La Corriente Sindical d’Izquierda convoca’l prósimu vienres 21 de xineru, a les 19:00h, n’El Parche (pza. l’Ayuntamientu) d’Avilés, una cacerolada popular escontra los culpables de la cris, que percorrerá les cais céntriques de la villa, pa desixir la retirada de la Reforma Llaboral y de les Pensiones.
Cacerolada a los banqueros:
Porque son los vampiros de la clas obrera. Porque arrastráronmos a toes y toos a esta cris, pola so ambición y polos sos puñeteros beneficios. Porque, por munchu que s’antroxen de modernidá, siguen siendo unos simples usureros. Porque viven na opulencia a costa del nuesu trabayu y el nuesu sudor. Porque enxamás ficieren nin una sóla cosa bona y honrada en tola so vida. Porque mos dexen na cai embargándonos les nueses cases. Porque siempres tan metíos en chanchullos. Porque mos roben con préstamos abusivos. Porque la única ética que conocen ye la de les perres fáciles y ayenes. Porque especulen col dineru que reciben del Estáu, que ye’l dineru de tolos ciudadanos y ciudadanes. Porque tan desangrándonos. Porque financien les guerres y enllenen el mundiu de fame y miseria. Porque donde éllos apaecen lo únicu que mos dexen ye la ruina. Y porque representen tolo que les ciudadanes y ciudadanos honraos nun mos peta ser.
Cacerolada al PSOE:
Por dexar de ser un partíu pa tornase nuna mafia. Por dexar de ser socialistes y axuntase cola banca y los grandes empresarios. Por dexar de ser obreros y tornase capitalistes. Por regalar el nuesu dineru a los bancos. Por abaratanos el despidu y dexanos nel paru. Por baxanos los sueldos. Por corruptos y mentirosos. Por metenos na cárcele cuandu defendemos los nuesos drechos. Por facenos trabayar fasta cayer de vieyos. Por prexubilase a los 52 años con retiros millonarios. Por caciques y prepotentes. Por gaseanos nes piscines. Por facer EREs nos ayuntamientos. Por privatizanos l’agua y facela más cara. Por subinos los precios de todo y saqueanos la nómina pa enllenar los bolsillos de los banqueros y los grandes empresarios. Por nun dexanos llegar a fin de mes. Por xodenos el presente y arruinar el futuru de los nuesos fíos y fíes. Por facer que, por primer vegada, les nueves xeneraciones vaigan a vivir pior que les anteriores. Por dexar que los ricos paguen lo mesmo que los probes. Por cobrar sueldos millonarios que nin se ganen nin se merecen. Y por traicionar a los braeros y braeres socialistes que dieren la so vida por causes xustes.
Cacerolada al PP:
Porque sofiten la Reforma Llaboral y la Reforma les Pensiones. Porque cuandu gobernaren quisieron facer lo mesmo qu’anguañu ta faciendo’l PSOE. Porque onde gobiernen privaticen la sanidá, la educación y tolo que se-yos pon per delantre. Porque van algamar que namás tea mélicu y vaiga a la escuela el que tea perres pa pagalo. Porque onde gobiernen intenten meter na cárcele a los y les trabayadores qu’exercen el so drechu a la fuelga. Porque a poques que nos descuidamos métennos nuna guerra. Y porque tienen a mediu partíu implicáu en xuicios por corruición.
Cacerolada a la FADE y la CEOE:
Porque nos esploten. Porque enxamás nos paguen tolo que nos deben. Porque nos roben. Porque nos puteen. Porque entá-yos abulta poco. Porque nos menacien, nos xantaxeen, y nos despiden cuandu protestamos na empresa. Porque son la vergoña l’empresariáu européu. Porque siguen na Edá Media. Porque cobren sovenciones del Estáu y dempués y lleven los beneficios a paradisos fiscales. Porque tienen les lleis llaborales de la so parte. Porque tienen impunidá pa incumplir les lleis. Porque defrauden a Facienda. Porque nun aseguren a los y les trabayadores. Porque nes bones dómines nun repartieren los sos beneficios y agora quieren que los y les trabayadores paguemos les sos pérdides. Porque a lo qu’éllos faen llámenlo “trabayar”. Porque, comu diz el canciu: “paez que tragaren un tenedor, porque nun doblen nin pa dios”. Porque amás de trabayar pa ellos tenemos d’aguantar les bronques que nos echen. Porque pa ellos siempres trabayamos poco. Porque marchen de vacaciones de luxu coles perres que dexen de paganos. Y porque faenmos trabayar ca vegada más por menos perres.
Fonte: www.csi-asturies.org
No hay comentarios:
Publicar un comentario