¡Axuntate a la causa de Rosa Diez! ¡Solidaridá!

Chancia aparte la situación ye pa llorar. Énte un nuevu Día de les Lletres y llevando tola selmana sintiendo falsos bonos propósitos y babayaes como que la llingua pervive lleendo llibros n'asturianu (asina y yá ta) per parte de políticos, cabezaleros d'instituciones públiques cayíes nel sucursalismu español y enviendo como la castellanización medra ca día que pasa nun podemos dicir otra cosa; la mesma de siempres, qu'hasta nós tamos fartos yá de repetila: ¡L'ASTURIANU LLINGUA OFICIAL YÁ!

Amestaos dos nuevos documentos na Biblioteca

Un país por construyir

La Biblioteca Dixital d'esti blogue ufierta dos documentos más, per un llau enllazamos al Informe sobre la repesión y non Reconocencia de los drechos llingüísticosd'Asturies, asoleyáu pola Academía de la Llingua Asturiana y que constituí un documentu completu, direutu y afayaizu pa entender la situación del idioma d'Asturies y la represión y minorización que se fai del coleutivu astur-falante.

Per otru llau, amestamos un documentu hestóricu del nacionalismu asturianu, entituláu Avilés, el primer conceyu en colingar la bandera d'Asturies, un documenta de Conceyu Bable onde desplícase les circunstancies d'esti fechu y faen un analís políticu de la propia situación, tamos falando de 1977.

Nos díes vinientes xubiremos más cosuques interesante a la Biblioteca. Encamentamos la llectura de los nuesos documentos y agradecemos enforma aportaciones, que podeis unviar a frayandocadenes@gmail.com

Darréu apautase a la manifestación del Día de les Lletres Asturianes y reivindica la oficialidá como únicu camín pa salvar la llingua del país.

La organización política xuvenil Darréu quier espresar una vegada más nel Día de les Lletres Asturianes la so esmolición pa cola situación de la llingua propia d'Asturies: l'asturianu. Nun fai falta acudir a estudios sociollingüísticos pa saber que'l futuru del idioma asturianu ye permuniu col proceder que se ta dando anguañu, con más de 30 años de discriminación, rebaxamientu social y represión escontra'l coleutivu astur-falante, un importante seutor del Pueblu Asturianu.

Dende Darréu atalantamos nesti Día de les Lletres que l'únicu futuru del asturianu ye la so Oficialidá y el más fondu respetu por esa declaración d'Oficialidá. Queremos recordar qu'hai unos años dellos conceyos d'Asturies declararon qu'oficializaben la nuesa llingua y l'Estáu Español baltió estes declaraciones. Los políticos d'Asturies siguen la so zuna pa col asturianu y van munchos pasos per detrás de la sociedá asturiana, ñegando sistemáticamente los drechos llingüísticos a los asturianos, cuando non reprimiéndolos pol fechu de reclamar esi drechu.

La urxente declaración d'Oficialidá tien de venir acompañada d'una Llei de Normalización Llingüística, qu'axuste esi modelu d'oficialidá completa y camude'l camín de desaniciu cultural y llingüísticu que se lleva dando na nación asturiana dende hai bien d'años por mor de los intereses del nacionalismu españolista estremista, que tien l'envís de desaniciar les identidaes nacionales presentes nel Estáu Español y crear un modelu cultural “español” homoxeneu y artifial al serviciu de los intereses del poder

Asina pues, la militancia de Darréu va tar presente na manifestación pola oficialidá entamada pola Xunta Pola Defenda de la Llingua Asturiana, qu'entamará a les 19:30 hores d'esti vienres 4 de mayu y que saldrá de la Estación del Norte d'Uviéu. Dende la organización Darréu llamamos a la xente mozo a participar na convocatoria y reivindicar los nuesos drechos llingüísticos.

Estrayíu de www.darreu.org

Andecha Astur llama a partipar nel manifestamientu pola oficialidá

La situación d’estrema debilidá na que s’afaya la nuesa llingua nacional obliga a xuncir toles fuercies perriba de cualisquier diferencia, nuna espresión más de la necesaria xunidá d’aición.

Andecha Astur llama a participar nel manifestamientu pola Oficialidá de la Llingua Asturiana convocáu pa mañán n’Uviéu, (19:30 Estación de la Renfe) camentando que la situación na que s’afaya la nuesa llingua nacional obliga a superar cualisquier diferencia que puea dase ente los estremaos axentes socio-políticos que defenden los drechos democráticos asturainos en materia llingüística, y per ende la Oficialidá comu un primer pasu p’algamalos.

Andecha Astur denuncia una vuelta más la situación predemocrática que carecemos n’Asturies tamién na tema llingüística, la responsabilidá de toos y caún de los partíos con representación na Xunta Xeneral, y la estrema hipocresía d’Izquierda Unida n’Asturies, que reiteradamente fai declaraciones favoratibles a la Oficialidá de la Llingua Asturiana, pero que sistemáticamente s’escaez d’elles en cuantes algama cualisquier triba de capacidá decisoria, tantu a nivel municipal comu de “Principado”, onde negocia otru pautu col PSOE nel que la Oficialidá de la llingua ye la primer escaecía.

Ello asina, Andecha Astur denuncia’l xenocidiu cultural ya identitariu al que ta sometíu’l Pueblu Asturianu, desixe l’aplicación de los drechos humanos en materia llingüística internacionalmente reconocíos, la declaración imediata de la oficialidá de la llingua asturiana y l’aprebación d’una Llei de Normalización Llingüística que desendolque la so aplicación; y reitera’l so llamamientu al conxuntu de la sociedá asturiana a participar nel manifestamienrtu de mañán pola Oficialidá,n’exerciciu práuticu de lo que tien de ser la xunidá d’aición.

 

Fonte: www.andecha.org

 

Darréu participó esti primeru de Mayu na movilización entamada polos sindicatos de clas en Xixón.

La Organización de Mocedá Independentista Revolucionario Darréu, participó esti martes na manifestación cellebrada en Xixón con motivu del 1u mayu, entamada polos sindicatos Corriente Sindical d’Izquierda, SUATEA y CGT. Darréu participó nesta movilización baxo una pancarta col llema: “La clas obrera tien más necesidá de respetu, que de pan”. ¡Mocedá faite respetar!, acompañada de banderes del país y banderes socialistes.

Dende Darréu llamamos a la mocedá a seguir lluchando y organizase polos sos drechos como asturianos y como trabayores, al marxe de sindicatos foriatos amariellos que namái quieren enriquecese a costa de la Pueblu Trabayador Asturianu, sobremanera de la mocedá. Aportó’l momentu nel que la xente mozo xunta ya organizada lluche por superar la situación predemocrática que carez Asturies y en defensa de los drechos que-y correspuenden como Pueblu.

Nesti añu ainda más si ye posible, la mocedá asturiano sigui viviendo una situación llaceriosa, ensin futuru dalgunu, condergada a la precariedá y la emigración forciada, amás les moces y mozos que lluchen en defensa de los sos drechos s’alcuentren rápidu cola represión. L'únicu camín posible ye’l de la llucha y l'autorganización del Pueblu Trabayador Asturianu de cara a conquistar tolos sos drechos sociales. Una llucha en defensa de los sos intereses coleutivos basada na defensa de los drechos nacionales d'Asturies, el socialismu y la solidaridá ente pueblos.

De www.darreu.org

La XDLA llama a manifestase esti vienres 4 de mayu, Día de les Lletres Asturianes

La Xunta pola Defensa de la Llingua Asturiana (XDLA) presentó na mañana d’esti xueves 4 de mayu la Manifestación pola Oficialidá, una marcha que va salir de la Estación del Norte d’Uviéu esti vienres 4 de mayu, Día de les Lletres Asturianes, a les 19.30 hores. Na rueda de prensa, Carlos Pulgar y Llucía Menéndez, representantes de la Xunta pola Defensa de la Llingua Asturiana y Xunta Moza, respectivamente, convocaron a tola sociedá a participar nesta movilización.

Como tolos años, celebración y revindicación van dir de la mano. «Nun periodu de caos políticu, con dos contiendes electorales nun añu y la consiguiente parálisis alministrativa, ye'l momentu pa esixir a la clas dirixente asturiana que supere la so incompetencia y inorancia avezada, superando tamién el so descreitu con altura de mires, satisfaciendo la reclamación de la oficialidá», esplicaron los representantes de la XDLA. De toles maneres, destacaron la sentencia del Tribunal Supremu que da la razón al Tribunal Superior de Xusticia d'Asturies al anular la ratio mínima esixida pa dar asturianu en Secundaria: «Esperamos qu'esti avance sía un puntu d'inflexión na situación de la llingua nel sistema educativu».

La Manifestación pola Oficialidá ye una cita que vien siendo vezu dende 1987, cuando la XDLA convocó una concentración énte la Xunta Xeneral el Día de les Lletres Asturianes qu’acabó nuna marcha improvisada pola cantidá de xente qu’acudió. Dende entós, tolos años la organización cívica vien entamando una manifestación pa recordar una de les asignatures pendientes pa la sociedá asturiana, lo que, en palabres de los representantes de la XDLA, ye «ún de los défictis democráticos más importantes de la historia contemporánea d’Asturies»: la falta de reconocencia oficial de derechos llingüísticos pa una parte de la población que sigue ensin tenelos. Por eso, pidieron qu’esti Día de les Lletres «toles persones arguyoses de pertenecer al movimientu de revindicación llingüística y toes aquelles qu'aprecien la dignidá y el futuru del idioma» acudan a manifestase.

Fonte: Les Noticies

Compromisu por Avilés entama mañana una clas d'asturianu na cai.

Compromisu por Avilés, coincidiendo cola selmana que les hipócrites instituciones asturianes dediquen al nuestru idioma, entama n'El Parche una clase d'asturianu col envís de denunciar la situación llaceriosa na que s'atopa l'idioma.

Manifiestu de los sindicatos de clas asturianos coincidiendo col 1u mayu, énte unes 10.000 persones.

Llevamos dellos años viendo cómu cada Gobiernu que pasa a recoyer la so ración del peselbre, nun va a la gueta d’otra cosa que facer más grande esa descomunal estafa qu’intenten tapecer baxu´l nome de cris.

Yá nun hai forma de cuntar la cantidá de millones d’euros que nos roben pa sanear les arques de la banca. El fraude fiscal yá non solo nun se persigue, sinon que s’amnistía. Y la economía somorguiada entama a tener un tamañu mayor que la economía llegal. Los ricos faen el so agostu y faen xorrecer la so riqueza.

Demientres, el paru cébase cola clas obrera. La probitú y la probitú severa entamen a ser normales nes nueses cais y los drechos llaborales yá formen parte’l pasáu.

Al empar, l’acosu y derribu a la Sanidá, la Educación y los Servicios Sociales, van facer que perdamos la nuesa salú, que los nuesos fíos y fíes nun puedan estudiar y que les presones con necesidaes dependan de lo qu’atopen na basoria. Los probes enxamás tienen ocasión de facer el so agostu; los probes namás pueden emprobecese más tovía.

¿Pétavos que demos datos?. Pues vamos dalos, porque datos, llaceriosamente, ye lo que nos sobra. Seis millones de paraos y paraes nel Estáu español. Cien mil n’Asturies. El 40% ya nun cobra nada y otro 30% cobra menos de 600 euros. Un millón setecientes mil families, 35.000 d’elles asturianes, tienen a tolos sos miembros en paru, más de la metada los y les pensionistes cobren menos de 600 euros, el 55% la mocedá ta nel paru, mediu millón de families yá perdieron les sos viviendes y una de cada cuatru presones (el 25% la población) ta na probitú.

Nun hai disculpia. Tenemos de dar un pasu alantre na defensa los drechos obreros.

La Reforma Llaboral del Gobiernu fae desapaecer el Drechu Llaboral pa imponer el Drechu Empresarial. Asina les coses, yá nun puede haber más concesiones, yá nun puede haber más negociaciones. Porque lo que ta en xuegu nun son meyores salariales o llaborales; lo que ta en xuegu son coses tan básiques comu’l nuesu pan, la nuesa salú, la nuesa cultura y el nuesu bientar. El nuesu y el de Los nuesos fíos y fíes.

Asina de crudu ta’l panorama. Por eso, tenemos de dexar nidies dalgunes de les coses que tenemos de facer.

La nuesa actuación nes empreses y centros de trabayu tien de ser d’una firmeza estraordinaria; tenemos de tornar cada puestu trabayu nuna trinchera que tenemos de defender cueste lo que cueste.

A la defensa de los y les trabayadores, tenemos de xuncir la llucha de quienes nin siquier tienen drechos llaborales, de quienes nin siquier tienen una empresa onde trabayar y de quienes, magar tean un puestu trabayu, lo que cobren nin siquier merez el nome de salariu.

Vamos al fondu la custión: seis millones de paraos y paraes son doce millones de brazos cruzaos que tienen de remangase, xunta’l restu trabayadores, pa entamar a ganar na cai lo que nos roben nos despachos.

Y la esplosiva situación social que ta creándose, ta retrucándose dende’l Gobiernu con una escalada descomanada de la represión. La brutalidá policial, les detenciones arbitraries y la proliferación de fuertes sanciones económiques ensin sentíu nengún, desanicien, na práutica, tolos drechos y llibertaes ciudadanes. La nueva normativa d’orde públicu anunciada pol Ministru l’Interior, mándanos a dómines pasaes, qu’enxamás pensamos que podíen tornar.

Y comu yera d’esperar, la CSI, la CXT y SUATEA nun s’escapen d’esa represión. Identificaciones arbitraries, seguimientos policiales o sanciones de fasta 30.000 euros por actos tan “pelligrosos” comu facer pintaes, pegar cartelos o encender bengales, son los primeros pasos nuna política represiva que, ensin dubia, va dir endureciéndose col tiempu.

Nesti escenariu, tenemos de dar una rempuesta decidida. Porque quieren despedinos, quieren dexanos ensin vivienda, quieren quitanos la nuesa salú, quieren tornanos en man d’obra analfabeta y, si protestamos, múltennos, golpéennos, detiénennos, encarcélennos y, llegáu’l casu, mátennos. Y esto ye, nin más nin menos, lo que ta pasando.

Van echásenos enriba tiempos perdifíciles y la nuesa rempuesta nun puede ser un llaváu de cara asemeyáu al que tan ufiertando los nomaos sindicatos mayoritarios.

Les nueses movilizaciones tienen d’algamar la firmeza y la contundencia afayaíces pa frenar los gravísimos ataques que la clas obrera ta sufriendo.

Nun vamos dexanos llevar pol pesimismu, nun vamos cayer na desesperanza y, sobrotou, vamos dexar bien nidio que nun tenemos miéu, que nun nos dan miéu, que somos el pueblu, qu’hai muncha fuercia nel brazu d’esti pueblu y que vamos utilizar esta fuercia pa defender a la clas obrera.

¡PUXA’L MOVIMIENTU OBRERU!
PUXA LA CLAS OBRERA!
¡PUXA ASTURIES!

Rafael Fdez Tomás denunció l’escaezu d’Asturies pa cola obra del Conseyu Soberanu

Nel Clú de Prensa Asturiana de Xixón.

Ayeri Rafael Fernández Tomás, nietu del hestóricu dirixente obreru asturianu Belarmino Tomás –Presidente del Conseyu Soberanu d’Asturies y Lleón y, anteriormente, Presidente del segundu comité revolucionariu de la República Independiente d’Obreros y Campesinos d’Asturies- desendolcó una conferencia alrodiu de los documentos rellativos al Conseyu Soberanu d’Asturies y Lleón, más de 60.000 pieces hestóriques del patrimoniu asturianu que s’atopen en Ferrol, según denunció Fdez Tomás, tres un treslladu fechu na madrugada.

Amás, el ponente denunció la falta de voluntá de los distintos gobiernos asturianos por, en primer llugar, clasificar y poner a dimposición n’archivos esti patrimoniu documental asturianu y, en segundu llugar, por nun facer nada depués del treslladu a tierres gallegues de la documentación. Amás, afitó la importancia del conocimientu de la xesta de los obreros y obreres asturianes recoyía nos documentos secuestraos.

L’encargáu de presentar l’actu foi’l militante d’Andecha Astur y miembru de Conceyu Abiertu, Mariu Arbesú, en representación del únicu seutor políticu asturianu que lleva vindicando dende va décades la figura de Belarmino Tomás como cabezaleru del llegáu hestóricu que los nuesos antepasaos dexaron al pueblu trabayador asturianu colos sos actos revolucionarios y emancipatorios.

Bolivia nacionaliza la filial de REE

Empresa tresportadora d'enerxía.

El gobiernu bolivianu anunció la nacionalización de la filial de "Red Eléctrica Española" nel país, la denomada "Transportadora de electricidad", de la que REE cuntaba col 73% de les acciones con unos activos fixos valoraos en dalgo más de 100 millones d'euros, anque la mayor incidencia d'esta filial s'asitia n'Ecuador. El presidente Evo Morales ordenó a les fuercies armaes custodiar les instalaciones de la compañía pa preservar los intereses nacionalizaos.

Según el discursu de Morales, "como xustu homenaxe a los trabayadores y al pueblu bolivianu que lluchó pola recuperación de los recursos naturales y los servicios básicos, nacionalizamos la Transportadora de Electricidad". Asina, esti anunciu llega con motivu del Primeru de Mayu, pocos díes depués del anunciu d'un incrementu del 22,6% nel Salariu Mínimu Nacional.

Sobre la Biblioteca Dixital

Magar d'agora, los documentos que taben y tarán asitiaos na nuesa Biblioteca Dixital camuden de sirvidor y pasen de RapidShare a GoogleDocs. Les razones son delles, RapidShare esborria documentos si nun pases a la cuenta de pagu y nun permite ver los documentos de forma direuta.

Agora, el llector podrá esfrutar de los documentos de la Biblioteca ensín tener necesidá de baxalos, anque de toles formes encamiéntase facelo pa una mayor visibilidá de los mesmos. Pa descargar los documentos nesti nuevu formatu hai que calcar enriba los enllaces de la biblioteca p'abrilos, una vegada visibles la opción de descarga pues atopala arriba a la manzorga de la ventana.

Comentar de nuevu que siguimos abiertxs a aida, polo que si quies tornar y/o dixitalizar daqué a la nuesa llingua o encamentanos dalguna obra pa la nuesa biblioteca pues facelo unviando un corréu lleutrónicu al nuesu e-mail  frayandocadenes@gmail.com

Manifiestu de Darréu ente'l Primeru de Mayu

Otru primeru de mayu más, y otru añu más nel que les agresiones del capitalismu siguen golpiando al Pueblu Trabayador Asturianu. La situación de la mocedá d'esti país ye pergrave, con una emigración forciada, un paru xuvenil y una precariedá que medren de forma acelerada y que faen que'l futuru nesti estáu de les coses seya ca vuelta más escuru. La Educación Pública Asturiana ta entamando a ser desmantelada poles imposiciones del Gobiernu d'España de Rajoy, al igual que la sanidá. La llexislación tórnase entá más represiva y los drechos de la ciudadanía van desapaeciendo pasu ente pasu, amosando esti fechu la situación pre-democrática na que tábemos enantes y na que siguimos, pa pior. L'Estáu Español quita la mazcara y col tiempu va quedando n'evidencia, amosando que la supuesta “transición democrática” foi continuismu franquista reformáu.

La situación empiora, la crisis del capital golpía fuerte y la represión medra, pero nun debemos escaecer que la crisis ye un gran negociu y una escusa pa la burguesía española, yá tea asitiada en Madrí o n'Asturies, pa finar col anterior réxime de drechos y llibertáes, yá de por sí mui restrinxíu. Mentantu la mocedá nun ve futuru, los ricos siguen atropando multimillonarios beneficios, eso si, altravíes de la esplotación y la precariedá que sofre'l trabayador o la trabayadora.

La solución nun ye confiar nos analistes de salón y sofá que falen en términos neolliberales d'una posible solución, llamando al sacrificiu y a la paz social. El sistema capitalista tien estes crisis económiques de forma periódica y Asturies, que carez una crisis permanente dende los tiempos de la supuesta “reconversión”, sigue en manes de sucursalistes y llacayos del españolismu capitalista. Dende Darréu atalantamos que la solución a esta situación ye construyir una alternativa d'unidá popular, asturiana y revolucionaria, que puxe pola soberanía económica y política d'Asturies.

Asturies solo tien un camín pa salvase: caminar haza la conciencia nacional y la conciencia de clase. Les relaciones ente l'Estáu Español y el nuesu país son propies del colonialismu y la sumisión d'Asturies a esa ferramienta del capital que ye España ye total. Pa construyir una alternativa al capitalismu tenemos que lluchar pola soberanía nacional d'Asturies, solo asina podremos salir de les estructures del poder como la XE o la OTAN y construyir un sistema políticu y económicu basáu na xusticia social, na independencia, na democracia popular y na estabilidá económica y política.

¡Non a los retayos sociales! ¡Non a la privatización de la Educación! ¡Abaxu la Reforma Llaboral!

¡Puxa'l 1u de Mayu! ¡Puxa la clase trabayadora! ¡Puxa Asturies socialista y dixebrá!

Por otru llau dende Darréu queremos convidar a la sociedá asturiana a la espicha entamada xunto con Andecha Astur nel Llar l'Ayalga de Xixón sitiau na Cai Prendes Pando,asina como a la manifestación entamada pol sindicatu de clas asturianu CSI que saldrá de la Plaza L'humedal de Xixón a les 12:00 hores.

www.darreu.org

CSI, CXT y Suatea convoquen en Xixón pa «resistir, lluchar, avanzar»

La Corriente Sindical d’Izquierda (CSI), CXT y Suatea celebren el Primeru de Mayu en Xixón. Ta convocada una manifestación a les 12 hores, na plaza L’Humedal, col eslogan de Resistir, lluchar, avanzar. Nella llamen a tolos trabayadores a denunciar la política del Gobiernu de Rajoy, que ta afondando «na cris-estafa na que llevamos metíos dende hai dellos años».

Los convocantes ponen como exemplu d’esa realidá qu’obliga a la movilización «los rescates millonarios a la banca, el fraude fiscal, la economía sumida, l’acosu y derribu de la sanidá, la educación y los servicios sociales públicos, l’aumentu de la probitú severa, el paru esbocáu o l’ataque fulminante a los derechos de los y les trabayadores que supón la reforma llaboral».

Les cifres de paraos y les implicaciones sociales qu’eso supón lleven a que l’actuación nes empreses y centros de trabayu de los sindicatos, a xuiciu de los convocantes, «tien que ser d’una firmeza estraordinaria; tenemos que defender, a toa costa, cada puestu trabayu. Y a ello tenemos que xuntar la llucha de los que yá nun tienen trabayu y de los que, anque trabayen, reciben un sueldu de miseria». A esa situación esplosiva, denuncien, el Gobiernu estatal ta respondiendo «con una escalada escomanada de la represión, na que la brutalidá policial, les detenciones arbitraries y la proliferación de fuertes sanciones económiques ensin sentíu nengún, faen desapaecer na práctica tolos drechos y llibertaes ciudadanes. Nesi sen, la nueva normativa d’orden públicu anunciada pol Ministru l’Interior, va volvenos a tiempos pasaos, qu’enxamás pensábemos que podíen volver».

Fonte: Les Noticies

Andecha Astur apautase al manifestamientu convocáu pola CSI, CXT y SUATEA pal Primeru Mayu

Andecha Astur apautase al manifestamientu convocáu pola CSI, CXT y SUATEA pal prósimu martes 1 de mayu a les 12 hores na plaza L’Humedal de Xixón, y fai un llamamientu "al conxuntu del Pueblu Trabayaor Asturianu a que participe activamente". Arriendes d’ello, Andecha Astur amiesta "a les evidentes reclamaciones de xusticia social, la de SOBERANÍA, entantu qu’atalanta qu’ensin ella nun va ser posible superar la situación que carecemos anguañu", na que más de 35.000 families asturianes tienen a tolos miembros en paru, onde la media pensiones nun algama los 600 euros, más del 60% de la mocedá ta nel paru, y decenes de miles d’ellos vense obligaos a emigrar añu ente añu pa poder vivir.

Ello asina, Andecha Astur considera que "recuperar la capacidá del Pueblu Asturianu pa decidir llibremente’l so futuru costitúi el pegollu principal p’avanzar haza una sociedá llibre y socialista onde los recursos económicos, los medios de produición y el sistema xurídicu-políticu tea en función de los más de la sociedá asturiana". De magar el manifestamientu, Andecha Astur cellebrará una espicha nel Llar d’Andecha (Prendes Pando 11 baxu. Xixón)

Conferencia sobre los archivos del Conseyu Soberanu

Güei en Xixón.


El Clú La Nueva España de Xixón entama una charra entitulada "¿Dónde están los documentos del Consejo Soberano de Asturias y León?" na que Rafael Fernández Tomás, nietu del hestóricu dirixente obreru asturianu Belarmino Tomás, falará d'estos aprosimadamente 60.000 documentos qu'anguaño s'atopen en Ferrol, y que según defiende Fernández Tomás deberíen asitiase en territoriu asturianu, llugar al que pertenecen de mena llexítima.

La conferencia cuntará cola presentación de Mariu Arbesú, miembru de coleutivos políticos como Andecha Astur y Conceyu Abiertu, y tendrá entamu a les 20 hores de la tarde nel Clú La Nueva España de Xixón.

Fonte: Infoasturies.net

Sofitu denuncia un nuevu casu de represión

Piden 4 años de prisión por supuestamente "agredir" a Tini Areces.

Dende Sofitu acaben d'informar y denunciar les posibles consecuencies d'un nuevu casu de represión qu'entamaría'l 9 de xunetu del 2010. Según despliquen, "Esi día nel actu de refuga entamáu nel recibimientu al Tren Negru na estación de Xixón, la policía española detién, por órdenes direutes de Tini Areces (Presidente del Principáu d'aquella), a una moza independentista por "supuestamente " habelu agredío".

Según amesten, "Con violencia, la policía azótala al suelu rompiéndo-y les ropes que llavaba pa esposala y treslladala a comisaría. Ante les pretestes de la xente ellí aconceyao, la policía carga y otra muyer ye denunciada por supuéstamente da-y un taragañu nun deu a un policía, ensin que nel informe mélicu apaeza mancaura tala.
Al día siguiente la prensa oficial asoleya datos y semeya de la moza detenía ensin respetar dengún de los sos drechos, amuesando una vegada más la impunidá cola que, tanto prensa como policía trabaya nestos casos".

El casu nun fina ehí, y ye que tal como informen dende l'organismu antirrepresivu, "Cuasi dos años dempués la fiscalía pide 4 y 1 añu de prisión pa cada una acusándoles d'unos presuntos delitos de atentáu a l'autoridá. por estos fechos sedrán xulgaes el prósimu 3 de mayu nos xulgaos de poniente de xixón a les 10:30 hores".

Sofitu quier denunciar "que denguna d'estes dos agresiones asocedieron, que nun hubo más agresión que la de la policía escontra los qu'ellí se manifestaben pa protestar pola violencia política, económica y cultural que'l gobiernu de turnu del PSOE taba exerciendo escontra'l nuesu pueblu".

Poro, faen "un llamamientu pa solidarizase coles represaliaes y denunciar esti nuevu casu de persecución política".

Fonte: Infoasturies.net

Primeru de mayu n'Asturies

El prósimu martes 1 de mayu cellébrase n'Asturies, y en tol mundiu, el Día Internacional de los Trabayadores, día del proletariáu internacional. Esi día habrá nel mundiu una montonera de movilizaciones y convocatories pol socialismu, pola dignidá de los y les trabayadores, la soberanía nacional y la democracia popular. En definitiva, en tol mundiu'l prósimu martes habrá en tolos países miles de voces glayando escontra l'actual dictadura del capitalismu, que ellí per onde pasa arrasa con miseria, desigualdá, represión ya individualismu xenocida.

N'Asturies la situación ye bien conocía, el capitalismu manifiéstase con grandes proyeutos económicos de calter colonial manexaos dende la metrópoli Madrí. A nivel industrial, enerxéticu, residual... Asturies ye un país que tien una situación económica permurnia pero al empar sacrifica la so ñatura, fuercia de trabayu y productividá al serviciu del capitalismu españolista, ensín que dientru d'esi xuegu capitalista tea dengún beneficiu a cambeu d'esi sacrificiu.

Les muertes nel tayu siguen medrando, la patronal sigue cuntando les sos mentires y falacies de siempres y algamando cuotes de poder políticu mentantu nun paguen la crisis social y económica qu'ellos mesmos xeneraron y se faen más ricos y riques al travíes del yá tan sonáu "sacrificiu de toes y toos" del que nos fala'l sistema capitalista pa superar la so crisis. Lo más murnio ye que'l propiu Pueblu Trabayador entrá nel xuegu y acaba creyendo esos llamamientos lliberales al sacrificiu, qu'a la fin nun son más que recortes económicos y de drechos algamaos pola clas obrera y pa la clas obrera. Los pocos drechos sociales colos que podía movese'l pueblu tan siendo desmantelaos, amosando esti fechu lo feble de la supuesta democracia monárquica española.

Les burguesíes nacionales qu'hai nel Estáu en momentos d'auxe económicu ( pa elles) viendense meyor que nunca al españolismu, amosando que la burguesía nun tien patria y la burguesía española manexa al so antoxu tola parafernaria nacionalista española, somorguiando un puquiñin más a los pueblos/naciones del Estáu. El sistema capitalista sigui diendo de la man de la idea d'España, yá qu'esa idea ye una idea propia d'esi sistema lliberal qu'impunxieron valíendose d'esi nacionalismu, ente otres coses. La inoracia y el nivel cultural y educativu del Estáu Español (n'amenorgamientu por ciertu) faen que tol mundiu piénsese como español, un nuevu modelu d'interclasismu estúpidu, onde afiten una coleutividá que gana mundialinos de fúbol y na que toos piensen que son iguales.

Como vemos, España, ferramienta'l capital y el propiu sistema, gocien de bona salú pesie a la supuesta indignación xeneralizada qu'hai. Al mesmu tiempu, les clases populares conscientes de la braera situación n'Asturies siguen ensín una alternativa soberanista y de clas, el soberanismu asturianu sigui en crisis y el nacionalismu ca vegada va a fórmules más reformistes que polo visto en marzu nun-y valen de nada.

¿Qué facer?

Esti nun ye un analís posáu, ye un analis que probatiblemente seya consideráu como feble y pocu rigurosu pero camentamos qu'hai una riestra d'emerxencies que camentamos como necesariu mirar haza elles. El lleutor avezáu sabrá que siempres tamos diciendo lo mesmu, pero ye la realidá. Cualesquier país coles condiciones suxetives y oxetives que tien Asturies nesti momentu lliberose permediu d'un procesu d'emancipación social y nacional. La condición de colonia y d'esplotación y espoliu masivu capitalista faen qu'Asturies tea d'afondar na so construcción nacional, enfrentase col Estáu y trabayar sobre'l socialismu y pol socialismu.

Hai qu'amestar a la concenciación nacional el componente de clas y facer ver a la xente d'esti país qu'otra Asturies ye posible. Una Asturies fuera de les grandes estructures de poder de la oligarquía mundial y española con soberanía, independencia y xusticia social. Una Asturies non dependiente y que dea exemplu al mundiu de lo que ye una economía y un sistema políticu al serviciu de les persones y non de les plusvalies.

Namái hai que buscar la fórmula pa facer qu'Asturies seya de nuevu un referente pa la clas obrera mundial, pero da-y una vuelta de tuerca y amestar el componente nacional. Pa ello, ye pernecesariu desechar les ferramientes polítiques y sindicales qu'anguañu son mayoritaries n'Asturies y que furrulen col pasu los años como una mafia clientelar al serviciu del capitalismu español.

La independencia nacional d'Asturies va costar muncho, hai que crear la conciencia nacional pa lo que quiciabes haya qu'entamar a quitar dalgunos tabús, pero eso si, nunca dir a posiciones de nacionalismu reaccionariu, sinon de construcción nacional y social. Asturies tien de ser una barricada que nun pueda pasar el sistema d'esplotación del home pol home, y pa ello tien de llibrase del llastre imperialista español. Hai que construyir país, patria y nación, dende la izquierda y al empar semar socialismu, un socialismu revolucionariu qu'anguañu tien poca cabía dientru'l mesmu soberanismu, pues si bien fálase d'esa "independencia y socialismu", bien poca xente patriota propón una idea y una fueya de ruta p'algamar esi socialismu y diseñar esi socialismu. Pa qu'esto camude, la formación y la organización van ser claves pa superar l'actual estáu de les coses. Pel momentu, pasa a l'aición y movilizate col sindicalismu asturianu de clas esti prósimu 1u de mayu. Depués vendrá'l tiempu de los alderiques internos y la normalización d'un movimientu políticu asturianu y popular.

¡Puxa'l Primeru de Mayu!

¡Puxa'l Pueblu Trabayador!

¡Puxa Asturies!

La CSI solidarízase col Sindicatu Andaluz de Trabayadores

El gobiernu andaluz desaloxó la Finca Somonte, ocupada por trabayadores del SAT.

La Corriente Sindical d'Izquierda vien d'asoleyar un comunicáu en solidaridá pa col Sindicatu Andaluz de Trabayadores pol desaloxu de la Finca Somonte, propiedá de la Xunta d'Andalucía y que foi ocupada por mediu millar de trabayadores del sindicatu. Según desplica CSI, "Con esta ocupación, el SAT pretendía l’autoxestión de la tierra polos propios y propies trabayadores, pa crear el másimu emplegu y favorecer el desendolque la economía llocal y comarcal".

Tal como informa la Corriente, "El xueves 26 d’abril, el Gobiernu andaluz (PSOE-IU) unvió delles dotaciones de la Guardia Civil que, por orden de la Xunta d’Andalucía, desaloxaben a los y les trabayadores de la finca que yá taben cultivando".

Poro, "Delantre estos fechos, la Corriente Sindical d’Izquierda quier asoleyar la so solidaridá dafechu pa col Sindicatu Andaluz de Trabayadores, al empar que desixe al PSOE y a Izquierda Unida la vuelta atrás nesti allorie y que torne la finca de Somonte a los y les trabayadores del campu andaluz, que son los únicos y llexítimos dueños de la so tierra".

D'otra miente, ye de reseñar la llegada d'informaciones qu'afirmen qu'alrodiu d'ún cientu d'obreros y obreres tornaron a ocupar la finca na madrugada.

Fonte: Infoasturies.net

Nuevos documentos na biblioteca.

La nuesa Biblioteca Dixital yá cunta con dos documentos más na so llista que podeis descargar en formatu pdf calcando nel títulu los mesmos. Per un llau presentamos un nuevu documentu d'Ho Chi Minh y el Partíu Comunista de Vietnam, entitulada Aiciones que "tienen de faese" y que "nun tienen de faese", onde s'afiten una riestra d'aiciones a considerar pa bien y mal, y onde se toma como básicu'l respetu a les cultures tradicionales de la cultura nacional vietnamita. Tamién nesi documentu surden cuestiones alredor de la posición nesi momentu respeutu a lo "místicu" y les creencies.

Per otru llau, podeis baxalos l'artículu de James Connolly entituláu ¿Antipatrióticu?, nel cual el llider marxista ya independentista irlandés reflexona sobre la llucha social y de clases y la so rellación con conflictu nacional n'Irlanda y fai un analis hestóricu de ciertes reivindicaciones sociales que fueron de la man de les nacionales propies del conflictu ente Irlanda y l'Imperiu Británicu.

Si quereis facer dalguna aportación a la biblioteca nun teneis más qu'unviar lo que vos pete al correu frayandocadenes@gmail.com

Mayu entama con convocatories perimportantes pal Pueblu Asturianu.

Esti mes de mayu, como tolos años, vien bien cargáu de convocatories y movilizaciones, dos de les cuales son siempres perimportantes. Per un llau, el prósimu martes ye 1 de mayu, Día de la Clas Trabayadora y pol otru'l vienres 4 de mayu ye'l Día de les Lletres Asturianes.

Asina, esti prósimu martes, 1u de mayu, los sindicatos asturianos de clas, CSI, SUATEA y CXT entamen la yá tradicional manifestación en Xixón. La convocatoria partirá de la céntrica Plaza L'Humedal xixoniega, a les 12:00 hores. Dende dichos sindicatos indiquen que sedrá una convocatoria col envís de baltiar la reforma llaboral, la represión y los recortes sociales. Esi mesmu día amás,cellebrando'l 1u de mayu, al finar la manifestación les organizaciones soberanistes y socialistes Andecha Astur y Darréu entamen una espicha popular nel Llar L'Ayalga de Xixón a les 14:30 hores.

Non menos importante ye la manifestación del prósimu vienres 4 de mayu. Na Estación del Norte d'Uviéu a les 19:30 hores escomencipiará la manifestación pola OFICIALIDÁ, entamada pola Xunta Pola Defensa de la Llingua Asturiana, manifestación que por desgracia repítese añu tres añu ensín que l'estatus xurídicu del idioma'l país camuda y siga la humildación pal nuesu pueblu asturianu, lo que conlleva la desapaición del bable o asturianu pali que pali.

Nun planu más institucional, esi mesmu vienres cellebrase'l XXXIII Día de les Lletres Asturianes, qu'entama como tolos años l'Academia de la Llingua Asturiana y qu'entama depués de la manifestación. Los actos del Día de les Lletres entamen a les 20:30 hores nel Teatru Filarmónica d'Uviéu y van consistir nuna riestra d'actuaciones musicales y lliteraries y nuna Xuntra Estraordinaria d'académicos.

¡Esti mayu movilízate! ¡Por Asturies, la nuesa cultura, los nuesos drechos, la soberanía y la xusticia social! ¡Puxa Asturies llibre y socialista!