Dende Conceyu Abiertu queremos amosar el nuesu refugu a la cellebración que cada añu se produz n’Uviéu con motivu de los “Premios Príncipe de Asturias”, unos galardones que, según consideramos, respuenden principalmente a una operación de llaváu de cara pa la institución monárquica, cada día más deteriorada nel conxuntu del estáu español.
Amás, esti criteriu afeuta especialmente a Asturies, a cuyu pueblu se mos impuso la institución del “Principado”, una figura política qu’entendemos respuende a valores arcaicos y antidemocráticos inherentes a la propia institución monárquica. Dende Conceyu Abiertu queremos afitar qu’Asturies nun ye un “Principáu”, nin el pueblu asturianu siervu o vasallu de nenguna figura que nun seya formada y participada pol propiu pueblu.
Nesi sentíu, tamién queremos denunciar la situación de probitú democrática na que s’atopa Asturies, con cientos de persones represaliaes nos caberos meses por distintos conflictos sociales y llaborales como puede ser el casu del mineru. Nestos díes de parafernalia, Uviéu enllénase de fuercies policiales qu’entorpecen o incluso impiden el normal desendolcu de la vida de los y les ciudadanes pal regocixu d’unes élites ayenes a la realidá na que viven les clases populares.
Y ye que nuna Asturies con 100.000 paraos y paraes, na que dende Xineru de 2011 tuvieron qu’emigrar 17.000 mozos y moces, na que perdemos miles d’habitantes al añu, nun país cada día más avieyáu y con menos perspeutives de futuru, nun podemos facer más que denunciar la política del “pan y circu” a la que dende les instituciones estatales, asturianes y municipales mos somorguien en toles ocasiones que pueden.
Consideramos que nestos tiempos de dificultá pal conxuntu del pueblu trabayador asturianu, ye una obscenidá y una burlla a la ciudadanía’l fastuosu despliegue de medios económicos y humanos, con sovenciones millonaries a una fundación qu’escapa al control públicu y que nun sabemos mui bien en qué emplega caún de los euros del pueblu que-yos apurren les instituciones.
A too ello, queremos amestar que’l pueblu asturianu nel so conxuntu nun se ve representáu por una serie de valores –represores, machistes, homófobos, autoritarios- tresmitíos pola institución monárquica, fechu pol que calificamos como una humildación al pueblu asturianu esti eventu.
Dende Conceyu Abiertu camentamos que ye pernecesario que les nueses instituciones dediquen el so tiempu, esfuerzu, enfotu y el nuesu dineru na creación d’un texíu económicu que dea salida llaboral digna a la bayura de paraos y paraes qu’enllenes les llistes del desemplegu nel nuesu país.
Creyemos que ye más importante poner fin a la marxinación y represión na que vemos sometida a la nuesa cultura, identidá, y a la nuesa llingua. Represión y marxinación a la que contribuyen estos premios qu’en nengún casu tienen en cuenta los nuesos rasgos propios.
En definitiva, hai que poner les mires en custiones que de verdá afeuten a los problemes diarios de los y les asturianes, y non n’eventos elitistes ayenos al pueblu y que sólo sirven pa l’autoafirmación de les instituciones que mos llevaron a l’actual situación. En consecuencia, dende Conceyu Abiertu vemos necesaria una movilización lo más amplia posible, en númberu de participantes y en variedá d’aiciones, pa denunciar la situación y amosar el refugu del nuesu pueblu pa con esta llaceria
