Razones p’apostatar

Somos un grupu de persones del Conceyu Siero que queremos esplicar la nuestra decisión d’apostatar. Educáronmos na tradición católica y, anque agora nun somos creyentes el nuestru grau de “descreimientu” nun ye uniforme: ateos, agnósticos, non practicantes... Hasta agora o bien nun mos plantegáremos l’apostasía o bien díbemos aplazándolo indefinidamente. Lo que mos emburrió definitivamente a dar el pasu d’exercer esti drechu ye la postura cada vez más belixerante de la cúpula y dirixentes de la Ilesia católica española. Les inxerencies n’asuntos políticos y sociales qu’esceden del ámbitu de la fe (personal o coleutiva) pa llevar a cuestionar decisiones democrátiques de representantes llegalmente escoyíos.

Caún de nós tien idees personales, opciones ideolóxiques y vivencies que puen añadir motivaciones particulares a la decisión de que se mos borre de los archivos de la Ilesia católica. Pero lo que mos xune nesti actu d’apostasía ye la necesidá que sentimos toos de nun mirar pa otru llau énte postures manipuladores, totalitaries y represores en temes como la homosexualidá, l’albuertu, el divorciu, l’anticoncepción, la educación. Conocemos a persones dientro de la organización (cures, feligreses...) que son exemplu de solidaridá y d’apoyu a xente desfavorecío y necesitao; respetamos y valoramos el so llabor, pero, nun compartiendo la so fe, pesa más na nuestra decisión la continua y omnipresente actividá de la xerarquía lluchando escontra avances sociales na llinia del respetu, la llaicidá y la convivencia intercultural. La nuestra conciencia nun mos permite que se mos cunte ente los cómplices de campañes qu’ataquen valores que mos paecen básicos nuna sociedá plural y que busquen la protección de sectores sociales sensibles y la construcción d’una sociedá basada na diversidá y el respetu mutuu.

Nun podemos ser nin un migayu cómplices nos insultos a los homosexuales, nes desinformaciones sobre l’anticoncepción, na manipulación educativa, na criminalización del albuertu, na discriminación de les muyeres, na marxinación d’otres creyencies, na imposición de métodos decisorios tiránicos, na financiación d’entidaes estremistes y ultraortodoxes, nel despreciu a la llingua asturiana, na permisividá a los abusos sexuales, nel ataque a la llaicidá, na imposición a tola sociedá de símbolos cristianos, na instrumentalización interesada del Estáu...

Firmen esti testu:

Xosé Firmu García Cosío

Miguel Ánxel Lago Santillán

Simón Blanco Llera

Policarpo Mencía Álvarez

Nel Anxelu Rodríguez Peláez

Llinu Álvarez Santidrián

Vidiu de la conferencia d'aznar d'esti xueves de la Coordinadora d'asamblees d'estudiantes de la Universidá d'Uviéu.

Darréu llama a la mocedá a siguir movilizándose escontra Aznar o cualisquier otra espresión de facismu español

Comunicáu de la organización de mocedá Darréu:

Esta mañana, na Universidá d’Uviéu cellebrose una conferencia impartida pol ultraderechista español Jose María Aznar. A la so llegada foi recibíu por estudiantes que-y dixeron coses comu que yera un facista, un asesín y un terrorista, ente otres. Paez ser que al señor Aznar nun-y presten les verdaes na so cara, yá que comportóse comu un faltosu llevantando’l deu corazón a los estudiantes, amosando la so gran educación, prepotencia y actitú chulesca. Actitudes toes elles que nun son más que faltes de respetu pa colos estudiantes.

Na conferencia impartida pol facista Aznar en dengún momentu se faló d’Asturies, de la crisis permanente na que s'atopa y n'especial la mocedá asturiano, de la realidá que sufrimos los/les asturianos/es anguañu, comu son: el paru, la emigración de la mocedá, la precariedá llaboral; por poner dalgunos exemplos. Sólu tuvo pallabres pa España y lo que ye meyor pa los españoles. Llegó a afirmar coses comu qu’el únicu sistema económicu válidu ye’l de tipu capitalista y que la integridá territorial del estáu ye incuestionable.

Y pa enriba tenemos qu’aguantar comu esta xente, xente que fala d’estáu de llibertaes y llibertá d’expresión comu l’alcalde d’Uviéu, Gabino de Lorenzo, desixe-y a Delegación de Gobiernu que tome medíes escontra los estudiantes. Que los identifique, detenga y ponga a disposición xudicial, pol cenciellu fechu d’espresar la so opinión y refuga a un provocador, a un facista español.

Nun debemos escaecer fechos represivos como los asocedíos l’añu pasáu nun mitin del PSOE en Llangréu onde interveníen Zapatero y su talante, y onde un asistente qu’intentó sacar un cartelu críticu, faciendo referencia a la crisis, fue sacáu pola fuercia y a golpes del actu. Y tan solu fai unes selmanes, nun actu del partíu UPyD onde participaba Rosa Díez na sede de La Nueva España, una militante d’Andecha Astur al intentar facé-y una entruga a esta ultraespañolista, fue sacada a la fuercia y detenida.

Yá tamos fartos de que líderes políticos d’esta calaña vengan al nuesu país a imponer les sos grandes idegues diseñaes dende Madrí que nun son válides pal pueblu asturianu. Somos nosotros lxs asturianxs los que podemos diseñar un modelu aplicable a la realidá y los problemes n’Asturies. Porque con esta lamentable forma d’actuar siguen amosando’l despreciu y la falta de respetu que tienen p’Asturies y pal pueblu asturianu.

Darréu llama a la mocedá a siguir movilizándose escontra Aznar o cualisquier otra espresión de facismu español

¡PUXA ASTURIES LLIBRE YA SOCIALISTA!


Estrayíu de la so páxina web: www.darreu.org

Vidiu d'Aznar, el criminal de guerra na Universidá d'Uviéu.

El criminal de guerra José María Aznar pasó güei por Uviéu.

El facista español Jose María Aznar pasó güei pela Universidá d'Uviéu a dar una conferencia. L'actu provocó delles aiciones de protesta que fueron rapidamente reprimies tantu dientru como fuera'l recintu universitariu. Lxs universitarixs que protestaben glayaron llemes como " Aznar, facista, tú yes el terrorista", " Aznar, asesín" o " Nun pasarán".



Otros universitarios acudieron a la so charra a echa-y en cara, y a la cara lo que fizo n'Irak. Estxs xóvenes nun tuvieron rempuesta del es-presidente y fueron llevaxs pola fuercia a golpes fuera l'aula. Aznar, amosando'l so egocentrismu dixo d'esto " que nun puen vivir ensín él", y otres vegaes callaba con actitú chulesca dafechu. Otru momentu pa remenbrar ye'l xestu de mala educación y faltosu qu'Aznar fizo cuando entraba na conferencia, xestu que foi inmortalizáu peles camares de la prensa y que dará dexuru la vuelta polos medios.

Demientres la so conferencia, organizada pola organización ultralliberal FAES y Nueves Xeneraciones nun fizo otra cosa más que criticar l'actuación y xestión de Zapatero( tamos toxs d'alcuerdo señor Aznar, si). Tamién defendió'l modelu capitalista y la " democracia " española.

Mentanto duró la conferencia nun dixo la pallabra Asturies en dengún momentu, namai que pa referise al tiempu y lo bella que ye...provincionalismu baratu de Casa Pepe si. En dengún intre faló de la situación política, social o económica d'Asturies. D'otra miente emplegó la pallabra España durante tola charra. Esto ye lo de siempres, lo que pinta " esta tierrina tan guapina" nel mapa español. Nada. Dende equí damos-y al señor Aznar un conseyu, que torne pa España, tantu que faló d'ella.

Dientru pocu prohibirán los bolos y les fabes...

Xixón va obligar a beber sidre en llugares acotaos y con tapón de plásticu o escanciadores lléctricos

Asturies sigui perdiendo, poco a poco, la so identidá. Y gracies a los mesmos de siempre. Xixón, el conceyu más pobláu del país, inclúi nel borrador de la so ordenanza nueva de terraces la prohibición d’escanciar sidre na cai. Namái va poder bebese na vía pública nes terraces autorizaes y con tapón de plásticu o escanciadores lléctricos, lo que llevaría a perder situaciones tan prestoses como dir a beber una botella sidre en Cimavilla na plaza d’Arturo Arias, más conocida como la d’El Llavaderu, o en cualisquier otru puntu de la ciudá.

Según reza’l borrador “namái pue escanciase sidre nes terraces autorizaes que tengan los sos correspondientes elementos de recoyida y proteición qu’impida tirar na vía pública los residuos derivaos del escanciáu y del consumu d’esta bebida”. L’anterior ordenanza, del 2002, tovía vixente, obliga a los hosteleros a facese cargu de la llimpieza del entornu de la sidrería o bar que rexenten. Agora, el gobiernu del PSOE y IX-BA-LV apuesta por llimitar el consumu de sidre con esta midida prohibicionista que va afectar a chigres, llagareros y consumidores por igual y que, de xuru, va tener repercusión nel turismu na ciudá, yá que la bebida nacional ye ún de los principales reclamos del país.

A cambio, los hosteleros de la ciudá van poder mantener les terraces n’usu los 365 díis del añu, y non como agora, que namái podíen instalase na cai n’époques determinaes, lo que va beneficiar a cafeteríes y bares. ¿Sedrá esto lo que nomen turismu de calidá? ‘Asturias con sal’. Y ensin sidre.

Concentración escontra'l paru y la precariedá en Xixón.

El Conceyu de paraos, paraes y precarios de Xixon ye una organización qu'abre un espaciu pa la reflexión y defensa de los intereses d'un coleutivu tan desigual como precisáu de voz propio, como son los paraos y los precarios.

Esti Conceyu llama a cellebrar esti sábadu 20 de febreru, a les 18:30 hores, nel paséu Begoña frente a Teatru Xovellanos. La concetración ta sofitada por delles organizaciones sindicales, polítiques y sociales.

En Xixón, con casi 28.000 paraos, faise necesario "conceyos que tapeza polos intereses de les persones ensin empléu o con empleos precarios, ye un ente nun solu pa la sociedá y el ámbitu de la izquierda sino fundamentalmente pa toos aquellos de nós que tamos ensin mas recursos que la desesperación y el mirar pa otru llau", espliquen en nota de prensa.



La concentración cellebrase "d'alcuerdu y simultaneamente" colos conceyos de tol Estáu y a ellla tan convidaes les organizaciones politiques d'esquierda, sindicatos y organizaciones cíviques y ciudadanes". Dene'l Conceyu fain llamamientu a participar "viviegamente a los trabayadores afectaos pola precariedá y el paru".


Dalgunes de les vindicaciones son "por un trabayu dignu pa toos ", "por una renta básica", "desbloquéu urxente del salariu societariu y extensión a los paraos mayores de 18 años" y pola gratuidá nos servicios municiapeles esenciales, agua, tersportes públicaos y actividaes culturales, deportives y sociales"



La concetración sofítenla. CSI, CGT, SUATEA, Andecha Astur, PCPE, PCA, UNA, FUSOA, Coordinadora Antifacista d'Asturies, CJC-CMC, JCA, RASH y Soldepaz.


Fonte: Infoasturies.

El facha español José María Aznar ofrez mañana una conferencia na Universidá d'Uviéu.

L'aula magna de la Facultá d'Económiques va acoyer mañana, xueves, a les 12:30 hores una conferencia a cargu de José María Aznar, presidente de FAES, ultraderechista y es-presidente del gobiernu del estáu. Esti mesmu presonaxe ye'l responsable de traxedies como las qu'asocedieron( ya inda güei siguen) n'Irak.

La conferecnia ta siendo anunciada por Nueves Xeneraciones, les mocedáes del Partiu Popular.

Fai! realizó una concentración énte la Casa Conceyu de Llanera

La movilización entamada pola organización d'esquierda soberanista llevó la reivindicación a les puertes de la Casa Conceyu de Llanera en Posada, sitiu nel que díes enantes y en varies ocasiones, fueren refugaos los permisos pal usu d'espacios públicos y vergoñosamente vulneraos los derechos llingüísticos de les asturianes y asturianos prohibiendo l'usu del idioma propiu nes comunicaciones cola alministración.

La concentración, qu'entamó a les 12.30, foi respaldada por más de cuarenta persones durante la hora llarga que tuvo llugar, col repartu de cientos de panfletos y énte'l ruíu de los chiflos que s'espardieron ente los presentes.

Demientres que tuvo llugar la protesta dellos medios de comunicación asturianos y del conceyu acudieron pa recoyer les declaraciones y les impresiones de los convocantes que, de primer mano y con fotocopies del documentu onde l'ayuntamientu obligaba a usar el "Castellano", conocieron la inxusta vulneración de derechos carecida, cola prohibición del emplegu de la llingua asturiana pa les comunicaciones cola alministración. Al tiempu, miles de ciudadanes y ciudadanos de Posada y Llugo de Llanera recibieron nel so buzón un panfletu nel que Fai! desplicaba pasu a pasu la discriminación que dellos de los sos militantes tuvieren que soportar nel conceyu gobernáu pol Partido Popular.

Fai! quier agradecer otra vuelta a tola riestra d'asociaciones cíviques, conseyos de la mocedá, organizaciones polítiques y persones del ámbitu de la esquierda, el soberanismu asturianu y el movimientu vecinal que se punxeron en contautu, al traviés d'una montonera de correos lletrónicos, mensaxes nes redes sociales o de manera personal, pa tresmitinos la so indignación énte los fechos y amosando la so solidariedá pa con cualquier violación de derechos llingüísticos asemeyada.

Valoración de la movilización:

Fai! valora como mui positiva l'actividá y esperiencies desendolcaes nestes últimes selmanes en Llanera.

D'una banda, consiguióse trabayar nún ámbetu xeográficu poco politizáu y mui permeable a la reivindicación de derechos identitarios (derechu al usu del idioma propiu) y tamién cívicos (derechu al bon tratu per parte de les alministraciones públiques). Nesti sen, la pegada d'un cientu de cartelos en Posada y Llugo -arrancaos poles brigaes de llimpieza ordenaes pa tal fin n'esclusiva- y, sobremanera, el buzonéu con 2.000 panfletos puerta a puerta de los principales núcleos de población del conceyu son un éxitu de por sí, reblagando les llendes de los medios de comunicación de mases y llegando a informar a la población del proceder neglixente de l'alministración del so conceyu.

Con too y con ello, destacamos l'acoyida que tuvo la movilización na prensa asturianista, en primer llugar, que-y dió en munchos casos una relevancia destacable a los fechos, sobremanera cola espublización del "documentu de la vergoña" oficial firmáu pola conceyala de Cultura y Muyer. Tampoco nun nos cai embaxo la probe pero real repercusión nos medios de comunicación asturianos en castellán (LNE, EC), lo que pa esta organización tamién supón el llevar la nuesa reivindicación a espacios menos avezaos.

Poro, depués d'unes selmanes de movilización y trabayu, Fai! nun va dexar pa prau esta reivindicación. Siguiremos puxando por consiguir que los espacios públicos de Llanera dexen de tar secuestraos pol equipu de gobiernu, pola llibertá d'espresión y escontra la represión llingüística que vien careciendo toa aquella y aquel que quiera espresase nel idioma del so pueblu.

Llanera, 15 de febreru de 2010

Más semeyes en www.fai-asturies.org

Artículu de Pepe Sánchez: ¿Quién paga la cris?

Ye un fechu oxetivu qu’esiste una fonda cris económica, o meyor, una fonda cris del sistema económicu nel que se sofita la sociedá d’anguañu, tantu la política, comu la cultura y les diferencies societaries.

Sí, hai una fonda cris económica, pero’l Bancu Santander asoleya los segundos meyores resultaos de la so hestoria y los demás bancos algamen grandes beneficios. Inclusu, coles perres de les arques públiques mercárense bancos nel estranxeru y fasta se permiten el luxu de facese cola escudería Ferrari. Pero créditos nun dan, por aquello de los morosos.

Sí, señores, tamos nel fondu la cris y los grandes empresarios ganen dalgún qu’otru millón menos y, al empar que señalen al culpable, los y les trabayadores, desixen reformes llaborales, despidu de baldre, mayor productividá y amenorgamientu los salarios, ello ye, trabayar más pa cobrar menos y ensin protestes, a la cai ensin idemnización.

El Gobiernu diz tener les igües: xubir l’ IVA y l’ IRPF , lo qu’apareya recortar los salarios netos direutos ya indireutos, xubir la edá xubilación, lo qu’apareya amenorgar les pensiones y torgar la entrada nel mercáu llaboral de la mocedá, amás d’esaniciar la pensión de viudedá, facilitar el despidu, lliquidar la negociación coleutiva y otres guapures asemeyaes.

Sí, en cris tamos y parez qu’a los qu’ha salvase ye a los bancos y a los grandes empresarios. Poro, ¿quién carez la cris y quien quieren que la pague?. Los ricos lloren, pero, bramente, carecémosla y pagámosla los y les de siempres, los y les trabayadores, los y les que tenemos un emplegu y los cuasique 5 millones de paraos y paraes, los y les que nun ficimos un res pa prevocar la situación d’anguañu nin pa que se mos castigue. D’esta mena, al 90% la población, que somos namás que trabayadores, sacrifícasenos, xunto col nuesu trabayu, el nuesu sueldu, los nuesos drechos y la nuesa vida, pa que la ínfima minoría siga enriqueciéndose más y más.

Sí, señores, les economíes de los y les trabayadores tan en cris, munches yá direutamente en quiebra. Y, enriba, los mesmos que mos echen al paru, desixen el cobru de les hipoteques ensin demora denguna.Toos y toes sabemos que la probitú xorrez alarmantemente y tan viviéndose milenta de situaciones dramátiques: la xente humilde pierde’l so emplegu y dempués la so casa, queden desahuciaos ensin escrúpulu dengún. Tan xorreciendo comu la espuma los embargos, la execución de les hipoteques y los desahucios. La cris prevocada polos ricos cae comu una llábana nos costazos de los y les trabayadores, de los xubilaos y xubilaes, inclusu de los neños y neñes.. Entá más, la mesma alministración desahucia a trabayadores en paru de los sos pisos d’alquiler pa rentes baxes.

¿Ú la democracia?, ¿ú la defensa los porgüeyos de la mayoría?. Ye una situación que por cenciella solidariedá nun pue consentise. Poro, ye necesario que s’atienda urxentemente, a lo menos, a la petición paliativa de la paralización darréu de los procesos d’embargu y desahuciu a los y les trabayadores afeutaos pola cris y el desemplegu y la suspensión del pagu de les hipoteques y los sos intereses a los paraos y paraes.

La cris que la paguen los banqueros y los grandes empresarios, los braeros culpables de la situación d’anguañu.

Pepe Sánchez ye'l responsable d’Organización de Corriente Sindical d'Izquierda-Avilés

140.000 persones viven baxo l'umbral de la probeza n'Asturies

De les daqué más d'un millón de persones censaes, oficialmene hai 140.000, el 14% de la población, que viven per debaxo del umbral de la probeza, una categoría na qu'entren quienes sobreviven con una renta añal inferior a 6.278 euros, ingresos nos que la estadística gubernamental fixa el llistón. Pese a ser unos datos mui duros, Asturiesta tien una tasa de probeza menor al del conxuntu del Estáu onde un 20% de la población ye probre, anque per enrima de la del País Vascu por exemplu onde los probress son 'namás' el 8%.

Son datos qu'asoleya l'Institutu estatal d'Estadística, que tamién espeyen que quienes caltienen los sos salarios en Asturias, reciben cantidaes superiores a la media estatal por mor de la influencia nes estadístiques qu'exercen les prexubilaciones mineres y siderúrxicas o la estabilidá de los sueldos de los funcionarios.

El mapa asturianu de la probreza, centráu hasta va poco en coleutivos denomaos 'marxinales' y en dalgunos barrios urbanos, agora inclúi families que llevaban una vida cómoda relativamente y que d'un día pa otru quedó ensin ingresos pola perdida d'empléu. El perfil nuevu de probre ye la de una persona parada, principalmente muyer, con fíos, y que nun pertenez a un sector consideráu marxinal.


Fonte: Infoasturies

El réxime clientelar y l'enchufismu políticu 'problemes importantes a iguar' p'Andecha Astur

Dende Andecha Astur consideren "indecentes y sangrantes" los niveles "d’enchufismu", de "clientelismu políticu" y "amiguismu" a los que ta llegando’l "rexime de la FSA y de los que lu caltienen".

Pa la organización política asturiana, los últimos fechos, la denuncia de que tol personal de la Procuradora Xeneral del ‘Principado’ foi nomada "a deu" o’l nomamientu tamién "a deu" del direutor nuevu del Muséu Etnográficu de Grandas "espeyen perbién la situación y la calidá democrática que sufrimos".

Andecha Astur xúnese a la denuncia pública del Conceyu por Otra Función pública n’Asturies (COFPA) sobre’l nomamientu "a deu" de tola plantilla de la Procuradora Xeneral "y la que yá fixera de lo xeneralizao de la situación d’emplegar na alministración ‘comisarios políticos’ del rexime".

De la mesma Andecha denuncia, ensin entrar a valorar los sos méritos profesionales o personales, la destitución del Pepe El Ferreiro como direutor del Muséu Etnográficu de Grandas de Salime, "pa, por cuestiones polítiques, nomar a deu, ensin sacar la plaza a convocatoria pública, un direutor nuevu adictu al rexime, cola complicidá d’IU".P'Andecha Astur la situación "yá fiede" y considera que "tolos partíos parllamentarios, PSOE, IU-BA-LV y PP, ensin esceición son responsables, toos gobiernen y/o gobernaron y, en mayor o menor medida, caltuvieron el sistema, creando y engordando una élite agradecida".
"Dende la izquierda nacionaliega camentamos que’l del clientelismu políticu, la deucracia, ye un problema importante a iguar y combatir", remata la nota de prensa Andecha Astur.

Fonte: Infoasturies.

L'Alcade de Sieru dimite

El alcalde de Sieru, Juan José Corrales, presentó güei la so dimisión énte la Comisión Executiva l'agurpación del conceyu PSOE .

Depués de una "reflexón fondera", l'alcalde pidió perdón polos fechos a los ciudadanos sierenses. Corrales anunciólo esta tarde nuna rueda prensa na Agrupación Socialista, onde compareció col secretariu xeneral del PSOE del conceyu, Roberto García.

Corrales anunció que va dar desplicaciones énte'l Plenu Municipal al restu de los grupos políticos que componen la corporación. El tovía alcalde dixo que la so situación personal pudo contrubuyir a comenter los fechos, pero qu'asume "honestamente" les consecuencies polítiques que d'ellos se deriven.


Fonte: Infoasturies.

Escándalu 'etílico-políticu' del alcalde de Sieru

Triplicaba la tasa d'alcohol permitíu y sedrá xulgáu por un delitu contra la seguridá del tráficu.


L'escándalu etílicu de Juan José Corrales españó ayeri y espandióse per tol país, y pel estáu, salpicando dafechu a la Federación Socialista Asturiana (FSA). Dempués d'un día "duru" de folixa en Les Comadres de La Pola, l'alcalde Juan José Corrales (PSOE) estrellóse borrachu a les 6.30 de la mañana del vienres col so coche oficial, con una tasa de 0,75mg/l. Al rexidor sierense nun se-y ocurrió otra que la de garrar el coche pa dir a Llugones, onde reside. Argüelles foi la final del so trayectu, l'alcalde "comióse" la retonda d'esta llocalidá, que fai tamién d'entrada a Noreña, y estrozó'l coche nun accidente que nun tuvo consecuencies pa la so salú pero qu'entovía nun se sabe les que tendrá na so vida política.

L'Alcalde de Sieru foi treslladáu a l'Hospital Central onde se constató que nun sufría mancadures. El rexidor dará esplicaciones públiques nun tardando y recapacita sobre'l so futuru políticu en so casa. Daes les circustancies, Corrales nun acudió a la cena a la que taba invitáu ayeri y que servía como actu de despedía d'un sarxentu de la Guardia Civil destináu en La Pola.

L'escandalu etílicu de Juan José Corrales pue pasá-y factura política y dende la FSA ya se considera'l casu como grave, sobremanera pola "exemplaridá" que se-yos supón a los cargos públicos. Espérase un bon espolín políticu nesti conceyu asturianu, mui importante por estensión y por población, pa mañana y la selmana que bien. La comparecencia pública de Corrales ye mui esperada y l'escándalu ye parte de les conversaciones y chancies de tola población asturiana.

Xuristes pide la igua de la "faltona discriminación" de Llanera

Xuristes pol Asturianu, tres tener conocimientu del casu de Llanera, desixi-y al Alcalde que tramite’l pidimientu y retire la delegación de competencies a quien nun cumple cola llegalidá.

L’Aconceyamientu calificó de “discriminación llingüística faltona”, que la Conceyala de Cultura y Muyer de Llanera, Belén Rodríguez López, nun ceda l’usu d’una sala de la Casa Cultura a la organización Fai! por presentar l’escritu n'asturianu. Pa Xuristes, l’actitú de la Conceyala ye “intolerable nun cargu públicu d’una Alministración democrática”.

Poro, encamiéntan-y a l’Alcalde de Llanera a tomar les midíes afayadices pa “cortar pela freba colos despropósitos burocráticos denunciaos pente medies d’ordenar darréu’l trámite y resolución del pidimientu y retirar la delegación de competencies a quien nun sabe facer un emplegu axustáu a drechu, tolerante y democráticu de les mesmes”.

Xuristes pol Asturianu camienta que l’Ayuntamientu de Llanera ta vulnerando gravemente cuatro drechos de la ciudadanía. Primeru, el derechu a nun ser discrimináu per razón de la llingua, “porque la Conceyala entendió dafechu lo que se-y pidía, talu que lo acredita la rempuesta que dio, polo qu’ésta, nos sos términos, nun pue tener otru oxetivu que la discriminación llingüística”.

Segundu, el drechu al emplegu na vida pública de la llingua rexonal, dientro del territoriu del que ye propia y tradicional, calificáu como derechu imprescriptible y recoyíu na Carta Europea de les Llingües Rexonales o Minoritaries. “Esti Conveniu Internacional foi robláu por España, gobernando’l Partíu Popular que tamién lo fai güei en Llanera”, señalen.

Como tercer puntu, falen del drechu a empobinase n’asturianu a l’Alministración municipal, reconocíu na Llei d’usu y nel réxime xurídicu de les Alministraciones Públiques y del procedimientu alministrativu común. Pa finar citen el drechu a ser tratáu con respetu peles autoridaes y funcionarios, “obligaos a facilita-y l’exerciciu de los sos drechos” esclarien.

Dende l’Aconceyamientu, camienten que’l gobiernu local de Llanera actuó “como si entá tuviere vixencia’l Decretu 2929/1975, testu aprobáu pela dictadura franquista pa regular, torgar más bien, l’usu de les llingües rexonales españoles”.

Del mesmu mou, dicen llamentar los fechos, tres denunciar un casu asemeyáu en Xixón nun fixo’l mes. Lo que pa Xuristes amuesa la discriminación llingüística que vienen careciendo los ciudadanos asturfalantes nos sos trámites burocráticos.

Fonte: Asturies.com

Y la entruga del millón ye... ¿onde ta la Xunta Pola Defensa de la Llingua Asturiana?

Fai! convoca una concentración en Llanera

El próximu sábadu 13 de febreru la organización d’esquierda soberanista Fai! tien convocada una concentración tres del secuestru permanente de los espacios públicos de Llanera per parte de la so corporación y dempués d’un escandalosu casu de censura llingüística, onde l’alministración del conceyu prohíbe la espresión n’asturianu.

Fai! vien de presentar, en rueda de prensa celebrada esti miércoles día 10 nel local de les asociaciones vecinales de Llanera, una movilización a la que sigún los convocantes lleguen “dempués d’una bayura de despropósitos y neglixencies alministratives per parte de los rexidores de Llanera”. El descontentu de Fai! ta xeneráu poles torgues constantes que per parte de la conceyala de Cultura Belén López se vienen dando pal usu d’espacios públicos como la casa la cultura o de la mocedá de Posada.

La organización convocante espardió ente la prensa un pliegu de documentos nos que s’incluyía una cronoloxía onde se detallen les comunicaciones ente les partes pa solicitar l’usu d’un espaciu públicu, que vien siendo reiteradamente refugáu.

Nel primeru de los casos l’ayuntamientu diera’l vistu bonu d’entamu pa posteriormente retirar el permisu ensin dar nenguna esplicación per escrito, al tiempu que de manera oral, la propia conceyala afirmaba, n’actitú censora, que “nosotros tenemos que saber quiénes usen los nuestros locales y qué temes van tratar nellos”.

De la mesma manera, Fai! solicitare un espaciu pa facer un mural promoviendo l’asociacionismu nel conceyu col lema “Faciendo Asturies dende Llanera”. Esti mural, confeccionáu el mes pasáu, yá foi esborriáu probablemente énte lo “pernicioso y negativo” del so mensaxe.

Nesta segunda ocasión, nin siquiera se ñega l’usu d’equipamientos del pueblu, sinón que directamente nun s’almite la propia solicitú por tar escrita n’asturianu, violando los derechos a la non discriminación llingüística de les y los asturfalantes, recoyíos na Declaración Universal de los Derechos Humanos, asina como nel estatu d’autonomía d’Asturies, la llei d’usu y la mesma constitución española.

Énte esti panorama, Fai! tresmitió al Aconceyamientu de Xuristes pol Asturianu (AXA) un dossier con una rellación de los fechos pa que dende l’asociación se tomen les midíes oportunes no que cinca a la defensa llegal de los derechos llingüísitcos.

Por tolo espuesto, Fai! convoca una concentración que col lema “DEMOCRACIA PA LLANERA: pol usu de los espacios públicos y escontra la represión llingüística” va celebrase esti sábadu 13 de febreru a les 12.30 hores delantre l’ayuntamientu en Posada.

Al tiempu, la organización fai un llamáu al sofitu y a la participación de toles persones y organizaciones vecinales, polítiques y culturales que vienen careciendo los métodos antidemocráticos de la corporación dirixida pol popular José Avelino Sánchez, asina como a les qu’en toa Asturies sufren les mesmes discriminaciones per parte de l’alministración pol fechu d’espresase n’asturianu.

Tamién se quier dar les gracies a tolos entes, asociaciones y organizaciones (Vecinos d’Agüera, Conseyu de la Mocedá del Principáu d’Asturies, UNA Mocedá, Izquierda Xunida de Llanera, Aconceyamientu de Xuristes pol Asturianu), asina como a tolos ciudadanos qu’a títulu personal ufrieron el so sofitu inmediatu a Fai!.

Darréu de la concentración, y nel mesmu sitiu, Fai! va a informar a la xente con tolos detalles d’esta coyuntura, abriéndose a la busca en comuña de propuestes pa superar esta situación insostenible onde se busquen continuamente formes de torgar la participación y les reivindicaciones ciudadanes.

Cronoloxía de los fechos:

29 d’avientu:

Miembros acreditaos de Fai! nel conceyu entreguen na Casa’l Conceyu la solicitú pa la confección d’un mural y un llugar pa cellebrar l’asamblea na Casa la Cultura o Casa de la Mocedá de Posada.

L’alministración ínstalos a dir a la Casa la Cultura y entrugar si ellí hai sitiu disponible pa esi día y hora, lo que se confirma ensin problema per parte del funcionariu encargáu, qu’avisa a un compañeru pa que’l día de l’asamblea se permita l’usu d’un proyector.

Na vuelta a la Casa’l Conceyu, confírmase-yos a los funcionarios la disponibilidá de la Casa la Cultura y entrégase la solicitú. Nesi intre espétase-yos a los militantes de Fai! que "l’asturianu nun ye cooficial y que quiciabis nun l’aceuten". Darréu d’esto, p’asegurase consulten telefónicamente y dicen que sí, que nun hai problema. Queda afitáu l’actu, diséñase un cartelu que s’esparde pelos núcleos de población más importantes del conceyu y fáise una convocatoria pública, na que s’avisa tamién al traviés d’una llista de corréu a xente del conceyu.

4 de xineru:

Pónense en contautu con una militante de Fai! per teléfonu dende la Casa’l Conceyu pa espetar que "la solicitú nun pue tar n’asturianu" y qu’asina nun pue quedar. Oblígase a los organizadores, con una convocatoria na cai, a tornar l’escritu al castellán. Sicasí, los militantes de Fai! en Llanera entreguen una fueya billingüe, onde, na parte superior, ta l’escritu n’asturianu y, na inferior, en castellán.

7 de xineru

Nueva llamada per parte de los funcionarios del conceyu, que telefónicamente comuniquen que la solicitú ta denegada. Inmediatamente y énte la gravedá de los fechos demándase-yos una contestación per escrito, que devuelven col siguiente testu manuscritu y qu’esclaria mui poco: "Habló Belén Concejala con el Alcalde. (se lo deniega). Se les avisó x teléfon. 7/01/10. (denegado).

Al tiempu, avísase de que "va a llamavos la conceyala", xusto tres de dar un mensaxe contradictoriu del tipu "vete a vela a la Casa la Música agora" nel que la funcionaria se corrixe al "decatase de que ta de vacaciones -casualmente- esi día y el siguiente".

Fáise otra petición pa que, teniendo en cuenta que l’actividá ta convocada y publicitada, s’ufra un sitiu alternativu y torna a repetise la solicitú pa mural. El pidimientu ta namás n’asturianu. Avísase de que "si nun se traduz nun va ser aceutáu", a lo que’l representante de Fai! se ñega.

La conceyala, -que casualmente ruempe de sópitu, ente la gravedá de la crisis alministrativa xenerada, el so periodu de descansu vacacional y entra pela puerta de la Casa’l Conceyu- llama telefónicamente a los representantes de Fai! pa dicí-yos qu’aconceyaron "ella y l’alcalde" y que la solicitú ta "denegada". Diz entós, nuna clara postura censora, "qu’ellos tienen que tar informaos de lo que va facese nos sos llocales y que se-y tien que facer un escritu nel que se diga de qué se va falar, de qué va tratar l’asamblea y cómo va ser y qué va dicir el mural que se faiga".

D’urxencia, y como última midida, Fai! entrega un nuevu escritu nel que se fala brevemente de los motivos polos que públicamente se va cellebrar l’Asamblea, asina como pa poné-y final con un mural qu’afale la participación y la implicación de la población de Llanera nes problemátiques del so conceyu. El testu ye entregáu y la téunica municipal informa de qu’ella, l’alcalde y la conceyala van aconceyar pa decidir finalmente.

Pa finar, a les 14.30, trancando yá les dependencies públiques, confirmen la denegación de la solicitú per cuarta vegada consecutiva. Entrúguense les razones y nin siquiera s’aporten contestaciones per escrito, nin s’informa oralmente de les razones qu’impiden el derechu a la llibre reunión en dependencies públiques.

25 de xineru de 2010

Una militante de Fai! en Llanera torna a presentar un escritu solicitando nuevamente l’usu de la “Casa la Mocedá” de Posada. La solicitú ta escrita íntegramente n’asturianu y va dirixida otra vegada a la conceyala de Cultura Belén López. Nel mesmu momentu, la funcionaria d’alministración vuelve a desixir la presentación del testu en castellán, a lo que la militante se ñega, instando a que se-y devuelva per escrito una contestación oficial del ayuntamientu.

28 de xineru de 2010

La militante recibi una fueya col asuntu “Requiriendo escrito en Castellano”, na que se comunica que “dicho escrito debe de presentarlo en Castellano” firmáu pola conceyala. Paradóxicamente, l’escritu emitíu por Belén López, en castellán, contién seis faltes d’ortografía meciendo, nesti testu, puñalaes a la norma de la so llingua de cabecera al tiempu qu’impide la espresión na llingua propia a la ciudadanía asturiana.

Tini Areces " Naide se cree qu'Asturies ye España y lo demás tierra conquistada".

Vidiu de la selmana pasada, onde nuna conferencia del FORUM EUROPA nuesu GRAN presidente SOCIALISTA fala alredor del nacionalismu asturianu dexando dalgunes perles que comentar y analizar, anque p'analis fondu el que fai él del nacionalismu asturianu.

El vidiu entama cola risa de Tini yá a la primer entruga, debía ser que fartose a tortiella yá enantes de dir a la conferencia.

"Asturies es España y lo demás tierra conquistada, la frase nosotros la decimos pero nadie se lo cree jeje"

Pues non, naide se lo cree si tien dos deos de frente, pero tal paez qu'esa frase cuadonguista vos lleva dando décades de resultaos nes urnes. Por supuestu qu'Asturies nun ye España, nin lo demás tierra conquista, principalmente porque España nun esiste. Pero bono los políticos eso sabeislo de sobra.

"Nos llena de orgullo eso de decir: Asturias es España y lo demás tierra conquistada".

Enllenarate a ti d'arguyu Tini, porque lo que ye a los asturianos en la so mayor parte, o bien da-yos igual o bien da-yos vergoña. Fala por ti, nun fales en coleutivu, yá que nun yes naide pa falar en nome d'un pueblu que condergues al desaniciu. Y ye ciertu, nun mos llena d'arguyu, nun hai más que ver delles encuestes pa ver la identificación de lxs asturianxs con españa. A un asturianu una frase cola pallabra España le ye indiferente, nun enllena-y d'arguyu.

" Asturias es una región bellisima que tiene una imagen positiva(..)Asturias a pesar de sus problemas, de su conflictividad...lo cierto es que tiene una imagen positiva, y esa imagen positiva queremos conservarla".

Equí fala d'Asturies como rexón, cosa insultante pa ún de los primeros Estaos europeos independientes, con plantegamientos asina como p'algamar nel Estatutu la reconocencia de nación hestótica. Lo de la imaxen positiva tién razón, el día que'l pueblu asturianu garre concenxa de si mesmu camudará enforma la cosa y los caciques s'esmolecerán. Hasta entós tola razón pa Tinín.

" Yo trato de transmitir que además de la Asturias de la imagen positiva, de la naturaleza privilegiada, de esos espacios, de nuestra hospitalidad, de nuestra forma de ser(...) hay una Asturias innovadora, profunda, que se desconoce y que camina hacia el futuro...".

Tamién podríes tresmitir la imaxen de l'Asturies de los ERES, los 81.000 paraos, el Sama-Velilla, la regasificadora, la represión llingüistica, la emigración forciada de la mocedá, el desaniciu cultural y del padremuñu, la persecución policial...

" Asturias es una comunidad con una identidad profundisima, podriamos haber hecho de eso un arma reivindicativa, territorial, sin duda con plena legitimidad(...)pero no se ha hecho ¿ por que ? porque Asturias se siente profundamente integrada en España. Es una comunidad que reclama su identidad, la demuestra...porque tenemos una inmigración de hace más de dos siglos...porque en el mundo hemos sabido lo que ha sido ir a otros lugares y ser acogidos, y tener una visión amplia de la vida. Creo que nos ha ayudado mucho".

Si Tini, Asturies ye un país con una identidá fonda. De la que nun yeres un vividor de la política dibes a les manis pola llingua, debe ser que nun ye que pudieres o non facer un arma vindicativa d'eso, sinon qu'algamaste una vía rápida pa vivir a costa de tolxs asturianxs, vendiendote al PSOE. Ye lo que tien l'ambición.
Fales d'inmigración ¿ tú ? Pues controla lo que-y pasa a dalgunos manteros ya inmigrantes que tan siendo espulsaos n'Asturies y que recibieron agresiones nestos caberos años de la to policia. Por ciertu Areces, nada tien que ver qu'un país reclame los sos drechos coleutivos y la so personalidá con nun abrise a la inmigración. Los únicos xenofobos qu'hai n'Asturies sois vosotros, la FSA y demás enxendros políticos, xenofobos colos inmigrantes y por si nun ye pocu con tolo que güela a asturianu.

"El nacionalismo en Asturias tiene poco futuro"
Ye ceo pa xulgar eses pallabres, de momentu axela tú y dexa de reprimir a la mínima cualesquier actu independentista, que ye lo únicu que sabeis facer. Si vos esmolez sedrá por dalgo, y daqué de pensar vos darán eses pequeñes espresiones nacionalistes.

Discriminación llingüistica na Casa conceyu de Llanera

La conceyalía de Cultura y Muyer, de la popular Belén López, vien de torgar por segunda vez el drechu a poder facer usu de les istalaciones públiques a la organización soberanista Fai! por mandar les sollicitues en llingua asturiana. Pa denunciar esti fecho, Fai! va dar una rueda de prensa en Llanera güei a les 17 hores en Llugo Llanera.

Mañana miércoles 10 de febreru a les 17 hores nel local "Cafamilu" de les asociaciones vecinales del conceyu de Llanera (c/ Severo Ochoa de Llugo de Llanera) tendrá llugar una RUEDA DE PRENSA onde la organización d’izquierda soberanista "Fai!" va a denunciar la política de prohibición que per parte del Ayuntamientu de Llanera se vien aplicando al usu de les instalaciones públiques (Casa la Cultura, Casa la Mocedá), fechos que se repiten dende hai tiempu con tol movimientu asociativu del conceyu.


Belén López (PP), conceyala Cultura y MuyerPer segundu mes consecutivu esta organización vien pidiendo un espaciu pa facer una charra pública que vien siendo torgáu, de manera gravísima, pola "Conceyala de Cultura y Muyer" del Partido Popular Belén López. Ellí aportaráse a tolos presentes un pliegu con una cronoloxía de los fechos y con documentos onde la propia alministración con firma de la conceyala se niega a almitir les solicitúes por tar redactaes en llingua asturiana, negando la so presentación nel rexistru por nun tar "EN CASTELLANO", amás de l’actitú claramente antidemocrática que l’alcalde y la corporación municipal ta manteniendo.

Demientres l’actu darase anuncia de la convocatoria d’una movilización na cai pa esta selmana contra’l secuestru de les instalaciones públiques a los coleutivos de Llanera y contra la represión llingüística. Amás, comentaránse los apoyos que la organización ta teniendo d’otres instituciones, asociaciones y partíos qu’esta situación antidemocrática ta xenerando.


Fonte: Aruelu.

Campaña d'Hostelería de la Corriente Sindical d'Izquierda

La Estaya d’Hostelería de la Corriente Sindical d’Izquierda ta llevando alantre una campaña d’información a los y les trabayadores del seutor y de denuncia de la precariedá llaboral y pésimes condiciones de trabayu que carecen la gran mayoría d’estos y estes trabayadores. Pa la CSI, la patronal de la hostelería "impón unes condiciones llaborales inaceutables: xornaes llaborales interminables, abondes vegaes de 50 y 60 hores selmanales, la mayoría les hores estres nun son remuneraes, nun s’asegura a los y les trabayadores pola totalidá les hores trabayaes, los trabayos de fin de selmana realícense de vezu ensin contratu, cúntase namás que con un díi de descansu selmanal y la mayoría les vegaes los sueldos nun algamen los mil euros mensuales".

Pero’l braeru problema’l seutor, pa La Corriente, ye la falta ferramientes que garanticen el cumplimientu les normatives llegales que regulen la xera llaboral. Asina, el Conveniu Coleutivu caberu, vixente fasta’l 2011, "tórnase en papel moyáu porque incúmplese dafechu na gran mayoría les empreses".

A too ello hai d’amestar "les torgues coles que nos atopamos al denunciar les irregularidaes ya incumplimientos" delantre la Ispeición de Trabayu, que fai "casu omisu de cualisquier denuncia presentada, y, con esta actitú, permite, tolera y tórnase cómpliz de la situación d’inxusticia ya indefensión de la gran mayoría los y les trabayadores del seutor", denuncia el sindicatu asturianu.

Asina les coses, la CSI asoleyó un cartelu y un periódicu (“La Voz del Chigre”) que ta repartiendo en mano per tolos centros de trabayu de la comarca (bares, cafeteríes, hoteles, yaeso) y nos que s’informa a los y les trabayadores de los sos drechos, ufiertándo-yos sofitu xurídicu y sindical pa la igua de los sos conflictos y reivindicaciones llaborales.

Pa finar, la CSI va entamar al empar una campaña de denuncia delantre Ispeición de Trabayu, "de toes aquelles empreses hosteleres qu’incumplen la normativa llaboral vixente nel Conveniu Coleutivu y va pedir les responsabilidaes alministratives y xudiciales que procedan escontra Ispeición de Trabayu y Direición Xeneral de Trabayu si éstes persisten na so actitú de permisividá y tolerancia delantre los fraudes cometíos pola patronal de la hostelería", espliquen.

Fonte: infoasturies

Darréu presenta n'Uviéu " Ochobre'l 34: Memories d'un país".

La organización moza independentista presenta esti prósimu vienres 12 de febreru'l so documental autoxestionáu n'Uviéu. El documental asoleyose coincidiendo col DMR'09 y foi presentáu en dellos sitios hasta anguañu.

Esti vienres toca-yos n'Uviéu proyeutalo, na llibrería Paraxuga, a partir de les 20:30 hores. Dempués de la proyeición del documental Darréu entama una espicha en Paraxuga.