16 mineros deteníos n'Asturies dende qu'empicipiaron les protestes, en llibertá con cargos o a la espera de xuiciu

Col mineru deteníu en Grau, yá son 18 los prindaos n'Asturies por diferentes cuerpos policiales españoles dende l'aniciu les movilizaciones mineres.

Amás de los dos mineros deteníos y absueltos nun xuiciu rápidu depués de la denomanda "Batalla de Santa Cristina de L.lena", hai cinco trabayadores en llibertá con cargos, polos enfrentamientos asocedíos en La Ribera, y 10 a la espera de xuiciu polos enfrentamientos en La Vega d'Anzu (Grau). El mineru deteníu d'ayeri, acusáu de llanzar voladores a un helicóperu, suma'l sestu trabayador que s'atopa en llibertá con cargos, a los que habría qu'amestar el mineru asturianu deteníu en Madrid. Estes cifres améstense a les detenciones que tamién se vienen produciendo nes protestes mineres na provincia de Llión.

Fonte: Infoasturies

I Conceyu Nacional de Conceyu Abiertu

Iniciatives populares pa San Xuan.

Tanto'l Centru Social Autoxestionáu "La Semiente" como l'Asociación Cultural "N'Ast" entamen coincidiendo cola festividá de San Xuan delles actividaes al rodiu d'esta festividá tan típica nos países con raigañu atlánticu como'l de nuesu. Equí dambos cartelos:

Darréu quier denunciar la ocupación de fuercies represives del estáu de les cuenques mineres

La Organización de Mocedá Independentista Revolucionario Darréu quier denunciar l'agresiva ocupación policial y militar que tan sufriendo les cuenques mineres nes caberes selmanes, llegando al so puntu cimeru na xornada d'ayeri, coincidente cola fuelga xeneral y na xornada de güei 19 de xunu, día depués de la convocatoria, con maniobres del Exércitu Español na Cuenca del Nalón, cerca del Pozu Candín. La escalada represiva y de control social cada vegada ta siendo más desproporcionada en les cuenques y nel conxuntu d'Asturies.

Dende Darréu caltenemos qu'esti comportamientu policial y militar nun tien más enfotu que tratar de meter mieu a la ciudadanía asturiana y a la mocedá, y crear situaciones de violencia p'asina poder criminalizar les lluches populares nesti país al travíes de los medios de comunicación del poder vixente neolliberal. Estes fuercies, cola aición represiva que lleven desendolcando dellos díes yá cada vuelta más queden n'evidencia como lo que son: fuercies d'ocupación españoles, al serviciu del capitalismu más sangrín y xabaz.

Esti proceder ye bien murnio y amuesa una vegada más la natura neofranquista del Estáu Español, onde hai perres pa banqueros, corruptos y el financiamientu masivu de la represión pero la mocedá ta condergada a la ruina, la desesperanza y la falta de futuru dafechu. Demientres quieren desmantelar los nuesos seutores económicos y privaticen la educación ainda más cola escusa de la “gran crisis económica” xueguen a la represión policial y militar a gran escala pa con un pueblu que desendolca una llucha xusta.

Dende Darréu animamos a la mocedá a espeyar el so descontentu con esti proceder represivu de les fuercies militares y policiales españoles. Tamién queremos tresmitir tola nuesa solidaridá, otra vuelta más, pa tolos trabayadores del país que nestos momentos siguen en griesca pola viabilidá del so puestu de trabayu y del texíu industrial asturianu.

¡FUERA LES FUERCIES REPRESIVES D'OCUPACIÓN!

¡PUXA LA LLUCHA OBRERA Y POPULAR D'ASTURIES!

¡PUXA ASTURIES LLIBRE!

Comunicáu de Darréu nel día d'ayeri: www.darreu.org

Concentración n'Avilés contra'l paru, los retayos sociales y la represión

Vienres 22 de xunu a les 19:30 hores

“Avilés escontra la cris” convoca una concentración el prósimu vienres 22 de xunu, a les 19:30 h. n’El Parche (Pza. l’Ayuntamientu). Los entamadores del actu de protesta consideren "Avilés y Asturies nun pueden permitise nin una sola persona más ensin trabayu". Avilés escontra la cris quier denunciar la privatización y los retayos en Sanidá, Educación y Servicios Sociales. El colectivu avilesín sorraya tamién ye un actu "pola fuelga xeneral n'Asturies".

Con estos retayos el colectivu allerta que "vamos dexar la nuesa salú en manes de negociantes y mercaderes", namás van tener salú "aquellos que tean perres pa pagalo" o que "quieren tornanos a les dómines nes que namás que los más pudientes teníen acesu a la educación". Amás, consideren que que les presones con necesidá d’atenciones sociales, "van quedar abandonaes a lo so suerte".

"Avilés escontra la crisis" considera qu'hai que denunciar na cai que se tean gastando "les perres públiques pa financiar los negocios y los pufos de banqueros, empresarios y especuladores", que la Reforma Llaboral desanicia "tolos drechos llaborales y condérganos a la precariedá llaboral" y que'l Gobiernu "lo únicu que se-y ocurre ye retrucar a les demandes ciudadanes con una escalada descomanada de la represión, propia d’un Estáu totalitariu".

Nueva xornada de llucha minera tres la fuelga xeneral nes cuenques

Nueva xornada de fuelga minera en toa Asturies.
Los mineros y mineres d'Asturies tornaron güei a les cais tres la esitosa xornada de fuelga xeneral nes cuenques mineres, asina como la xornada de llucha pal restu d'Asturies na que se rexistraron delles aiciones como pintaes, cortes de carreteres ya incluso ataques a un garrapiellu d'entidaes bancaries. Na xorrnada de güei, la llucha tuvo diversificada n'aiciones de distintu calter.

Los cortes de carretera tuvieron presentes un día más en puntos importantes de la xeografía asturiana, con aiciones tanto pela mañana como pela tarde en puntos como l'Autovía Minera o l'AS-355. Amás d'ello, como dende va tres selmanes, siete mineros siguen enzarraos nos pozos asturianos, a los que s'amesta l'enzarru ayeri de mineros nel Ayuntamientu de Cangas.

Güei tamién foron protagonistes cientos de muyeres de mineros, que llevaron la protesta al Senáu madrilanu con concentraciones nos sos esteriores y protestes nel interior, polo que foron desaloxaes.

D'otru lláu, la Federación Mundial de Sindicatos d'Industria amosó'l sofitu a la llucha minera desendolcada nes comarques mineres del estáu, qu'amestarán un nuevu frente de llucha cola "Marcha del carbón" que'l 10 de Xunetu saldrá dende Mieres rumbu a Madrí, 20 años depués de la primer aición d'esti calter.

Fonte: infoasturies

Tres fontes y tres partes integrantes del marxismu, de Lenin, na biblioteca.

La obra de Vladimir Ilich Ulianov, Lenin, Tres fontes y tres partes integrantes del marxismu yá ta disponible n'asturianu y en formartu PDF na Biblioteca Dixital del Blogue Frayando Cadenes.

Nesti documentu, Lenin fai un analis del heriede de Marx a la hestoria de la filosofía, la pólítica y la economía. El cabezaleru revolucionariu bolchevique espeya perbien nesti instructivu testu tres de los grandes pegoyos del pensamientu de Karl Marx, el materialismu hestóricu, la teoría de la plusvalía capitalista y la doctrina de la llucha de clases. Estes aportaciones tomen relación col contestu y el tiempu de Marx, fontes que tomó'l gran pensador alemán, aniciador del socialismu científicu.

Asina, esti testu ye perinteresante tanto p'afondar nel conocimientu del marxismu como p'averase al mesmu.

L'únicu terrorista, l'Estáu Español.

Depués del ésitu de la xornada de movilización y fuelga xeneral d'ayeri en les cuenques mineres del país, güei un ciudadanu asturianu facía esta semeya del Exércitu Español de maniobres pola Cuenca del Nalón. Al paecer la semeya ta fecha nel alredor del Pozu Candín, llugar onde dellos mineros siguen enzarraos y onde ayeri recibieron la visita d'una marcha de centenares de paraes y paraos del Valle del Nalón.

Nun hai marxe pa especulaciones o casualidaes, esta aición militar ye una provocación y un intentu por parte del neolliberalismu españolista de meter el mieu nel cuerpu a los asturianos y asturianes. la violencia del Estáu Español tien munches cares, dende la del decretazu y la imposición hasta la del tolete y la metralleta, y si les coses siguen asina y cuanto más concencia coleutiva esconsone nel pueblu asturianu más vamos tener qu'alfrentanos cola violencia física.

50.000 persones manifiéstense en Llangréu en defensa de la minería

Cuatro mineros enzarraos na Casa Conceyu de Cangas del Narcea

Una manifestación multitudinaria en defensa de la minería remató la xornada de fuelga xeneral nes cuenques mineres d'esti llunes y que tuvo un siguimientu tamién masivu. Asina, unes 50.000 persones tomaron les cais de Llangréu y marcharon dende La Felguera hasta Sama. Nestos díes de tanta criminalización de les sos protestes, los mineros diéronse un 'bañu de mases' y amosaron el sofitu popular que tienen les sos movilizaciones. La manifestación remató colos himnos Santa Bárbara y Asturies patria querida, l'alcordanza de los mineros enzarraos nos pozos y llamando a manifestase'l miércoles n'Uviéu, contra la reforma llaboral y los recortes sociales. En Cangas del Narcea, cuatro mineros enzarráronse nel Salón de Plenos en señal de protesta, con intención de resistir ellí hasta que se solucione'l conflictu.

Estrayíu d'infoasturies.net

Homenaxe a los asturianos que defenderon Bilbao en 1937

"Nel nuesu pueblu, nin podemos nin debemos escaecer esta delda de sangre colos meyores fíos del Pueblu Asturianu"

Una plataforma popular, Larrabetzu 1937-2012, que promueve la conmemoración del 75 cabudañu de los combates del Cinturón de Fierru de Bilbao fexo, na llocalidá de Larrabetzu, un actu d'alcordanza na fosa común de Blunburu, onde tan enterraos combatientes asturianos que dieren la vida en defensa la llibertá y contra'l facismu en xunu de 1937. L'actu cuntó cola presencia txistularis, una ufrienda de flores silvestres y la colocación de les banderes nacionales vasca y asturiana. Nel actu sorrayóse que, "Nel nuesu pueblu, nin podemos nin debemos escaecer esta delda de sangre colos meyores fíos del Pueblu Asturianu". La formación política asturiana Andecha Astur púnxose en contactu colos organizadores del actu d'alcordanza p'agradeceyos la cellebración del actu.

P'Andecha fechos comu esti, son "una demostración d'auténtica solidaridá ya internacionalismu" y ponen n'evidencia "tantu al "Principado" comu istitución, comu al PSOE-IU a la hora de reivindicar la memoria hestórica asturiana". La organización d'izquierda nacionaliega camienta qu'estos partíos siguen "enfotaos en tapecer una herencia que mos honra comu asturianos y que los pon n'evidencia comu cómplices que son de l'actual situación de falta de llibertaes democrátiques que se vive n'Asturies".

La televisión vasca cubrió l'actu d'alcordanza colos milicianos asturianos en Larrabetzu, vidiu que se reproduz darréu:

FONTE: infoasturies

¡A la fuelga xeneral!

Mañana, llunes 18 de xunu, fuelga xeneral en les cuenques mineres y xornada de llucha nestes comarques y tamién n'Asturies. ¡Puxa la llucha de la clas obrera! ¡Puxa Asturies llibre y socialista!

Conceyu Abiertu por Samartín, Mieres y Llangréu sofitarán la fuelga xeneral del 18 de Xunu

Los conceyos de la organización nes cuenques mineres faen un llamamientu conxuntu a la llucha.

Les organizaciones de Conceyu Abiertu nos conceyos de Samartín, Mieres y Llangréu vienen d'asoleyar un comunicáu nel qu'anuncien el so sofitu a la fuelga xeneral que se desendolcará nel cuenques mineres el prósimu llunes 18 de xunu, asina como denuncien la xabaz represión policial durante les protestes de les caberes selmanes. Darréu apurrimos el comunicáu completu:

"La militancia de Conceyu Abiertu nos municipios de Samartín del Rei Aurelio, Mieres y Llangréu quier amosar de mena conxunta el so sofitu decidíu y absolutu a la convocatoria de fuelga xeneral nes cuenques mineres que tendrá llugar esti llunes 18 de Xunu, en defensa del seutor del carbón, amenazáu de pieslle polos recortes de fondos que’l gobiernu estatal quier aplicar pa esta estaya económica y llaboral clave e indispensable nel presente y futuru cercanu de les zones mineres, asina como d’Asturies nel so conxuntu, y ye que camentamos qu’esti conflictu ye de tolos y toles asturianes, debío a que les consecuencies direutes ya indireutes del posible zarru de la minería sedríen bien penoses pa tol país.

Poro, animamos a los asturianos y asturianes asitiaes fuera de les cuenques, a que sofiten la xornada de llucha convocada pal restu’l país, como manera d’amosar apoyu al coleutivu mineru, amás d’amosar a les élites polítiques, económiques y sociales del estáu que la clas obrera asturiana nun va a tolerar una agresión de tales proporciones a los sos drechos y condiciones de vida.

Tamién queremos denunciar la descomanada presencia policial desplegada en toa Asturies, tantu d’efeutivos de la “Policía Nacional” como de la “Guardia Civil”, que tan desplegando nel nuesu país a les sos fuercies d’élite, tresportaes dende otros llugares del estáu pa ocupar Asturies, reprimir duramente les lluches sociales y llaborales, y amedrentar a la población que les sofita, dexando nidio una vegada más el so calter de mercenarios al serviciu de les oligarquíes que dirixen el nuesu destín. Ye por ello que facemos un llamamientu p’aparar la represión exercida polos policíes, de la mesma mena que camentamos que, de nun ser asina, el pueblu asturianu ta nel so llexítimu drechu de defendese mediante los medios que considere afayaízos.

En definitiva, Conceyu Abiertu por Samartín, Mieres y Llangréu asoleyamos la nuesa solidaridá y sofitu incondicional pa colos mineros na so llucha pol futuru de los nuesos conceyos, asina como llamamos a la ciudadanía a participar na convocatoria de fuelga xeneral pa esti llunes 18 de Xunu, amás de na xornada de llucha pal restu d’Asturies."

Estrayíu d'infoasturies

DARRÉU llama a la movilización permanente en les cuenques y n'Asturies

Dende la organización de mocedá soberanista y revolucionaria Darréu queremos tresmitir la nuesa postura al rodiu de les convocatories que tamos teniendo en les cuenques y n'Asturies demientres estes selmanes y la creciente situación de conflictividá:

• Sofitamos la fuelga xeneral en les cuenques convocada pa esti llunes 18 y atalantamos que ye necesaria yá una fuelga xeneral nel conxuntu'l país asturianu col calter indefiníu y combativu, yá que ye un erru parcializar la situación o sectorializala, tando en xuegu'l conxuntu del texíu industrial asturianu y les nueses espectatives de futuru como país.

• Darréu ye una organización de mocedá y dende la nuesa perspectiva creemos que ye la hora de que les moces y los mozos de les cuenques y d'Asturies dean un pasu alantre y emprendan una dinámica de movilización activa, combativa y dende espacios y frentes de llucha ayenos a los intereses del Estáu Español y el capital. La mocedá va ser la más perxudicada nesti desmantelamientu industrial y de drechos. El nuesu futuru pinta escuru y ye polo tanto importante nesti sen la llucha de la mocedá pa tornar la situación.

• Magar d'esti prósimu llunes, camentamos que nun se tien d'aparar nada, sinón siguir n'aumentu la escalada de movilización y llucha nes cais y nos espacios propios, yá que nel ámbetu institucional nun podemos esperar nada, tando'l mesmu remanáu y controláu pol neolliberalismu español. La posición chulesca y prepotente del PP o la hipocresía del PSOE nesti conflictu amuesen esti control total de la supuesta “democracia”. Son dambos partíos les cares d'una mesma moneda, la del capitalismu español y l'inmovilismu políticu y social.

• Asina, dende Darréu sofitamos toles movilizaciones de tolos trabayadores en griesca pol so puestu de trabayu y llamamos a la mocedá asturiano a espresar la so solidaridá activa. Otra vuelta, Darréu reclama la soberanía política y económica d'Asturies como nación pa poder construyir una braera democracia popular nesti país, garante d'un sistema socioeconómicu y políticu xustu y al serviciu del Pueblu Trabayador, non de les grandes élites del capital. Solo saliendo de les estructures del capital podremos construyir la alternativa al capitalismu que conderga'l futuru de los pueblos y los trabayadores.

¡PUXA LA LLUCHA DEL PUEBLU TRABAYADOR ASTURIANU!

¡MOCEDÁ LLUCHA POL TO FUTURU!

¡PUXA ASTURIES LLIBRE Y SOCIALISTA!

El FUSOA llama a la globalización de la llucha.

Globalizar la llucha

Dende va yá dos selmanes, los mineros, lo mesmo d'Asturies y Llión que d'otres partes del Estáu, tán llevando alantre una llucha pol so futuru. Anque esti conflictu se nos quier presentar como dalgo meramente sectorial, que incumbe namás a los mineros como tal, los ataques a tolos trabayadores en forma de retayos contínuos faen que esta llucha na minería agora mesmo seya global. Tá en xuegu que nos roben la Sanidá, la Educación y tolos derechos llaborales algamaos durante años de llucha y sacrificiu.

Igual que nel 62 cola Fuelgona, que supunxo l'iniciu de la llucha obrera contra la dictadura franquista dempués de 25 años de derrota, güei, frente a la dictadura cada vuelta más xabaz del Capital, los mineros vuelven a convertise nel símbolu de resistencia que-yos planta cara y nun se dexa vencer.

Los mineros, como los galos d'Asterix, pueden resistir nes sos aldees pero necesiten tol sofitu pa ganar esta batalla. Lo necesiten tanto como los movimientos sociales necesitábemos que dalguien en dalgún llugar y en dalgún momentu se volviere a plantar. Y ahí tán los mineros, resistiendo a la lóxica del Capital y de los sos xestores. Nun podemos dexalos solos.

Somos conscientes, por embargu, de que en cualesquier momentu les cúpules sindicales pueden cerrar el conflictu por cuatro migayes, pero la puerta tá abierta. La llucha laboral convirtióse dende'l primer momentu en política y social.

El día 18 de Xunu ye un día clave. Tá convocada una Fuelga Xeneral en toles cuenques mineres. Dende'l FUSOA (Fondu xUnitariu de Solidaridá Obrera d'Asturies) llanzamos el guante a quien s'anime y quiera garralu y permitímonos 'el luxu' de convocar una XORNADA DE LLUCHA en tol Estáu pa esi día. Facemos un llamáu a tolos colectivos, individualidaes, sindicatos de clase y movimientos sociales a estender la llucha de los mineros y que tolos frentes s'axunten n'unu sólu nel que toos y too tengan cabida.

El capitalismu tiénlo claro, incrementa l'espoliu, poro la nuesa respuesta ha ser xunitaria.

Toos y toes somos mineros, toos y toes a la llucha y en to los frentes .

Astucia y determinación
P'alantre compañeres y compañeros
Puxa Asturies
Puxa los mineros
COMUNICÁU DEL FUSOA

L'Adepavan anuncia actos de protesta durante'l 18-X

Fuelga xeneral nes cuenques mineres.
L'Asociación de Paraos y Paraes del Valle'l Nalon vien d'anunciar al traviés d'una nota prensa de la cellebración el prósimu llunes de la so avezada concentración delantre del Ayuntamientu de Llangréu baxo la denomación de "Los llunes al sol", que tendrá llugar de magar les 13:00 en sofitu a la convocatoria de fuelga xeneral nes cuenques d'esi mesmu día.

Sicasí, nun sedrá la única aición, y ye que tamién anuncien una marcha solidaria tres la concentración, na que caminarán hasta'l Pozu Candín d'HUNOSA p'amosar el sofitu a los mineros enzarraos, y al restu del coleutivu en llucha. Amás, s'amestarán a la manifestación que tendrá llugar pela tarde na Felguera, y animen a tol pueblu a participar.

FONTE: Infoasturies.net

Thyssen Norte retiró l'ERE pol que s'enzarraron 16 trabayadores

Triunfu del coleutivu obreru.
La direición de Thyssen Norte decidió la retirada del Espediente de Regulación d'Emplegu qu'afeutaba a la tola plantilla de la so factoría en Baíña (Mieres), y pol que 16 trabayadores s'atopaben enzarraos nes instalaciones industriales de mena indefinida, hasta la retirada del mesmu, tres atopar la compañía carga de trabayu que nun impidió la so negativa anicial a caltener l'ERE.

Pesie a ello, la intervención de la direutiva de la multinacional nel conflictu, gracies a la presión exercida polos trabayadores y la so xunidá d'aición nes protestes, fizo que la planta asitiada na cuenca'l Caudal decidiera, según informen fontes sindicales, retirar l'Espediente, pa la construcción de 46 pasiellos rodantes con destín árabe.

FONTE: Infoasturies.net

Xueves de combatividá minera y docente

Siguen les fuelgues y enzarros indefiníos de dambos coleutivos.

Los mineros y los profesores interinos d'Asturies realizaron esti xueves de nueu numberoses aiciones de protesta nel país, amás de caltener les sos respeutives fuelgues indefiníes, asina como l'enzarru de mineros nos pozos Santiagu y Candín, y de profesores nel IES Doctor Fleming, cumpliendo estos caberos 4 díes nesa situación, demientres que lo siete mineros acumulen yá práuticamente dos selmanes, ente'l sofitu diariu de cientos de persones que se concentren nesos enclaves.

Los mineros cortaron un día más carreteres y víes de ferrocarril, con aiciones n'A-66 (L.lena), AS-116 (Olloniegu), n', na Autovía Minera (Riañu), na N-630 a l'altura de Morcín, o l'A-64 n'El Berrón. Amás delles víes de ferrocarril foron cortaes, retirándose ensin incidente nunos casos, y obligando a aparar trenes n'otros. A too ello, un grupu de mineros Alemanes visitaron güei instalaciones mineres asturianes, pa conocer la realidá de la llucha minera asturiana y apurrir el so sofitu y solidaridá.

Pel so lláu, los profesores interinos caltienen l'enzarru, siguen alantre cola fuelga indefinía,y llevaron alantre aiciones na cai como'l corte del tráficu a l'altura de la Plaza d'España, n'Uviéu, a non munchos metros de los mineros acampaos. Amás, ta teniendo llugar la xornada de llucha a la que la Plataforma d'Interinos d'Asturies, asina como los sindicatos, llamaron a la movilización xeneral de tol personal educativu, con una manifestación n'Uviéu como caberu actu significativu.

FONTE: Infoasturies

Solidaridá dende Andalucía pa coles lluches d'Asturies

Jaleo!!! ante las luchas mineras y jornaleras: Todo el apoyo a la lucha
obrera y a Somonte!

Desde Jaleo!!! Queremos hacer público nuestro apoyo a la lucha de los
mineros asturianos, la de los trabajadores de trasportes y en general al
pueblo trabajador asturiano que en estos días vuelve a ser un referente de
lucha obrera en todo el Mundo. Nosotros y nosotras como internacionalistas
y socialistas sentimos su lucha como nuestra, Asturias como Andalucía son
dos naciones que no sólo están bajo el control del estado español si no que
vienen históricamente saqueadas por este y ahora también por la Unión
Europea. No puede haber futuro para nuestros pueblos si no es mediante la
lucha, como están enseñando los mineros, y esta tiene que ser por todos los
medios necesarios. Como decía Malcolm X, frente a la violencia capitalista
que arruina a los trabajadores, que desahucia a las familias obreras de sus
casas, que nos ofrece el suicidio o la emigración como solución tenemos que
responder con contundencia con las armas que siempre ha usado la clase
obrera, tenemos que responder con Huelgas, cortes de carreteras,
manifestaciones, petardos, tornillos, solidaridad, y unidad.

Desde Andalucía nuestro mejor apoyo a la lucha minera tiene que ser nuestra
propia lucha por el pueblo trabajador andaluz, porque una victoria obrera
en un país, es una victoria para el proletariado internacional. Nuestra
mejor respuesta a los planes capitalistas de rescates financieros y
recortes tiene que ser la intensificación de la lucha en todos los frentes.
Y el ejemplo más cercano de lucha obrera en Andalucía, lucha que además
está construyendo Poder Popular, es el proyecto de Somonte, que está dando
un ejemplo de dignidad y lucha en Andalucía. Esta lección de dignidad no
está saliendo gratuita a nuestros y nuestras camaradas de Somonte, que
están siendo requeridos para diversos juicios. Jaleo!!! se involucra desde
el 4 de marzo, día de la ocupación, en Somonte, con varios de nuestros
camaradas implicados directamente en esta revolución agraria. Tanto en el
apoyo a este hecho y su difusión, como en su construcción en el día a día
trabajando en la finca. Entre los reprimidos, queremos resaltar a un
camarada jiennense y otro palmeño, ambos de jaleo!!!, que están también
construyendo este futuro dentro de Somonte.

Ante esto, llamamos a la Juventud andaluza y al pueblo trabajador andaluz a
las próximas movilizaciones en solidaridad con los trabajadores de Somonte
organizadas por los comités de cada ciudad en todo el país andaluz:

*- SEVILLA: CONCENTRACIÓN frente al Parlamento de Andalucía el viernes día
15 de Junio a las 10.00h. Sevilla.*

*- GRANADA: CONCENTRACIÓN delegación de agricultura y pesca (Avd. Joaquín
aguaras n2). Viernes 15 de Junio a las 12:00.*

*- POSADAS (Comarca de Palma del Río): CONCENTRACIÓN en los Juzgados de
Posadas a las 10:00. **Los compañeros de **somonte* *tienen que declarar en
los juzgados de Posadas (Córdoba) hay 16 compañeros imputados por daños.*

*-** **CÓRDOBA: CONCENTRACIÓN delegación de agricultura y pesca (c/ Tomás
de Aquino). Viernes 15 de Junio a las 10:00.*

Llamamos apoyar las acciones y movilizaciones en solidaridad con la lucha
de los mineros y apoyamos la Huelga general del 18 de junio en Asturias.

*¡¡Porque solo el pueblo salva al pueblo¡¡*

*¡PUXA LES CUENQUES MINERES! ¡PUXA ASTURIES LLIBRE Y SOCIALISTA!*

*¡¡VIVA ANDALUCIA LIBRE Y SOCIALISTA¡¡*

Andecha Astur llama a la Fuelga Xeneral en toa Asturies

Pide a UGT Y CCOO qu’abandone el so sucursalismu reinal y que tean el valor de defender los porgüeyos d’Asturies y de los trabayaores asturianos per delantre los suyos propios, ampliando a toa Asturies la so convocatoria de fuelga.

Énte la convocatoria de Fuelga Xeneral pal prósimu 18 de xunu circuscritu a les cuenques mineres, Andecha Astur fai un llamamientu a la convocatoria de Fuelga Xeneral d’ámbetu nacional, atalantando que "ye imposible disociar l’actual conflictu na minería del restu conflictos sociollaborales que tan teniendo llugar n’Asturies nin de la ellevadísima tasa de paru, perda de prestaciones sociales y de la sangría que suponen les decenes de miles d’asturianos que se ven forciaos a emigrar".

Andecha Astur fai un llamamientu a UGT y CCOO pa "qu’abandonen d’una vegada’l so sucursalismu reinal, y que nel exerciciu de la soberanía que-yos correspuende comu representantes de bona parte de los trabayaores asturianos tean el valor de defender los porgüeyos colleutivos d’Asturies y de dichos trabayaores asturianos y que por una vuelta sepan anteponelos a los presonales y de sindicatu ampliando a nivel nacional la so convocatoria de Fuelga Xeneral".

Pa la organización d'izquierda nacionalista, llendar el conflictu a les cuenques mineres, comu fain UGT y CCOO, "seutorializa la llucha a niveles inaceutables, lo qu’en postrer estremu favorez l’aisllacionismu del conflictu mineru y debilita la llucha obrera nel nuesu país, al facer de ca conflictu un casu aislláu y ñegar la evidencia d’una confrontación d’intereses a nivel nacional por unos fechos que, si bien ye cierto que se producen dientru d’un contestu internacional, n’Asturies alquier formes propies, non en vanu vienen dándose dende munchu enantes de la cris d’anguañu y respuende a unes polítiques mui concretes del Estáu español p’Asturies empobinaes a l’esaniciu del nuesu texíu económicu, col oxetivu d’algamar la desindustrialización dafechu del nuesu país, la emigración de la nuesa mocedá y un futuru basáu en xubilaos y camareros".

Afayaivos

El blogue Frayando Cadenes, ye un blogue d'Asturies na llingua d'Asturies que parte d'unos presupuestos ideolóxicos y políticos bien llendaos, los de la izquierda soberanista revolucionaria. Poro, el soberanismu y el marxismu son les bases qu'afiten la dinámica y actividá d'esti blogue, un espaciu na rede que quier facer contra-poder a la fola neolliberal y españolista que n'Asturies y nos pueblos del Estáu Español tamos viviendo. Asina, el blogue Frayando Cadenes ye un espaciu na rede que tien dos grandes estayes de trabayu: la xera informativa y la xera formativa.

Nel blogue atopareis información venceyada a la realidá social, económica, cultural o política d'Asturies y del mundu. Si quereis un espaciu n'internet que diga les coses como son, ensín cayer nes grandes mentires y dende una perspectiva popular esti ye'l vuesu sitiu. Equí l'imperialismu nun remana la información como pasa na prensa oficial. El blogue Frayando Cadenes nun solo esparde noticies de medios dixitales asturianos, tamién ufre munches vegaes les sos cróniques propies y amás informa sobre la situación n'otros países, desendolcando nesti sen una bona riestra d'entrevistes internacionales.

Frayando Cadenes tamién ufre una Biblioteca Dixital, un proyeutu que quier ayudar a la formación de los militantes del soberanismu revolucionario asturianu. Un espaciu de documentación alternativa de toles obres y testos que nun atoparás nes grandes biblioteques. Camentamos que la xera formativa ye más que necesaria nel soberanismu asturianu y ye un de los grandes factores que despliquen el mal momentu que vive'l movimientu que puxa pola reconstrucción social y nacional d'Asturies. Poro, la formación política ye clave nesti blogue tamién, cola llingua del país como idioma vehicular d'esta formación, por supuestu, como forma d'aportar nós tamién a la dignificación y revitalización de la llingua asturiana.

Otros aspeutos, como la formación d'opinión o la compilación d'archivu, ente otros, son tamién perimportantes nel blogue Frayando Cadenes. En resume, lo que meyor defín esti blogue y el trabayu que se quier desendolcar pa con el ye contribuyir al espoxigue de la izquierda soberanista d'Asturies y al movimientu revolucionario mundial, dende'l nuesu país y nel idioma'l país. El nuesu correu de contautu ye frayandocadenes@gmail.com . Asina, dende esti espaciu queremos dar les gracies a tola xente que visita'l blogue y dicivos que tais nel vuesu llar.