Énte la elleición de Javier Fernández comu presidente’l “Principado”

Una autonomía de pandereta, unos partíos políticos incapaces y más de lo mesmo pa una Asturies que precisa más que nunca la soberanía

Los acabantes episodios nel “Principado” escenificaron el papel d’una autonomía impuesta que nun respuende a les necesidaes de los asturianos, y unos partíos políticos incapaces de ver acullá de los sos propios intereses, con una IU que de nueu representa’l papel de pigarda del PSOE.

El llamentable sainete que finó pol momentu cola elleición de Javier Fernández comu Presidente del “Principado” punxo de nueu n’evidencia la incapacidá dafechu de l’autonomía del “Principado” pa resolver eficazmente cualisquier triba de situación, gracies a lo que’l problema suscitáu pola falta de mayoríes perduró nel tiempu demientres más d’un añu, ensin que porcierto, se notare n’escesu, dau’l calter sucursal del mesmu, non en vano trátase d’una autonomía impuesta dende Madrid.

Nel mesmu sen, les amenaces d’intervención estatal nos presupuestos asturianos costituyeren por sigo mesmes la meyor demostración de que’l “Principado” nun ye más qu’una autonomía de pandereta, ensin la mínima capacidá de xestión. Asina mesmo, tol procesu pa formar una mayoría de gobiernu nel “Principado” punxo n’evidencia a unos partíos políticos incapaces de ver acullá de los sos propios porgüeyos, y supunxo la confirmación dafechu del papel d’IU comu auténtica pigarda del PSOE, al facilitar la elleición de Javier Fernández ensin denguna triba de condición, y ensin consultar previamente coles sos bases.

Comu resume, y dempués d’esti llamentable periplu, el Pueblu Asturianu continúa sometíu a una autonomía impuesta que ñega los nuesos más ellementales drechos colleutivos,quemos clatién inermes a la hora de defender los nuesos llexítimos intereses, y baxo un gobiernu nuevamente del PSOE, una auténtica garantía de continuidá del réxime mafiosu-clientelar que vien carenciendo Asturies baxo los estremaos gobiernos del PSOE, que llegó al so estremu con Álvarez Areces y cuya espresión más conocía ta siendo’l casu Riopedre, cuyes implicaciones polítiques entá darán muncho que falar.

A la fin, Andecha Astur reivindica de nueu la necesidá de cuntar con un sistema xurídicupolíticu propiu y unes istituciones soberanes que únicamente respuendan a les necesidaes ya intereses del nuesu Pueblu y que per ende dean rempuesta a los nuesos problemes en clave asturiana y non española.

Fonte: www.andecha.org