1. En primer llugar, una noticia asina, entamar un PCPA confirma cierta deriva nel PCPE haza plantegamientos más centralistes y españolistes, entendiendo l'españolismu non d'una forma estremista pero si asimilatoria del Estáu Español como principal campu de xuegu y d'eso que llamen "pueblu español", inesistente dende la nuesa postura, como suxetu políticu cimeru. Munchos años dalgunos seutores reclamaron estes siegles pal agrupamientu del PCPE Asturies, lo qu'a la fin nun va dase nunca si apaez esta nueva formación. Amás, pue vese ciertu descontentu per parte dalgunos seutores comunistes d'Asturies col viraxe centraliegu'l PCPE, que vien d'un importante Congresu d'hai dos años. Paez ser qu'agora dalgunos ex-militantes, enviendo esa deriva intenten apostar pol soberanismu, dalgo que dende posiciones d'izquierda soberanista llevase munchos años reclamando al comunismu en dellos países del Estáu, incluyíu'l de nueso.
2. Esta noticia causa ente la xente que se mueve na cai, nos tayos y nes organizaciones revolucionaries, con independencia de postura política, abonda sorpresa, pues paez que ye una noticia non esperada y un movimientu mui arriesgáu y quiciabes precipitáu. Non pol fechu de que surda una corriente soberanista y comunista, sinon por qu'esa corriente manifiéstese en forma de partíu, colo qu'ello conlleva.
3. Con tol respetu del mundiu, toes y toos sabemos qu'Asturies ye un país perpiquiñu y equí conozse tol mundu. Causa sorpresa, induldablemente, que dalgunos seutores qu'enxamás apostaron pol soberanismu socialista agora quieran entamar un proyeutu d'esti cálter, y más amosando cierta llínia nesi sen ensín tan siquier cellebrar un Ier Congresu. Ye dicir, depués de munchos años de que dientru les organizaciones marxistes revolucionaries d'estructura estatal nun se cediera un res, nin un migayín, na cuestión nacional asturiana, agora atopámonos un proyeutu de clas y nidiamente asturianu, qu'abraza la cuestión nacional de sopitu. Amestar tamién que ye bien sabíu, que por suerte, na izquierda nacional asturiana hai militantes y simpatizantes comunistes, y polo que ye sabíu los que militen nun fixeron denguna fuga y camudaron d'organización y los que nun militen siguen asperando por un proyeutu meyor y mas razonatible y taúticu.
4. Un movimientu comunista de tipu asturianu y polo tanto, nacionalista, independentista o soberanista, como'l que dende esti espaciu na rede defendemos, abrazando les teoríes del socialismu científicu y revolucionariu qu'afitaron Marx, Engels, Lenin ya otros grandes del marxismu tien de tener en cuenta la realidá sociopolítica d'esta nación. Poro, ye menester entamar a ser conscientes de qu'Asturies parte d'una relación colonial de dominación social que yá vien de dellos sieglos y que n'Asturies hai organizaciones que yá asumen esi analis dende posiciones socialistes. Nun quier dicir esto que nun deba apaecer un coleutivu como esti que se quier construyir nomáu "PCPA", pero si que ye ciertu que la condición y rol de partíu políticu solo contribúi a una mayor atomización na izquierda asturiana y una mayor confusión y perda de xunidá.
5. Igual que tresmitimos esa cuarta idea, tamién camentamos que ye pernecesariu un coleutivu de tipu marxista-leninista nel soberanismu asturianu, patriota y revolucionariu, ensín atayos nin concesiones ideolóxiques. Ye necesariu esi coleutivu p'asoleyar les contradicciones de la izquierda española y atrayer a militantes comunistes a la causa nacional asturiana. Por eso, camentamos que la función anicial de la xente qu'integra'l PCPA o que quier facelo, sedría más bien entamar una dinámica de corriente interna dientru'l soberanismu y/o nacionalismu asturianu militando nes organizaciones patriotes, dende'l conceyu a la totalidá del país. Esi coleutivu, con militantes socialistes y soberanistes d'organizaciones como por exemplu Conceyu Abiertu, tendría un pesu clave dientru'l movimientu nacionaliegu a la hora d'analizar la realidá, implicar al nacionalismu nel movimientu obreru y favorecer la formación de tola militancia. Un exemplu de coleutivu qu'exerce de corriente interna marxista-leninista nel Estáu ye'l de Kimetz, n'Euskal Herria.
7. Respetamos la voluntá los/es compañeros/es del PCPA y deseamos-yos muncha suerte nel futuru independientemente'l resultáu del so primer congresu, pero camentamos que dende esti blogue y col enfotu d'aportar constructivamente dende'l respetu y la crítica fundamentada ye necesariu facer valoraciones énte acontecimientos d'esti tipu y espresar la nuesa postura, que ye la d'una parte del soberanismu revolucionario asturianu. Ñaturalmente nun asperamos que les persones q ue van integrar el PCPA mos faigan casu, pero ciertamente si qu'asperamos qu'esti artículu sirva-yos pa facer un analis más posáu de la realidá, tamién de la de so, p'asina saber lo que faen y si ye necesariu o non el so proyeutu.
8. La postura d'esti blogue ye nidia no ideolóxicu. Dende equí si creemos que'l día de mañana sedrá un partíu comunista, de tipu leninista, el qu'abandere y llidere la lliberación d'Asturies como nación y como clas trabayadora. Ye dicir, asumimos, que sedrá un gran partíu revolucionario'l que traiga pa esti país, xunto con otros seutores, la tan ansiada independencia y el tan necesariu socialismu, pero esto ye una batalla mui llarga y tien munches etapes, y por desgracia tenemos entá munches que llibrar pa qu'eso ocurra y teamos en condiciones d'entamar esi proyeutu de vanguardia. Pel momentu, ta asperando la tan necesaria Unidá Popular. ¡Trabayemos toes y toos por ella! ¡Pol socialismu y por una Asturies dixebrá!
Dicir que'l PCPE-Asturies "nun (se) cediera un res, nin un migayín, na cuestión nacional asturiana", ye falar a lo xole o pretender qu'esta organización adopte como propios los preseyos soberanistes. Dende finales de los 90 ya entamos del sieglu XXI, el PCPE-Asturies vien considerando Asturies como país, usando la llingua propia como llingua vehicular (más enants qu'agora) y tuve una conferencia del partíu esclusivamente pa falar de cuestión nacional y camudar de nome, precisamente por esi de PCPA.
ResponderEliminarPuen cuntase colos dedos d'una mano, y sobrarán, los militantes del PCPE-Asturies o meyor exmilitantes que pudieren tar d'alcuerdu con esta nueava organización.
Ver veremos que dixo'l ciegu d'Oyoniegu, pero a mi personalmente suéname a chancia.
Thanatos
En fin. Esti analís ye una muestra mas de lo floxo que ta la política y sobretoó la capacidá de calletrar na realidá d'Asturies. A un rapaz con muncha traza pal arte performance ocurrese-y esta brillante idea y hai xente qu'hasta la cree. La verdá que como esperimentu sociolóxicu nun ta nada mal y amuesa insisto lo mal qu'anda la izquiera real y nacional per estos llugares.
ResponderEliminarYo daría-y un conseyu a esti blogue y ye que nun fixere la risión analizando esta noticia, ta falando colos pantasmes d'una chancia mui bona.
Mas nada. Saludos revolucionarios.
Cualesquier apaición n'escena d'un coleutivu nel ámbetu asturianu y na izquierda d'esti país merez atención ¿Por qué non? Ye un coleutivu que se va presentar a la sociedá'l sábadu en Xixón, nun creo que s'adelantaren tanto a santos inocentes y que s'avere daquién y nun haiga naide, o tea un rapaz "con muncha traza pal arte performance". Yo tamién quiero tomámelo a chancia, val, por que les coses series ya importantes lleven tiempu y nun ñacen de la nada pero bono, ehí ta la noticia y equí ta un analis, con una opinión soberana pero qu'a lo menos ye reflexivu y nun ye tan burru como los que tamos avezaos a lleer na izquierda asturianista.
ResponderEliminarPor ciertu, l'analis nun se si sedrá floxu o non, pero'l segundu comentariu que fala de nivel políticu n'Asturies tampocu da exemplu. Analiza'l comentariu propiu collaciu/a, que tien nulu conteníu políticu ya ideolóxicu. Esi ye'l nuesu problema (ente otros munchos). Por ciertu, cuando tengamos otra siegla perhí rulando yá veremos que dicimos, qu'una siegla anguañu pue facer munchu dañu col usu d'interné.
Sobre'l primer comentariu, defendi'l calter de ciertu asturianismu nel PCPE-Asturies, a lo menos de respetu al país como talo. Nun seyamos cínicos, el PCPE-Asturies, inda más güei, ye un partíu xacobín y dependiente dafechamente de Mádrí, los seutores más asturianistes, por dicilo asina, tan o fuera'l partíu por "pequeño-burgueses" o na segunda llinia en movimientu pero ensín cuestionar lo que-yos vien dau dende Madrí. Y eso ye asina y puntu.
Soi'l segundu. Nun me presta perder el tiempu. El procesu d'afondamientu ideolóxicu, políticu, y de concencia tien que ser propiu.
ResponderEliminarNel segundu me paez que desconoces completamente la historia del PCPE-Asturies. D'esi Partíu a naide s'echó por posiciones asturianistes, si alguien comenta eso simplemente miente.
Nun sé si será xacobín, en tal casu ye un partíu que toma les decisiones siguiendo'l centralismo democráticu y la estratexa clásica leninista d'un Estáu un Partíu, yá sé que pa la mente nacionalista ye mui difícil d'entendelo pero tien poco que ver con esi mantra de: "dependiente dafechamente de Madrí", ningún de los sectores que dexaron o colaron, porque nun me consta qu'hubiere espulsiones, ta en contra d'esa concepción del Partíu.
En cuantes a ciertos plurales. Bueno, meyor nun los utilicemos sin rigor.
El comentariu dizlo toó. N'Asturies, en ciertos sectores, a la xente presta-y opinar y facer cábales, inventar la realidá porque la qu'hai ye mui dura, nun presta, nun s'afaya al interés. En llugar de calletrar nella pa tresformala, pues imaxinámosla. Algo que se pué albidrar hasta nel to comentariu.
Señor@s, la realidá ye la que ye, non la que nos prestaría. Esto ye una performance sin base ninguna. Ye precisamente un esperimentu qu'insisto demuestra que parte de la izquierda nacional y la real (si lo creen) anden a nisos.
Y la ideoloxía pequeno-burguesa ta mui espardía ciertamente.
Por esclariar una cosina, la xente que coló del PCPE-Asturies, pue dicise que yeren del "núcleu duru xacobín"(con eses comines y más inda si faen falta).
ResponderEliminarInsisto, cualesquier análisis de la política del PCPE-Asturies, dende postures nacionaliegues, por mui de clas que seyan les mesmes, ye feble, por nun usar palabres más fuertes.
Thanatos.
Habría mil factores perhí alrodiu'l fechu de que delles persones dexaren de militar nel PCPE, pero'l posicionamientu más centraliegu que'l Partíu adoptó daqué tien de ver, podeis dicir lo que vos pete, dexuru que sabeis muncho más si tais dientru d'esi partíu, pero bono, lo que se diz ye qu'una de les causes foi esa, y nun son bilordios de la rede o'l chigre, son cuestiones de les falen ex-militantes.
ResponderEliminarY si, Thanatos, dientru'l nacionalismu asturianu de clas hai mui poca xente bien formada eso yá lo sabemos collaciu, nun ye nenguna novedá. Dafechu la escasa formación ye lo que fai qu'haya y hubiere demientres tantos años tantos veletes nesi ghettu. Lo que pasa ye que los comunistes soberanistes tampocu creo que tean d'enfotase agora mesmu en crear un partíu de vanguardia, eso apúntalo bien esa reflexón-artículu d'esti blogue, ye una babayada, una irresponsabilidá y un erru pergrande.
Yo encamiéntote eso si que nun fales con esa soberbia: cualesquier análisis de la política del PCPE-Asturies, dende postures nacionaliegues, por mui de clas que seyan les mesmes, ye feble, por nun usar palabres más fuertes". A ver si agora'l PCPE va ser la solución final pa entamar la Revolución Socialista nesti país o nel Estáu... que'l cálter y la dinámita que ta garrando esi partíu ye pa faceselo mirar y nun fai falta nin llupa pa ello... seamos serios, coherentes y razonáos, por favor.
Saludos socialistes y antiespañolistes;)
Si, nun taba de mas ser serios y nun debatir de pantasmagoríes.
ResponderEliminarMira rapazu. Lo que comentes ye simple y llanamente mentira. Yo soi ex-militante del PCPE y de tolos que mientes, que conozo a la inmensa mayoría, ningún tien esa sensibilidá, y ningún dexó'l Partíu por que se volviere mas centralista. Ningún yera nin ye nacionalista.
Nin el Partíu adoptó ninguna posición mas centralista nin, insisto los militantes que lo dexaron lo fixeron por una concencia soberanista.
Insisto nel fechu de que sería positivo pa los nacionalistas ver la realidá tal cual ye y dexase d'idealismos de como nos prestaría que fuera.
Evidentemente el PCPE nun va ser n'esclusiva la vanguardia de la revolución social pero nun tengo ninguna dubia pola conocencia que tengo de los militantes d'esi partíu que si será ún de los destacamentos de vanguardia.
Los comunistes soberanistes o non soberanistes siempre tien qu'organizase pola propia concepción que'l marxismo-leninismo tien de la llucha revolucionaria. Tienen que mantener la independencia y nunca pónese a les órdenes d'elementos pequeno-burgueses, lo cual nun quita de collaborar con quien esa siempre insisto desde esa independencia.
Pensar lo contrario ye nun conocer los postulaos y la historia del movimientu comunista.
Y nun sé si llamalo babayada pero si enquivocación, idealismo y voluntarismo. Grandes males qu'abunden perequí.
Y pa finar. Falemos de rialidaes por favor.
Saludos revolucionarios.
Parez qu'hai más xente organizándose, nun sé si bono o malo dixebrar les fuercies, pero bono... Tomáu de Glayíu:
ResponderEliminarVien d'encadarmase a la fin el Partíu Comunista Asturianu (PCA), la vanguardia del suxetu hestóricu d'esta dómina, el Pueblu Trabayaor Asturianu (PTA).
El so primer Congresu cellebróse na clandestinidá nalgún llugar de les cuenques mineres el pasáu mes de marzu (2012), y ellí afitose la so cadarma organizativa asina como'l so programa, basáu nel marxismu-leninismu-pensamientu Belarmo Tomás.
Al Congresu asistieron destacaes representaciones internacionales, asina un miembru d'ETA Auténtica, otru del Colectivu Comunista d'Asturies de Santiyana (CCAS) o una moza del Exércitu Colloráu Xaponés. El debate y los aplausos allargáronse hasta altes hores de la Historia.
El PCA declarará nes prósimes xornaes l'amarraza popular espurría (APE) contra l'Estáu Español y toa triba de fuercia collaboracionista nel País Astur.
El PCA aprovecha pa mandar un saludu candial a otres fuercies hermanes na xera la lliberación, como'l Partíu Comunista del Pueblu Asturianu (PCPA) o les Brigaes Roxes de Campu Casu. D'otra manera, desixe la llibertá inmediata de los 40 comunistes asturianos secuestraos nes cárceles del Imperiu Español.
FASTA LA VICTORIA SIEMPRES
Secretaría de Comunicación del Comité Central del Partíu Comunista Asturianu (PCA)
Aportaron noticies al periodiquín "LES NOTICIES" qu'informen d'una escisión nel PCA ya'l PCPA, constituyéndose esta tardi'l PCA(r) ya'l PCPA(r), dambos tan afondando na unidá comunista, y entamaron conversaciones (clandestines claro) col Plataforma Comunista (r).
ResponderEliminar