Tamos viviendo’l trenta aniversariu’l güelpe d’estáu del 23 de febreru. Si hai una fecha bien presente na memoria dende la muerte de Franco, esa ye la del 23 de febreru de 1981. Los que la vivimos siendo entá mui mozos (yo tinía ventiún años) pensábamos qu’aquella muerte taba ya mui lloñe, como na nueche los tiempos, pero nun yera asina. Namái pasaren cinco años y la mayor parte de lo qu’entós llamábamos “poderes fácticos”, los que constituín de verdá’l “Poder” con mayúscula taben tan vivos como enantes. Nun yera’l primer sustu que llevábamos pero sí que fo’l más espectacular ya’l que pudo saldase con un bañu sangre si daquién d’aquel pelotón de guardies civiles perdiere los nervios.
Ye verdá oficial qu’aquella tarde-nueche d’iviernu, dempués del miéu y la coruxía, la historia diera un saltu y la democracia consolidose nel reinu d’España. Diz la versión oficial que’l fracasu’l güelpe abrió la puerte a un nuevu exércitu y a una nueva sociedá, de móu y manera qu’elli zarraba la transición, dando pasu a un gobiernu prácticamente provisional y a l’alternancia ensin conflictu un añu más sero, cuando’l PSOE ganaba les ellecciones con mayoría absoluto.
Ye verdá que’l 23 de febreru de 1981 supunxu un saltu, pero yo camiento que polo contrario. La transición finaba, no pol fracasu’l güelpe sinon, mui a la contra, pol so trunfu. La sociedá española que nacía d’aquella nueche de tricornios y transistores yera más medranosa, más plana, más acomplexada y más apolitizada que la de dos díes enantes. La sociedá nun se fixo más democrática sinon más acomodaticia.
Echar una güeyada a cómo se llegare a situación tala nun ta de más. El xeneral Franco dexara “amarrao y bien amarrao” la custión, sabeor como yera –ye hora d’entamar dicir que’l gallegu paticurtiu nun yera dengún babayu inorantón- que la monarquía nun diba poder caltener el modelu de 1939 y que la salía democrática yera la única posible. Lo “amarrao” nun taba en caltener el franquismu, sinon en construyir una democracia non participativa que nunca rompiera llazos col franquismu mesmu. Lo amarrao consistía nel escaecimientu de tolo anterior a la guerra civil. A los franquistes dexábase-ys la manda de que nun punxeren pilancos, col compromisu de que nun diben ser sometíos a un xuciu responsabilidaes como los sos compinches alemanes, italianos ya inclusive portugueses. Y a los comunistes diben dexalos participar siempres que s’engodollaren na bandera borbónica y permitieren que los muertos de la república y de la posguerra quedaren azotaos peles cunetes y nes foses comunes de los camposantos. ¿Y los socialistes?. Esos, ensin problema: yá pertenecíen al réxime dende los caberos sesenta. Yá fueran igual de rastriegos con Adefonso XIII, participando nel gobiernu de Primo de Rivera. El borbonismu de los socialistes ye patolóxico. Y sigue siéndolo: si un día se custiona la monarquía toi seguru que’l partíu más borbónicu va ser el PSOE. Por cierto, que yo poco lluché porque tinía diecisiete años cuando morriera’l dictador. Fixi lo que pude ya onde pudi, que fora más bien poco. Pero sí ye verdá que na facultá onde estudié (la más politizada de Madrid) nunca conociera a naide’l PSOE. Pero agora resulta que xente de la mio promoción y d’otres dos o tres anteriores tan, a lo que paez, enllenes de combatientes antifranquistes que güei son altos directivos del partíu de Pablo Iglesias.
Nel 1977, cuando les primeres ellecciones, hebo total llibertá… Eso dicen, pero nun ye verdá. Nun pudo presentase naide a la esquierda’l PCE nin naide que llevara la “r” de “republicanu”. Nun fora llegalizada Izquierda Republicana, nin Esquerra Republicana de Catalunya y nin tansiquier Alianza Republicana Democrática Española (ARDE), de centru-drecha. Con ello buscaba’l neofranquismu que tol esquierdismu cayera pa la macona’l PCE y la memoria republicana pal ocháu’l PSOE. Agora, bona verdá ye que tolos partíos faxistes, inclusive los que practicaben la violencia armada, pudieron presentase. Y saliera bien la cosa.
Pero nun contaran nel amagüestu cola fuercia’l nacionalismu. Creyíen controlaos al PNV y a CIU. Pero ye qu’había otru nacionalismu nuevu, estremáu del primer nacionalismu democristianu y pactista. Nun yera namás qu’ETA o Terra Lliure, sinon que yera un movimientu emerxente que diba dende la ERC illegal nel entamu, a la UPG de Galicia, el MPAIAC de Canaries o’l mesmu CNA d’Asturies. Y too esi movimientu espardiera pente 1979 y 1981.
Tampoco cuntaron con un movimientu obreru non obediente a UGT y CCOO, simplayos títeres del PSOE ya’l PCE en tou esti procesu. Dende sindicatos nacionalistes como LAB o INTXG hasta la vieya CNT, pasando por esperiencies autoxestionaries impresionantes n’Andalucía y por potentes cooperatives en Cataluña, Asturies ya’l País Vascu, poníase en custión un día sí ya otru tamién aquel pautu neofranquista.
Y taba dempués la mocedá, una mocedá que yera ñeta de los afusilaos pol nacionalcatolicismu, una mocedá que yá nun tinía’l miéu de casa, aquella llerza de nun falar, de “nun metese”. Aquella mocedá taba esperando que, dempués de Franco, aportare la democracia, pero la democracia de verdá y non el sucedániu que-ys regalara Torcuato Fernández Miranda y Xuan Carlos I. Aquella mocedá peleara colo poco que tinía y cuntiando colos pocos que yeran –eso de que cientos de miles combatieran al franquismu ye una mentira noxante- por otra cosa.
Ya nesti panorama españó’l 23-F. A mi les histories conspiranoiques nun m’importen un res. ¿Quién taba implicáu?. Pa mi ta claro: parafrasiando al clásicu castellán, “del rei abaxo toos”. El 23-F yera polo qu’allampaben el rei, el PSOE, el PCE, la UCD y AP. Tamién lo queríen los banqueros, el PNV y CIU. Y, por supuesto, el gobiernu norteamericanu que taba peresmolecíu pola oposición al ingresu na OTAN d’una ciudadanía mui antiimperialista y, al empar, d’un exércitu franquista mui autárquicu y antiyanqui.
Y Tejero entró nel Congreso y Milans del Bosch sacó los tanques a la cai. Y nun pasó nada porque nada diba pasar sacantes que, como yá dixe, un par de guardies civiles se punxeran nerviosos o Tejero decidiere pasar a la historia de los héroes hispánicos. Esi yera l’únicu riesgo, que delles persones camudaran en “kamikazes”. Pero nin tansiquier eso fixeran. Inclusive dende’l puntu d’agüeye militar aquello nun tuvo nin migaya d’heroismu.
El 24 de febreru –ye una forma falar- España entró na OTAN, aprebáronse los mayores recortes llaborales dende la muerte de Franco, los nacionalistes del PNV y de CIU arrugáranse bien arrugaos y los movimientos sociales foran reprimíos política y socialmente, amás de ser criminalizaos por una sociedá acoyonada que pensaba que yeren los culpiables de que los militares torgaren la transición democrática.
Van trenta años. El güelpe trunfó con claridá. Agora, como pa cellebralo, pretenden acabar colos drechos llaborales que queden, coles más básiques llibertaes públiques y col estáu de les autonomíes. Nun ye casualidá. El reinu d’España, un cenciellu protectoráu económicu como bien diz el PP (qu’en nada va arrepentise d’eses pallabres porque seguirán siendo verdá cuando gobierne Rajoy), ye un exemplu de “democracia cleptómana representativa” que namás sobrovive sobro la corrupción y qu’entá tien unes cuantes decenes de miles de desapaecíos a los que-ys ñeguen, cuando menos, cristiana sepultura.
David M. Rivas
No hay comentarios:
Publicar un comentario