La mocedá independentista-Darréu- colos trabayadores de Diasa Pharma.

La muerganización independentista asoleya un comunicáu na so páxina web en solidariedá colos trabayadores de los laboratorios mierenses:

"

Dende Darréu queremos amosar tol nuesu sofitu y solidariedá colos trabayadores de Diasa Pharma.

La empresa, asitiada nel Valle de Turón, lleva dos meses yá ñegando’l so salariu a los sos trabayadores y poniendo en pelligru los puestos de trabayu d’estos. Manuel Adenso Iglesias, que ye’l xerente y másimu responsable de Diasa Pharma ye’l principal culpable de la situación de la empresa y de los sos trabayadores. Amás, les negociaciones con estos tuvieron enllenes de mentires y amenaces, por parte’l xerente, según l’asamblea de trabayadores de la empresa mierense.

Énte la grave situación d’estos ciudadanos, que siguen trabayando anque se-yos ñegue’l so salariu, Darréu quier amosar la so postura al respeutu. La nuesa muerganización revolucionario quier desixir el pagu de tolos salarios a estos trabayadores, ensín esceiciones y con continuidá, ya que camentamos que son estos mesmos los que caltienen la empresa en pie y la so actividá, mentantu los responsables d’esta, que ñeguense a pagar a los trabayadores siguen viendo medrar los sos beneficios. Asina, amosamos tamién la nuesa postura sofitando la continuidá de los llaboratorios, los que, según l’asamblea de trabayadores de los mesmos, tienen total viabilidá. A la fin, queremos desixir que nun se toque nengún puestu de trabayu, pues la plantiya, cumplíes les sos vindicaciones, tien la intención d’echar la empresa alantre y siguir cola continuidá d’esta, como fizo hasta agora.

Creyemos qu’estes demandes son necesaries de cumplir, yá qu’esta situación agravaría más entá la mala situación llaboral n’Asturies y especialmente, como ye’l casu, nes Cuenques Mineres.

Nun queremos escaecer tampocu d’otros casos de represión llaboral o de ñegación de drechos a los trabayadores como los d’Enferbus, Rioglass, Asturiana de Zinc… Nun podemos permitir el desaniciu del nuesu texíu industrial, yá que nun ye namai que sinónimu de paru y emigración.

Como ye vezu, dende’l “Principado” nun tomen postura alredor del tema y la clas política del país tien como mayor preocupación qu’Areces nun quede con fame nes sos visites oficiales.

Los culpables de la cris capitalista, siguen saliendo a la lluz con fechos llamentables como estos y con estes graves situaciones, y nun faen un res pa igualo.

Dende Darréu llamamos al Pueblu Trabayador Asturianu a movilizase escontra esti sistema en cris y da-y tol sofitu a los trabayadores de Diasa Pharma. Güei son estos pero mañana pue ser la plantiya de trabayadores de cualesquier empresa d’Asturies, la cris sigue y va siguir asina, faciendo pagar al Pueblu Trabayador los erros de la burguesía y l’Estáu facista español.

SOLUCION DIASA PHARMA ¡YÁ!

¡PUXA’L PUEBLU TRABAYADOR!

¡PUXA ASTURIES LLIBRE Y SOCIALISTA! "


Tamién el PCPE amosó el so sofitu y la so solidariedá publicamente colos afeutaos d'esti conflictu llaboral. Ún más nel nuesu pais...