Biblioteca dixital de Frayando Cadenes

Nesta biblioteca vas poder atopar dalgunos testos marxistes, anti-imperialistes, antifacistes, nacionalistes o simplemente asturianos non españolistes. El finxu d'esta entrada, a la que vas poder acceder continamente al travíes d'una imaxe-enllaz a la mandrecha d'esti blogue ye espardir lliteratura crítica, principalmente de cálter revolucionario. L'envís de tou esto ye que les persones del soberanismu asturianu y toles persones con un mínimu de concencia crítica puean acceder a dalgunos testos clásicos en formatu dixital y en llingua asturiana. La torna de lliteratura crítica y revolucionaria ye una forma más de normalizar y dignificar el nuesu idioma nacional y camentamos que ye una forma de contribuyir a la pervivencia de la propia llingua dende les nueses posiciones polítiques ya ideolóxiques.

Como podrás ver, nesta biblioteca nun hai muncho entá, pero pasu ente pasu vamos facer por dir enanchandola con dellos autores y/o publicaciones que consideremos relevantes. L'oxetivu ye facer dientru del Blogue Frayando Cadenes un espaciu que sirva de biblioteca patriota, n'asturianu y de perfil revolucionario. S'asoleyaran fragmentos, conferencies, artículos, investigaciones o llibros d'autores estremáos, pero tamién pue ser que s'espublicen testos propios d'organizaciones si s'atalanta necesariu o interesante. En casu d'asoleyar dalgo nesta biblioteca en llingua castiellana s'alvertirá na espublización. Si quies aportar tú tamién nun duldes n'unvianos la to dixitalización y/o torna al corréu frayandocadenes@gmail.com Esti blogue espubliza material d'otres fontes, señalando l'orixe del documentu nesi casu y citando la fonte.

Academia de la Llingua Asturiana

Institución que se creó en 1980 y ye l'espaciu más institucionalizáu que tien l'idioma'l país. Trabaya n'investigación, llabor editorial, educativa, organización d'eventos, pedagoxía, campu normalizador o nel campu los drechos civiles, ente otres xeres.

Informe sobre la represión y non reconocencia de los drechos llingüísticos n'Asturies.

Vladimir Ilich Ulianov "Lenin"

Fundaor, importante teóricu y cabezaleru del Partíu Bolchevique. Dirixió la Revolución Socialista Rusa de 1917 y aportó grandes obres y construcciones teóriques al socialismu científicu entamáu por Marx y Engels.

Tres fontes y tres partes integrantes del marxismu

                                                                    

El nuesu programa (Torna y dixitalización del blogue "Andecha Obrera")

Les xeres del proletariáu na presente Revolución (Torna y dixitalización blogue "Andecha Obrera")

Karl Marx

Co-fundaor de la práutica y filosofía del socialismu científicu. Afitó los pegoyos del marxismu y fundó la Lliga Comunista y la I Internacional.

La nacionalización de la tierra

James Connolly

Cabezaleru nacionalista y revolucionario irlandés. Destacó por amestar les idees soberanistes y patriótiques de la Irlanda a la gueta la independencia coles idees y la práxis marxista. Bona parte del nacionalismu políticu irlandés parte d'ellí.

Socialismu y Nacionalismu

¿Antipatrióticu?

Fidel Castro Ruz

Dirixente de la Revolución Cubana. Ye dende hai décades un de los mayores ideólogos y referentes del movimientu revolucionario internacional, sobre manera n'America Llatina. El so gran valir destaca na defensa d'un patriotismu cubanu de calter socialista. Un de les grandes personalidaes del sieglu XX y parte'l XXI y gran referente a la hora d'espeyar les contradicciones del imperialismu mundial.

Los superrevolucionarios

Conceyu Bable

Conceyu Bable foi una asociación política y cultural asturiana, mui cercana a postures nidiamente nacionaliegues y qu'axuntó a munches persones esmolecíes pola cultura del país, la llingua, el bientar xeneral d'Asturies y la soberanía de la nación ente 1974 y la década de los 80. Primer organización nacionaliega constituyía nesti país.

Avilés, el primer conceyu en colingar la bandera d'Asturies

Conceyu Nacionalista Astur

El Conceyu Nacionalista Asturianu (CNA) foi'l primer partíu políticu d'Asturies nacionaliegu dafechu y socialista revolucionario. Algamó más de 8.000 votos pal senáu en 1979 y tuvo actividá ente 1976 y 1981, cuando dellos militantes fueron represaliaos nuna gran operación de la policia española. Espublizó una revista propia baxo'l títulu Asturies Dixebrá.

Documentu "Autonomía" (1980)

CNA al Pueblu Trabayador de Mieres (Agostu de 1979)

Recuerdos d'ayeri y güei, entrevista a Gerardo Sánchez, vieyu militante del CNA fecha pol periódicu GÜEI en 2001.

Revista "Asturies Dixebrá", muerganu del CNA. Númb. 1. Mayu 1979.

Ho Chi Minh

Cabezaleru del Partíu Comunista de Vietnam y del movimientu pola lliberación nacional de la so patria. Derrotó a los imperialistes franceses y afitó bases guerrilleres de gran caláu. Morrió enantes de ver al so pueblu trunfar contra l'enemigu imperialista yanki.

Programa del Partíu Comunista d'Indochina

Carta al Presidente de los Estáos Xuníos

Aiciones que tienen de faese y que nun tienen de faese

Georgi Dimitrov

Cabezaleru comunista búlgaru. Foi presidente de la III Internacional y dirixió la llucha antifacista en Bulgaria, onde foi presidente. Aportó obres alredor de la ñatura'l facismu, coles que comprender meyor el cáncanu facista y xenófobu y la so relación col gran capital.

El calter de clas del facismu

Antonio Gramsci 

Ñembru fundaor del Partíu Comunista Italianu. Arrestáu en 1926 y condergáu a venti años de prisión polos facistes aportó grandes obres y conceutos sobre la hexemonía de vanguardia marxista, les griesques de posiciones o'l papel de la inteleutualidá.

La internacional Comunista

Exércitu Republicanu Irlandés

Canalización de la llucha armada del pueblu irlandés na so llucha de lliberación nacional escontra l'Imperiu Británicu. Exércitu popular nacionaliegu y tradicionalmente izquierdista, anque finó con munches dixebres d'estremaes ideoloxíes.

El llibru verde  (torna y dixitalización del Blogue "Acción y Política")

Movimientu Comunista d'Asturies

Partíu comunista fundáu en 1975 col so I Congresu, mui averáu ideolóxicamente al maoísmu y que furrulaba a nivel estatal. N'Asturies actuó baxo'l nome "Movimientu Comunista d'Asturies" en determinaes ocasiones foi abondo cercanu a la cuestión nacional. Foi pali que pali arrenegando de la llínia orixinal y depués la so bas social formó Lliberación, integrada anguañu n'Izquierda Xunida.

Asturies nagua pola llibertá (1977)

Gaspar Melchor de Xovellanos

Pernomáu ilustráu xixonés, figura clave de la ilustración n'Asturies y nel Estáu Español y represaliáu políticu, consecuencia de ser un adelantáu al so tiempu. Nunca renegó de la identidá del país, les sos instituciones y la so autonomía, anque la hestoria española tapez la so figura y españoliza a la mésma d'una forma esaxerada.

El Xovellanos Asturianista

Yasser Arafat



Cabezaleru de la Organización pa la Lliberación de Palestina (OLP), de l'agrupación armada Al Fatah, Presidente de l'Autoridá Palestina y Premiu Nobel de la Paz.

Mensaxe a Fidel Castro

Andecha Astur

Organización política fundada en 1990 de calter nacionalista y socialista revolucionaria qu'ainda güei prosigue'l so llabor. Desenrrolló un gran llabor na defensa de los drechos llingüísticos, l'axitación en clave nacional, la denuncia política de la represión o l'amestura de presupuestos marxistes de tipu socialista al nacionalismu asturianu. Anguañu prosigue la so actividá.

Intervención d'AA na charra-alderique "Asturies y la Constitución Española".

El procesu autonómicu n'Asturies: Erbies y propuestes pal so analís.

Partíu Comunista de los Trabayadores d'Asturies

El Partíu Comunista de los Trabayadores d'Asturies ye'l nome que recibe la federación qu'hai nel nuesu país del Partíu Comunista de los Trabayadores, partíu que surdió de la oposición d'izquierda (OPI) dientru'l PCE.

Puxando por Asturies (1977)

Noam Chomsky
Llingüísta, filósofu y activista estáuxunidense. Perconocíu en tol mundu pola so actividá teórica crítica escontra'l sistema capitalista vixente y escontra la política esterior de los EEXX. Autodenomáu políticamente como anarcosindicalista, si bien los sos xuicios y les sos aportaciones teóriques nun tienen un puntu de partida marxista ye bien ciertu que la so obra tien gran valir a la hora de desmontar el papel imperialista d'Estáos Xuníos nel mundu.

Diez estratexes de manipulación mediática

Documentu: Programa del Partíu Comunista d'Indochina (1930).

Esti blogue ufre a los sos llectores el Programa del Partíu Comunista d'Indochina (1930) en formatu PDF y tornáu a la llingua d'Asturies. Nesti curtiu pero interesante ya hestóricu documentu'l partíu d'Ho Chi Minh espresa'l so programa a curtiu-mediu plazu na fas de llucha d'emancipación nacional y social. Un programa que venció al imperialismu francés y yanki a bas de muncha llucha y sangre, siendo Vietnam un pueblu qu'humildó y dexó n'evidencia al imperialismu más agresivu y xabaz.

El documentu tien abondo valor hestóricu, y anque nun ye un gran material formativu espeya perbien como tien de ser un programa revolucionario y como dirixise al pueblu. Como podemos ver, el tio Ho y los sos collacios y collacies s'espresaben nun llinguaxe mui corriente, cola fin d'averase al pueblu y de nun elitizar los sos discursos. Lo ciertu ye qu'esi aspeutu quiciabes fuere definitivu pa la victoria del so partíu y del pueblu de Vietnam y l'algame de la so soberanía nacional y social. El camín qu'emprendió Vietnam na so llucha tien de ser exemplu pa toles naciones oprimíes del mundu, pues nun hai independencia nin soberanía nacional ensín independencia y soberanía económica.

El documentu pues descargalo nel enllaz d'enrriba o nel que vien darréu:

https://rapidshare.com/files/809506005/programa_PCICH_oh_chi_min_.pdf
https://rapidshare.com/files/809506005/programa_PCICH_oh_chi_min_.pdf
https://rapidshare.com/files/809506005/programa_PCICH_oh_chi_min_.pdf
https://rapidshare.com/files/809506005/programa_PCICH_oh_chi_min_.pdf

El capitalismu sigui colos sos asesinatos

Un ciudadanu griegu, fartu de recoyer comida de la basoria y pasar les penuries que ta imponiendo'l capital a les persones decidió quitase la vida con un tiru na tiesta. Los medios recoyeron la noticia porque nun hai más remediu y porque la situación en Grecia ye yá incaltenible pal capitalismu.

Hai un mes, en Xixón, pasó lo mesmu, con una persona que suicidose nun conocíu centru comercial de la villa asturiana. Los medios de comunicación asturianos pasaron de la noticia, yá que los psicólogos encamentaron nun dar bombu al casu. Esi home, taba a les puertes del deshauiciu y dexó un cartelu nel que dicía que foi imposible pa él pagar la hipoteca.

El sistema capitalista crea nes persones estes circunstancies y situaciones y los sos medios de manipulación espeyan la so verdá, parcialícenla y a vegaes, como ye'l casu, escuendenla y nun asoleyen un res al respeutu. Nesti casu nun interesaba espeyar les bondaes d'esta democracia y del llibre mercáu. El mieu entama a aportar a les estructures, les bases o los pegoyos del sistema capitalista español. Solo fai falta que la xente entame a comprender que la problemática de fondu ye qu'hai un conflictu ente clases sociales y que los más tan oprimios polos menos, los cuales tan emplegando "la crisis" como escusa perfecha pa robar tolos drechos y prestaciones sociales a los más, algamáes con muncha sangre y muncha llucha. Hai d'aparar les agresiones del capital y preparar l'ataque del pueblu, con trabayu, organización, concienciación y formación. Asturies sedrá la tumba'l capital.

El Gobiernu d´España mete un retayu a los presupuestos d´Asturies del 8,8%

Los Presupuestos Xenerales del Estáu pal 2012 acuten p’Asturies una inversión de 506,95 millones d’euros, un 8,8% menos que la que recibió l´añu pasáu.

Asturies nun ye´l País onde más se nota la tisoria del Gobiernu d´España a la hora de controlar el déficit públicu, ye´l segundu, per detrás de la comunidá autónoma de Castiella-La Mancha, onde menos cai la inversión, si nun se cuenten los dos únicos países que van recibir más fondos que l’añu pasáu: País Vascu y Galicia.

La infraestructura que va llevar una suma mayor del Estáu ye la Variante de Payares, onde va invertir anguaño 210,58 millones d’euros, 25,38 millones d’euros más que nel 2011. Otra de les más importantes ye la inversión na Autovía del Cantábricu, que pasa de los 94 millones que recibió l’añu pasáu a los 67 millones d’esti añu, repartíos ente los tramos Llanes-Pendueles, Pendueles-Unquera, Navia-Tapia, Outur-Vil.lapedre, Muros-Las Dueñas y l’enllaz de San Roque. Nos presupuestos d’esti añu aparecen partíes nueves en comparanza col añu anterior, como 40,4 millones destinaos a pagar espropiaciones, 34 millones d’un empréstamu por El Musel y 5,8 millones destinaos a l’Autopista del Mar. En materia de comunicaciones ye tamién significativa la medría na inversión nel Aeropuertu d’Asturies, que xube de 4,4 millones a 12,8.

Una partida rellacionada cola financiación territorial que sí sube en comparanza col añu 2011 ye la de les tresferencies a les Comunidaes Autónomes, que medra nun 9,7%, hasta algamar los 27.734 millones d’euros. Sicasí, los Presupuestos Xenerales del Estáu nun recueyen la cesión de tributos estremada por comunidaes, polo que nun ye posible saber en que midida varia esta cantidá en comparanza col añu 2011. Sí se conoz el montante destináu a Asturies con cargu al Fondu de Suficiencia, un mecanismu destináu a cubrir la diferencia ente la necesidá de financiación de cada autonomía y qu’anguaño va tar nos 299 millones d’euros, 10 millones menos que nel 2011. Nel otru mecanismu destináu a iguar los desequilibrios económicos ente comunidaes, los Fondos de Compensación Interterritorial, Asturies ve menguaos los ingresos nun 18%, hasta llegar a los 24.838 euros.

Amás, el ministru de Facienda y Alministraciones Públiques, Cristóbal Montoro, na rueda de prensa depués de la presentación de los presupuestos nel Congresu, mostróse inflexible tocante a los topes de déficit de les Comunidaes Autónomes. En concreto, sobre los pactos pa formar Gobiernu n’Asturies y Andalucía aseguró que los alcuerdos ente los partíos van tener que respetar los compromisos de déficit públicu y alvirtió que, si dalguna fuercia nun ta convencida d’ello, que nun se meta nel Gobiernu, nuna alusión velada a Izquierda Xunida, que yá mostrara la so oposición a los topes de déficit impuestos a les Comunidaes Autónomes, al considerar que respetalos diba obligar a recortar en servicios esenciales, como sanidá, educación y bienestar social.

Conceyu Abiertu por Samartín denuncia’l descontrol económicu de la Casa Conceyu

La Sindicatura de Cuentes d’Asturies espublizó un informe nel que se recueyen les conclusiones de la so fiscalización a cuatro conceyos, énte ellos el de Samartín del Rei Aurelio, depués de qu’en 2008 nun presentaren de mena afayaíza les sos cuentes.


Nel informe del organismu, ésti espeya que la Casa Conceyu de Samartín nun rinde cuentes correutamente, amosando numberosos desequilibrios presupuestarios que lleven a situaciones de déficit, asina como’l desendolcu de procedimientos de contratación d’obres y servicios que nun tan argumentaos enforma.

Poro, dende Conceyu Abiertu por samartín queremos denunciar éstes deficiencies qu’afeuten negativamente a la xestión del Ayuntamientu y, en consecuencia, a los servicios qu’ésti ufierta a los ciudadanos y ciudadanes, anguaño en recorte en munchos casos pola falta de presupuestu.

Asina, dende ésti coleutivu ciudadanu consideramos que nun ye de recibu la escuridá cola que se manexa’l gobiernu llocal del PSOE a la hora d’escoyer nos concursos a les empreses que desendolquen obres y servicios nel nuesu conceyu, al mesmu tiempu que desiximos al consistoriu, énte too, honestidá y seriedá na xestión económica y de los presupuestos, intentando qu’éstos, más alló de que seyan más o menos modestos, seyan realistes, y atiendan a una bona xestión de los recursos.

Sicasí, dende CA por Samartín creyemos que diches deficiencies correspuenden a un problema estructural del sistema representativu col que mos atopamos, y ye que la realidá amosa que los representantes de los ciudadanos y ciudadanes nel nuesu conceyu, como en tantos otros, basen les sos actuaciones esclusivamente nos sos intereses políticos y elleutorales, y non nel bientar del ciudadanu y na xestión afayaíza de los sos recursos, aspeutu que mos perxudica a tolos habitantes de Samartín del Rei Aurelio.

Conceyu Abiertu por SMRA

Trabayadora del Bar Business recibe sentencia favoratible

Primer sentencia del casu.

El conflictu del Chigre Business con delles trabayadores resultó favoratible pa los intereses de la trabayadora, que como bien despliquen dende la CSI "A la trabayadora despidida reconózse-y el derechu a cobrar les cantidaes debíes, amás de la categoría como camarera, les hores extras non cobraes, la nocturnidad y les cotizaciones. Coles mesmes, una segunda despidida llogró un alcuerdu bien satisfactoriu, evitando dir a xuiciu y encurtiando asina los plazos de cobru".

Asina, dende'l sindicatu de clas asturianu, presente en tol procesu, camienten que "La llucha d'estos tres trabayadores foi exemplar en tou momentu, recordemos que fueron xulgaes por insultos y vexames y tienen otra causa abierta acusaes de faer pintaes nos distintos negocios d'esti empresariu". Nun sector tan precariu y dificil como ye'l de la Hostelería, esto sirve pa demostrar que con llucha, solidaridá y sofitu mutuu tou ye posible, y organizaes ganense batalles" .

La plantilla d'Alcoa torna a cortar la carretera

En protesta pol ERE qu'entama na planta avilesina.

La plantilla de la factoría avilesina d'Alcoa cortó güei la carretera durante media hora en refugu al Espediente de Regulación d'Emplegu qu'escomenzó a aplicase güei, y nel que los y les trabayadores denuncien la desorganización que tan sufriendo n'aplicación del procesu regulador.

Dende Alcoa, los representantes sindicales reclamen una nueva Tarifa Llétrica Industrial que garantice la competitividá de la factoría, la consideración del seutor metalúrxicu como estratéxicu, y la execución d'inversiones que garanticen el futuru de la compañía énte l'amenaza de desllocalización.

Fonte: Infoasturies

La reconstrucción del nacionalismu n'Asturies

Na cabera Tertulia García-Rendueles foi analizada l'actual situación de desastre elleutoral comu consecuencia de trés factores qu'afecten fondamente al propiu movimientu nacionaliegu asturianu aniciáu nos años 1970 cuestionando inclusive la so mesma esistencia dientru d'un contestu xeneral de desideoloxización y crisis social:

I) La progresiva disolución de les posiciones nacionaliegues, soberanistes y tresformadores nel marcu d'un falsu posibilismu que, carauterizáu ambiguamente comu asturianista, autonomista y progresista, arrenuncia a toa perspectiva de confrontación col Estáu español ensin ser quien a xenerar unos mínimos avances nacionales en déngun ámbitu social.

II) La sustitución del trabayu socio-políticu dende la base, en collaboración colos movimientos populares, por unes pantasioses espeutatives elleutoralistes, lo que vien xenerando un oportunismu tácticista astrayíu de cualisquier triba de coherencia estratéxica.

III) L'enclín de tolos seutores organizaos del nacionalismu asturianu a convertise en vanguardies autoreferenciales que terminen convirtiéndose en locomotores ensin vagones.

Esti escenariu dende la perspeutiva de los tertulianos namás pue ser modificáu mediante la superación de los francimientos atropaos en tantos años, un relevu políticu y la progresiva articulación d'una estratexa societaria comu Movimientu de Lliberación Nacional atalantando asina que construyir la Nación Asturiana comu suxetu colectivu dende la heteroxeneidá social ye daqué más que costruyir organizaciones nacionaliegues nel ámbetu partidista.

Ello asina asumiendo que nun se pue pretender xenerar dengún marcu políticu de calter "ampliu” o de pretensión más o menos “unitaria” ensin un trabayu previu d'atracción de colleutivos y presones, considérase afayaizo a curtiu plazu l'articulación d'un Partíu políticu de cuadros que, ensin pretender ser l'espaciu definitivu, tega comu finalidá al mediu plazu'l desendolcu de dinámiques d'aición colleutiva dende la base al traviés de la dinamización d'organizaciones seutoriales nos distintos ámbetos sociales (sindical, cultural, ecolóxicu, etc.). Y namásdempués va poder venir la configuración al llargu plazu d'un Frente Ampliu de calter nacional-democráticu (onde puedan entrar dende grupos procedentes de la social-democracia asturianista fasta de la izquierda obrerista tradicional siempres y cuando asuman l'autodetermín non como un simple drechu democráticu sinón tamién comu una ferramienta estratéxica pa camudar l'estáu de les coses n’Asturies) coles mires de da-y una traducción política a l'acumuladura de fuercies sociales realizada nes organizaciones seutoriales.

www.n-ast.org

El paru medró otru mes más n'Asturies

Mete mieu la vixencia d'esta vieya semeya...

35 persones más en situación de desemplegu.

El Ministeriu d'Emplegu y Seguridá Social del gobiernu estatal vien d'espublizar los datos rellativos al desemplegu nel mes de marzu, con cifres de nueu negatives n'Asturies y nel conxuntu del estáu. Asina, el paru nel nuesu país medró en 35 persones, asitiándose en 99.388 paraos y paraes, que faen averase inda más haza les 100.000 persones en situación de desemplegu.

En cifres porcentuales, l'espoxigue ye del 0,04%, demientres que nes cifres interanuales, nos caberos 12 meses el paru medró en 11.648 persones, un 13,28% más. Los principales seutores destructores d'emplegu foron la industria (-116) y l'agricultura (-39). En cuantes al repartu por xéneros, 50.357 paraes son muyeres, y 49.031 homes.

Fonte: Infoasturies.net

Las persones enantes que'l dineru… y el mobiliariu urbano

Nin represión nin recortes. Solidaridá coles deteníes del 29M.

La xornada de fuelga xeneral n’Asturies saldóse en términos represivos con cuatro detenciones, numberoses identificaciones y mancadures. Asina s'estrenó Gabino de Lorenzo nel so nuevu puestu de Delegáu del Gobiernu español n'Asturies, col mesmu despreciu pola integridá de les persones que demostró na so etapa d'alcalde d'Uviéu, de la mano del Xefe de la Policía local Agustín de Luís.

Dende les 0:00 h del xueves 29 de marzu, axentes de la Policía –non siempres uniformados– dieron en identificar nes principales ciudaes a distintes persones pol simple fechu de caminar pola cai, siguiendo coles midíes d'acoso a activistes empecipiaes na selmana enantes a la convocatoria de fuelga. Un afiliáu de la CSI foi identificáu por cinco coches patrulla, trés d'ellos camuflaos, acusáu de realizar una pintada, cuando nin siquier llevaba un esprái enriba. La prioridá del dispositivu policial yera evitar les pintaes, el selláu de supermercaos y d'entidaes bancaries. Nunca vamos ver el mesmu esplegue pa evitar l'acoso y l'esplotación llaboral nel interior d'estos centros de trabayu, nin la presencia d'axentes de incógnito na trastienda de les operaciones de llavadura de dineru.

A partir de les 6:30 h el piquete alternativu a los sindicatos mayoritarios foi acompañáu por dellos furgones de la UIP, que realizaron identificaciones “preventives” con ánimu d'amedranar a los sos componentes. Sicasí, el delitu producíase delantre de les sos ñarices, nada menos que un atracu: tres los cristales de la Conseyería d'Economía calculen los recortes necesarios pa satisfaer la voracidad de los mercaos.

A les 9:00 h produzse una carga policial contra este mesmu piquete mientres percorría les cais d'Uviéu pa informar de les consecuencies de la reforma llaboral y de los retayos sociales, qu'empezaron colos gobiernos del PSOE y afondó l'executivu del PP. Delles persones fueron cutíes ya identificaes –una tuvo que recibir tres punto de sutura na oreya– y un mozu foi deteníu en siendo placado contra'l suelu. Nun va ser puestu en llibertá hasta les 13:30 h –acusáu de desordes públicos– a pesar de les protestes a les puertes de la comisaría. ¿Por qué intervieno la policía? Porque s'entornaron media docena de cubos de basura y un par de ceniceros. Non puede tolerase qu'haya bolses de basura nel suelu nun día de fuelga, pero si qu'haya 100.000 persones tiraes na cai. Nes ciudaes de postal nun pasa nada hasta que se visibiliza la basura de contratos –y de vides– que nos ufierten. El desorde de lo público creyer quien privaticen, desahucian y conderguen a la esclusión social a miles de persones, non quien crucien un cubu de basura o una papelera.

Poco dempués, dos nuevos que participaba nel piquete d'UXT y CC.OO. fueron cutíos y conducíos a comisaría unu en calidá de deteníu– por tratar de realizar un graffiti nun caxeru de la cai Uría. La cara ensangrecida d'unu de los mozos ye'l preciu a pagar por caltener intacta la imaxe d'estes entidaes financieru y comercial. La primavera pue que llegue al Tayu Inglés, pero los derechos llaborales nun pasen de les sos puertes. ¿Cuándo vamos ver la rodía de los policías sobre -y pescuezu del presidente de Liberbank por privatizar una entidá que podía ponese al serviciu de la población en tiempos de crisis? A lo llargo de la mañana produciéronse tamién dos detenciones por enfrentamientos verbales" en Llangréu.

En Xixón, dellos axentes infiltrados fueron espulsaos de los piquetes de la CSI. La policía, fornida col costosu material antidisturbios adquiríu apocayá, respondió a cierta distancia a les barricaes coles que se cortaron los accesos a la ciudá. Sicasí, les escasez d'efectivos obligó-yos a retirase en más d'una ocasión frente a la presión de los piquetes. Especialmente llamativa foi la salida de la manifestación convocada por CSI, CGT y SUATEA, cuando un gordón de manifestantes forzó'l repliegue de los axentes que s'averaren a la barricada instalada na redoma casa sindical minutos antes.

Pela tarde produzse quiciabes la más grave intervención policial. A les 18:30 h, nel encruz ente callar Viaductu Marquina y callar Independencia, dábense alcuentru diverses persones y colectivos pa formar un bloque críticu a la fin de la manifestación de los sindicatos de concertación. La iniciativa pasaba por amosar el sofitu a la convocatoria de fuelga, pero tamién el refugu a la política siguida polos sindicatos mayoritarios. La policía forma un gordón “pa evitar enfrentamientos” que torga al bloque críticu averase al restu de manifestantes. Sicasí, en siendo alvertíes de lo que taba asocediendo, numberoses persones que participaben nel calce principal de la manifestación detiénense y esixen que'l bloque críticu pueda incorporase. La resultancia ye que la manifestación paralízase y una ventena de antidisturbios queden atrapaos ente dos numberosos grupos de manifestantes que nun pueden movese en nenguna dirección (una llínea de antidisturbios torgaba que'l bloque críticu abandonara callar Viaductu Marquina pela parte cimera). A pesar de lo absurdo del operativu, los policías traten de torgar la unión de los manifestantes a golpe de tolete, puñaes y emburriones (siquier cuatro persones presentaron parte de mancadures nel Hospital y denuncies contra los axentes que los cutieron). Afortunadamente, a la fin son enchíos, una y bones delles persones taben teniendo dificultaes inclusive p'alendar.

La humildación ye considerable (minutos antes dixérase-yos por megáfonu “Policías tienen 5 minutos pa eslleise”) y la rabia ye bien visible nes sos cares (un axente llega a tundir una papelera). Tanto ye asina, que minutos dempués acometen contra un mozu al que cuten y detienen. Por cuenta de les feríes causaes, primero ye conducíu al Centru médicu de la Lila y dempués al Hospital Central. Mientres la nueche va ser treslladáu a comisaría, onde se-y va tomar declaración antes de pasar a disposición xudicial. Nun va ser puestu en llibertá hasta les 14:00 h del vienres 30.

Según el responsable del operativu policial, fueren los convocantes quien solicitaren el dispositivu pa caltener separaos a unos manifestantes sobre los que nun garantizaben el control. Nun va ser la CSI quien dea creitu a les versiones policiales y, sía que non, señalamos al Delegáu del Gobiernu español, Gabino de Lorenzo, como responsable últimu d’esta actuación al igual que de les enantes señalaes. Sicasí, nun escaecemos tampoco'l celu col que davezu UXT, CC.OO. y USO “protexen” les sos convocatories de les voces crítiques por aciu gordones de seguridá, más pensaos en controlar a los “aponderaos” qu'a los violentos uniformados. Tampoco queremos dexar de pasar el fechu de que nenguna d'estes organizaciones convocantes interesar pol estáu del deteníu, a pesar de ser informaos de la necesidá de brinda-y asistencia xurídica. Confiamos en qu'emitan un comunicáu de refuga y tomen bona nota pa enzancar que, nel futuru, la Policía y les empreses de comunicación puedan semar falses divisiones (coles diferencies reales yá tenemos abondo).

Por tou lo anterior, dende la CSI esiximos la dimisión de Gabino de Lorenzo, sumándonos al refugu espresáu por diversu colectivu y persones a títulu individual, y llamamos a la solidaridá frente a los casos de represión, independientemente de si les persones represaliaes cunten o non con respaldu de dalguna organización en concretu.

Queremos tamién recordar que la represión non solo ye policial: los retayos, como los recoyíos nos nuevos presupuestos xenerales, formen parte del mesmu dispositivu destináu a suminos nel mieu y na depresión.

A lo último, refugamos la violencia patronal y la represión policial sufierta n'otros llugares del Estáu español; especialmente la reclusión preventiva en Barcelona de trés manifestantes que, de llograr peracabase, sentaría un peligrosu precedente pa quien vamos siguir enfrentándonos a esta estafa llamada crisis.

¡Si toquen a una, tóquenmos a toes!

CORRIENTE SINDICAL D'IZQUIERDA

Los retayos de Rajoy:

- Gastu social: 4,3%.
- Educación: 21,9%.
- Cultura: 15,1%
- Sanidá: 6,8%.
- Investigación y Desendolcu: 25,6%.
- Fomentu d'emplegu: 21,3%.
- Gasto en desempleo: 5,5%.
...
- CASA REAL: 2,00%

Probes...

Sobro'l terrorismu...

El gobiernu del PP t'acabantes d'anunciar que tratará de facer que delitos de vandalismu seyan magar d'agora delitos de terrorismu. Pali que pali tornamos a los tiempos del franquismu puru, anque la burguesía hexemonista españolista tapeciera la Dictadura del Capitalismu y l'Imperiu Español con una democracia parlamentaria que nin tan siquier algama unos mínimos democráticos d'Estáu democráticu-burgués. 

Poro, énte la más que prevista fola d'aición social y resistencia na cai pa preservar los pocos drechos sociales y políticos qu'hai nel Estáu Español el Gobiernu del PP agora mos diz que cualesquier desorden públicu sedrá catalogáu de terrorismu. Si bien nun queda claro que quier dicir eso de terrorismu lo ciertu ye que con esta midía ta nidio que lo que se quier ye amedrentar a les y los trabayadores, aparar la rebelión social y meter a calzaor les sos reformes ( o agresiones) ultralliberales y antisociales. Paez que quieren enllenar la carcele de muyeres y homes que solo lluchen pol so presente y futuru. Nesi xuegu, el PSOE punxo delles piedres yá, como siempres (vease'l casu de la reforma llaboral de 2010, por exemplu) faciendo más severes les lleis y sentencies por reivindicaciones populares nes cais ya inclusu n'ámbetos priváos.

El PSOE, el cual fai unos años empobinó un grupu terrorista d'Estáu col señor X a la cabeza escaez como siempres tolo que foi, mexa enrriba la so hestoria y conderga a la disidencia del so partíu a un apartheid que ye abondo inoráu y que si bien dende les nueses posiciones nun mos interesa un res ye al empar bon espeyu de la democracia interna que tienen ellí llantada.

A colación colo mentáu, tanto del tema'l terrorismu como l'asimilación del PSOE de los dictáos del capitalismu ultra y l'españolismu más falanxista dexamos equí esta cita de Pablo Iglesias. En 1908 el Gobiernu Español promulgó una llei antiterrorista ( non tan severa como la que quier promulgar agora, por ciertu). El fundaos del PSOE, Iglesias, al analizar la llei y xulgala dixo les pallabres que vienen darréu un 23 de xineru énte'l Congresu: "Nós falamos con muncha claridá a los nuesos; y cuando-yos decimos qu'hai que poner la man sobro la riqueza pa tresformala, facemos-yos notar que fadrémonos por mediu de la revolución, esto ye, por mediu de la violencia. Y como na violencia tan comprendios el fusil, el puñal, la dinamita, etc., a nós se mos aplicará l'artículu 55 [...] Si agora mos pesllais el camín, nin mos amedranaremos nin mos cruciaremos de brazos; diremos pol otru; sedremos terroristes; y tar seguros que nun sedremos de boquilla, de que daremos cara".

Terrorista ¿quién? Democracia ¿ónde?

NON AL FACISMU "DEMOCRÁTICU" ESPAÑOL

La violencia policial dexa un nuevu afroamericanu asesináu nos EE.XX

La policía de Pasadena (California) finó cola vida d'un mozu de 19 años.


L'actuación policial nos EE.XX dexó recientemente un nuevu afroamericanu asesináu por mor de l'actuación de les "fuercies de seguridá", tres una denuncia de robu d'una mochila fecha por un ciudadanu, qu'alvirtió que los lladrones diben armaos. En casos d'esi calter la policía activa'l sistema de grabación del so coche pa filmar el procesu de detención, práutica que nun se punxo en marcha nesti casu.

Asina, el desendolcu d'un tirotéu finó cola vida de Kendrec McDade, un mozu universitariu de 19 años fináu polo tanto en sospechoses circunstancies, muerte que s'amesta a la d'otru ciudadanu de raza prieta asesináu en Febreru pola policía. Nel momentu del so asesinatu nunca caleya, McDade sólo lllevaba con elli un reproductor d'audiu.

El fechu ta causando maltar y tensiones raciales na zona sur de los EE.XX, por mor de la desmidía actuación policial pa colos ciudadanos y ciudadanes de raza prieta nos EE.XX, especialmente na zona sureña.

Fonte: Infoasturies.net

La renta de los asturianos y asturianes retrocedió a niveles de 2007

Sicasí, l'espoxigue de los precios ye del 11%.


Según los datos asoleyaos recientemente pol Institutu Nacional d'Estadística (INE), anguaño los ingresos medios de los asturianos y asturianes s'asitien en 21.976 euros, demientres que nel añu 2007 les cifres que se rexistraben nel nuesu país yeren de 21.678, sólo 300 inferior a les cantidaes que, cinco años depués, manexamos n'Asturies. Sicasí, el costu de la vida medró nestos cinco años un 11%, polo que'l poder adquisitivu de los asturianos y asturianes menguó.

En cuantes al Productu Interior Brutu (PIB) nel periodu 2008-11, Asturies ye'l cuartu territoriu del estáu onde más menguó (-1,57%), sólo per detrás de Castiella-La Mancha, Murcia y Comunidá Valenciana. En términos globales, el PIB d'Asturies en 2011 foi de 23.175 millones, el cuartu más pequeñu del estáu sólo per detrás de Cantabria, La Rioxa y Estremadura. El pesu d'Asturies nel conxuntu del estáu ye del 2,2%.

En toles modalidaes citaes Asturies ta perbaxo de la media estatal, nel casu del PIB per cápita cada asturianu y asturiana cunta con un Productu Interior Brutu 1.300 euros inferior al de la media del estáu español.

Fonte: Infoasturies

Vidiu de la CSI: El día de fuelga xeneral n'Asturies

Esti vidiu, de 24 minutos, amosa gran parte de lo trescurríu demientres la xornada de fuelga xeneral nel nuesu país, anque induldablemente falten munches coses que nun recoye'l documentu audiovisual. Ye pernecesaria otra fuelga, coordinada y dirixía dende'l sindicalismu de clas nacional y contra'l capital y les sos agresiones violente en forma de decretazos.

El calter de clas del facismu, de Giorgi Dimitrov en PDF y n'asturianu.

Giorgi Dimitrov

El cálter de clas del facismu  ye un breve pero esclariador trabayu alredor de la ñatura de les idees facismu y la so relación cola ideoloxía más reaccionaria y xabaz de la burguesía y la oligarquía. Esta solo ye una de les obres de Giorgi (Xurde) Dimitrov qu'aborden un estudiu del facismu como ideoloxía. Recordemos que Dimitrov foi secretariu xeneral de la Internacional Comunista ente 1934 y 1943, mentantu la so actividá política escribió munchos trabayos alredor del facismu.

Agora, por primer vez, podemos esfrutar con esti breve pero bayuroso artículu en llingua asturiana, pa facer memoria y atalantar qu'hai que tar soyertes al facismu d'ayeri y güei, especialmente anguañu, cuando paez que la burguesía ve peligrar les sos estructures de poder, los sos intereses y los sos porgüeyos frutu del descontentu'l Pueblu Trabayador. Pa poder ver y descargar l'archivu en PDF calcar enriba'l títulu en moráu qu'hai nestra entrada o nos enllaces qu'hai darréu:

https://rapidshare.com/files/550883140/calter_clas_facismu_dimitrov.pdf
https://rapidshare.com/files/550883140/calter_clas_facismu_dimitrov.pdf
https://rapidshare.com/files/550883140/calter_clas_facismu_dimitrov.pdf
https://rapidshare.com/files/550883140/calter_clas_facismu_dimitrov.pdf

La militancia de Darréu secundó la fuelga, caltuvo una dinámica de llucha y salió a la cai colos sindicatos de clas asturianos.

Na xornada d'ayeri, 29 de marzu, los y les militantes de la organización política de mocedá Darréu tuvimos sofitando la convocatoria de fuelga xeneral al llau del Pueblu Trabayador Asturianu pero ensín entrar nel xuegu posibilista y negociador de les grandes centrales sindicales CCOO-UGT.

Nesta xornada, desenrolló aiciones d'axitación y propaganda y entamó una dinámica d'aición reivindicativa na cai. Per otru llau participamos na manifestación convocada polos sindicatos de clas asturianos CSI, SUATEA y CGT na ciudá de Xixón, la cual espeyó qu'hai otra forma de plantar cara a la reforma llaboral, dende la coherencia, l'anticapitalismu y ensín lliberáos.

Tornamos a dicir qu'esta reforma llaboral ye una agresión direuta contra los drechos sociales y llaborales y dexa a la mocedá asturiano nuna situación inda pior a la que yá tien enriba. Recordar que'l paru xuvenil, la precariedá llabora y la emigración forciada son realidáes mui presentes n'Asturies de güei y qu'estes midíes solo valen pa empeorar la situación y salvar la riqueza y los porgüeyos d'unos pocos.

Asina, llamamos a los mozos y moces del país a siguir cola llucha, contribuyendo cola movilización constante a la conformación d'una fuercia política y social que seya capaz d'aparar estes imposiciones españoles y neolliberales nel nuesu país y construyir n'Asturies una alternativa al capitalismu y l'españolismu qu'imponen les estructures del poder vixente.

¡La llucha ye l'únicu camín! ¡Mocedá llucha pol to futuru!

Pol autodetermín, la sobernía nacional d'Asturies y el socialismu: ¡Abaxu'l capitalismu!

Semeyes y testu recoyíu de www.darréu.org

Modelu de solicitú a Alimerka Supermecados pal usu del asturianu

Déxovos equí un modelu de solicitú a Alimerka Supermercados pa reclamar l’usu del asturianu y de la toponimia oficial. Podéis mandala a la siguiente direición de corréu electrónicu: atencion_al_cliente@alimerka.es

O nel so formulariu de contautu: http://www.alimerka.es/web/index.php/contacto

A l’atención d’Alimerka Supermercados:

El so grupu empresarial tien l’orixe n’Asturies y anque nos años últimos espardió’l negociu fuera del mesmu, caltién llazos bien importantes con esti país. Da trabayu a cientos d’asturianos y pelos sos supermercaos pasen miles de persones al añu. Poro, faise más importante que caltengan los sos raigaños y amuesen el reconocimientu que-y deben a esta tierra. La llingua propia d’Asturies ye l’asturianu y l’usu que fai la so empresa del idioma ye nulu.
El seutor alimentariu tien un bayurosu léxicu que podríen tar usando. Per otru llau, incumplen la llei al nun usar la toponimia oficial asturiana, nin na so web, nin na publicidá que reparten.
Poro, como falante d’asturianu y usuariu, reclamo al traviés del unvíu d’esti corréu: que contemplen l’usu del asturianu mesmo de forma escrita qu’oral nos sos establecimientos d’Asturies, que faigan usu del asturianu na so publicidá y páxina web y que cumplan cola toponimia oficial en tolos ámbitos.
Munches gracies pola so atención.

Del blogue Fueya en Blanco

El nuevu panorama n'Asturies depués del 25-M.

Munches llínies de tinta fueron escrites estes selmanes n'Asturies ente la convocatoria d'eleiciones a la Xunta Xeneral y la fuelga xeneral del pasáu xueves. La prensa sucursalista y burguesa obviamente fexo'l so papel, desplicando la so visión a la ciudadanía, la visión burguesa y colonialista.

Los resultáos de les eleiciones nacionales nun pudieron ser más desgraciaos p'Asturies y la so supervivencia como nación. La mafia pseudo-socialista y españolista de la FSA trunfó una vegada más, amosando la rede que tien implantada nel nuesu país y el so furrulamientu clientelar. FORO y PP obtuvieron unos bonos resultáos pa la so situación de decretazos y crisis de gobiernos, mentanto Izquierda Xunida algamó bonos resultáos relativos a fuercia de fagocitar y aprovechase de la llucha de la braera izquierda asturiana, en tolos ámbitos y xacios. Les coses a la fin nun camudaron tanto respeutu a enantes del 25 de mayu de 2011.

Pero, ciertamente, dende una perspectiva patriota y soberanista, lo que más esmolez o asina s'entiende dende esti blogue, ye la entrada d'UPyD, partíu ultra-nacionalista español y de lo más reaccionariu con Ignacio Prendes a la cabeza, con un diputáu. Los acontecimientos y los votos d'emigrantes fueron claves pa da-yos el papel amás de llave de gobiernu, polo que meyor nun-yos podía salir la xugada. Independientemente de la importancia que-y queramos dar a les eleiciones, pues siempre tenemos que tener en cuenta que formen parte del xuegu del capital, el fechu de qu'UPyD entre na Xunta Xeneral ensín gran nivel de militancia y ensín representación nos conceyos d'Asturies ye una llaceria. Esti resultáu ye un síntoma más de la desesperación coleutiva y de la gran estructura del Estáu pa qu'Asturies siga inorando la so condición de colonia y entamar a llantar resistencia daveres.

Nun podemos obviar que los medios de comunicación "asturianos" dieron-y una importancia terrible a esa formación ultraespañolista. La Nueva España, RTPA, El Comercio, La Voz, etc, ficieron campaña por UPyD al empar que poles sos opciones inmovilistes tradicionales. Paez ser qu'ente'l poder mediáticu hebo un gran interés en meter a UPyD na Xunta Xeneral d'Asturies. Esos intereses respuenden a les presiones ya intereses del uniformismu españolista y los intereses de les grandes empreses españoles pa somorguiar más Asturies, obtener más plusvalía al travíes d'una ferramienta perbona: el colonialismu.

Ye mui negativu qu'entre na Xunta Xeneral un partíu que nun reconoz l'asturianu como llingua, y cuando lo fai nun lo ta faciendo de verdá. Un partíu que ta contra la oficialidá "ensín rodeos", ensín llínies d'actuación de normalización. Un partíu que diz que non direutamente tamién al carbón asturianu, que conderga a tolos seutores económicos asturianos en pro de "la concentración. Un partíu, UPyD, que ta na so bas ideolóxica contra les propies Comunidaes Autónomes, anque mazcariten esi discursu, esi mensaxe. Que quier finar cola estructura territorial tradicional de los conceyos. ¿Cómo un partíu tan direutu y reaccionariu algamó representación na Xunta Xeneral?

Hai dellos fautores, prensa, desencantu, intereses económicos y lliquidacionistes, nel sen cultural y nacional, etc. Pero lo ciertu ye qu'esi resultáu pue suponer la derrota definitiva d'Asturies como nación y como Pueblu Trabayador. Les formes de neocolonialismu adautaes al nuesu país tan lloñe del modelu Africa, eso ye evidente, pero les fuercies polítiques sustentaben esi apartheid y esa estructura colonial teníen dalgo de precuru por tapecer esi conflictu, espeyar normalidá democrática y asumir dalgún rol de la propia identidá ya idiosincracia asturiana.

Agora, con UPyD, y cola previsible españolización del restu de partíos con representación paez que vamos entamar a pasar de nuevu a un marcu de colonialismu puru, con un Estáu Español que va violar los intereses y necesidaes d'Asturies y va inorar ciertu equilibriu ente'l país y l'Estáu al que tamos amarraos. Lleguen tiempos difíciles, onde los elementos identitarios d'Asturies van ser persiguíos y los intereses y necesidáes del Pueblu Asturianu tamién. L'equilibriu políticu, económicu, social y cultural va decantase del llau del centralismu y la posición d'Asturies va ser definitivamente marxinada. Asperemos que'l "fautor UPyD" nun torne a apaecer pela Xunta y nes prósimes eleiciones nun tornemos a topanos con esta xente, anque'l restu son más de lo mesmu. La falta de capacidá organizativa y la nula representación nos conceyos pue facer que'l pasu d'UPyD pela Xunta Xeneral seya dalgo anecdóticu.

El nacionalismu/soberanismu asturianu

Fuercies nacionalistes yeren dos les que se presentaben a les eleiciones, Andecha Astur y Bloque por Asturies-Unidá Nacionalista Asturiana, xunta a la marca ecoloxista (residual) Los Verdes - Grupo Verde estos últimos. Ente les dos fuercies, nun s'algamaron 3.000 votos. La crisis presente nel soberanismu asturianu ye yá fonda y vien d'atrás, con una dinámica d'escisiones d'escisiones y de perda progresiva de bas social y militante.

Los murnios resultáos son espeyu de una gran perda de bas social. Nun hai alpenes militantes y n'Asturies la figura del simpatizante activu ye cuasi inesistente. Per otru llau, mesmamente a nivel propagandísticu el nacionalismu asturianu tien series deficiencies, y si bien el nivel de trabayu de cai d'Andecha Astur nestes eleiciones nun foi malu, lo ciertu ye que'l nivel queda mui lloñe de meyores époques. La conclusión básica nel nacionalismu asturianu, a la espera d'analis más ellaborás y posáos, ye que falta muncha xente nel proyeutu nacional y social.

Esto lleva a que nos conceyos nun tengamos conceyales, nin sedes de les organizaciones, nin influencia nos movimientos sociales cuasi, nin tampocu nel ámbetu vecinal y cultural. La xuntanza ente BA-UNA y AA a nivel nacional baxo unos mínimos asumibles y respetando la soberanía organizativa ye inútil si nun miramos con llupa esi fenómenu de falta de bas social. El nacionalismu asturianu, pola so propia ñatura ideolóxica nunca va ser beneficiáu pol Estáu o los sos medios, polo que'l camín nun ye facer un movimientu políticu con cuatro persones con traxe y corbata ya inorar crear llocales, bas social, infraestructura a la fin, lo que ye imposible ensín militantes, munchos militantes son necesarios, cientos o miles, y non decenes ( poques) como anguañu.

Hai que posar un pocu y mirar los conceyos, la xente, les posibilidaes de crear bas social y entamar dende ceru. Enantes de nada, hai que fuxir de que mos vean como "los del bable" y tener en cuenta la llucha social. Hai que saber analizar la crisis capitalista actual y ser referentes de rempuesta n'Asturies, ye un mínimu que mos tendríemos que poner d'equí a 5-6 años.

Dos consideraciones pa finar esti artículu, que ye una opinión tovía en caliente y pocu construyía. La taútica reformista y posibilista de BA-UNA, con un discursu autonomista y con un discursu d'izquierda cuasi calcáu al d'IU, d'asimilación parcial del capitalismu y mui averáu a posiciones socialdemócrates frañó. La teúnicu de tratar d'imitar a los partíos del sistema, ñegar cuestiones como la nacionalidá d'Asturies (recordemos a Palacios nuna entrevista con Neira, tratando de nun dicilo, con complexos nesi sen) y nun analizar la realidá baxo criterios de clas y poder nun foi la meyor manera d'algamar representación pa ellos. Poro, quiciabes habia qu'afitar unes bases mínimes, non posibilistes anque tampocu seutaries pero ensín complexos. Cuestiones como l'autodetermín y la necesidá de superación del capitalismu son cuestiones irrenunciables y que siempres tienen de tar ehí.

Otra consideración pa zarrar ye la poca fuercia y maduré política que tien eso que se suel nomar "asturianismu cultural". Ta nidio que nel ámbetu cultural l'asturianismu tien una incidencia importante n'Asturies pel momentu, mui perriba de la influyencia del "asturianismu políticu". Analizando los númberos, podemos ver como eses persones que conformen y dinamicen la cultura tradicional del país dieron-y la espalda al nacionalismu y ye previsible qu'esos votos vayan siempres pa IU, PSOE y a vegaes FORO. Ye dicir, l'asturianismu cultural nun representa'l nacionalismu, anque se sirva d'ellí pa según que coses. Nun quier dicir esto que'l nacionalismu políticu tea de dexar de sofitar esi ámbetu cultural pero ye pernecesaria la crítica y una mayor presión política sobro esi coleutivu, faciendo d'ellí una parte fundamental del movimientu patriota del futuru movimientu de lliberación nacional asturianu.

Ensín persones nin movimientu nun habrá votos enxamás. Col parlamentarismu nun se va a dengún
sitiu de cara a tresformar la sociedá y emancipar al Pueblu Asturianu pero ta nidio que necesitamos un mínimu, unos espacios nos conceyos y na Xunta pa normalizar lo que tien de venir a ser un movimientu políticu masivu dalgún día. Hasta qu'eso llegue, siguiremos resistiendo les agresiones d'España ya inda más agora, que se fai más que necesariu.

Asturies, un pueblu obligáu a resistir.

Xixón 29 de marzu de 2012. 15.000 asturianxs coherente na cai.

Pesie a los munchos golpes del españolismu, el caciquismu, el capital, la represión y les traiciones al nuesu país de patriotes d'ordenador y sindicalistes de cachopu, puru y Mercedes ASTURIES NUN SE RINDE.