A la Señora Consuelo Vega Díaz (II)

A la Señora Consuelo Vega Díaz, Direutora de Política Llingüística del Principáu d’Asturies.

Primeru.- Dende mayu de 2010 lleva ensin actualizase la información sobre l’estáu de los trabayos de la XAT. Poro, desconozse: si hai más conceyos con dictame definitivu, qué conceyos tán en distintes fases del proyeutu y si hai solicitúes nueves de revisión de toponimia por parte de los conceyos.

Segundu.- Cola información espublizada hasta güei, sábese que’l conceyu d’Uviéu lleva años enllamorgáu nel primer pasu de solicitú de revisión toponímica y el conceyu de Santu Adrianu bien de meses, ensin finar el procesu, siendo adelantáu por conceyos qu’entamaren el trabayu con posterioridá.

Terceru.- Anguaño 15 conceyos siguen tando fuera de los trabayos cola XAT: Cabrales, Candamu, Cuaña, Cuideiru, Eilao, Muros, Navia, Onís, Peñamellera Alta, Peñamellera Baxa, Pravia, Les Regueres, Santiso d’Abres, Sotu’l barcu y Villayón. Seis años depués del entamu de la normalización toponímica.

Paez qu’esiste una cierta dexadez col exerciciu de normalización toponímica nun actuando la XAT en momentu nengún d’oficiu, y ensin "forciar" a los conceyos a entamar o entainar los procesos de normalización, faciendo que’l procesu s’allargue. Tampoco paez qu’esista voluntá de la so institución por facilitar la comunicación colos ciudadanos esmolecíos pola normalización llingüística.

Poro:

ENCAMIENTO-Y

a) Actualizar la información sobre l’estáu de los trabayos de la XAT.

b) Ufrir información de por qué se producen esos retrasos na fechura de los espedientes toponímicos d’Uviéu y de Santu Adrianu. Amás, tomar les midíes oportunes pa que, dende la XAT, se fuerce a continuar esi procesu abiertu.

c) Afalar a la XAT pa qu’actúe d’oficiu escontra esos 15 conceyos que nun entamaron la revisión de la so toponimia, seis años depués dende l’aniciu de los trabayos. Amás, procurar que la so institución respuenda, positivamente o negativamente, a les comunicaciones que se-y faen llegar dende cualquiera de les señes dispuestes pa ello.

N’Uviéu, a dieciséis de setiembre, de dos mil diez.

Vitor Suarez

Del so blogue fueya en blanco.