Semeya d'una movilización del Conceyu Nacionalista Astur, nel primeru de mayu de 1979, paez ser que en Sama de Llangréu. La imaxen s'asoleyó nel so día na revista qu'esta formación política asoleyó, la mítica revista " Asturies Dixebrá". Como se pue agüeyar el llema principal ye " Asturies pel so autodetermín", y acompanguen a esti mesmu otros como " Non al desmantelamientu del País Astur" o " Puxa Asturies socialista y dixebrá", amás d'otros en clave puramente social. Ye solliñable que pa ser una convocatoria d'eses carauterístiques, nun primeru de mayu y entamada dende'l propiu CNA namái, se ve xentuca. Nun ye una movilización masiva pero llega al poder de convocatoria y supera al de les organizaciones nacionalistes d'anguañu.
D'aquelles se pecaría d'inocencia, de faltes d'organización, de poneilo fácil al control policial de la pseudodemocracia ñaciente o de grandonismu. Pero lo que ta nidio ye los militantes del CNA, por exemplu, nun taben militando tres d'una pantalla, nun taben faciendo vaciu a naide y nun se pasaben hores y hores emporcando al vecín nacionaliego. D'aquelles la llucha taba na cai, non n'interné. Ta nidio, nun había, y que suerte pa ellos.
Anguañu asistimos al conflictu permanente ente nacionalistes, que dende l'anonimatu y con una conexión a la rede nun aparen d'engochar a otres formaciones polítiques, que consideren rivales cuando deberíen ser compañeres. Nun se dan interacciones dialectices, naide trata de convencer a naide nin pon argumentos enriba la mesa. Nada d'eso hai. Namái hai bilordios y miseries qu'asoleyar, miseries que solo ven nel güeyu ayenu, pero que nun son capaces de ver nel de so. Nun hai un mínimu de respetu y tolerancia ente patriotes, y como se repite, caun emporca a l'otru, pero naide trata de convencer a naide, nin s'amuesa un mínimu de voluntá n'ello. Caun, naide ta escluyíu, y si lo tuviere tendría un problema, tendrá los sos posicionamientos, pero una cosa ta nidia: el cainismu sigue medrando, Asturies sigue perdiendo, y los contautos ente la izquierda nacionalista solo son por cuatro foros d'internet. Muncha xente fala de que ye la policía dende comisaría, pero nun siendo sinceros naide nun cree neso, polo menos nes más de les vegaes. ¿ Somos toxs unos fios de puta o simplemente nun tenemos cultural política pa facer argumentos serios, coherente y dende'l respetu ?¿ Hasta cuando ?
Mui bon artículu y mui oportunu
ResponderEliminarla culpa ye del otru!!!
ResponderEliminar"Frayando cadenes", hai una cosa na que nun tienes razón, o meyor dicho, tiénesla solo nuna parte. Ye verdá lo de la utilización perversa o desvirtuada de los foros de la rede, tamién ye cierto lo del anonimatu y los insultos y faltosaes, pero dígote con plenu conocimientu de causa qu'hai, hubimos, persones que plantegamos toda triba de problemes, dixuntives, discutinios d'estratexa, d'oxetivos, bocexos de soluciones o de llinies de trabayu, incluso con gran esfuerciu personal, sacando tiempu d'onde nun lu había, intentando clarificar y construyir, too ello nel interior de les organizaciones, coses que como comprenderás non siempre trescalen pa fuera. Agora bien, tamién puéu dicite que'n bona midía foi tiempu perdíu, quedando solo un sentimientu de frustración.
ResponderEliminarY la razón de lo que munchos consideramos un fracasu personal apúntesla tu nuna de les preguntes finales. Non, nun tenemos cultura política, más bien formación, con toles salvedaes que se quiera. De nada sirve falar bien, tranquila y ordenadamente, argumentando d'un xeitu coherente, cuando ye como falar pa una muria: nun hai interllocutores. Podría cuntate milenta anéudotes d'éses que nun sabes si rir o llorar, pero nun quiero entrar no que tu llames bilordios. Y eso ye cuando a quien sabe una migaya nun-y interesa que la xente avance, porque prefieren militantes obedientes, poco formaos y que se conformen con idegues básiques. Eso cuando esiste xente que sabe daqué, porque munches vegaes puedes atopar delles persones que tán como teyes políticamente falando, pero ocupando puestos de responsabilidá pa los qu'oxetivamente nun tán capacitaos. ¿Quién forma a los formadores, quién educa a los educadores? Por eso mesmo la xera d'ellaborar discursu nun avanza, delles veces por falta de voluntá y otres por falta de capacidá, cuando non poles dos coses al tiempu. Al final asúmese eso que dicen los yanquis, "toles opiniones son válides", y non, sintiéndolo muncho nun ye asina, toles opiniones nun son igual de válides. ¿Cómo va tener el mesmu pesu xente con una trayectoria detrás de munchos años que'l d'un o una que va nada qu'entamó a militar? ¿Cómo va ser igual de válida la opinión de quien trabayó con intensidá y compromisu que la de daquién que solo paga una cuota y nun apaez cuasi que pa nada? ¿Cómo puede tener el pesu que tien daquién que fala perbién pero a la hora de trabayar siempre atopa escuses pa eludir la xera? Pues eso esiste, compañeru, y nun imaxines hasta qué puntu.