SUATEA esixe la execución inmediata de la sentencia qu’anula la ratio mínima pa cursar asturianu

La sentencia qu’anula la ratio mínima pa cursar Llingua Asturiana supón “un gran avance”, según SUATEA. El sindicatu del sector educativu esixe’l cumplimientu inmediatu del fallu del Supremu y critica'l llabor del Executivu anterior y del d'anguaño.

El Sindicatu Unitariu y Autónomu de Trabayadores de la Enseñanza d’Asturies (SUATEA) felicitóse por esta resolución xudicial que desanicia la norma qu’obligaba tener un mínimu d’ocho alumnos pa qu’un centru educativu de Secundaria dea Llingua Asturiana. “Ye una gran noticia pal avance firme na normalización llingüística del nuestru idioma, y un frenu a les actuaciones contraries al so desarrollu realizaes pol Gobiernu anterior y el d'anguaño", asegura. SUATEA critica al Gobiernu porque, "pese a qu'en declaraciones na prensa manifiéstase favoratible a l'aplicación de la Llei d'Usu, na práutica incúmplela dafechu. Asina, el sindicatu recuerda “cuando caltuvo'l recursu de casación que perdió con esta sentencia por llealtá institucional; cuando nun atendió la demanda de más de 30 alumnos y alumnes de les escueles de Bual y Grandas de Salime plantegada dende primeros de cursu y testonamente reivindicada por SUATEA énte Xefe de Personal Docente; cuando sólo s'escolariza nesta aréa al 12 por cientu del alumnáu d'Educación Infantil y se niega esti derechu a los pas, mas y centros educativos que lo solicitaren; cuando se caltién la optatividá d'elleición ente Llingua Asturiana y otres árees como segunda llingua estranxera, aniciu profesional, proyeutos…; y contra'l criteriu de voluntariedá recoyíu nel artículu 4 de l'Estatutu Autonomía d'Asturies y la mesma Llei d'Usu".

Por último, amuesa la so satisfaición porque la noticia recibióse "na fecha más afayadiza pa la so celebración, nel XXXIII Día de les Lletres Asturianes”. Amás, SUATEA confirmó que festexará la sentencia del Supremu participando na manifestación convocada pola Xunta pola Defensa de la Llingua Asturiana pa les 19.30 hores d’esti vienres na Estación del Norte d’Uviéu pa reivindicar “la oficialidá pal nuestru idioma".

Fonte: Asturies.com