El movimientu nacionaliegu asturianu siempres se carauterizó por caltener una llinia d'izquierda nidia y marcadamente independentista con percuntaes esceiciones (qu'incluso pueden cuntase como esternes al movimientu con esperiencies murnies como PAS). El camín que caltuvo Andecha Astur, heriede de CNA y d'ENA, siempres foi (y paez ser que sigui siendo) lleal a la llinia tradicionalmente marcada pola tendencia del, yá denomáu, "nacionalismu asturianu revolucionariu". D'ehí res que dicir.
Ensin embargu paez que les polítiques reformistes, alministracionistes y burocrátiques que proponen el Bloque por Asturies y los sumisos y oportunistes cabezaleros d'Unidá Nacionalista Asturiana tán perlloñe d'asitiase na llinia socialista que decíen defender cuando munchos d'ellos coincidieron en BIA, momentu nel que la xente d'IAS y PCPE decidió dar el costazu al seutor d'Izquierda Nacionaliega d'Asturies (presentáu como ún de los más firmes defensores de la llinia enantes nomada) que fundó l'enxendru asturianista y pro-IU del BpA.
Ensin embargu IAS colos años acabó algamando'l puestu que deseaba; quita-y el puestu a Andecha como partíu bandera del nacionalismu asturianu d'izquierda.
Fundose UNA como una plataforma que se presentaba mui interesante nos medios asturianistes, como la gran y esperada coalición de tola izquierda independentista, pero nun foi asina. UNA nin fai por meter a AA en sitiu dengún nin quier caltener la llinia obrera, socialista y de base del nuesu nacionalismu, la llinia na que ye más importante sofitar a los trabayadores y facer presencia nacional na cai que tener puestinos n'alministración. En términos xenerales, la nuesa llinia, la del pueblu.
Esti añu el nacionalismu d'izquierdes va presentase na candidatura popular Conceyu Abiertu, un proyeutu cercanu a les CUP catalanes y mui ilusionante no que cinca a política llocal y nacional, fuera de llinies pactistes y burocrátiques (que suponemos y esperamos que non tolos militantes de la "Gran" coalición sofiten, faigan crítica y autocrítica y tornen al cauce obreru de la lliberación nacional).
Por eso ye que, ¿a qué preciu tamos pagando la "xuntanza"? ¿Merez la pena traicionar les nueses idees a costa d'un puñadín de votos? Esperemos que la xente nacionaliego opine que non.
Del blogue: Andecha obrera.
Madre de dios... nun m'estraña que nun haya una Xuntanza total. Lo qu'hai que lleer.
ResponderEliminarMira ver si envede frayar cadenes primero frayes la to cagalera mental.
ResponderEliminarVamos ver:
ResponderEliminar1- "UNA nin fai por meter a AA en sitiu dengún nin"
Nun ye qu'UNA nun faiga por meter a AA en ningún sitiu, ye qu'AA yá ta n'UNA. O dicho d'otru mou, militantes y xente de la executiva yá tán n'UNA. Los qu'agora usen les sigles d'AA, ye otra parte de los militantes (menor númberu) que, como vemos, tienen que cambiar les sigles porque nun tienen razón a la hora d'usar les sigles. Da-y toles vueltes que quieras, pero la prueba de que nun tienen razón ye que cambien de "nome".
2- "(UNA) nun quier caltener la llinia obrera, socialista y de base del nuesu nacionalismu, la llinia na que ye más importante sofitar a los trabayadores y facer presencia nacional na cai que tener puestinos n'alministración".
Nun sé en qué documentu d'UNA lleisti eso, has de contámelo. Si pa ti, caltener la llinia obrera, socialista y de base ye dir con sudadera a los mítines, presentar debuxos animaos como cartel electoral y coses d'esi calter, pues tamos guapos. Lo que fai falta ye un nacionalismu d'izquierdes seriu, non cuatro guah.ucos con pintes de grafiteros.
3- "Esti añu el nacionalismu d'izquierdes va presentase na candidatura popular Conceyu Abiertu, un proyeutu cercanu a les CUP catalanes y mui ilusionante no que cinca a política llocal y nacional".
Esi ye otru problema d'esi nacinalismu que fales (una parte, porque ye gracioso que pa ti namás AA ye'l verdaderu nacionalismu d'izquierdes). Ye triste que n'Asturies teamos mirando continuamente pa catalanes o vascos, como si la idiosincrasia fuera la mesma, como si lo que val p'allá, valiere p'aquí. Asina mos va.
4- "Merez la pena traicionar les nueses idees a costa d'un puñadín de votos".
Esto ye lo más gracioso. Suéname al "votu útil" del PSOE. Yo, ni los que sofitamos la gran xuntanza, tamos fartos de que'l nacionalismu asturianu nun pinte un res. Siguir cola mesma estratexa llévanos a lo mesmo depués de 30 años, ye dicir, nun pintar un res. Y lo peor ye que vosotros nun sabéis facer campaña poles vuestres idees, sinón criticando a los demás.
Como diz un anónimu, lo qu'hai que lleer.
Los talibanes recueyen lo que lleven años semando y cuchando. Lo triste ye que siempres garren a dalgunos mozucos despitaos qu'ente que se dan cuenta y non de con quien s'axuntaron fain coses como articulos tan llamentables como esti.
ResponderEliminar"Frayando cadenes" igual nun emplega'l mesmu llinguaxe o forma d'argumentar qu'usaríamos otros, aparte de tar enquivocáu en dellos datos, pero lo que diz nun ye cagalera mental denguna. Si "Frayando cadenes" se considera un revolucionariu y fala con términos y conceutos propios de los revolucionarios, y quien lu siente o lu llee coincide más o menos coles sos idegues, lo que diz sedrá visto con normalidá. Poro, si los escuchantes o lleutores son muncho más moderaos (apetézme dicir socialdemócrates, que ye lo que son bona parte de, ensin dir más lloñe, la UNA, pero nun voi mangar etiquetes a unos lleutores anónimos que nun espliciten más idegues propies que'l refugu a la entrada del filu), entós ye normal que les palabres y los conceutos de "Frayando cadenes"-yos dea perceguera. Pal primeru, esclariá-y que nes bases constituyentes del BIA dicíase qu'habia que construyir un espaciu más reducíu, más ideoloxizáu, socialista, d'izquierdes, etc, que diba ser IAS, pero al tiempu otru espaciu más anchu nel que les coincidencies nun tendríen que ser ideolóxiques sinon d'oxetivos concretos como la defensa de los puestos de trabayu, el mediu ambiente, la oficialidá del asturianu, el máximu autogobiernu, etc. Nesi espaciu más anchu habríen convivir, cito, "dende la esquierda revolucionaria a la socialdemocracia coherente". Y esi espaciu mayor que la propia IAS yera'l BIA. Había una serie de puntos mínimos que dicíen asumir los tres partíos (IAS, INA, PCPE) más cualisquier independiente de los que pudieren entrar. Pero too eso foi nel papel, porque na práutica nun fuera asina. El PCPE interpretó'l BIA como'l so frente de mases, un llugar onde facer el trabayu partidariu propiu, de xeitu asemeyáu a como podría facelo nun sindicatu o una asociación de vecinos. Los nacionalistes yeren los otros dos, pero'l PCPE enxamás dixo ser nacionalista. Eso sí, el PCPE yera un partíu seriu, mentes que los otros yeren sendes pandes, en dellos casos talamente paecía que de mataos. Asina que bien ceo'l PCPE hexemonizó al BIA, o polo menos desbordó a los otros dos. INA llegó a emplazalos, con fecha, a camudar el nome. El PCPE ñegóse, llegó la fecha y... nun pasó nada. Los de la INA echaron per delantre a los d'IAS pa llevar les hosties, hasta qu'éstos fartucaron y dexaron el BIA. Al quedar solos PCPE y INA, éstos entamaron a averase a IU, y claro, per ehí los del PCPE nun pasaben. Desixeron y consiguieron la disolución del BIA. Y como INA taba ensin perspeutiva camudó la política d'alliances. Pautó con IU y llegalizó la sigla Bloque por Asturies, pa ver si della parte del eleutoráu lu confundía col propiu BIA, lo qu'hasta ciertu puntu consiguieron, perguapu favor a IU. O seya, que'l plantegamientu teóricu orixinal d'IAS amosó ser un fracasu. Lo de la UNA vieno a ser una reedición de lo mesmo. Aparentemente había más sintonía ente la parte d'Andecha qu'entró na UNA y la propia IAS, pero tampoco furruló. Ente la desapaición del BIA y la criación de la UNA, IAS foi consecuente con esi plantegamientu de recoyer a cuanta más xente meyor, de tóu pelaxe. Pero non yá nel espaciu anchu, sinon na propia IAS. Y ehí foi el segundu fracasu: perdes pela drecha (Piloña) y pela izquierda (MIAS). Apaez la UNA y vuelta la burra al práu: el seutor más claramente nacionalista y más claramente d'izquierdes nun tuvo sitiu, entamaron les marches de la xente proviniente d'Andecha y práuticamente solo queden los de Carreño: tercer fracasu.
ResponderEliminarEso sí, si embaxo dalgún prisma puede vese un ésitu, ye'n qu'esi espaciu ampliu va medrando, pero con una composición cada vuelta más homoxénea y con menos pluralismu, y esa composición más homoxénea con un tinte mui moderáu. Por ello'l pesu dáu al trabayu institucional y tan pequeñu nos movimientos sociales. Cuando l'últimu conceyu nacional de la UNA, entrugaron en LNE a Faustino Zapico cuántos militantes tinía'l partíu, y ésti respondió que 200. Va poco hubo una manifestación contra la crisis en Xixón, con un baberu conxuntu del Bloque y la UNA. Mires les semeyes y da grima: ente 15-30 persones, y eso con un supuestu cortexu conxuntu y teniendo en cuntia que'n Xixón ye posiblemente onde la UNA tien más xente. Andecha Astur nun trabayaría tolos temes que tinía que trabayar, nos que trabayara cometería milenta errores, pero taba ehí, tocando los coyones al poder, metiendo denuncies y otres actividaes. Agora hai quien diz con satisfación qu'Andecha yá nun ocupa'l llugar central del nacionalismu asturianu d'izquierdes. Val qu'Andecha desapaeciera si ello valiera pa poner otra cosa meyor nel so llugar, pero... ¿ESTO...? ¿Esti espaciu qu'aspira a ser una especie de Chunta Aragonesista a l'asturiana? ¿A "tomar el poder" (ja!) pa camudar les coses dende riba? ¿Queriendo algamar esi poder con comunicaos de prensa? Oxalá que saquen bonos resultaos nes prósimes eleiciones, oxalá, polo menos valdrá pa remover les agües paraes de la política asturiana, que fieden qu'arrecienden, pero... muncho temo que los resultaos van ser llastimeros. Hai una crisis social y económica bien gorda ehí fuera, puede que la xente estalle, y nesi casu duldo muncho de qu'atopen al Bloque y la UNA armando revoluciones. Pa lo que queda d'Andecha, o Darréu, o como se vaiga llamar, si deprende de los errores cometíos y suelta llastre, ésa ye la oportunidá d'avanzar.
ResponderEliminarRecordai solo a la xente qu'esti artículu nun ye propiu d'esti blogue, sinon del Blogue "Andecha Obrera", anque en gran parte se puea soscribir tolo que tresmite esti artículu d'esi blogue.
ResponderEliminarPrimero, nun-y echar denguna culpa al compañeru redautor de Frayando Cadenes porque como diz abaxo nun ye de so, ye de mio.
ResponderEliminarSegundo, a min, como marxista ya INDEPENDENTISTA (pallabra de la que vos avergoñais toos caberamente) nun considero pa nada a una coalición de centroizquierda rexonalista como Partíu válidu pa representar los mios intereses y los de tolos trabayaores d'Asturies. Lo triste ye que la mayoría de nós fai años díbemos argullosos col pin d'Andecha na solapa la xaqueta pero solo unos cuantos siguimos con ella y con la ideoloxía qu'esti simbolizaba.
Tolos militantes falamos fasta fai bien poco del pueblu trabayaor asturianu y de la República Asturiana, socialista y soberana, pero agora lo que ye lo guapo ye centranos en ser un partíu del bable...
Y, n'efeutu que votar BpA-UNA ye facer votu util "nacionaliegu", porque como tienen representante y bla bla bla pues son los más grandes y Andecha nun ta nenyuri.
Respeutu a lo de CUP díxelo como exemplu porque yera l'únicu que se m'ocurría, pero, a parte, qué pasa? nun valen de exemplu? Los que me conocen saben que yo siempres critico comparanos con EH y PPCC, pero esti exemplu yera práuticu ya inocente.
¿Asina que queremos un nacionalismu d'izquierda seriu?. Vaya, vaya.
ResponderEliminarY pa dar exemplu d'esi "nacionalismu d'izquierda seriu" entamamos con una afirmación PERSERIA: "la xente d'Andecha Astur yá ta en UNA". Pero bono, ¿tú pensaste bien lo que tas diciendo?. ¿Eso ye seriedá?. ¿Tú camientes que la xente nun s'entera de lo qué pasó y lo que pasa anguañu en UNA? (por cierto, menos unidá hai cualisquier cosa).
Lluéu vien otru analís PERSERIU: la ropa que se pon la xente. Si ún se pon una sudadera pa dir a un actu políticu yá nun ye seriu. ¡Qué bien!, que lleición de seriedá nos analís. Debe ser muncho más serio dir de traxe y corbata y facer comunicaos de prensa onde se ve bien a les clares qu'esi comunicú faise por puru oportunismu y que nun se tien nin paxolera idega de qué va'l tema sobre'l que se ta escribiendo (sobrotou si se trata de temes llaborales). Por cierto, espero que renunciéis a los votos que vos den los y les chavales qu'usen sudadera.
Otra cosa PERSERIA ye eso de "la gran xuntanza" (xoder col de la seriedá, parez que ta falando de la madre de toles xuntances). ¿Qué pasa, tron?, tú tamién t'empixaste con eso d'entrar nel parllamentín asturianu ¿eh?. ¿A que yá vos tais viendo de corbatina, metanes na Xunta Xeneral, faciendo política PERSERIA ente Jesús Iglesias, Javier Fernández, Riopedre, Arestegui y Cascos?. ¡Ah!, eso sí, faciendo de diputadín enrolláu que fae "oposición" y va a les manifestaciones "guais". Pero, claro, nun se t'escurra llamalu pa dalguna movilización un pocu complicada porque, entós, nin te garra'l teléfonu (porque eso yá pasó). ¿Sabes lo que ye esa "gran xuntanza" de AA-PAs-URAs-UNA-BA?: viender les idegues, los principios y la ética a cambiu d'un platu fabes. Nin más nin menos.
Mira, collaciu/a, puedo aceutar estratexes polítiques que nun comparto, puedo discutir les llinies polítiques del nacionalismu d'izquierda con cualisquier presona, pero cuandu me dan argumentos comu la ropa que lleva la xente a los mítines y, pa enriba, pídenme seriedá, tienes de comprender que yo tamién pida seriedá.
Cuandu quieras (bien podríe ser neste mesmu foru) falamos seriamente de nacionalismu d'izquierda, d'independentismu y d'alternatives DE VERDÁ SERIES qu'empobinen al Pueblu asturianu y a la so gran mayoría, la clas obrera asturiana, a algamar un futuru estremáu del que mos tienen planificáu. Pero, mentantu, nun pidas "seriedá" cuandu lo único polo que naguais ye por meter a ún de los vuestros na mayor cueva de lladres qu'hai n'Asturies, que ye la Xunta Xeneral.
¡Ah! y pa la xente de Frayando Cadenes y d'Andecha Obrera: tranquis, collacios/es, hai muncha xente (y sé lo que digo) que vos entiende. Dexái que se peguen por "un puñáu de votos". Nun hai un res que facer con ellos. El díi 23 de mayu de 2011, entamamos a falar, pero esta vegada en serio de verdá.