDLLA vien de pidir a les persones y partíos que nel futuru tengan responsabilidaes de gobiernu n’Asturies que tornen esta situación de desigualdá xurídica de la ciudadanía declarando la oficialidá de la llingua asturiana. De la mesma manera sorrayen "qu’habían ser quien a llibrase de les polítiques culturales inútiles y megalomaniátiques, y axeitar unes polítiques llingüístiques series, realistes y eficaces que permitan al idioma ganar falantes y espacios d’usu, asegurando asina’l so futuru".

fonte: Aruelu.

Entrevista a Mariu Arbesú, militante d'Andecha Astur.

Falemos con Mariu Arbesú, candidatu d'Andecha Astur nes últimes elleiciones europées sobre la propuesta de campaña de xunidá d'aición que ficiera en campaña.

Pasaron dellos meses dende aquella, foi nel Día d'Andecha nel aniciu de la campaña ellectoral y quiximos saber en que quedara aquella propuesta de SOS Asturies. Más cuando ta ehí yá l'ochu setiembre, Día de la Nación Asturiana.

Na campaña ellectoral prometisti que dempués de les elleiciones, fueren los que fueren los resultaos, dibes plantegar una propuesta de “xunidá d’aición” alredor del llema “SOS Asturies”. Entovía nun hai nada público. ¿Qué pasó dende entós?

Ye cierto que nun hai nada público pero, sin que lo ficieremos público, sí qu’hebio bastante movimientu. Concretamente foi nel actu políticu del Día d’Andecha en Ribeseya onde plantegué por primera vez la idea. Dixe espresamente que si n’Andecha lo teniemos claro intentaríamos facela lo mas abierta posible y llevala a aquellos seutores de la sociedá que tan fartos de les carencies democrátiques y de la crís permanente na que vive Asturies. La propuesta d’aquella taba mui verde: cenciellamente proponía, dientru la nuesa táutica de xunidá d’aición, una campaña baxo’l llema SOS Asturies. Dende entós a esta parte fuimos aldericando sobre’l tema pero nun sólo dientru d’Andecha Astur sinon que quiximos sacar l’alderique a fuera tamién. Presisamente un de los primeros pasos que dí dempués de les elleiciones foi falar d’esto con bastante xente que nun ye d’Andecha pero que venimos moviendonos o coincidiendo muncho casi siempres nos mesmos espacios. Posteriormente de forma yá formal treslladámosla a les organizaciones. Fae ya de esto algo menos d’un mes.

Vamos empincipiar polo primero, ¿Qué ye eso de la xunidá d’aición? ¿En que consiste la propuesta y a quién va dirixida?

Trátase de crear un espaciu de coincidencia pa trabayar a comuña con aquellos qu’asuman esta táutica ensin más condicionante que’l compartir esta necesidá de trabayu xunitariu en defensa de los drechos presonales y colleutivos del Pueblu Asturianu. Una de les primeres coses que tamos plantegando ye qu’esi espaciu sirva pa mantener una comunicación permanente, intercambiu d’información y alderique ente les organizaciones asina como organizar y coordinar aiciones o campañes comunes.

Daquién podría pensar, viendo’l funcionamientu de la política institucional ya institucionalista, que se quier facer dalgún tipu de coalición ellectoral o que respuende a estratexes ellectoralistes. ¿Ye asina?

Non. N’absolutu. Una de les coses que precisamente facilita más el que esta idea puea salir bien ye que nesti intre nun hai unes elleiciones a la vista. Sería radicalmente irreal plantegar nesti momentu una xuntanza elleutoral o daqué asemeyao. Lo que nós plantegamos ye entamar la casa polos cimientos. Xenerar un espaciu que permita dir conociendonos, ver cuales son les coincidencies y cuales les diferencies y a partir de les coses nes que coincidimos crear espacios de llucha y trabayu en comun pero partiendo siempres de la soberanía de les organizaciones y persones que quieran tirar por ello. La idea ye que les organizaciones continuen igualmente cola so actividá y la so dinamica propia y que dende esti espaciu se respete dafechu la so propia percepción de la rialidá y los sos analís políticos.

Vemos que nun ye dalgo zarrao y onde se respeta dafechu l’autonomía y soberanía d’organizaciones y persones. Si hai sectores que nun ven clara la iniciativa agora, ¿van poder amestase más alantre?

Sí, esi ye otru aspectu interesante de la propuesta d’Andecha Astur. Ye abierta y pretende ser un procesu llargu nel tiempu nel que habrá que dir incorporando a más sectores sociales, políticos, sindicales a esta táutica y concretamente a la campaña de SOS ASTURIES. Eso sí, entendiendo que, lloxicamente la propuesta ta dafechamente pesllada a aquelles presones y partíos políticos responsables d’esta situación como FSA-PSOE y IU-LV-BA.

Y.. ¿onde ta’l puntu d’aniciu?, ¿cómo se quier echar a andar esti marcu de xunidá d’aición?

La idea ye entamar con una campaña llarga nel tiempu baxo’l llema SOS Asturies. Ye un lema que podemos compartir toos y que habría que dotalu d’unos contenidos de denuncia. Concretamente nosotros pensamos n’articular la campaña baxo esi lema denunciando dos cuestiones: les carencies democratiques y la falta de drechos políticos que carecemos n’Asturies asina como la crisis permanente a la que nos somete la política económica colonial del estáu español pa col nuesu país. Ye dicir: dos o tres puntos de fondu políticu y un lema o llogotipu qu’identifique la campaña y que sería SOS Asturies. Sería una campaña ambiciosa quiciabes como nunca se vió n’Asturies.

Ta ehí l’ochu setiembre, el Día de la Nación Asturiana ¿pué haber novedaes esti añu?

Sí. Nós tresllademos a les organizaciones una propuesta el 9 d’agostu concretamente que consistía en entamar el 8 de setiembre con la campaña de SOS Asturies cellebrando un Manifestamientu conxuntu con motivu del Díi de la Nación Asturiana, baxo’l mencionáu lema, con baberu compartíu, convocatoria individual (de forma que ca muerganización puea da-y el matiz que camiente más afayaizu, dientru’l lema xeneral) y con comunicáu final conxuntu, en función de los alcuerdos que s’algamen.

Bono, entós paez que dalgo pue salir…

Sí. Esa ye la idea. Tamos viendo que nun toes les que mos prestaría. Agostu son siempres feches difíciles pa sacar alantre proyeutos d’esti tipu y eso ta repercutiendo bastante no despacio que va too. Hai espectatives de qu’esta selmana se concrete alguna cosa de cara al 8 de setiembre con algunes organizaciones. Vemos que dende los seutores más independentistes asumese mui bien la llinia que proponemos y dende les organizaciones mas tradicionales d’izquierda tamién. Ente muerganizaciones como Darréu, CSI o Pcpe además de otros coleutivos sociales y políticos la acoyida foi mui bona dientru, lloxicamente, de les dificultaes esperables. Por embargu, parezme que costará más implicar a los sectores del nacionalismu más moderáu. Por exemplu’l PAS y la UNA dempués de más de 15 dies cola propuesta sobre la mesa entá nun mos contestaron. En tou casu, sabemos que estes coses requieren paciencia y nós siguiremos esforzándonos nesti apueste xunitariu incorporando a esta táutica a más sectores políticos, sindicales, sociales, culturales, ecoloxistes…

Fonte: Infoasturies.