Intervención de CSI na manifestación de Democracia p'Asturies

Un saludu a toos y a toes dende la Corriente Sindical d’Izquierda. En primer llugar, esti sindicatu quier agradece-y a la plataforma ciudadana Democracia p’Asturies la so consideranza pa con nós, convidándonos a participar nesta movilización xunitaria que, ente toos y toes, tenemos la responsabilidá de tornar nuna alternativa política fuerte que-y eche la galga a quienes-y ñeguen el pan y la Sal a Asturies.

Si falamos de democracia, dende la CSI, pescanciámoslo nel so sentíu lliteral, ello ye, poder pal pueblu. Y si falamos de democracia p’Asturies, tamos falando de poder pal Pueblu Asturianu. De poder pa que sólo’l Pueblu Asturianu tea la capacidá pa decidir cuálu va ser el so presente y cuálu va ser el so futuru. Nun podemos dexar que denguna otra istancia o istitución nos quite’l poder que nos correspuende exercer comu Pueblu que somos. Nin los gobiernos, nin los parllamentos, nin los Tribunales de Xusticia pueden usurpar el nuesu drechu a escoyer lo que queremos o lo que nun queremos ser.

Pero nun podemos escaecenos de la nuesa hestoria, la que nos llevó a ser, anguañu, los que somos la gran mayoría de nós: trabayadores asturianos y asturianes. Nun hai de tracamundiase. La soberanía d’un Pueblu nun pue subordinase a denguna consideranza, pero esta soberanía tampocu nos sirve si vamos algamala a cualisquier preciu. El progresu d’Asturies tien d’apareyar el progresu de la mayoría’l Pueblu Asturianu y esa mayoría nun ye otra que la clas obrera asturiana. Nun hai una cosa ensin la otra.

Y, nesi sen, dende la CSI queremos denunciar equí la necesidá d’enanchar el conceutu de democracia a la estaya llaboral. Anguañu, el sistema de representación sindical nos estremaos seutores productivos, apareya braeros pucherazos elleutorales y regala miles de millones d’euros del dineru públicu a los sindicatos CCOO y UXT que, col so exércitu de lliberaos y banduyos agradecíos, lleguen a facer comedies comu ésta que nos tienen entamada pal prósimu 29 de setiembre, con una fuelga xeneral apautada con Gobiernu y Patronal y que va apareyar, si nun-y ponemos remediu, un nuevu pasu atrás pal conxuntu de los y les trabayadores.

Por una democracia real p’Asturies, por un poder real pal Pueblu Asturianu y por un poder real pa la clas obrera asturiana, ye polo que tenemos de lluchar.

¡Puxa Asturies!

Por Paco Iglesias