La organización nacionalista confía en que "s’investigue’l restu la trama clientelar del PSOE n’Asturies"
Andecha astur considera’l fechu de que l’esConseyeru d’Educación del “Principado” seya deteníu ya investigáu por corrupción ye motivu "de satisfaición y esperanza pal conxuntu la sociedá asturiano, que dende va decenios vien careciendo cómu’l PSOE texe una rede clientelar col mayor de los descaros ensin que fasta anguañu se tomare denguna midía xudicial al respeutu". Dende’l "comencimientu dafechu" de qu’esti casu nun ye más que "la punta l’iceber de la corrución sustentada pol PSOE n’Asturies", Andecha Astur espera que se lleve alantre una "investigación a fondu d’esti casu concretu", que tien comu protagonista a José Luis Iglesias Riopedre, "amigu presonal d’Álvarez Areces", recuerden, y que la investigación "se xeneralice al restu d’alministraciones asturianes (“Principado” y Ayuntamientos) xestionaos pol PSOE".
Pa la organización asturiana d'izquierda qu’un esConseyeru d’Educación y la so man drecha seyan deteníos ya investigaos por corrución "ye tan escandaloso comu novedoso n’Asturies, pero la verdá ye que ye vox populi ente tola comunidá educativa de los cientros públicos la especial “predileición” que la Conseyería d’Educación tien con determinaes empreses, siempres les mesmes, a la hora d’alxudicar equipamientos, y el vezu de rialicar diches alxudicaciones “a deu”. Otru tantu podríemos dicir del restu les alministraciones xestionaes pol PSOE, nes qu’estes dinámiques costitúin norma".
"Esperamos qu'esta iniciativa nun seya solo un llaváu de cara ante la opinión pública, frutu d'una venganza ente facciones agora enfrentaes dientro del propiu PSOE o too ello xunto" afirmen dende la formación política. "N'Andecha Astur naguamos por Xusticia qu'en casos como esti nun mire pa otru llau y eche la galga a esti sistema corruptu, cuya podredumbre ye de dominiu públicu y xenera un un creciente clamor social pol so desmantelamientu", rematen la nota de prensa.
Fonte: Infoasturies
No hay comentarios:
Publicar un comentario