Andecha Astur considera un insultu les declaraciones del PSOE vinculando l'arguyu de sentise asturianos con ser d'estrema derecha.
La organización política asturiana, d'izquierda y que diz tar arguyosa de ser asturiana, critica que'l PSOE y Lastra escaecen "que la mayoría del Pueblu Asturianu ta arguyosu de ser y sentise asturianos y quieren seguir siéndolo y sintiéndolo" y entruga si dende'l PSOE "se ta llamando a los y les asturianes facistes".
"Sabíamos que nel PSOE da alerxa tolo que suena a asturiano, d'ehí les sos polítiques antiasturianes y d'esfarrapamientu del país social, cultural y económicamente pero les declaraciones de Lastra déxenlo mui claro", apunten na nota prensa.
P'Andecha Astur Fernando Lastra "nun contentu con insultar" a los y les asturianes arguyosos de selo catalagándolos de ser d'estrema derecha, critica que dixera que l'arguyu de ser asturianu, catalán o alemán llevaba a “situaciones dificiles” ensin esplicar, diz la formación asturiana, "a que lleva el so arguyu de sentise español y el so españolismu munches veces asoleyáu pol PSOE y los sos dirixentes n'Asturies" que consideren "ensin dubia" más averaos a la estrema derecha "que los que nos sentimos arguyosos de ser asturianos y tenemos un proyeutu de futuru pal nuesu país".
Con too ello, Andecha Astur considera que'l PSOE "destapó tovia más la so cara antiasturiana" dexando claro que "namás representa un proyectu nacionalista español escluyente y derechista n'Asturies, siendo'l másimu esponente d'un réxime caciquil, dominante n'Asturies dende va décades, y que tien como resultáu la crisis endémica que carez Asturies y que sufre'l Pueblu Asturianu con altos índices de pobreza, esclusión social, precariedá llaboral, emigración, represión...sofitáu na destrucción d'Asturies en toles estayes dende'l desmantelamientu industrial, pesqueru o agrícola-ganaderu hasta l'esfarrapamientu ecolóxicu pasando pola aculturización y la represión llingüística" acaben.
No hay comentarios:
Publicar un comentario