La retirada del asturianu nos XIII Premios de la Crítica provoca la reaición d’escritores y coleutivos

L’Asociación d’Escritores d’Asturies retiró la categoría d’asturianu nos XIII Premios de la Crítica. Ello provocó la reaición d’escritores como Carlos Suari, que decidió devolver el gallardón que ganara nel 2009, y de dellos coleutivos.

La entrada del asturianu nestos premios fíxose nel añu 2002, cuando Roberto González-Quevedo llevó’l premiu a la meyor novela n’asturianu con ‘Pol sendeiro noite’. A partir d’esi momentu, tolos años hubo gallardones pa llibros escritos na llingua del país, hasta esta edición, na que la organización, al paecer por motivos económicos les poques candidatures que se presentaben, dexó fuera al asturianu. Esta situación provocó la reaición d’escritores y coleutivos de defensa del idioma, como la Xunta pola Defensa de la Llingua Asturiana (XDLA) y Iniciativa pol Asturianu. Asina, Carlos Suari, ganador del 2009 del premiu a la meyor poesía n’asturianu por ‘Orbayu d’alfileres’, decidió devolver el so premiu.

Nel so comunicáu, la XDLA aseguró que, con esta decisión, l’Asociación d’Escritores d’Asturies marxina a los lliteratos qu’utilicen el nuestru idioma como vehículu de creación” y pide la intervención de la Direición Xeneral de Política Llingüística –entidá que collabora colos Premios de la Critica– pa que “intermedie y solucione esti agraviu comparativu hacia los lliteratos qu’usen como ferramienta l’idioma del país”. D’igual forma, recuerda que nel 2011 espublizáronse n’Asturies más de cien obres n’asturianu y eloxa’l llabor de los escritores en llingua asturiana, a los que califica como “los meyores embaxadores de la nuesa cultura y lliteratura”.

Pela so parte, Iniciativa pol Asturianu califica la decisión de dexar fuera al asturianu d’estos gallardones de “una falta seria al idioma d’Asturies”. “Consideramos inalmisible tala decisión por ser un xestu dañible pa la llingua nuna situación tan drástica como na qu’anguaño s’atopa. Poro, pedimos a l’Asociación d’Escritores d’Asturies que rectifiquen esta decisión, calteniendo toles categoríes contemplaes nel pasáu, en pie d’igualdá colos escritores en castellanu”, apunten dende esti coleutivu, que tresmitió la so quexa a Mariano Arias Páramo, presidente de l’Asociación d’Escritores d’Asturies, y a la Conseyería de Cultura y Deporte.

Asturies.com