Reproducimos equí la entrevista que'l Blogue Frayando Cadenes fexo al blogue compañeru Andecha Obrera, que ta entamando na rede anguañu. Esperemos que seya bienllegada y presta a los lleutores.
1. ¿Por qué surde "Andecha Obrera" nesti momentu? ¿Qué se quier tresmitir dende esti blogue?
El proyeutu d’Andecha Obrera entama agora poles dos grandes problemátiques del nacionalismu que tan surdiendo caberamente: el medrante anticomunismu, principalmente representáu por cierta xente que postea per Glayíu, provocáu por un odiu infundáu haza PCPE y CMC (acusaos d’españolismu xabaz, insisto, infundáu) y pol crecimientu de les opciones socialdemócrates que representen BpA y UNA que, dende’l respetu a los seutores de militancia que nun comulguen cola reforma pero busquen salíes eleutorales (que nun comparto pero, en parte, comprendo), tán faciendo dañu a la ideoloxía revolucionaria tradicional del nuesu movimientu representáu hestóricamente por CNA, ENA y AA.
2. ¿Cómo ves la bloguesfera n'asturianu? ¿Crees que la izquierda patriota asturiana tien munchu pesu dientru d'esta?
Paezme que ta medrando d’una forma ilusionante y cásique siempres dende una óptica nacional y vindicativa. Ensin embargu tornamos a lo d’enantes, ta tirando per una vía pela que nun taba y puxando por una propaganda contrarrevolucionaria.
3. ¿El blogue "Andecha Obrera" ñaz col enfotu nun pasar del ámbetu de la rede o se quier tresmitir el mensaxe a nivel de cai, foros, dende "Andecha Obrera"?
Nun creo que se vaiga formar un movimientu d’esto (rises). Sedría bono, pero nun s’espera. Paezme que yá esisten organizaciones que defienden el socialismu y l’autodetermín y, poro, nun sedría necesario pasar a mayores.
4. Como podemos agüeyar hasta'l momentu el blogue va tornar y recuperar testos de la tradición marxista revolucionario y otros más actuales nesi sen. ¿Ye esti un de los proyeutos que se propón el blogue dende un entamu?
La idea ye la d’averar a los asturfalantes la lliteratura comunista al traviés de los clásicos (Marx, Engels, Lenin, Stalin, Mao…) y de nuevos autores cola torna d’artículos y testos, amás de dalgunos de producción propia. Tamién creo que ye importante emplegalu pa la promoción d’actos y opciones polítiques asturianes averaes a la nuesa tendencia marxista.
5. Como ves la situación d'Asturies y el Pueblu Trabayador Asturianu anguañu. ¿Crees qu'hai soluciones a curtiu-mediu plazu?
Habeles hailes. Interpretando la realidá asturiana dientro d’España cualaquier partíu socialista (real) que lleve alantre l’avance de l’autonomía puede meyorar la nuesa situación, anque non iguala del too. Les llinies que más me tiren (refiriéndome a partíos políticos) son les d’Andecha Astur y del PCPE, yá que dambos tán pol drechu d’autodetermín y pol socialismu, que son los finxos que debemos tener toos y toes siempres no cimero de la nuesa torre ideolóxica. Pero tengo bien nidio que, pa min, el verdaderu oxetivu ye la formación de la República Socialista Asturiana y la consiguiente llegada de la sociedá comunista.
6. ¿Qué opinión ties de los movimientos políticos que se tán dando dientro de la izquierda nacionaliega? ¿Cómo se ve'l movimientu soberanista? ¿Crees que ye necesariu construyir espacios comunes y caltenelos?
Nel ámbetu esclusivamente nacionaliegu solo observo dos que se puedan definir d’izquierda nacionaliega (por nun dicir ún). Paezme increyible que los medios alternativos nacionales sigan tratando a PAS como una candidatura nacionalista. BpA-UNA son una coalición a observar y a tener bien en cuenta tanto pol potencial d’averamientu a la cuestión nacional que paecen tener como polos problemes que pué provocar nel nuesu movimientu l’averamientu al centru-izquierda.
Les coses nun van como debieren dala situación perprobe del País pero demientres qu’esistan les plataformes de xuntanza como l’Ensame República Asturiana y Democracia p’Asturies, refugaes pola nueva “jet-set” nacionaliega, y demientres haiga militantes concenciaos con ganes de trabayar siguiremos dando lo qu’agora son pasinos pero igual mañana son “pasonos”.
7. ¿Cómo se ven les eleiciones nacionales de 2011 dende "Andecha Obrera"? ¿Meyor mirar pa 2015?
Murniamente pemeque nun sacaremos muncho a nivel nacional anque pa opinar va haber qu’esperar a la campaña eleutoral y a les eleiciones en si. Dende Andecha Obrera tirarase siempres pola opción más d’izquierdes y más independentista qu’haiga, de momentu esi papel represéntalu Conceyu Abiertu.
8. ¿Que falla n'Asturies pa que nun cale'l mensaxe revolucionario y patriota? ¿Crees que la izquierda española y estatalista fexo muncho por confundir a la xente? ¿Crees que s'ha de combatir esta mesma coles contradicciones que produz el so centralismu que-y fai el xuegu al nacionalismu español más ranciu?
Lo murnio ye que’l discursu revolucionariu nun ta calando cásique en dengún sitiu y Asturies debiere ser de los primeros, anque equí se prefiera tirar pa Cascos o pa Rajoy. Los partíos comunistes europeos cayeron cola llegada del eurocomunismu, qu’eliminó a tres de los más grandes partíos marxistes occidentales: l’español, el francés y l’italianu (que yera’l más grande). Solo’l Partíu Comunista de Portugal ya’l KKE griegu (anque haiga que tener en cuenta exemplos como los chipriotes AKEL o’l gobiernu bielorrusu del Presidente Lukashenko) representen una verdadera vanguardia.
Respeuto al mensaxe patriota, hai esperances entovía, pero hemos de quitanos d’enrriba d’una vez por toes la fatada d’“Asturies ye España y lo demás tierra conquistao”. Somos ún de los pueblos con más argumentos hestóricos, económicos y políticos en pro de la independencia o, como mui mínimo, d’una autonomía que vaiga muncho más lloñe d’una simple federación. Si se caltuviere España habíemos de baxar la dependencia d’ella a cásique cero.
La izquierda española nun solo fexo sinón que fai por ñegar la nuesa identidá. Incluso medios hispanistas y proto ultraderechistas como’l Catoblepas (onde participen dende supuestos maoistes d’UCE fasta ultraderechistes pasando per personaxes como Gustavo Bueno, cercanu al nacional bolchevismu según ciertos análisis del so discursu) almiten que’l nuesu nacionalismu tien un potencial pergrande, amás de comparar insistentemente a Andecha Astur y a Darréu cola izquierda patriota vasca pa tentar de criminalízalo. Si de verdá nun fueremos naide como dicen ellos, el señor Areces nun se diba nin a dignar a nomanos enxamás, pero’l fechu ye que lo fai. Sabe que somos los únicos que podemos tirar abaxo’l so sistema corruptu y la única salida ye falar mal de nós y repetir consignes dignes de Jose María Pemán.
España ye un Estáu qu’apunta a desapaecer como s’acabaron los imperios hestóricos y, murniamente, la URSS, escontra los cualos naide de la dómina diba apostar. La que yera Una, Grande y Llibre, pola fuercia de la hestoria, va tornase n’otra cosa. La entruga ye: ¿sedrá’l futuru que queremos o va apaecer dalgo peor? Esi ye un llabor que nos toca a nós, los militantes.
Munches gracies por contestar esta entrevista. A siguir puxando por una Asturies dixebrá y socialista
Gracies a vós, camaraes. Un saludu socialista y asturianu.
A 17 de febreru de 2011 en Frayanco Cadenes
"...plataformes de xuntanza como ... Democracia p’Asturies, refugaes pola nueva “jet-set” nacionaliega"
ResponderEliminarVamos ver hom, que paez qu'o nun mos enteramos o nun mos queremos enterar. Democracia p'Asturies YE UN "APAÑU D'AA-DARRÉU, ta inventao, xestionao y promovío por AA-Darréu. La propia web llévala xente d'AA-Darréu. Cómo nun se va refugar una "plataforma" que se quier nomar "ciudadana" cuando nun ye "ciudadana", sinón que ye una estratexa d'AA d'atropar xente pa la so cuerda. Precioso lo de "jet-set" nacionaliega, gran altor analíticu.
"...y pol crecimientu de les opciones socialdemócrates que representen BpA y UNA que, dende’l respetu a los seutores de militancia que nun comulguen cola reforma pero busquen salíes eleutorales (que nun comparto pero, en parte, comprendo), tán faciendo dañu a la ideoloxía revolucionaria tradicional del nuesu movimientu representáu hestóricamente por CNA, ENA y AA"
Vamos ver hom, n'Asturies NUN HAI MOVIMIENTU REVOLUCIONARIU TRADICIONAL, hai cuatro gatos xugando a abertzales. Quedase en qu'UNA-Bloque quier una salida "eleutoral" ye nun saber qué piensen los asturianos nin saber ná del país Astur. Date una vueltina pela cai (dexa los foros, los blogs, infoasturies...) y verás qu'Asturies camina per otru llau. Paezme que vives nuna Asturies que nun esiste. Cuando baxes del guindu, avísesme. Bloque-UNA faen una propuesta nacionalista d'izquierdes coherente, que nun tienen como lema cimeru "INDEPENDENCIA" porque eso ye una utopía anguaño. Dexái de creevos catalanes o vascos, Asturies va per otru llau, la idiosincrasia asturiana va per otru llau. Mui guapo falar del BLoque-UNA como propuesta "socialdemócrata", al mesmo altor que lo de "jet-set".
Con tolos respetos, paecenme respuestes mui de guaje. O nun t'enteres cómo ta'l patiu o trátanos como afataos.
Comilón: Dame que yes tú el que trata de fatos a los demás.
ResponderEliminarRespuestes mui de guah.e o quieres facelu guah.e que ye mui distinto. Que la xente asume un postuláu revolucionariu nun quier dicir pa nada que seya un inocente, pela cueta tien el vértigu del realismu.
Dices respuestes de guah.e porque la to apuesta política nun ye revolucionaria, porque optes por reformismo y la realpolitik, como bien se llee a lo llargo d'esti discursu que namás-y falta un afalamientu a la participación na fiesta de la "democracia". Pa encima permíteste criticar a la xente que quier facer auténticu poder popular, dende la base, contrapoder. Si nin, tú y los tó sois socialdemócratas pa empezar porque créeis que la llegalidá ye independiente e inocente, pero eso ye lo que pasa cuando nun se cree qu'esisten clases sociales cuando nun s'acata ún de la esistencia d'una hexemonía, tamién a nivel políticu e ideolóxicu.
¿El Bloque-UNA nun son una propuesta socialdemócrata? ¿Considérense acasu organizaciones de clase? ¿Tienen como oxetivu una sociedá coleutiva, na que los medios de producción sean propiedá del pueblu?
¿Ven la participación eleutoral o nes instituciones como un frente de llucha más o venlo como el fin, esto como el preséu más afechiscu pa camudar la rialidá?
¿Nun asumen (estremao d'acatar) esta llegalidá? Perendengues formó parte de Gobiernos del PSOE. ¿O toi metiendo mentires?
¿BPA-UNA tienen como oxetivu la revolución social n'Asturies?
Bien por Andecha Obrera (n'especial pola so crítica a un anticomunismo rampante que vien de los cuévanos del nacionalismo (que non patriotismo) más reaicionariu y remontáu), bien por Frayando Cadenes por danos a conocer esti blogue tan prestosu. Bien tamién a Conceyu Abiertu y la xente que participa nesi proyeutu de creación de poder popular, cuento algo mui necesario pa la que ta cayendo (muncho más qu'un diputáu risón) a quien-y deseo la mayor de les suertes.
¡Salú y Revolución!
Comilón, creo que nun fai falta respondete porque lo yá fexo en parte'l compañeru del mensax anterior.
ResponderEliminarPaezme mui guapo que na to cita elimines al ERA, el cualu, nun alarde de fidelidá a la socialdemocracia y al rexonalismu más ranciu, foi abandonáu por UNA. Respeuto a Democracia p'Asturies voi dicite que participo nesa plataforma y nun soi nin d'Andecha nin de Darreu.
Lo d'asturianistes xugando a abertzales dicíslo toos caberamente porque abandonastis la tendencia dígase lo que se diga. El nacionalismu asturianu auténticu SIEMPRES foi d'izquierda revolucionaria con esceiciones pequeñes y de curtia vida. Y, sí compañeru, BPA-UNA ta al altor del PSOE pero versión asturianista, como muncho llega a IX, pero nun vaigas creer que los que vois vendistis sois socialistes, siéntolo, y eso resúmese perbién na bateria d'entrugues qu'espuso el compañeru del comentariu anterior.
¿La xente na cai? ¿Sabeislo vós? Pues si quiero sigui-y el rollu a la xente de la cai métome en PP, PSOE o nel FAC que quies que te diga...
Primero refugastis de l'asturina, llueu de la independencia y llueu del socialismu... si eso ye ser realista prefero nun selo.
¡Puxa Asturies Marxista-Leninista y Soberana!
Dempues de tantos años de sintir la frase de Puxa Asturies Socialista, creo que la mayor parte de la xente que lo diz nun sabe de que ta falando. Creo qu'hai xente que si lo tien claro, pero a nivel individual, como ye'l casu d'Andecha Obrera. Entiendo que con una Asturies Socialista ca un tiende a faer utópicu el so modelu social d'esi supuestu socialismu, pero creo qu'hasta agora nun se fexo'l debate de como tendría de ser esi modelu de supuesta República Socialista Asturiana. Anque si creo que la xente del PCPE tien claro como tendria d'articualase una Republica Socialista duldo muncho que la mayor parte de la xente d'A.A. tenga clares eses coses, y mas que ná por falta de formación política, anque tamien se de dalgun que tien tanto de socialista como los citaos BpA. Esto que comento ye una reflexón o mas bien una entruga; Esiste un modelu o dalgún modelu d'estructurar un futuru estau asturianu en clave socialista?? entendemos por estau socialista la URRS d'Stalín? Sedría un estau con un únicu partíu, osea, un partiu comunista central?, esitiria un exercitu asturianu?? sedria realmente el poder del pueblu o sedría de la elite politica del partiu?? la riqueza sedria realmente colectiva o sedria propiedá del estáu??
ResponderEliminarCreo que la xente que realmente lluchais o teneis como finxu la criación d'una República Socialista Asturiana, tendrieis que sentavos y debatir sobre como sedria y como s'estructuraria esi modelu. Ye un asuntu que nun se trató y posiblemente seya un de les coses poles que la izquierda d'asturies seya un ambitu mui plural y ensin estructurar realmente. D'éllo que xente que comparta los mesmos principios tean espardios, militandfo en distintes organizaciones. Ya seya PCPE, UNA, BpA, o AA) (si, anque paeza mentira hai comunistes en tooes elles) ensin que ninguna d'estes siegles lluche realmente por esa Republica Socialista Asturiana, pero que son la unica forma d'esos militantes de dar pasinos a falta dun braeru partiu comunista asturianu.
Pensailo, alomeyor ye'l momentu. Necesitais d'esi debate, y los que nos movemos n'esti ambitu de la llucha social, tamien necesitamos que lu tengais pa saber realmente de que se fala cuado se diz Puxa Asturies Socialista o Republica Socialista Asturiana.
Creo que se nota que nun soi comunista, pero dexo claro que nun soi anticomunista, creo que tamién se nota.
olos Estaos tienen un calter de clase, son la espresión d'una clase contra otra. La diferencia ta cualu ye l'envís d'esi Estáu y l'interés de que clase defiende. Un Estáu socialista respuende al interés de les clases trabayadores que son la mayoría social, y tien como envís acabar coles clases sociales, pa ello procura encetase ente otres coses n'acabar cola división del trabayu, a midía que les diferencies sociales mengüen, l'Estáu tamién porque nun se fai necesariu. Nun Estáu socialista como na URSS de la témpora de Stalin qu'amientes (típicu cliché)esiste propiedá estatal y tamién esistía propiedá autoxestionada como son los koljoses. Tener equí un alderique sobre esa témpora llevaríanos munchísimu tiempu y acabaría cafiando y cafiándonos. Pero ye curiosu que a Stalin se lu critique polo que s'aloya notros. Ye persimpáticu que se critiquen los planes quinquenales cuando l'oxetivu de los mismos yera la socialización completa, del campu y de les fábriques. Porque la NEP necesaria pa unm tiempu concretu, creare tamién una especie de burguesía primixenia (Los NEPmen) y tamién espurriere la dependencia y el poder de los Kulaks sobretoó en llugares como Ucrania onde practicaben de cutiu el sabotaxe, pero nun campesín ricu (nun te lo niego como nun burócrata, pero pa eso tien que tar precisamente'l Partíu y tamién esiste la llucha de clases y la revolución cultural) ta la semiente del capitalista. Pues bien mientres se ponen a baxar d'un burro a estos planes empondérense por exemplu los procesos de coleutivización de los anarquistes n'Aragón.
ResponderEliminarEl problema de les comunes y l'autoxestión sin un mecanismu de control superior (lo cual nun quier dicir que nun sea democráticu) ye que acaben causando desigualdaes sociales esplícome: Non toles tierres son iguales de buenes pa cultivar, (arriendes non tola xente ta igual de formada nin tien la misma traza pa trabayar). Nun ye lo mismo semar patates en La Vega de Pravia que pa contra la montaña en L.lena. Esto tendría como resultáu qu'unes comunes autoxestionaes diben a tener más escedente ser más riques, naide nos asegura que nun s'aprovecharen d'esa situación y apaiciere otra vuelta una nueva clase dominante. Esa ye la función del Estáu evitar eses desigualdaes.
Un Estáu que respuende al interés mayoritariu y que'l so furrulamientu s'afite nel centralismu democráticu, esto ye que dende cualisquier barriu d'Asturies hasta p'arriba tola xente participa nel procesu d'escoyeta y xixilancia de los sos responsables. Porque afitándose nos principios de la Comuna de París tolos responsables del poder popular puen ser en cualisquier momentu revocables, arriendes de tener que rendir cuentes colos sos eleutores. ¿Cuála ye la función del Partíu? El Partíu ye la organización de la vanguardia de la clase, y el so envís ye primero la construcción del socialismo y dempués l'avance haza la sociedá sin clases: el comunismo.
El Partíu ye independiente del Estáu porque la llucha de clases sigue dientro del socialismo, y sigue cumpliendo cola so función, ser un preséu nes lluches de la clase de vanguardia: la clase obrera y trabayadora. La clase democrática, la clase qu'aspira a la desapaición de les clases,... Nesti sen tien qu'ente otres coses mirar pol mantenimientu de la democracia nel Estáu, por evitar la so burocratización, por evitar el rexurdimientu de la clase burguesa infiltrada o nueva en clave de nomenclatura, porque los responsables cumplan la so función y nun s'esmanen. "Cañoneemos el Comité Central" dixo Mao-Tse-Tung. Y esto tamién lo fixeron los anarquistas sinon mirái la FAI que xurdió pa mantener la pureza ácrata dientro de la CNT y llegó a voltiar Congresos (recuérdese la engarrapela colos Trentistas y la so espulsión).
ResponderEliminar¿Otros partíos? Bien eso depende del procesu de les circunstancies de los propios partíos. Nel fondu los partíos y les llínies polítiques son espresión del interés de clase.
Yo nun duldo qu'haya socialistas revolucionarios n'AA, algún hai n'UNA. ¿En el BPA? Nun sé, entós quiciás los haya n'IX.
Tamién la izquierda revolucionaria esiste (y quiciás más presente) acullá de los partíos, ehí tenemos coleutivos como Fai!, Sofitu, xente que trabaya a nivel de base, sindical, en dellos movimientos sociales y populares...
Lo que ta claro ye que les contradiciones de clase esisten tamién dientro de la propia nación, cosa que dalgunos encumaos o autoencumaos s'encerricen en negar. Fálase munches vegaes de xuntanza amplia queriendo amestase col PAS (incluso cola URAS), dexando al deslláu a otres organizaciones, a quien critica eso llámenlu español.
Pero ehí tenemos l'artículu del so cabezaleru (el Roxu) del xueves o el miércoles: Onde afirma que les medíes d'agresión de derechos de la clase trabayadora son necesaries y que'l principal derechu del trabayador ye trabayar (nun se decata que ye una obligación, el trabayador namás tien la so fuercia de trabayu pa garantizase la esistencia). Camiento que los esclavos negros nel Sur taríen encantaísimos.
Sería interesante que-y echaran una güeyada.
¿Pué alguien mínimamente d'izquierdas amestase con esta xente y siguir siéndolo? Pues repito que munchos encumaos y queríos lo defienden. Pero en fin la llucha d'idees la llucha de clases ta presente en tolos sitios.