Un añu más, y van delles décades, los asturianos van salir a la cai pa, coincidiendo col XXXI Día de les Lletres Asturianes, manifestase pola reconocencia del estatus d’oficialidá pa la llingua asturiana. Un idioma qu’afirmen dende la Xunta pola Defensa de la Llingua Asturiana, vive un momentu “preocupante pola perda cada vez más grande de falantes”. La manifestación va entamar a les 19:30 hores na Estación del Norte, d’Uviéu, y va siguir pela cai Uría llegando hasta les puertes del Teatru Campoamor. A les puertes del mesmu va dase llectura al discursu añal de la XPDLLA.
La Xunta aprovecha esta convocatoria pa denunciar la presencia “testimonial” del asturianu nos medios de comunicación públicos y el so usu “tan escasu” pola Alministración asturian, que comenten “nun ayuda precisamente a que la nuestra llingua gane prestixu y reconocimientu ente la xente”.
Amás, denuncien “la precariedá de l’asignatura nes primeres etapes educatives -hora y media voluntaria a la selmana- y en Secundaria -optativa en competencia con asignatures como Informática o Francés- dan una idea de la poca importancia que merez pa l’Alministración educativa”.
Imaxe de la manifestación de 2009
Pa la Xunta namás se pue cortar el retrocesu d’un idioma minorizáu como’l nuestru con una política de normalización decidida qu’abra espacios d’usu al asturianu, que lo faiga dalgo normal na vida diaria n’ámbitos como la educación, los medios de comunicación o l’Alministración.
La organización calificó la política llingüística del Gobiernu asturianu“adornu anecdóticu o folclóricu” que namás fai “usos testimoniales per un llau y, cuando se trata d’iniciatives fundamentales como’l trabayu de les Oficines de Normalización nos Conceyos, precariedá na dotación y falta de control”.
La Xunta denuncia la “falta d’usu” de los topónimos que la propia alministración aprueba y recuerda los caos daos esti añu, como’l del ciudadanu al que “queríen negar el derechu a dirixise n’asturianu a l’Alministración”, derechu que, recuerden “el Tribunal Constitucional acaba de reconocer”, y que pa la XPDLLA “confirma la vía xurídica como ún de los caminos pa reclamar los nuestros derechos”, anque recuerda “la necesidá d’un marcu llegal d’oficialidá que garantice que les polítiques llingüístiques y los derechos ciudadanos nun dependan de la interpretación más o menos arrogante d’un Gobiernu o d’un xuez”.
Esti sábadu la organización política xuvenil Darréu, celebró una riestra d’actividades en Llangréu col llema "Contra'l terrorismu patronal: resistencia popular", coincidiendo col Día Internacional de las Clas Obrera. La convocatoria entamó a les 17:00 con una concentración delantre la Casa Conceyu de Llangréu, en Sama. Dempués una marcha percorrió les cais de Sama y La Felguera, pa dir finar en Pénjamo con una espicha. A la concentración, averáronse decenes de ciudadanes y ciudadanos que glayaron polos drechos sociales y nacionales d’Asturies y escontra la represión del gobiernu llangreanu. Una vocera de la organización independentista lleeó un comunicau denunciando la persecución política que Darréu carez nel conceyu llangreanu ya informando de la situación. Pasaes les 17:30 hores, dende la Casa Conceyu Llangréu partió una marcha que finó nel Barriu de Pénjamo. La marcha percorrió Sama y La Felguera y demientres la marcha decenes de mozos y moces caminaron tres una pancarta col llema "Contra’l terrorismu patronal: RESISTENCIA POPULAR". Hebo dellos cancios escontra la patronal, en defensa del futuru d’Asturies, pola independencia y el socialismu. Tamién se glayó escontra les fuercies d’ocupación y la ilesia. Cola marcha Darréu quería "desixir una solución a la crisis permanente que sufre Asturies en favor de les clases populares, les mesmes que sufren la represión del poder". Nel so trescursu, dellos ciudadanos y ciudadanes aplaudieron la marcha combativa. Al finar la marcha la organización de mocedá revolucionario entamó una espicha nel Area Recreativa onde nun faltó la bona música y hebo un espaciu de reflexón y alderique ente los asistentes con bon ambiente. Darréu agradez la so presencia a los y les asitentes y anima a la mocedá "a que se sume a la resistencia contra’l capitalismu y l’Estau español que representen el desaniciu social y económicu d’Asturies".
Un garrapiellu de trabayadores y paraxs prendieron fueu a una barricada coinciendo col 1u mayu n'Aviles. La barricada ocasionó que la ciudá tuviera curtiada pola A-8 y la variante. L'aición nun foi vindicada por dengún coleutivu, paez totalmente autónoma.
Los sindicatos CSI, Suatea, CGT y Confederación Intersindical SF organizaron la manifestación del 1º de Mayu en Xixón onde percorrieron les cais de la ciudá puxando polos drechos de los trabayadores y denunciando les polítiques económiques del Gobiernu asturianu y estatal que marafundien el mercáu llaboral.
Xunto a los sindicatos convocantes participaron dellos coleutivos y agrupaciones polítiques ente les que taben UNA, PCPE, PCA, Fai!, l’asociación de familiares asesinaos y represaliaos pol franquismu (AFAR), un bloque soberanista pol socialismu y la independencia y dellos coleutivos más.
Los convocantes sorrayaron qu’Asturies averase a los 100.000 paraes y paraos, tán embargandonos los pisos y siguen despidiendo obreres y obreros con milenta ERE’s nel planu socieconómicu. Palos sindicatos "esti 1º de Mayu tien de ser un puntu d’inflexión na movilización social y llaboral n’Asturies, tenemos que salir a la cai a demostrar que nun queremos siguir sufriendo les consecuencies d’un sistema diseñáu pa favorecer la desigualdá y la explotación, que nun queremos pagar les sos perdes al igual qu’ellos nun repartieron los sos beneficios y que tamos cansaos de que nos sigan engañando cola recuperación de la crisis". Pal PCPE "la crisis capitalista deben pagala los ricos y non los trabayadores". Consideren que tien d’esaniciase la OTAN, salir de la XE y puxar pol socialismu y el comunismu. Dende UNA ye necesaríu un cambéu porque de lo contraríu va siguir too como esta. La federación nacionalista considera que la "paz social" ente sindicatos mayoritarios y el Gobiernu ta mercada "a golpe de subvenciones", como tamién lo tan los empresarios asturianos que nun gorguten a les esixencies del "gobiernu de matrimoníu FSA-PSOE-IU".
Contra'l terrorismu patronal: RESISTENCIA POPULAR ASTURIANA. Manifiestu de Darréu ente'l 1u de Mayu. Asoleyau en Glayiu y KaosEnLaRed
Güei ye 1u de Mayu, Día de la Clas Trabayadora y ye obligación de nueso salir a les cais, salir a dicir verdaes, a dicir qu’esto tien que finase. Dicir que’l capital nun pue siguir afogándonos nesti pozu ensín fondu.
Tamos mui cerca de los 100.000 paraos, superando les piores previsiones planificaes. La ufierta de trabayu nel país ye escasa, temporal y precaria. Solu nel añu 2009 hebo n’Asturies más de 16.000 accidentes llaborales rexistraos. Los últimos datos conocios asoleyaos reflaxaron que más d’un 14% de la población asturiana vive embaxo l’umbral de la probitú. Esto ye, unes 160.000 persones. Siguen pesllando empreses, dexando a miles de families ensín nada de lo que comer y creyando una situación d’insostenibilidá. Los Espedientes de Regulación d’Emplegu golpean perfuerte a la clas obrera. Estes son les estadístiques que tenemos n’Asturies. Estadístiques crudes y pa esmolecese abondo. Estadístiques qu’amuesen como’l Pueblu Asturianu ta sufriendo una braera sangría por parte de la patronal y la burguesía, cola complicidá de los sos axentes.
La crisis social y económica que tamos viviendo nun ye nada nuevu nel nuesu país. Asturies lleva más de 30 años en crisis. 30 años nos que vimos como desmantelaron tol nuesu texíu ocupacional, ye dicir, tol texíu industrial. El seutor naval ye cuasi inesistente y la siderurxia lleva esi camín. 3 décades onde decenes de miles de puestos de trabayu fueron destruyios pola patronal. Tres décades onde los llabriegos fueron marxinaos y el campu foi refugau pola economía gracies a les polítiques de la Xunión Europea. 3 décades viendo como la precariedá nun dexa de medrar, onde los contratos temporales son lo normal y les condiciones son pésimes. El despidu ye gratuitu pal patrón o la patrona y les ayudes publiques son ridicules.
30 años viendo como van privatizándose seutores como la sanidá o la educación. Privatización que comu siempres supón un esfuerciu económicu pergrande nes nueses families, n’absoluta mayoría de families, y que supón un enriquecimiento extra más pal ricu de turnu. La mocedá sigue viendo como tien que colar d’Asturies p’atopar un trabayu dignu, como fai 30 años. 160.000 asturianos y asturianes viven n’otres zones del Estáu. Areces siguirá ñegandolo fasta que caiga de tantu pisase’l focicu. Les pensiones siguen recortándose y la Seguridá Social tamién. Munches viviendes tan vacies mentantu hai xente viviendo pela cai por nun poder pagase un alquiler. El preciu d’estes ye inasequible pa cualesquier familia trabayadora. Por toes estes razones caltenemos que non, qu’esto de la crisis n’Asturies nun ye daqué nuevu. Ye daqué que llevamos arrecostinando dende fai décades y que güei ta sangrando inda más al nuesu Pueblu Trabayador.
A cambeo d’esto’l Gobiernu del Principau d’Asturies nun fai más que convertinos nun basureru con irracionales idees como la regasificadora, la incineradora o la llinia Sama-Velilla. Proyeutos que nun producen cuasi puestos de trabayu y son perxudiciales pa la nuesa ñatura. Proyeutos non racionales y nunca rentables. Esi ye’l papel d’Asturies, el de ser el basureru industrial del Estáu español. Por supuestu nós nun vamos goler un duru. Solo van golelo una minoría adinerada y con influencia direuta na política. La xubida de la edá de xubilación ye otra torga más pal desendolque d’unes relaciones llaborales positives, baxando la edá sedría posible aumentar les posibilidaes de más emplegu. Siguen pesllando empreses y siguen echándose a trabayadores a la cai a ritmu acelerau: Diasa, Enferbus, Venturo, Vesuvius, Duro Felguera o Juliana son una bona riestra exemplos d’ineficacia y abuso patronal.
La prensa y los políticos que tenemos nel nuesu país, ye dicir, los sucursalistes de Madrí nun faen un res. La prensa oficial y capitalista nun para de quitar fierru a la situación y en dengún momentu señala a los culpables de la situación, tantu global como nacional. Nun-yos interesa salir acusando a quien-yos paga por escribir mentires y manipular la verdá. Nun hai valentía p’afrontar la verdá y pedir responsabilidaes direutes a la patronal, a la oligarquía. Solu hai interés en dicir “ Esto lo arreglamos entre todos”, enxamas de dicir “ Esto iguamoslo ensín ellos”.
El gobiernu d’Areces, sociata y cacique, colos sos complices de gobiernu nun fai más que roblar toa esta riestra de medies antipopulares y burgueses. Traicionen les sos siegles con total ñaturalidá con tal d’aumentar les sos cuentes bancaries más y más. Pero nun tienen suficiente con eso, amás persiguennos a los que pedimos soluciones, responsabilidaes y otres polítiques. Esa ye la cara del PSOE, anque lleve la mazcara del pseudro obrerismu y progresismu del que fai gala. Los independentista y socialistes conocemos perbien la braera cara del PSOE por desgracia.
Dende Darréu queremos manifestar la nuesa refuga a too esto. Queremos denunciar esta situación insostenible que la clas obrera mundial ta sufriendo en xeneral, y l’asturiana en particular. El Pueblu Trabayador Asturianu tien qu’abrir los güeyos. Tien que ser consciente que necesita d’una izquierda tresformadora y de clas, y qu’esa izquierda ta n’Asturies. El pueblu tien que saber quien son los sos enemigos y cual ye’l so camín. Tenemos que tener nidio que’l sistema nun afronta denguna crisis, que la crisis ye’l sistema capitalista. Nun valmos con una recuperación de la economía. Pedimos xusticia pa les capes populares d’esti Pueblu. Nun ye lóxicu que tengamos que pagar nós una crisis qu’entamó colos escesos de les clases dirixentes, de la patronal. Nós nun tenemos por que pagar esta crisis, ellos nun repartieron los sos infinitos beneficios. Ellos dieronmos más miseria y conflictividá.
Poro, encamentamos que’l Pueblu Trabayador Asturianu tien qu’entamar el camín de la organización. Asturies tien qu’entamar a salir a les cais y movilizase contra esta oligarquía españolista que llantaronmos. Asturies tien que recuperar la concenxa de clas de la que siempres falose. Asturies tien qu’organizase pa combatir al capital y los sos brazos executores.
Tenemos que dir pasu a pasu en defensa de los nuesos drechos fasta poder construyir la alternativa popular que tea nidio lo que somos: Trabayadores asturianos, oprimíos como clas y como nación, como pueblu. Esta doble explotación tien que dar en consecuencia’l camín del socialismu y la lliberación nacional. Solo nós mesmos vamos iguar les nueses llaceries, dengún explotador asturianu o foriatu va venir a regalanos nada. El resumies cuente : LLUCHEMOS POL FUTURU.
Esti primeru de mayu puede ser como los anteriores. Puede qu'heba 100.000 paraos y paraes, que s'abrieren más ERE's, qu'aprobaren la instalación d'otra incineradora o d'otra térmica ensin importar la salú de miles d'asturianxs. Puede que sigan a construyir una bomba de reloxería como ye la regasificadora del Musel, o que subasten el nuesu padremuñu como asocede en San Andrés de los Tacones (Xixón) p'asina dexar vía llibre a la ZALIA que fairía desapaecer el 80% de la parroquia. Puede que sigan abriendo o estrozando los montes con decenes de parques eólicos o absurdes llinies d'alta tensión, too esto pal beneficiu de la oligarquía gobernante y les sos comenientes redes clientelares. Puede que sigan especulando, que sigan estrozando'l llitoral, que sigan habiendo Caliaos, que quieran que seyamos la "pila" y vertidoriu del Estáu Español, que la emigración de la mocedá nun seya una lleenda urbana. Puede que too seya cierto, pero la rempuesta social sigui siendo la mesma tolos años, INSUFICIENTE.
D'equí podemos resover dos coses, que'l movimientu obreru o de clas ye cásique nulo, y que la vitalidá como pueblu, como País, ye práuticamente inesistente. Podríemos detenemos a sopelexar les causes qu'aportaron a esta situación o podemos baxar a la rialidá y salir a la cai como obrerxs y como asturianxs. Porque a menos que lluchemos por una Asturies SOCIALISTA y SOBERANA siguiremos siendo cómplices d'esti crime haza'l nuesu País, haza nós mesmos.
Ello ye que pa esti 1u mayu, en Fai! y n'otres organizaciones pensamos qu'estos problemes tienen un calter nacional y de clas. Poro, decidimos encadarmar un bloque soberanista pa la movilización alternativa en Xixón que tendrá llugar a les 12:00 h y partirá dende la Plaza del Humedal..
Les revoluciones nun s'ufierten na teletienda o se materialicen nos chigres, faigamos rialidá'l nuesu suañu, deámos-y la bocada'l sistema.
Nun sigas el xuegu a los nuesos asesinos, SAL A LA CAI esti 1u mayu.
Alredor de un centenar de miles de paraos, xubida de la edá de xubilación, recortes en servicios públicos, precariedá, emigración y desaniciu industrial. La murnia situación chisca a Asturies dende siempres, más güei. La patronal al mesmu tiempu sigue faciendose más y más millonaria a costa de los que trabayen.
El xuegu ye'l de siempres. Ye hora d'entamar de 0 y lluchar pol futuru, por un futuru meyor a esti y onde la utopía tea un sitiu. Onde la utopía seya la guía única de les relaciones homanes y tamién llaborales. Nesti xuegu toconos el d'esplotaos y perdedores. Fai falta un bon contra-ataque. Un contra-ataque de clas. Un contra-ataque de la clas obrera constituyía como clas nacional asturiana. Esi ye l'únicu camín que pue tomar un xugador como tú. Un xugador del Pueblu Trabayador Asturianu. Fai falta ganar munchos partios y pa eso hai qu'entrenar abondo. Entamemos.
Énte la data del 1u de mayu, día de les y los trabayadores, y la manifestación alternativa que va percorrer les cais de Xixón dende la plaza L'Humedal a les 12 hores, convócase a un bloque unitariu y combativu a les estremaes organizaciones y persones que puxen por algamar plenos derechos sociales y nacionales pal pueblu asturianu.
Esti bloque, que va cuntar con animación y pancarta propia, ta abiertu a la participación de toes aquelles y aquellos qu'asina quieran, ensin torga nenguna, p'axuntar a les estremaes espresiones y sensibilidaes de la esquierda nacionalista, soberanista y/o independentista como manera de facer más visibles les nueses reivindicaciones comunes y porque la situación d'emerxencia nacional y tamién social asina lo demanda.
Garra les tos banderes, les tos pegatines y xúntate a esti bloque combativu dientro de la manifestación. Axunta la to voz cola d'otres y otros que piensen como tu por una Asturies verdaderamente llibre y combativa.
Agradécense les adhesiones públiques d'organizaciones y persones, asina como l'espardimientu de la convocatoria.
Puxa'l 1u de mayu! Puxa la clas trabayadora! Independencia y socialismu! Puxa Asturies dixebra!
Asoleyau na páxina web de la organización d'esquierda independentista:
"La convocatoria entamará a les 17:00 hores na Casa Conceyu de Llangréu, en Sama, vamos facer una concentración denunciando la situación llaceriosa d’Asturies y contra’l capitalismu. A les 17:30 hores marcha combativa contra la represión nel Conceyu y en sofitu de la clas trabayadora y los drechos coleutivos d’esta. A les 20:00 hores espicha con precios populares y conciertu de grupos mozos.
Baxo’l llema “ La crisis social que la pague’l capital “ dende Darréu queremos convidar a tola sociedá llangreana y asturiana a amestase a la convocatoria xunitaria que proponemos. Nesti 1 de mayu queremos denunciar la llaceriosa situación que tamos sufriendo n’Asturies. Vamos camín de los 90.000 paraos y l’añu pasáu hebo más de 16.000 accidentes llaborales nel país. Tamién ye perimportante remembrar datos como’l de qu’un 14% de la población asturiana vive baxo l’umbral de la probitú, ye dicir, 160.000 persones. Cada mes delles empreses salten a l’actualidá cola anuncia de despidos masivos y pieslles de les mesmes. Los ERE y el terrorismo patronal golpeen n’Asturies cada vegada más fuerte.
La clas política asturiana y los medios lacayos del emperiu nun cansen de dicinos que les coses nun tan bien, pero tapecen siempres l’orixe d’esta cris y los sos responsables. Tamién tapecen les braeres consecuencies, y asina xueguen coles noticies según quien-yos pague, pero enxamás s’enfoten n’asoleyar la llaceriosa situación de clas obrera anguañu. Ye siempres un “ tamos mal pero nun ye pa tantu”. Ye siempres un “ Esto iguamoslo ente toos”. Repiten esos mensaxes pero nun s’atreven a señalar a la patronal y la oligarquía como los culpables de la crisis capitalista. Una crisis producía pol enfotu de les clases altes de facese más y más riques. Dende la prensa oficial nun afonden un res na tema la crisis, sólo unvíen el mensax que la burguesía-yos dexa. Esa ye la situación y estos los enemigos del Pueblu Trabayador Asturianu. Ñegar esto respuende a un interés de clas, de clas burguesa, o bien a faltar a la verdá, cosa a la que tamos avezaos ente’l conformismu nel que vivimos.
EL Pueblu Trabayador tien que ser consciente de cual ye l’enemigu y cual ye la so xera p’actuar. Los y les trabayadores deben tomar concenxa plena de cual ye la so clas, cuales los sos intereses y cuales los esplotadores y opresores. El camín pa espertar la concenxa coleutiva ye bien cenciellu: l’activismu y la xunidá popular. Esi ye’l camín qu’atalantamos correchu dende la nuesa organización, poro, vamos manifestanos esti próximu 1 de mayu en Llangréu en defensa de los porgüeyos de les clases populares.
Ente les torgues qu’atopamos nesti día a día, nesti camín dica’l cambeu social y políticu ta la represión. N’Asturies por tola esquiera revolucionaria ye conocida la persecución política y el trabayu de la Brigada d’Información, manexada pol señor Antonio Trevín. Paez ser que la represión agrávase inda más nos conceyos onde la persecución medra y el simple fechu de ser activista y pegar una pegadiella reivindicativa ye sinónimu d’un multa de miles d’euros. D’actualidá ta agora’l casu de la represión que tamos viviendo nel Conceyu de LLangréu, gobernáu por Esther Díaz. Delles organizaciones presentes nel conceyu sufrieron yá multes de miles y miles d’euros y amenaces por parte del réxime. Asina decidimos axuntanos esti 1 de mayu en Llangréu en defensa de los drechos del Pueblu Trabayador Asturianu, pol socialismu y contra la represión.
La convocatoria entamará a les 17:00 hores na Casa Conceyu de Llangréu, en Sama, vamos facer una concentración denunciando la situación llaceriosa d’Asturies y contra’l capitalismu. Darréu, vamos entamar a les 17:30 hores una marcha combativa contra la represión nel Conceyu y en sofitu de la clas trabayadora y los drechos coleutivos d’esta. La marcha entamará en Sama y finará na Barriá de Pénjamo, pasando por La Felguera, percorriendo asina gran parte del Conceyu.
De magar les 20:00 hores vamos entamar una espicha con precios populares y un conciertu de grupos mozos. La espicha va cellebrase nel Area Recreativa de Pénjamo y nun faltará la meyor música col meyor ambiente". Fonte: www.darreu.org
Tini Areces ganó'l primer premiu del Gran Día del Gochu Asturñol
Coincidiendo coles fiestes del picadillu y el sabadiego Darréu entamó en Noreña el I Gran Día del Gochu Asturñol del añu. L’eventu averó a muncha mocedá que pudo esfrutar d’un conciertu, una espicha y como non de los premios al gochu asturñol.
La tardi entamó col I Picadillu UnderGround Fest, entamau conxuntamente ente Darréu y Nora Antifa. El conciertu averó a munches moces y mozos qu’esfrutaron coles actuaciones de hip-hop y punk programaes nel cartelu. Decenes de xóvenes axuntaronse nos llocales del Llar d’Andecha de Noreña viendo esti conciertu, que tuvo como protagonistes a Wanye Argastur, Gori , MNR , Suma D y Brigada.
A les 20:00 h aparose momentáneamente la música pa entregar na Estatua del Gochu el I Galardón al Gochu Asturñol del añu. La ciudadanía averose con curiosidá al eventu y siguió’l mesmu. Nun hebo muncha sorpresa y foi Don Vicente Álvarez Areces el I premiau con esti honor. Ente les grandes capacidaes que destacó’l xurau de Darréu pa escoyer el ganador tan les sos dimensiones físiques, la so incoherente trayeutoria, les lleendes urbanes, la so afición a fartucar, les sos capacidaes represives o’l so güeyu pal lladrillazu. Tres la intervención d’un militante de Darréu, una moza descubrió la estatua del gochu, que camudó de cara, y agora tenía la d’Areces. Ente los glayios del públicu asistente en sofitu a Tini y la sorpresa Tini Areces recoyió’l premiu y amosó la so gayola. Finau esti actu los asistentes tornaron pal Llar d’Andecha onde diba siguir el conciertu.
Darréu, al finar el conciertu vino la espicha nel Llar d’Andecha, onde nun faltó’l picadillu y el meyor ambiente festivu. Dempués de la espicha siguió delles hores la folixa nel Llar cola meyor música combativa y muncha xente.
Dende Darréu queremos agradecer fonderamente a tolos grupos de música la so participación nel evento y l’asistencia a tola mocedá qu’averose a los actos entamaos. ¡ L’añu que vien tornarán a Noreña los galardones!
DECLARACIÓN DEL XURÁU DEL I GRAN GALARDÓN GOCHU DEL AÑU ASTURÑOL
Bones a toos y toes los que vos averasteis a la primer entrega del Galardón al Gochu Asturñol del añu.
Pa entregar esti gran premiu escoyimos un sitiu tan representativu como esti, la estatua del gochu de Noreña, ñeru de les industries cárniques y chaniceres. Pa entamar agradecer la vuestra presencia yá qu’ensín vosotros esti gran gochu que güei va ser premiau enxamás merecería tal honor. Munches gracies a toes y toos de verdá. Pa siguir dicir qu’esti eventu qu’entamamos güei quier ser l’entamu d’unos premios de gran sonadía y prestixu, cuasi tan prestixiosos como los Premios Principiegos, anque nesti casu nun vamos poder cuntar colos señores príncipes d’Asturies yá que tan trabayando intensamente de cara a otra famosa portada de la revista El Jueves.Sabemos que toos y toes tais ñerviosos por conocer el ganador al gochu del añu asturñol. Nun vos vamos esperar muncho más. Queremos recordavos que darréu de la entrega del galardón podréis esfrutar d’un espicha nel Llar d’Andecha de Noreña con precios populares.Vamos col ganador añal, qu’amás va tener el privilexiu de poder ser el primer gran gochu galardonau del país. Enantes de nada dicir que’l galardón esti primer añu tuvo reñiu yá que la trayeutoria d’estos gochucos nominaos ye estensa y ta enllena gochaes. Pola so llarga trayeutoria, la so vida dedicada a agravar el desaniciu nacional d’Asturies, pol so enfotu en reprimir a la mocedá asturiano que tien idees combatives y pensamientu críticu, pola so política de cuasi prohibición de la llingua asturiana, polos ataques a la identidá asturiana. Pola so llabor de finar col padremuñu nacional. Siguimos, pola so prepotencia, pol so cinismu, poles sos mentires, como la llenda urbana de la emigración d’asturianos y asturianes a la gueta un trabayu dignu, de que ye’l mesmu másimu responsable. Pol so compromisu cola patronal, pol so nulu compromisu colos trabayadores, pola so estratexa de finar col seutor naval pa camudalo pol lladrillazu y la especulación urbanística. Pola so servidumbre a los gochonos de Madrid, pola permanente ñegación de la nacionalidá asturiana, pol so españolismu de pata negra, por riise abiertamente del independentismu asturianu delles vegaes, por facese’l suecu ente l’encarcelamientu de Candido y Morala y ser responsable direutu, pola so talla xamonona. Pola so llabor, xunto a Antonio Trevín (aspirante al galardón), nel permanente siguimientu al movimientu asturianu de reconstrucción nacional y social. Pola represión exercia a coleutivos pocu favorecios como l’inmigrante. Por ser el xefe de les fuercies d’ocupación n’Asturies. Por dir de socialista y ser un españolista collaciu de la patronal. Polos sos únicos xamones, braeramente deliciosos. Pola to contribución a l’estrozu de la ñatura, pola incineradora, pol Sama-Velilla, por llantanos hectaries de molinos en suelu protexiu. Pola mentira del Paraisu Ñatural. Pol despreciu “ a los del bable”, pol pieslle masivu d’empreses, por nun facer un res ente’l treslláu de Duro Felguera y otres empreses, por tratar de piesllar Juliana, lo pocu que dexaste nel to pelotazu urbanisticu. Por mercar votos descaradamente cual cacique, pola cobarde posición ente’l carbón asturianu, por ser tou un gobernador de la Colonia, por ser el meyor basayu de la metrópoli impuesta. Pol to físicu, les tos dimensiones. Por ser un bon facista modernu, d’esos antroxaos de democracia.
Pola to allumante y coherente carrera política. Por ser ex – falangista, por tar nel PCE y colar d’el por que traicionaren el marxismu leninismu. Por ser de los del bable nel so día.Por entrar nel PSOE d’Asturies amosando , también nomáu FSA de las JONS. Como podeis ver ye un bala perdía de la política esti gran gochón que güei premiamos. Pol to viciu coles espichones nes inauguraciones, por ser el modelu de fartón asturñol por escelencia. Pol to control dientru la radio- televisión publica asturiana, también conocida como TeleTini. En resumies cuentes, pola so dimesión animal, pola so allumante capacidá de desaniciar la ñatura y a la par el sector llaboral nesti país. Pola so talla represora, pol so caciquismu, pol so sentir antiasturianu, pol so facismu español tradicional, pol so pocu respetu pol pueblu nel que gobierna, pola represión a los movimientos d’izquierda y defensa de los trabayadores. Por toa una vida desaniciando la nación asturiana, el pueblu asturianu. Por toes estes imnumberables razones y munchisimes más, dende Darréu queremos da-y el galardón a Gochu Asturñol del añu 2010 a…
¡¡¡VICENTE ÁLVAREZ ARECES!!! ¡¡¡NORABONA!!!
El ganador, nuesu gran gochu asturñol Tini yá tien la so cara onde merez. Asperamos qu’agora por fin el nuesu galardonau fine la so carrera política, cole pa les inmenses deheses estremeñes de les qu’enxamás el so pá Guardia Civil nunca nun tuvo que salir.
Convidavos a toos y toes a la espicha que darréu vamos celebrar nel Llar d’Andecha. Asperamos que prestáravos esti primer galardón a Gochu Asturñol del Añu 2010.
Dende Darréu queremos agradecer la colaboración de Cárniques Trevín.
Pa finar insistimos, dengún animal tien porque sentise ofendiu pol eventu que cellebramos güei, anque a vegaes la realidá supere a la ficción.
El independentista asturianu, militante de Darréu, que yá denunciara nel so día a los policíes españoles que lu acosaren el pasáu 4 de marzu en plena cai Uría d'Uvieu, vien de recibir una denuncia roblada polos dos mesmos policíes que lu acosaren. Dase´l casu de qu'unu d'ellos ye'´conocíu facista R.S.B., que yá fuera sentáu nel banquiellu fae unos pocos meses por unos fechos asemeyaos escontra otru independentista asturianu.
Na so denuncia, los policíes españoles 80042 y 82311 mienten al afirmar que'l mozu ñégase a ser identificáu y cacheáu, amás d'amenazalos ya insultalos con frases como "Sois una puta mierda, nun tenéis porqué identificame, conózovos y yá vos garraré ensin uniforme", fechos que puen ser desmentíos si 'l xuez almite la petición de conseguir la grabación de dos cámares de video, una municipal y otra de caxastur, y que polo visto, daríen una versión mui alloñada de lo que los policíes españoles declaren.
Les dos denuncies foron calificáes como falta, polo que dende SOFITU tase a l'aspera de que se ponga fecha pa xuiciu pa volver a movilizase escontra la impunidá que tienen les fuercies opresores españoles y los numberosos facistes que d'elles son miembros.
Xentiquina, DRD, La Curuxa, Toli Morilla, Misiva, Skama la Rede, Los Berrones y Dixebra van ser los grupos que van actuar na XXII Edición del Conciertu pola Oficialidá.
Estilos estremaos, dende los cantares pa neños al rock más combativu pasando pela música tradicional asturiana y la canción d’autor van poner más d’ocho hores de música, reivindicación y folixa, en dos escenarios independientes que van alternar les actuaciones ensin tiempos muertos nin descansu.
El XXII Conciertu pola Oficialidá va abrir les puertes a les 19:00 del prósimu sábadu 24 d’abril, nes instalaciones de la Feria de Muestres de Xixón. El preciu de la entrada ye de 8€ pa la entrada anticipada y de 10€ na puerta.
Les entraes tán a la venta n’Uviéu en La Casa Posafuelles y Malayerba nunca muere; en Xixón nel Café Trisquel, El Barucu y Llibrería Alborá; n’Avilés n’El Cafetón; en Candás en La Gueta; en Tinéu nel Mesón Cervantes; en Ḷḷuarca na Panadería Aldín; en Cangas nel Bar Azul; en La Puela Allande nel Café Centro; en Mieres en L’Abellugu; en La Pola Ḷḷena en La Palmera; en La Pola Siero nel Abre César; en Nava en La Posta; en Grau nel Bar Piero’s; y en L’Entregu en Tom Mallory.
Cuando entá siguimos col asuntu la rede elléctrica d’alta tensión que va percuerrer pente Sama y Velilla y a poques selmanes andaes de que la “esquierda plural” asegurase la so permanencia en coalición, col banzáu de Caliao y la macroincineradora incluyíos, apaecen pel horizonte nueves amenaces pa los ecosistemes asturianos. Ya ye que cuando aperta la cris, nun ye raro que les ocurrencies inofensives de tiempos normales se conviertan n’aberraciones coles qu’engañar a la xente, a una ciudadanía preso de la medrana pero, entá más, preso de la inorancia y, en delles vegaes, de fanatismu partidista. Dicía un personax d’una obra teatro de Rosario d’Acuña –“El padre”- que “el día qu’Asturies salga de la so nueche d’inorancia y fanatismu, l’aurora la llibertá entamará riscar na nuesa patria”. Pasara un sieclu, vivimos revoluciones y guerres, aguantamos una dictadura y saludamos con alborozu a la democracia, pero esa aurora sigui ensín nacer.
Un teleféricu amenaza al Monsacru, un teleféricu que naide sabe mui bien pa qué va servir, sacantes pa enllenar los bolsos de los que ayeri tiníen tases de beneficios del trenta por ciento y güei “solo” les caltienen del vente por ciento. Pero pa lo que sí servirá ye pa esfarrapar lo poco que queda guapo nos más altos gumios de la montaña central asturiana. Los países alpinos, pioneros en remontes mecánicos, hai yá cuasi cincuenta años que los punxeran en custión y lleven trenta ensín construir denguno. Yá cuando’l teleféricu de Fuente De –y yá lloviere- la so instalación fue criticada por técnicos y científicos. Pero yeran otros tiempos ya otru réxime político. O eso ye lo que entóncenes se pensaba.
Pero poques coses cambiaron n’asigún qu’asuntos. Por exemplu, les posiciones critiques pa col enantu d’El Musel foren acallaes igual que pasara en plena dictadura. Nos periódicos namás apaecieron opiniones favoratibles y políticos, empresarios, sindicalistes ya universitarios aplaudíen l’esfarrape la bahía de Xixón pa comederu de la oligarquía enerxético-siderúrxico-cementera y pa conseguir mover unes poques más tonelaes de carbón. Y agora resulta que, asigún dellos espertos –nun ye’l mio casu precisamente, que nun soi espertu nes ciencias peláxiques-, ye posible que la playa San Llorienzu pierda la totalidá l’arena en cinco años. Habrá poner a remoyar les barbes de Xixón, viendo cómo tan pelando les de Castrillón y Ribeseya.
Y agora vienen más banzaos na cuenca’l Navia, cuenca más que castigada poles obres hidráuliques, la industria lláctea y la industria de celulosa. Pretenden construir un banzáu enorme cerca de Navia de Suarna, na vecina Galicia, nel mediu Navia y afleutando a la rexón de Los Ancares, de gran bayura natural y cultural. El proyectu llevaba bloqueáu dicisiete años, daos los impactos tan graves que provocaría, pero agora la Diputación de Llugo pretende ponelu otra vuelta enriba’l tapete. D’esta forma, una cuenca que debería ser estudiada y xestionada como un tóo, non namái carez les polítiques tan poco acompasaes de Galicia y Asturies, sinón que vese afleutada pola política hidráulica d’una provincia. Por si fora poco, les empreses que tan detrás del desbloquéu d’esti proyectu alloriante son les mesmes que pretenden construir otros dos banzaos nel rigu Agüeria, afluente’l Navia en tierres asturianes.
Y pa xustificar económicamente toes estes barbaridaes monten un alcuentru d’economistes y asimilaos, mui publicitáu na prensa, onde los mesmos que dieran les recetes hai diez años y que mos llevaran a la cris más fondera dende 1929, siguen recetando y recetando. Asina, por exemplu, sal Velarde diciendo que la única posibilidá d’Asturies ye una enerxía abondosa y barata. Otra vuelta l’emplegu de la economía, non como ciencia, sinon como estratexa xustificativa.
En conxunto, de facese semeyante barbaridá –y multiplicao si tamién faen lo mesmo nel Agüeria- va quedar seriamente perxudicada la reserva de la biosfera del Rigu Eo, Los Ozcos y Terras de Burón, declarada como tal pola UNESCO hai una década precisamente pol gran interés ecolóxicu, etnográficu y antropolóxicu d’esta fastera fronteriza.
Nesta partitocracia que carecemos, onde los casos de corrupción nun tienen importancia denguna porque’l reinu d’España nun ye otra cosa qu’un réxime corruptu dende’l trubiecu ya onde’l modelu políticu ye una democracia cleptómana representativa, paez que, dacuando envez, dalgún mangante acaba nel penal. Dellos socialistes de Filesa probaran el trax de rayes y van probalu tamién dellos conservadores de Gürtel. Pero, ¿daquién va pagar si Xixón queda ensín playa?, ¿daquién si’l Navia muerre?. Si los fiscales s’esmolecen poles perres esmucíes nes manes d’estos bucaneros de la política, ¿cómo ye que naide persigue a los políticos qu’hipotequen el futuru de tou un pueblu?. Amás, perseguilos ye fácile: abasta con adicar pa les sos mesmes declaraciones. Por exemplu, los que defendieron les bondaes d’El Musel y negaron los sos impactos ecolóxicos tan nos periódicos. Si mañana pasa daqué… la cosa ye fácile.
Mentanto, nes valles del Trubia, sigue’l culiebrón del “puntabrava” de Cabárceno y les “impreñables” Paca y Tola. A un tiempo, mentres nacen esbardos nos montes d’Asturies y paez qu’entama a iguase xenéticamente la población de los montes de Palencia, muerren adultos envelenaos nes tierres de L.laciana y Palacios del Sil. Pero, ya eso ye lo importante pa los nuesos xestores y gobernantes, siguimos “faciendo l’oso” con un debuxu animáu que yá nin tan siquier ven los neños nes cadenes más merdentes de televisión y que practica “paradaisin” comiendo fabes.
Coincidiendo coles fiestes del Picadillu y el Sabadiegu de Noreña la organización independentista entama esti prósimu sábado 24 d’abril el I Gran Día del Gochu Asturñol . Esti eventu tendrá como principal actividá la entrega’l Premiu del Gochu Asturñol del añu, que s’entrega por primera vegada. La entrega’l premiu sedrá como nun podría ser d’otra manera na yá mítica estatua del gochu de Noreña, na cai Florez Estrada. La “gala “ d’entrega del galardón entamará de magar les 20:00 hores. Dende les 17 hores, desendólcase nos llocales del Llar d'Andecha el primer Picadillu Underground Fest qu'entama Darréu xunta Nora Anftifa. Pa entregar esti premiu’l xuráu de Darréu lleva yá meses cavilando p’atopar un bon gochu que merezca esti galardón, y entá nun hai escoyíu un ganador d’ente los nominaos. Pa escoyer al ganador dende Darréu tamos teniendo en cuenta les dimensiones del animal, les capacidaes represives, antiasturianes y facistes del mesmu. Amás, al ser el primer añu d’esti rellumante galardón dende Darréu vamos tener en cuenta la esperiencia y estensa trayeutoria de los nominaos. Con toa seguridá vamos tener presente al ganador del Premiu en Noreña p’aplaudilu como merez y da-y el galardón de parte de tol Pueblu d’Asturies. Asperamos que la xente de Noreña y d’Asturies s’avere a la entrega de premios, yá que va tar enllena sorpreses.
Dempués de la entrega de galardones dende Darréu queremos convidar a tol pueblu de Noreña a una espicha nel Llar d’Andecha de magar les 22:00 hores. La espicha sedrá a precios populares y nun faltará’l bon ambiente . Darréu de la espicha s’entamará nel mesmu llocal, nel Llar d’Andecha una folixa colos meyores sonios combativos varies hores. Colo que la xornada queda percompleta: festival dende les 17hores, entrega premiu a les 20:00 hores, espicha a les 22:00 hores y folixa pela nueche.
Apuesta pola eliminación del cuartelillu ya impulsar la Policia Llocal pa la seguridá de la villa. Ante la propuesta d'Izquierda Unida de treslladar el cuartelillu a la zona del polígonu, la del PCE d’asitialu nun terrén municipal próximu al actual y l'oposición al treslláu de PSOE y PP, Andecha Astur quier faer pública la so posición al respective amosándose contraria dafechu a la so manteniemiento nel Conceyu.
Andecha Astur considera innecesario caltener el “cuartelillu” qu'esti cuerpu militar tien Noreña.
La organización d'izquierda nacionaliega recuerda que la instalación d'éstos, nos nucleos urbanos, obedez históricamente a la intesificación de los llabores represivos y centralizadores del Estáu, llabores qu'en Asturies y Noreña conocemos perfectamente dáu'l protagonismu hestóricu d'esti cuerpu na represión del Pueblu Asturianu.
La seguridá de la zona urbana del Conceyu tien de ser asumida, igual que se fai n'otros conceyos pola Policia Llocal, asina dende Andecha Astur consideramos necesaria la trasformación de la policia llocal de Noreña nun serviciu públicu democráticu al serviciu del ciudadanu les 24 hores, pa lo que se debería ampliar la plantiya.
Ye conodida, amás, por tola ciudadanía, la ineficacia de la Guardia Civil en Noreña, que cubre un area grande de Siero y Noreña, y que como se suel dicir nunca tán cuando se-yos precisa.
La supresión del cuartelillu lliberaría terrenes que podríen convertise n'instalaciones municipales necesaries.
En resume, Andecha Astur nun quier “cuartelillu” de la Guardia Civil en Noreña, considéralo innecesariu ya ineficaz pa la seguridá ciudadana na Villa, seguridá que considera ten de ser atendida pola Policia Local de Noreña.
Pa rematar, Andecha Noreña critica duramente que tantu Izquierda Unida como'l PCE defendan y coincidan en caltener a esti cuerpu, historicamente represor y con una verdadera hestoria negra en Asturies, en Noreña cuando lo único que cabe pidir de la Guardia Civil, dende posiciones pretendidamente d'izquierda, ye la so disolución.
Nun comunicau Darréu amuesa la so solidaridá cola plantiya de la empresa, en llucha dende fai un mes pola llaceriosa situación na que s'atopen. La organización xuvenil tamién esixe futuru llaboral nes cuenques y Samartín. El comunicau ye'l que vien darréu:
"Dende la organización de mocedá independentista revolucionario queremos da-y el nuesu sofitu y la nuesa solidaridá a la plantiya de Venturo XXI. Animamos a la plantiya a siguir na llucha polos sos drechos como trabayadores y la sociedá a acudir a la marcha de mañana día 15 hasta l’Ayuntamientu de Samartín.
Los trabayadores d’esta empresa de Samartín del Rei Aurelio lleven varios meses cobrando el so sueldu con retrasos de fasta 20 díes y entá nun cobraren la nómina de marzu, cobrando tan solu fai unos díes la de febreru. Esta situación dificulta’l día a día de los y les trabayadores de Venturo XXI y fai esmolecese a la plantiya pol so futuru inciertu. En total son 73 persones les que tan nesta situación, una situación difícil, yá qu’amás de nun cobrar como tien de ser, los propietarios nun esclarien a la plantiya’l futuru prósimu d’esta empresa, poro, el futuru de los trabayadores y les sos families. La plantiya esixe que se faiga pública la situación de viabilidá de la empresa, de les nómines atrasaes y del so futuru.
La nuesa organización quier amosar la so solidariedá pa colxs 73 trabayadores y facemos un llamáu al pueblu de Samartín n’especial y a la sociedá asturiana en xeneral a solidarizase cola platiya de Venturo XXI.
Como los propios trabayadores dicen el camín ye’l de la participación y la unidá. Asina, Darréu tamién quier esixir el pagu de toles mensualidades dientru’l periodu normal y que la directiva fale nidio sobro’l futuru de les y los trabayadores y la empresa.
Venturo XXI ye una empresa de la Cuenca’l Nalón qu’abrió fai 5 años col supuestu oxetivu de crear emplegu estable al marxe de la minería. Asina, esiximos el caltenimientu de los puestos de trabayu y de la empresa nes cuenques, yá qu’esa noticia nun fadría más qu’empiorar el panorama llaboral n’Asturies y na Cuenca’l Nalón.
Animamos a la plantiya a siguir na llucha polos sos drechos como trabayadores y la sociedá a acudir a la marcha de mañana día 15 hasta l’Ayuntamientu de Samartín. El Pueblu Trabayador Asturianu tien qu’entamar a defendese por sí mesmu de les agresiones de la patronal oligárquica y garrar el camín de la autoorganización, la unidá y la solidaridá ente la clas obrera."
Dende Darréu quieren amosar el so descontentu cola represión que la mocedá revolucionario sufre nel Conceyu de Llangréu. Dicen sufrir dende la organización independentista persecución política, con abondes multes ya incluso amenaces. El comunicáu ye'l que vien:
Continúa la persecución política en Llangréu
Dende la organización de mocedá revolucionario DARRÉU queremos dar a conocer la represión y les torgues que siguimos sufriendo por parte del Ayuntamientu de Llangréu. Dende que Darréu entamara a cellebrar el Día de la Mocedá Revolucionario nel conceyu de Llangréu escomencipiaron los problemes col Ayuntamientu d’esti conceyu, gobernáu pol PSOE y con Esther Díaz de cabezalera. Al entamu, nun pudieron impedir la cellebración de les diferentes actividades, pero ca añu diben aumentando más y más les torgues y pilancos, les multes, les amenaces, les persecuciones a militantes...; fasta que nel 2009 algamen el so oxetivu y el DMR nun pudo cellebrase en Llangréu.
Cualisquier xera pa la que Darréu solicita permisos nel conceyu de Llangréu ye refugada, la ñegativa ye sistemática por parte del ayuntamientu. Cualisquier actividá que queramos entamar nesti conceyu supón una llucha diaria y continúa. Pero non contentos con esta situación, entamen a llegar les sanciones económiques, agora mesmo Darréu en cosa d’un añu acumula más de 10000 € en multes d’esti ayuntamientu. Les caberes, de la selmana pasada, pol valor total de 5800 € que correspuenden a: 100€ por cartelos en contenedores, 3500 € por pintaes y 2200 € por pegadielles en contenedores.
Dempués vemos como ye’l propiu ayuntamientu el que coloca carteles y propaganda de los sos eventos fuera de los sitios qu’ellos consideren llegalmente “afayadizos”. En too Llangréu tan solu existen 5 paneles de mui pequeñes dimensiones, onde se puea poner publicidá.
Dexen nidio qu'esiste un doble raseru al aplicar les lleis en Llangréu y que lo qu’al ayuntamientu del PSOE esmolez-y nun ye la llimpieza de les paredes públiques del conceyu sinon que los xóvenes llangreanos s’autoorganicen, tengan idees propies y seyan críticos col sistema políticu y col gobiernu municipal. Esta persecución política escontra Darréu tien de finar, el PSOE llangreanu nun pue utilizar el control del Ayuntamientu pa perseguir a la mocedá crítico col sistema y l’Estáu español.
Asoleyáu na páxina web de la organización d'esquierda independentista Darréu.
